កិច្ចប្រជុំនេះក៏មានការចូលរួមពីលោកអភិបាលរងខណ្ឌ លោកអធិការ និងអធិការរងនគរបាលខណ្ឌ លោកមេបញ្ជាការកងរាជអាវុធហត្ថខណ្ឌ ព្រមទាំងលោក-លោកស្រីនាយប៉ុស្តិ៍នគរបាល និងលោក-លោកស្រីចៅសង្កាត់ទាំង៨ ក្នុងខណ្ឌ៧មករា ដែលបានពិភាក្សាផ្លាស់ប្តូរយោបល់ និងដាក់ចេញនូវវិធានការជាក់ស្តែង ដើម្បីធានាបាននូវប្រសិទ្ធភាពក្នុងការទប់ស្កាត់ និងបង្ក្រាបបទល្មើសអនឡាញនៅក្នុងមូលដ្ឋាន។

លោក ថេង សុថុល អភិបាលខណ្ឌ៧មករា បានលើកឡើងក្នុងការសំណេះសំណាលថា  ការសហការរវាងអាជ្ញាធរមូលដ្ឋាន កម្លាំងសន្តិសុខ និងមន្រ្តីពាក់ព័ន្ធទាំងអស់ ពិតជាមានសារៈសំខាន់ ដើម្បីធ្វើការតាមដាន និងស្វែងរកព័ត៌មានអំពីសកម្មភាពគួរសង្ស័យ ដែលអាចនាំឱ្យកើតមានបទល្មើសអនឡាញ។ លោកបានណែនាំឱ្យអាជ្ញាធរភូមិ សង្កាត់ និងកម្លាំងនគរបាល ត្រូវបន្តពង្រឹងការត្រួតពិនិត្យទីតាំងស្នាក់នៅប្រមូលផ្តុំ ក៏ដូចជាការចុះពិនិត្យអគារជួល ឬកន្លែងដែលមានការស្នាក់នៅជាច្រើនរបស់ជនបរទេស ឬក្រុមមនុស្សដែលអាចពាក់ព័ន្ធនឹងសកម្មភាពឆបោកតាមប្រព័ន្ធអនឡាញ។

លោកអភិបាលបានបញ្ជាក់ថា ក្នុងមូលដ្ឋានខណ្ឌ៧មករា មានទីតាំង អាគារ ខុនដូរ អាផានមិន សណ្ឋាគារ ចំនួន៨៧ ទីតាំង រហូតដល់ថ្ងៃនេះ កម្លាំងគណៈបញ្ជាការឯកភាពខណ្ឌបានចុះត្រួតពិនិត្យ ហើយរួចរាល់ និងមិនមានបទល្មើសឆបោកតាមប្រព័ន្ធអនឡាញ ឡើយ។ ប៉ុន្តែទោះជាយ៉ាងណា កម្លាំងគណៈបញ្ជាខណ្ឌបន្តចុះត្រួតពិនិត្យឡើងវិញបន្តទៀត មិនអនុញ្ញាតឲ្យមានបទល្មើសឡើញ គឺត្រូវរក្សាមូលដ្ឋានខណ្ឌ៧មករា ជាតំបន់ ស ឲ្យបានដាច់ខាត់៕ ដោយ ៖ អុឹងម៉េង

The post អភិបាលខណ្ឌ៧មករា ជំរុញមន្រ្តីពាក់ព័ន្ធ បន្តពង្រឹងការបង្ការ និងបង្ក្រាបបទល្មើសអនឡាញ ដើម្បីការពារសន្តិសុខសុវត្ថិភាពប្រជាពលរដ្ឋ appeared first on Kampuchea Thmey Daily.

យោងតាមសេចក្តីប្រកាសព័ត៌មានចេញផ្សាយនៅព្រឹកនេះសម្រាប់កំណែជំនាន់ទី ៣.០ នេះ, និម្មាបនកម្មនៃ CamDigiKey ត្រូវបានរៀបចំថ្មីទាំងស្រុងតាម ការវិវត្តនៃបច្ចេកវិទ្យាចុងក្រោយ ដើម្បីធ្វើឲ្យប្រព័ន្ធមានសមត្ថភាពគ្រប់គ្រាន់ក្នុងការឆ្លើយតបនឹងកំណើន នៃការប្រើប្រាស់ដែលមានចំនួនកាន់តែច្រើនឡើងៗ ពីមួយថ្ងៃទៅមួយថ្ងៃ និងដើម្បីដោះស្រាយបញ្ហា ប្រឈមនានាដែលធ្លាប់បានជួបប្រទះ ក្នុងកំណែជំនាន់ទី ២.១ ដោយបំពាក់បន្ថែមនូវប្រព័ន្ធសុវត្ថិភាព, បង្កើនសមត្ថភាពប្រព័ន្ធក្នុងការទ្រទ្រង់ទំហំប្រតិបត្តិការច្រើនក្នុងពេលតែមួយ និង បន្ថែមមុខងារកម្រិត ប្រើប្រាស់ផ្សេងទៀត សំដៅផ្តល់ភាពងាយស្រួល និង ប្រសិទ្ធភាពប្រើប្រាស់ ក្នុងការទទួលបាននូវបទ ពិសោធន៍ល្អប្រសើរជាងមុន មួយកម្រិតទៀត។

