ស្ពានឆ្លងទន្លេមេគង្គ ក្តីតាកុយ-អរិយក្សត្រ Archives - Kampuchea Thmey Daily

ស្ពានឆ្លងទន្លេធំៗចំនួន ៦ ស្ថិតក្នុងដំណាក់កាលសិក្សា និងឈានទៅបើកការដ្ឋានសាងសង់បន្តបន្ទាប់

Dy Bunnara — Tue, 03 Mar 2026 02:45:02 +0000

ស្ពានឆ្លងទន្លេចំនួន ៦ កំពុងស្ថិតនៅក្នុងដំណាក់កាលសិក្សា ដែលនឹងអាចឈានទៅបើកការដ្ឋានសាងសង់ជាបន្តបន្ទាប់នៅពេលខាងមុខ។

ស្ពានអរិយក្សត្រ

គម្រោងសាងសង់ស្ពានឆ្លងទន្លេទៅក្រុងអរិយក្សត្រ បានលេចឮព័ត៌មានជាយូរឆ្នាំមកហើយនិងបានក្លាយជាការទន្ទឹងរង់ចាំយ៉ាងអន្ទះអន្ទែងសម្រាប់ពលរដ្ឋរស់នៅក្រុងអរិយក្សត្រ។

ក្រោយសិក្សាជាច្រើនឆ្នាំ ប្រភពពីមន្រ្តីរដ្ឋាភិបាលបានអះអាងថា ស្ពានឆ្លងទៅអរិយក្សត្រគ្រោងនឹងឈានទៅបើកការដ្ឋានសាងសង់នៅឆ្នាំ ២០២៦។

គម្រោងសាងសង់ស្ពានឆ្លងទៅក្រុងអរិយក្សត្រ ទទួលបានប្រាក់កម្ចីពីរដ្ឋាភិបាលប្រទេសកូរ៉េ ក្នុងទំហំទឹកប្រាក់ប្រមាណជិត ៣០០ លានដុល្លារ។ តាមគម្រូប្លង់ស្ពានមិត្ដភាពកម្ពុជា-កូរ៉េ ត្រូវសាងសង់ចំនួន ២ ដោយទី១ តភ្ជាប់ពីខាងមុខផ្សាររាត្រីឆ្លងកាត់ទន្លេសាបទៅកាន់តំបន់ជ្រោយចង្វារ និងទី២ តភ្ជាប់ពីជ្រោយចង្វារឆ្លងកាត់ទន្លេមេគង្គទៅអរិយក្សត្រ។

ស្ពានក្តីតាកុយ

នៅក្នុងពិធីបើកការដ្ឋានសាងសង់ចំណតផែកុងតឺន័រទឹកជ្រៅជំហានទី ១ នៅកំពង់ផែស្វយ័តក្រុងព្រះសីហនុ កាលពីថ្ងៃទី២២ ខែធ្នូ ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើដល់រដ្ឋាភិបាលជប៉ុនពិនិត្យលទ្ធភាពជួយសាងសង់ស្ពានឆ្លងទន្លេមេគង្គពីក្តីតាកុយទៅតំបន់អរិយក្សត្រ។

តាមរយៈអនុរដ្ឋមន្ត្រីក្រសួងរៀបចំដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន អំឡុងធ្វើទស្សនកិច្ចនៅប្រទេសកម្ពុជា សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា ជប៉ុនគឺជាមិត្តដ៏សំខាន់ដែលបានចូលរួមចំណែកក្នុងការអភិវឌ្ឍប្រទេសកម្ពុជា ពីអតីតកាល បច្ចុប្បន្នកាល និងទៅអនាគត។

