ថ្លែងប្រាប់ កម្ពុជាថ្មី នៅថ្ងៃទី៦ ខែមេសានេះ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានគូសបញ្ជាក់ថា រយៈពេលដែលពិភពលោកទាំងមូលបានផ្ទុះនូវសង្រ្គាមស្ទើរគ្រប់ទិសទី​ គេសង្កេតឃើញថា រាល់គ្រប់មុខទំនិញមិនថាតែរបស់ប្រើប្រាស់ ក្នុងនោះអាហារហូបចុកហាក់កើនឡើងតម្លៃខ្ពស់ផងដែរ។

យ៉ាងណាមិញ ចំពោះប្រទេសកម្ពុជាក៏កំពុងទទួលរងនូវឥទ្ធិពលនេះ តាមរយៈការកើនឡើងនូវរាល់មុខទំនិញទាក់ទងទៅនឹងរបស់របរហូបចុកប្រចាំថ្ងៃនៅលើទីផ្សារខ្លះផងដែរ។

លោក ស្រ៊ុន ពៅ បានបញ្ជាក់ដែរថា សម្រាប់នៅទីផ្សារបច្ចុប្បន្ន សាច់ជ្រូក សាច់មាន់ និងសាច់គោ ហាក់មានតម្លៃខ្ពស់បន្ដិច ប៉ុន្ដែសម្រាប់តម្រូវការ និងការផ្គត់ផ្គង់វិញគឺគ្រប់គ្រាន់ពុំមានសញ្ញាអ្វីគួរឱ្យកត់សម្គាល់នោះឡើយ។

ក្នុងកាលៈទេសៈដ៏លំបាកនេះ លោក ស្រ៊ុន ពៅ អំពាវនាវ និងស្នើសុំចិត្តអាជីវករ កសិករដែលអ្នកចិញ្ចឹមសត្វទាំងអស់ មេត្តាសូមកុំលក់ដំឡើងថ្លៃរាល់មុខទំនិញ ឬផលិតផលណាដែលពុំចាំបាច់ ដើម្បីផ្ដល់ឱកាសដល់អតិថិជនដែលជាអ្នកទទួលទានសាច់ជ្រូក សាច់មាន់ និងសាច់គោ អាចមានលទ្ធភាពគ្រប់គ្រាន់ក្នុងការចំណាយ​ប្រចាំថ្ងៃ។

អាជីវករលក់សាច់ជ្រូក ស្ថិតនៅក្នុងផ្សារអូរឫស្សី រាជធានីភ្នំពេញ បានឱ្យដឹងដែរថា សម្រាប់មុនថ្ងៃបុណ្យចូលឆ្នាំខ្មែរខាងមុខនេះ សាច់ជ្រូកមានតម្លៃកើនឡើងបន្ដិច ពោលគឺសាច់ជ្រូកមានតម្លៃចាប់ពី ២ ៣០០០ពាន់ ទៅដល់ ២ ៥០០០រៀល ក្នុង១គីឡូ ដែលធៀបនឹងប៉ុន្មានខែមុនខុសចន្លោះពី ៣ពាន់រៀល ទៅដល់៥ពាន់រៀល ក្នុង១គីឡូ។

ការកើនឡើងនូវតម្លៃនេះ អាជីវករខាងលើអះអាងថា ​បណ្ដាលមកពីកត្តាច្រើនយ៉ាងដែលក្នុងនោះមាន៖ ការផលិតថ្លៃដើមមានតម្លៃខ្ពស់​ មិនថាចំណីសត្វ ការដឹកជញ្ជូនសុទ្ធតែមានតម្លៃខ្ពស់ដូចគ្នា៕

អត្ថបទ ៖ សួស សិត

The post តម្លៃសាច់ជ្រូកឡើងថ្លៃបន្ដិច ខណៈការផ្គត់ផ្គង់គ្រប់គ្រាន់ appeared first on Kampuchea Thmey Daily.

