ស្ត្រីខ្លាំង Archives - Kampuchea Thmey Daily

៦ យ៉ាងដែលស្ត្រីជោគជ័យតែងធ្វើខុសគ្នាពីមនុស្សធម្មតា

សាង ស្រីល័ក្ខ — Tue, 09 Mar 2021 01:59:35 +0000

សហគ្រិនស្ត្រីវ័យក្មេង ៦ រូបក្នុងចំណោមបុគ្គលដ៏ជោគជ័យនានានៅអាមេរិក បានចែករំលែកនូវអ្វីដែលខុសប្លែកពីមនុស្សទូទាំងមានក្នុងចរិតលក្ខណៈស្ត្រីជោគជ័យ ៖

១. ប្រែក្លាយមនុស្សដែលគេប៉ាន់ស្មានមិនដល់ទៅជាកម្លាំងចិត្ត

ស្ត្រីជោគជ័យទាំងអស់ភាគច្រើន មានរឿងរ៉ាវរាប់មិនអស់ ដែលត្រូវបានគេនឹកស្មានមិនដល់។ នៅពេលដែលស្ត្រីបង្វែររឿងទាំងនោះទៅជាកម្លាំងចិត្ត ពួកគេនឹងទទួលបានជោគជ័យគ្រប់ពេល។

ដូច្នេះយើងក៏ត្រូវតែមានទំនុកចិត្តលើសមត្ថភាពរបស់ខ្លួនឯង ទោះបីរឿងនោះជារឿងដំបូងរបស់យើងក៏ដោយ។ ដាច់ខាតត្រូវឈរនៅក្នុងគោលបំណងដែលយើងប៉ង ហើយសម្រេចវាឲ្យបាន។

២. ជ្រើសរើសភាពរីកចម្រើនជាងភាពល្អឥតខ្ចោះ

ក្នុងនាមជាស្ត្រី យើងច្រើនតែមានសង្គមដើម្បីគិតថា គ្រប់រឿងទាំងអស់ចាំបាច់ស្អាតនិងល្អឥតខ្ចោះ។ ប៉ុន្តែភាពឥតខ្ចោះអាចបញ្ឈប់ការរីកចម្រើន និងចលនាតាមរបៀបដ៏សំខាន់មួយ។

ស្ត្រីជោគជ័យ តែងចាត់វិធានការយ៉ាងឆាប់រហ័សនៅកិច្ចការសំខាន់ណាមួយ ដើម្បីទទួលបានភាពរីកចម្រើន ជាងភាពល្អឥតខ្ចោះ។

៣. ក្លាហានស្នើសុំឲ្យគេទទួលស្គាល់ចំពោះសមិទ្ធផលខ្លួន

ការសិក្សាបានកត់ត្រាពីគម្លាតទំនុកចិត្តលើស្ត្រី ដែលជារឿយៗរារាំងពួកគេមិនឲ្យដាក់ពាក្យសុំការងារដែលពួកគេគ្មានលក្ខណៈគ្រប់គ្រាន់ ឬស្នើសុំដំឡើងប្រាក់ខែ។

ស្ត្រីជោគជ័យរកវិធីដើម្បីធ្វើឲ្យសមិទ្ធផលរបស់ពួកគេ ត្រូវបានគេស្គាល់ ហើយស្នើសុំឲ្យគេទទួលស្គាល់ចំពោះសមិទ្ធផលទាំងនោះ។

៤. ចាត់វិធានការទោះបីជាលទ្ធផលយ៉ាងណាក៏ដោយ

ជំនួសឲ្យការរង់ចាំឬមានអារម្មណ៍ជឿជាក់ ១០០% ចំពោះការសម្រេចចិត្ត ឬលទ្ធផលដែលចង់បាន ស្ត្រីដែលទទួលបានជោគជ័យតែងចាត់វិធានការជាមុន។ មានតែតាមរយៈការព្យាយាមនិងបរាជ័យប៉ុណ្ណោះ ដែលពួកគេអាចរៀនអ្វីដែលដំណើរការ ហើយគ្មាននរណាម្នាក់គិតថា វាមាននៅក្នុងជីវិតឬអាជីវកម្មនោះទេ។

ស្ត្រីជោគជ័យដឹងថា ដើម្បីធ្វើសកម្មភាព ទោះបីជាមានការភ័យខ្លាចនិងភាពមិនប្រាកដប្រជាក៏ដោយ ពួកគេតែងគិតថា តើពួកគេនឹងឈានទៅមុខយ៉ាងដូចម្ដេច។

៥. ពួកគេលើកទឹកចិត្តគ្នាទៅវិញទៅមក

ស្ត្រីដែលទទួលបានជោគជ័យ តែងជំរុញនិងលើកទឹកចិត្តអ្នកផ្សេងឲ្យក្លាយជាមនុស្សរឹងមាំងក្នុងអាជីវកម្មពួកគេ។ ការច្រណែននិងការធ្វេសប្រហែស គ្រាន់តែបង្វែរអារម្មណ៍ពួកគេពីការរស់នៅក្នុងជីវិតនិងអភិវឌ្ឍភាពពេញលេញ ធ្វើយ៉ាងម៉េចឲ្យជីវិតមានសុភមង្គលប៉ុណ្ណោះ។

ពួកគេមិនចាំបាច់ប្រឆាំងគ្នាដើម្បីយកឈ្នះរៀងៗខ្លួនឡើយ មានតែជួយគ្នាក្នុងវិស័យនេះទៅវិញទៅមក។

៦. ចែករំលែកគំនិតដោយសេរី

មានមនុស្សកាន់តែច្រើនសុំរៀនពីគ្នា ហើយស្ត្រីកំពុងដឹកនាំការប្រាស្រ័យទាក់ទងនេះ ដោយបើកចំហនៅកន្លែងសាធារណៈ ឬអង្គប្រជុំណាមួយ។

ស្ត្រីជោគជ័យក្លាហានមិនខ្លាចក្នុងការចែករំលែកភាពជោគជ័យរបស់ពួកគេ និងវិធីដែលពួកគេបានឈានជើងមកដល់ទីនោះទេ។ ដូច្នេះគ្រប់គ្នាអាចកសាងសង្គម និងរៀនពីគ្នាទៅវិញទៅមក៕

ប្រែសម្រួល៖ សាង ស្រីល័ក្ខ

ចុចអាន៖អាជីពមិនត្រូវការការិយាល័យ មានមិនខ្វះទេសម្រាប់អ្នកស្រលាញ់សេរីភាព

ចុចអាន៖ចៅហ្វាយរូបណាដែលនិយាយពាក្យទាំងនេះ មិនទាន់សក្ដិសមនឹងតួនាទីនៅឡើយ

The post ៦ យ៉ាងដែលស្ត្រីជោគជ័យតែងធ្វើខុសគ្នាពីមនុស្សធម្មតា appeared first on Kampuchea Thmey Daily.

