ក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព.) លើកទី៨ អាណត្តិទី៤  ធ្វើឡើងនាថ្ងៃទី២៥ ខែមីនា​នេះ ប្រធានស្តីទី អង្គភាពប្រឆាំងអំពើពុករលួយ លោកយ៉ិនទៀង ពុទ្ធិរិទ្ធ បានរាយការណ៍ថា កាលពីថ្ងៃទី១៨ ខែ មីនា ឆ្នាំ ២០២៦  អ.ប.ព. បានកសាងសំណុំរឿងពាក់ព័ន្ធអំពើ រំលោភអំណាច និង សម្អាតប្រាក់ ដែលមានជនសង្ស័យ ឈ្មោះ ម៉ៅ សាន់សូនា អនុប្រធានសាខាគយ និងរដ្ឋាករ  ខេត្តកោះកុង ឈរជើងនៅចំណុចអណ្តូងទឹក ដែលល្បីល្បាញ ចាប់ឡានដឹកទំនិញមិនរើស តាំងពីទំនិញមានពន្ធ ទំនិញគ្មានពន្ធ គ្រឿងអេតចាយ ត្រី សាច់ បន្លែ គ្រឿងផ្ទះដែលរុះរើ… ជាប់សង្ស័យក្នុងអំពើ រំលោភអំណាច និងសម្អាតប្រាក់ ទៅតុលាការ។  

បើតាមលោក យ៉ិនទៀង ពុទ្ធិរិទ្ធ អង្គភាពប្រឆាំងអំពើពុករលួយ ក៏បានកសាងសំណុំរឿងបញ្ជូនឈ្មោះ ម៉ៅ ទិត្យា បុគ្គលិកជាប់កិច្ចសន្យា នៃសាខាគយ និងរដ្ឋាករ ខេត្តកោះកុង ជាប់សង្ស័យពីបទ សមគំនិតក្នុងអំពើរំលោភអំណាច និងសម្អាតប្រាក់, ឈ្មោះ ពត ស្រីនាង មុខរបរមេផ្ទះ ជាប់សង្ស័យពីបទ សមគំនិតក្នុងការសម្អាតប្រាក់ និងទី៤-ឈ្មោះ ផល ដុល្លា មុខរបរ បុគ្គលិកធនាគារ ជាប់សង្ស័យពីបទ សមគំនិតក្នុងការសម្អាតប្រាក់ ដែលជាបក្សពួករបស់ឈ្មោះ ម៉ៅ សាន់សូនាទៅតុលាការដូចគ្នា។

យោងតាមសេចក្ដីរាយការណ៍ពីមូលដ្ឋានបានឱ្យដឹងថា អនុប្រធានសាខាគយ និងរដ្ឋាករខេត្តកោះកុង លោក ម៉ៅ  សាន់​សូនា ល្បីល្បាញខាងជម្រិតទារប្រាក់ពីជនជាតិចិនជាច្រើនករណី  ទារប្រាក់ពីអ្នកដឹកទំនិញ អ្នកដឹកគ្រឿងសមុទ្រ  និងល្បីខាងចាប់ដោយមិនលើកលែងឡើយសូម្បីតែអ្នកដឹកអេតចាយ។  

ក្រុមអ្នកបើកឡានដឹកទំនិញក្នុងស្រុកដែលបានឆ្លងកាត់ផ្លូវជាតិលេខ៤៨ ភូមិសាស្រ្តស្រុកបូទុមសាគរ ខេត្តកោះកុង  បានប្រាប់អ្នកយកព័ត៌មាន ថា នៅដែលបុគ្គល ម៉ៅ សាន់សូនា ឃាត់រថយន្តដឹកអេតចាយ ត្រីសាច់ បន្លែផ្លែឈើ ត្រួតពិនិត្យម្តងៗ អនុប្រធានគយ និងរដ្ឋាកររូបនេះបានជំរិតទាររាប់ពាន់ដុល្លារ ប៉ុន្តែក្រោយមកសម្រួលមកត្រឹម៤០ម៉ឺនរៀល  ដោយប្រើពាក្យថា«យល់យោគ» ទើបឱ្យរថយន្តដឹកទំនិញអាចបន្តដំណើរទៅមុខបាន។ ចំណែកពលរដ្ឋដឹកសម្ភារ:រុះរើផ្ទះផ្លាស់ទីលំនៅ ក៏ត្រូវលោក ម៉ៅ សាន់សូនា មិនលើកលែងឱ្យឡើយ ដោយជំរិតទារឱ្យបង់លុយក្រៅច្បាប់ចំនួន១៥ម៉ឺនរៀលក្នុង១រថយន្ត ក្រោមហេតុផលត្រូវបង់ថ្លៃបាយទឹក និងបានជម្រិតទារប្រាក់រាប់សែនរៀលពីអ្នកប្រកបរបរដឹកគ្រឿងសមុទ្រជាច្រើនលើកមកហើយ។