ប្រធានសមាគមអ្នកចិញ្ចឹមសត្វកម្ពុជាលោក ស្រ៊ុន ពៅ បានលើកឡើងថាវិស័យចិញ្ចឹមសត្វ គឺជាវិស័យដ៏សំខាន់មួយនៅក្នុងវិស័យកសិកម្ម ដោយបានជួយផ្តល់វិភាគទានដ៏ធំមួយនៅក្នុងការជំរុញកំណើនសេដ្ឋកិច្ចជាតិ។

ថ្លែងក្នុងកិច្ចប្រជុំប្រចាំឆ្នាំរបស់សមាគមអ្នកចិញ្ចឹមសត្វកម្ពុជា និងសិក្ខាសាលាស្តីពីដំណោះស្រាយប្រកបដោយ និរន្តរភាពលើវិស័យចិញ្ចឹមសត្វនៅកម្ពុជានៅព្រឹកថ្ងៃទី២១កម្ភៈនេះ លោក ស៊្រុនពៅ បានបន្តថាមិនតែប៉ុណ្ណោះទៀតវិស័យចិញ្ចឹមសត្វ បានជួយគាំទ្រដល់វិស័យនានានៅក្នុង វិស័យកសិកម្ម និងវិស័យផ្សេងទៀត ដូចជាការបង្កើតការងារជូនប្រជាពលរដ្ឋ ការបង្កើន ចរន្តប្រមូលទិញវត្ថុធាតុដើមសម្រាប់ ផលិតចំណីសត្វក្នុងស្រុក និងការបង្កើនសកម្មភាព អាជីវកម្មខ្នាតតូច និងខ្នាតមធ្យមក្នុងស្រុក ឱ្យកាន់តែផុលផុសឡើងៗ ថែមទៀតផង។ដូចនេះ វិស័យចិញ្ចឹមសត្វនៅកម្ពុជាត្រូវតែរឹងមាំ និងឈានទៅមុខ ដើម្បីជួយដល់ កំណើនសេដ្ឋកិច្ចជាតិ។

លោកបានថ្លែងពន្យល់ថា ៖រយៈពេល ជាច្រើនឆ្នាំចុង ក្រោយនេះ វិស័យចិញ្ចឹមសត្វនៅតែបន្តរក្សាបានវឌ្ឍនភាពពីមួយឆ្នាំទៅមួយឆ្នាំមិនឈប់ ឈរ ពោល គឺ យើងបានផ្តើមពីការចិញ្ចឹមដែលមានលក្ខណៈគ្រួសារ រហូតបានក្លាយជា ការចិញ្ចឹមបែបពាណិជ្ជកម្មទំនើប ដូចបណ្តាប្រទេសនានា ហើយមានលទ្ធភាពផ្គត់ផ្គង់ ទីផ្សារក្នុងស្រុកយ៉ាងពេញលេញទៀងទាត់ និងមានផលិតកម្មសត្វមួយចំនួន អាចនាំ ចេញទៅក្រៅទេសទៀតផង»។

លោក ស៊្រុនពៅបានបន្ថែមថាតាំងពីដើមឆ្នាំ២០២៤មកនេះ វិស័យចិញ្ចឹមសត្វយើងមានដំណើរការជាវិជ្ជមានជា បណ្តើរៗ ពិសេសលើផ្នែកទីផ្សារ ដែលធ្វើឱ្យសហគ្រិនខ្មែរយើង ជាពិសេស សមាជិក សមាគមអ្នកចិញ្ចឹមសត្វកម្ពុជាដែលស្រលាញ់ពេញចិត្តវិស័យនេះមានទឹកចិត្តឡើងវិញ ហើយក៏បានជំរុញថ្នាក់ដឹកនាំសមាគមឱ្យបន្តតាមដាន និងស្វែងរកការគាំទ្រលើគោល នយោបាយ និងស្វះស្វែងចូលជួបប្រជុំពិភាក្សាការងារជាមួយក្រសួងស្ថាប័នមាន សមត្ថកិច្ចពាក់ព័ន្ធដើម្បីជួយដល់វិស័យចិញ្ចឹមសត្វ និងធានាដល់សុខុមាលភាពសង្គមផង ដែរ។

