ការ​ណែនាំ​របស់ធនាគាររដ្ឋ​​​វៀតណាម (SBV) ដែលជាធនាគារកណ្ដាល​របស់​ប្រទេស​ ធ្វើ​ឡើង​ចំពេល​ដែល​តម្លៃស្រូវអង្ករធ្លាក់ចុះគួរ​ឱ្យ​ព្រួយ​បារម្ភ។ យោងតាមក្រសួងកសិកម្ម​វៀតណាម​ ការនាំចេញអង្កររបស់​វៀតណាម​ក្នុងខែកុម្ភៈ មានចំនួន ៥៦០ ០០០ តោន ឬ​ ២៨៨,២ លាន​ដុល្លារ ដោយធ្លាក់ចុះ ១៣,៦ ភាគរយ បើ​គិតពីតម្លៃ ធៀប​នឹង​រយៈពេល​ដូចគ្នា​កាលពីឆ្នាំមុន។ ​អង្ករវៀតណាម​ត្រូវ​បាន​នាំចេញក្នុងតម្លៃ​ជាមធ្យម ៥៥៣,៦០ ដុល្លារ/តោន ក្នុងរយៈពេល​២ខែដំបូងនៃឆ្នាំ ២០២៥ ​ដោយ​ធ្លាក់ចុះ ១៨,៣ ភាគរយ ធៀប​នឹ​ងរយៈពេល​ដូចគ្នា​កាលពីឆ្នាំមុន។ ​

សមាគមស្បៀងអាហារវៀតណាម (VFA) បាន​ឱ្យដឹងថា​ ការធ្លាក់ចុះ​នេះ​បណ្ដាល​មក​ពី​កំណើន​នៃការផ្គត់ផ្គង់​សកល​ ក្រោយ​ពេល​ឥណ្ឌា​បើក​ការនាំចេញ​អង្ករឡើងវិញ ខណៈផលិតកម្មស្រូវក៏កើនឡើង​ទាំងនៅទីផ្សារប្រទេសវៀតណាម ថៃ និង ប៉ាគីស្ថាន​។ ​

បន្ទាប់ពីការណែនាំកាលពីដើម​ខែ​នេះ​របស់លោក​នាយករដ្ឋមន្ត្រី ផាម មិញ ឈិញ ​ស្តីពីតុល្យភាពការផ្គត់ផ្គង់ និងតម្រូវការអង្ករ ធនាគាររដ្ឋវៀតណាមបានណែនាំដល់ធនាគារផ្សេង​ៗ ​ឱ្យ​គាំទ្រដល់ការផលិត និងនាំចេញអង្ករ។ ធនាគារទាំងនោះ ត្រូវតែធានាឱ្យបាននូវមូលនិធិគ្រប់គ្រាន់សម្រាប់កម្ចីលើ​សកម្មភាពទាក់ទងនឹងស្រូវអង្ករ​ដូចជា​ផលិតកម្ម ការកែច្នៃ ការទិញ ការ​ស្ដុកទុកបណ្ដោះអាសន្ន និងការនាំចេញ​ជាដើម​ ក្នុងឆ្នាំ ២០២៥នេះ។ ​

SBV ក៏បាន​លើកទឹកចិត្តឱ្យធនាគារ និងអាជីវកម្មវៀតណាម សម្របសម្រួលជាមួយសមាគមស្បៀងអាហារវៀតណាម និងសមាគមឧស្សាហកម្មអង្ករវៀតណាម ផងដែរ​ ដើម្បីចែករំលែកព័ត៌មានអំពីគោលនយោបាយឥណទាន និងជួយអាជីវកម្មទទួលបានហិរញ្ញប្បទាននៅពេលចាំបាច់។

​ក្រៅពីវៀតណាម ថៃដែលជាប្រទេស​ផ្គត់ផ្គង់​អង្ករដ៏ធំ ​ក៏​បាន​ចាត់​វិធានការ​ដើម្បី​ឆ្លើយ​តប​នឹង​ការ​ធ្លាក់​ចុះ​តម្លៃ​អង្ករផងដែរ។ រដ្ឋមន្ត្រីពាណិជ្ជកម្មថៃ លោក Pichai Naripthaphan បាននិយាយកាលពីថ្ងៃព្រហស្បតិ៍សប្ដាហ៍មុន​ថា ​ថៃកំពុងស្វែងរកកិច្ចសហប្រតិបត្តិការជាមួយ​ឥណ្ឌា និងវៀតណាម ដើម្បីស្វែងរកមធ្យោបាយដើម្បីដោះស្រាយការធ្លាក់ថ្លៃស្រូវ។

Pichai បានប្រាប់សភាថា ​ថៃកំពុងពិភាក្សាជាមួយប្រទេសទាំង ២ ដើម្បីកាត់បន្ថយការប្រកួតប្រជែងដោយសង្ឃឹមថា នេះ​នឹងបង្កើតតុល្យភាពតម្លៃស្រូវនៅ​លើ​ទីផ្សារពិភពលោក និងជួយកសិករឱ្យ​មាន​ស្ថិរភាព​ប្រាក់ចំណូល៕

The post ធនាគារកណ្តាលវៀតណាមជំរុញការផ្តល់ប្រាក់កម្ចីដល់វិស័យស្រូវអង្ករ ចំពេលតម្លៃធ្លាក់ចុះ appeared first on Kampuchea Thmey Daily.

