ស្រីអយ Archives - Kampuchea Thmey Daily

ជាថ្មីម្ដងទៀត! ម៉ា ដូណា ប្រកាសទារលុយអតីតតារាកំប្លែងស្រីម្នាក់ ជំពាក់ខ្ទង់ម៉ឺនដុល្លារ

អ៊ិន ពិសី — Wed, 05 Feb 2025 07:45:03 +0000

ជាថ្មីម្ដងទៀត ដោយអស់ការអត់ធ្មត់ តារាសម្ដែង និងកំប្លែង ម៉ា ដូណា បានប្រកាសយ៉ាងក្តៅគគុកទារលុយអតីតតារាកំប្លែងស្រីម្នាក់ ដែលជំពាក់បំណុលខ្លួនខ្ទង់រាប់ម៉ឺនដុល្លារ ជាយូរឆ្នាំមកហើយ មិនព្រមដោះស្រាយសងទាល់តែសោះ។

នៅថ្ងៃទី ៥ ខែកុម្ភៈ ឆ្នាំ ២០២៥ នេះ តាមរយៈបណ្ដាញសង្គមហ្វេសប៊ុកផ្ទាល់ខ្លួន តារាសម្ដែង និងកំប្លែង ម៉ា ដូណា បានលើកឡើងថា «ជម្រាបសួរដល់លោកជំទាវក្អយ និង ឧកញ៉ា ម៉ូ ដែលជាតារាកំប្លែងល្បី ១ រូប សូមជួយមកដោះស្រាយលុយខ្ញុំ ចំនួន ៤៥ ០០០ ដុល្លារ ផង ព្រោះតាំងពីខ្ញុំឆាតទៅ លែងឆ្លើយតប មិនមែនខ្ញុំភ្លេចទេ តែខ្ញុំហត់នឹងការកុហករបស់អ្នកទាំង ២ ណាស់ ជួយបាញ់លុយសងខ្ញុំផង អាចលុបឆាតបាន តែបញ្ជាក់ថា ខ្ញុំថតទុកអស់ហើយ»។

ពាក់ព័ន្ធរឿងបំណុលខ្ទង់រាប់ម៉ឺនដុល្លារនេះ មិនមែនមានតែ អតីតតារាកំប្លែង ស្រីអយ ម្នាក់ទេ ដែលត្រូវ លោក ម៉ា ដូណា បង្ហោះទារលុយជាសាធារណៈនោះ ក្នុងនោះ ក៏មាន តារាកំប្លែងអ្នកនាង ស្រេង សុកាន់ដា ហៅ ខ្ញុង ផងដែរ។

គួររំលឹកថា កន្លងទៅ អតីតតារាកំប្លែងមានងារជាជំទាវ ជួន ចាន់រតនា ហៅ ស្រីអយ ដោយសារតែជួបវិបត្តិធ្ងន់ធ្ងរ ទើបខកខានក្នុងការបង់តុងទីនឲ្យ លោក ម៉ាដូណា ហើយសន្យាម្ដងហើយម្ដងទៀត តែមិនបានបង់ឲ្យសោះ។ ហេតុនេះហើយ ទើបបានជា លោក ម៉ា ដូណា លែងយល់មុខ ក៏បានបង្ហោះសារទារលុយជាសាធារណៈតែម្ដង៕

អត្ថបទ ៖ ពិសី

The post ជាថ្មីម្ដងទៀត! ម៉ា ដូណា ប្រកាសទារលុយអតីតតារាកំប្លែងស្រីម្នាក់ ជំពាក់ខ្ទង់ម៉ឺនដុល្លារ appeared first on Kampuchea Thmey Daily.

ធ្លាយដំណឹងថា ជំទាវ ស្រីអយ កំពុងជួបបញ្ហាធ្ងន់ធ្ងរ រឿងបំណុលតុងទីន

KC Virak — Wed, 08 Jun 2022 03:34:59 +0000

អតីតតារាកំប្លែងមានងារជាជំទាវ ជួន ចាន់រតនា ហៅ ស្រីអយ បានធ្វើឱ្យមហាជន និងអ្នកគាំទ្រ ភ្ញាក់ផ្អើលជាថ្មី ខណ:សុខៗស្រាប់តែត្រូវបានអ្នកសិល្បៈដូចគ្នាទម្លាយរឿងជំពាក់លុយមិនទាន់សង ដែលធ្វើឱ្យម្ចាស់បំណុលទម្លាយរូបជាសាធារណៈ។

