លោក ផុន រិណុ ប្រធានការិយាល័យគ្រប់គ្រងការកែច្នៃ នៃនាយកដ្ឋានកសិ-ឧស្សាហកម្ម បានប្រាប់ “កម្ពុជាថ្មី” នៅថ្ងៃទី២៩ ខែមីនា ថា ក្រុមការងារបាននាំអ្នកស្រាវជ្រាវពីវិទ្យាស្ថានដំណាំតំបន់ត្រូពិច នៃបណ្ឌិតសភាវិទ្យាសាស្ត្រសាធារណរដ្ឋប្រជាមានិតចិន រួមជាមួយអ្នកវិនិយោគចិនមកពីទីក្រុងហាងចូវ ចុះសិក្សាផ្ទាល់នៅចម្ការស្វាយចន្ទីនៅខេត្តរតនគិរី។

លោកបានបន្តថា ការចុះសិក្សានេះមានគោលបំណងវាយតម្លៃបរិមាណផលិតកម្មស្វាយចន្ទីនៅខេត្តរតនគិរី ដែលអាចផ្គត់ផ្គង់ឲ្យក្រុមហ៊ុនចិនបាន។ កន្លងមក រោងចក្រនៅចិនតែងតែទិញគ្រាប់ស្វាយចន្ទីពីប្រទេសវៀតណាម ដើម្បីយកទៅកែច្នៃ។ ដូច្នេះ ការចុះមកពិនិត្យលើកនេះ គឺដើម្បីវាយតម្លៃលទ្ធភាពបង្កើតរោងចក្រកែច្នៃនៅកម្ពុជា និងសិក្សាអំពីនីតិវិធីចុះបញ្ជីវិនិយោគក្នុងស្រុក។លោកបានបញ្ជាក់ថា ក្រុមហ៊ុនមានគោលដៅផលិតស្វាយចន្ទីចន្លោះពី ៣០ ទៅ ៥០ តោនក្នុងមួយថ្ងៃ ហើយក្នុងមួយឆ្នាំ អាចឈានដល់ចន្លោះពី ១ម៉ឺនតោន ដល់ ៥ម៉ឺនតោន។

បើយោងតាមការតម្រង់ទិសរបស់រាជរដ្ឋាភិបាលកម្ពុជា មានកម្មវិធីពិសេសមួយសម្រាប់ជំរុញការអភិវឌ្ឍតំបន់ប៉ែកឦសាន ដោយគ្រោងបង្កើតរោងចក្រកែច្នៃគ្រាប់ស្វាយចន្ទីមួយក្នុងចំណោមខេត្តទាំង៤។ គម្រោងនេះនឹងផ្តល់ឱកាសឲ្យក្រុមហ៊ុនចិនវិនិយោគ ដោយផ្តោតលើការកែច្នៃគ្រាប់ស្វាយចន្ទីរប្រភេទ M23 និងប្រភេទប្រពៃណី ដែលអាចផលិតបានស្តង់ដា 320 ខណៈក្រុមហ៊ុនក្នុងស្រុកផលិតបានស្តង់ដា 180 និង 240។

លោកបានបន្តថា ក្រុមហ៊ុនចិននឹងចុះសិក្សា និងពង្រីកសកម្មភាពទៅកាន់ខេត្ត កំពង់ចាម សៀមរាប រតនគិរី មណ្ឌលគិរី ក្រចេះ និងព្រះវិហារ។ ទោះជាយ៉ាងណា លោកបានបញ្ជាក់ថា ទោះបីមានការបង្កើតរោងចក្រនេះក៏ដោយ ក៏មិនអាចធានាថាតម្លៃគ្រាប់ស្វាយចន្ទីនៅលើទីផ្សារនឹងមានស្ថិរភាព ឬអាចព្យាករណ៍បានច្បាស់លាស់ឡើយ ព្រោះវាអាស្រ័យលើស្ថានភាពទីផ្សារជាក់ស្តែង និងទីផ្សារពិភពលោក។ ជាក់ស្តែង ឆ្នាំនេះតម្លៃគ្រាប់ស្វាយចន្ទីមួយតោនធ្លាប់មានតម្លៃប្រហែល ១,៣០០ ដុល្លារ ប៉ុន្តែបច្ចុប្បន្នបានកើនដល់ប្រហែល ១,៥០០ ដុល្លារ។

ជាមួយគ្នានេះ លោកក៏បានផ្តាំផ្ញើដល់កសិករឲ្យអនុវត្តតាមបច្ចេកទេសដាំដុះឲ្យបានត្រឹមត្រូវរបស់ក្រសួង និងតាមការណែនាំរបស់ក្រុមហ៊ុនចិនដែលជាអ្នកទិញ។ លើសពីនេះ តាមរយៈរាជរដ្ឋាភិបាល និងក្រសួងកសិកម្ម មន្រ្តីកសិកម្មនៅតាមឃុំ នឹងចូលរួមចងក្រង និងចុះបញ្ជីក្រុមផលិត ឬសហគមន៍កសិកម្ម ដើម្បីអភិវឌ្ឍទៅជាសហគមន៍ទំនើប និងមាន​ប្រសិទ្ធភាពខ្ពស់៕

ដោយ៖ ខៀវ ចាប

The post អ្នកជំនួញចិន បង្ហាញការចាប់អារម្មណ៍កាន់តែខ្លាំងលើដំណាំស្វាយចន្ទីនៅកម្ពុជា appeared first on Kampuchea Thmey Daily.