មុខងារកម្រិតអ្នកប្រើប្រាស់ដែលត្រូវបានបន្ថែមក្នុង កំណែជំនាន់ថ្មីនេះ អនុញ្ញាតឲ្យអ្នកប្រើប្រាស់ធ្វើបច្ចុប្បន្នកម្មព័ត៌មានផ្ទាល់ខ្លួនលើកម្មវិធីទូរស័ព្ទដៃ CamDigiKey ៣.០ បានដោយខ្លួនឯង រួមមាន លេខទូរស័ព្ទ អ៊ីម៉ែល អាសយដ្ឋាន និង អាចស្នើសុំធ្វើ បច្ចុប្បន្នកម្មអត្តសញ្ញាណប័ណ្ណ ឬ លិខិតឆ្លងដែនដែលហួសសុពលភាពបានផងដែរ។

មជ្ឈមណ្ឌលនេះបានលើកឡើងថា៖«CamDigiKey ជាកម្មវិធីទូរស័ព្ទដំបូងគេ និងឈានមុខគេនៅកម្ពុជា ដែលអនុញ្ញាតឱ្យអ្នក ប្រើប្រាស់ម្នាក់ មានគណនីឌីជីថលតែមួយ និងអាចយកទៅប្រើប្រាស់ជាយន្តការយថាភូតកម្ម (Authentication) ឬការបញ្ជាក់អត្តសញ្ញាណរបស់អ្នកប្រើប្រាស់ នៅតាមបណ្តាផតថលរបស់ ក្រសួង ស្ថាប័នដែលផ្តល់សេវាអេឡិចត្រូនិកសម្រាប់ធុរកិច្ច ក្នុងក្របខ័ណ្ឌនៃយន្តការផ្លាស់ប្តូរទិន្នន័យ តាមផ្ទាលផ្លាស់ប្តូរទិន្នន័យកម្ពុជា (CamDX) ដោយមិនចាំបាច់ត្រូវការបង្កើតគណនីថ្មីបន្ថែមទៀតទេ»៕

​

The post កម្មវិធីទូរស័ព្ទដៃ CamDigiKey ជំនាន់ទី ៣.០ ត្រូវបានដាក់ឱ្យដំណើរការចាប់ពីថ្ងៃ​នេះតទៅ appeared first on Kampuchea Thmey Daily.

តាមការផ្សព្វផ្សាយរបស់អង្គការយូនីសេហ្វ ទង្វើដែលបញ្ជាក់ថា អ្នកកំពុងតែធ្វើការសន្ទនាតាមអនឡាញ និងជួបបញ្ហាបៀតបៀនផ្លូវភេទមានដូចជា បុគ្គលនោះតែងតែសរសើរ និងលួងលោមអ្នកឱ្យផ្ញើរូបថត ឬ វីដេអូឯកជនរបស់អ្នកជាបន្តបន្ទាប់តាមអនឡាញ។ គេចង់ដឹងរឿងរ៉ាវផ្ទាល់ខ្លួនរបស់អ្នក ដោយសួរសំណួរផ្ទាល់ខ្លួនជាច្រើន ហើយគេអាចនឹងកុហកអ្នកអំពីអត្តសញ្ញាណពិតរបស់គេ។ បន្ទាប់មក គេធ្វើការសន្ទនា គេចាប់ផ្តើមស្នើសុំជួបអ្នកជាលក្ខណៈឯកជនតែ២នាក់។ មួយវិញទៀត គេព្យាយាមអូសទាញអ្នកឱ្យចូលរួមសន្ទនាបែបលក្ខណៈផ្លូវភេទ រួចប្រហែលជាសន្យាថា នឹងមិនឱ្យអ្នកដទៃដឹងពីការសន្ទនានេះឡើយ។

តាមការកត់សម្គាល់ ទង្វើ និងការលួងលោមទាំងអស់នេះហើយ ទើបធ្វើឱ្យកុមារជាច្រើនក្លាយជាជនរងគ្រោះត្រូវបានគេរំលោភបំពានផ្លូវភេទ ហើយករណីនេះ មិនត្រឹមតែកើតមានលើកុមារឡើយ ក៏កើតមានលើមនុស្សធំ ជាស្ត្រីច្រើនផងដែរ។ ដូចនេះ អាណាព្យាបាលគួរយកចិត្តទុកដាក់តាមដាន និងសួរនាំពីកូនៗជានិច្ច ដើម្បីអាចស្វែងរកដំណោះស្រាយ និងជំនួយបានទាន់ពេលវេលា។

ជុំវិញនឹងករណីខាងលើ ប្រសិនជាជនរងគ្រោះជួបនូវហេតុការណ៍ទាំងអស់នេះ រងការគំរាមកំហែង និងរំលោភបំពានផ្លូវភេទតាមអនឡាញ ឬមានអារម្មណ៍ថាខ្លួនអសុវត្ថិភាព អាចស្វែងរកជំនួយបានតាមរយៈរាយការណ៍ទៅនគរបាលជាតិលេខ ១២៨៨ ឬ ទៅអង្គការ APLE កម្ពុជា ០៩២​ ៣១១​ ៥១១​ ឬបណ្តាញទូរសព្ទជំនួយកុមារលេខ ១២៨០៕

The post យូនីសេហ្វ បង្ហាញពីសញ្ញាបញ្ជាក់ថាអ្នកកំពុងលេងឆាតជាមួយជនបំពានផ្លូវភេទតាម​អនឡាញ appeared first on Kampuchea Thmey Daily.