តារាសម្តែងហូលីវូដពីររូបដែលក្លាយជាសហគ្រិនដ៏ជោគជ័យ

Sonya — Wed, 25 Nov 2020 10:24:00 +0000

ឧស្សាហកម្មហូលីវូដ (Hollywood) ជាពិភពខ្សែភាពយន្តល្បីល្បាញពាសពេញពិភពលោក និងបានបង្កើតតួសម្ដែងមានកេរ្តិ៍ឈ្មោះជាច្រើនរូប។ ក្នុងនោះមានតួសម្ដែងមិនច្រើនប៉ុន្មានឡើយ ដែលបានបំលែងអាជីពរបស់ខ្លួនឲ្យទៅជាអាជីវកម្មក្រោមការខិតខំប្រឹងប្រែង និងគំនិតច្នៃប្រតិដ្ឋ។

ទីនេះជាតារាសម្ដែងស្រីល្បី ២ រូបដែលបានប្រែក្លាយខ្លួនទៅជាសហគ្រិន៖

អ្នកស្រី Jessica Alba សហស្ថាបនិកក្រុមហ៊ុន The Honest Company

អ្នកស្រី Jessica Alba ចូលប្រឡូកក្នុងវិស័យសិល្បៈតាំងពីអាយុ ១៣ ឆ្នាំ មកម្លេះ។ លុះដល់អាយុ ១៩ ឆ្នាំ នាងលេចមុខជាតួឯកក្នុងពិភពហូលីវូដនិងទទួលបានពានរង្វាន់តារាឆ្នើម Golden Globe Awards ។

នៅឆ្នាំ ២០១១ អ្នកស្រីបានក្លាយប្រែខ្លួនពីសម្ដែង មកជាជាអ្នកជំនួញយ៉ាងជោគជ័យ ក្រោយពេលបង្កើតក្រុមហ៊ុន The Honest Company។ ក្រុមហ៊ុននេះផ្តោតទៅលើការបង្កើតផលិតផលដែលចម្រាញ់ចេញពីសេរីរាង្គធម្មជាតិសុទ្ធគ្មានជាតិពុលដែលមានប្រមាណជាង ១០០ មុខ។

គិតត្រឹមឆ្នាំ ២០២០ អ្នកស្រី Jessica Alba មានទ្រព្យសរុបប្រមាណជា ៣៤០ លានដុល្លារ។

អ្នកស្រី Melisa McCarthy ស្ថាបនិកក្រុមហ៊ុន Seven7

អ្នកស្រី Melisa McCarthy ជាតារាសម្ដែង តារាកំប្លែង អ្នកនិពន្ធ ផលិតករ និងជាអ្នកច្នៃម៉ូដ។ សិល្បការិនីអាមេរិកាំងរូបនេះក៏ធ្លាប់ទទួលបានពានរង្វាន់តារាស្រីឆ្នើម Golden Globe Awards ដល់ទៅ ២ ផងដែរ។

នៅក្នុងឆ្នាំ ២០១៥ អ្នកស្រីបានបង្កើតក្រុមហ៊ុនផ្ទាល់ខ្លួនដែលឲ្យឈ្មោះថា Seven7 ។ ក្រុមហ៊ុននេះចាប់ផ្តើមជាមួយនឹងគោលគំនិតដែលផ្តល់ជូនឲ្យអតិថិជននូវខោអាវគ្រប់វ័យ និងគ្រប់ទំហំ ដោយមានលក់ក្នុងហាង Macy និង Nordstrom។

គិតត្រឹមឆ្នាំ ២០២០ អ្នកស្រី Melisa McCarthy មានទ្រព្យសរុបប្រមាណជា ៨០ លានដុល្លារ៕

ប្រែសម្រួល ៖ សន្យា

ប្រភព ៖ Entrepreneur

ចុចអាន៖ មេរៀនជីវិត ៧ ចំណុចត្រូវរៀនពីតារាហូលីវូដតម្លៃខ្លួន ២០ លានដុល្លារអាមេរិក

The post តារាសម្តែងហូលីវូដពីររូបដែលក្លាយជាសហគ្រិនដ៏ជោគជ័យ appeared first on Kampuchea Thmey Daily.

រឿង ៥ យ៉ាងដែលសហគ្រិនគ្រប់រូបអាចរៀនពី Oprah Winfrey

សាង ស្រីល័ក្ខ — Wed, 25 Nov 2020 09:19:00 +0000

មិនត្រឹមជាអ្នកផលិតកម្មវិធីសម្រាប់ប្រព័ន្ធផ្សព្វផ្សាយយក្ខប៉ុណ្ណោះទេ អ្នកស្រី Oprah Winfrey ក៏ជាតារាល្បីបំផុតមួយផងដែរ។ ទ្រព្យសម្បត្តិសុទ្ធរបស់ Oprah ត្រូវបានប៉ាន់ប្រមាណថាមានចំនួន ២.៥ ប៊ីលានដុល្លារ ហើយឥទ្ធិពលរបស់នាងបានកើនឡើងយ៉ាងខ្លាំង ចាប់តាំងពីនាងបានកំណត់គំនិតនៅក្នុងទសវត្សរ៍ទី ៧០ ។

នេះគឺជារឿង ៥ យ៉ាង ដែលសហគ្រិនអាចរៀនសូត្រពី Oprah winfrey ៖

១. ដឹងថាខ្លួនឯងជានរណា

ត្រូវដឹងខ្លួនឯងជានរណា និងអ្វីដែលយើងកំពុងធ្វើនៅទីនេះ ឬអ្វីផ្សេងទៀតនឹងកើតឡើង ចំណង់ចំណូលចិត្តនាំឲ្យមានគោលបំណង។ សម្រាប់ Oprah វាមិនមែនអំពីការទទួលបានជោគជ័យឬមានកេរ្តិ៍ដំណែលនោះទេ តែជាការបំពេញនូវការបញ្ចេញមតិរបស់ខ្លួនឯងថាជាមនុស្សបែបណា។