នៅក្នុងក្របខណ្ឌការអភិវឌ្ឍវិស័យសាធារណការ និងដឹកជញ្ជូន សម្តេចលើកសំណើដល់រដ្ឋាភិបាលជប៉ុនបន្តជួយគាំទ្រដល់ការអភិវឌ្ឍហេដ្ឋារចនាសម្ព័ន្ធ ផ្លូវស្ពានរបស់ប្រទេសកម្ពុជាដូចជាគម្រោងពង្រីក និងលើកកម្ពស់កម្រិតគុណភាពផ្លូវជាតិលេខ ១ ទៅដល់ស្ពានអ្នកលឿង និងស្ពានឆ្លងកាត់ទន្លេមេគង្គ ក្តីតាកុយទៅតំបន់អរិយក្សត្រ។

ស្ពានឆ្លងទន្លេពីកំពង់ឆ្នាំងទៅខេត្តកំពង់ធំ

ក្រុមហ៊ុនសាជីវកម្មស្ពាន-ថ្នល់ចិន (CRBC) បានចេញរបាយការណ៍សិក្សាសមិទ្ធិលទ្ធភាព គម្រោងសាងសង់ស្ពានឆ្លងកាត់ទន្លេសាបដែលមានប្រវែងជាង ៣ គីឡូម៉ែត្រ តភ្ជាប់ពីខេត្តកំពង់ឆ្នាំងទៅខេត្តកំពង់ធំ រួមទាំងផ្លូវតភ្ជាប់ដោយរង់ចាំការពិនិត្យសម្រេចការផ្តល់ឥណទានសម្បទានពីរដ្ឋាភិបាលចិន។

គម្រោងសាងសង់ស្ពាននិងផ្លូវតភ្ជាប់ពីខេត្តកំពង់ឆ្នាំង ទៅកាន់ខេត្តកំពង់ធំគ្រោងចំណាយថវិកាប្រមាណ ២៥០ លានដុល្លារ។

ការស្ថាបនាហេដ្ឋារចនាសម្ព័ន្ធដ៏សំខាន់នេះ ចែកចេញជាពីរផ្នែក ក្នុងនោះត្រូវសាងសង់ស្ពានឆ្លងកាត់ទន្លេសាប ប្រវែង ៣.២៤០ ម៉ែត្រ ទទឹង ១៣,៥ម៉ែត្រ និងផ្លូវ ៥០C ប្រវែងផ្លូវសរុប ៥៨,២០៨ គីឡូម៉ែត្រ ក្រាលកៅស៊ូបេតុង (AC) ទទឹង ១០ម៉ែត្រ លើទទឹងតួផ្លូវ ១១ម៉ែត្រ។

ស្ពានឆ្លងទន្លេរពៅ

កម្ពុជាមានផែនការសាងសង់ស្ពានទន្លេរពៅឆ្លងកាត់ព្រំដែនតភ្ជាប់រវាងខេត្តព្រះវិហារ និងខេត្តចម្ប៉ាសាក់ ដើម្បីជំរុញការធ្វើពាណិជ្ជកម្ម និងវិស័យទេសចរណ៍។

មន្រ្តីក្រសួងសាធារការបានបញ្ជាក់ថា ការសាងសង់ស្ពានឆ្លងកាត់ទន្លេឆ្លងកាត់ព្រំដែន នឹងក្លាយជាច្រកដ៏សំខាន់មួយទៀត ក្នុងការតភ្ជាប់ផ្លូវដឹកជញ្ជូន កាត់បន្ថយរយៈចម្ងាយធ្វើដំណើរពីខេត្តចម្ប៉ាសាក់របស់ប្រទេសឡាវមកកាន់ខេត្តព្រះវិហាររបស់ប្រតេសកម្ពុជា ព្រមទាំងពង្រឹងការអភិវឌ្ឍនៅតំបន់ព្រំដែន លើការជំរុញការធ្វើពាណិជ្ជកម្មទ្វេភាគី និងទេសចរណ៍។