ក្រុមហ៊ុន Inoue Calcium Corporation បានដាក់ផែនការក្នុងការពង្រីកការកែច្នៃគ្រាប់ស្វាយចន្ទី ជាផលិតផលសម្រេច សម្រាប់នាំចេញទៅទីផ្សារជប៉ុន ដោយមានការចូលរួមពីអគ្គនាយករង និងមន្រ្តីនៃនាយកដ្ឋានទាំងបី ចំណុះអគ្គនាយកដ្ឋានជំរុញពាណិជ្ជកម្ម។

ការលើកឡើងរបស់ក្រុមហ៊ុនត្រូវធ្វើឡើងក្នុងជំនួបរវាង លោក ឈរ ស៊ុនហុង អនុរដ្ឋលេខាធិការក្រសួងពាណិជ្ជកម្ម នៅថ្ងៃទី ០១ ខែតុលា ឆ្នាំ ២០២៥​ បានជួបពិភាក្សាការងារជាមួយ លោក Takashi INOUE អគ្គនាយកក្រុមហ៊ុន Inoue Calcium Corporation និងកញ្ញា សឿន សុទ្ធនីតា សហស្ថាបនិក និងជានាយិកាអភិវឌ្ឍន៍ទីផ្សារ នៃក្រុមហ៊ុនហ៊ែនក្រាហ្វធីត ឃែស៊ូណាត់ ស្ទឹងត្រែង។

លោកអនុរដ្ឋលេខាធិការ បានបង្ហាញអំពីការគាំទ្រ លើកទឹកចិត្តដល់គណៈប្រតិភូពាណិជ្ជករជប៉ុន ក្នុងសិក្សាស្វែងយល់អំពីផលិតផលសក្តានុពលកសិកម្មកម្ពុជានៅខេត្តស្ទឹងត្រែង តាមគោលការណ៍រាជរដ្ឋាភិបាលក្នុងការជំរុញការវិនិយោគ ជាពិសេសក្នុងភូមិភាគឦសាន ព្រមទាំងចាប់ដៃគូពាណិជ្ជកម្មជាមួយក្រុមហ៊ុនកម្ពុជា ដើម្បីសហការជំរុញការបណ្តាក់ទុន និងវិនិយោគ ក៏ដូចជានាំចេញ-នាំចូលផលិតផលរវាងប្រទេសទាំងពីរ។

លោកអនុរដ្ឋលេខាធិការ បានបង្ហាញការសាទរចំពោះសិប្បកម្ម ហ៊ែនក្រាហ្វធីត ឃែស៊ូណាត់ ស្ទឹងត្រែង ដែលបាននាំចេញគ្រាប់ស្វាយចន្ទីជាផលិតផលសម្រេចចំនួន ១តោន ទៅទីផ្សារជប៉ុន បានជោគជ័យ និងគ្រោងនាំចេញបន្ថែមចំនួនពីរកុងតឺន័រទៀតនៅឆ្នាំបន្ទាប់។

យោងតាមក្រសួងពាណិជ្ជកម្ម គិតចាប់ពីខែមករា ​ដល់ខែសីហា ​ឆ្នាំ ២០២៥ ក​ម្ពុជារកចំណូលបានប្រមាណជិត ៨០០ លានដុល្លារ (៧៩០) ពីការនាំ​ចេញ​គ្រាប់​ស្វាយ​ចន្ទី ​កើនឡើង ៦០,៥៥% ​ធៀបនឹងរយៈពេល​ដូចគ្នានៅឆ្នាំ ២០២៤។

លោក អួន ស៊ីឡុត ប្រធានសមាគមស្វាយចន្ទីកម្ពុជា ប្រាប់កម្ពុជាថ្មីថា ​ទីផ្សារ​តម្លៃ​ និង​ទិន្នផល​គ្រាប់​ស្វាយចន្ទី​នៅ​តែ​បន្ត​មាន​ភាព​ល្អ​ប្រសើរ​នៅ​ឆ្នាំ ​២០២៥ ថ្វីបើមានការធ្លាក់ភ្លៀងច្រើន ដែលធ្វើឱ្យ​គុណ​ភាពចន្ទីធ្លាក់​ចុះ​បន្តិច។ ​

លោក អួន ស៊ីឡុត បន្ថែមថា តម្លៃគ្រាប់ស្វាយចន្ទីនៅតែមានភាពល្អប្រសើរចាប់តាំងពីខែមេសា ដែលគ្រាប់សើមមានតម្លៃ ៥០០០ រៀល ក្នុងមួយគីឡូក្រាម នៅក្នុង​ខែមេសា ហើយគ្រាប់ស្ងួតលក់បាន ៦៥០០ រៀល នៅខែ​ឧសភា នៅខែមិថុនា គ្រាប់ស្វាយចន្ទីស្ងួត លក់បានតម្លៃ ៧២០០ រៀលក្នុងមួយ​គីឡូ​ក្រាម និងខែសីហា លក់បាន ៦៨០០ រៀលក្នុងមួយគីឡូក្រាម។ ​

លោក អួន ស៊ីឡុត យល់ឃើញថា៖ «កម្ពុជាត្រូវមានយន្តការច្បាស់​លាស់ទើបរក្សាតម្លៃគ្រាប់ស្វាយ​ចន្ទីឆៅ​ឱ្យមានស្ថេរភាពជូនដល់កសិករ ដោយយន្តការចម្បងគឺគាំ​ទ្រការ​បង្កើត​​​​រោង​ចក្រកែច្នៃក្នុង​ស្រុក​ឲ្យបានច្រើន តាម​គោលនយោបាយជាតិស្ដីពីស្វាយ​ចន្ទីដែល​បានកំណត់ ២៥% រវាងឆ្នាំ ២០២២-២០២៧»៕

The post សហគ្រាសកែច្នៃស្វាយចន្ទីស្ទឹងត្រែង គ្រោងពង្រីកផលិតកម្មកែច្នៃ នាំចេញទៅទីផ្សារជប៉ុន appeared first on Kampuchea Thmey Daily.

