​កំពង់ផែនេះត្រូវបានបង្កើតឡើងក្នុងគោលបំណងសម្រួលដល់ការដឹកជញ្ជូនទំនិញផ្លូវទឹក ដោយដើរតួនាទីជាចំណុចតភ្ជាប់​ដ៏សំខាន់សម្រាប់ការដឹកជញ្ជូនទំនិញកសិកម្ម និងធនធានផ្សេងៗចេញពីតំបន់ខេត្តក្រចេះ និងខេត្តជុំវិញតាមរយៈផ្លូវទឹក និង​ក៏​នឹង​ចូលរួមកាត់បន្ថយការចំណាយលើការដឹកជញ្ជូន និងបង្កើនប្រសិទ្ធភាពក្នុងការនាំចេញនាំចូលទំនិញ ដោយប្រើប្រាស់សក្តានុពលនៃទន្លេមេគង្គ។

លោក សូម សារិត អភិបាលស្រុកព្រែកប្រសព្វ ខេត្តក្រចេះ​បានបញ្ជាក់ថា គម្រោងនេះស្ថិតក្នុងដំណាក់កាលអភិវឌ្ឍន៍ និងមានការវិវឌ្ឍ​ជាបន្តបន្ទាប់​ស្រប​តាម​ផែនការមេរបស់ក្រសួងសាធារណការ និងដឹកជញ្ជូន។

លោកថា តាមរយៈ​កំពង់ផែនេះអាចជួយសម្រួលដល់ការដឹកជញ្ជូនផលិតផលកសិផលរបស់ប្រជាកសិករបានលឿនរហ័ស និងកាន់តែមានភាពងាយស្រួល។ ក្នុងនោះអ្នកស្រុកព្រែកប្រសព្វអាចទទួលបានផលប្រយោជន៍ពីកំពង់ផែនេះ​ច្រើនជាងគេ។

លោកបន្តថា កំពង់ផែដែលកំពុង​សាងសង់​នេះក៏នឹងដើរតួជាទីចំណតទូកដឹកជញ្ជូនធំៗ ចរាចរណ៍ទំនិញ និងបង្កើតបានតំបន់ស្តុកទំនិញបានច្រើនរក្សាបានសង្វាក់ដឹកជញ្ជូនមានប្រសិទ្ធភាពផងដែរ ជាពិសេសរោងចក្រស៊ីម៉ង់តិ៍។ លើសពីនេះទៀត ក៏អាចបង្កើតនូវឱកាសការងារ និងទាក់ទាញវិនិយោគិនមកកាន់ស្រុកព្រែកប្រសព្វ ក៏ដូចជាខេត្តក្រចេះទាំងមូល។ 

ខណៈ​ដែល​ស្រុកព្រែកប្រសព្វមានទីតាំងអំណោយផលពីធម្មជាតិ ស្ថិតនៅតាមបណ្តោយទន្លេមេគង្គដែលផ្តល់លក្ខខណ្ឌអំណោយផលក្នុងការតភ្ជាប់ជាមួយផ្លូវគោកនិងផ្លូវទឹក កំពង់ផែពហុបំណងខេត្តក្រចេះ​នឹង​ជួយជម្រុញសេដ្ឋកិច្ចខេត្តឲ្យខ្លាំងក្លាបំផុត ព្រោះអាចកាត់បន្ថយការចំណាយថ្លៃដឹកជញ្ជូនទំនិញពីថ្លៃមកថោក និងរក្សាលំនឹងតម្លៃផលិតផលដែលផលិតបានមិនអាចឱ្យឈ្មួញកណ្តាលកេងចំណេញពីកសិករបានទៀត។ លោក សូម សារិត​ បន្ថែម។

នៅក្នុង​ស្រុកព្រែកប្រសព្វ​មានផ្ទៃដីកសិកម្ម សរុបប្រមាណជាង ៨០ ពាន់ហិកតា ក្នុងនោះស្រែប្រាំង​មាន​ប្រមាណជាង ៩ពាន់ហិកតា ស្រែវស្សាជាង ៥ ពាន់ហិកតា និងដំណាំយុទ្ធសាស្រ្តរួមមាន ដំណាំកៅស៊ូចំនួន ៩,៩ពាន់ហិកតា ស្វាយ​ចន្ទីចំនួន ៣៦ ពាន់ហិកតា ស្វាយកែវល្មៀត ៦ ពាន់ហិកតា និងដីល្បាប់សម្រាប់ដំណាំតាមរដូវកាល ២ ពាន់ហិកតា។

