អាកាសចរណ៍សុីវិល Archives - Kampuchea Thmey Daily

អ្នកនាំពាក្យអាកាសចរស៊ីវិល៖ សង្គ្រាមឈូងសមុទ្រ មិនប៉ះពាល់ធ្ងន់ធ្ងរដល់ការដឹកជញ្ជូនរបស់កម្ពុជាឡើយ

Din Thary — Thu, 12 Mar 2026 03:02:16 +0000

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរស៊ីវិល មានប្រសាសន៍ថា សង្គ្រាមនៅតំបន់មជ្ឈិមបូព៌ា មិនធ្វើឱ្យប៉ះពាល់ដល់ដែនអាកាស និងការចុះចតនៅអាកាសយានដ្ឋានអន្តរជាតិតេជោនោះទេ ដោយសារតែស្ថានភាពភូមិសាស្រ្តរបស់កម្ពុជាមានគម្លាតឆ្ងាយពីតំបន់ជម្លោះ។

លោក ស៊ីន ចាន់សិរីវុត្ថា បញ្ជាក់ថា៖ «ដូច្នេះហើយបើទោះបីជាជម្លោះកំពុងកើតមាននៅក្នុងតំបន់មជ្ឈិមបូព៌ាក៏ដោយ ក៏ដែនអាកាសរបស់កម្ពុជានៅតែបើកដំណើរការជាប្រក្រតី និងប្រកបដោយសុវត្ថិភាព»។

លោក ស៊ីន ចាន់សិរីវុត្ថា បានបន្ថែមថា បើទោះបីកម្ពុជានៅឆ្ងាយពីតំបន់ជម្លោះក៏ពិតមែន ប៉ុន្តែក៏នៅមានផលប៉ះពាល់ខ្លះនៅការតភ្ជាប់រវាងអ៊ឺរ៉ុប អាមេរិកខាងជើង អាហ្វ្រិក ដែលហោះហើរមកកាន់ប្រទេសកម្ពុជា ប៉ុន្តែការតភ្ជាប់នេះអាចហោះហើរវាងទៅផ្លូវផ្សេង ឬអាចតភ្ជាប់ទៅតាមអាកាសយានដ្ឋានផ្សេងៗ ក្រៅពីអាកាសយានដ្ឋានទាំង ៧ ដែលប៉ះពាល់។

អាកាសយានដ្ឋានអន្តរជាតិតេជោតែងតែត្រៀមលក្ខណៈសម្បត្តិជានិច្ច មិនមានអ្វីដែលជាការខ្វះខាតទេ អាចទទួលយន្តហោះគ្រប់ប្រភេទ និងគ្រប់ពេលវេលា ប្រកបដោយផាសុកភាព និងសុវត្ថិភាព។

បើតាមអ្នកនាំពាក្យរូបនេះ សង្គ្រាមនៅមជ្ឈិមបូព៌ានេះ មានផលប៉ះពាល់ដែរ ប៉ុន្តែមិនធ្ងន់ធ្ងរនោះទេ គឺអាចគ្រប់គ្រងបាន និងធ្វើពិពិធកម្មនៃការដឹកជញ្ជូននេះបាន។

តាមការប៉ាន់ស្មានផលប៉ះពាល់ជាអវិជ្ជមានបឋម អាចមានអ្នកដំណើរ ប្រហែល ១២,៩៦០ នាក់ ក្នុងមួយសប្ដាហ៍ និងប្រហែល ៥១,៨៤០ នាក់ ក្នុងមួយខែ។

លោក ស៊ីន ចាន់ បានពន្យល់ថា មិនមែនបានន័យថា ភ្ញៀវទាំងអស់មិនអាចធ្វើដំណើរបាននោះទេ ប៉ុន្តែគ្រាន់តែប៉ះពាល់ទៅដល់ការធ្វើដំណើររបស់ពួកគេ ដោយភ្ញៀវទេសចរទាំងអស់នោះអាចធ្វើដំណើរទៅតាមផ្លូវផ្សេងៗ មកកាន់ប្រទេស កម្ពុជា។ ចំពោះផលប៉ះពាល់នេះ មិនមែនសម្រាប់តែប្រទេសកម្ពុជាមួយនោះទេ គឺប៉ះពាល់ជាសកល៕

អត្ថបទ៖ ឌិន ថារី

The post អ្នកនាំពាក្យអាកាសចរស៊ីវិល៖ សង្គ្រាមឈូងសមុទ្រ មិនប៉ះពាល់ធ្ងន់ធ្ងរដល់ការដឹកជញ្ជូនរបស់កម្ពុជាឡើយ appeared first on Kampuchea Thmey Daily.