ក្នុងអំឡុងពេលដែលកម្ពុជា ក៏ដូចជា ពិភពលោកទាំងមូលជួបវិបត្តិកូវីដ-១៩ ប្រទេសត្រូវបានបិទខ្ទប់ មិនអាចទៅណារួចនោះ គឺមនុស្សគ្រប់រូប មិនថាកុមារ ឬ មនុស្សពេញវ័យ គឺត្រូវប្រើប្រាស់ប្រព័ន្ធឌីជីថល ប្រព័ន្ធអនឡាញ សម្រាប់សិក្សា បំពេញការងារផ្សេងៗ និងសម្រាប់ទំនាក់ទំនងគ្នា។ ការពឹងផ្អែកលើប្រព័ន្ធអនឡាញនេះ មានទាំងឥទ្ធិពលល្អ និងបញ្ហាប្រឈម ជាពិសេស កុមារ នឹងងាយរងគ្រោះពីការកេងប្រវ័ញ្ចផ្លូវភេទតាមរយៈប្រព័ន្ធអនឡាញ។

អង្គការយូនីសេហ្វ បានឱ្យនិយមន័យថា ការល្បួងតាមប្រព័ន្ធអនឡាញ គឺជាការរំលោភបំពានផ្លូវភេទ ហើយវាកើតឡើងនៅពេលដែលមនុស្សពេញវ័យ មានទំនាក់ទំនងជាមួយកុមារ ឬ មនុស្សវ័យក្មេងដែលមានអាយុក្រោម១៨ឆ្នាំ និងចង់មានទំនាក់ទំនងផ្លូវភេទ។ ការលួងលោមប្រភេទនេះ កើតឡើងដោយបុគ្គលនោះចាប់ផ្តើម បង្កើតទំនាក់ទំនងឱ្យមានភាពស្និទ្ធស្នាល បង្កើតទំនុកចិត្តដល់ពួកគេ រួចឈានដល់ការរំលោភបំពាន និងបោកប្រាស់តាមប្រព័ន្ធអនឡាញ។

ទន្ទឹមជាមួយគ្នានេះ អង្គការមួយនេះ ក៏បានបង្កើតជាវីដេអូមួយមាន ៤ភាគ មានចំណងជើងថា “តោះ ឆាតលេង ហេស៎” ដើម្បីបង្កើនការយល់ដឹង និងទប់ស្កាត់ជាមួយនឹងបញ្ហានេះ។ នៅក្នុងសាច់រឿង គឺនិយាយពីមិត្តភក្តិជិតស្និតចំនួន៤នាក់ ដែលពួកគេស្វែងយល់ពីទំនាក់ទំនង ការទុកចិត្ត និងហានិភ័យតាមរយៈប្រព័ន្ធអនឡាញ។ ជាមួយនឹងបញ្ហាប្រឈម ក៏មានជាការរកវិធីដោះស្រាយ ប្រយុទ្ធប្រឆាំងទាក់ទិននឹងការលួងលោម និងបោកបោកប្រាស់តាមប្រព័ន្ធអនឡាញផងដែរ។ អង្គការដដែលបានណែនាំថា ការជួប ឬ លេងជាមួយមនុស្សថ្មីតាមប្រព័ន្ធអនឡាញ អាចធ្វើឱ្យមានអារម្មណ៍ថា រំភើប ចង់លេងជាមួយជាបន្តបន្ទាប់ ប៉ុន្តែ ត្រូវប្រាកដចិត្តថា មិត្តភាពទាំងនោះ គឺជាមិត្តភាពមួយដែលសមរម្យ និងត្រឹមត្រូវ។

យ៉ាងណាក៏ដោយ ដើម្បីចូលរួមទប់ស្កាត់បញ្ហាលួងលោមតាមអនឡាញ និងកេងប្រវ័ញ្ចផ្លូវភេទនៅកម្ពុជា អង្គការយូនីសេហ្វ ណែនាំវិធីចំនួន៣។ ទី១ ប្រមូលភស្តុតាង និងផលប៉ះពាល់ ទី២ ចែករំលែកបន្តពីវីដេអូ “តោះ លេងឆាត ហេស៎” ដើម្បីផ្សព្វផ្សាយបន្ត និងទី៣ គឺប្លុកបុគ្គលនោះចោល រួចរាយការណ៍ពីបញ្ហាទាំងនោះទៅអង្គការ APLE កម្ពុជា តាមរយៈលេខទូរសព្ទ ០៩២ ៣១១ ៥១១៕

The post អង្គការយូនីសេហ្វ ណែនាំពីការលួងលោមតាមប្រព័ន្ធអនឡាញ ដែលមនុស្សគួរប្រុងប្រយ័ត្ន appeared first on Kampuchea Thmey Daily.

​លោក ញ៉ុ​ង ឌិន​ថន អគ្គនាយករង​នៃ​ក្រុមហ៊ុន មិត្ត​ហ្វូ​ន បាន​មានប្រសាសន៍ថា ប្រព័ន្ធ​ព័ត៌មានវិទ្យា​សម្រាប់​សាលារៀន (School Information System ‘SIS’) ជា​កម្មវិធី​ដ៏​មាន​សារប្រយោជន៍​ចំពោះ​ទាំង​សិស្ស និង​ទាំង​គ្រូបង្រៀន ជាពិសេស ក្នុងអំឡុងពេល​នៃ​វិបត្តិ​ជំងឺឆ្លង​នេះ។