CoQ10 គឺជាសារធាតុប្រឆាំងអុកស៊ីតកម្មដែលរាងកាយរបស់យើងផលិតដោយធម្មជាតិ ហើយវាមានសារៈសំខាន់សម្រាប់សុខភាពទូទៅ ជាពិសេសសុខភាពបេះដូងតែម្តង។ នៅពេលមនុស្សកាន់តែចាស់ សមត្ថភាពរបស់រាងកាយក្នុងការផលិតសារធាតុប្រឆាំងអុកស៊ីតកម្មដែលរលាយក្នុងខ្លាញ់នេះកាន់តែថយចុះ ដែលមានន័យថាការបន្ថែមសារធាតុបន្ថែមទៅក្នុងរបបអាហារអាចមានប្រយោជន៍។

ជាធម្មតាដំណាំអាហារធញ្ញជាតិដូចជាអង្ករ ក៏ដូចជាបន្លែ និងផ្លែឈើមួយចំនួន គឺសំយោគបានត្រឹម CoQ9 ប៉ុណ្ណោះ ប៉ុន្តែបន្ទាប់ពីធ្វើការវិភាគវិវត្តន៍នៃបម្រែបម្រួលធម្មជាតិនៅក្នុងអង់ស៊ីម Coq1 លើប្រភេទរុក្ខជាតិលើដីជាង ១ ០០០ ប្រភេទ និងអនុវត្តម៉ាស៊ីនរៀនបច្ចេកទេស អ្នកស្រាវជ្រាវក្នុងការសិក្សានេះបានប្រើការកែសម្រួលហ្សែនដើម្បីកែប្រែអាស៊ីត​អាមីណូសំខាន់ៗចំនួន ៥ នៃអង់ស៊ីម Coq1 នៅក្នុងអង្ករ បង្កើតពូជស្រូវថ្មីដែលមានសមត្ថភាពសំយោគ CoQ10 ។

ចុះផ្សាយក្នុងទស្សនាវដ្តី Cell កាលពីថ្ងៃសុក្រ ការសិក្សានេះបង្ហាញថា ការកើនឡើងបរិមាណ CoQ10 មិនមានផលប៉ះពាល់ដល់ទិន្នផលស្រូវទេ។

យោងតាមសហអ្នកនិពន្ធដំបូងរបស់ការសិក្សានេះ លោក Xu Jingjing អ្នកស្រាវជ្រាវរងនៅសួនរុក្ខសាស្ត្រ Shanghai Chenshan ក្រោមបណ្ឌិត្យសភាវិទ្យាសាស្ត្រចិន (CAS) ការសិក្សាពីមុនបានបង្ហាញថា CoQ10 នៅតែមានស្ថិរភាពក្នុងកំឡុងពេលមានកម្ដៅ ដែលបង្ហាញថាការចម្អិនអាហារមិនប៉ះពាល់ដល់កម្រិត CoQ10 ខ្លាំងឡើយ។

គួរកត់សម្គាល់ថា ប្រសិនបើមនុស្សញ៉ាំបាយដែលមាន CoQ10 ជារៀងរាល់ថ្ងៃ ពួកគេអាចបន្ថែម CoQ10 ប្រហែល ១ ទៅ ២ មីលីក្រាម ក្នុងមួយថ្ងៃ។ ជាធម្មតាមនុស្សទទួលទានជាមធ្យមនៃ CoQ10 ពីសាច់គឺប្រហែល ២ ទៅ ៣ មីលីក្រាម ក្នុងមួយថ្ងៃ ដូចនេះ CoQ10 នៅក្នុងអង្ករដែលទើបបង្កើតថ្មីនេះគឺអាចប្រៀបធៀបទៅនឹង CoQ10 ដែលមាននៅក្នុងសាច់ ដែលមានន័យថាវាអាចបម្រើជាអាហារបំប៉នដ៏មានប្រសិទ្ធភាពសម្រាប់របបអាហារប្រចាំថ្ងៃ។

ជាមួយគ្នានេះលោក Zhao Qing អ្នកស្រាវជ្រាវនៅសួនរុក្ខសាស្ត្រ Shanghai Chenshan ដែលចូលរួមក្នុងការស្រាវជ្រាវនេះ ជឿជាក់ថា សមិទ្ធិផលនៃការបង្កើតពូជស្រូវថ្មីនេះ មិនត្រឹមតែអាចអនុវត្តបានតែ CoQ10 ប៉ុណ្ណោះទេ ប៉ុន្តែថែមទាំងផ្តល់នូវវិធីសាស្រ្តជាសាកលដល់ការស្រាវជ្រាវជីវសាស្ត្រផ្សេងៗទៀតផងដែរ៕

អត្ថបទ៖ ប៊ុន សុភាព

The post អ្នក​វិទ្យាសាស្ត្រ​ចិន​ បង្កើត​ពូជ​ស្រូវ​ដែល​ជួយ​ដល់​សុខភាព​បេះដូង appeared first on Kampuchea Thmey Daily.