តើយើងនឹងធ្វើអ្វី ប្រសិនបើយើងជាមនុស្សចុងក្រោយនៅលើផែនដី ហើយតើអ្វីទៅជាអំណោយតែមួយគត់របស់យើង ដែលមិនទាន់ត្រូវបានគេដឹង? តើយើងកំពុងរស់នៅក្នុងភាពពិតនាពេលនេះ ឬមានអ្វីដែលត្រូវការផ្លាស់ប្ដូរ? “ ចំណងចំណូលចិត្តគឺជាថាមពល “។

២. ជ្រើសរើសអ្វីដែលត្រឹមត្រូវ

នៅគ្រប់ស្ថានការណ៍រាល់ការសន្ទនានិងគ្រប់ផ្លូវបំបែក Oprah បានជ្រើសរើសយកភាពល្អប្រសើរ។ នាងជ្រើសរើសធ្វើអ្វីដែលត្រឹមត្រូវនៅពេលនេះ តែមិនមែនជាជម្រើសងាយឡើយ។ Oprah បាននិយាយថា“ ធ្វើបានល្អបំផុតនៅពេលនេះ ធ្វើឲ្យខ្លួនឯងស្ថិតក្នុងកន្លែងល្អសម្រាប់ពេលបន្ទាប់ទៀត” ។

៣. នៅពេលគ្មានការតស៊ូនោះកម្លាំងក៏គ្មាន

Oprah និយាយថា “បង្វែររបួសរបស់យើងទៅជាប្រាជ្ញា” ។ រៀនពីវិធីដើម្បីជម្នះភាពលំបាក ផ្លាស់ទីឧបសគ្គពីអតីតកាល និងលូតលាស់នៅក្នុងវិបត្តិ។ នាងបានបង្កើតកំណត់ត្រាថ្មីៗក៏ដូចជាក្លាយជាអ្នកជួយដល់អ្នកដទៃ ដោយការតស៊ូនិងបង្វែរបញ្ហា។

តើយើងមានអំណរគុណចំពោះការតស៊ូមួយណា? តើការប្រយុទ្ធមួយណាដែលបានបង្កើតយើងហើយតើសំណាងអាក្រក់ណា ដែលបានបង្រៀនយើងឲ្យខិតខំបន្ថែមទៀត?

ត្រូវចងចាំថាបើគ្មានការអនុវត្តទេ យើងមិនអាចបង្កើតសាច់ដុំបានទេ។ បើគ្មានហ្វឹកហាត់ខ្លាំងក្លាយើងមិនអាចឈ្នះការប្រកួតប្រដាល់បានទេ។ ប្រភពនៃកម្លាំងរបស់យើងគឺជាភ្នំដែលយើងបានប្រមូលផ្ដុំរួមគ្នា។

៤. ធ្វើខ្លួនមានតម្លៃដើម្បីនាំមកជាមួយភាពជោគជ័យ

អំណាចដ៏អស្ចារ្យកើតឡើងពីការទទួលខុសត្រូវ ហើយភាពជោគជ័យដ៏អស្ចារ្យគឺកើតឡើងពីការរិះគន់។ ការទទួលស្គាល់របស់ Oprah គឺថា “ មនុស្សមិនចូលចិត្តយើង” ទេ ពីព្រោះភាពជោគជ័យរបស់យើងឆ្លុះបញ្ចាំងពីពួកគេ នូវអ្វីដែលពួកគេមិនស្គាល់នៅក្នុងខ្លួន។ ធ្វើតាមក្ដីសុបិនរបស់យើង រួមទាំងកាលៈទេសៈអំណោយផល ដើម្បីឈ្នះ នាំមកនូវមិត្តភ័ក្ដិនិងអ្នកគាំទ្រ ព្រមទាំងសត្រូវនិងការច្រណែនមកដែរ។

៥. សេវាកម្មឲ្យគ្នាគឺស្មើភាពជោគជ័យ

នៅក្នុងសុន្ទរកថាចាប់ផ្ដើមឆ្នាំ ២០១៩ លោកស្រី Oprah បានដកស្រង់សម្ដីរបស់លោក Martin Luther King ថា“ មិនមែនមនុស្សគ្រប់គ្នាសុទ្ធតែអាចល្បីល្បាញនោះទេ ប៉ុន្តែគ្រប់គ្នាអាចមានភាពអស្ចារ្យពីព្រោះភាពអស្ចារ្យត្រូវបានកំណត់ដោយសេវាកម្ម” ។

Oprah ជឿជាក់ថា “ វិធីល្អបំផុតដើម្បីទទួលជោគជ័យ គឺស្វែងរកអ្វីដែលយើងចូលចិត្ត បន្ទាប់មករកវិធីដើម្បីផ្ដល់ជូនអ្នកដទៃតាមទម្រង់នៃសេវាកម្ម” ។

សេវាកម្មមានន័យថា សកម្មភាពនិងពាក្យរបស់យើង ស្វែងរកមនុស្សពិតប្រាកដនៅពេលពួកគេត្រូវការហើយស្ដាប់ពួកគេ៕

ប្រែសម្រួល៖ សាង ស្រីល័ក្ខ

ប្រភព៖ forbes

The post រឿង ៥ យ៉ាងដែលសហគ្រិនគ្រប់រូបអាចរៀនពី Oprah Winfrey appeared first on Kampuchea Thmey Daily.

CEO របស់ Huffington មានគន្លឹះគ្រប់គ្រងស្ត្រេសយ៉ាងល្អ

Sonya — Fri, 20 Nov 2020 07:10:00 +0000

អ្នកស្រី Arianna Stassinopoulos Huffington ជាអ្នកនិពន្ធជនជាតិក្រិកកាត់អាមេរិកាំង និងជាអ្នកជំនួញមួយរូប។ អ្នកស្រីជាសហស្ថាបនិកនៃកាសែត The Huffington Post ព្រមទាំងជាស្ថាបនិកនិងនាយកប្រតិបត្តិក្រុមហ៊ុនបច្ចេកវិទ្យាផ្សព្វផ្សាយ Thrive Global ។

ស្ត្រីឆ្នើមរូបនេះ ជាសហគ្រិន និងជាមេដឹកនាំដ៏មានឥទ្ធិពលមួយរូបដែលមានមនុស្សជាច្រើនកំពុងរៀនសូត្រពីជីវិតរបស់អ្នកស្រី។

ខាងក្រោមជាបទពិសោធន៍មួយចំនួនពាក់ព័ន្ធនឹងភាពស្មុគស្មាញក្នុងវិស័យជំនួញ ដែលអ្នកស្រីបានចែករំលែកដល់សហគ្រិនស្ត្រីដទៃ!