ការដាក់ឱ្យដំណើការនូវគម្រោងនេះត្រូវបានធ្វើឡើងកាលពីព្រឹកថ្ងៃទី៥ ខែកញ្ញា ក្រោមអធិបតីភាពរបស់ឯកឧត្តម ឌិត ទីណា រដ្ឋមន្ត្រី​នៃ MAFF ឯកអគ្គរដ្ឋទូតសហភាពអឺរ៉ុបប្រចាំកម្ពុជា លោក Igor Driesmans, និង លោក Jost Kadel ភារធារី និងជាប្រធានកិច្ចសហប្រតិបត្តិការអភិវឌ្ឍន៍អាល្លឺម៉ង់ ។

យោងតាមសេចក្តីប្រកាសព័ត៌មានរបស់សហភាពអឺរ៉ុបប្រចាំកម្ពុជា កម្មវិធីនេះក៏នឹងធានានូវការអនុវត្តការងារសមរម្យសម្រាប់កម្មករ និងដើម្បីបង្កើនសមត្ថភាពរបស់អ្នកផលិត និងអ្នកកែច្នៃ ដើម្បីទទួលយកការអនុវត្តប្រកបដោយនិរន្តរភាព និងស្តង់ដារពាក់ព័ន្ធនានា ដើម្បីបំពេញតម្រូវការនាំចេញ​ រួមទាំងទីផ្សារសហភាពអឺរ៉ុបផងដែរ។

​គំនិតផ្តួចផ្តើម​ដោយដៃគូអឺរ៉ុបនេះនាំមកនូវការបង្កើនផលិតភាពនៅក្នុងខ្សែសង្វាក់តម្លៃគោលដៅដោយការលើកកម្ពស់បច្ចេកវិទ្យាបៃតង កសិ-បរិស្ថាន និងការវិនិយោគប្រកបដោយការទទួលខុសត្រូវ (រួមទាំងការគ្មានការកាប់បំផ្លាញព្រៃឈើ) ក្នុងផលិតកម្ម និងការ​កែច្នៃកសិកម្ម។ ជាមួយនឹងមូលនិធិរួមសរុបចំនួន ២៧ លានដុល្លារអាមេរិកពីសហភាពអឺរ៉ុប និងក្រសួងសហព័ន្ធសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (BMZ) នៃប្រទេសអាល្លឺម៉ង់ គម្រោងនេះមានរយៈពេលប្រាំឆ្នាំនឹងត្រូវបានអនុវត្តដោយ GIZ សហការជាមួយរាជរដ្ឋាភិបាលកម្ពុជា តំណាងដោយ MAFF ដែលនឹងអនុវត្តនៅខេត្តសំខាន់ៗចំនួនបួន រួមមាន កំពង់ធំ ក្រចេះ ត្បូងឃ្មុំ និងកំពត។

ថ្លែងក្នុងពិធីនោះ ឯកអគ្គរដ្ឋទូតសហភាពអឺរ៉ុបប្រចាំកម្ពុជា លោក Igor Driesmans បានសង្កត់ធ្ងន់លើសារៈសំខាន់នៃការវិនិយោគលើនិរន្តរភាព និង សង្គម ដើម្បីពង្រីកលទ្ធភាពទទួលបានទីផ្សារពិសេសសម្រាប់ផលិតផលកសិកម្មកម្ពុជា។

លោកបានមានប្រសាសន៍ថា៖«គំនិតផ្តួចផ្តើមនេះឆ្លុះបញ្ចាំងពីការប្តេជ្ញាចិត្តរបស់សហភាពអឺរ៉ុប និងអាល្លឺម៉ង់ ក្នុងការលើកកម្ពស់កំណើនបៃតង និងការបង្កើតការងារសមរម្យនៅកម្ពុជា ដើម្បីឆ្លើយតបទៅនឹងការប្តេជ្ញាចិត្ត​របស់កម្ពុជាលើការពង្រឹងអាជីវកម្មបៃតង។ យើងសង្ឃឹមថាកម្មវិធីនេះនឹងធ្វើឱ្យប្រសើរឡើងនូវខ្សែសង្វាក់តម្លៃគ្រាប់ស្វាយចន្ទី និងម្រេចសម្រាប់ជាប្រយោជន៍ដល់កសិករ និងសហគ្រាសធុនតូច និងមធ្យម ទន្ទឹមនឹងការលើកកម្ពស់បរិស្ថាន និងស្តង់ដារសង្គមសម្រាប់ការនាំចេញ និងការវិនិយោគពីសហភាពអឺរ៉ុប»។

​លោក Jost Kadel ​ក៏បានសង្កត់ធ្ងន់លើតួនាទីសំខាន់នៃវិស័យកសិកម្មនៅក្នុងសេដ្ឋកិច្ចរបស់កម្ពុជា និងសារៈសំខាន់របស់វាក្នុងការសម្រេចបាននូវការរួមចំណែកដែលបានកំណត់ថ្នាក់ជាតិ (NDCs) របស់កម្ពុជាក្រោមកិច្ចព្រមព្រៀងទីក្រុងប៉ារីស។

