គួរបញ្ជាក់ថា ហេតុការណ៍គ្រោះថ្នាក់ចរាចរណ៍នេះបាន កើតឡើងកាលពីថ្ងៃទី២៧ ខែមីនា ឆ្នាំ២០២៦ វេលាម៉ោង២២៖៤០នាទី លើផ្លូវជាតិលេខ៥ ចន្លោះបង្គោលគីឡូម៉ែត្រលេខ២៤៦-២៤៧ នៅត្រង់ចំណុច ភូមិកកោះ ឃុំកកោះ ស្រុកមោងឫស្សី ខេត្តបាត់ដំបង។

យោងតាមរបាយការណ៍របស់សមត្ថកិច្ច បានឱ្យដឹងថា ហេតុការណ៍ដ៏រន្ធត់នេះបានកើតឡើងរវាងរថយន្ត១គ្រឿងម៉ាក MERCEDES BENZ AMG GT53 ប្រភេទគ្រួសារ ពណ៌ខ្មៅ ពាក់ស្លាកលេខកម្ពុជា C.S.6168 អ្នកបើកបរមិនស្គាល់អត្តសញ្ញាណ (រត់គេចខ្លួន) បើកបរក្នុងទិសដៅពីភ្នំពេញ ឆ្ពោះទៅខាងបាត់ដំបង លុះមកដល់ចំណុចកើតហេតុខាងលើ បានបុកពីក្រោយម៉ូតូចំនួន២គ្រឿង លើគន្លងផ្លូវម៉ូតូ។ ដែលម៉ូតូទាំងនោះ មានម៉ាក Honda dream ពណ៌ខ្មៅ ពាក់ស្លាកលេខបាត់ដំបង 1H-2105 អ្នកបើកបរឈ្មោះ ប៉ុក ស៊ីណាប់ ភេទស្រី អាយុ៣២ឆ្នាំ រស់នៅភូមិកកោះ ឃុំកកោះ ស្រុកមោងឫស្សី  (ស្លាប់) និងអ្នករួមដំណើរចំនួន២នាក់ទៀតឈ្មោះ ម៉េន ម៉ីនាង ភេទស្រី អាយុ១០ឆ្នាំ រស់នៅភូមិកកោះ ឃុំកកោះ ស្រុកមោងឫស្សី  (ស្លាប់) និង ឈ្មោះ ម៉េន សុខមាន ភេទប្រុស អាយុ៧ឆ្នាំ រស់នៅភូមិកកោះឃុំកកោះ ស្រុកមោងឫស្សី របួសធ្ងន់ បានដឹកយកទៅសង្គ្រោះនៅមន្ទីរពេទ្យបង្អែកស្រុកមោងឫស្សី។

រីឯម៉ូតូទី២ ម៉ាក Honda dream ពណ៌ខ្មៅ ពាក់ស្លាកលេខបាត់ដំបង 1S-1965 អ្នកបើកបរឈ្មោះ សួន ធានី ភេទប្រុស អាយុ៥០ឆ្នាំ រស់នៅភូមិកកោះ ឃុំកកោះ ស្រុកមោងឫស្សី (ស្លាប់) និងអ្នករួមដំណើរចំនួន២នាក់ទៀត ឈ្មោះវុន ស្រីជា ភេទស្រីអាយុ៤៣ឆ្នាំរស់នៅភូមិកកោះ ឃុំកកោះ ស្រុកមោងឫស្សី (ស្លាប់) និងម្នាក់ទៀតឈ្មោះ ចាន់ ចាវ ភេទប្រុស អាយុ៧ឆ្នាំ រស់នៅភូមិកកោះ ឃុំកកោះ ស្រុកមោងឫស្សី (ស្លាប់) ដែលកំពុងបើកបរស្របទិសគ្នា។

តាមការពិនិត្យកន្លែងកើតហេតុ កម្លាំងនគរបាលជំនាញ នៃអធិការដ្ឋាននគរបាលស្រុកមោងឫស្សី បានបញ្ជាក់ថា រថយន្តបើកបរក្នុងទិសដៅពីត្បូងទៅជើង ក្នុងល្បឿនលឿន ពេលមកដល់ចំណុចកើតហេតុខាងលើ បានបុកពីក្រោយម៉ូតូចំនួន២គ្រឿង ដែលបើកបរក្នុងទិសដៅស្របគ្នា យ៉ាងពេញទំហឹងតែម្ដង។