គួរកត់សម្គាល់ថា សារព័ត៌មានក្នុងស្រុកបានចេញផ្សាយកាលពីពាក់កណ្ដាលខែសីហា ឆ្នាំ២០២៥ ថា អនុប្រធានគយ និងរដ្ឋាករខេត្តកោះកុង ម៉ៅ សាន់សូនា បានប្រព្រឹត្តទង្វើដូចដែលក្រុមអ្នកបើករថយន្តដឹកទំនិញរៀបរាប់ខាងលើ និងបានប្រើប្រាស់រថយន្តពាក់ផ្លាកលេខរដ្ឋ និងស៊ីវិលប្រដេញចាប់រថយន្ត ប្រើប្រាស់សម្ដីអសុរោះ សម្លុតពលរដ្ឋជាដើម៕

ដោយ៖ ង៉ិល ណារ៉ាត់

The post ACU បញ្ចូនខ្លួនអនុប្រធានសាខាគយកោះកុង ល្បីរឿងជំរិតទារលុយជនជាតិចិន ចាប់លុះក្ស័យ ចាប់ឡានដឹកទំនិញបង់ពន្ធ គ្រឿងអេតចាយ និងបក្សពួកទៅតុលាការ appeared first on Kampuchea Thmey Daily.

កាលពី​ថ្ងៃទី២៦ ខែមករា ឆ្នាំ២០២៤ អគ្គនាយកដ្ឋានគយនិងរដ្ឋាករកម្ពុជា (អគរ) មានប្រារព្ធពិធីអបអរសាទរទិវាគយអន្តរជាតិ និងត្រូវជាខួបលើកទី ៧១ ឆ្នាំ នៃការបង្កើតអង្គការគយពិភពលោក។

ទិវាគយអន្តរជាតិសម្រាប់ឆ្នាំ ២០២៤ ធ្វើឡើងក្រោមប្រធានបទ “ពង្រឹងភាពជាដៃគូប្រពៃណី និងបង្កើតភាពជាដៃគូថ្មីដោយមានគោលដៅរួមច្បាស់លាស់” (Customs Engaging Traditional and New Partners with Purpose)។

នាឱកា​សនោះ​ លោក គុណ ញឹម រដ្ឋមន្រ្តីប្រតិភូអមនាយករដ្ឋមន្រ្តី និងជា​អគ្គនាយកនៃអគ្គនាយកដ្ឋានគយនិងរដ្ឋាករកម្ពុជាបានលើកពី​សមិទ្ធផល​សម្រេច​បានមួយ​ចំនួន​​នៃអគ្គនាយកដ្ឋានគយនិងរដ្ឋាករកម្ពុជា។

បើតាមលោក គុណ ញឹម ដោយសារមានការចូលរួមយ៉ាងសកម្មពីដៃគូនានាបានធ្វើឱ្យ​អគ្គនាយកដ្ឋានគយនិងរដ្ឋាករកម្ពុជាសម្រេចបានសមិទ្ធផលសំខាន់ៗជាច្រើន ពាក់ព័ន្ធនឹងកិច្ចសម្រួលពាណិជ្ជកម្មនិងកិច្ចសហប្រតិបត្តិការផ្សេងៗក្នុង​នោះ​រួមមាន៖