បើតាមប្រភពបានឱ្យដឹងថា ដោយសារតែជួបវិបត្តធ្ងន់ធ្ងរទើបធ្វើឱ្យជំទាវ ស្រីអយ មានការខកខានក្នុងការបង់តុងទីនឱ្យលោក ម៉ាដូណា ហើយសន្យាម្ដងហើយម្ដងទៀតតែមិនបានបង់ឱ្យ។ ហេតុនេះបានជាលោក ម៉ាដូណា មិនយល់មុខបានបង្ហោះសារកាលពីថ្មីៗកន្លងទៅថា៖ “ក្អយអើយ ខ្ញុំទ្រាំឆ្អែតហើយ ចូលមើលឆាតផង!។ សំខាន់ហេតុអ្វី សន្យាជាច្រើនដងមិនប្រាកដ ឆាតមិនឆ្លើយ? ខ្ញុំតែងតែឆាត Facebook សិន មិនដែលចង់គិតរឿងបង្ហោះទេ ខ្ញុំចិត្តទូលាយណាស់”។

ភ្លាមៗនោះគេឃើញ ជំទាវ ស្រីអយ បានធ្វើការឆ្លើយតបទៅលោក ម៉ាដូណា ថា៖ “សូមអគុណនូវចិត្តទូលាយរបស់មិត្ត ខ្ញុំតែងតែឆ្លេីយឆ្លង តែខ្ញុំមិនបានឆ្លេីយព្រោះពេលខ្លះខ្ញុំមិនបានប្រេីទូរស័ព្ទ។ ខ្ញុំមានបញ្ហាសតិអារម្មណ៍ អ្នកផ្ទះតែងតែដកទូរសព្ទ ខ្ញុំធ្លាប់ប្រាប់មិត្តដែរតេី ម្យ៉ាទៀតតិចណាស់ដែលមិនបានឆ្លេីយ។ ឥឡូវសរុបដោយការអនុគ្រោះ គឺខ្ញុំសុំពេលព្រោះមិនទាន់មានលុយ”។

ជំទាវ ស្រីអយ បញ្ជាក់បន្ថែមទៀតថា៖ “សុំទោសណាមិត្តភក្តិ! លុយតុងទីនមិត្តភក្តិឱ្យខ្ញុំធ្វេីជាលិខិតជំពាក់ប្រាក់នៅមុខមេធារី ក៏ខ្ញុំព្រមធ្វេីអស់ហេីយទាំងដែលតុងទីនមិត្តភក្តិឯងកំពុងជួបបញ្ហាកូនខ្លះលែងបង់ កូនខ្លះក៏រត់ ខ្ញុំក៏ជួបបញ្ហាធ្ងន់ តែខ្ញុំនៅតែព្យាយាមទទួលខុសត្រូវបំផុតក្នុងកាលៈទេសៈខ្ញុំកំពុងទាល់។ ម្យ៉ាងទៀតបន្ទាប់ពីធ្វេីកិច្ចព្រមព្រាងលុយតុងទីនក្លាយជាលុយជំពាក់ ខ្ញុំក៏បានបង់រំលស់ឱ្យមិត្តឯងមួយខែដែរ ដោយឡែកខែនេះខ្ញុំទាល់ ខ្ញុំរកបង់សងមិនទាន់ ខ្ញុំក៏បានឆាតសុំអង្វរដែរ”។

ជំទាវ ស្រីអយ បន្ថែមថា៖ “បើមិត្ត Post ខ្ញុំ ខ្ញុំមិនខឹងនូវការពិតដែលខ្ញុំជំពាក់ទេ តែបេីមិត្តទុកពេល ខ្ញុំនឹងរកគ្រប់វិធីទូទាត់ទាំងអស់ដរាបណាខ្ញុំនៅរស់ តែបេីមិត្តមិនទុកពេលហេីយយកការផុសដេីម្បីបន្ធូរអារម្មណ៍មិត្ត ធ្វេីចុះ ខ្ញុំមិនឆ្លើយទេ ខ្ញុំនៅតែសុំអង្វរមិត្តឱ្យទុកពេល ខ្ញុំមិនរត់មិនគេច ខ្ញុំនៅឈរដោះស្រាយជូនមិត្ត សូមមិត្តមេត្តាដោយការអនុគ្រោះ ទោះខ្ញុំសងយឺតតែមិនបាត់បង់ អរគុណ”។

ទន្ទឹមគ្នានេះដែរស្រាប់តែឃើញម្ចាស់គណនីហ្វេសប៊ុកឈ្មោះ Dara Rath ដែលគេស្គាល់ថាជាស្ថាបនិក “គ្រួសារតារាកម្ពុជា” ក៏បានបញ្ចេញសារដោយខ្លីថា៖ “ចុះខ្ញុំ លោកស្រី?។ ឆ្លើយតបនឹងសំនួរនេះ ជំទាវ ស្រីអយ បានលើកឡើងថា៖ “ដូចបងដឹងស្រាប់ ការរងគ្រោះនៃតុងទីនមិនមែនតែខ្ញុំ មានតារា និងអ្នករកសុីមួយចំនួនដែលលោភលន់ និងការស៊ីការប្រាក់តុងទីន ដេញលោតចុះឡេីង ចុងក្រោយបាកដូចខ្ញុំជាដេីម ចេញមពីការលោភលន់ទាំងអស់។ ប្អូនអរគុណដល់បង Dara Rath ដែលមេត្តាទុកពេលឱ្យប្អូន មិនយូទេណាបង បងក៏លេងតុងទីនដែរ អ៊ីចឹងបងដឹងពីតុងទីនច្បាស់ ដោយការគោរពទឹកចិត្តបងប្រុស Dara Rath អាក្រក់តែមាត់ តែចិត្តម៉ាបេន”.