បច្ចុប្បន្នរថយន្តបង្កត្រូវបានកម្លាំងសមត្ថកិច្ចនាំយកទៅរក្សាទុកនូវការិយាល័យចរាចរណ៍ផ្លូវគោក ចំណែកសពជនរងគ្រោះ សមត្ថកិច្ចបានធ្វើកំណត់ហេតុ និងប្រគល់ទៅក្រុមគ្រួសារសាច់ញាតិ យកទៅធ្វើបុណ្យតាមប្រពៃណី។

លោក ចាន់ សុធី នាយការិយាល័យចរាចរណ៍ផ្លូវគោកខេត្តបាត់ដំបងបានបញ្ជាក់ថា បច្ចុប្បន្នសមត្ថកិច្ចបានស្រាវជ្រាវរកឃើញអត្តសញ្ញាណម្ចាស់រថយន្ដ ដែលជាជនបង្កនោះហើយ និងបានបើកបររថយន្តម៉ាក MERCEDES BENZ AMG GT53 ពាក់ស្លាកលេខកម្ពុជា C.S.6168 គឺឈ្មោះ ស៊ីវ ជ័យសិដ្ឋ អាយុ២០ឆ្នាំ មានស្រុកកំណើតនៅឃុំប៉ោយប៉ែត ស្រុកអូរជ្រៅ ខេត្តបន្ទាយមានជ័យ និងមានទីលំនៅបច្ចុប្បន្ន នៅផ្ទះលេខ១៧ ផ្លូវ១២ ភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ។ ប៉ុន្ដែសមត្ថកិច្ចកំពុងធ្វើការកោះហៅ និងកំពុងតាមស្រាវជ្រាវដោយសារតែជនបើកបររូបនេះបានគេចខ្លួនមិនទាន់ចូលលំនៅឋាននៅឡើយ៕ អត្ថបទ : សោ និយមរ័ត្ន

The post សមត្ថកិច្ចស្រាវជ្រាវដឹងអត្តសញ្ញាណ អ្នកបើករថយន្តបុកមនុស្សស្លាប់៦ នាក់ស្លាប់នៅស្រុកមោងឬស្សីហើយ appeared first on Kampuchea Thmey Daily.

លោក ជិន ម៉ាលីន រដ្ឋលេខាធិការប្រចាំការនៃក្រសួងយុត្តិធម៌ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកមោងឬស្សីនៃខេត្តបាត់ដំបង តំណាងដ៏ខ្ពង់ខ្ពស់ លោក អង្គ វង្ស វឌ្ឍានា ប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកមោងឬស្សី បានដឹកនាំក្រុមការងាររាជរដ្ឋាភិបាល និងក្រុមការងារគណបក្សប្រជាជនកម្ពុជាចុះជួយស្រុកមោងឬស្សី លើកទឹកចិត្តបែបនេះ  ក្នុងពេលជួបសំណេះសំណាលជាមួយកីឡាករប្រណាំងទូកងសរុបចំនួន៦០នាក់មកពីទូកងចំនួន២មកពីស្រុកមោងឬស្សី នៃខេត្តបាត់ដំបង។

ក្នុងឱកាសនោះ លោក ជិន ម៉ាលីន បាននាំយកថវិកាសរុបចំនួន១៥លានរៀល មី៥០កេះ ត្រីខ២៥០កំប៉ុង ទឹកសុទ្ធ៦០យួ ទឹកភេសជ្ជៈប៉ូវកំលាំង៦០យួ ទឹកត្រី១២យួ ទឹកស៊ីអ៊ីវ៥យួ ព្រមទាំងគ្រឿងសម្ភារៈចាំបាច់មួយចំនួនទៀត ជូនដល់ក្រុមកីឡាករ និងកីឡាការិនី ដែលត្រៀមចូលរួមប្រកួត។

ក្នុងឱកាសនៃការប្រារព្ធពិធីបុណ្យអុំទូកនៅខេត្តបាត់ដំបង ដែលនឹងប្រព្រឹត្តទៅនៅថ្ងៃទី១៦និង១៧ ខែតុលា ឆ្នាំ២០២៤នេះ ស្រុកមោងឬស្សី បានទូកងចំនួន២ចូលរួមប្រកួត គឺទូកងកន្លង់រ័ត្នរំពាត់មាស និង ទូកងកន្លង់ថោងសំរោងពេជ្រ។  

លោក ជិន ម៉ាលីន បានកោតសរសើរចំពោះអាជ្ញាធរមូលដ្ឋាននៃស្រុកមោងឬស្សី យុវជនយុវនារីស្ម័គ្រចិត្តនិងជាពិសេសកីឡាករទូកងស្រុកមោងឬស្សី ដែលបានខិតខំប្រឹងប្រែងឱ្យមានកីឡាករទូកងនៃស្រុកមោងឬស្សីចំនួន៦០នាក់ដែលមានទូកងចំនួន២គ្រឿងចូលរួមក្នុងការប្រណាំងទូកងដើម្បីអបអរសាទរពីធីបុណ្យអុំទូកនៅខេត្តបាត់ដំបង៕

The post លោក ជិន ម៉ាលីន លើកទឹកចិត្តកីឡាករទូកងស្រុកមោងឬស្សីប្រឹងយកជ័យជម្នះថ្នាក់ខេត្តឱ្យបាន ដើម្បីបានទៅប្រកួតថ្នាក់ជាតិ appeared first on Kampuchea Thmey Daily.

