ចិនកត់ត្រាអតិរេកពាណិជ្ជកម្ម ១០០ ប៊ីលានដុល្លារខែមុន ទោះពន្ធ ត្រាំ បន្ថយកំណើនការនាំចេញ

Huon Dina — Mon, 08 Sep 2025 08:35:01 +0000

ទិន្នន័យពាណិជ្ជកម្មនៃភ្នាក់ងារគយចិន ដែលចេញផ្សាយនាថ្ងៃចន្ទនេះ បានបង្ហាញថា ចិនបានទទួលនូវអតិរេកពាណិជ្ជកម្មជាង ១០០ ប៊ីលានដុល្លារ នៅខែសីហា ទោះបីជាពន្ធរបស់សហរដ្ឋអាមេរិកបានបន្ថយនូវកំណើននៃការនាំចេញ ធៀបនឹងខែមុនៗក៏ដោយ។ នេះបើតាមការចុះផ្សាយរបស់ភ្នាក់ងារសារព័ត៌មាន AP។

ការនាំចេញសរុបរបស់ចិន មានចំនួនប្រមាណ ៣២១,៨ ប៊ីលានដុល្លារ នៅខែសីហា ដោយកើនឡើង ៤,៤ ភាគរយ បើធៀបនឹងរយៈពេលដូចគ្នាកាលពីឆ្នាំំមុន ប៉ុន្តែខ្សោយជាងអត្រាកំណើន ៧,២ ភាគរយ នៅខែកក្កដា។ ការនាំចូលវិញ មានចំនួនប្រមាណ ២១៩,៥ ប៊ីលានដុល្លារ ដោយកើនឡើង ១,៨ ភាគរយ។

តួលេខនេះបង្ហាញពីអតិរេកពាណិជ្ជកម្មប្រមាណ ១០២,៣ ប៊ីលានដុល្លារ នេះធ្វើឱ្យអតិរេកពាណិជ្ជកម្មក្នុងរយៈពេល ៨ ខែដើមឆ្នាំ កើនឡើងដល់ ៧៨៥,៣ ប៊ីលានដុល្លារ ហើយចំនួននេះអាចនឹងកើនឡើងលើស ១ ទ្រីលានដុល្លារ ត្រឹមបំណាច់ឆ្នាំ ដែលជាអត្រាខ្ពស់បំផុតក្នុងប្រវត្តិសាស្រ្ត។

ទោះបីជាយ៉ាងណាក៏ដោយ តួលេខនៃការនាំចេញនៅសីហា បង្ហាញពីអត្រាខ្សោយបំផុតប្រចាំខែ រាប់តាំងពីដើមឆ្នាំ ដោយអ្នកជំនាញសង្កត់ធ្ងន់ពីឥទ្ធិពលនៃសង្រ្គាមពន្ធខ្ពស់ជាមួយប្រធានាធិបតីអាមេរិក លោក ដូណាល់ ត្រាំ ចំពេលដែលបច្ចុប្បន្នប្រឹងប្រែងធ្វើពិពិធកម្មទីផ្សារទៅអាស៊ី អាហ្វ្រិក និងអាមេរិកខាងត្បូង។

ការនាំចេញរបស់ចិនទៅកាន់សហរដ្ឋអាមេរិក បានធ្លាក់ចុះ ៣៣ ភាគរយ ក្នុងខែសីហា មកត្រឹម ៤៧,៣ ប៊ីលានដុល្លារ ខណៈការនាំចូលពីអាមេរិក បានធ្លាក់ចុះ ១៦ ភាគរយ មកត្រឹម ១៣,៤ ប៊ីលានដុល្លារ៕

The post ចិនកត់ត្រាអតិរេកពាណិជ្ជកម្ម ១០០ ប៊ីលានដុល្លារខែមុន ទោះពន្ធ ត្រាំ បន្ថយកំណើនការនាំចេញ appeared first on Kampuchea Thmey Daily.

អតិរេកពាណិជ្ជកម្មចិននឹងកើនជិតកំណត់ត្រា ១ ទ្រីលានដុល្លារ នៅបំណាច់ឆ្នាំ

Huon Dina — Wed, 13 Nov 2024 01:30:19 +0000

អតិរេកពាណិជ្ជកម្មរបស់ចិន កំពុងឆ្ពោះទៅរកកំណត់ត្រាថ្មីនៅឆ្នាំនេះ ដែលបង្ហាញពីការនាំចេញដ៏រឹងមាំនៃការនាំចេញរបស់ចិន និងអតុល្យភាពនៃពាណិជ្ជកម្មសកល ខណៈប្រធានាធិបតីជាប់ឆ្នោតអាមេរិក លោក ដូណាល់ ត្រាំ ដែលប្ដេជ្ញាកាត់បន្ថយឱនភាពពាណិជ្ជកម្មអាមេរិកតាមរយៈគោលនយោបាយពន្ធបែបការពារនិយម គ្រោងឡើងកាន់អំណាចជាថ្មីចាប់ពីដើមឆ្នាំក្រោយ។