បែងចែកពេលវេលាឲ្យត្រឹមត្រូវ

អ្នកស្រី Huffington មានប្រសាសន៍ថា គុណភាពជីវិតផ្អែកលើការរក្សាតុល្យភាពពេលវេលាបានត្រឹមត្រូវ។ យើងគួរតែលះបង់ពេលវេលាដែលចាយលើបណ្តាញសង្គមខ្លះ ដោយចំណាយពេលវេលាទៅអភិវឌ្ឍន៍ជំនួញ ឬផ្នែកណាមួយដែលធ្វើឲ្យខ្លួនឯងរីកចម្រើន។

ប្ដូរទម្លាប់នៃការគេង

ស្ថាបនិករូបនេះប្រាប់ថា រឿងដំបូងដែលសំខាន់ យើងត្រូវប្រាកដថាបានដកទូរសព្ទដាក់ឆ្ងាយពីខ្លួន ហើយឆ្ងាយពីដៃ ដើម្បីកុំចេះតែចង់យកវាមកប្រើ។ ទម្លាប់បែបនេះនឹងធ្វើឲ្យ យើងឆាប់បានគេង និងក្រោកមកមានថាមពល។ មួយវិញទៀតអ្នកស្រីផ្ដល់យោបល់ថា ការធ្វើសមាធិក៏អាចជួយឲ្យគេងលក់បានស្កប់ស្កល់ផងដែរ។

គ្រប់គ្រងភាពតានតឹង

អ្នកស្រី Huffington ណែនាំអំពីការគ្រប់គ្រងភាពស្មុគស្មាញថា ត្រូវតែមានការថែទាំសុខភាពតាមរយៈការញ៉ាំអាហារល្អៗ ព្រមទាំងគេងគ្រប់គ្រាន់ជាមុនសិន ទើបអាចដោះស្រាយបញ្ហានានាជាក្រោយបាន។

នៅពេលយើងមានសុខភាពល្អ យើងអាចនឹងមានការគិតដ៏ល្អមួយដែលនាំឲ្យសម្រេចចិត្តបានល្អទៅតាមនោះ។ នាយិកាកាសែតរូបនេះបន្ថែមថា យើងគួរគេងឲ្យបានគ្រប់គ្រាន់ និងកាត់បន្ថយពេលវេលាក្នុងពិភពឌីជីថលខ្លះ។ រីឯការគេងមិនលក់បណ្តាលមកពីការធ្វើការច្រើនពេក និងភាពសកម្មជ្រុលលើបណ្តាញសង្គម។

ហ៊ានប្រឈមមុខនឹងភាពភ័យខ្លាច

គន្លឹះចុងក្រោយដើម្បីជម្នះភាពតានតឹងគឺ ហ៊ានប្រឈមមុខនឹងភាពភ័យខ្លាច។ អ្នកស្រីថា ការព្រួយបារម្ភពីភាពបរាជ័យ ឬភ័យខ្លាចមិនសម្រេចអ្វីមួយ មិនគួរឲ្យរអាទេ។ ផ្ទុយទៅវិញ នៅពេលលយើងហ៊ានទទួលយក វានឹងបង្ហាញពីសមត្ថភាពនិងភាពរឹងមាំរបស់យើងខ្លាំងប៉ុណ្ណា៕

ប្រែសម្រួល ៖ សន្យា

ប្រភព ៖ Entrepreneur

ចុចអាន៖ លេង FACEBOOK យ៉ាងណាកុំឲ្យសុខភាពផ្លូវចិត្តយុវវ័យរងការប៉ះពាល់?

The post CEO របស់ Huffington មានគន្លឹះគ្រប់គ្រងស្ត្រេសយ៉ាងល្អ appeared first on Kampuchea Thmey Daily.

មេរៀនសំខាន់ៗមុនបើកអាជីវកម្មខ្លួនឯងពីស្ថាបនិក jimmy choo

Sonya — Fri, 20 Nov 2020 05:27:00 +0000

អ្នកស្រី Tamara Mellon ជាសហស្ថាបនិកមួយរូបនៃក្រុមហ៊ុន Jimmy Choo ដែលជាក្រុមហ៊ុនជំនាញច្នៃម៉ូតស្បែកជើងកែង កាបូបដៃ គ្រឿងសម្អាងផ្សេងៗដ៏ល្បីឈ្មោះមួយនៅអង់គ្លេស។

អ្នកស្រី Mellon ចាប់ផ្តើមការងារដំបូងបង្អស់ជាអ្នកច្នៃម៉ូដលើគ្រឿងតុបតែងឲ្យក្រុមហ៊ុនគ្រឿងសម្អាង British Vogue។ ប៉ុន្តែក្រោយមក សហស្ថានិករូបនេះបានជួបអ្នកជួសជុលស្បែកជើងលោក Jimmy Choo ដែលពេលនោះ Jimmy Choo ជាបុគ្គលិកធ្វើការនៅក្នុងក្រុង London’s East End ។ ក្រោយបានជួប Jimmy Choo អ្នកស្រីបានណែនាំឲ្យលោកធ្វើប្រភេទស្បែកជើងសម្រាប់ថតម៉ូដលើគម្របទស្សនាវដ្តី។ បន្ទាប់ពីនោះមក ការច្នៃម៉ូដស្បែកជើងទទួលបានការគាំទ្រយ៉ាងខ្លាំង ដូច្នេះហើយទើបអ្នកទាំងពីរសម្រេចចិត្តបង្កើតរោងចក្រដោយខ្លួនឯងតែម្តង។

