ស្រុកវាលវែង Archives - Kampuchea Thmey Daily

ព្រហើនមែន! ថៃបំផ្ទុះអាវុធ ពេលដែលអ្នកសង្កេតការណ៍អាស៊ានកំពុងចុះពិនិត្យនៅតំបន់ថ្មដា ពោធិ៍សាត់

Ngoeul Narath — Wed, 19 Nov 2025 05:49:23 +0000

ភាគីថៃបានបំផ្ទុះអាវុធ ក្នុងពេលដែលក្រុមអ្នកសង្កេតការណ៍អាស៊ានកំពុងចុះសង្កេតការណ៍ពិនិត្យ និងផ្ទៀងផ្ទាល់ការអនុវត្តបទឈប់បាញ់នៅច្រកច១ ឃុំថ្មដា ស្រុកវាលវែង ខេត្តពោធិ៍សាត់។ ក្រុមអ្នកសង្កេតការណ៍ត្រូវបង្ខំចិត្តផ្អាកការផ្ទៀងផ្ទាត់ និងដកថយ ដើម្បីគេចចេញពីគ្រោះថ្នាក់។

សេចក្ដីប្រកាសព័ត៌មានរបស់ក្រសួងការពារជាតិកម្ពុជា សរសេរដូច្នេះ៖«នៅព្រឹកថ្ងៃទី១៩ ខែវិច្ឆិកា ឆ្នាំ២០២៥ នៅវេលាម៉ោង១១:០៨នាទីព្រឹក ក្រុមអ្នកសង្កេតការណ៍អាស៊ាន (AOT) ក្រោមការសម្របសម្រួលរបស់ក្រសួងការពារជាតិកម្ពុជាបានចុះទៅពិនិត្យនិងផ្ទៀងផ្ទាត់ការអនុវត្តបទឈប់បាញ់នៅច្រកច១ ឃុំថ្មដា ស្រុកវាលវែង ខេត្តពោធិ៍សាត់។ នៅអំឡុងពេលចុះពិនិត្យនោះ មានការ ផ្ទុះអាវុធនៅខាងភាគីថៃ។ ដើម្បីសុវត្ថិភាព ក្រុមអ្នកសង្កេតការណ៍អាស៊ានសម្រេចផ្អាកការចុះផ្ទៀងផ្ទាត់នៅតំបន់នោះ និងដកថយត្រឡប់វិញ។ »។

រូបថតឯកសារ៖ ក្រុមអ្នកសង្កេតការណ៍អាស៊ានចុះពិនិត្យការអនវុត្តបទឈប់បាញ់នៅឃុំថ្មដា ស្រុកវាលវែង ខេត្តពោធី៍សាត់ កាលពីខែកញ្ញា កន្លងទៅ។

ក្រសួងការពារជាតិកម្ពុជា មិនបានលម្អិតថា ការបំផ្ទុះអាវុធពីសំណាក់ភាគីថៃនោះ មានរយៈពេលប៉ុន្មាននាទី ហើយបាញ់ឡើងទៅលើមេឃ ឬបាញ់ចូលមកខាងភាគីកម្ពុជា ឬយ៉ាងណាទេ។

ការផ្ទុះអាវុធរបស់ភាគីថៃ នាថ្ងៃទី១៩ ខែវិច្ឆិកា នេះ គឺបន្ទាប់ពីកាលពីពេលថ្មីៗនេះ មានសេចក្ដីរាយការណ៍ពីប្រភពព័ត៌មានដ៏គួរឱ្យទុកចិត្តបានមួយមកថា យោធាថៃគ្រោងវាយប្រហារនៅតំបន់ថ្មដា និងតំបន់អូរភ្លុកដំរី ក្នុងខេត្តពោធិ៍សាត់ នាថ្ងៃទី១៨ ខែវិច្ឆិកា ឆ្នាំ២០២៥។

តំបន់ច្រកច១ ឃុំថ្មដា ស្រុកវាលវែង ខេត្តពោធិ៍សាត់ ដែលភាគីថៃបំផ្ទុះអាវុធនាថ្ងៃទី១៩ ខែវិច្ឆិកា នេះ គឺស្ថិតនៅចន្លោះទីតាំង ដែលក្រសួងការបរទេសកម្ពុជា ធ្លាប់លើកឡើងថា យោធាថៃមានបំណងប្រើកម្លាំងដណ្តើម យកទឹកដីនៅទីតាំងចំនួន ១៧ ចាប់ពីខេត្តពោធិ៍សាត់ រហូតដល់ខេត្តកោះកុង ភាគពាយ័ព្យនៃប្រទេសកម្ពុជា។

សកម្មភាពបំផ្ទុះនេះ កើតឡើងបន្ទាប់ពីកាលពីថ្មីៗនេះ មានសេចក្ដីរាយការណ៍របស់សារព័ត៌មានថៃថា ភាគីថៃសម្រុកធ្វើផ្លូវ យុទ្ធសាស្ត្រសម្រាប់ដឹកជញ្ជូនយុទ្ធោបករណ៍ ស្បៀង សំដៅមកតំបន់អូរភ្លុកដំរី ឃុំថ្មដា ស្រុកវាលវែង ខេត្តពោធិ៍សាត់ និងធ្វើលេណដ្ឋាននៅទីតាំងជាប់ជាមួយព្រំដែនកម្ពុជា៕

The post ព្រហើនមែន! ថៃបំផ្ទុះអាវុធ ពេលដែលអ្នកសង្កេតការណ៍អាស៊ានកំពុងចុះពិនិត្យនៅតំបន់ថ្មដា ពោធិ៍សាត់ appeared first on Kampuchea Thmey Daily.