​

​

លោក ស៊្រុនពៅបានសំណូមពរដល់អ្នកចូលរួម ដើម្បីធ្វើឱ្យ សមាគមអ្នកចិញ្ចឹមសត្វកម្ពុជា ក្លាយជាចលករដ៏ខ្លាំងមួយក្នុងការលើកកម្ពស់សុខភាព សុវត្ថិភាពចំណីអាហារ សន្តិសុខស្បៀងជាតិ និងជំរុញវិស័យចិញ្ចឹមសត្វនៅកម្ពុជាឱ្យ កាន់តែរឹងមាំប្រកបដោយគុណភាព ដើម្បីចូលរួមកសាង និងពង្រឹងគ្រឹះសេដ្ឋកិច្ចជាតិ ស្របតាមគោលនយោបាយអភិវឌ្ឍន៍សេដ្ឋកិច្ចជាតិរបស់រាជរដ្ឋាភិបាល៕

អត្ថបទ៖សំអឿន

The post  វិស័យចិញ្ចឹមសត្វជាវិស័យដ៏សំខាន់មួយជួយជំរុញកំណើនសេដ្ឋកិច្ចជាតិ appeared first on Kampuchea Thmey Daily.

លោក ចាន់ ផាន អាយុ៥៨ឆ្នាំ ជាកសិករចិញ្ចឹមគោ ស្ថិតនៅស្រុកស្រីសន្ធរ ខេត្តកំពង់ចាម បានប្រាប់ឱ្យដឹងថា មុខរបរចិញ្ចឹមគោនេះ លោកបានធ្វើវារយៈពេលជាង៣០ឆ្នាំមកហើយ។ លោកបន្តថា ចូលមកដល់ឆ្នាំ២០២៥នេះ ទីផ្សារគោនៅក្នុងភូមិ ឃុំ របស់លោក ហាក់ថមថយខ្លាំង ដោយសារស្ងាត់ឈ្មួញដើរទិញគោ មិនថាជាប្រភេទគោពូជ និងគោគីឡូនោះទេ។ ទាំងនេះហើយ ដែលធ្វើឱ្យការចិញ្ចឹមគោរបស់លោក ចាន់ ផាន មានការជាប់គាំងទីផ្សារមិនអាចលក់បានចំណេញដូកកាលពីពេលកន្លងទៅ។

លោក​ ចាន់ ផាន បានប្រាប់ឱ្យដឹងទៀតថា មូលហេតុដែលលោកនៅតែបន្តចិញ្ចឹមគោនេះ ដោយសារតែវាជាមុខរបរប្រពៃណីមួយរបស់ប្រជាជនខ្មែរតាំងពីសម័យបុរាណ ភាគច្រើនធ្វើស្រែ និងចិញ្ចឹមគោនេះតែម្ដង។ លោក បញ្ជាក់ទៀតថា សម្រាប់ទីផ្សារនាពេលបច្ចុប្បន្ន គោចិញ្ចឹមសម្រាប់តែចូលកសិដ្ឋាន ចំណែកឯការភ្ជួររាស់ បច្ចុប្បន្នគេនាំគ្នាប្រើ គោយន្ត និងត្រាក់ទ័រទំនើបៗអស់ហើយ ចំពោះគោវិញគេមិនសូវនិយមប្រើដូចសម័យបុរាណ នោះឡើយ។

មិនខុសគ្នាប៉ុន្មានពីកសិករខាងលើ លោក សុខ ពៅ អាយុ៥៦ឆ្នាំ ជាកសិករចិញ្ចឹមគោ ស្ថិតនៅខ្សាច់កណ្ដាល ខេត្តកណ្ដាល ក៏បានប្រាប់ឱ្យដឹងដូចគ្នាថា បច្ចុប្បន្នមុខរបរចិញ្ចឹមគោលក្ខណៈគ្រួសារ មានការធ្លាក់ចុះយ៉ាងខ្លាំង នេះក៏ដោយសារតែគោមិនសូវមានទីផ្សារ និងពេលលក់ចេញពុំបានថ្លៃខ្ពស់ដូចពេលកន្លងទៅ។