ក្រោយមកស្លាកយីហោ Jimmy Choo បានលេចរូបរាងឡើង។ អ្នកស្រី Mellon ធ្វើការជាអ្នកគ្រប់គ្រងទទួលបន្ទុកផ្នែកច្នៃម៉ូដនៅក្រុមហ៊ុន Jimmy Choo ចាប់តាំងពីឆ្នាំ ១៩៩៦ រហូតដល់ ២០១១ ។ អំឡុងពេលនោះអ្នកស្រីផ្តោតសំខាន់លើការផ្សព្វផ្សាយសក្តានុពលនៃម៉ាក Jimmy Choo ដើម្បីឲ្យទីផ្សាក្នុងស្រុកមានការទទួលស្គាល់ រហូតអាចពង្រីកហាងរបស់ខ្លួនបាន ១០០ នៅទូទាំងពិភពលោក។

ក្នុងឆ្នាំ ២០១៦ អ្នកស្រី Mellon ទទួលបានពានរង្វាន់ OBE (Order of the British Empire)។ អ្នកស្រីក៏ធ្លាប់ធ្វើជានាយិកាឲ្យក្រុមហ៊ុន Revlon ផងដែរ ហើយក្រោយមកអ្នកស្រីក៏ចាប់ផ្តើមបង្កើតនូវស្លាកយីហោស្បែកជើងថ្មីដោយដាក់ឈ្មោះខ្លួនឯងថា Tamara Mellon ។

នៅក្នុងបទសម្ភាសន៍មួយ ជាមួយអ្នកកាសែត អ្នកស្រី Tamara Mellon បាននិយាយយ៉ាងដូច្នេះថា “មនុស្សគ្រប់រូបសុទ្ធតែអាចស្វែងរកកម្លាំងចិត្ត និងឱកាសនៅគ្រប់ទីកន្លែង ឲ្យតែអ្នកទាំងនោះមានការតាំងចិត្តដើម្បីបន្តទៅមុខនិងមិនបោះបង់។” អ្នកស្រីបន្ថែមនិងផ្តល់យោបល់ថា “កុំឈប់ធ្វើការឲ្យសោះ ពីព្រោះមិនសំខាន់ថាអ្នកកំពុងធ្វើអ្វីទេ ការងារបង្កើតឱកាស ហើយឱកាសនេះហើយដែលនាំអ្នកទៅកន្លែងដែលអ្នកចង់ទៅ។ វាមិនសំខាន់ថា អាយុអ្នកប៉ុន្មាន ឬអ្នកចង់ធ្វើអ្វីទេ អ្វីដែលសំខាន់រឿងទាំងអស់នោះគឺអាស្រ័យលើឱកាសដែលអ្នកជួបអ្នកដទៃ។ ម្យ៉ាងវិញទៀត កុំស្តាប់ដំបូន្មានមួយចំនួនដែលគ្រាន់តែបង្អាក់ផ្លូវដើររបស់អ្នកឲ្យសោះ។” អ្នកស្រីបានលើកឧទាហរណ៍ចុងក្រោយថា “ចំពោះខ្ញុំផ្ទាល់ ពេលចាប់ផ្តើមដំបូង អ្នកណាក៏ប្រាប់កុំឲ្យបង្កើតក្រុមហ៊ុន Jimmy Choo ដែរ ប៉ុន្តែចុងក្រោយខ្ញុំបែរជាអរគុណខ្លួនឯងហើយដែលមិនស្តាប់ពាក្យសម្តីទាំងនោះ”៕

ប្រែសម្រួល៖ សន្យា

ប្រភព៖ Entrepreneur

The post មេរៀនសំខាន់ៗមុនបើកអាជីវកម្មខ្លួនឯងពីស្ថាបនិក jimmy choo appeared first on Kampuchea Thmey Daily.

ជំនាញ៤ យ៉ាងដែលស្ត្រីទាន់សម័យចាំបាច់ត្រូវមានក្នុងសម័យបច្ចេកវិទ្យា

សាង ស្រីល័ក្ខ — Wed, 18 Nov 2020 08:04:00 +0000

បច្ចេកវិទ្យាកំពុងក្លាយជាផ្នែកសំខាន់មួយ នៃជីវិតប្រចាំថ្ងៃរបស់យើង។ តាមពិតអាចនិយាយបានថាអនាគត គឺជាបច្ចេកវិទ្យា។

តើមានន័យយ៉ាងដូចម្ដេច សម្រាប់ស្ត្រីសម័យថ្មីនៅកន្លែងធ្វើការ នៅពេលអាជីវកម្មនិងឧស្សាហកម្មឆ្ពោះទៅរកបច្ចេកវិទ្យានាពេលអនាគត?

តើស្ត្រីត្រូវការជំនាញអ្វីខ្លះ ដើម្បីអភិវឌ្ឍន៍នៅកន្លែងធ្វើការនាពេលអនាគត?

១. សហការ

បច្ចេកវិទ្យានិងស្វ័យប្រវត្តិកម្មមានប្រសិទ្ធភាពក្នុងការប្រមូលផ្ដុំមុខងារការងារផ្សេងៗគ្នា ស្ត្រីត្រូវគិតថាតើព័ត៌មានវិទ្យា និងផ្នែកទីផ្សារធ្វើការជាមួយគ្នាយ៉ាងដូចម្ដេច ដើម្បីធ្វើយុទ្ធនាការទីផ្សារឌីជីថលនាពេលបច្ចុប្បន្ននេះ។

អ្វីដែលសំខាន់ដើម្បីពូកែក្នុងតួនាទីឆ្លងកាត់មុខងារនេះ គឺត្រូវមានសមត្ថភាពក្នុងការសហការគ្នា។
នេះមានន័យថា ធ្វើឲ្យប្រសិទ្ធភាពជាមួយក្រុម និងអ្នកពាក់ព័ន្ធផ្សេងៗគ្នាដែលជាបញ្ហាស្មុគស្មាញដោយការកើនឡើងនៃការងារពីចម្ងាយនាបច្ចុប្បន្ននេះ។

២. ឥទ្ធិពល

ស្ត្រីមានចំនួនមិនស្មើគ្នា ឬសំឡេងមិនឮខ្ទរខ្ទារដូចបុរសនៅក្នុងឧស្សាហកម្មបច្ចេកវិទ្យានៅឡើយ។ ដូច្នេះត្រូវធ្វើឱ្យសំឡេងរបស់យើងលឺនៅក្នុងកន្លែងធ្វើការ ដែលគ្រប់គ្រងដោយបុរស ហើយធ្វើឱ្យមានអារម្មណ៍ថា យើងធ្វើបាន ឬអាចចូលរួមការងារផ្សេងៗ ដើម្បីបញ្ចៀសបច្ចេកវិទ្យាពីភាពលំអៀងនិងឆ្ពោះទៅរកសមភាពពិតទាំងអស់គ្នា ។