បច្ចុប្បន្ន​គេ​សង្កេត​ឃើញ​ថា មាន​ផ្លូវមួយខ្សែ ដែល​បែក​ចេញ​​ពីផ្លូវជាតិលេខ ៥ ឆ្លង​កាត់​ភូមិជ្រៃរុន ភូមិ​អំពិល​ឈូង និង​ភូមិ​ព្រៃរកា ទៅ​ទល់ និង​ប្រលាយ១៧ ស្ថិត​ក្នុង​ឃុំ​ឫស្សីក្រាំង ស្រុក​មោងឫស្សី ខេត្ត​បាត់ដំបង ដែល​មាន​ប្រវែង​ប្រមាណ ១២ គីឡូម៉ែត្រ កំពុង​ប្រឈម​នឹង​បញ្ហា​ភក់​ច្រំ​ស្ទើរ​តែ​ធ្វើដំណើរ​មិន​បាន ពិសេស​​គឺសិស្ស​សាលា ដែល​មាន​ពេល​ខ្លះ​ត្រូវ​អាក់ខាន​​ក្នុងការសិក្សា ដោយ​​សារតែការធ្វើដំណើរទៅកាន់សាលារៀនមិនកើត។

មជ្ឈដ្ឋាន​មួយចំនួននៅទីនោះបាននិយាយថា នៅ​ប៉ុន្មាន​ឆ្នាំមុន គឺមាន​ក្រុមការងារ​បាន​ឈូសឆាយ និង​ចាក់​ពង្រាបដីស ហើយ​​ក៏​បាន​ទុកចោល​រហូតមកទល់​នឹងពេលនេះគឺមានរយៈពេល ប្រហែល ៣ឆ្នាំ​មកហើយជ្រៃរុន ដែល​គេ​មិនទាន់​ឃើញ​ស្ថាប័នពាក់ព័ន្ធ​ណាមួយទៅធ្វើបន្តទៀតសោះ ដោយគេគ្រាន់តែឮថា ផ្លូវមួយខ្សែនេះ​គឺមាន​គម្រោងក្រាល​កៅស៊ូ។

តាម​រយៈ​ដំណឹង​នេះ បាន​ធ្វើឲ្យប្រជាពលរដ្ឋមានការសប្បាយរីករាយ និងត្រេកអរក្រៃលែង ប៉ុន្តែ​នៅ​ទីបំផុតរយៈពេល ៣ ឆ្នាំបានកន្លងផុតទៅ ដោយ​មិនបានឃើញ​ស្រមោលគ្រឿង​ចក្របន្ត​សកម្មភាពនៅ​ទីនោះ​ទៀតឡើយ ធ្វើ​ឲ្យ​ការធ្វើដំណើរ​របស់ប្រជាពលរដ្ឋ ពិសេសគឺសិស្សានុសិស្ស មានការលំបាកជា​ខ្លាំងក្នុង​ការធ្វើដំណើរ​ឆ្លងកាត់ផ្លូវមួយខ្សែនេះ។ ជាក់ស្ដែង​ដោយ​មានពេល​ខ្លះសិស្សអាច​ត្រឡប់ទៅផ្ទះវិញ​ដោយសារតែមិនអាច​ធ្វើដំណើរ​ទៅដល់​សាលារៀនបាន ក្រោយ​ពេល​ដែល​មាន​ភ្លៀងធ្លាក់​​រួចមក។

ជុំវិញបញ្ហានេះដែរនៅព្រឹកថ្ងៃទី៨ ខែសីហា ឆ្នាំ២០២៤ នេះ លោក វ៉ាន់ ថុល ប្រធាន​មន្ទីរ អភិវឌ្ឍន៍ជនបទ​ខេត្ត​បាត់ដំបង​ បាន​មាន​ប្រសាសន៍​តាមរយៈ​ទូរសព្ទ​ថា ផ្លូវ​មួយខ្សែនោះ​គឺ ជាគម្រោងរបស់ អង្គការ jica ហើយ​ក៏មិន​មានការ​បោះបង់ដែរ ក្រោយ​ពីបាន​ពង្រាបដីម្ដងរួចមក ដែល​ការអាក់​ខាននេះ​គឺជា​ការពន្យារពេល​ដើម្បីសិក្សា​លម្អិត និង​ត្រៀមក្រាលកៅស៊ូនា​ចុងឆ្នាំ​២០២៥៕

អត្ថបទ : សោ និយមរ័ត្ន

The post ផ្លូវមួយខ្សែនៅស្រុកមោងឫស្សី កំពុងបែកភក់ស្អិត សឹងមិនអាចធ្វើដំណើរបាន appeared first on Kampuchea Thmey Daily.