ស្រុក​មានឃុំចំនួន ៨ឃុំ ភូមិចំនួន ៦១ភូមិ និងមានប្រជាពលរដ្ឋសរុបចំនួន ៧៦ ពាន់នាក់ ស្មើនិង ១៨ពាន់គ្រួសារ៕

អត្ថបទ៖ប្រុញ វិធិន

The post កំពង់ផែពហុបំណងខេត្តក្រចេះ ផ្តើម​​សាង​សង់ អនាគត​នឹងក្លាយជាច្រក​ដឹកជញ្ជូន​ដ៏សំខាន់ខេត្ត​ភាគ​ឦសាន appeared first on Kampuchea Thmey Daily.

តាមការឲ្យដឹងពី លោក ប៉ិច ងួនស្រ៊ឺ មេឃុំជ្រោយបន្ទាយបានឲ្យដឹងថា នៅឆ្នាំ២០២៥នេះ ឃុំទទួលបានគម្រោងកែលម្អការ​តភ្ជាប់បណ្ដាញផ្លូវថ្នល់ពីផ្លូវក្រាលគ្រួសក្រហម ទៅជាផ្លូវក្រាលកៅស៊ូ ដែលមានប្រវែង ៥ ០០០ ម៉ែត្រ និងទទឹង ៨ ម៉ែត្រ នឹងចាប់ផ្ដើមនៅដើមខែកុម្ភ ឆ្នាំ២០២៥ នេះ ដែលជាគម្រោងរបស់ថ្នាក់ជាតិ និងអនុវត្តស្ថាបនាកសាងដោយ កងវិស្វកម្ម សម្ដេច ជាស៊ីម។

លោកបានបញ្ជាក់ថា វឌ្ឍនភាពឃុំជ្រោយបន្ទាយក្នុងអាណត្តិទី ៧ នេះ សម្រេចបានសមិទ្ធផលជាច្រើនដូចជា គម្រោងថ្នាក់ជាតិ ទទួលបានផ្លូវក្រាលកៅស៊ូ ១ ខ្សែ ដោយនៅឆ្នាំ២០២៤ ប្រវែង ៣ ០០០ ម៉ែត្រ និងឆ្នាំ២០២៥នេះ ប្រវែង ៥ ០០០ ម៉ែត្របន្ថែមទៀត សរុបប្រវែង ៨ ០០០ម៉ែត្រ ប្រែក្លាយជាផ្លូវជាតិលេខ ២៧៩ តភ្ជាប់​រវាងឃុំសោប និងជ្រោយបន្ទាយ ស្ថិតក្នុងស្រុកព្រែកប្រសព្វ។

លោក ប៉ិច ងួនស្រ៊ឺ មេឃុំជ្រោយបន្ទាយ

ដោយឡែកថវិកាមូលនិធិឃុំសង្កាត់ យកមកអភិវឌ្ឍន៍នៅក្នុងឃុំក៏សម្រេចបានសមិទ្ធផលច្រើនផងដែរ ទី១ ផ្តោតសំខាន់ធ្វើផ្លូវ បេតុង និងទី២ ធ្វើផ្លូវគ្រួសក្រហម ដោយសារឃុំនេះមានផ្ទៃដីធំ និងមាន ១២ភូមិ។ ប្រសិនបើធ្វើផ្លូវបេតុង ឬផ្លូវកៅស៊ូ​ទាំងអស់ គឺមិនងាយបានតភ្ជាប់រវាងពីភូមិមួយទៅភូមិមួយ ដូច្នេះទើបគណកម្មការឃុំ ក៏បានបែងចែកកញ្ចប់មូលនិធិឃុំជា ២ កញ្ចប់ គឺ ១កញ្ចប់ ធ្វើផ្លូវបេតុង និងមួយកញ្ចប់ទៀត ធ្វើផ្លូវក្រាលគ្រួសក្រហម ដើម្បីតភ្ជាប់ពីភូមិមួយទៅភូមិមួយ ប្រជាពលរដ្ឋងាយស្រួលមកទទួលសេវា។