ស្ពានឆ្លងទន្លេបាសាក់នៅក្រុងសំពៅពូន

ស្ពានឆ្លងកាត់ទន្លេបាសាក់នៅក្រុងសំពៅពូន ក៏កំពុងត្រូវបានសិក្សាដើម្បីតភ្ជាប់សង្កាត់ចំនួនពីរក្នុងក្រុងសំពៅពូនជាប់ព្រំដែនជាមួយប្រទេសវៀតណាម។

លោក អេង សុវិចិត្ត អភិបាលក្រុងសំពៅពូនបានបញ្ជាក់ថា គម្រោងសាងសង់ស្ពាននេះស្ថិតនៅក្នុងដំណាក់កាលសិក្សានៅឡើយ។

លោកថា សង្កាត់សំពៅពូននិងសង្កាត់ជ្រៃធំខណ្ឌចែកដោយទន្លេ ហើយការធ្វើដំណើរកន្លងទៅត្រូវប្រើទូកដចម្លង ឬត្រូវធ្វើដំណើរវាងតាមស្ពានកោះធំដែលមានចម្ងាយឆ្ងាយ។

ខណៈគម្រោងសាងសង់ស្ពាននេះស្ថិតនៅក្នុងដំណាក់កាលសិក្សា លោកអភិបាលក្រុងសំពៅពូនរំពឹងថា បើសិនស្ពាននេះត្រូវបានកសាងឡើង នឹងជួយសម្រួលដល់ការធ្វើដំណើរនិងការដឹកជញ្ជូន រួមទាំងផ្តល់ប្រយោជន៍ដល់ការអភិវឌ្ឍសេដ្ឋកិច្ចសម្រាប់ពលរដ្ឋក្នុងមូលដ្ឋាន ខណៈតំបន់នេះក៏ជាច្រកព្រំដែនដ៏សំខាន់សម្រាប់ការធ្វើពាណិជ្ជកម្មរវាងប្រទេសកម្ពុជានិងប្រទេសវៀតណាម។

ស្ពានកោះនរា អរិយក្សត្រ

កន្លងទៅថ្មីៗនេះ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំកិច្ចប្រជុំដើម្បីពិនិត្យ និងពិភាក្សាលើគម្រោងសិក្សា និងសាងសង់ស្ពានឆ្លងកាត់ទន្លេមេគង្គតភ្ជាប់ពីកោះនរា ទៅតំបន់អភិវឌ្ឍក្រុងរណបមេគង្គឃីនៃក្រុងអរិយក្សត្រ ខេត្តកណ្តាល។

ខណៈគម្រោងស្ពាននេះជាគម្រោងវិនិយោគដោយវិស័យឯកជន មិនមានការបញ្ជាក់ពីទំហំនៃការចំណាយ និងពេលវេលានឹងចាប់ផ្ដើមសាងសង់នៅពេលណានោះទេ។ អ្នកជំនាញសេដ្ឋកិច្ចមើលឃើញថា ការសាងសង់ស្ពាននេះក្រៅពីសម្រួលការធ្វើដំណើរ ក៏នឹងបើកឱកាសសម្រាប់ការអភិវឌ្ឍថ្មីៗបន្ថែមទៀតនៅពេលអនាគតនៅតំបន់នោះ៕

The post ស្ពានឆ្លងទន្លេធំៗចំនួន ៦ ស្ថិតក្នុងដំណាក់កាលសិក្សា និងឈានទៅបើកការដ្ឋានសាងសង់បន្តបន្ទាប់ appeared first on Kampuchea Thmey Daily.