លោកបានថ្លែងថា៖«គោលបំណងចម្បងរបស់យើងសម្រាប់គម្រោងនេះគឺលើកកម្ពស់ការប្រកួតប្រជែង និងភាពធន់នឹងអាកាសធាតុរបស់កម្ពុជាក្នុងវិស័យកសិកម្ម ដែលជួយឱ្យមានប្រាក់ចំណូលកាន់តែច្រើន ការពង្រីកសមត្ថភាពកែច្នៃ និងការលើកកម្ពស់លទ្ធភាពទទួលបានទីផ្សារសម្រាប់អ្នកពាក់ព័ន្ធទាំងអស់»។

ឯកឧត្តម ឌិត ទីណា ​ បានសង្កត់ធ្ងន់ថា៖« ​នៅពេលដែលកសិកម្មកម្ពុជាឈានទៅរកភាពទំនើបជាមួយនឹងការអនុវត្តសហគមន៍រួម និងបច្ចេកទេសប្រកបដោយនិរន្តរភាព គម្រោង CAPSAFE នឹងក្លាយជាការបោះជំហានដ៏សំខាន់មួយក្នុងការពង្រឹងខ្សែសង្វាក់តម្លៃគ្រាប់ស្វាយចន្ទី និងម្រេចរបស់យើង ដោយប្រកាន់យកនូវកំណើនបៃតង និងលើកកម្ពស់ការប្រកួតប្រជែងការនាំចេញ ​។ ​ប្រទេសកម្ពុជាបានរួមចំណែកដល់ការឈានទៅរកអធ្យាក្រឹតកាបោន ​ និងនៅតែមានភាពធន់ក្នុងការប្រឈមមុខនឹងបញ្ហាអាកាសធាតុ កិច្ចសហប្រតិបត្តិការនេះជាមួយដៃគូអឺរ៉ុបរបស់យើងបង្ហាញពីការប្តេជ្ញាចិត្តរួមគ្នារបស់យើងក្នុងការកសាងអនាគតដ៏រុងរឿងសម្រាប់យើងទាំងអស់គ្នា»។

​ជាមួយគ្នានោះដែរ ឯកឧត្តមរដ្ឋមន្ត្រី ក៏បាន​រចូលរួមជាអធិបតីបិទបញ្ចប់គម្រោង CRAS ដែលបានសហការធ្វើការជាមួយរាជរដ្ឋាភិបាល ជួយគាំទ្រដល់គោលនយោបាយរបស់រាជរដ្ឋាភិបាលនីតិកាលទី៧៕

The post អឺរ៉ុបជួយពង្រឹងភាពប្រកួតប្រជែងលើការនាំចេញ និងការផ្តល់តម្លៃបនែ្ថមនៃផលិតគ្រាប់ស្វាយចន្ទី និងម្រេចរបស់កម្ពុជា appeared first on Kampuchea Thmey Daily.

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធាន​គ.ត.គ.ស.​​ កាលពីថ្ងៃអង្គារ ទី២០ ខែសីហា ឆ្នាំ២០២៤ បានដឹកនាំកិច្ចប្រជុំលើកទី១ នៃ​ គ.ត.គ.ស. ​ដើម្បីជំរុញការអនុវត្តគោលនយោបាយនេះឱ្យសម្រេចបានទៅតាមផែនការជាពិសេសការប្រែក្លាយកម្ពុជាទៅជាអធិរាជនាំចេញគ្រាប់ស្វាយចន្ទីនៅលើទីផ្សារអន្តរជាតិ។ នេះបើយោងតាមក្រសួងពាណិជ្ជកម្ម។

សម្រាប់កិច្ចប្រជុំលើកទី១នេះ ត្រូវបានរៀបចំឡើងក្នុងគោលបំណង ១).ប្រកាសសមាសភាពនៃប្រធាន អនុប្រធាន សមាជិកនៃគណៈកម្មការ គ.ត.គ.ស. ដូចមានចែងក្នុងសេចក្តីសម្រេចរបស់រាជរដ្ឋាភិបាលលេខ ១៦ សសរ ចុះថ្ងៃទី១២ ខែមករា ឆ្នំា២០២៤ ២). អនុម័តលើសូចនាករ និងសូចនាករវាស់វែងសមិទ្ធកម្ម និង ៣). កិច្ចពិភាក្សាលើការជំរុញការអនុវត្តគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ ឱ្យមានប្រសិទ្ធភាព។

​គោលនយោបាយ​នេះ​ត្រូវ​បាន​ដាក់​ឱ្យ​ប្រើប្រាស់​កាលពី​ខែមិថុនា​ឆ្នាំ​មុនដោយលោក ប៉ាន សូរ​ស័ក្តិ អតីត​រដ្ឋមន្ត្រីក្រសួង​ពាណិជ្ជកម្ម ។ ជាមួយគោលនយោបាយនេះគឺមាន ១០៦ ទំព័រ សំដៅធ្វើការអភិវឌ្ឍផលិតកម្មស្វាយចន្ទី ការកែច្នៃ និងការធ្វើទីផ្សារឱ្យកាន់តែមានការប្រកួតប្រជែង ដើម្បីធានានិរន្តរភាព និងការធ្វើពិពិធកម្មសេដ្ឋកិច្ច និងដើម្បីប្រែក្លាយកម្ពុជាទៅជាប្រទេសផលិត និងផ្គត់ផ្គង់គ្រាប់ស្វាយចន្ទីដ៏សំខាន់សម្រាប់ទីផ្សារក្នុងស្រុក តំបន់ និងពិភពលោកក្នុងពេលអនាគត។