ពលរដ្ឋ​ឈ្មោះ អ៊ំ សាន់ ណាគី អាយុ ៧២ឆ្នាំ រស់នៅភូមិរកាធំ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ បានសម្ដែងការសប្បាយចិត្ត និងបានឲ្យដឹងថា ចាប់តាំងពីឃើញមានការត្រួស​ត្រាយអភិវឌ្ឍន៍ផ្លូវមក ទី១ គឺអរខ្លាំងមែនទែន ដោយការរង់​ចាំរបស់ប្រជាពលរដ្ឋ គឺយូរឆ្នាំមកហើយ ព្រោះតំបន់នេះពីដើមគេហៅថាតំបន់ជនបទ ប៉ុន្តែរយៈពេលប៉ុន្មានឆ្នាំ ចុងក្រោយនេះ រាជរដ្ឋាភិបាលធ្វើការអភិវឌ្ឍន៍ជាជំហានៗបានមកដល់ខេត្តក្រចេះ ដល់ឃុំជ្រោយបន្ទាយ ជាពិសេស ការកសាងស្ពានឆ្លងទន្លេមេគង្គ៕

អត្ថបទ ប្រុញ វិធិន

The post ឃុំជ្រោយបន្ទាយ​ កែលម្អផ្លូវក្រាលគ្រួសក្រហម ជាផ្លូវកៅស៊ូប្រវែង ៥ ០០០ ម៉ែត្រ ភ្ជាប់ទៅ​ស្ពាន​ថ្មី​​ឆ្លង​ទន្លេ​មេគង្គ​ខេត្តក្រចេះ appeared first on Kampuchea Thmey Daily.

លោក សូម សារិត ​អភិបាល​ស្រុក​ព្រែក​ប្រសព្វ​បាន​សម្តែង​ការ​សាទរ​និង​មោទនភាព​ដែល​ស្រុក​ជាប់ដង​ទន្លេ​នេះ​នឹង​ទទួល​បាន​សមិទ្ធផល​ស្ពាន​ឆ្លង​ទន្លេ​ជា​ប្រវត្តិសាស្រ្ត​ថ្មី​ក្នុង​ពេល​ឆាប់ៗ​នេះ។

លោក សូម សារិត​ ដែល​ទើប​ផ្លាស់​មក​ដឹកនាំជាអភិបាល​ស្រុកព្រែកប្រសព្វ​បាន​ឲ្យ​កម្ពុជា​ថ្មី​ដឹងថា ពលរដ្ឋ​នៅ​ស្រុក​ព្រែកប្រសព្វ​ទទួលបាន​​​ព័ត៌មាន​ពី​គម្រោង​ស្ពាន​ឆ្លង​ទន្លេ​នៅ​ខេត្ត​ក្រចេះ​ជាច្រើន​ឆ្នាំ​មក​ហើយ។ គម្រោង​ស្ពាន​នេះ​ជាការ​ទន្ទឹងរង់ចាំដ៏​យូរ​ ខណៈ​បច្ចុប្បន្ន​ពលរដ្ឋ​មានការ​លំបាក​​ត្រូវ​​ឆ្លង​ដ​​ត្រូវ​ចំណាយ​ច្រើន ​និង​ក៏​ប្រឈម​​ហានិភ័យ​ផ្សេងៗ។

លោក​អភិបាល​ស្រុកបានប្រាប់​ពី​ភូមិសាស្រ្ត​​ស្រុក​ព្រែក​ប្រសព្វ​ភាគច្រើនពលរដ្ឋ​​ពឹង​ផ្អែក​លើ​វិស័យ​កសិកម្ម។ តាមរ​យៈ​សមិទ្ធផល​ស្ពាន​ថ្មី​នេះ លោករំពឹងទុកថា នឹង​ជួយ​លើក​ស្ទួយ​ជីវភាព​ពលរដ្ឋ​ឲ្យ​ល្អ​ប្រសើរ​ថែម​ទៀត។

ក្នុង​កិច្ច​ប្រជុំ​កំពូល​អាស៊ាន ​នាយករដ្ឋមន្រ្តី​កម្ពុជា​និង​ចិន បាន​ចុះហត្ថលេខា​លើ​ឯកសារ​សំខាន់ៗ​ចំនួន ១៨ ក្នុង​នោះ​ក៏​មាន​គម្រោង​សាង​សង់​ស្ពាន​ឆ្លង​កាត់​ទន្លេ​នៅ​ខេត្ត​ក្រចេះ។