សហគមន៍ភូមិទំព័រនៅវាលវែង អះអាងបន្លែដាំដុះជុំវិញផ្ទះមិនខ្វះទីផ្សារ ថែមទាំងលក់បានថ្លៃ

Dy Bunnara — Thu, 04 Jul 2024 03:53:25 +0000

នៅស្រុកវាលវែង ជាតំបន់ព្រៃភ្នំដែលពលរដ្ឋមួយចំនួនធ្លាប់ចូលព្រៃកាប់ឈើប្រឈមមុខគ្រោះថ្នាក់ផ្សេងៗ ប៉ុន្តែពលរដ្ឋមួយភាគធំបច្ចុប្បន្នបានផ្លាស់ប្ដូរមុខរបរមកប្រកបរបរកសិកម្មដាំដុះដំណាំជុំវិញផ្ទះ។

សហគមន៍តំបន់ការពារធម្មជាតិភូមិទំព័រ នៃតំបន់ការពារធម្មជាតិភ្នំសំកុស ស្ថិតក្នុងភូមិទំព័រ ឃុំប្រមោយ ស្រុកវាលវែង ខេត្តពោធិ៍សាត់ មានពលរដ្ឋជាច្រើនគ្រួសារបានចងក្រងគ្នាជាសហគមន៍ ក្នុងការប្រកបរបរកសិកម្ម និងចិញ្ចឹមសត្វដើម្បីបានចំណូលទ្រទ្រង់ជីវភាព ដោយមានការគាំទ្របច្ចេកទេសនិងថវិកាពីអង្គការដៃគូនានា។

អ្នកស្រី ប៉េន ស៊ីថុល និងស្វាមី លោក កែវ ពក ជាសមាជិកសហគមន៍តំបន់ការពារធម្មជាតិភូមិទំព័រ ក្នុងឃុំប្រម៉ោយ ស្រុកវាលវែង ខេត្តពោធិ៍សាត់ ដែលមានដីជាង ២ ហិកតា បានដាំដុះដំណាំចម្រុះជុំវិញផ្ទះមានដូចជា ស្ពៃក្តោប ខាត់ណា ពោត ដំឡូង សណ្តែកគួរ ល្ហុង រួមទាំងការចិញ្ចឹមសត្វមួយចំនួនដើម្បីរកបានចំណូលបន្ថែម។

អ្នកស្រី ស៉ីថុល បានបញ្ជាក់ថា ការចាប់ផ្តើមដំបូងជាការផ្សងព្រេង ប៉ុន្តែដោយសារមានការជួយជ្រោមជ្រែងពីបណ្ដាអង្គការដៃគូរួមទាំងក្រសួងបរិស្ថានដែលជួយទាំងបច្ចេកទេស និងថវិកា ធ្វើឲ្យដាំដុះដំណាំកសិកម្មរបស់អ្នកស្រីទទួលបានជោគជ័យ។

អ្នកស្រីអះអាងថា ដំណាំបន្លែដែលអ្នកស្រីដាំដុះរាល់ថ្ងៃ ក្រៅពីមិនខ្វះទីផ្សារ ថែមទាំងលក់បានថ្លៃទៀតផង៕

The post សហគមន៍ភូមិទំព័រនៅវាលវែង អះអាងបន្លែដាំដុះជុំវិញផ្ទះមិនខ្វះទីផ្សារ ថែមទាំងលក់បានថ្លៃ appeared first on Kampuchea Thmey Daily.

ទៅវាលវែងកុំភ្លេចសាកម្ហូបក្រវាញ រុក្ខជាតិប្រចាំតំបន់ ថែមទាំងផ្តល់ជំនួយសុខភាពថែមទៀត

Dy Bunnara — Fri, 28 Jun 2024 04:26:11 +0000

ស្រុកវាលវែងជាតំបន់ព្រៃភ្នំ មានសក្ដានុពលទាក់ទាញសំខាន់គឺទេសចរណ៍ធម្មជាតិ។ នៅតំបន់នេះមានរុក្ខជាតិពិសេសម្យ៉ាងដែលដុះតាមព្រៃភ្នំ ដែលត្រូវបានអ្នកស្រុកវាលវែងខេត្តពោធិ៍សាត់ប្រាប់ថា អាចយកទៅច្នៃធ្វើជាម្ហូបដ៏មានឱជារស ថែមទាំងជំនួយដល់សុខភាពថែមទៀតផង។

រុក្ខជាតិដែលអ្នកស្រុកអះអាងនេះគឺដើមក្រវាញ ដែលតាមអ្នកស្រុកប្រាប់ថាមានតែដុះនៅស្រុកវាលវែងខេត្តពោធិ៍សាត់ និងតំបន់មួយចំនួនក្នុងខេត្តបាត់ដំបង។

រុក្ខជាតិក្រវាញត្រូវបានក្រសួងបរិស្ថានចុះបញ្ចូលទៅក្នុងសៀវភៅគ្រឿងទេសទាំង ៤៣ មុខ ដែលបានដាក់សម្ពោធឱ្យប្រើប្រាស់ជាផ្លូវការកាលឆ្នាំ២០២២។

ឯកសារបានបង្ហាញថា ក្រវាញជារុក្ខជាតិដុះដោយខ្លួនឯងក្នុងព្រៃធម្មជាតិរងក្រោមម្លប់ឈើធំៗ នៅតំបន់មិនសូវក្តៅ ហើយមានដីនិងអាកាសសើម ពិសេសនៅតំបន់ជួរភ្នំក្រវាញខេត្តពោធិ៍សាត់។

ប្រជាជនខ្មែរប្រើប្រាស់រុក្ខជាតិនេះជាគ្រឿងទេស និងឱសថ។ ស្លឹកខ្ចីអាចយកទៅធ្វើបន្លែសម្រាប់ស្ល ហើយផ្លែមានធាតុក្តៅអាចជួយឱ្យដើរខ្យល់ស្រួល ជាថ្នាំព្យាបាលក្រពះ ចុកសៀតច្រាលខ្យល់ និងអាហារមិនរលាយ។ ស្លឹកអាចព្យាបាលស្ពឹកស្រពន់ និងហើមអញ្ចាញធ្មេញ។ ផ្កាព្យាបាលឈឺឬស្រវាំងភ្នែក។ មើមយកទៅធ្វើថ្នាំកម្លាំង៕

ចុចអាន៖ ដំណាំ «ក្រវាញ» កំពុងទទួលបានការចាប់អារម្មណ៍ ខណៈទីផ្សារមានតម្លៃសមរម្យ

The post ទៅវាលវែងកុំភ្លេចសាកម្ហូបក្រវាញ រុក្ខជាតិប្រចាំតំបន់ ថែមទាំងផ្តល់ជំនួយសុខភាពថែមទៀត appeared first on Kampuchea Thmey Daily.