មន្រ្តីកម្ពុជា-ជប៉ុន ប្រជុំពិភាក្សាគ្នាប្រមូលធាតុចូល គម្រោងសាងសង់ស្ពានថ្មីឆ្លងទន្លេមេគង្គ

Dy Bunnara — Fri, 31 Jan 2025 07:39:44 +0000

គម្រោងកែលម្អផ្លូវជាតិលេខ ១ និងគម្រោងសាងសង់ស្ពានថ្មីឆ្លងកាត់ទន្លេមេគង្គ ត្រូវបានលើកយកមកប្រជុំពិភាក្សាគ្នាកាលពីម្សិលមិញនេះ ដោយមានការចូលរួមពីមន្រ្តីក្រសួងសាធារណការនិងដឹកជញ្ជូន និងអ្នកជំនាញការជប៉ុនមកពីទីភា្នក់ងារសហប្រតិបត្តិការអន្តរជាតិនៃប្រទេសជប៉ុន (JICA)។

លោក តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន ដែលចូលរួមដឹកនាំកិច្ចប្រជុំបានគូសបញ្ជាក់ថា កិច្ចប្រជុំនេះរៀបចំឡើងក្នុងគោលបំណង ដើម្បីពិនិត្យនិងពិភាក្សាលើរបាយការណ៍សិក្សាប្រមូលធាតុចូល សម្រាប់គម្រោងកែលម្អផ្លូវជាតិលេខ ១ និងសាងសង់ស្ពានថ្មីឆ្លងកាត់ទន្លេមេគង្គ។

ជាលទ្ធផល អង្គប្រជុំបានវាយតម្លៃខ្ពស់ចំពោះលទ្ធផល និងកិច្ចសហការរបស់ទីភា្នក់ងារសហប្រតិបត្តិការអន្តរជាតិនៃប្រទេសជប៉ុន (JICA) ក្នុងការបញ្ជូនជំនាញការជាន់ខ្ពស់របស់ខ្លួន ដើម្បីពិនិត្យនិងរៀបចំផែនការគម្រោងកែលម្អផ្លូវជាតិលេខ ១ និងសាងសង់ស្ពានថ្មីឆ្លងកាត់ទន្លេមេគង្គរបស់កម្ពុជាប្រកបដោយការយកចិត្តទុកដាក់ខ្ពស់។

នៅក្នុងពិធីបើកការដ្ឋានសាងសង់ចំណតផែកុងតឺន័រទឹកជ្រៅជំហានទី ១ នៅកំពង់ផែស្វយ័តក្រុងព្រះសីហនុ កាលពីថ្ងៃទី២២ ខែធ្នូ ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានស្នើដល់រដ្ឋាភិបាលជប៉ុនពិនិត្យលទ្ធភាពជួយសាងសង់ស្ពានឆ្លងទន្លេមេគង្គពីក្តីតាកុយទៅអរិយក្សត្រ។

តាមរយៈអនុរដ្ឋមន្ត្រីក្រសួងរៀបចំដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ដែលធ្វើទស្សនកិច្ចនៅប្រទេសកម្ពុជា សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា ជប៉ុនគឺជាមិត្តដ៏សំខាន់ដែលបានចូលរួមចំណែកក្នុងការអភិវឌ្ឍប្រទេសកម្ពុជា ពីអតីតកាល បច្ចុប្បន្នកាល និងទៅអនាគត។

នៅក្នុងក្របខណ្ឌការអភិវឌ្ឍវិស័យសាធារណការ និងដឹកជញ្ជូន សម្តេចបានស្នើដល់រដ្ឋាភបាលជប៉ុនបន្តជួយគាំទ្រដល់ការអភិវឌ្ឍហេដ្ឋារចនាសម្ព័ន្ធ ផ្លូវស្ពានរបស់ប្រទេសកម្ពុជាដូចជាគម្រោងពង្រីក និងលើកកម្ពស់កម្រិតគុណភាពផ្លូវជាតិលេខ ១ ទៅដល់ស្ពានអ្នកលឿង និងស្ពានឆ្លងកាត់ទន្លេមេគង្គ ក្តីតាកុយ-ទៅអរិយក្សត្រ៕

The post មន្រ្តីកម្ពុជា-ជប៉ុន ប្រជុំពិភាក្សាគ្នាប្រមូលធាតុចូល គម្រោងសាងសង់ស្ពានថ្មីឆ្លងទន្លេមេគង្គ appeared first on Kampuchea Thmey Daily.