​លោក ឌិន​ថន មានប្រសាសន៍​យ៉ាង​ដូច្នេះ​ថា ៖ «​ជាមួយនឹង​ប្រព័ន្ធ SIS លោកគ្រូ​អ្នកគ្រូ​អាច​កំណត់​កាលវិភាគ​សម្រាប់​ថ្នាក់រៀន​ទាំង​ផ្ទាល់ ទាំង​តាម​អន​ឡាញ ក្នុងនោះ​រួមមាន​មុខងារ​ជាច្រើន ដូចជា កែ​និង​ដាក់ពិន្ទុ​លំ​ហាត់ បង្រៀន​ថ្នាក់រៀន​តាម​វីដេអូ​អន​ឡាញ ការផ្ញើ​សារ​ទៅ​សិស្ស​និង​អាណាព្យាបាល ការផ្ដល់​ចំណាត់ថ្នាក់​ប្រចាំឆ្នាំ និង​មុខងារ​ប្រឡង ជាដើម ។​»

​លោក​បាន​បន្ថែមថា ៖ «​កម្មវិធី SIS នេះ​អាចធ្វើ​ទាំង​កិច្ចការ​ជា​ប្រពៃណី​ដែល​គ្រូបង្រៀន​ធ្វើ​ទម្លាប់​ប្រចាំថ្ងៃ​បាន​ផង ហើយក៏​អាច​ធ្វើបាន​កាន់តែ​ល្អ​ថែមទៀត នៅលើ​អន​ឡាញ ទោះ​ស្ថិតនៅ​ទីកន្លែង​ណាក៏ដោយ ដោយ​គ្រាន់តែ​ប្រើប្រាស់​អ៉ីនធើណិត​ប៉ុណ្ណោះ ។​»

​មនុស្ស​ជំនាន់​សព្វថ្ងៃ​ត្រូវការ​ប្រើប្រាស់​ប្រព័ន្ធ​អប់រំ​ឌីជីថល ដែល​ធ្វើ​ទំនើប​កម្មវិធីសិក្សា​រៀនសូត្រ​របស់​សិស្សានុសិស្ស​នៅក្នុង​ប្រទេស​កម្ពុជា រាប់​តាំងពី​សាលារៀន​នៅតាម​ទីក្រុង​រហូតដល់​សាលារៀន​នៅតាម​ខេត្ត​ផងដែរ។ ដោយ​ផ្លាស់ប្ដូរ​វិធី​រៀន​របស់​សិស្សានុសិស្ស SIS Cambodia បាន​ជួយ​រួមចំណែក​ធ្វើ​ឲ្យ​វិស័យ​អប់រំ​មាន​ភាពប្រសើរឡើង ដោយ​បង្កើត​បរិយាកាស​រៀនសូត្រ​ប្រកបដោយ​សុវត្ថិភាព​សម្រាប់​ទាំង​សិស្ស ទាំង​គ្រូ ។

​ប្រព័ន្ធ​ព័ត៌មានវិទ្យា​សម្រាប់​សាលារៀន (SIS) ត្រូវបាន​អភិវឌ្ឍ​ឡើង​ដោយ​ក្រុមហ៊ុន មិត្ត​ហ្វូ​ន ដោយមាន​ការគាំទ្រ​ពី​ក្រសួង​ប្រៃសណីយ៍​និង​ទូរគមនាគមន៍ និង​សហការ​ជាមួយ​ក្រសួង​អប់រំ យុវជន និង​កីឡា។ តាម​គម្រោង​ផែនការ SIS នឹងត្រូវ​ដាក់ពង្រាយ​ទៅកាន់​សាលារៀន​ប្រមាណ ១០០០​កន្លែង នៅ​ទូទាំងប្រទេស ហើយ​ក្នុងដំណាក់កាល​ដំបូង ប្រព័ន្ធ​នេះ​បានដាក់​ពង្រាយ​រួចជាស្រេច​ហើយ ទៅដល់​សាលារៀន​ជាង ៣០០​កន្លែង ដែលមាន​សិស្សានុសិស្ស​ជាង ៣​សែន​នាក់ និង​គ្រូ​ជាង ២​ម៉ឺន​នាក់ ។ នេះ​បើ​យោងតាម​ការ​ឲ្យ​ដឹង​ពី​ក្រុមហ៊ុន មិត្ត​ហ្វូ​ន ។

​មិត្ត​ហ្វូ​ន បាននិងកំពុង​នាំមុខគេ​នៅក្នុង​ការជួយ​គាំទ្រ​ដល់​រាជរដ្ឋាភិបាល​កម្ពុជា ​ដើម្បី​អនុវត្ត​កម្មវិធី​អភិវឌ្ឍន៍​ឌីជីថល​ជាតិ​របស់ខ្លួន។ កន្លងមក ក្រុមហ៊ុន​បានធ្វើការ​យ៉ាង​ជិតស្និទ្ធ​ជាមួយ​ក្រសួង​ស្ថាប័នរដ្ឋ​សំខាន់ៗ ដើម្បី​អនុវត្ត​គម្រោង​ឌី​ជី​ថ​លរូ​ប​នីយកម្ម​នៅក្នុង​វិស័យ​ជាច្រើន ដូចជា វិស័យ​អប់រំ សុខាភិបាល និង​ដឹកជញ្ជូន។ ជា​ក្រុមហ៊ុន​ឈានមុខ​គេ​មួយ​នៅក្នុង​វិស័យ​ទូរគមនាគមន៍​និង​បច្ចេកវិទ្យា​ឌីជីថល មិត្ត​ហ្វូ​ន មាន​ហេដ្ឋារចនាសម្ព័ន្ធ​បណ្ដាញ​ធំជាងគេ​បំផុត ដែល​បម្រើ​សេវាកម្ម​ដល់​ប្រជាជន​កម្ពុជា​ប្រមាណ ៩​លាន​នាក់ នៅ​ទូទាំងប្រទេស៕

​

The post ការរៀនសូត្រកាន់តែមានសុវត្ថិភាពជាងមុន ជាមួយនឹងកម្មវិធីឌីជីថល appeared first on Kampuchea Thmey Daily.