នៅស្រុកវាលវែង អ្នកវិនិយោគអាចជួលដីពីរដ្ឋរៀបចំបង្កើតតំបន់អេកូទេសចរណ៍

Dy Bunnara — Thu, 27 Jun 2024 04:12:18 +0000

ស្រុកវាលវែងជាស្រុកមួយមានសក្តានុពលលើវិស័យទេសចរណ៍ ខណៈរដ្ឋាភិបាលបានដាក់ចេញគោលនយោបាយជំរុញការវិនិយោគបង្កើតតំបន់អេកូទេសចរណ៍ ដើម្បីលើកស្ទួយជីវភាពនិងរុញកំណើនការអភិវឌ្ឍសេដ្ឋកិច្ចពលរដ្ឋក្នុងមូលដ្ឋាន។

លោក ម៉ុម បូផាន់ អភិបាលរងស្រុកវាលវែង

លោក ម៉ុម បូផាន់ អភិបាលរងស្រុកវាលវែង ខេត្តពោធិ៍សាត់បានបញ្ជាក់ថា នៅភូមិសាស្រ្តស្រុកវាលវែង រដ្ឋាភិបាលមិនបណ្តោយឲ្យក្រុមហ៊ុនវិនិយោគពាសវាលពាសកាលនោះទេ គឺបានកំណត់ទីតាំងសម្រាប់វិនិយោគ មិនអាចវិនិយោគស្រេចតែចិត្តនាំឲ្យប៉ះពាល់ដល់ប្រយោជន៍រួម និងប៉ះពាល់តំបន់អេកូទេសចរណ៍នៅក្នុងមូលដ្ឋាន។

លោក ម៉ុម បូផាន់ បានបន្តថា ក្នុងចំណោមផ្ទៃដីជាង ៤៩ ម៉ឺនហិតានៅស្រុកវាលវែង រដ្ឋាភិបាលបានកាត់ឆ្វៀលប្រគល់ជូនដល់ពលរដ្ឋទាំងដីសម្បទានសេដ្ឋកិច្ច និងដីសម្បទានសង្គមកិច្ចសរុបមានជាង ៤ ម៉ឺនហិកតា។ ក្នុងនោះរដ្ឋាភិបាលក៏បានរៀបចំដីសម្រាប់ជួលដល់ក្រុមហ៊ុនវិនិយោគ បង្កើតជាតំបន់អេកូទេសចរណ៍ខ្នាតតូច។

«អ្នកវិនិយោគដែលចង់វិនិយោគនៅស្រុកវាលវែង អាចជួលដីពីរដ្ឋមិនពិបាកទិញដីខុសច្បាប់ ពីព្រោះរដ្ឋបានអនុញ្ញាតឲ្យមានក្រុមហ៊ុនជួលដីពីរដ្ឋមកអភិវឌ្ឍ»។ លោក ម៉ុម បូផាន់ បញ្ជាក់។

សក្ដានុពលនៃស្រុកវាលវែងមានភូមិសាស្ត្រអំណោយផលសម្រាប់អេកូទេសចរណ៍ ដោយសារតំបន់នេះសំបូរធនធានធម្មជាតិ ជាគោលដៅសម្រាប់ទេសចរមកកម្សាន្ត។

បើតាមលោក ម៉ុម បូផាន់ បច្ចុប្បន្នអាជ្ញាធរបានរឹតបន្តឹងការចូលកាប់ទន្ទ្រានដីរដ្ឋដោយខុសច្បាប់ ហើយការវិនិយោគនៅតំបន់ហាមឃាត់មិនអនុញ្ញាតិនោះទេ។

ថ្មីៗនេះ រដ្ឋាភិបាលបានបង្កើតអនុគណៈកម្មការចម្រុះចុះបង្ក្រាប និងរិបអូសផ្ទៃដីព្រៃដែលរងការកាប់ទន្ទ្រានដោយខុសច្បាប់ជាង ៤ ម៉ឺនហិកតា ខណៈអាជ្ញាធរស្រុកវាលវែងមានផែនការនឹងដាំស្តារផ្ទៃដីព្រៃឈើឡើងវិញនៅទីតាំងដីដែលបានដកហូត។

អាជ្ញាធរស្រុកវាលវែង បានលើកឡើងពីមូលហេតុនៃការកាប់ទន្ទ្រានដីព្រៃរបស់រដ្ឋ ដោយសារដីនៅតំបន់ស្រុកវាលវែងបានឡើងថ្លៃ ដែលជំរុញឲ្យពលរដ្ឋនាំគ្នាទៅកាប់រុករានយកដីលក់ តាមការបំផុសបំផុលពីឈ្មួញខិលខូច។

ស្រុកវាលវែង ជាស្រុកមួយក្នុងចំណោមក្រុងស្រុកទាំងប្រាំពីរ នៃខេត្តពោធិ៍សាត់ មានព្រំប្រទល់ខាងលិចទល់នឹងខេត្តត្រាត ប្រទេសថៃ ខាងកើតទល់នឹងស្រុកភ្នំក្រវាញ មួយផ្នែកនៃស្រុកតាលោសែនជ័យ ខាងជើងទល់ស្រុករុក្ខគីរី ស្រុកគាស់ក្រឡ ស្រុកសំឡូត ខេត្តបាត់ដំបង ខាងត្បូងទល់នឹងស្រុកមណ្ឌលសីមា ខេត្តកោះកុង ។