សេចក្ដីព្រាងច្បាប់ចំនួន៤ ពាក់ព័ន្ធវិស័យអាកាសចរណ៍ ទទួលបានអនុម័តទាំងស្រុងពីព្រឹទ្ធសភា

Thoeun Vansong — Mon, 05 Jan 2026 07:06:29 +0000

ក្នុងសម័យប្រជុំពេញអង្គ នាព្រឹកថ្ងៃទី៥ ខែមករា ឆ្នាំ២០២៦នេះ ព្រឹទ្ធសភាបានឯកភាពទាំងស្រុងលើសេចក្តីព្រាងច្បាប់ចំនួន៤ ពាក់ព័ន្ធនឹងវិស័យអាកាសចរណ៍។ សម័យប្រជុំលើកទី៤ ព្រឹទ្ធសភា នាព្រឹកមិញ បានប្រព្រឹត្តទៅក្រោមអធិបតីភាពលោក អ៊ុច បូររិទ្ធ អនុប្រធានទី១ព្រឹទ្ធសភា ដែលមានវត្តមានសមាជិកព្រឹទ្ធសភាចូលរួមចំនួន៥៦រូប។

សេចក្តីព្រាងច្បាប់ទាំង៤ ដែលទទួលបានការឯកភាពពីព្រឹទ្ធសភា គឺ៖ ១. សេចក្តីព្រាងច្បាប់ស្តីពីអាកាសចរណ៍ស៊ីវិលកម្ពុជា។ ២. សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងគ្រប់ជ្រុងជ្រោយ ស្តីពីការដឹកជញ្ជូនតាមផ្លូវអាកាសរវាងរដ្ឋសមាជិកអាស៊ាន និងសហភាពអឺរ៉ុប និងរដ្ឋសមាជិករបស់ខ្លួន។ ៣. សេចក្តីព្រាងច្បាប់ស្តីពីការអនុម័តយល់ព្រមលើពិធីសារទី៣ស្តីពីការពង្រីកសិទ្ធិហោះហើរទី៥ រវាងភាគីចុះកិច្ចព្រមព្រៀងក្រោមកិច្ចព្រមព្រៀងដឹកជញ្ជូនតាមផ្លូវអាកាសរវាងរដ្ឋាភិបាលនៃរដ្ឋសមាជិកអាស៊ាន និងចិន។ ៤.សេចក្តីព្រាងច្បាប់ស្តីពីការអនុម័តយល់ព្រមទៅលើពិធីសារអនុវត្តកញ្ចប់កិច្ចសន្យាទី១១ និងទី១២ នៃសេវាកម្មដឹកជញ្ជូនតាមផ្លូវអាកាស ក្រោមកិច្ចព្រមព្រៀងក្របខ័ណ្ឌអាស៊ានស្តីពីសេវាកម្ម។

បើតាមសេចក្ដីប្រកាសព័ត៌មានរបស់អគ្គលេខាធិការដ្ឋានព្រឹទ្ធសភា បន្ទាប់ពីសមាជិកព្រឹទ្ធសភាជាច្រើនរូបបានឡើងមានយោបល់រួចមក ដោយមានការឆ្លើយបំភ្លឺពីលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល អង្គប្រជុំព្រឹទ្ធសភា បានពិនិត្យ ហើយឱ្យយោបល់ឯកភាពទាំងស្រុងលើសេចក្តីព្រាងច្បាប់ខាងលើ ដោយឥតកែប្រែក្នុងចំនួន ៥៦សំឡេងនៃចំនួនសមាជិកព្រឹទ្ធសភាទាំងមូល។

គួរឱ្យដឹងថា សេចក្ដីព្រាងច្បាប់ខាងលើ ត្រូវបានរដ្ឋសភាអនុម័តកាលពីថ្ងៃទី២៥ ខែធ្នូ ឆ្នាំ២០២៥ ក្នុងសម័យប្រជុំពេញអង្គរដ្ឋសភា ហើយត្រូវបានបញ្ជូនបន្តមកកាន់ព្រឹទ្ធសភា ដើម្បីសុំការពិនិត្យហើយឱ្យយោបល់៕

អត្ថបទ៖ ធឿន វ៉ាន់សុង

The post សេចក្ដីព្រាងច្បាប់ចំនួន៤ ពាក់ព័ន្ធវិស័យអាកាសចរណ៍ ទទួលបានអនុម័តទាំងស្រុងពីព្រឹទ្ធសភា appeared first on Kampuchea Thmey Daily.