ស្ត្រីត្រូវព្យាយាមស្នើសុំការទទួលខុសត្រូវកាន់តែច្រើន នៅកន្លែងធ្វើការ ដែលអាចផ្ដល់ឱ្យស្ត្រីនូវឱកាសបន្ថែមទៀត ក្នុងការចូលរួម និងធ្វើការជាមួយអ្នកដឹកនាំក្រុមផ្សេងទៀត។

៣. ការយល់ចិត្ត

អ្នកដឹកនាំតែងតែត្រូវការដើម្បីដឹកនាំការសន្ទនាត្រឡប់ទៅសេវាកម្មអតិថិជនវិញ។ ផ្ដោតលើសេវាកម្មអតិថិជន ផ្ដល់នូវគុណសម្បត្តិជាយុទ្ធសាស្ត្រដែលជួយឱ្យអាជីវកម្ម មានភាពខុសគ្នានៅក្នុងទីផ្សារ ដែលមានមនុស្សកាន់តែច្រើនឡើងៗ ។

លើសពីនេះក្រុមផ្ទៃក្នុងត្រូវការការគ្រប់គ្រងដែលយល់ចិត្ត និងគាំទ្រតម្រូវការរបស់ពួកគេ ដើម្បីឱ្យអាជីវកម្មរីកចម្រើន។

គន្លឹះដើម្បីសម្រេចបានទាំងពីរ គឺការយល់ចិត្ត។ ស្ត្រីត្រូវអនុវត្តការយល់ចិត្តនៅពេលណាដែលអាចធ្វើទៅបាន ដើម្បីបង្កើតការតភ្ជាប់ និងបញ្ឈប់ជម្លោះដែលអាចកើតមានមិនអាចស្មានដឹងមុន។

៤. ពូកែសម្របខ្លួន

ដូចដែលបានបង្ហាញ ថ្មីៗនេះជំងឺរាតត្បាតបានធ្វើឲ្យអាជីវកម្មដែលមានបំណងចង់ប្រកួតប្រជែងសម្របខ្លួន ឬវិវត្តជាញឹកញាប់ក្នុងល្បឿនដូចជារន្ទះ។

នេះមានន័យថា និយោជកនឹងពេញចិត្តដល់បេក្ខជនដែលបង្ហាញពីលក្ខណៈស្នូល នៃការបន្សាំខ្លួន ជាពិសេសនៅពេលពួកគេបំពេញតួនាទីស្នូល។

ជំនាញសម្របខ្លួនគឺជាសំណុំជំនាញដែលរួមបញ្ចូលសមត្ថភាពរបស់មនុស្សម្នាក់ ដើម្បីសម្រប ខ្លួនទៅនឹងការផ្លាស់ប្ដូរនៅក្នុងបរិយាកាសរបស់ពួកគេ។

ការចេះសម្របខ្លួនក្នុងអាជីព មានន័យថា យើងអាចឆ្លើយតបយ៉ាងរហ័សចំពោះការផ្លាស់ប្ដូរគំនិត និងការទទួលខុសត្រូវផ្សេងៗ៕

ប្រែសម្រួល ៖ សាង ស្រីល័ក្ខ

ចុចអាន៖ គន្លឹះរកស៊ីធ្វើជាអ្នកមានរបស់មនុស្សស្រី ដោយមិនចាំបាច់ពឹងបុរស

The post ជំនាញ៤ យ៉ាងដែលស្ត្រីទាន់សម័យចាំបាច់ត្រូវមានក្នុងសម័យបច្ចេកវិទ្យា appeared first on Kampuchea Thmey Daily.

៨ចំណុច ដែលសហគ្រិនស្ត្រីក្នុងតំបន់អាស៊ីគួរតែយល់ដឹង

សាង ស្រីល័ក្ខ — Mon, 16 Nov 2020 08:14:08 +0000

ស្ត្រីដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចប្រកបដោយភាពច្នៃប្រឌិត និងការពង្រីកអាជីវកម្មនៅអាស៊ីនិងប៉ាស៊ីហ្វិក។

នេះគឺជាឱកាសនិងបញ្ហាប្រឈមចំនួន ៨ ដែលសហគ្រិនជាស្ត្រីកំពុងប្រឈម នៅក្នុងតំបន់ដែលពួកគេរស់នៅ ៖

១. ស្ត្រីមានចំនួនច្រើនជាងពាក់កណ្ដាលនៃចំនួនប្រជាជននៅក្នុងទ្វីបអាស៊ី ហើយអង្គការសហប្រជាជាតិប៉ាន់ប្រមាណថា សេដ្ឋកិច្ចអាស៊ីប៉ាស៊ីហ្វិកនឹងទទួលបានប្រាក់ចំណូលបន្ថែមចំនួន ៨៩ ពាន់លានដុល្លារ ជារៀងរាល់ឆ្នាំ ប្រសិនបើស្ត្រីអាចទទួលបានសក្ដានុពលសេដ្ឋកិច្ចពេញលេញរបស់ពួកគេ។

២. សហគ្រិនស្ត្រីក៏ដូចជាបុរស ពួកគេចង់ចាប់ផ្ដើមអាជីវកម្ម ប្រសិនបើបរិយាកាសអាជីវកម្មទូទៅមានលក្ខណៈអំណោយផល។

៣. មានអាជីវកម្មខ្នាតតូចដែលជាកម្មសិទ្ធិរបស់ស្ត្រីជាផ្លូវការ នៅអាស៊ីបូព៌ាជិត ៦ លាន។ ហើយនៅក្នុងសេដ្ឋកិច្ចដូចជាឥណ្ឌូណេស៊ី ម៉ាឡេស៊ី ថៃ និងវៀតណាម អាជីវកម្មដែលគ្រប់គ្រងដោយស្ត្រីកំពុងកើនឡើង និងកើនឡើងក្នុងអត្រាមួយយ៉ាងលឿន។