ស្រុកវាលវែង មាន ៥ ឃុំ ភូមិផ្លូវការចំនួន ២០ ភូមិ និងភូមិឧបសម្ព័ន្ធចំនួន ២៤ ភូមិ និងមានចំនួនគ្រួសារសរុប ៩ ១៣៣ គ្រួសារ មានប្រជាពលរដ្ឋរស់នៅសរុបចំនួន ៤០ ៤៩៨ នាក់ ស្រី ២១ ០៤៨ នាក់ ប្រជាពលរដ្ឋដែលមានអាយុចាប់ពី ១៨ ឆ្នាំ ឡើងមានចំនួន ២២ ៧៤០ នាក់ ស្រី ១១ ៣៣៥ នាក់៕

The post នៅស្រុកវាលវែង អ្នកវិនិយោគអាចជួលដីពីរដ្ឋរៀបចំបង្កើតតំបន់អេកូទេសចរណ៍ appeared first on Kampuchea Thmey Daily.

ដាក់ឱសានវាទចុះរៀបចំតំបន់អន្ទង់អាំង (ភ្នំ ១៥០០) ឱ្យទៅជាតំបន់បៃតង ជាតំបន់អេកូទេសចរណ៍ធម្មជាតិ

Dy Bunnara — Wed, 26 Jun 2024 09:50:32 +0000

រដ្ឋបាលខេត្តពោធិ៍សាត់បានចេញសេចក្តីជូនដំណឹងពីការចុះរៀបចំ និងដោះស្រាយតំបន់អន្ទង់អាំង (ភ្នំ១៥០០) នៅក្នុងស្រុកវាលវែង ខេត្តពោធិ៍សាត់ ដើម្បីប្រែក្លាយឱ្យទៅជាតំបន់បៃតង ជាគោលដៅអេកូទេសចរណ៍ធម្មជាតិស្របតាមការណែនាំពីប្រមុខរដ្ឋាភិបាលកម្ពុជា។

សេចក្តីជូនដំណឹងរបស់រដ្ឋបាលខេត្តពោធិ៍សាត់បានលើកពាក់ព័ន្ធដល់ប្រជាពលរដ្ឋចំនួន ៩៨ គ្រួសារ នៅតំបន់អន្ទង់អាំង (ភ្នំ១៥០០) ក្នុងភូមិសាស្ត្រ ភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់។

ដើម្បីធានាបានការអនុវត្តមានប្រសិទ្ធភាពខ្ពស់ រដ្ឋបាលខេត្តបានជូនដំណឹងដល់ប្រជាពលរដ្ឋពាក់ព័ន្ធតំបន់អន្ទង់អាំងទាំង ៩៨ គ្រួសារដូចខាងក្រោម៖

១. សម្រាប់ប្រជាពលរដ្ឋទាំង ៦៧ គ្រួសារ ដែលយល់ព្រមចាកចេញពីតំបន់អន្ទង់អាំង (ភ្នំ១៥០០) ត្រូវបន្តសហការជាមួយអាជ្ញាធរភូមិ ឃុំ ស្រុក និងខេត្ត ដើម្បីត្រៀមរុះរើចាកចេញពីតំបន់អន្ទង់អាំងទៅទីតាំងថ្មី ដែលរដ្ឋបាលខេត្តទទួលបានការអនុញ្ញាតក្នុងការរៀបចំគោលនយោបាយដីធ្លីពីរាជរដ្ឋាភិបាលជូនពលរដ្ឋទាំង ៦៧ គ្រួសារ ព្រមទាំងត្រូវចូលរួមដាំដើមឈើស្តារឡើងវិញនៅតាមចន្លោះដីដែលគ្មានដំណាំ ឬដីទំនេរដែលធ្លាប់កាន់កាប់កន្លងមក។

២. សម្រាប់ប្រជាពលរដ្ឋចំនួន ៥ គ្រួសារ ដែលយល់ព្រមចាកចេញ ហើយទទួលបានគោលការណ៍អនុញ្ញាតបន្តប្រមូលផលទុរេនរយៈពេលបីឆ្នាំ ដើម្បីរំលោះទុនដែលបានវិនិយោគ ដោយត្រូវចូលរួមដាំដើមឈើនៅចន្លោះដីដែលគ្មានដំណាំ និងមិនត្រូវសាងសង់ហេដ្ឋារចនាសម្ព័ន្ធថ្មីបន្ថែម ប៉ុន្តែអាចកាន់កាប់និងអាស្រ័យផលនៅទីតាំងថ្មីជាបណ្ដោះអាសន្ន លុះត្រាបោះបង់ទីតាំងចាស់ ទើបមានសិទ្ធស្នើសុំធ្វើប័ណ្ណកម្មសិទ្ធិលើទីតាំងថ្មីបាន។

៣. សម្រាប់ប្រជាពលរដ្ឋចំនួន ៣១ គ្រួសារ ដែលមិនទាន់យល់ព្រមចាកចេញពីតំបន់អន្ទង់អាំង ត្រូវពិចារណាសម្រេចចិត្តក្នុងរយៈពេល ៣០ ថ្ងៃ (ចាប់ពីថ្ងៃជូនដំណឹង) ក្នុងការយល់ព្រមចាកចេញ ហើយដាក់ពាក្យ ស្នើសុំគោលនយោបាយដីធ្លីមករដ្ឋបាលខេត្តពោធិ៍សាត់។

ករណីផុតកំណត់រយៈពេល ៣០ ថ្ងៃ នៅតែមិនព្រមសម្រេចចិត្តរុះរើចាកចេញ ឬដាក់ពាក្យស្នើសុំគោលនយោបាយដីធ្លីទេ ការខាតបង់ផលប្រយោជន៍ផ្សេងៗរបស់បងប្អូនប្រជាពលរដ្ឋជាការទទួលខុសត្រូវដោយខ្លួនឯង ព្រមទាំងត្រូវប្រឈមក្នុងការទទួលខុសត្រូវចំពោះមុខច្បាប់ផងដែរ។

