តាមរយៈការតស៊ូខិតខំប្រឹងប្រែង វណ្ណដា ទទួលបានភាពជោគជ័យមិនស្ទើរ ក្រោយបោះជំហានចូលវិស័យសិល្បៈបែបចម្រៀងរ៉េប។ លើសពីការខិតខំប្រឹងប្រែង វណ្ណដា ក៏មានភ័ព្វសំណាងជាច្រើនចូលមកក្នុងជីវិត មិនថាសន្ទុះនៃការគាំទ្រក្នុងស្រុក និងក្រៅស្រុក ជាពិសេសការជួយជ្រោមជ្រែងពីផលិតកម្ម បារមី បានធ្វើឲ្យ វណ្ណដា កាន់តែមានប្រជាប្រិយភាពថែមមួយកម្រិតទៀត។ ទន្ទឹមនឹងនេះ វណ្ណដា ក៏បានចាប់ផ្ដើមប្រឡូកក្នុងវិស័យសិល្បៈនៅក្រៅប្រទេស ដោយកាលពីពេលថ្មីៗនេះ វណ្ណដា បានទម្លាក់បទចម្រៀងជាមួយតារារ៉េបស្រុកថៃ F.Hero Sprite 1Mill មានចំណងជើងថា Run The Town ដែលទទួលបានគាំទ្រខ្លាំងមិនថានៅខ្មែរ និងថៃ ដោយត្រឹមតែរយៈពេល ១០ ថ្ងៃ ទទួលបានអ្នកចូលមើលរហូតដល់ទៅ ៨.៤ លាននាក់ នៅក្នុងយូធូប។

បើងាកមកមើលតារាចម្រៀងនៅក្នុងប្រទេសកម្ពុជាយើងវិញ ក៏មានតារាចម្រៀងជួរមុខពីរដួងបានគាំទ្រ វណ្ណដា មានដូចជា អ្នកនាង ពេជ្រ សោភា បាននិយាយចំៗពេល Live ថា គាំទ្រវណ្ណដាពេញៗមាត់ ដោយព្រោះ​ទេពកោសល្យ និងសមត្ថភាព និងកាលពីប៉ុន្មានថ្ងៃមុននេះ តារាចម្រៀងប្រចាំផលិតកម្មហង្សមាសមួយរូបទៀត គឺ លោក ហ្សណូ បានស៊ែរបទចម្រៀង Run The Town ដោយភ្ជាប់ជាមួយឃ្លាថា “Proud of you bro”។ ឯចំណែកអ្នកនាង ឱក សុគន្ធកញ្ញា ទោះបីជាអ្នកនាងមិនបានបង្ហាញជាសាធារណៈនៃការគាំទ្រតារាចម្រៀងវ័យក្មេងរូបនេះក៏ដោយ តែអ្នកនាងបានថត Tiktok ដោយដាក់ចម្រៀង Solo again របស់វណ្ណដាផងដែរ។

គួររំលឹកថា កាលពីកន្លងទៅថ្មីៗនេះ វណ្ណដា បានធ្វើការប្រគំតន្ដ្រីរបស់ខ្លួនជាលើកដំបូង ដោយសហការជាមួយស្រាបៀ ហនុមាន អមជាមួយ $KULLTHE ALBUM ដែលបានព្រឹត្តិឡើងនៅ Phnom Penh Factory ដោយទទួលបានការគាំទ្រខ្លាំងពីសំណាក់អ្នកហ្វេនៗរបស់លោកផ្ទាល់៕

អត្ថបទ៖ ផានិត

The post ដឹងទេ តារាចម្រៀងជួរមុខស្រុកខ្មែរណាខ្លះ គាំទ្រ វណ្ណដា ជាសាធារណៈ? appeared first on Kampuchea Thmey Daily.