១. បានបញ្ចប់ការអនុវត្តគម្រោងបញ្ជរតែមួយជាតិដំណាក់កាលទី២ និងបានចាប់ផ្ដើមការអនុវត្តគម្រោងបញ្ជរតែមួយជាតិដំណាក់កាលទី៣
២.បានធ្វើសន្ធានកម្មប្រព័ន្ធស្វ័យប្រវត្តិកម្មគយជាមួយប្រព័ន្ធស្វ័យប្រវត្តិកម្មរបស់រតនាគារជាតិ អគ្គនាយកដ្ឋានពន្ធដារ អគ្គនាយកដ្ឋានដឹកជញ្ជូនផ្លូវគោក និងប្រៃសណីយ៍កម្ពុជា
៣. បានដាក់ឱ្យអនុវត្តកម្មវិធីប្រតិបត្តិករសេដ្ឋកិច្ចបានទទួលការអនុញ្ញាត (AEO) និងបានបង្កើនចំនួនសមាជិកនៃក្រុមធុរជន​ល្អបំផុត (Best Traders)
៤.បានចុះកិច្ចព្រមព្រៀងទទួលស្គាល់គ្នាទៅវិញទៅមកលើការងារប្រតិបត្តិករសេដ្ឋកិច្ចបានទទួលការអនុញ្ញាតក្នុងក្រប​ខ័ណ្ឌអាស៊ាន (MRA)
៥.បានអនុវត្តយន្តការភាពជាដៃគូគយ-ផ្នែកឯកជន (CPPM) និងកិច្ចប្រជុំពិគ្រោះយោបល់ជាមួយសភាពាណិជ្ជកម្មកម្ពុជា និងសមាគមធុរកិច្ចផ្សេងទៀត ដោយបានដោះស្រាយនូវបញ្ហានិងសំណូមពរជាច្រើន របស់ផ្នែកឯកជនពាក់ព័ន្ធនឹងការងារគយ
៦.បានចូលរួមអនុវត្តគោលនយោបាយពាណិជ្ជកម្មអន្តរជាតិរបស់រាជរដ្ឋាភិបាល ពិសេសក្នុងការចរចាបង្កើតកិច្ចព្រមព្រៀងពាណិជ្ជកម្មសេរីទ្វេភាគីដែលរួមមានជាមួយចិន កូរ៉េ អេមីរ៉ាតអារ៉ាប់រួម និងការចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)ជាដើម
៧.បានចុះហត្ថលេខាលើអនុស្សរណៈយោគយល់គ្នាជាមួយរដ្ឋបាលគយចិន ហុងកុង និងកូរ៉េ ដើម្បីពង្រឹងកិច្ចសហប្រតិបត្តិការគយ និងការជួយគ្នាទៅវិញទៅមក
៨.បានរៀបចំផែនទីចង្អុលផ្លូវស្តីពីកិច្ចសម្រួលពាណិជ្ជកម្មឆ្នាំ២០២២-២០២៥ ក្រោមក្របខ័ណ្ឌគណៈកម្មាធិការកិច្ចសម្រួលពាណិជ្ជកម្ម
៩.បានចូលរួមពង្រឹងកិច្ចសហប្រតិបត្តិការអន្តរជាតិ ទ្វេភាគី ពហុភាគី តំបន់ និងសកលលោក ក្នុងការចែករំលែកព័ត៌មាន និងការជួយគ្នាទៅវិញទៅមក តាមរយៈការចុះអនុស្សរណៈនៃការយោគយល់គ្នានិងកិច្ចព្រមព្រៀងសហប្រតិបត្តិការនានាជាច្រើន។

ជារៀងរាល់ឆ្នាំនៅថ្ងៃទី ២៦ ខែមករា រដ្ឋបាលគយនៃប្រទេសជាសមាជិកអង្គការគយពិភពលោកដែលបច្ចុប្បន្នមានចំនួន ១៨៥ ប្រទេស តែងតែ​រៀបចំពិធីអបអរសារទរទិវាគយអន្តរជាតិ ដើម្បីរំលឹកដល់ការបង្កើតក្រុមប្រឹក្សាសហប្រតិបត្តិការគយ ដែលបច្ចុប្បន្នមានឈ្មោះថា អង្គការគយពិភពលោក (WCO)។