លោក បន្តថា ទីផ្សារគោបច្ចុប្បន្ន ពុំអាចលក់ចំណេញដូចកាលពីជាង១០ឆ្នាំមុន ដែលប្រភេទគោពូជខ្លះ អាចលក់តម្លៃ១នឹម ជាង២០លានរៀល ក៏ធ្លាប់មានដែរ។ ប៉ុន្តែតម្លៃគោរយៈពេលពេលចុងក្រោយនេះ គឺធ្លាប់ថ្លៃយ៉ាងគំហុក ពោលគឺ១នឹម លក់បានយ៉ាងច្រើន ៥លានរៀល ទៅ៦លានរៀល តែប៉ុណ្ណោះ។

យ៉ាងណាមិញ ទាក់ទងនឹងបញ្ហានេះ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានប្រាប់ឱ្យ កម្ពុជាថ្មី ដឹងថា មូលហេតុដែលជាកត្តាចម្បងនាំឱ្យតម្លៃគោរបស់កសិករធ្លាក់ចុះខ្លាំង នេះដោយសារតែបច្ចុប្បន្នវិស័យកសិកម្មគេមិនសូវនិយមប្រើប្រាស់គោសម្រាប់ភ្ជួររាស់ដូចកាលពីមុន ដោយសារវាត្រូវបានជំនួសមកវិញដោយគ្រឿងយន្ត មានត្រាក់ទ័រ និងម៉ាស៊ីនទំនើបៗ សម្រាប់បម្រើឱ្យវិស័យមួយនេះ។

ក្រៅពីនេះ កត្តាដែលនាំឱ្យតម្លៃគោមានធ្លាក់ចុះខ្លាំងក៏ដោយសារតែមានការនាំចូលសាច់ក្របីពីប្រទេសឥណ្ឌាចូលមកប្រទេសកម្ពុជាច្រើន ចំណែកតម្លៃវិញក៏ថោកគួរសម ដែលមួយគីឡូត្រឹមតែ២០០០០រៀល នៃតម្លៃលក់ចេញក្នុងទីផ្សារ៕

អត្ថបទ​ ៖ សួស សិត

The post កសិករ​អះអាង​ថា តម្លៃ​គោធ្លាក់ចុះ ខណៈរបរចិញ្ចឹមគោតាមផ្ទះក៏ថមថយ appeared first on Kampuchea Thmey Daily.

លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានមានប្រសាសន៍ប្រាប់ កម្ពុជាថ្មី ដឹងថា បើទោះបីជា រាជរដ្ឋាភិបាលកម្ពុជា សម្រេចផ្អាកការនាំចូលសាច់បង្កក ចូលមកកម្ពុជារយៈពេល៦ខែ ពោលគឺចាប់ថ្ងៃទី ១២ ខែមីនា ឆ្នាំ២០២៤ រហូតដល់ ថ្ងៃទី១២ ខែកញ្ញា ឆ្នាំ២០២៤ ខាងមុខនេះក៏ដោយ ក៏កម្ពុជានឹងមិនខ្វះខាតសាច់សត្វសម្រាប់ផ្គត់ផ្គង់ទីផ្សារក្នុងស្រុក នោះដែរ។

លោក បន្តថា មូលហេតុដែលកម្ពុជាមិនខ្វះខាតសាច់សត្វសម្រាប់ផ្គត់ផ្គង់ទីផ្សារ នេះក៏ដោយសារតែ រាជរដ្ឋាភិបាលអាណត្តិទី៧នេះ បានណែនាំឱ្យក្រសួងកសិក​ម្ម រុក្ខាប្រមាញ់ និងនេសាទ ជួយជំរុញ និងលើកទឹកចិត្ត ដល់ប្រជាកសិករ ក៏ដូចជា អ្នកចិញ្ចឹមសត្វ ទាំងអស់ បង្កើនការចិញ្ចឹមសត្វរបស់ខ្លួនឱ្យបានល្អ សម្រាប់ផ្គត់ផ្គង់ទីផ្សារក្នុងស្រុក នាពេលខាងមុខនេះ។