សារព័ត៌មាន Bloomberg បានចុះផ្សាយនូវការវិភាគទិន្នន័យរបស់ខ្លួន ដោយផ្អែកលើតួលេខពីរដ្ឋបាលគយចិន ដែលបង្ហាញថា អតិរេកពាណិជ្ជកម្មរបស់ចិននឹងឈានជិតដល់ ១ ទ្រីលានដុល្លារអាមេរិក ប្រសិនបើវារក្សាបាននូវល្បឿនកំណើនដូចអត្រារាប់ចាប់តាំងដើមឆ្នាំ។

យោងតាមទិន្នន័យរបស់គយចិន ដែលចេញផ្សាយកាលពីសប្តាហ៍មុន អតិរេកពាណិជ្ជកម្មទំនិញបានកើនឡើងដល់ ៧៨៥ ប៊ីលានដុល្លារ ក្នុងរយៈពេល ១០ ខែដំបូងដើមឆ្នាំ ដែលជាកម្រិតខ្ពស់បំផុត បើធៀបទៅនឹងរយៈពេលដូចគ្នានៃ ឆ្នាំផ្សេងៗទៀត និងកើនឡើងជិត ១៦ ភាគរយ ធៀបនឹងឆ្នាំ ២០២៣។

សេដ្ឋវិទូមើលឃើញថា តម្លៃនៃទំនិញចិនបានថយចុះ ដែលធ្វើឱ្យការនាំចេញរបស់ចិនកើនឡើងកាន់តែធំ ធៀបនឹងការនាំចូលរបស់ប្រទេសមហាសេដ្ឋកិច្ចទី២មួយនេះ។ ចិនបាននិងកំពុងពឹងផ្អែកលើការនាំចេញដើម្បីជំរុញកំណើនសេដ្ឋកិច្ច ចំពេលដែលកម្សោយនៃតម្រូវការក្នុងស្រុក ធ្វើឱ្យសេដ្ឋកិច្ចប្រទេសនេះស្ថិតក្នុងស្ថានភាពស្រពិចស្រពិល។

កន្លងមក មានសេចក្ដីរាយការណ៍ថា ការនាំចេញរបស់ចិនកើនឡើងខ្ពស់ ក្នុងកាលៈទេសៈដែលក្រុមហ៊ុនក្នុងស្រុកចិនត្រៀមខ្លួនសម្រាប់អាណត្តិថ្មីរបស់លោក ត្រាំ ដែលប្ដេជ្ញាដាក់ពន្ធ ៦០ ភាគរយ លើទំនិញចិននាំចូលអាមេរិក។ ទិន្នន័យចុងក្រោយបង្ហាញថា អតិរេកពាណិជ្ជកម្មចិនជាមួយសហរដ្ឋអាមេរិក បានកើនឡើង ៤,៤ ភាគរយ នៅឆ្នាំនេះ គិតមកទល់ពេលនេះធៀបនឹងរយៈពេលដូចគ្នាកាលពីឆ្នាំមុន។ អតិរេកពាណិជ្ជកម្មជាមួយសហភាពអឺរ៉ុបវិញ បានកើនឡើង ៩,៦ ភាគរយ ខណៈជាមួយប្រទេសអាស៊ីគ្នេយ៍ចំនួន ១០ បានកើនឡើងជិត ៣៦ ភាគរយ។

អ្នកវិភាគលើកឡើងថា រដ្ឋបាល ត្រាំ អាចនឹងបង្កើនផលប៉ះពាល់ដល់ការនាំចេញរបស់ចិន ដែលបច្ចុប្បន្នរងវិធានការពន្ធមួយចំនួន ពីសហភាពអឺរ៉ុប ក៏ដូចជាអាមេរិក រួចស្រាប់ហើយ។ មានការព្រមានថា ប្រសិនបើលោក ត្រាំ អនុវត្តវិធានការពន្ធ ប្រទេសផ្សេងៗទៀតអាចនឹងដើរតាមគន្លងជាមួយគ្នា ដើម្បីទប់ទល់នឹងការធ្វើពិពិធកម្មការនាំចេញរបស់ចិន៕

The post អតិរេកពាណិជ្ជកម្មចិននឹងកើនជិតកំណត់ត្រា ១ ទ្រីលានដុល្លារ នៅបំណាច់ឆ្នាំ appeared first on Kampuchea Thmey Daily.

អតិរេកពាណិជ្ជកម្មចិន Archives - Kampuchea Thmey Daily

ចិនកត់ត្រាអតិរេកពាណិជ្ជកម្ម ១០០ ប៊ីលា​នដុល្លារខែមុន ទោះពន្ធ ត្រាំ បន្ថយកំណើនការនាំចេញ

អតិរេកពាណិជ្ជកម្មចិននឹង​កើន​ជិតកំណត់ត្រា ១ ទ្រីលាន​ដុល្លារ​ នៅ​បំណាច់​ឆ្នាំ ​

ចិនកត់ត្រាអតិរេកពាណិជ្ជកម្ម ១០០ ប៊ីលានដុល្លារខែមុន ទោះពន្ធ ត្រាំ បន្ថយកំណើនការនាំចេញ

អតិរេកពាណិជ្ជកម្មចិននឹងកើនជិតកំណត់ត្រា ១ ទ្រីលានដុល្លារ នៅបំណាច់ឆ្នាំ