ទិវាគយអន្តរជាតិឆ្នាំ ២០២៤​ ប្រធានបទសំខាន់គឺការ​​អំពាវនាវដល់សមាជិកអង្គការគយពិភពលោកទាំងអស់ ធ្វើការវាយតម្លៃឡើងវិញនូវការរៀបចំយុទ្ធសាស្ត្រដើម្បីពង្រឹងកិច្ចសហប្រតិបត្តិការ និងរឹតចំណងភាពជាដៃគូរបស់ខ្លួនដែល​​មានស្រាប់ឱ្យកាន់តែស៊ីជម្រៅ និងត្រូវបង្កើតសម្ព័ន្ធភាពដៃគូថ្មីជាច្រើនទៀត។

លោក​គុណ ញឹម បាន​គូស​បញ្ជាក់​ថា ប្រធានបទឆ្នាំនេះមិនត្រឹមតែជាប្រយោគពាក្យស្លោកប៉ុណ្ណោះទេ ប៉ុន្តែគឺជាផែនទីចង្អុលផ្លូវសម្រាប់រដ្ឋបាលគយត្រៀមរៀបចំយុទ្ធសាស្រ្តកំណែទម្រង់និងទំនើបកម្មគយ ផែនការសកម្មភាពដើម្បីសម្រេចបាននូវបេសកកម្ម និងចក្ខុវិស័យរបស់រដ្ឋបាលគយនីមួយៗ ដើម្បីពង្រឹងបន្ថែមនូវកិច្ចសម្រួលពាណិជ្ជកម្មអន្តរជាតិ និងរួមចំណែកបង្ករឱ្យមានបរិយាកាសធុរកិច្ចល្អប្រសើរ, ការបង្កើនប្រសិទ្ធភាព ក្នុងការប្រមូលចំណូលពន្ធអាករ ប្រកបដោយសមធម៌និងតម្លាភាព, ការបង្កើនប្រសិទ្ធភាព​ក្នុងការបង្ការនិងបង្ក្រាបអំពើរត់គេចពន្ធ, និងការចូលរួមចំណែកការពារសង្គម បរិស្ថាន និងសុខមាលភាពរបស់ប្រទេសជាតិ។

បើតាម​លោក គុណ ញឹម ដើម្បីកែលម្អកិច្ចសម្រួលពាណិជ្ជកម្មនិងបរិយាកាសវិនិយោគនិងធុរកិច្ចនៅកម្ពុជា ព្រមទាំងបង្កើនប្រសិទ្ធភាពក្នុងការអនុវត្តតួនាទីស្នូលគឺការប្រមូលពន្ធនិងអាករ អគ្គនាយកដ្ឋានគយនិងរដ្ឋាករកម្ពុជាបានកំណត់គោលដៅយ៉ាងច្បាស់លាស់នៅក្នុងឯកសារយុទ្ធសាស្ត្រកែទម្រង់និងទំនើបកម្មគយឆ្នាំ២០២៤-២០២៨។

បន្ថែមពីនេះ​ លោក គុណ ញឹម អះអាង​ថា កិច្ចសម្រួលពាណិជ្ជកម្ម និងកិច្ចសហប្រតិបត្តិការគយជាផ្នែកមួយដ៏សំខាន់សម្រាប់រាល់កិច្ចដំណើរការរបស់រដ្ឋបាលគយ។ ក្នុងន័យនេះ អគ្គនាយកដ្ឋានគយនិងរដ្ឋាករកម្ពុជាបានរៀបចំឱ្យមានយន្តការសហប្រតិបត្តិការជាមួយដៃគូរជាច្រើន ដែលក្នុងនោះរួមមាន៖ រវាងរដ្ឋបាលគយនានា, គយជាមួយស្ថាប័នរបស់រាជរដ្ឋាភិបាល (ក្រសួងពាណិជ្ជកម្ម, ក្រសួងយុត្តិធម៌, អគ្គស្នងការនគរបាលជាតិ, អគ្គនាយកដ្ឋានអន្តោប្រវេសន៍, កងរាជអាវុធហត្ថ,…), គយជាមួយវិស័យឯកជន (CPPM, JBAC, EUROCHAM, CLA…) និងគយជាមួយដៃគូអភិវឌ្ឍន៍ (IMF, WB, UNODC, ADB, JICA, EU-Arise Plus/ GIZ…)ជាដើម៕

The post អគ្គនាយកដ្ឋានគយកម្ពុជា លើក​សមិទ្ធផល​​សម្រេច​បាន​​ ៩ ចំំណុច ឱកាស​​​ប្រារព្ធទិវាគយអន្តរជាតិ appeared first on Kampuchea Thmey Daily.