នៅ​ក្នុង​សន្នីសីទ​បញ្ចប់​ក្នុង​កិច្ច​ប្រជុំ​អាស៊ានប្រមុខ​រដ្ឋាភិបាល​សម្តេច​តេជោ ហ៊ុន សែន ​បាន​ហៅ​គម្រោង​សាងសង់ស្ពាន​នេះ ជា​សមិទ្ធផល​​​ប្រវត្តិ​សាស្រ្ត​សម្រាប់​ពលរដ្ឋ​ខេត្តក្រចេះ។

យ៉ាងណាមិញ បើ​តាមការ​បញ្ជាក់​ពី​លោកអភិបាលស្រុកព្រែកប្រសព្វ​​ មិន​ទាន់​ដឹងថា​ដំណើរការ​នៃការបើកការដ្ឋាន​សាងសង់ជាផ្លូវការ​នឹង​ចាប់ផ្តើម​នៅពេលណា​នៅ​ឡើយទេ។

​ថ្មីៗ​នេះ មានការ​ផ្សព្វផ្សាយ​រូបភាព​ពី​ការ​បញ្ជូន​គ្រឿង​ចក្រ​ដើម្បី​សាងសង់​ស្ពាន​ឆ្លង​ទន្លេ​នៅ​ខេត្ត​ក្រចេះ​នៅលើ​បណ្តាញ​សង្គម។ ឆ្លើយតប​សំនួរ​របស់​សារព័ត៌មាន​កម្ពុជា​ថ្មី​ក្នុង​សន្និសីទ​ពី​វឌ្ឍនភាព​រយៈ​ពេល ៥ ឆ្នាំ​របស់​ក្រសួង​សាធារណការ​និង​ដឹកជញ្ជូន រដ្ឋមន្ត្រី​ក្រសួងសាធារណការ​និង​ដឹក​ជញ្ជូន​ លោក ស៊ុន ចាន់ថុល ទទួល​ស្គាល់​ថា គ្រឿង​ចក្រ​មួយ​ចំនួនពិត​ជា​បាន​បញ្ជូន​ទៅ​​ ដើម្បី​​ត្រៀមបើក​ការដ្ឋាន​ស្ពាននៅ​ខេត្តក្រចេះ។

លោក​ថ្លែង​យ៉ាង​ដូច្នេះ​ថា “​ពិត ១០០% គ្រឿងចក្រមួយ​ចំនួន​ពិត​ជា​បាន​​បញ្ជូនទៅ​។ ​ជា​ធម្មតា​ក្រុមហ៊ុន​ត្រូវ​បញ្ជូន​គ្រឿងចក្រ​ទៅ​មុន​​​ និង​​ធ្វើ​ការ​បណ្តើរៗមុនការដ្ឋាន​សាងសង់ចាប់ផ្តើម​ជា​ផ្លូវការ​​”។

ស្ពាន​ឆ្លង​កាត់ទន្លេមេគង្គ​ក្នុងខេត្ត​ក្រចេះ តាម​ការ​សិក្សា​មាន​ប្រវែង​សរុប ១១៣១ម៉ែត្រ និង​ទទឹង ១៣,៥០ម៉ែត្រ ជា​ប្រភេទ​ស្ពានបេតុង​សរសៃ​ដែក ​ដោយ​គ្រោង​ចំណាយ​ថវិកា​សរុប​ជាង ៥៦​លានដុល្លារ។ ក្នុង​គម្រោងស្ពាននេះ​ ក៏មាន​សាងសង់​ផ្លូវ​​តភ្ចាប់ពី​​ស្ពាន​ទៅ​ខេត្ត​កំពង់ធំកាត់​តាម​ស្រុក​សណ្តាន់ រហូត​ដល់​ខេត្ត​សៀមរាប៕

The post អភិបាល​ស្រុក​ព្រែកប្រសព្វ៖ ពលរដ្ឋ​ទទួល​បានព័ត៌មានជាច្រើន​ឆ្នាំ​ ស្ពាន​ឆ្លង​ទន្លេ​​នៅ​ខេត្តក្រចេះ appeared first on Kampuchea Thmey Daily.