លោក ស្រ៊ុន ពៅ បានបន្ថែមទៀតថា កន្លងមក កម្ពុជាមិនដែលខ្វះខាតសាច់សត្វ សម្រាប់ផ្គត់ផ្គង់ទីផ្សារក្នុងស្រុក នោះទេ ផ្ទុយទៅវិញ កម្ពុជាក៏បាននាំចេញសាច់សត្វចិញ្ចឹមទៅក្រៅប្រទេស ផងដែរ។

លោក ស្រ៊ុន ពៅ ក៏បានអំពាវនាដល់ប្រជាកសិករ អ្នកចិញ្ចឹមសត្វ សូមកុំបាក់ទឹកចិត្ត ទោះបីជាកន្លងមកការចិញ្ចឹមសត្វត្រូវខាតបង់ខ្លះក៏ដោយ ប៉ុន្ដែសូមប្រឹងប្រែងបន្តទៀត ដើម្បីជំរុញដល់វិស័យការចិញ្ចឹមសត្វ នៅកម្ពុជា និងជួយឱ្យសេដ្ឋកិច្ចជាតិទទួលបានការរីកចម្រើន បន្តទៅទៀត។

សូមជម្រាបជូនថា រាជរដ្ឋាភិបាលកម្ពុជា បានសម្រេចផ្អាកជាបណ្តោះអាសន្នសម្រាប់រយៈពេល ០៦ (ប្រាំមួយ)ខែ នូវការនាំចូលគ្រឿងក្នុង និងបំណែកសាច់បង្កក។ នេះបើតាមសេចក្តីប្រកាសព័ត៌មានរួម របស់ក្រសួងពាណិជ្ជកម្ម និងក្រសួងកសិកម្ម នៅថ្ងៃទី១២ ខែមករា ឆ្នាំ២០២៤ កន្លងទៅនេះ៕

អត្ថបទ ៖ សួស សិត

The post កម្ពុជា នឹងមិនខ្វះសាច់សត្វផ្គត់ផ្គង់ឡើយ ទោះបីផ្អាកនាំចូលសាច់បង្កក ៦ខែ ក៏ដោយ appeared first on Kampuchea Thmey Daily.

លោក ស៊្រុន ពៅ ប្រធានសមាគមអ្នកចិញ្ចឹមសត្វកម្ពុជា បានឱ្យកម្ពុជាថ្មីដឹងថា កំណើននៃតម្រូវការជ្រូករស់មានការកើនឡើងប្រមាណ ៣០%-៤០% ក្នុងមួយថ្ងៃ។ លោកបានឱ្យដឹងទៀតថា សព្វថ្ងៃកម្ពុជា មានតម្រូវការជ្រូករស់ពី ៨ពាន់ ទៅ៩ពាន់ក្បាល ក្នុងមួយថ្ងៃ ខណៈដែលចូលឆ្នាំចិន វៀតណាមនេះ មានការកើនឡើងរហូតដល់ ១ម៉ឺន២ពាន់ក្បាល ក្នុងមួយថ្ងៃ ពោលគឺមានការកើនឡើងក្នុងរយៈពេលពីរបីថ្ងៃនេះ។ បើទោះជាពេលនេះ មានតម្រូវការខ្ពស់ក៏ពិតមែន លោកស៊្រុន ពៅ មើលឃើញថា ទីផ្សារជ្រូកអាចនឹងកកស្ទះវិញ នៅក្រោយចូលឆ្នាំចិនវៀតណាម ដោយសារមានការបិទផ្សារ ពលរដ្ឋជាប់សែស្រឡាយចិនវៀតណាមឈប់សម្រាកដើរកម្សាន្ត។