សម្រាប់នាំចេញកៅស៊ូក្នុងខែ មិថុនា ឆ្នាំ ២០២៣ កម្ពុជាទទួលបានចំណូលជិត ៦៤ លានដុល្លា ដោយមានការ​កើនឡើយរហូតដល់ ៤៤.៨ ភាគរយ បើធៀបទៅនឹងរយៈពេលដូចគ្នាក្នុងឆ្នាំ ២០២២ ដោយមានទំហំទឹកប្រាក់ជាង​ ៤៤ លានដុល្លារ។

កាលពីឆ្នាំ ២០២២ កម្ពុជាបានរកចំណូលពីការនាំចេញកៅស៊ូធម្មជាតិ និងផលិតផលកៅស៊ូបានប្រមាណ ៥៤១. ៦៦ លានដុល្លារ មានការកើនឡើង ២៨.៣ ភាគរយ បើធៀបនឹងឆ្នាំ ២០២១។

ចំណែកទីផ្សារ​សំខាន់ៗ ក្នុងការនាំចេញកៅស៊ូរបស់កម្ពុជា មានដូចជា ប្រទេសវៀតណាម ម៉ាឡេស៊ី ចិន សិង្ហបុរី ជប៉ុន កូរ៉េ និងសហគមអឺរ៉ុប ជាដើម។

សូមបញ្ជាក់ថា បច្ចុប្បន្ន កម្ពុជាមានផ្ទៃដីដាំកៅស៊ូសរុបចំនួន ៤០៤ ៥៧៨ ហិកតា ក្នុងនោះ កៅស៊ូដែលអាចចៀរជ័រ​បានមានផ្ទៃដីចំនួន ៣១៥ ៣៣២ ហិកតា ស្មើនឹង ៧៨ ភាគរយ និងផ្ទៃដីថែទាំមានចំនួន ៨៩ ២៤៦ ហិកតា ស្មើនឹង ២២ ភាគរយ។ នេះបើយោងតាមរបាយការណ៍ពីអគ្គនាយកដ្ឋានកៅស៊ូ៕

អត្ថបទ៖ ផល ធារិត

The post កម្ពុជា ទទួលបានចំណូលពីការនាំចេញកៅស៊ូជាង ៣២០​លានដុល្លារ កើន ៤២% ក្នុងឆមាសទី១ appeared first on Kampuchea Thmey Daily.

របាយការណ៍ដដែល បានបង្ហាញថា «ចាប់ពីខែមករា ដល់ខែធ្នូ ឆ្នាំ២០២២ កម្ពុជា នាំចេញទំនិញក្នុងតម្លៃ ២២ ៤៨២ លានដុល្លារ កើនឡើង ១៦.៤% បើធៀបនឹងរយៈពេលដូចគ្នាកាលពីឆ្នាំមុន ដែលតម្លៃ ១៩ ៣០៨ លានដុល្លារ»។

ក្នុងនោះ កម្ពុជាបាននាំចេញទំនិញច្រើនជាងគេ ទៅទីផ្សារសហរដ្ឋអាមេរិក ដោយសម្រេចបានជាងជិត ៩ពាន់លានដុល្លារ ខណៈវៀតណាម ស្ថិតនៅលំដាប់ទី២ ដែលបានកម្ពុជា បានចេញទំនិញក្នុងតម្លៃជាង ២ពាន់លានដុល្លារ និងនាំចេញ​ទៅ​ចិនជាង ១២០០លានដុល្លារ។

ចំណែកវិស័យកាត់ដេរសម្លៀកបំពាក់ កម្ពុជាបាននាំចេញក្នុងតម្លៃជាង ៩ពាន់លានដុល្លារ , ម៉ាស៊ីន និងឧបករណ៍​អគ្គិសនី​តម្លៃជិត ២ពាន់លានដុល្លារ កើនឡើង ៨៤.៨%, គ្រាប់ធញ្ញជាតិចំនួនជាង ១២០០លានដុល្លារ ថយចុះ៣.៧% និងស្បែកជើងចំនួន ១៧​០០លានដុល្លារ កើនឡើង២៤.៨%​​។