នៅក្នុងរយៈពេល ៧ ខែ គិតចាប់ពីខែមករា ដល់ខែកក្កដា ឆ្នាំ ២០២៤ កម្ពុជាផលិតគ្រាប់គ្រាប់​ស្វាយចន្ទីឆៅបានជាង ៨៣ ម៉ឺនតោន ក្នុងនោះនាំចេញទៅវៀតណាមចំនួន ៧៨ ម៉ឺនតោន មានការកើនឡើង ៣៦,៧% គិតជាទឹកប្រាក់ជាង ១,០៩ ពាន់លានដុល្លារ ដែលធ្វើឱ្យកម្ពុជាឈរលេខ២ជាបណ្តោះអាសន្ននៃប្រទេសនាំចេញច្រើនជាងគេលើពិភពលោក។ នេះបើយោងតាមរបាយការណ៍របស់សមាគមស្វាយចន្ទីកម្ពុជា។

ទិន្នន័យរបស់សមាគមស្វាយចន្ទីកម្ពុជា បញ្ជាក់ថា កម្ពុជាឈរលេខ២ ជាបណ្តោះអាសន្ន ជាប្រទេសដែលផលិតស្វាយចន្ទីឆៅច្រើនបំផុតលើពិភពលោក។ គ្រាប់ស្វាយចន្ទីស្ងួត បច្ចុប្បន្ន មានតម្លៃ ៧ ៣០០ រៀលឡើងទៅក្នុងមួយគីឡូក្រាម។

លោក អួន ស៊ីឡុត ប្រធានសមាគមស្វាយចន្ទីកម្ពុជាប្រាប់កម្ពុជាថ្មីនៅថ្ងៃទី ១៦ ខែសីហា ឆ្នាំ ២០២៤នេះថា កំណើននេះ មិនមែនចៃដន្យនោះទេ ពីព្រោះតាំងពីខែឧសភា សមាគមរកឃើញថា ស្វាយចន្ទីនៅកម្ពុជាមានកំណើនខ្ពស់ ដែលអាចសម្របខ្លួនបាជាមួយបាតុភូត​អេលនីណូ (El Nino) ខណៈផ្ទៃដីដាំដុះក៏បានកើនឡើងបន្ដិចផងដែរ។

លោក អួន ស៊ីឡុតថ្លែងថា៖ «សមាគមស្វាយចន្ទីកម្ពុជាបានប្រកាសនៅខែកញ្ញា ឆ្នាំ ២០២៣ ពីបាតុភូតអេលនីណូ ដែល​កម្ពុជានឹងប្រឈម យើងក៏បានផ្ដល់ដំណោះស្រាយដល់សមាជិក និងកសិករទូទៅឱ្យត្រៀមខ្លួន ក្នុងការរក្សាផលឱ្យនៅល្អ»។

​លោកបានថ្លែងបន្តទៀតថា៖ «ស្វាយចន្ទីជាប្រភេទដំណាំដែលធន់នឹងកម្ដៅ ខ្ញុំអាចនិយាយបានថា ក្ដៅកាន់តែខ្លាំង ទិន្ន​ផល​​ក៏បានល្អដែរ ប្រសិនបើយើងបានត្រៀមខ្លួនរួចជាមុន ប្រសិនបើយើងមិនអាចត្រៀមបានមុនទេផលអាចនឹងធ្លាក់ចុះពី ២០% ទៅ ៣០%»។

ជាមួយគ្នានេះដែរ កម្ពុជា​កំពុង​ព្យាយាម​ប្រែក្លាយ​ខ្លួន​ជា​ប្រទេស​ផលិត និង​នាំចេញ​គ្រាប់ស្វាយចន្ទី​ឈានមុខ​គេ តាមរយៈ​គោលនយោបាយ​ជាតិ​របស់​ខ្លួន​ស្តីពី​គ្រាប់ស្វាយចន្ទី​ឆ្នាំ ២០២២-២០២៧នេះ។ ​

តាមរយៈការអនុវត្តគោលនយោបាយនេះ សមត្ថភាពកែច្នៃរបស់កម្ពុជាត្រូវបានគេរំពឹងថានឹងកើនឡើងពី ៥ ភាគរយទៅ ២៥ ភាគរយនៅឆ្នាំ ២០២៧ និង៥០ ភាគរយនៅឆ្នាំ ២០៣២៕

The post ក្រសួងពាណិជ្ជកម្មបើកកិច្ចប្រជុំគណៈកម្មការអន្តរក្រសួងតាមដាន និងវាយតម្លៃការអនុវត្តគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ លើកដំបូង​ appeared first on Kampuchea Thmey Daily.

