ឡុង ភារ៉ាត់ Archives - Kampuchea Thmey Daily

កីឡាករលេចធ្លោ៣រូបព្រះខ័នរាជស្វាយរៀងនិយាយពីជំនួបធំជាមួយភ្នំពេញក្រោន

chean virakbot — Mon, 04 Jul 2022 03:26:59 +0000

សមាជិកលេចធ្លោ៣រូបរបស់ព្រះខ័នរាជស្វាយរៀងបានបង្ហាញចំណាប់អារម្មណ៍ផ្ទាល់ខ្លួនអំពីការប្រកួតទល់ជាមួយនឹងភ្នំពេញក្រោន វេលាម៉ោង៦:៣០នាទីល្ងាច ថ្ងៃអង្គារ៍ ទី៦ ខែកក្កដា ស្អែកនេះនៅទឹកដីស្វាយរៀង ក្នុងសប្តាហ៍ទី៩ នៃការប្រកួតជម្រើសជើងឯកខេមបូឌានព្រីមៀរលីគ រដូវកាល២០២២។

អៀន ពិសី

ខ្សែបម្រើស្លាបព្រះខ័នរាជស្វាយរៀង អៀន ពិសី បង្ហាញអារម្មណ៍ផ្ទាល់ខ្លួនថា ៖«សម្រាប់ខ្ញុំយល់ឃើញថា ការប្រកួតនេះគឺជាការប្រកួតមួយដ៏ល្អ។ ខ្ញុំសប្បាយចិត្តដែលបានប្រកួតជាមួយក្រុមខ្លាំង។ ការប្រកួតមួយនេះនឹងល្អមើលសម្រាប់អ្នកគាំទ្រ ពីព្រោះអីក្រុមទាំងពីរនឹងលេងបុកគ្នាទៅវិញទៅមក»។

ចំណែកយុវជនលេចធ្លោ ជូ ស៊ីនទី បាននិយាយថា ៖«ខ្ញុំគិតថា នេះជាការប្រកួត ដ៏អស្ចារ្យមួយ ហើយជាការប្រកួតដ៏ស្វិតស្វាញ និងជាការប្រកួតដែលមានការចាប់អារម្មណ៍បំផុត។ យើងខ្ញុំប្តេជ្ញាថា នឹងប្រឹងឲ្យអស់សមត្ថភាព និង នាំរឿងល្អសម្រាប់អ្នកគាំទ្ររបស់យើង»។

ជូ ស៊ីនទី

ទន្ទឹមជាមួយគ្នា ឡុង ភារ៉ាត់ ខ្សែបម្រើកណ្តាលគួរឲ្យចាប់អារម្មណ៍មួយរូបរបស់ព្រះខ័នរាជស្វាយរៀង បានលើកឡើងថា ៖«ថ្ងៃស្អែកគឺជាការប្រកួតដ៏ពិបាក និងតឹងតែងសម្រាប់ក្រុមយើង។ ទោះជាការប្រកួតពិបាកយ៉ាងណា តែពួកយើងបានត្រៀមខ្លួនរួចរាល់ហើយសម្រាប់ការប្រកួតនេះ»។

កាលពីជុំទី១ ព្រះខ័នរាជស្វាយរៀងបានយកឈ្នះភ្នំពេញក្រោនដោយលទ្ធផល ៣-១ នៅទឹកដីរបស់ភ្នំពេញក្រោន ក្នុងរាជធានីភ្នំពេញ។

ឡុង ភារ៉ាត់

ដល់ពេលនេះ ព្រះខ័នរាជស្វាយរៀង នៅតែជាក្លឹបមិនទាន់ស្គាល់បរាជ័យក្នុងការប្រកួតជម្រើសជើងឯកខេមបូឌានព្រីមៀរលីគ រដូវកាល២០២២នេះ បន្ទាប់ពី៨ប្រកួតគឺឈ្នះ៧ និងស្មើ១ មាន២២ពិន្ទុ កំពុងឈរលើកំពូលតារាង។ ថ្ងៃអង្គារ៍ស្អែកនេះគឺជាការប្រកួតសប្តាហ៍ទី៨របស់ភ្នំពេញក្រោន ដោយសារក្រុមតំណាងកម្ពុជានេះបានចេញទៅប្រកួតពានរង្វាន់ AFC Cup។ ការប្រកួតនៅលីគ៧លើកកាលពីជុំទី១ ភ្នំពេញក្រោន ឈ្នះ១ ស្មើ៤ និងចាញ់២ មាន៧ពិន្ទុ កំពុងឈរចំណាត់ថ្នាក់លេខ៦៕

អត្ថបទ៖ វីរបុត្រ

The post កីឡាករលេចធ្លោ៣រូបព្រះខ័នរាជស្វាយរៀងនិយាយពីជំនួបធំជាមួយភ្នំពេញក្រោន appeared first on Kampuchea Thmey Daily.