ឆ្លើយតបការសាកសួរពីកម្ពុជាថ្មីក្នុងដំណើរទៅស្រុកវាលវែងកាលពីសប្តាហ៍មុននេះ លោក ម៉ុម បូផាន់ អភិបាលរងស្រុកវាលវែង ខេត្តពោធិ៍សាត់បានបញ្ជាក់ថា ផ្ទៃដីនៅតំបន់ជើងភ្នំ ១៥០០ ដែលអាជ្ញាធរបង្រ្កាបបានពីការរុករានដោយខុសច្បាប់មានទំហំប្រហែល ៥០ ហិកតា។

លោកថា ជាគោលដៅរបស់រដ្ឋាភិបាលនៅតំបន់ភ្នំ ១៥០០ ឬផ្លូវអន្ទង់អាំង គឺមិនអនុញ្ញាតិឲ្យមានការសាងសង់សំណង់ណាមួយនោះទេ ដោយរក្សាទុកជាព្រៃឈើធម្មជាតិដើម្បីរៀបចំជាតំបន់អេកូទេសចរណ៍។

រដ្ឋបាលស្រុកវាលវែង បានត្រៀមដាំកូនឈើចម្រុះរាប់ម៉ឺនដើមនៅចំណុចផ្លូវអន្ទង់អាំងលើភ្នំ ១៥០០ តាមបណ្ដោយផ្លូវជាតិលេខ ៥៥ ក្នុងស្រុកវាលវែង ខេត្តពោធិ៍សាត់ ក្រោយទទួលកូនឈើព្រៃត្រូពិកដ៏កម្រចំនួន ២ ម៉ឺនដើម ពីអង្គការសម្ព័ន្ធមិត្តសត្វព្រៃ (Wildlife Alliance)។

លោក ម៉ុម បូផាន់ អភិបាលរងស្រុកវាលវែង ខេត្តពោធិ៍សាត់បានឲ្យដឹងថា កូនឈើទាំងនោះនឹងយកទៅដាំនៅតំបន់ជើងភ្នំ ១៥០០ តាមផ្លូវអន្ទង់អាំង ដែលជាតំបន់គោលដៅអេកូទេសចរណ៍ដ៏ទាក់ទាញនៅស្រុកវាលវែងខេត្តពោធិ៍សាត់។

កូនឈើចំនួនពីរម៉ឺនដើម ដែលគ្រោងដាំនៅចំណុចផ្លូវអន្ទង់អាំង មានកូនឈើចំនួន ៧ ប្រភេទ ត្រូវបានចាត់ថ្នាក់ជាប្រភេទរងការគំរាមកំហែង បើយោងតាមសហភាពអន្តរជាតិដើម្បីការអភិរក្សធម្មជាតិ (IUCN)។ កូនឈើទាំងនោះរួមមាន ធ្នង់ ក្រញូង បេង នាងនួន ផ្តៀក គគីរ ឈើទាល និងប្រភេទផ្សេងទៀត៕

The post ដាក់ឱសានវាទចុះរៀបចំតំបន់អន្ទង់អាំង (ភ្នំ ១៥០០) ឱ្យទៅជាតំបន់បៃតង ជាតំបន់អេកូទេសចរណ៍ធម្មជាតិ appeared first on Kampuchea Thmey Daily.

មានប្រវត្តិជាអ្នកកាប់ឈើខុសច្បាប់ ប្តូរធ្វើកសិកម្មដាំដំណាំជុំវិញផ្ទះ មួយខែរកចំណូលបានជិត ១ ពាន់ដុល្លារ

Dy Bunnara — Tue, 25 Jun 2024 04:55:25 +0000

មានអតីតកាលជាអ្នកប្រកបរបរកាប់ឈើខុសច្បាប់ ប៉ុន្តែគ្រួសារអ្នកស្រី ពេន ស៊ីថុល បានកែប្រែជីវភាពល្អប្រសើរជាងមុន តាមរយៈការប្តូរមុខរបរមកធ្វើកសិកម្ម ដោយមានការជួយជ្រោមជ្រែងនិងគាំទ្រពីក្រសួងនិងស្ថាប័នអង្គការនានា។

អ្នកស្រី ពេន ស៊ីថុល

អ្នកស្រី ប៉េន ស៊ីថុល ជាសមាជិកសហគមន៍តំបន់ការពារធម្មជាតិភូមិទំព័រ នៃតំបន់ការពារធម្មជាតិភ្នំសំកុស ស្ថិតក្នុងភូមិទំព័រ ឃុំប្រម៉ោយ ស្រុកវាលវែង ខេត្តពោធិ៍សាត់បានលើកឡើងពីភាពខុសគ្នា ក្រោយពីគ្រួសារអ្នកស្រីផ្លាស់ប្ដូរមុខរបរពីការចូលព្រៃកាប់ឈើកាលពីច្រើនឆ្នាំមុន ដោយបង្វែរមកធ្វើកសិកម្មដាំដុះដំណាំចម្រុះជុំវិញផ្ទះ ដែលក្នុងមួយខែគ្រួសារអ្នកស្រីអាចរកចំណូលបានប្រហែល ៤ លានរៀល។

អ្នកស្រីបានប្រាប់ពីប្រវត្តិថា កាលពីអំឡុងឆ្នាំ ២០១០ ប្តីអ្នកស្រីបានប្រកបរបរចូលព្រៃកាប់ឈើដែលត្រូវប្រឈមមុខគ្រោះថ្នាក់គ្រប់បែបយ៉ាង ហើយចំណូលទៀតរកបានត្រឹមដោះទាល់ជីវភាពមួយគ្រាៗប៉ុណ្ណោះ។ ការប្ដូរមកប្រកបរបរកសិកម្មដោយដាំដុះដំណាំចម្រុះ រួមទាំងចិញ្ចឹមសត្វមួយចំនួនផងនោះ បានធ្វើឲ្យជីវភាពគ្រួសាររបស់អ្នកស្រីបានរីកចម្រើនធូធារជាងមុនច្រើន ថែមទាំងមានលំនឹងខាងផ្លូវចិត្តរស់នៅមិនខ្លាចមុខខ្លាចក្រោយដូចមុនទៀត៕

The post មានប្រវត្តិជាអ្នកកាប់ឈើខុសច្បាប់ ប្តូរធ្វើកសិកម្មដាំដំណាំជុំវិញផ្ទះ មួយខែរកចំណូលបានជិត ១ ពាន់ដុល្លារ appeared first on Kampuchea Thmey Daily.

