ស្នងការនគរបាលខេត្តកំពត សរសេរលើទំព័រហ្វេសប៊ុកផ្លូវការដូច្នេះ៖« ករណីឃាតកម្មនៅឃុំមានជ័យ ស្រុកឈូក កាលពីថ្ងៃទី 10.02.25 សមត្ថកិច្ចឃាត់ខ្លួនជនដៃដល់បានហើយ ករណីខាងលើនេះមិនមានជាករណីប្លន់នេះទេ ករណីនេះផ្តើមចេញពីរឿងស្នេហាត្រីកោណ »។

បើតាមទំព័រហ្វេសប៊ុកនាយកដ្ឋាននគរបាលព្រហ្មទណ្ឌ ឱ្យដឹងថា ករណីឃាតកម្មលើជនរងគ្រោះឈ្មោះ អឹម ទូច ភេទស្រី អាយុ៤៩ឆ្នាំ ជនជាតិខ្មែរ បានកើតឡើងកាលពីថ្ងៃទី១១ ខែកុម្ភៈ ឆ្នាំ២០២៥ វេលាម៉ោង១២និង១០នាទី នៅភូមិតាព្រុំ ឃុំមានជ័យ ស្រុកឈូក ខេត្តកំពត បង្កឡើងដោយជនមិនស្គាល់អត្តសញ្ញាណ។

ក្រោយពីមានហេតុការណ៍នេះឡើង ដោយអនុវត្តតាមបទបញ្ជាថ្នាក់ដឹកនាំ, កម្លាំងជំនាញរបស់នាយកដ្ឋាននគរបាលព្រហ្មទណ្ឌ សហការ ជាមួយស្នងការដ្ឋាននគរបាលខេត្តកំពត និងខេត្តតាកែវ បានស្រាវជ្រាវតាមនីតិវិធី និងជំនាញ រហូតកំណត់បានអត្តសញ្ញាណ និងទីតាំងលាក់ខ្លួនរបស់ជនសង្ស័យ។

នៅថ្ងៃទី១៣ ខែកុម្ភៈ ឆ្នាំ២០២៥ វេលាម៉ោង១៤និង៣០នាទី កម្លាំងជំនាញបានបន្តដឹកនាំសហការ ដោយបានធ្វើការឃាត់ខ្លួនជនសង្ស័យខាងលើមានឈ្មោះ ភុំ បុត្រ ភេទប្រុស អាយុ៤៥ឆ្នាំ ជនជាតិខ្មែរ ត្រង់ចំណុច ភូមិត្រពាំងខ្លូត ឃុំត្រាំកក់ ស្រុកត្រាំកក់ ខេត្តតាកែវ។

ជនសង្ស័យខាងលើបានសារភាពថា កាលពីថ្ងៃកើតហេតុខ្លួនបានទៅរួមរ័ក្សជាមួយជនរងគ្រោះ បន្ទាប់មកជនរងគ្រោះបានដឹងថា ខ្លួនមានប្រពន្ធ ទើបឈានដល់ការឈ្លោះប្រកែកគ្នា ហើយខ្លួនយកដំបងវាយទៅលើជនរងគ្រោះបណ្តាលស្លាប់ រួចខ្លួនប្រមូលយកទ្រព្យសម្បត្តិរបស់ជនរងគ្រោះរួមមាន៖ ទូរស័ព្ទដៃចំនួន២គ្រឿង, ក្រវិលមាស ទម្ងន់១ជី, ចិញ្ចៀនមាសទម្ងន់២ជី, ខ្សែដៃប្លាទីន១តម្លឹង និងខ្សែ ក ប្លាទីន ទម្ងន់៣ជីរត់គេចខ្លួន។

 បច្ចុប្បន្ន ជនសង្ស័យខាងលើ ត្រូវបាននាយកដ្ឋាននគរបាលព្រហ្មទណ្ឌ ប្រគល់ជូនស្នងការដ្ឋាននគរបាលខេត្តកំពត ជាម្ចាស់ករណី ដើម្បីកសាងសំណុំរឿងតាមនីតិវិធីបន្ត៕

ដោយ៖ ង៉ិល ណារ៉ាត់

The post ការផ្សាយថាចោរប្លន់សម្លាប់នៅខេត្តកំពត៖ស្នងការ ថាមិនមែនប្លន់សម្លាប់ឡើយ គឺជាករណីស្នេហាត្រីកោណ appeared first on Kampuchea Thmey Daily.