ដោយឡែក កម្ពុជា ក៏បាននាំចូលទំនិញមកវិញក្នុងតម្លៃ ២៩ ៩៤១ លានដុល្លារ កើនឡើង ៤.៣% ដែលធ្វើឱ្យទំហំ​ពាណិជ្ជកម្ម​រវាងកម្ពុជា និងទីផ្សារអន្តរជាតិ កើនឡើង ៥២ ៤២៤លានដុល្លារ កើនឡើង ៩.២% ផងដែរ៕

The post កម្ពុជា រកចំណូលបានពីការនាំចេញទំនិញជាង ២២ពាន់លានដុល្លារ ក្នុងឆ្នាំ ២០២២ appeared first on Kampuchea Thmey Daily.

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍ថា ឆ្នាំនេះការប្រមូលពន្ធគយ និងពន្ធដារ លើសផែនការ ២៥ភាគរយ ពោលគឺ គិតត្រឹមថ្ងៃទី ២៩ ខែ ធ្នូ ពន្ធដារ សម្រេចប្រមូលពន្ធបានចំនួន ៣ ៤៣៧ លានដុល្លារ ស្មើនឹង ១២១,៩១ភាគរយ។ ដោយឡែក អគ្គនាយកដ្ឋានគយ ប្រមូលបាន ២ ៦៧០ លានដុល្លារ  ស្មើ ១០៤,១៥ភាគរយ លើសផែនការ ១២២ភាគរយ ដោយមិនទាន់គិតអំពីចំណូលសារពើពន្ធផង។ ក្នុងនោះ គ្រាន់តែវិស័យទេសចរណ៍ ទទួលបានភ្ញៀវជាង ២លាននាក់ ដោយតម្លៃទិដ្ឋការប្រមាណ ៦០លានដុល្លារ។ នេះជាការបន្ថែមរបស់សម្តេចតេជោ។

បើតាមសម្តេច ពាក់ព័ន្ធនឹងកំណើននៃចំណូលលើការប្រមូលពន្ធនេះ បានផ្តល់ឱ្យកាសដល់រាជរដ្ឋាភិបាល អភិវឌ្ឍ​ហេដ្ឋារចនាសម្ព័ន្ធនានា ជាក់ស្តែងដូចជាផ្លូវថ្នល់ជាដើម។ ជាមួយគ្នានេះ សម្តេចតេជោ ក៏បានអំពាវ​នាវដល់​អាជ្ញាធរគ្រប់លំដាប់ថា្នក់បន្តគាំទ្រវិស័យគយ និងពន្ធដារ ដើម្បីប្រមូលចំណូលកាន់តែប្រសើរថែមទៀត។ ការលើកឡើងរបស់សម្តេចតេជោ ហ៊ុន សែន បែបនេះ នៅក្នុងពិធីបើកការដ្ឋានស្តារ និងលើកកម្រិតគុណភាពផ្លូវពីរ គឺផ្លូវជាតិលេខ៣១ និងលេខ៣៣ ស្ថិតក្នុងភូមិសាស្ត្រខេត្តកំពត និងខេត្តកែប នាព្រឹកថ្ងៃទី ៣០ ខែ ធ្នូ ឆ្នាំ ២០២២៕

The post គយ និងពន្ធដារ ប្រមូលចំណូលបានជាង ៦ពាន់លានដុល្លារ ក្នុងឆ្នាំ ២០២២ appeared first on Kampuchea Thmey Daily.

បើតាមប្រសាសន៍លោក ប៊ូរ ប៊ុនណារ៉ា ចំពោះរថយន្ត គឺមានអាត្រាពន្ធខ្ពស់ ដូច្នេះពេលនាំចូលមក តម្រូវឱ្យបិទ​លតាបត្រ​ដើម្បីសម្គាល់ថា រថយន្តនោះ​បានបង់ពន្ធរួចរាល់។ ចំណែកការនាំចូល បារី (ប្រភេទទំនិញថ្នាំជក់) គឺតម្រូវឱ្យមានតែម (ត្រាពន្ធគយ) ដើម្បីសម្គាល់ថា ទំនិញនោះមានហានិភ័យខ្ពស់ និងទាមទារឱ្យយកចិត្តទុកដាក់ខ្លាំង។