គេសង្កេតឃើញថា មួយរយៈចុងក្រោយនេះ តារាមួយចំនួនតែងជួបបញ្ហា តុងទីន និងការខ្ចីជំពាក់ ដែលមហាជនទូទៅគួរប្រុងប្រយ័ត្នចំពោះករណីខាងលើនេះដូចគ្នា៕

អត្ថបទ៖ ចាន់រ៉ា

The post ធ្លាយដំណឹងថា ជំទាវ ស្រីអយ កំពុងជួបបញ្ហាធ្ងន់ធ្ងរ រឿងបំណុលតុងទីន appeared first on Kampuchea Thmey Daily.

អតីតតារាកំប្លែង ស្រីអយ ត្រូវអ្នកនាង សឿ សុធារ៉ា ទម្លាយរឿងជំពាក់លុយជិត ១ ម៉ឺនដុល្លារ

អ៊ិន ពិសី — Thu, 07 Oct 2021 03:07:20 +0000

អតីតតារាកំប្លែងអ្នកនាង ជួន ចាន់រតនា ហៅ ស្រីអយ បានធ្វើឲ្យមហាជន និងអ្នកសិល្បៈដូចគ្នាមានការភ្ញាក់ផ្អើលខ្លាំង ខណៈសុខៗស្រាប់តែត្រូវបានអ្នកសិល្បៈដូចគ្នាទម្លាយរឿងជំពាក់លុយជិត ១ ម៉ឺនដុល្លារ។

តួយ៉ាងនៅលើគណនីហ្វេសប៊ុករបស់តារាសម្តែងអ្នកនាង សឿ សុធារ៉ា បានបង្ហោះដោយភ្ជាប់ឈ្មោះ និងរូបភាពរបស់តារាកំប្លែងអ្នកនាងស្រីអយ ដូច្នេះថា អ្នកនាង ស្រីអយ ជំពាក់លុយខ្លួនចំនួន៩៥២០ ដុល្លារមិនទាន់សងទេ។

អ្នកនាង សឿ សុធារ៉ា បានបញ្ជាក់ថា អ្នកនាង ជួន ចាន់រតនា ហៅ ស្រីអយ អតីតតារាកំប្លែងជំពាក់នូវទឹកប្រាក់នាងខ្ញុំចំនួន ៩៥២០ ដុល្លារ គិតត្រឹមថ្ងៃទី ២៧ ខែសីហា ឆ្នាំ ២០២១ មកទល់ថ្ងៃនេះគាត់មិនព្រមសងប្រាក់នាងខ្ញុំទេ។ ដោយឲ្យនាងខ្ញុំទទួលខុសត្រូវបង់ប្រាក់ជំនួសគាត់ក្នុងមួយថ្ងៃ ១៧៣ ដុល្លារ រហូតចប់តុងទីននាងខ្ញុំ ៤០ ថ្ងៃទៀត។

តារាសម្តែងស្រី សឿ សុធារ៉ា បាននិយាយបន្ថែមទៀតថា សូមបញ្ជាក់ តុងទីនក្បាល ២០ ដុល្លារគាត់ (ខ្ញុង) លេង ៧ ក្បាល ងាប់ ៥ រស់ ២ ហើយខ្ញុំថែមទាំងចេញលុយជំនួសគាត់ ៥០០ ដុល្លារចំនួន ៣៧ សប្ដាហ៍ទៀតដែលគាត់បានលេងតុងទីនជាមួយនាងខ្ញុំមួយខ្សែទៀតគឺក្បាល ១០០ ដុល្លារ។

ជុំវិញរឿងរ៉ាវដ៏រសើបខាងលើនេះដែរ កម្ពុជាថ្មី កាលពីរសៀលថ្ងៃទី ០៦ ខែតុលា ឆ្នាំ ២០២១ មិនទាន់អាចទាក់ទង ដើម្បីសុំការបំភ្លឺពីតារាកំប្លែង ស្រីអយ បាននៅឡើយទេ៕

អត្ថបទ ៖ ចាន់រ៉ា

The post អតីតតារាកំប្លែង ស្រីអយ ត្រូវអ្នកនាង សឿ សុធារ៉ា ទម្លាយរឿងជំពាក់លុយជិត ១ ម៉ឺនដុល្លារ appeared first on Kampuchea Thmey Daily.