ផ្លូវអន្ទង់អាំងលើភ្នំ ១៥០០ ដាក់អាទិភាពដាំកូនឈើព្រៃត្រូពិកកម្រ ២ ម៉ឺនដើម ស្តារព្រៃឈើធម្មជាតិឡើងវិញ

Dy Bunnara — Mon, 24 Jun 2024 04:59:26 +0000

ដោយមានការគាំទ្រពីអង្គការសម្ព័ន្ធមិត្តសត្វព្រៃ (Wild Alliance) រដ្ឋបាលស្រុកវាលវែងដែលទើបទទួលបានកូនឈើព្រៃត្រូពិកដ៏កម្រចំនួន ២ ម៉ឺនដើម បានដាក់គោលដៅនឹងដាំកូនឈើចម្រុះនៅចំណុចផ្លូវអន្ទង់អាំងលើភ្នំ ១៥០០ តាមបណ្ដោយផ្លូវជាតិលេខ ៥៥ ក្នុងស្រុកវាលវែង ខេត្តពោធិ៍សាត់។

ក្នុងចំណោមកូនឈើទាំងនោះ មានកូនឈើចំនួន ៧ ប្រភេទ ដែលត្រូវបានចាត់ថ្នាក់រងការគំរាមកំហែង បើយោងតាមសហភាពអន្តរជាតិដើម្បីការអភិរក្សធម្មជាតិ (IUCN)។

លោក ម៉ុម បូផាន់ អភិបាលរងស្រុកវាលវែង ខេត្តពោធិ៍សាត់បានឲ្យដឹងថា កូនឈើទាំងនោះនឹងត្រូវបានថែទាំនិងយកទៅដាំនៅតំបន់ជើងភ្នំ ១៥០០ តាមផ្លូវអន្ទង់អាំង ដែលជាតំបន់គោលដៅអេកូទេសចរណ៍ដ៏ទាក់ទាញនៅស្រុកវាលវែងខេត្តពោធិ៍សាត់។

កាលពីប៉ុន្មានខែមុននេះ ប្រមុខដឹកនាំកម្ពុជាសម្តេចធិបតី ហ៊ុន ម៉ាណែត បានដាក់បទបញ្ជាឲ្យចុះបង្ក្រាបបទល្មើសធនធានធម្មជាតិនៅស្រុកវាលវែង ហើយលទ្ធផលដកហូតបានដីព្រៃដែលបានកាប់រុករានយ៉ាងអានាធិបតេយ្យបានជាង ៤ ម៉ឺនហិកតា។

លោក ម៉ុម បូផាន់ បានបញ្ជាក់ថា ក្នុងចំណោមផ្ទៃដីជាង ៤ ម៉ឺនហិកតា ដែលដកហូតបានពីជនល្មើស រដ្ឋបាលស្រុកនឹងដាំស្តារព្រៃឈើឡើងវិញ ដោយដាក់គោលដៅចាប់ផ្តើមមុនគេនៅចំណុចភ្នំ ១៥០០ ដែលរដ្ឋាភិបាលបានប្រកាសដាក់ជាតំបន់អេកូទេសចរណ៍ធម្មជាតិ និងបន្តដាំនៅតាមតំបន់មួយចំនួនទៀតដែលរងការកាប់ទន្ទ្រានដោយខុសច្បាប់។

លោកអភិបាលរងស្រុក ក៏លើកឡើងពីមូលហេតុនៃការកាប់ទន្ទ្រានដីព្រៃរបស់រដ្ឋ ដោយសារនៅតំបន់ស្រុកវាលវែងដីមានការឡើងថ្លៃ ដែលជំរុញឲ្យពលរដ្ឋនាំគ្នាទៅកាប់រុករានយកដីលក់ តាមការបំផុសបំផុលពីមេក្លោងជាឈ្មួញខិលខូចមួយចំនួន។

បើតាមអភិបាលស្រុកវាលវែង នៅស្រុកវាលវែងមានផ្ទៃដីជាង ៤៩ ម៉ឺនហិកតា ហើយផ្ទៃដីព្រៃដែលរងការបាត់បត់តាមការប៉ាន់ស្មានមានប្រហែល ១០ ភាគរយ។ លោកថា ថ្មីៗនេះក្រោយរដ្ឋាភិបាលបានបង្កើតអនុគណៈកម្មការចម្រុះចុះបង្ក្រាបនិងរិបអូសផ្ទៃដីព្រៃដែលរងការកាប់ទន្ទ្រានដោយខុសច្បាប់ជាង ៤ ម៉ឺនហិកតា រដ្ឋបាលស្រុកមានផែនការនឹងដាំស្តារជាផ្ទៃដីព្រៃឈើឡើងវិញ។

នៅក្នុងពិធីប្រគល់កូនឈើ ២ ម៉ឺនដើម ដល់រដ្ឋបាលស្រុកវាលវែង លោក John Willis នាយកប្រចាំប្រទេសអង្គការសម្ព័ន្ធមិត្តសត្វព្រៃបានបញ្ជាក់ថា ការផ្តល់កូនឈើដល់រដ្ឋបាលស្រុកវាលវែង ជាការចូលរួមចំណែកដើម្បីលើកសម្រស់ធម្មជាតិពណ៌បៃតងឡើងវិញសម្រាប់ស្រុកព្រៃភ្នំដែលមានសក្តានុពលលើវិស័យទេសចរណ៍ធម្មជាតិ។