លោក ស្រ៊ុន ពៅ បានលើកឡើងថា បច្ចុប្បន្ននេះ កម្ពុជា មានតម្រូវការជ្រូកប្រមាណ ៧ពាន់ទៅ ៨ពាន់ក្បាលក្នុងមួយថ្ងៃ ដើម្បីផ្គត់ផ្គង់ទីផ្សារក្នុងស្រុក ខណៈដែលការផលិតបានរហូតដល់ជាងមួយម៉ឺនក្បាល ក្នុងមួយថ្ងៃ។

នៅថ្ងៃទី ០៩ កុម្ភៈនេះ ប្រជាពលរដ្ឋជាប់សែស្រឡាយចិនវៀតណាម បានសម្រុកទៅផ្សារយ៉ាងច្រើនកុះករ ទិញបន្លែត្រីសាច់ ជាពិសេសជ្រូកខ្វៃ ដើម្បីធ្វើម្ហូបសម្រាប់សែនចូលឆ្នាំចិនវៀតណាម។ គេកត់សម្គាល់ឃើញថា ជ្រូកខ្វៃមានទីផ្សារខ្ពស់ និងលក់ដាច់ជាងគេនៅរដូវចូលឆ្នាំចិនវៀតណាមនេះ។

សូមបញ្ជាក់ថា នៅឆ្នាំ ២០២៤នេះ ពិធីបុណ្យចូលឆ្នាំប្រពៃណីចិនវៀតណាម ប្រព្រឹត្តិទៅចាប់ពីថ្ងៃទី ០៩-១២ ខែកុម្ភៈ។ ប្រជាជនចិនវៀតណាម ដែលស្នាក់នៅកម្ពុជាជាច្រើន បានវិលត្រឡប់ទៅកាន់ស្រុកកំណើតវិញរយៈពេលប៉ុន្មានថ្ងៃមកនេះ។ ដោយឡែក ប្រជាជនកម្ពុជា ជាប់សែស្រឡាយចិន ក៏កំពុងតែរៀបចំកម្មវិធីផ្សេងៗយ៉ាងសប្បាយផងដែរ៕

The post លោក ស៊្រុន ពៅ ៖ ចូលឆ្នាំចិនវៀតណាម មានតម្រូវការជ្រូកកើនឡើងជាង ១ម៉ឺន២ពាន់ក្បាលក្នុងមួយថ្ងៃ appeared first on Kampuchea Thmey Daily.

សម្តេចនាយករដ្ឋមន្ត្រី ហ៊ុន ម៉ាណែត បានប្រកាសបែបនេះ នៅក្នុងពិធី “បិទសន្និបាតបូកសរុបការងារឆ្នាំ២០២៣ និងលើកទិសដៅការងារបន្ត ឆ្នាំ២០២៤ របស់ក្រសួងកសិកម្ម រុក្ខាប្រមាញ់ និងនេសាទ” កាលពីរសៀលថ្ងៃទី ៣០ ខែមករា។ សម្តេច ហ៊ុន ម៉ាណែត បានលើកឡើងថា ការអនុគ្រោះពន្ធនេះ គឺដើម្បីទាញយកផលប្រយោជន៍ និងលើកទឹកចិត្តដល់អ្នកផលិតក្នុងរយៈពេលដ៏ខ្លី។

ថ្លែងប្រាប់កម្ពុជាថ្មី លោក ស្រ៊ុន ពៅ បានគូសបញ្ជាក់ថា ការអនុគ្រោះពន្ធ គឺមានប្រយោជន៍ខ្លាំងណាស់ ដល់វិស័យចិញ្ចឹមសត្វ និងផលិតចំណីសត្វ។ លោកសង្កត់ធ្ងន់ថា នេះគឺជាក្តីសង្ឃឹមសម្រាប់រោងចក្រផលិតចំណីសត្វ ហើយក៏ជាក្តីសង្ឃឹមរបស់កសិករ ដែលចង់បានតម្លៃចំណីសត្វថោកផងដែរ។