ថ្មីៗនេះមានប្រភពមួយចំនួន បានធ្វើការបង្ហោះសារនៅលើបណ្ដាញសង្គម ដែលបានចោទប្រកាន់ទៅលើទីតាំងផលិតទឹក​ស្អាតក្នុងស្រុកមោងឫស្សីថាគ្មានតម្លាភាព ដែលប្រភពទាំងអស់នោះបានលើកឡើងនូវបញ្ហា ៣ ចំណុចសំខាន់ៗដូចជា : ក្រុមហ៊ុនបានស្រង់លេខនាឡិកាស្ទង់ទឹកលើសម៉ែត្រគូបរបស់អតិថិជន លុះនៅពេលបែកការទើបក្រុមហ៊ុនព្រមកាច់​កង​​សងវិញនៅខែក្រោយៗមកទៀត។

បញ្ហានេះប្រជាពលរដ្ឋបានលើកឡើងថា ដោយសារតែពួកគាត់រវល់ការងារមិនបានចុះពិនិត្យផ្ទៀងផ្ទាត់ទៅលើវិក័យប័ត្រជាមួយ​នឹងកុងទ័រទឹក លុះនៅពេលទៅពិនិត្យទើបដឹងថា ក្រុមហ៊ុនបានកត់ត្រាលើសលេខកុងទ័ររហូតដល់ជាង ៧០ ម៉ែត្រ​គូប ទើបមានការតវ៉ាគ្នាដូច្នេះហើយទើបក្រុមហ៊ុនកាត់បណ្ដាក់ដើម្បីរំលោះសងម្ចាស់កុងទ័រវិញ។ មានន័យថាក្រុមហ៊ុនបានកេ​ប្រវ័ញ្ចទៅលើលេខកុងទ័រទឹកហើយយកលុយមុនអស់ទៅហើយ។

បញ្ហាទី ២ អ្នកប្រើប្រាស់ទឹកស្អាតបានលើកឡើងថា ពួកគេបានទូទាត់លុយតាម QR រួចទៅហើយលុះដល់ថ្ងៃដាច់ខែខាង​ក្រុមហ៊ុនទឹកស្អាតបានយកវិក័យប័ត្រមកដល់ផ្ទះ ដើម្បីទារលុយម្ដងទៀត។ បញ្ហានេះពលរដ្ឋ​មានការងឿងឆ្ងល់ថាហេតុអ្វីបានជាក្រុមហ៊ុនមិនពិនិត្យឲ្យបានច្បាស់លាស់នៅពេល ដែលអតិថិជនប្រើប្រាស់ទឹកបានទូទាត់តាម QR រួចទៅហើយបែរជាក្រុមហ៊ុនមកទារលុយម្ដងទៀតយ៉ាងដូច្នេះ។

រឿងដែលសំខាន់ជាងនេះទៅទៀត គឺប្រភពទឹកឆៅដែលក្រុមហ៊ុនទឹកស្អាត បានទាញយកមកផលិតជាទឹកស្អាតគឺយកពីក្នុងស្ទឹងមោងឬស្សីដែលបច្ចុប្បន្នទឹកស្ទឹង​ស្ថិតនៅក្នុងបាតស្ទឹង និងមានសភាពកខ្វក់ឡើងស្លែខៀវ សឹងតែមានក្លិនស្អុយ​ថែមទៀតផង ដែលប្រជាពលរដ្ឋមានអារម្មណ៍មិនចង់ហ៊ានប្រើប្រាស់ព្រោះដោយសារតែប្រភពទឹកកខ្វក់ខ្លាំងពេក។