អាកាសចរស៊ីវិល៖ ជើងហោះហើរឆ្លងកាត់តំបន់ជម្លោះកម្ពុជា-ថៃ នៅតែមិនទាន់អនុញ្ញាតឱ្យមានការហោះហើរឡើយ

Din Thary — Wed, 30 Jul 2025 03:50:17 +0000

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានឱ្យ«កម្ពុជាថ្មី» នៅព្រឹកថ្ងៃទី៣០ ខែកក្កដា ឆ្នាំ២០២៥ នេះ ដឹងថា គិតមកដល់ម៉ោង ១០ និង ០០នាទីនេះ ស្ថានភាពជើងហោះហើរ និងដែនអាកាសកម្ពុជានៅរក្សាស្ថានភាពដដែលមិនមានអ្វីប្រែប្រួលនោះទេ។ ជាមួយគ្នានោះដែរ សម្រាប់ជើងហោះហើររំលងដែលបានបិទមិនឱ្យហោះឆ្លងកាត់តំបន់ជម្លោះកម្ពុជា-ថៃ នៅមិនទាន់អាចបើកឱ្យដំណើរការហោះហើរដូចដើមនៅឡើយទេ។

លោក ស៊ិន ចាន់សិរីវុត្ថា បានគូសបញ្ជាក់ថា ស្ថានភាពនៃការហោះហើរជើងហោះហើរភ្នំពេញ-បាងកក បាងកក-ភ្នំពេញ ក៏ដូចជា បាងកក-សៀមរាប គឺនៅរក្សាប្រក្រតីភាពជាធម្មតាមិនមានអ្វីផ្លាស់ប្ដូរនោះទេ។ ប៉ុន្តែសម្រាប់តំបន់គ្រោះថ្នាក់ អាកាសចរស៊ីវិលកម្ពុជានៅមិនទាន់អាចបញ្ជាក់បានទេថាតើ អាចបើកដំណើរការឡើងវិញនៅពេលណានោះទេ។

«ជុំវិញបញ្ហានេះ អាកាសចរស៊ីវិលកម្ពុជា កំពុងរង់ចាំមើលស្ថានភាពទូទៅនៃបញ្ហាព្រំដែនរវាងប្រទេសទាំងពីរ កម្ពុជា-ថៃ នេះសិន ប៉ុន្តែចំពោះការបិទដែនអាកាសលើតំបន់ប្រយុទ្ធគ្នានោះ ការហោះហើរនៅមិនទាន់មានការប្រែប្រួលនោះទេ ហើយចំនួនជើងហោះហើររំលងនៅរក្សាស្ថានភាពដដែល។ បានន័យថា ក្រុមហ៊ុនជើងហោះហើររំលង គ្រាន់តែហោះប្តូរទៅផ្លូវផ្សេងបញ្ចៀសពីខ្សែផ្លូវគ្រោះថ្នាក់នោះតែបន្តិចប៉ុណ្ណោះ តាមការណែនាំរបស់ក្រុមការងារជើងហោះហើររបស់កម្ពុជា»។ លោក ស៊ិន ចាន់សិរិវុត្ថា បន្ថែមបែបនេះ។

លោក ស៊ិន ចាន់សិរីវុត្ថា បានអះអាងថា បញ្ហានេះអាកាសចរស៊ីវិល បានតាមដាន និងពិនិត្យយ៉ាងយកចិត្តទុកដាក់ គឺមិនមានការប្រែប្រួលនោះទេចំពោះដែនអាកាស ប៉ុន្តែសម្រាប់ការបើកដំណើរការឱ្យដូចដើមឡើងវិញ អាកាសចរស៊ីវិលនៅមិនទាន់អាចបើកឱ្យដូចដើមឡើងវិញនោះទេ ដោយអាកាសចរបាននិងកំពុងតាមដាន ពិនិត្យ និងវាយតម្លៃហានិភ័យ រហូតដល់មានការជូនដំណឹងជាថ្មី។