ដោយក្នុងស្ថានភាពស្រវឹងស្រា លោក ហេង សុខ លីដា បានបេីករថយន្តម៉ាក់ ហាយព្រីត ពណ៍ ស ពាក់ស្លាកលេខ ភ្នំពេញ 2AL-5312 មកដល់បន្ទប់នារីកំណាន់ទាំងយប់ នៅវេលាម៉ោង១០និង៣០នាទី បង្កឲ្យមានការភ្ញាក់ផ្អើលដល់​បងប្អូនប្រជាពលរដ្ឋអ្នកជិតខាង ដោយបានឈ្លោះប្រកែកគ្នាខ្លាំងៗ ឈានដល់ប្រេីអំពេីហិង្សាទៀត។ បន្ទប់ជួលនារី កំណាន់នោះ ជាបុគ្គលិកល្បែងអនឡាញ់ (មាន់ជល់) ឲ្យឈ្មោះ ហេង សុខលីដា នេះទៀត ស្ថិតនៅក្នុងភូមិ៦ សង្កាត់វាលវង់ ក្រុងកំពង់ចាម ភ្លាមៗនោះ ម្ចាស់បន្ទប់ជួលក៏បានទូរស័ព្ទប្ដឹងសមត្ថកិច្ចដើម្បីជួយអន្តរាគមន៍។

តាមប្រភពពីមិត្តភក្ដិជនរងគ្រោះបានប្រាប់ថា សង្ស័យជារឿងប្រច័ណ្ឌ ស្នេហាត្រីកោណ បានឈានដល់មានហេតុការណ៍នេះកេីតឡេីងទាំងកណ្តាលរាត្រី។ ក្រោយពីសមត្ថកិច្ចមូលដ្ឋានធ្វេីការសម្របសម្រួលមក ភាគីទាំងសងមានសភាពស្ងប់ស្ងាត់ រួចក៏បុរសរងគ្រោះដែលជាសន្តិសុខ ជិះម៉ូតូម្នាក់ឯងចេញពីបន្ទប់នារីជាសង្សាមកធ្វេីការវិញ ស្រាប់តែមកដល់ចំណុចផ្លូវជាតិលេខ៧ ត្រង់ចំណុចមុខហាងមីហិលផ្លូវថ្មី ក្នុងសង្កាត់វាលវង់ រថយន្តជនសង្ស័យ ដែលបេីកបរដោយឈ្មោះ ហេង សុខលីដា បានបេីកក្នុងល្បឿនលឿនបម្រុងបុកបុរសរងគ្រោះសម្លាប់ ប៉ុន្តែបុរសរងគ្រោះបានគេច​ដួលរងរបួសស្រាល ចំណែកឯជនបង្ករងរបួសស្រាល បេីកឡេីងជញ្ជេីមផ្លូវខូចគំរប់លូ និងរថយន្តរងការខូចខាតយ៉ាងធ្ងន់ធ្ងរ ។

បច្ចុប្បន្ន ជនរងគ្រោះ និងជនបង្កត្រូវកងកម្លាំងសមត្ថកិច្ចនៃអធិការនគរបាលក្រុងកំពង់ចាម ឃាត់ខ្លួនមកធ្វេីការសួនាំ ដោយឡែករថយន្តជនបង្កត្រូវសមត្ថកិច្ចស្ទួចយកទៅរក្សាទុកនៅអធិការដ្ឋាននគរបាលក្រុងកំពង់ចាម ដេីម្បីរងចាំដោះស្រាយតាមនិតីវិធីច្បាប់៕

អត្ថបទ៖ ឡេក ចាន់ពេជ្រ

The post សង្ស័យស្នេហាត្រីកោណ ប៉ូលិសខេត្តកំពង់ចាម​ម្នាក់ បេីករថយន្តដេញបុកបុរសម្នាក់ទៀត(មានវីដេអូ) appeared first on Kampuchea Thmey Daily.