លោកថា ទំនិញទាំងពីរប្រភេទខាងលើ គឺមានហានិភ័យខ្ពស់ពីការរត់គេចពន្ធ ដែលត្រូវបានចាត់ទុកជាប្រភេទ ទំនិញកំណត់ពិសេស ដូច្នេះរាល់ការនាំចេញឬចូល គឺស្ថិតនៅក្រោមការឃ្លាំមើលរបស់សមត្ថកិច្ចមន្ត្រីគយ​ នៅទូទាំងដែនគយ ពោល គឺសមត្ថកិច្ចមន្ត្រីគយ មានសិទ្ធិត្រួតពិនិត្យគ្រប់ទីកន្លែងនៅក្នុងដែនគ្រប់គ្រងដោយគយ។

ដោយឡែក បើសិនជាទំនិញណាដែលមិនមានហានិភ័យខ្ពស់ ហើយអាត្រាពន្ធទាប និងមិនមានសក្តានុពលណាមួយ អាចគេចពន្ធបានទេ នោះសមត្ថកិច្ចរបស់គយ មានតែត្រឹមរង្វង់អំណាចគយប៉ុណ្ណោះ ដែលបានន័យថា ២០គីឡូម៉ែត្រ ពីព្រំដែន ឬអាចឈានដល់ ៦០គីឡូម៉ែត្រ ក្នុងករណីតំបន់នោះ ជាកន្លែងដែលងាយគេចពន្ធ។

ប្រធាននាយកដ្ឋានកិច្ចការច្បាប់ និងទំនាក់ទំនងសាធារណៈ នៃអគ្គនាយកដ្ឋានគយ បញ្ជាក់ដែរថា សមត្ថកិច្ចអាចពិនិត្យឆែកឆេរនៅកន្លែងណា ទីណាក៏បានដែរ ឱ្យតែមានការសង្ស័យលើករណីរត់គេចពន្ធ នៅក្នុងដែនគយ៕

The post ទំនិញ ២ប្រភេទ មានហានិភ័យខ្ពស់ក្នុងការគេចពន្ធ​ appeared first on Kampuchea Thmey Daily.

បើតាមអគ្គនាយកដ្ឋានគយ នៅពេលបង្ហាញខ្លួនបេក្ខជនត្រូវភ្ជាប់មកជាមួយនូវសលាកបត្រឯកត្តជន រួមនឹងអត្តសញ្ញាណបណ្ណ ឬបណ្ណសម្គាល់មន្រ្តីរាជការ។

ក្នុងករណីបេក្ខជនពុំបានមកបង្ហាញខ្លួន ដោយគ្មានមូលហេតុច្បាស់លាស់ នឹងត្រូវបានចាត់ទុកថា បោះបង់ចោលនូវ​លទ្ធផលប្រឡងដោយស្វ័យប្រវត្តិ និងគ្មានលក្ខខណ្ឌ៕

The post អគ្គនាយកដ្ឋានគយ ជូនដំណឹងឱ្យបេក្ខជន​ជាមន្រ្តីរាជការ​ប្រឡងជាប់ ៥០នាក់ ត្រូវបង្ហាញខ្លួន appeared first on Kampuchea Thmey Daily.

ភាគីទាំងពីរ គឺគណៈប្រតិភូនៃអគ្គនាយកដ្ឋានគយ និងរដ្ឋាករកម្ពុជា ដឹកនាំដោយលោក គុណ ញឹម រដ្ឋមន្ត្រីប្រតិភូ​អមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានរៀបចំជំនួបទ្វេភាគី ជាមួយលោក Nguyen Van Can អគ្គនាយកនៃអគ្គនាយកដ្ឋានគយវៀតណាម កាលពីថ្ងៃទី១៥ ខែវិច្ឆិកា ឆ្នាំ២០២២។

នៅក្នុងជំនួបទ្វេភាគីនេះ រដ្ឋបាលគយនៃប្រទេសទាំងពីរ បានឯកភាពគ្នាបន្តពង្រឹង និងពង្រីកកិច្ចសហប្រតិបត្តការ លើចំណុចសំខាន់ៗដូចខាងក្រោម៖