គួរបញ្ជាក់ថា កាលពីថ្ងៃទី២៥ ខែកក្កដា ក្រោយសង្គ្រាមកម្ពុជា-ថៃ បានផ្ទុះឡើងដែលបង្កឡើងដោយភាគីថៃ ជាអ្នកបើកការឈ្លានពានមកលើកម្ពុជាមុននោះ ដើម្បីបញ្ចៀសគ្រោះថ្នាក់នានាតាមដែនអាកាសដែលអាចកើតមានជាយថាហេតុ អាកាសចរស៊ីវិលកម្ពុជាបានចេញសេចក្ដីប្រកាសមួយ ដើម្បីបញ្ជាក់ដល់ក្រុមហ៊ុនជើងហោះហើរទាំងឡាយណាដែលហោះក្រោមកម្ពស់ ១១គីឡូ ត្រូវតែផ្លាស់ប្តូរទិសនៃការហោះហើរទៅលើផ្លូវផ្សេងជំនួសវិញ។ ប៉ុន្តែសម្រាប់ជើងហោះហើរដែលហោះនៅកម្ពស់ខ្ពស់ជាង ១១គីឡូម៉ែត្រ ពុំចាំបាច់ធ្វើការហោះហើរផ្លាស់ប្តូរទិសតាមផ្លូវដែលមានជម្លោះនោះទេ។

អាកាសចរស៊ីវិលកម្ពុជា ក៏បានបញ្ជាក់ដែរថា ស្ថានភាពជើងហោះហើរភ្នំពេញ-បាងកក ក៏ដូចជា បាងកក-សៀមរាប នៅរក្សាប្រក្រតីជាធម្មតា លើកលែងតែជើងហោះហើរ Thai Airways ដែលធ្លាប់ហោះហើរក្នុងមួយថ្ងៃពីរជើង ថយមកនៅត្រឹមក្នុងមួយថ្ងៃមួយជើងវិញ គិតពីថ្ងៃទី២៧ ដល់ថ្ងៃទី៣១ ខែកក្កដា នេះ ដោយសារតែចំនួនភ្ញៀវមិនគ្រប់ទៅតាមទីផ្សារ៕

ដោយ៖ ឌិន ថារី

The post អាកាសចរស៊ីវិល៖ ជើងហោះហើរឆ្លងកាត់តំបន់ជម្លោះកម្ពុជា-ថៃ នៅតែមិនទាន់អនុញ្ញាតឱ្យមានការហោះហើរឡើយ appeared first on Kampuchea Thmey Daily.

ការមកដល់នៃភ្ញៀវទេសចរតាមផ្លូវអាកាសមានជាង ៣,៥ លាននាក់ ក្នុងឆមាសទី១ កើនឡើង ជាង ១៦%

May Kunmakara — Fri, 18 Jul 2025 07:25:07 +0000

អ្នកនាំពាក្យ និងជារដ្ឋលេខាធិការដ្ឋានអាកាសចរណ៍ស៊ីវិលកម្ពុជា លោក ស៊ីន ចាន់សិរីវុត្ថាបានឱ្យ«កម្ពុជាថ្មី»ដឹងថា នៅក្នុងឆមាសទី១ឆ្នាំ២០២៥នេះ ការធ្វើដំណើររបស់ភ្ញៀវទេសចរតាមផ្លូវអាកាសនៃអាកាសយានដ្ឋានអន្តរជាតិទាំង៣ (ភ្នំពេញ-សៀមរាបអង្គរ-ព្រះសីហនុ)មានជាង ៣,៥ លាននាក់ ក្នុងឆមាសទី១ កើនឡើង ជាង ១៦% ធៀបនឹងរយៈពេលដូចគ្នាកាលពីឆ្នាំមុន។

លោក ចាន់សិរីវុត្ថា បានថ្លែងបញ្ជាក់ទៀតថា គិតចាប់ពី ខែមករា ដល់ ខែមិថុនា ឆ្នាំ២០២៥ (រយៈពេល ៦ខែ) ស្ថានភាពវិស័យដឹកជញ្ជូន តាមផ្លូវអាកាស សម្រាប់អាកាសយានដ្ឋានអន្តរជាតិទាំង៣ (ភ្នំពេញ-សៀមរាបអង្គរ-ព្រះសីហនុ/ PNH-SAI-KOS) មាន៖ ជើងហោះហើរ ចេញ-ចូល (ទ្វេទិស) មានចំនួនជាង ៣ ម៉ឺនជើង (៣២,៣៧៩ ជើង) មានការកើនឡើងជិត ១៣% បើធៀបទៅនឹងរយៈពេល ០៦ ខែ ដូចគ្នាទៅនឹងឆ្នាំ២០២៤។

សម្រាប់អ្នកដំណើរ ចេញ-ចូល (ទ្វេទិស) មានចំនួនជាង ៣.៥ លាននាក់ (៣,៥២៨,៧៣៧ នាក់) មានការកើនឡើងជាង ១៦% បើធៀបទៅនឹងរយៈពេល ០៦ ខែ ដូចគ្នាទៅនឹងឆ្នាំ២០២៤។