នៅថ្ងៃទី២៨ ខែកុម្ភៈ ឆ្នាំ២០២៤ លោក តូច ប៊ុនហួរ រដ្ឋលេខាធិការក្រសួងកសិកម្មរុក្ខាប្រមាញ់ និងនេសាទ អញ្ជើញ​បើកការដ្ឋានសាងសង់ពង្រីករោងចក្រកែច្នៃគ្រាប់ស្វាយចន្ទី របស់ក្រុមហ៊ុន មីរ៉ាត់ អាហ្គ្រី ថេក ឯ.ក ជប៉ុន ស្ថិតនៅភូមិត្រពាំងអារក្ស ឃុំជ័យ ស្រុកកំពង់ស្វាយ ខេត្តកំពង់ធំ។

ក្នុងឱកាសនោះ លោកបានលើកឡើងថា ខេត្តកំពង់ធំត្រូវបានគេស្គាល់យ៉ាងទូលំទូលាយ ដែលជាខេត្តមានសក្កានុពលផ្នែកដំណាំកសិឧស្សាហ៍កម្ម ជាពិសេសស្វាយចន្ទី ដែលបានដាំច្រើនជាងគេនៅកម្ពុជា។ លើសពីនេះគ្រាប់ស្វាយចន្ទី របស់ប្រទេសកម្ពុជាមានទំហំធំ មានរស់ជាតិឈ្ងុយឆ្ងាញ់ ទទួលបានការវាយតម្លៃខ្ពស់ពីប្រទេសនានា រួមមាន ប្រទេស​ជប៉ុនផងដែរ។ គ្រាប់ស្វាយចន្ទីដែលផលិតក្នុងប្រទេសកម្ពុជា ភាគច្រើនត្រូវបាននាំចេញទាំងមិនទាន់កែច្នៃដោយសារតែការកង្វះរោងចក្រសម្ងួត ឃ្លាំងស្តុកទុក និងកែច្នៃ ដែលជាមូលហេតុបង្ខំឲ្យមានការលក់គ្រាប់ស្វាយចន្ទីក្នុងតម្លៃទាបក្នុងអំឡុងពេលប្រមូលផលតែម្តង។

លោក តូច ប៊ុនហួរ បន្តថា សក្តានុពលដំណាំស្វាយត្រូវបានរាជរដ្ឋាភិបាលកម្ពុជា ក៏ដូចជាគណៈកម្មាធិការគោលនយោបាយ សេដ្ឋកិច្ច និងហិរញ្ញវត្ថុ (គ.ស.ហ) ដាក់ចេញនូវវិធានការចាំបាច់នានា ក្នុងការជំរុញការកែច្នៃ និងការនាំចេញផលិតផលស្វាយចន្ទី ក្នុងនោះ រួមមាន ការពង្រឹង និងការពង្រីកការនាំចេញគ្រាប់ស្វាយចន្ទី ដោយចាប់ផ្ដើមពីផលិតផលពាក់កណ្ដាលសម្រេច ផ្តោតលើការនាំចេញគ្រាប់ស្វាយចន្ទីស្ងួត ហើយក្នុងជំហានបន្ទាប់បន្តពង្រឹង ពង្រីកការកែច្នៃគ្រាប់ស្វាយចន្ទី ក្នុងបរិមាណដែលអាចផ្តល់ទុនបាន បន្តពង្រឹងការធ្វើម៉ាក និងទីផ្សារផលិតផលគ្រាប់ស្វាយចន្ទីកម្ពុជា (Branding and Marketing) ការជំរុញការចងក្រងបង្កើតសហគមន៍កសិករស្វាយចន្ទី ពិនិត្យលទ្ធភាព ក្នុងការបង្កើនទុនបង្វិល សម្រាប់ប្រមូលទិញគ្រាប់ស្វាយចន្ទី ដើម្បីកែច្នៃ និងការបង្កើនទុនវិនិយោគលើហេដ្ឋារចនាសម្ព័ន្ធសម្រាប់ស្តុក និងកែច្នៃគ្រាប់ស្វាយចន្ទីផងដែរ។

ជាមួយគ្នានេះ លោក ព្រឹម រដ្ឋា អភិបាលរងខេត្តកំពង់ធំ លើកឡើងដែរថា ខេត្តកំពង់ធំ ជាខេត្តដែលមានសក្តានុពល​លើការដាំដុះដំណាំកសិកឧស្សាហ៍កម្ម មានកៅស៊ូ ស្វាយ និងស្វាយចន្ទីផងដែរ។ ក្នុងនោះ ដំណាំស្វាយចន្ទី បានដាំដុះលើផ្ទៃដីប្រមាណជិត១៥ម៉ឺនហិចតា ផ្ទៃដីកំពុងប្រមូលបច្ចុប្បន្នចំនួន៨ម៉ឺនហិកតា ទទួលបានទិន្នផលជាមធ្យម​១,៥តោន/ហិចតា ក្នុង១ឆ្នាំហើយ និងមានសហគ្រាសសិប្បកម្ម កែច្នៃស្វាយចន្ទីចំនួន ០៧កន្លែង និងម៉ាស៊ីនសម្ងួត ២៣កន្លែងផងដែរ។

លោក គេនតារ៉ូតានីយូជី (KENTARO TANIGUCHI) ប្រធានក្រុមហ៊ុន មីរ៉ាត់ អាហ្គ្រី ថេក ឯ.ក ធ្វើរបាយការណ៍ដែរថា ការបើកការដ្ឋានសាងសង់រោងចក្រកែច្នៃគ្រាប់ស្វាយចន្ទីបន្ថែមនេះ ប្រើប្រាស់ទុន ប្រមាណ ១លានដុល្លាអាមេរិច មានទំហំ៥៨ ម៉ែត្រ គុណ២០ ម៉ែត្រ បំពាក់ជាមួយសម្ភារបរិក្ខា ដែលផលិត កែច្នៃ គ្រាប់ស្វាយចន្ទី ១០តោន ក្នុង១ថ្ងៃ ក្នុងកម្រិតកុងត្រា១៥០០តោនក្នុង១ឆ្នាំ សម្រាប់ឆ្នាំដំបូង និងសម្រាប់ឆ្នាំបន្ទាប់៣០០០តោន ក្នុង១ឆ្នាំ ក្នុងនោះក៏មានការចុះអនុស្សរណៈកិច្ចសន្យាប្រមូលទិញជាមួយនឹងសហគមន៍ ចំនួន ១០ ដែលមានខេត្តព្រះវិហារចំនួន ៥ ខេត្តកំពង់ធំចំនួន ៥ សរុបចំនួន៨ពាន់តោន ផងដែរ៕