លោក John Willis បានលើកឡើងថា ដើម្បីចូលរួមគាំទ្រយុទ្ធនាការដាំដើមឈើមួយលានដើមក្នុងមួយឆ្នាំរបស់ក្រសួងបរិស្ថាន អង្គការសម្ព័ន្ធមិត្តសត្វព្រៃបានបរិច្ចាគកូនឈើចំនួន ១៩៧ ០០០ ដើម ដែលជាប្រភេទពូជព្រៃត្រូពិកចំនួន ១៨ ប្រភេទរួមមានដូចជា ធ្នង់ គ្រញូង បេង នាងនួន ក្លៀក គគីរ ឈើទាល និងពូជប្រភេទផ្សេងទៀត។

ក្នុងចំណោមកូនឈើចំនួន ១៩៧ ០០០ ដើម អង្គការសម្ព័ន្ធមិត្តសត្វព្រៃ នឹងបរិច្ចាគជូនដល់ក្រសួងបរិស្ថាន មន្ទីរបរិស្ថានខេត្តកោះកុង មន្ទីរបរិស្ថានខេត្តកំពង់ស្ពឺ មន្ទីរបរិស្ថានខេត្តពោធិ៍សាត់ រដ្ឋបាលស្រុកវាលវែង និងមួយផ្នែកសម្រាប់រក្សាទុកដាំនៅចំណុចអន្ទង់អាំងតាមបណ្ដោយផ្លូវជាតិលេខ ៥៥។

ក្នុងឆ្នាំ២០២៣ ក្រសួងបរិស្ថានដែលមាន លោក អ៊ាង សុផល្លែត ជារដ្ឋមន្ត្រីបានដាក់ចេញយុទ្ធសាស្ត្រចក្រាវិស័យបរិស្ថាន ក្នុងគោលបំណងតម្រង់ទិស និងចង្អុលបង្ហាញការងារជាអាទិភាព ដើម្បីធានាឱ្យបាននូវចីរភាពបរិស្ថាន និងសុក្រឹត្យកម្មបរិស្ថានកិច្ច ឆ្លើយតបនឹងការប្រែប្រួលអាកាសធាតុ និងលើកកម្ពស់សេដ្ឋកិច្ចបៃតង សំដៅសម្រេចគោលដៅយុទ្ធសាស្ត្របញ្ចកោណ «គឺជាប្រទេសដែលមានអព្យាក្រឹត្យកាបូន និងមានគម្របព្រៃឈើ ៦០% នៅឆ្នាំ២០៥០។

យុទ្ធសាស្ត្រចក្រវិស័យបរិស្ថានមានមុំចំនួន ៣ និងមានយុទ្ធសាស្ត្របីសំខាន់គឺ ទី១ ភាពស្អាត ទី២ ភាពបៃតង និងទី ៣ ចីរភាព៕

The post ផ្លូវអន្ទង់អាំងលើភ្នំ ១៥០០ ដាក់អាទិភាពដាំកូនឈើព្រៃត្រូពិកកម្រ ២ ម៉ឺនដើម ស្តារព្រៃឈើធម្មជាតិឡើងវិញ appeared first on Kampuchea Thmey Daily.

សាលាបឋមសិក្សា ស្រែយក្ស នឹងត្រូវកែលម្អសាងសង់អគារសិក្សាថ្មី ក្រោមការជួយឧបត្ថម្ភពីសំណាក់សប្បុរសជន

Sous Sith — Thu, 07 Mar 2024 04:33:52 +0000

សាលាបឋមសិក្សាស្រែយក្ស ជាឧបសម្ព័ន្ធមួយ នៃសាលាបឋមសិក្សាកុំប៉ង ដែលនៅចំណុចតំបន់ (ស្រែយក្ស) ស្ថិតនៅក្នុង ភូមិកុំប៉ង ឃុំក្រពើពីរ ស្រុកវាលវែង ខេត្តពោធិ៍សាត់ ត្រូវបានសាធារណជន ជួយឧបត្ថម្ភគាំទ្រ ក្នុងការជួសជុល និងកែលម្អ ដើម្បីសាងសង់អគារសិក្សាថ្មី ជូនសិស្សានុសិស្សចំនួន ២ថ្នាក់ គឺថ្នាក់ទី១ និង ទី២ មានសិស្សសរុបចំនួន ២១នាក់ ស្រី ៩នាក់ និងមានគ្រូកិច្ចសន្យាចំនួន ១នាក់ ដែលកំពុងបង្រៀននៅទីនោះផ្ទាល់។

លោក នី សុវណ្ណ អ្នកផ្ដួចផ្ដើមគំនិតបង្កើតមូលនិធិ ដើម្បីសាងសង់អគារថ្មី បានប្រាប់ឱ្យ កម្ពុជាថ្មី ដឹងថា មូលហេតុ ដែលលោក និងសប្បុរសជននានា បានរួមគ្នាបង្កើតមូលនិធិ ស្វែងរកថិវិកា ដើម្បីសាងសង់អគារថ្មី នៃសាលាបឋមសិក្សាស្រែយក្ស ដោយសារតែលោក បានមើលឃើញថា តំបន់ស្រែយក្ស ជាតំបន់ដាច់ស្រយ៉ាលខ្លាំង ជាក់ស្តែងសាលាបឋមសិក្សានេះ នៅឆ្ងាយខ្លាំងពីទីរួមខេត្តពោធិ៍សាត់ ផងដែរ។ លោក បន្ថែមថា សម្រាប់ពេលបច្ចុប្បន្ន សាលាបឋមសិក្សាស្រែយក្ស កំពុងតែស្ថិតនៅក្នុងគម្រោងនៃរៀបចំសាងសង់នៅឡើយ ព្រោះកំពុងតែរកច្បាប់ពីអាជ្ញាធរ ភូមិ ឃុំ ក្នុងមូលដ្ឋាន ទើបរៀបចំសាងសង់អគារសិក្សាថ្មី ១ខ្នង មាន ៣បន្ទប់ និងការកសាងអណ្ដូងទឹកសម្រាប់ប្រើប្រាស់ជាប្រយោជន៍រួម ក្នុងសាលាបឋមសិក្សាស្រែយក្សទាំងមូល។