ប្រធានសមាគមអ្នកចិញ្ចឹមសត្វកម្ពុជា មើលឃើញថា ការអនុគ្រោះពន្ធ នឹងជួយកម្ពុជា អាចប្រកួតប្រជែងជាមួយប្រទេសជិតខាង ដោយសារកន្លងមក ចំណីសត្វ ថ្លៃភ្លើង និងដឹកជញ្ជូន មានតម្លៃថ្លៃ ដែលធ្វើឱ្យវិស័យចិញ្ចឹមសត្វ មិនអាចរកប្រាក់ចំណេញ និងប្រកួតប្រជែងបាន។

បើតាមលោក ស្រ៊ុន ពៅ វិស័យចិញ្ចឹមសត្វមានសារសំខាន់ខ្លាំងណាស់ សម្រាប់កម្ពុជា។ បន្ទាប់ពីការចិញ្ចឹមបានហើយ ប្រធានសមាគម ចង់ឱ្យមានការជួយសម្រួលក្នុងការនាំចេញ កាន់តែពិសេសសម្រាប់វិស័យចិញ្ចឹមសត្វថែមទៀត។

​

ក្រសួងកសិកម្ម រុក្ខាប្រមាញ់ និង​នេសាទ បាន​ចាត់ទុកថា វិស័យ​ចិញ្ចឹមសត្វ​ដើរតួនាទី​យ៉ាងសំខាន់​ក្នុងការ​បង្កើន​ប្រាក់ចំណូល លើកកម្ពស់​ការរស់នៅ និង​ជំរុញ​សេដ្ឋកិច្ចជាតិ។

កម្ពុជា​បាន​ផ្តើមចេញពី​ការចិញ្ចឹម​សត្វ​ដើម្បី​ផ្គត់ផ្គង់​ជា​ម្ហូបអាហារ​ក្នុង​គ្រួសារ មកជា​ការចិញ្ចឹម​សត្វ​ដើម្បី​លក់​យកប្រាក់​ចំណេញ ហើយ​បច្ចុប្បន្ន​កម្ពុ​ជា មាន​កសិដ្ឋាន​ចិញ្ចឹមសត្វ​កាន់តែច្រើន និង​មាន​ទំហំ​កាន់តែ​ធំ​។

ផលិតកម្មសត្វគ្រប់ប្រភេទក្នុងរយៈពេល៥ឆ្នាំចុងក្រោយនេះ មានការកើនឡើងគួរឱ្យកត់សម្គាល់ គឺចាប់ពី ចំនួន ៤៥,៨៥លានក្បាល ក្នុងឆ្នាំ២០១៩ ដល់ចំនួន ៦៦,៥៨លានក្បាល នៅឆ្នាំ២០២៣។ ដោយឡែក ក្នុងឆ្នាំ ២០២៣ គោមានចំនួន ៣,០៥លានក្បាល ក្របីចំនួន ៤៣១,៤២ពាន់ក្បាល ជ្រូកចំនួន ៣,៥៨លានក្បាល បក្សីចំនួន ៥៩,៣៥លានក្បាល សេះចំនួន ២,៨២ពាន់ក្បាល ចៀចំនួន ៦,៥៥ពាន់ក្បាល ពពែចំនួន ៥៣ពាន់ក្បាល ដំរីចំនួន ៣៩ ក្បាល ស្វាចំនួន ៩៨,០៧ពាន់ក្បាល និងទន្សាយចំនួន ៣,២៤ពាន់ក្បាល។ ចំនួននេះ បើធៀបនឹងឆ្នាំ២០២២ ផលិតកម្មសត្វមានកំណើនចំនួន ២,១%។ នេះបើតាមរបាយការណ៍របស់ក្រសួងកសិកម្ម៕

The post លោក ស៊្រុន ពៅ មើលឃើញពីក្តីសង្ឃឹមវិស័យចិញ្ចឹមសត្វក្រោយរដ្ឋអនុគ្រោះពន្ធ២ឆ្នាំបន្ថែមទៀត   appeared first on Kampuchea Thmey Daily.