ដោយសា​រ​វិបត្តិ​នៃ​ជំងឺ​កូ​វីដ​១៩​ នៅតែ​បន្ត​កើតមានឡើង មន្ទីរពេទ្យ​កុមារ​អង្គរ​បាន​ទទួលរង​ការប៉ះពាល់​គួរ​ឲ្យ​កត់សម្គាល់​លើ​ផ្នែក​ហិរញ្ញវត្ថុ ព្រោះ​ព្រឹត្តិការណ៍ ឬ​សកម្មភាព​រៃអង្គាស​មួយចំនួនធំ មិន​អាច​ប្រព្រឹត្តិទៅបាន ហើយ​ជំនួយ​មូលនិធិ​ពី​ក្រុមហ៊ុន​អាជីវកម្ម ឬ​សប្បុរសជន​ដែល​ធ្លាប់​ផ្តល់ជំនួយ​សប្បុរសធម៌​មកកាន់​មន្ទីរពេទ្យ ក៏​មាន​ការធ្លាក់ចុះ​ខ្លាំង ដែល​ធ្វើ​ឲ្យ​មានការ​ប៉ះពាល់​ដល់​ដំណើរការ​ប្រតិបត្តិ​មួយ​ចំនួន​ថែមទៀត​ផង​។

បើ​របាយការណ៍​របស់​មន្ទីរពេទ្យ​កុមារ​អង្គរ​ បាន​ឲ្យ​ដឹង​នៅ​ព្រឹក​ថ្ងៃទី​០៣​ ខែសីហា​ ឆ្នាំ​២០២១​នេះ​ថា មន្ទីរពេទ្យ​កុមារ​អង្គរ បាន​សម្រប​ខ្លួន​នៅក្នុង​បរិបទ​ថ្មី គ្រោង​រៀបចំ​ប្រារព្ធ​ពិធី “​បុណ្យផ្កា​ប្រាក់​មហា​សាមគ្គី ឆ្នាំ​ទី​៨” ដើម្បី​កៀរគរ​មូលនិធិ​ជួយ​ដល់​មន្ទីរពេទ្យ តាម​ប្រព័ន្ធ​អន​ឡាញ ជា​លើកដំបូង​ក្នុងកំឡុងពេល​ដ៏​លំបាក​នេះ​។ ពិធី​នឹង​ប្រព្រឹត្តិ​ទៅ​មាន​ពីរ​វគ្គ ដែល​វគ្គ​ទីមួយ គឺជា​កម្មវិធី​សម្តែង​ព្រះធម៌ ទេសនា​ជា​ធម្មទាន និង​ជាការ​ផ្សព្វ​ផ្សាយដំណឹង របស់​ពិធីបុណ្យ​តាម​ប្រព័ន្ធ​អន​ឡាញ ដោយ​ធម្មកថិក​ល្បីៗ​ទាំង​ក្នុង និង​ក្រៅប្រទេស នៅក្នុង​បណ្តាញ សង្គម​ហ្វេ​ស​ប៊ុ​ក​មន្ទីរពេទ្យ​កុមារ​អង្គរ ចាប់ពី​ម៉ោង ៩ ដល់​ម៉ោង ១០ ព្រឹក​រៀងរាល់ថ្ងៃ ចាប់ពី​ថ្ងៃ ទី​១៣​ដល់​២៨ សីហា ២០២១ ជាមួយនឹង ប្រធានបទ​ល្អៗ ខុសៗ​គ្នា នៅមុន​ថ្ងៃ​ពិធី បុណ្យ​។