អត្ថបទ៖ ឈាង មករា

The post ក្រុមហ៊ុនជប៉ុនបន្ថែមទុន១​លាន​ដុល្លារ សាងសង់ពង្រីករោងចក្រកែច្នៃគ្រាប់ស្វាយចន្ទីនៅខេត្តកំពង់ធំ appeared first on Kampuchea Thmey Daily.

លោកស្រី អ៊ីន ឡៃ​ហួត នាយិកា​គ្រប់​គ្រង់ សិប្បកម្ម​កែច្នៃ​គ្រាប់ស្វាយចន្ទី​ជ័យ សំបូរ បានឱ្យដឹងថា នៅ​ឆ្នាំ​២០២៤ លោកស្រី​នឹង​ពង្រីក​ទីតាំង​នេះ​ឱ្យ​ធំ​ជាង​មុន ប្ដេជ្ញា​ចិត្ត​ធ្វើ​ឱ្យបាន​៣​តោន​ក្នុង​មួយថ្ងៃ​ដើម្បី​ឱ្យបាន​១៥០០​តោន​ក្នុង​មួយឆ្នាំ នា​ឆ្នាំ​២០២៤​ខាង​មុននេះ​ផ្គត់ផ្គង់​ដល់ដៃ​គូរ​សហការ​។​

​លោកស្រី អ៊ី​ន ឡៃ​ហួត នាយិកា​គ្រប់​គ្រង់ សិប្បកម្ម​កែច្នៃ​គ្រាប់ស្វាយចន្ទី​ជ័យ សំបូរ បាន​បន្តថា លោក ស្រី​កំពុង​ធ្វើ​ការចរចា​ចំនួន​៤​ក្រុមហ៊ុន ដែល​កំពុង​ធ្វើ មាន កាណាដា កូរ៉េ ជប៉ុន ថៃ ផងដែរ​។

​បច្ចុប្បន្ន សិប្បកម្ម​កែច្នៃ​គ្រាប់ស្វាយចន្ទី​ជ័យ សំបូរ ធ្វើ​តែ​ប្រភេទ​គ្រាប់​M23 តែប៉ុណ្ណោះ ហើយ​ក្នុង​ប្រភេទ​M23 នេះ​មាន​ចំនួន​១៥​ប្រភេទ​ផ្សេងៗ​គ្នា​។

​សូម​ជម្រាបជូន​ថា ដំណើរ​ទស្សនកិច្ច​ព័ត៌មាន និង​ទស្សនកិច្ច​សិក្សា របស់​ក្រសួងកសិកម្ម រុក្ខាប្រមាញ់ និង​នេសាទ និង​សហភាព​អឺរ៉ុប អំពី​ខ្សែ​ច្រវាក់​ផលិតកម្ម​ស្វាយចន្ទី​នៅ​កម្ពុជា ធ្វើឡើង​មាន​រយៈពេល ៤​ថ្ងៃ ៣​យប់ នៅ​ខេត្តកំពង់ធំ ស្ទឹងត្រែង និង​ក្រចេះ​៕

The post សិប្បកម្ម​កែច្នៃ​គ្រាប់ស្វាយចន្ទី​ជ័យ សំបូរ ប្ដេជ្ញា​ពង្រីក​ផលិតកម្ម​ឱ្យ​បាន​១៥០០​តោន​ក្នុង​១​ឆ្នាំ​ appeared first on Kampuchea Thmey Daily.

ដំណើរទស្សនកិច្ចព័ត៌មាន និងទស្សនកិច្ចសិក្សារបស់ក្រសួងកសិកម្ម និងសហភាពអឺរ៉ុប ធ្វើឡើងមានរយៈពេល ៤ថ្ងៃ ៣យប់ នៅខេត្តកំពង់ធំ ស្ទឹងត្រែង និងក្រចេះ។

​លោក ​តូច ប៊ុនហួរ រដ្ឋលេខាធិការក្រសួងកសិកម្ម បានលើកអំពីគោលបំណងនៃទស្សនកិច្ចនេះ គឺដើម្បីស្វែងយល់ពីសក្តានុពលរបស់ដំណាំស្វាយចន្ទី និងជំរុញការផ្សព្វផ្សាយឱ្យបានទូលំទូលាយ បង្កើនការវិនិយោគឱ្យបានខ្លាំងក្លា ដើម្បីសម្រេចគោលដៅឱ្យកម្ពុជាក្លាយខ្លួនជាអធិរាជ​នាំចេញ​ស្វាយចន្ទី។​

​ជាយន្តការលោក បានណែនាំឱ្យមានការសហការគ្នាចែករំលែកទិន្នន័យដាំដុះ និងទិន្នផលទាំងអស់ ដើម្បីមានភាពច្បាស់លាស់សម្រាប់ការគ្រប់គ្រង និងកែច្នៃនាំចេញ។ ដូច្នេះការផលិត ការកែច្នៃត្រូវយកចិត្តទុកដាក់លើគុណភាព សុវត្ថិភាព តាមស្តង់ដាគោលនយោបាយ និងទីផ្សារ ដើម្បីទទួលបានតម្លៃបន្ថែមខ្ពស់។