លោក នី សុវណ្ណ បានបញ្ជាក់ទៀតថា ថវិកានៃការសាងសង់អគារសិក្សាថ្មីនេះ កើតចេញពីការឧបត្ថម្ភពីសំណាក់សប្បុរសជនខ្មែរនៅឯបរទេសខ្លះ និងមួយចំណែកទៀតនោះ បានមកពីសប្បុរសជនក្នុងស្រុក ដែលថវិកាដែលត្រូវការយកមកសាងសង់អគារសិក្សាថ្មីនេះ អាចចំណាយរហូតទៅដល់ប្រមាណជិត ៤ម៉ឺនដុល្លារ ពីព្រោះត្រូវចំណាយទៅលើសម្ភារៈ ក្នុងនោះមាន ៖ បន្ទប់ទឹក អណ្ដូងទឹក អគារ ១ខ្នង មាន៣បន្ទប់ រួមទាំងសម្ភារៈសិក្សាផ្សេងៗទៀត ផងដែរ។

លោក នី សុវណ្ណ ក៏បានថ្លែងអំណរគុណចំពោះសប្បុរសជនទាំងអស់ ដែលបានចូលរួមឧបត្ថម្ភគាំទ្រថវិកាតាមរយៈរូបលោកកន្លងមក ដើម្បីយកមកធ្វើជាសប្បុរសធម៌ ពិសេសទៀតនោះការសាងសង់អគារសិក្សាថ្មីជូនដល់សិស្សានុសិស្ស ក្នុងសាលាបឋមសិក្សាស្រែយក្សនាពេលខាងមុខនេះ។

សូមជម្រាបថា សាលាបឋមសិក្សាស្រែយក្ស ជាសាលាឧបសម្ព័ន្ធមួយ នៃសាលាបឋមសិក្សាកុំប៉ង ត្រូវបានបង្កើតឡើងនៅឆ្នាំ ២០២៣-២០២៤ មានសិស្សថ្នាក់ទី១ និងថ្នាក់ទី២ ជាគួបគ្នា មានសិស្សសរុប ២១នាក់ ស្រី៩នាក់ និងមានគ្រូបង្រៀនជាប់កិច្ចសន្យាចំនួន១នាក់។ ដើម្បីអាចទទួលបានគ្រូបង្រៀន សាលាឧបសម្ព័នស្រែយក្ស ត្រូវដាក់បញ្ចូលចំនួនថ្នាក់ និងសិស្សទៅក្នុងសាលាបឋមសិក្សាកុំប៉ង រួចដាក់ឈ្មោះថា «សាលាឧបសម្ព័ន្ធ ស្រែយក្ស» តាមការកំណត់របស់ក្រសួងអប់រំ យុវជន និងកីឡា៕

អត្ថបទ ៖ សួស សិត

The post សាលាបឋមសិក្សា ស្រែយក្ស នឹងត្រូវកែលម្អសាងសង់អគារសិក្សាថ្មី ក្រោមការជួយឧបត្ថម្ភពីសំណាក់សប្បុរសជន appeared first on Kampuchea Thmey Daily.

ស្រុកវាលវែង Archives - Kampuchea Thmey Daily

ព្រហើនមែន! ថៃបំផ្ទុះអាវុធ ពេលដែលអ្នកសង្កេតការណ៍អាស៊ានកំពុងចុះពិនិត្យនៅតំបន់ថ្មដា ពោធិ៍សាត់

សហគមន៍​​ភូមិ​ទំព័រ​នៅវាលវែង អះអាង​បន្លែ​ដាំដុះ​ជុំវិញ​ផ្ទះ​មិន​ខ្វះទីផ្សារ ​ថែមទាំងលក់​បាន​ថ្លៃ

ទៅ​វាលវែង​កុំ​ភ្លេច​សាក​ម្ហូប​ក្រវាញ រុក្ខជាតិ​ប្រចាំ​តំបន់ ថែម​ទាំង​ផ្តល់​ជំនួយ​សុខភាព​ថែម​ទៀត

នៅ​ស្រុក​វាលវែង​ អ្នកវិនិយោគ​អាច​ជួលដីពី​រដ្ឋ​រៀបចំ​បង្កើត​តំបន់អេកូទេសចរណ៍

ដាក់​ឱសានវាទ​​ចុះ​រៀបចំ​តំបន់​អន្ទង់អាំង (ភ្នំ ១៥០០) ឱ្យ​ទៅជា​តំបន់​បៃតង ជា​តំបន់អេកូទេសចរណ៍ធម្មជាតិ

សាលាបឋមសិក្សា ស្រែយក្ស នឹងត្រូវកែលម្អសាងសង់អគារសិក្សាថ្មី ក្រោមការជួយឧបត្ថម្ភពីសំណាក់សប្បុរសជន

សហគមន៍ភូមិទំព័រនៅវាលវែង អះអាងបន្លែដាំដុះជុំវិញផ្ទះមិនខ្វះទីផ្សារ ថែមទាំងលក់បានថ្លៃ

ទៅវាលវែងកុំភ្លេចសាកម្ហូបក្រវាញ រុក្ខជាតិប្រចាំតំបន់ ថែមទាំងផ្តល់ជំនួយសុខភាពថែមទៀត

នៅស្រុកវាលវែង អ្នកវិនិយោគអាចជួលដីពីរដ្ឋរៀបចំបង្កើតតំបន់អេកូទេសចរណ៍

ដាក់ឱសានវាទចុះរៀបចំតំបន់អន្ទង់អាំង (ភ្នំ ១៥០០) ឱ្យទៅជាតំបន់បៃតង ជាតំបន់អេកូទេសចរណ៍ធម្មជាតិ