ចំពោះ​ពិធីបុណ្យ គឺជា​វគ្គ​ទី​២ គ្រោង​នឹងប្រព្រឹត្តិ​ទៅ​នៅ​ថ្ងៃទី២៩ ខែសីហា ឆ្នាំ​២០២១ ដោយ​អ្នកចូលរួម​មាន ចំនួន​កំណត់ ឲ្យ​ស្របទៅនឹង​វិធាន ការណ៍​ការពារ​នៃ​ការចម្លង​ជំងឺ​កូ​វីដ​១៩ និង​ធ្វើឡើង​នៅក្នុង​បរិវេណ​រង់ចាំ​នៃ​មន្ទីរពេទ្យ កុមារ​អង្គរ ខេត្តសៀមរាប ក្នុងនោះ មាន​កម្មវិធី​សូត្រមន្ត​ចម្រើន​ព្រះ​បរិត្ត និង​កម្មវិធី​សម្តែង​ព្រះ​ធម្មទេសនា​ដោយ​ធម្មកថិក ចំនួន ៧ អង្គ​ឆ្លង ឆ្លើយ អំពី “​អរិយទ្រព្យ ៧ ប្រការ​” ជា​កិច្ច​បង្ហើយ​បុណ្យ​។ ដោយ​មើលឃើញ​ពី​ផល​លំបាក​ដែល​មន្ទីរពេទ្យ​កុមារ​អង្គរ​ជួបប្រទះ ព្រះមហា​វិមលធម្ម ពិន សែម សិរី​សុ​វ​ណ្ណោ ព្រះ​រាជាគណៈ​ថ្នាក់​ទោ ជា​ឧ​ត្ត​ម​ទីប្រឹក្សា​គណៈសង្ឃ​នាយក និង​ជា​សមាជិក​ថេរ​សភា​នៃ​ព្រះពុទ្ធសាសនា​នៅ​ព្រះ​ជាណា​ចក្រ​កម្ពុជា និង ជា​ព្រះ​គ្រូ​ចៅអធិការ​វត្ត​រាជ​បូ​ណ៌ ក្រុង​សៀមរាប និង​ព្រះ​មន្ត្រី​សង្ឃ​ជាច្រើន​អង្គ រួមទាំង​ពុទ្ធបរិស័ទ និង​បណ្តា​ស្ថាប័ន ក្រុមហ៊ុន​ជាច្រើន បានសម្រេច​ចិត្ត​ចូលរួម​ជា​អ្នក​ផ្តើមបុណ្យ សាមគ្គី​គ្នា​ជួយ​ផ្សព្វ ផ្សាយ រៀបចំ​ពិធី និង​កៀរគរ​ប្រមូល​ថវិកា​តាម​រយៈ​បណ្តាញ​ទំនាក់ទំនង​របស់ខ្លួន ដោយ​មិន​មាន​លក្ខខណ្ឌ​។ មន្ទីរពេទ្យ​កុមារ​អង្គរ​ពិតជា​មាន​សេចក្ដីសោមនស្ស​យ៉ាង​ជ្រាលជ្រៅ​ ចំពោះ​ការប្តេជ្ញាចិត្ត​និង​ការលះបង់​ជា​បន្តទៀត​របស់​សប្បុរ​សជន​និង​អ្នក​ផ្តើមបុណ្យ​ទាំងអស់​។

​អ្នក​ឧក​ញ្ញ៉ា គិត ម៉េង ប្រធាន​និង​នាយក​ប្រតិបត្តិ ក្រុមហ៊ុន រ៉ូយ៉ាល់​គ្រុប (Royal Group of Companies) ក៏ដូចជា​ក្រុមហ៊ុន​ប្រតិបត្តិ ធនាគារ វី​ង (​ខេ​ម​បូ​ឌា​) ម​.​ក និង​ក្រុមហ៊ុនទូរស័ព្ទ​ចល័ត​សែ​ល​កាត នឹង​សហការ​បង្កើត​យុទ្ធសាស្ត្រ​ផ្សព្វផ្សាយ និង​រៃអង្គាស​ថវិកា ដើម្បី​ជួយ​ដល់​មន្ទីរពេទ្យ​។ លោកជំទាវ ម៉ៅ ចំណាន ជា​អគ្គនាយិកា​ប្រតិបត្តិការ​នៃ ក្រុមហ៊ុន​រ៉ូយ៉ាល់​គ្រុប និង ធនាគារ វី​ង (​ខេ​ម​បូ​ឌា​) ម​.​ក ដែល​ឆ្នាំនេះ​គឺជា​លើក​ទី​ពីរ​រហើយ​សម្រាប់​ការចូលរួម​ជា​អ្នក​ផ្តើមបុណ្យ លោកជំទាវ​មានប្រសាសន៍​បង្ហាញ​អំពី​ទឹកចិត្ត​ដូច្នេះ​ថា “​ក្នុងនាម​ជា​ម្តាយ​មួយរូប នៅពេលដែល​កូនៗ​មាន​បញ្ហា​សុខភាព អ្នក​ម្តាយ​តែងតែ​កើតក្តី​បារម្ភ​គ្រប់ពេលវេលា ជាពិសេស​នៅពេលដែល​កូន​ឈឺ​និង​ពិបាក​ស្វែងរក​កន្លែង​ព្យាបាល​ដែល​ទុកចិត្ត​។ ហេតុ​ដូច​ច្នេះ​ហើយ ការ ផ្តួចផ្តើម ប្រារព្ធ​ពិធីបុណ្យ​ផ្កាប្រាក់​មហា​សាមគ្គី​នេះ វា​នឹង​អាចជួយ​ដល់​មន្ទីរ ពេទ្យ​កុមារ​អង្គរ​អាច​បន្ត​ផ្តល់​សេវា​ព្យាបាល​ដោយ​ឥតគិតថ្លៃ​ដល់​កុមារ​បាន​កាន់តែ​ប្រសើរឡើង​ថែមទៀត​។​”លើសពីនេះ​ទៀត ការគាំទ្រ​ឥតឈប់ឈរ​នេះ​ គឺមាន​តម្លៃ​មិនអាច​កាត់ថ្លៃ​បាន​ចំពោះ​មន្ទីរពេទ្យ​។