១. បន្តពង្រឹងកិច្ចសហប្រតិបត្តិការលើការបង្ការទប់ស្កាត់ទំនិញរត់គេចពន្ធ និងការដឹកជញ្ជូនឆ្លងដែនខុសច្បាប់ តាមរយៈអនុវត្តប្រតិបត្តិការរួមគ្នា, ពង្រឹងយន្តការមន្ត្រីទំនាក់ទំនង (Focal points) ដើម្បីផ្លាស់ប្តូរព័ត៌មានទាំង ក្នុងកម្រិតអគ្គនាយកដ្ឋាន និងនៅមាត់ច្រកព្រំដែន។

២. ពន្លឿនចរាចរទំនិញនាំចេញនាំចូល ដើម្បីលើកកម្ពស់កិច្ចសម្រួលពាណិជ្ជកម្ម រវាងប្រទេសទាំងពីរ។ ភាគីវៀតណាម បានយល់ព្រម លើការសម្រួលឲ្យបានជាអតិបរមា លើការដឹកជញ្ជូនទំនិញឆ្លងកាត់ប្រទេសវៀតណាម មកកម្ពុជា​ដោយអនុវត្តតាមគោលការណ៍ រំហូរពាណិជ្ជកម្មស្របច្បាប់ និងទប់ស្កាត់ បទល្មើសគយជ្រកក្រោមរបបឆ្លងកាត់ ។

៣. បន្តសម្របសម្រួលជាមួយក្រសួងស្ថាប័នពាក់ព័ន្ធដើម្បីសិក្សាពិនិត្យលទ្ធភាព​អនុវត្តយន្តការត្រួតពិនិត្យរួម​គ្នាតែមួយដង នៅច្រកព្រំដែនអន្តរជាតិបាវិត ប្រទេសកម្ពុជា និងម៉ុកបៃ ប្រទេសវៀតណាម។

៤. បានឯកភាពគ្នាចាត់តាំងមន្ត្រីជំនាញ IT ឲ្យធ្វើការរួមគ្នាដើម្បីអភិវឌ្ឍប្រព័ន្ធបច្ចេកវិទ្យាព័ត៌មានមួយ សម្រាប់ផ្លាស់ប្តូរព័ត៌មានសង្ខេបតាម Online អំពីអត្តសញ្ញាណទំនិញឆ្លងកាត់ និងមធ្យោបាយ​ដឹកជញ្ជូនទំនិញទាំងនោះ។

៥. ផ្លាស់ប្ដូរទស្សនកិច្ច សិក្សាមន្ត្រីគយ ដើម្បីបង្កើនកិច្ចសហការមិត្តភាព និងរៀនសូត្រដកស្រង់បទពិសោធន៍ ទៅវិញទៅមក។

៦. គាំទ្រគ្នាទៅវិញទៅមក លើការងារគយលើឆាកអន្តរជាតិ។

៧. រៀបចំកិច្ចប្រជុំទ្វេភាគីបន្ទាប់ នៅប្រទេសវៀតណាម ក្នុងឆ្នាំ២០២៤។

កម្ពុជា វៀតណាម ក៏បានវាយតម្លៃខ្ពស់លើកិច្ចសហប្រតិបត្តិការ របស់រដ្ឋបាលគយនៃប្រទេសទាំងពីរ នាពេលកន្លងមក និងវឌ្ឍនភាពល្អក្នុងការអនុវត្តអនុស្សរណៈយោគយល់គ្នា ដែលបានចុះហត្ថលេខានាថ្ងៃទី០៤ ខែតុលា ឆ្នាំ២០១៩ នៅទីក្រុងហាណូយ ប្រទេសវៀតណាម និងកំណត់ហេតុប្រជុំទ្វេភាគី រវាងរដ្ឋបាលគយទាំងពីរកាលពីខែមីនា ឆ្នាំ២០១៨ នាទីក្រុងហូជីមិញ ប្រទសវៀតណាម៕

The post កម្ពុជា-វៀតណាម ប្តេជ្ញាពន្លឿនរំហូរពាណិជ្ជកម្មស្របច្បាប់ និងទប់ស្កាត់​បទល្មើសឆ្លងដែន appeared first on Kampuchea Thmey Daily.