៤. នៅសាធារណរដ្ឋប្រជាមានិតចិន ស្ត្រីតែងតែបង្ហាញអត្តសញ្ញាណប័ណ្ណរបស់ប្ដីខ្លួន ដើម្បីដាក់ពាក្យសុំឥណទាន។ ស្រដៀងគ្នានេះដែរ នៅក្នុងប្រទេសហ្វីលីពីន ស្ត្រីជាញឹកញាប់ត្រូវតែមានហត្ថលេខារបស់ប្ដីរបស់ពួកគេ លើឯកសារប្រាក់កម្ចី។

៥. ភស្តុតាងបង្ហាញថា ស្ត្រីមានទំនោរជាម្ចាស់កម្មសិទ្ធិដីធ្លីតិច ហើយដឹកនាំសហគ្រាសតូចៗ។ នៅឥណ្ឌូណេស៊ី ៨៥% នៃសហគ្រិនជាស្ត្រី ជាម្ចាស់អាជីវកម្មខ្នាតតូច ចំណែកការសិក្សានៅឡាវបានបង្ហាញថា ស្ត្រីជាម្ចាស់សហគ្រាសធុនតូចនិងមធ្យម ៦៣ % ប៉ុន្តែសហគ្រាសខ្នាតតូចនិងមធ្យម ជារបស់បុរសមានទំហំធំជាង។

៦. ការអប់រំខ្ពស់ផ្ដល់ជូនសហគ្រិនស្ត្រីនូវជំនាញ បណ្ដាញនិងធនធាន ដើម្បីធ្វើឲ្យអាជីវកម្មរបស់ពួកគេទទួលបានជោគជ័យ។ ទោះយ៉ាងណាក៏ដោយ នៅក្នុងសេដ្ឋកិច្ចដែលកំពុងអភិវឌ្ឍនិងកំពុងរីកចម្រើន មានភាគរយទាបនៃសហគ្រិនស្ត្រីដែលមានការអប់រំខ្ពស់។

៧. នៅឥណ្ឌូណេស៊ីក្មេងស្រីចំនួន ៤៨ ០០០ នាក់បានទទួលការបណ្ដុះបណ្ដាលបច្ចេកទេសនិងវិជ្ជាជីវៈផ្នែកវិទ្យាសាស្ត្រកុំព្យូទ័រ ធុរកិច្ចទេសចរណ៍និងបដិសណ្ឋារកិច្ច។ ទិន្នន័យពីសាលាគំរូចំនួន ៤០ បង្ហាញថា ក្នុងចំណោមនិស្សិតស្រីចំនួន ១០ ១៤២ នាក់ដែលបានបញ្ចប់ការសិក្សាក្នុងឆ្នាំ ២០១១ មាន ៤១% មានការងារធ្វើ និង ១២% បានចាប់ផ្ដើមអាជីវកម្មផ្ទាល់ខ្លួន។

៨. ប្រមាណ ៤២% នៃប្រាក់កម្ចីពីកំពូលស្ថាប័នមីក្រូហិរញ្ញវត្ថុចំនួន ១៤ ជាមូលនិធិធនាគារអភិវឌ្ឍន៍អាស៊ីនៅ Tajikistan ត្រូវបានផ្ដល់ដល់ស្ត្រីដែលចូលរួមក្នុងសកម្មភាពសហគ្រិន បង្កើនប្រាក់ចំណូលនិងពង្រីកប្រភពចំណូលរបស់ពួកគេ៕

ប្រែសម្រួល៖ សាង ស្រីល័ក្ខ

ប្រភព៖adb

The post ៨ចំណុច ដែលសហគ្រិនស្ត្រីក្នុងតំបន់អាស៊ីគួរតែយល់ដឹង appeared first on Kampuchea Thmey Daily.

សម័យរោគរាតត្បាតអាចជាឱកាសល្អសម្រាប់ផ្តើមអាជីវកម្មបែបច្នៃប្រឌិតថ្មី

សាង ស្រីល័ក្ខ — Sun, 15 Nov 2020 03:28:41 +0000

ច្បាស់ណាស់ឆ្នាំ ២០២០ មិនមែនជាឆ្នាំដែលយើងបានគ្រោងទុកទេ ហើយនៅចំណុចនេះហាក់ដូចជាយើងកំពុងទូកលើជិះរលកធំៗ ដែលមិនប្រាកដប្រជា។ ប៉ុន្តែហេតុអ្វីនេះបែរជាពេលវេលាដ៏អស្ចារ្យដើម្បីចាប់ផ្ដើមអាជីវកម្មថ្មីទៅវិញ?

គ្រប់គ្នាកំពុងចំណាយពេលច្រើននៅឯផ្ទះ

សម្រាប់គ្នាយើងភាគច្រើនក្នុងពេលនេះ គឺប្រាកដជាចំណាយពេលច្រើននៅផ្ទះ ហើយមានបញ្ហាប្រឈមផ្ទាល់ខ្លួនជាច្រើន (ចន្លោះតូច ធ្វើការជាមួយកូននៅផ្ទះ គ្មានកន្លែងដាក់តុ និងបញ្ជីការងារជាដើម ) ។ ប៉ុន្តែចុះយល់យ៉ាងណា ចំពោះភាពវិជ្ជមានដែលដើរចេញពីផ្ទះ?

ក្នុងពេលនេះគួរចេះប្រើវិបត្តិនេះជាគន្លឹះ ដើម្បីបង្កើតឱកាសនិងផ្នត់គំនិតដែលសមនឹងលំហូរធម្មជាតិ និងក្រមសីលធម៌ការងាររបស់យើង ជាងចំណាយពេលនៅផ្ទះមិនធ្វើអី។

មានកាលវិភាគថ្ងៃចុងសប្ដាហ៍ច្រើន

ស្រដៀងនឹងចំណុចខាងលើ វិធីមួយដើម្បីមើលចំណុចវិជ្ជមាននៃឆ្នាំ ២០២០ គឺត្រូវពិចារណាថាតើកាលវិភាគរបស់យើងទំនេរប៉ុន្មានថ្ងៃ។ នៅចុងសប្ដាហ៍គឺជាពេលវេលាដ៏ល្អ ដើម្បីប្ដេជ្ញាចិត្តរៀនពីអាជីវកម្មរបស់យើងនាពេលអនាគត។