​លោក​វេជ្ជបណ្ឌិត ងួន ច័ន្ទ​ភក្ត្រា នាយក​មន្ទីរពេទ្យ​កុមារ​អង្គរ ក៏បាន​មានប្រសាសន៍​អំពាវនាវ សុំ​ឲ្យ​សប្បុរសជន​ខ្មែរ ទាំង​ក្នុង និង​ក្រៅប្រទេស បន្ត​ចូលរួម​តាម​គ្រប់​រូបភាព ដូចជា​ការចែករំលែក​ថវិកា​ផ្ទាល់ខ្លួន បរិច្ចាគ​មកកាន់​ពិធី​នេះ ឬ​ជួយ​ស៊ែរ​ផ្សព្វ​ផ្សាយដំណឹង​ពិធីបុណ្យ​ឲ្យ​កាន់តែ​អធិកអធម​នៅ​តាម​បណ្តាញ​សង្គម​។ លោក​ក៏បាន​បញ្ជាក់​ផងដែរ​ថា “​ថវិកា​ដែល​ទទួលបាន​ពី​ការរៀបចំ​ពិធីបុណ្យ​ផ្កាប្រាក់​នេះ គឺជា​ចំណែក​ដ៏​សំខាន់​បំផុត​ដើម្បី​ថែរក្សា​ដំណើរ​ការផ្តល់សេវា​ពិនិត្យព្យាបាលថែទាំ សង្គ្រោះ​ជីវិត​កុមារ​កម្ពុជា ប្រកបដោយ​គុណភាព ក្តីមេត្តា​ករុណា និង​ឥត​គិត​កម្រៃ នៅក្នុង​មន្ទីរពេទ្យ​កុមារ​អង្គរ​”​។ ឆ្នាំ​២០២០​កន្លងទៅនេះ មន្ទីរពេទ្យ​កុមារ​អង្គរ បាន​ពិនិត្យ និង​ព្យាបាល​កុមារ​បាន​ចំនួន ៩៧ ០៦៩​ករណី អប់រំ​បណ្តុះបណ្តាល​មន្ត្រី​សុខាភិបាល និស្សិត​គិលានុបដ្ឋាក និស្សិត​វេជ្ជសាស្ត្រ និង​បុគ្គលិក​មន្ទីរពេទ្យ​កុមារ​អង្គរ​បាន​ចំនួន​៧៣ ៩០៨​នាក់ និង​អប់រំ​សុខភាព​តាម​បណ្ដា​ភូមិ សាលារៀន មណ្ឌល​សុខភាព និង​ក្នុង​សហគមន៍​បាន​ចំនួន ៥៦ ៧៤៧​នាក់ គឺ​ដោយសារ​តែមាន​ការជួយ ជ្រោមជ្រែង​ពី សប្បុរសជន​មកពី​គ្រប់ទិសទី​។

ពុទ្ធបរិស័ទ និង​សប្បុរសជន​ជិត​ឆ្ងាយ​ទាំងអស់ អាច​ចូលរួម​ដោយ​បរិច្ចាគ​ថវិកា​មកកាន់ មន្ទីរពេទ្យ​កុមារ​អង្គរ ដោយផ្ទាល់​តាមរយៈ​គណ​នី​ធនាគារ​ដោយ​មិន​គិត​សេវា​ដូចជា​៖​ធនាគារ វី​ង ខេ​បូ​ឌា (Wing)៖ 9122 (​ប្រាក់រៀល​) & 8122 (​ប្រាក់​ដុល្លារ​) ធនាគារ អេ​ប៊ី​អេ (ABA): 000 853 843,​ធនាគារ អេស៊ីលីដា (ACELDA): 0100 0105 6968 28 ,​ធនាគារ ស្ថាបនា (Sathapana): 078 0808 2834 1001 02 ឬក៏​ចូល​បច្ច័យ​ផ្ទាល់​នៅ​ទីកន្លែង​ប្រារព្ធ​ពិធីបុណ្យ (​មន្ទីរពេទ្យ​កុមារ​អង្គរ ខេត្តសៀមរាប​) និង​សប្បុរសជន​នៅក្រៅ​ប្រទេស​អាច​បរិច្ចាគ​តាម​Link Website៖ https://virtualbonpka.raisely.com/៕​

អត្ថបទ៖​ កុសល​

​

The post មន្ទីរពេទ្យ​កុមារ​អង្គរ រៀប​ចំពិធីបុណ្យ​ផ្កាប្រាក់​មហា​សាមគ្គី ឆ្នាំ​ទី​៨ តាម​ប្រព័ន្ធ​អន​ឡាញ ជា​លើកដំបូង appeared first on Kampuchea Thmey Daily.

​បើតាម​ការ​ឲ្យ​ដឹង​ពី​មន្ត្រី​ខេ​មរ​សហព័ន្ធ​តេ​ក្វាន់​ដូ​WT ថា ព្រឹត្តិការណ៍​ការប្រកួត​កីឡា​តេ​ក្វាន់​ដូ Online 2021 Korean Ambassador`s Cup Taekwondo Competition នេះ សម្រាប់​វិញ្ញាសា សម្តែង​មេគុន​១០ រួមមាន​វិញ្ញាសា​មេគុន​ឯកត្តជន​បុរស​-​នារី អាយុ​ក្រោម​១៥​ឆ្នាំ (​ខ្សែក្រវាត់​ខៀវ ) វិញ្ញាសា​មេគុន​ឯកត្តជន​បុរស​-​នារី អាយុ​១៥​ឆ្នាំ​ឡើង (​ខ្សែក្រវាត់​ខៀវ ) វិញ្ញាសា​មេគុន​ឯកត្តជន​បុរស​-​នារី អាយុ​ក្រោម​១៥​ឆ្នាំ (​ខ្សែក្រវាត់​ខ្មៅ​១​ដាន់ ) និង​វិញ្ញាសា​មេគុន​ឯកត្តជន​បុរស​-​នារី អាយុ​១៥​ឆ្នាំ​ឡើង (​ខ្សែក្រវាត់​ខ្មៅ​១​ដាន់ )​។​