ឡុង ភារ៉ាត់ មានគោលដៅចម្បង២ពេលចូលព្រះខ័នរាជស្វាយរៀង

chean virakbot — Wed, 29 Jun 2022 01:10:54 +0000

ឡុង ភារ៉ាត់ បានឆ្លងកាត់ក្នុងក្លឹបបាល់ទាត់ជាច្រើនមុនពេលលេចធ្លោក្នុងក្លឹបអាជីពព្រះខ័នរាជស្វាយរៀង និងក្រុមបាល់ទាត់ជម្រើសជាតិកម្ពុជាក្រុមធំ។

ឡុង ភារ៉ាត់

កីឡាករខ្សែបម្រើអាយុ២៤ឆ្នាំបានចូលព្រះខ័នរាជស្វាយរៀងកាលពីដើមឆ្នាំ២០២២កន្លងទៅនេះ។ រូបគេជាអតីតយុវជនភ្នំពេញរយៈពេលប្រហែលជា៥ឆ្នាំមុនផ្លាស់ចូលក្លឹបអាជីព វេស្ទើន ភ្នំពេញ អេហ្វស៊ី ក្នុងឆ្នាំ២០១៦។

ឆ្នាំ២០១៨ ឡុង ភារ៉ាត់ បានផ្លាស់ទៅនៅក្លឹប សូលទីឡូអង្គរ រហូតដល់ឆ្នាំ២០១៩ ទើបបានបន្តផ្ទេរទៅចូលរួមជាមួយ ក្លឹបអង្គរថាយហ្គឺរ។ លេងជាមួយក្លឹបអាជីពដែលមានម្ចាស់ជាជនជាតិជប៉ុននេះគឺជាឱកាសដែលរូបគេបង្ហាញសមត្ថភាពកាន់តែអស្ចារ្យ និងគួរឲ្យចាប់អារម្មណ៍ ហើយទីបំផុតក្លឹបអាជីពធំ ព្រះខ័នរាជស្វាយរៀង នាំចូលក្នុងឆ្នាំ២០២២។

ឡុង ភារ៉ាត់នៅលើទីលាន

សម្រាប់ការផ្ទេរមកកាន់ក្លឹបព្រះខ័នរាជស្វាយរៀងនេះ ឡុង ភារ៉ាត់ បានប្រាប់ថា ៖«ខ្ញុំឆ្លងកាត់បទពិសោធនៅក្លឹបជាច្រើនដែលពីមួយក្លឹបទៅមួយក្លឹប ខ្ញុំតែងតែបានរៀនសូត្រ និងអភិវឌ្ឍខ្លួនរហូត។ មើលឃើញសមត្ថភាពខ្លួនកាន់តែរីកចម្រើន ខ្ញុំចង់បានអ្វីដែលថ្មីបន្ថែមទៀត»។

«ខ្ញុំចូលព្រះខ័នរាជដោយមានគោលដៅសំខាន់ពីរ។ ទី១ គឺខ្ញុំចង់ប្រកួតប្រជែងថ្មី ពីព្រោះព្រះខ័នរាជស្វាយរៀងជាក្លឹបអាជីពធំ ដូច្នេះមានការប្រកួតប្រជែងខ្ពស់។ ទី២ គឺខ្ញុំចង់ឈ្នះពានរង្វាន់ជាមួយព្រះខ័នរាជស្វាយរៀង»។ ឡុង ភារ៉ាត់ បញ្ជាក់។

ឡុង ភារ៉ាត់ (លេខ១៦) ក្នុងក្រុមជម្រើសជាតិ

បន្ទាប់ពីចូលព្រះខ័នរាជស្វាយរៀង និងបានក្លាយជាសមាជិកសំខាន់មួយរូបជួយឲ្យក្លឹបមានមូលដ្ឋាននៅខេត្តស្វាយរៀងនេះឈរលើកំពូលតារាងនៃលីគកំពូលកម្ពុជារដូវកាល២០២២ ឡុង ភារ៉ាត់ ត្រូវបានកោះហៅចូលក្រុមជម្រើសជាតិកម្ពុជាក្រុមធំដើម្បីចេញទៅប្រកួតពានរង្វាន់ AFC Asian Cup វគ្គសន្សំពិន្ទុក្នុងពូលនៅប្រទេសឥណ្ឌា។ រូបគេក៏បានបង្ហាញប្រកួតជម្រើស១១នាក់ដំបូងនៅលើទីលានដែរ៕

អត្ថបទ៖ វីរបុត្រ

The post ឡុង ភារ៉ាត់ មានគោលដៅចម្បង២ពេលចូលព្រះខ័នរាជស្វាយរៀង appeared first on Kampuchea Thmey Daily.

ឡុង ភារ៉ាត់ Archives - Kampuchea Thmey Daily

ឡុង​ ភារ៉ាត់​ មាន​​​គោល​​ដៅ​​​ចម្បង​២​​​ពេល​​ចូល​​ព្រះ​​ខ័ន​​រាជ​​ស្វាយ​រៀង​

ឡុង ភារ៉ាត់ មានគោលដៅចម្បង២ពេលចូលព្រះខ័នរាជស្វាយរៀង