ជុំវិញបញ្ហាខាងលើនេះ អ្នកស្រី រឿន មុំ ជាម្ចាស់សហគ្រាសទឹកស្អាត ផាន់ណារ៉ា ស្រុកមោងឬស្សី បានបញ្ជាក់កាលពីព្រឹកថ្ងៃទី ២៤ ខែមិថុនា នេះថា រាល់បញ្ហាដែលកើតឡើងខាងលើគឺមានចំណុចខ្លះ អ្នកស្រីទទួលស្គាល់ថាពិតជាត្រឹមត្រូវដូចជាការចុះស្រង់លេខនាឡិកាស្ទង់ ហើយមានការកត់លេខកុងទ័រលើស គឺបុគ្គលរូបនោះអ្នកស្រីបានបញ្ឈប់ពីការងាររួចទៅហើយ ដោយសារតែបុគ្គលរូបនេះប្រព្រឹត្តអំពើមិនគប្បីទៅលើអតិថិជន ដូច្នេះទើបអ្នកស្រីបញ្ឈប់ពីការងារ ហើយទូទាត់សងទៅម្ចាស់វិញ តាមរយៈការកាត់ថ្លៃប្រើប្រាស់ទឹកប្រចាំខែរហូតដល់រួចរាល់លុយទាំងអស់នេះ។

អ្នកស្រី​បន្ត​ថា ត្រង់ចំណុចដែលថា ការទូទាត់លុយតាម QR រួចហើយ តែក្រុមហ៊ុននៅតែទៅទារលុយទៀតនោះគឺអ្នកស្រីបានសំណូមពរឲ្យអតិថិជនដែលប្រើប្រាស់ទឹកស្អាតទាំងអស់ សូមទៅផ្លាស់ប្ដូរឈ្មោះនៅក្រុមហ៊ុនផលិតទឹកស្អាតដើម្បីឲ្យសមស្របទៅនឹងកុងដែលបាញ់លុយតាម QR ព្រោះដោយសារតែអ្នកខ្លះដាក់ឈ្មោះប្រពន្ធនៅក្នុងពាក្យស្នើសុំប្រើប្រាស់ទឹក លុះអ្នកបាញ់លុយគឺជាប្ដី ដូច្នេះក្រុមហ៊ុនមិនអាចដឹងថាអ្នកបាញ់នោះជានរណាឡើយព្រោះពុំមានឈ្មោះនៅក្នុងបញ្ជីក្រុមហ៊ុន។

ដោយឡែកសម្រាប់ទឹកស្ទឹងមោងដែលមានសភាពកខ្វក់ និងឡើងស្លែពណ៌ខៀវនោះគឺពិតជាត្រឹមត្រូវ ប៉ុន្តែអ្នកស្រីបានអះអាងថា ប្រភពទឹកមានតែមួយ គឺស្ទឹងមោងឬស្សីដូច្នេះគ្មានជម្រើសណាមួយក្រៅពីនេះឡើយ ប៉ុន្តែដោយគ្រាន់តែក្រុមហ៊ុនត្រូវចំណាយទៅលើថ្នាំនិងក្លរីនច្រើន ដើម្បីបម្លែងទឹកឱ្យថ្លាសម្រាប់ប្រើប្រាស់បាន ប៉ុន្តែអ្នកស្រីក៏ទទួលស្គាល់ដែរថាយូរៗម្ដងទឹកមានសភាពកករដីគឺពិតប្រាកដ ប៉ុន្តែក្រុមហ៊ុនរបស់អ្នកស្រីមិនអាចផលិតទឹកឲ្យបានស្អាតដូចនៅទីក្រុងភ្នំពេញឡើយ ព្រោះសម្ភារៈនិងបរិក្ខារវាខុសគ្នាឆ្ងាយ។

បើទោះបីជាក្រុមហ៊ុនមានការស្រាយបំភ្លឺយ៉ាងណាក៏ដោយ ក៏មជ្ឈដ្ឋានពលរដ្ឋ​មួយចំនួននៅក្នុងស្រុកមោងឬស្សីដែលបច្ចុប្បន្នមានអ្នកប្រើប្រាស់ទឹកស្អាតជិត ៥.០០០ ខ្នង ផ្ទះ នៅក្នុងចំនួន ២៣ ភូមិ នៅតែមានការរិះគន់ទៅលើក្រុមហ៊ុនផលិតទឹកស្អាតនេះដដែល ដោយសារតែមានពេលខ្លះពលរដ្ឋ​សឹងមិនហ៊ានប្រើប្រាស់ទឹកដោយសារតែមានក្លិនមិនល្អទៅជាមួយ៕

អត្ថបទ : សោ និយមរ័ត្ន

The post ពលរដ្ឋ​លើកបញ្ហា ៣ ចំណុចរឿងទឹកស្អាត​នៅស្រុក​មោងឫស្សី ខណៈម្ចាស់​សហគ្រាស​ឆ្លើយតបទៅវិញ appeared first on Kampuchea Thmey Daily.