​ចំណែក​វិញ្ញាសា​មេគុន​ឯកត្តជន​បុរស​-​នារី មិន​គិត​អាយុ​(Open) (​ចាប់ពី​ខ្សែក្រវាត់​ខ្មៅ​២​ដាន់​ឡើង​)​។ ប្រយុទ្ធ​បច្ចេកទេស​២​វិញ្ញាសា​៖​វិញ្ញ​សា​បុរស​-​នារី​មិន​គិត​អាយុ​(Open) (​ចាប់ពី​ខ្សែក្រវាត់​ខ្មៅ​២​ដាន់​ឡើង​) (Speed Kicking រយៈពេល​១​នាទី ទាត់​គ្រប់​បច្ចេកទេស​ប្រកួត និង​គិត​ចំនួន​) ចំពោះ​កីឡាករ​-​កីឡាការិនី​អាច​ចូលរួម​ប្រកួត​បានតែ​មួយ​វិញ្ញាសា​ប៉ុណ្ណោះ​។​

​គួរ​បញ្ជាក់ថា ការប្រកួត​នេះ ទទួលបាន​ការឯកភាព​ជាគោលការណ៍ ពី​លោក​បណ្ឌិត​សភាចា​រ្យ ហង់​ជូន ណា​រ៉ុ​ន រដ្ឋមន្ត្រីក្រសួង​អប់រំ យុវជន និង​កីឡា និង ប្រធាន​ខេ​មរ​សហព័ន្ធ​តេ​ក្វាន់​ដូ WT៕​

អត្ថបទ៖ វិ​សិទ្ធ​

The post តេ​ក្វាន់​ដូ WT បើក​ការប្រកួត Online 2021 Korean Ambassador`s Cup Taekwondo Competition appeared first on Kampuchea Thmey Daily.

​ជនរងគ្រោះ​មានឈ្មោះ ពៅ ភេទ​ប្រុស អាយុ​៣៤​ឆ្នាំ មុខរបរ​អ្នក​ដឹកជញ្ជូន​តាម​អន​ឡាញ មាន​ស្រុកកំណើត​នៅ​ខេត្តស្វាយរៀង បច្ចុប្បន្ន​រស់នៅ​សង្កាត់​ព្រែក​ហូរ ក្រុង​តាខ្មៅ ខេត្តកណ្តាល​។​

​ប្រភពពី​កន្លែងកើតហេតុ​បានឱ្យដឹងថា មុនពេល​កើតហេតុ​គេ​ឃើញ​រថយន្ដ​ដឹក​ខ្សាច់​មួយគ្រឿង​ម៉ាក​ហ៊ីយ៉ាន់ដាយ ពណ៌​លឿង ពាក់​ស្លាក​លេខ​ភ្នំពេញ​3F-7419 បើក​តាម​បណ្ដោយ​ផ្លូវ​៦០​ម៉ែត្រ​ពី​ត្បូង​ទៅ​ជើង​ក្នុង​ល្បឿន​លឿន ខណៈ​បើក​មកដល់​ចំណុចកើតហេតុ​ក៏​បុក​ម៉ូតូ​មួយគ្រឿង​ម៉ាក​ហុងដា​ឌ្រី​ម ស៊េរី​ឆ្នាំ​២០២០ ពណ៌​ខ្មៅ​មួយគ្រឿង​ពាក់​ស្លាក​លេខ​កណ្ដាល​1 V-6274 ជិះ​ដោយ​បុរស​ម្នាក់​បញ្ច្រាស​ទិស​គ្នា​ពី​ជើង​ទៅ​ត្បូង​ពេញទំហឹង​ និង​កិន​ម៉ូតូ​អូស​ជាង​៥០​ម៉ែត្រ​រង​ការខូចខាត​ម៉ូតូ​ទាំងស្រុង ចំណែក​ជនរងគ្រោះ​បាន​បែក​ក្បាល​ស្លាប់​ក្នុង​ថ្លុកឈាម​យ៉ាង​អាណោចអាធ័ម​។

​ក្រោយ​កើតហេតុ សមត្ថកិច្ច​មូលដ្ឋាន​បាន​សហការ​ជាមួយ​សមត្ថកិច្ច​ជំនាញ​ចរាចរណ៍​ខណ្ឌមានជ័យ ​បាន​ចុះទៅ​ធ្វើការ​វាស់វែង​យក​រថយន្ត​បង្ក​និង​ម៉ូតូ​ទៅ​រក្សាទុក​នៅ​ការិយាល័យ​ចរាចរណ៍​ផ្លូវគោក នៃ​ស្នងការដ្ឋាន​នគរបាល​រាជធានី​ភ្នំពេញ​រង់ចាំ​ដោះស្រាយ​តាមច្បាប់ ។ ចំណែក​សព ​ត្រូវ​បាន​ប្រគល់​ឲ្យ​ទៅ​សាច់ញាតិ​ក្រុម​គ្រួសារ​យកទៅ​ធ្វើបុណ្យ​តាម​ប្រពៃណី​៕

អត្ថបទ៖ ឧ​ត្ត​រ៉ា​

​

The post ​អ្នក​ដឹកជញ្ជូន​តាម​អន​ឡាញ​ម្នាក់​ ត្រូវ​រថយន្ដ​ដឹក​ខ្សាច់​បុក និង​កិន​ម៉ូតូ​អូស​ជាង​៥០​ បណ្ដាល​ឲ្យ​ស្លាប់ appeared first on Kampuchea Thmey Daily.