ជាមួយគ្នានេះដែរ ត្រូវកាត់បន្ថយថ្លៃដើមផលិត និងទុនវិនិយោគ ដើម្បីជួយដល់កសិករ ធ្វើយ៉ាងណាឱ្យមានប្រសិទ្ធភាព និងនិរន្តរភាពសេដ្ឋកិច្ចពិតប្រាកដ។

មន្ដ្រីដដែលរូបនេះ បានបន្ថែមថា ការដាក់ព​ង្រាយមន្ត្រីផ្សព្វផ្សាយកសិកម្មឃុំ ពិតជាចាំបាច់ក្នុងផ្តល់សេវាផ្សព្វផ្សាយ​កសិកម្មកាន់តែខិតជិតកសិករ និងជួយសម្រួលពួកគាត់ដោះស្រាយបញ្ហាប្រឈម​ផ្សេងៗបានទាន់​ពេលវេលា និងមានប្រសិទ្ធភាពខ្ពស់។

បើយោងតាមរបាយការណ៍ពីសមាគមស្វាយចន្ទីកម្ពុជាបង្ហាញថា ​រយៈពេល១០ខែ គិតចាប់ពីខែមករា ដល់ខែតុលាឆ្នាំ២០២៣ កម្ពុជានាំចេញគ្រាប់ស្វាយចន្ទីឆៅជាង ​៦១ ម៉ឺនតោន ​ទទួលបានទឹកប្រាក់ ​៨៣១ លានដុល្លារ ថយចុះប្រមាណ ១៦ បើធៀបនឹងរយៈពេលដូចគ្នានៅឆ្នាំ២០២២។ ​

អត្ថបទ៖ សុខា

ស្វាយចន្ទី គឺដំណាំយុទ្ធសាស្រ្ត ដែលរាជរដ្ឋាភិបាលកំពុងយកចិត្តទុកដាក់ និងជំរុញការនាំចេញឲ្យបានក្លាយជា «អធិរាជ» នាំចេញគ្រប់ស្វាយចន្ទី នាពេលខាងមុខ។

រាជរដ្ឋាភិបាលបានដាក់ចេញនូវគោលនយោបាយជាតិ ស្តីពីស្វាយចន្ទី ២០២២-២០២៧ ដែលជាផែនទីចង្អុលផ្លូវដែលបានផ្តោត ទៅលើគោលដៅយុទ្ធសាស្ត្រធំៗចំនួន៣ គឺយុទ្ធសាស្ត្រនៃការផលិត យុទ្ធសាស្ត្រនៃការកែច្នៃ និងយុទ្ធសាស្ត្រនៃការនាំចេញ ប្រកបដោយនិរន្តភាព ភាពប្រកួតប្រជែង និងឈានមុខគេលើទីផ្សារ៕

The post ក្រសួងកសិកម្ម និងសហភាពអឺរ៉ុបចុះសិក្សាខ្សែច្រវាក់ផលិតកម្មស្វាយចន្ទីជំរុញកែច្នៃនាំចេញ appeared first on Kampuchea Thmey Daily.

​លោក អួន ស៊ីឡុត ប្រធានសមាគមស្វាយចន្ទីកម្ពុជាប្រាប់កម្ពុជាថ្មីនៅថ្ងៃច័ន្ទទី ៣០ ខែសីហា ឆ្នាំ ២០២៣នេះថា គ្រាប់ស្វាយចន្ទីស្ងួតមានតម្លៃល្អជាងឆ្នាំកន្លងទៅដោយសារតែគុណភាព​ល្អ ខណៈអាកាសធាតុឆ្នាំនេះ ក៏ល្អជាងឆ្នាំមុនដែល​ធ្វើឱ្យភាគរយសាច់បាត់ខ្ពស់។

លោក អួន ស៊ីឡុតបញ្ជាក់ថា៖ «ឆ្នាំមុន យើងលក់បានតែ១គីឡូ ៥ ៦០០ ​រៀល បច្ចុប្បន្នលក់បាន ៦ ៧០០ រៀល ក្នុង១គីឡូ»។ កសិករបានចាប់ផ្ដើមបញ្ចេញលក់គ្រាប់ស្វាយចន្ទីនៅអំឡុង ខែសីហា ដោយសារតម្លៃល្អអាច​ទទួលយកបាន។

ទិន្នន័យរបស់សមាគមស្វាយចន្ទីរកម្ពុជាបង្ហាញថា ​នៅក្នុងរយៈពេល ៧ ខែឆ្នាំ ២០២៣ ផលិត​កម្មស្វាយចន្ទី​ទទួលបានជាង ៦ សែនតោន (៦២០ ០០០) ដែលមានទឹកប្រាក់ ៨០៥ លានដុល្លារ​ថយចុះ ១៥,៩ ​ភាគរយ បើ​ធៀប​រយៈកាល​ដូចគ្នា​ក្នុង​ឆ្នាំ​ ២០២២​៕

អត្ថបទ៖ ឡេង ដេត

The post ​តម្លៃគ្រាប់ស្វាយចន្ទីបានហក់ឡើងវិញ ក្រោយកសិករផ្អាកលក់មួយរយៈ​ appeared first on Kampuchea Thmey Daily.