ចុះឈ្មោះចូលរៀនវគ្គសិក្សា បង្កើតទម្លាប់អានសៀវភៅ ចូលរួមជាមួយក្រុមដែលមានការលើកទឹកចិត្តនិងគាំទ្រ ដើម្បីបានបន្តចំណង់ចំណូលចិត្តយើង ដោយចំណាយពេលនេះ ដើម្បីរៀន។ ហើយចាប់ផ្ដើមអាជីវកម្មដែលយើងបានគិតទុកអស់រយៈពេលជាច្រើនឆ្នាំផងដែរ។

មនុស្សប្រើប្រាស់ប្រព័ន្ធផ្សព្វផ្សាយសង្គមច្រើន

មនុស្សគ្រប់គ្នាមិនថាយើងឬគេ ក្នុងពេលនេះម្នាក់ៗប្រាកដជាចំណាយពេលវេលាច្រើននៅលើប្រព័ន្ធផ្សព្វផ្សាយសង្គម។ ប៉ុន្តែសួរថា ហេតុអ្វីយើងមិនព្រមឆ្លៀតពេលនេះភ្ជាប់វេទិការបស់យើងទៅពួកគេ។

យើងអាចធ្វើបានបើមានការតាំងចិត្តខ្ពស់នឹងកិច្ចការងារទាំងនោះ។ ប៉ុន្តែហេតុអីយើងមិនសាកល្បងប្រើប្រាស់ប្រព័ន្ធផ្សព្វផ្សាយសង្គមជាប្រយោជន៍នៃអាជីវកម្ម របស់យើង។

ក្នុងពេលនេះ គួរពិចារណាលើផ្នែកបន្ថែមនៃលើអាជីវកម្មដែលយើងត្រូវធ្វើឆាប់ៗនេះ ដែលជាផលចំណេញរបស់មនុស្សគ្រប់គ្នា។

មានឱកាសនៅក្នុងសង្គមថ្មី

អាជីវកម្មខ្នាតតូចទាំងអស់ ដែលបច្ចុប្បន្នកំពុងរីកចម្រើន(ងើបទៅមុខបន្តិចម្ដង) នៃអាជីវកម្មរបស់ពួកគេ ភាគច្រើនគឺឲ្យអតិថិជនពាក់ម៉ាសឬលាងដៃជាមួយអាកុលជាដើម។

ជាមួយនឹងរឿងធម្មតានេះ នឹងផ្ដល់ឱកាសឲ្យយើងគិតអំពីគំនិតដែលខ្លួនយើងកំពុងតែធ្វើ។ មនុស្សនៅផ្ទះមិនសូវមានទំនាក់ទំនងគ្នាប៉ុន្នានទេ ហើយមនុស្សគ្មានការងារធ្វើក៏មានការលំបាកដែរ។

បើសិនយើងបង្កើតអាជីវកម្មថ្មីនាពេលនេះ យើងមានឱកាសនៅក្នុងសង្គមថ្មី ហើយបានជួយនិងបង្រៀនដល់អ្នកដែលកំពុងត្រូវការការងារ ឬមួយអាចជួយមនុស្សលំបាកផ្សេងទៀត។

នេះគឺជាការលើកទឹកចិត្តមួយ ដែលគួរធ្វើនឹងចាប់ផ្ដើម ទោះអាជីវកម្មរបស់យើងតូចតាចក្ដី តែយើងក៏បានស្វែងយល់និងរៀនពីបទពិសោធន៍សង្គម នាបច្ចុប្បន្ននេះដែរ៕

ប្រែសម្រួល៖ សាង ស្រីល័ក្ខ

ប្រភព៖bossbabe

The post សម័យរោគរាតត្បាតអាចជាឱកាសល្អសម្រាប់ផ្តើមអាជីវកម្មបែបច្នៃប្រឌិតថ្មី appeared first on Kampuchea Thmey Daily.

ស្ត្រីខ្លាំង Archives - Kampuchea Thmey Daily

៦ យ៉ាង​ដែល​ស្ត្រី​ជោគជ័យ​តែង​ធ្វើ​ខុសគ្នា​ពី​មនុស្ស​ធម្មតា

តារា​សម្តែងហូលីវូដ​ពីររូប​ដែលក្លាយជា​សហគ្រិន​ដ៏​ជោគជ័យ​

រឿង ៥ យ៉ាង​ដែល​សហគ្រិន​គ្រប់រូប​អាច​រៀន​ពី Oprah Winfrey

CEO របស់ Huffington មាន​គន្លឹះ​គ្រប់​គ្រង​ស្ត្រេ​សយ៉ាងល្អ

មេរៀនសំខាន់ៗមុនបើកអាជីវកម្មខ្លួនឯងពីស្ថាបនិក jimmy choo

ជំនាញ​៤​ យ៉ាង​ដែល​ស្ត្រីទាន់សម័យ​ចាំបាច់​ត្រូវ​មាន​​ក្នុងសម័យបច្ចេកវិទ្យា​

៨ចំណុច​ ដែល​​សហគ្រិនស្ត្រី​ក្នុង​តំបន់អាស៊ី​គួរ​តែយល់​ដឹង

សម័យរោគរាតត្បាត​អាចជា​ឱកាស​ល្អសម្រាប់ផ្តើម​អាជីវកម្ម​បែប​ច្នៃប្រឌិតថ្មី

៦ យ៉ាងដែលស្ត្រីជោគជ័យតែងធ្វើខុសគ្នាពីមនុស្សធម្មតា

តារាសម្តែងហូលីវូដពីររូបដែលក្លាយជាសហគ្រិនដ៏ជោគជ័យ

រឿង ៥ យ៉ាងដែលសហគ្រិនគ្រប់រូបអាចរៀនពី Oprah Winfrey

CEO របស់ Huffington មានគន្លឹះគ្រប់គ្រងស្ត្រេសយ៉ាងល្អ

ជំនាញ៤ យ៉ាងដែលស្ត្រីទាន់សម័យចាំបាច់ត្រូវមានក្នុងសម័យបច្ចេកវិទ្យា

៨ចំណុច ដែលសហគ្រិនស្ត្រីក្នុងតំបន់អាស៊ីគួរតែយល់ដឹង

សម័យរោគរាតត្បាតអាចជាឱកាសល្អសម្រាប់ផ្តើមអាជីវកម្មបែបច្នៃប្រឌិតថ្មី