លោកបានបញ្ជាក់ថា ទោះបីជាបញ្ហាស្ថានភាពសេដ្ឋកិច្ច និងការអូសបន្លាយពេលនៃជម្លោះព្រំដែនរវាងអ៊ុយក្រែន និងរុស្ស៊ី អង្គការអាកាសចរណ៍ស៊ីវិលអន្តរជាតិ និងថ្មីបញ្ហាប្រឈមមុខដាក់គ្នានៃជំលោះព្រំដែនកម្ពុជា-ថៃ ក៏ស្ថានភាពនៃអ្នកដំណើរតាមផ្លូវអាកាសនៅរក្សាបាននូវកំណើនមួយគួរឱ្យកត់សម្គាល់នាឆមាសកន្លងមកនេះ។

លោកថា៖«ប្រសិនបើយើងគិតទៅដល់ដែនអាកាស យើងដឹងហើយថា ដែនអាកាស គឺជាអធិបតេយ្យភាពរបស់ប្រទេសនីមួយៗ ដូច្នេះរាល់ការហោះហើរគឺត្រូវតែគោរព និងអនុវត្តនូវរាល់លក្ខខណ្ឌតម្រូវរបស់អន្តរជាតិ ហើយប្រសិនបើតំបន់នោះមានការប្រយុទ្ធគ្នាតាមផ្លូវអាកាស ឬក៏បាញ់បោះដាក់គ្នានោះ យើងត្រូវតែប្តូរទិសការហោះហើរពីតំបន់នោះទៅកន្លែងផ្សេង។ ដូច្នេះប្រសិនមានបញ្ហាអ្វីកើតឡើង យើងអាចប្តូរជើងហោះហើរទៅផ្លូវផ្សេងវិញបាន គ្រាន់តែត្រូវចំណាយពេលវេលាយូរជាង ប៉ុន្តែរហូតមកដល់ពេលនេះអ្វីៗនៅមិនទាន់មានការប្រែប្រួល គឺនៅរក្សាស្ថានភាពដើមទាំងអស់»។

ជាមួយគ្នានេះ លោកក៏បានបញ្ជាក់ដែរថា «អាជ្ញាធររបស់យើង ក៏ដូចជាអាកាសចរណ៍ស៊ីវិល ក៏បានធ្វើការតាមដាន គិតគូរ និងពិភាក្សាយ៉ាងហ្មត់ចត់ចំពោះស្ថានភាពព្រំដែននេះ ដូច្នេះប្រសិនមានអ្វីកើត យើងនិងមានផែនការរួចជាស្រេចដើម្បីដោះស្រាយលើបញ្ហាដែលកើតឡើង ព្រោះជាទូទៅ គឺយើងត្រូវតែគោរពតាមវិធានរបស់អន្តរជាតិ ដោយគេមានរបៀបណែនាំស្តីពីទំនាស់ព្រំដែន ឬនៅតំបន់ដែលមានទំនាស់ជាមួយគ្នា»។

លោកថា បើទោះបីជាកន្លងមកថ្មីៗនេះ បញ្ហាជម្លោះអ៊ីរ៉ង និងអ៊ីស្រាអែល ក៏មានបិទដែនអាកាសទាំងអស់នោះដែរ គឺកម្រិតយកផ្លូវហោះហើរវាងដែនអាកាសទាំងអស់នោះ មកកាត់តាមប្រទេសតួកគីវិញ គ្រាន់តែត្រូវចំណាយពេលយូរជាង និងចំណាយថវិកាច្រើនជាង ដោយបញ្ហាប្រឈមអាចមានផលប៉ះពាល់ទី១ ដល់តម្លៃ អាចនឹងមានការឡើងថ្លៃ ទី២ អាចប៉ះពាល់ដល់ការហោះហើរយូរជាង ឬអាចមានការយ៉ើតយ៉ាវ ឬក៏អាចមានការលុបចោលជើងហោះហើរដោយសារប្រការផ្សេងៗ។

ជាមួយគ្នានោះដែរ ទំនិញតាមផ្លូវអាកាស ចេញ-ចូល (ទ្វេទិស) មានចំនួនជាង ៣ ម៉ឺនតោន (៣៦,៩៣២ តោន) មានការកើនឡើងជាង ៦% បើធៀបទៅនឹងរយៈពេល ០៦ ខែ ដូចគ្នាទៅនឹងឆ្នាំ២០២៤ ៕

The post ការមកដល់នៃភ្ញៀវទេសចរតាមផ្លូវអាកាសមានជាង ៣,៥ លាននាក់ ក្នុងឆមាសទី១ កើនឡើង ជាង ១៦% appeared first on Kampuchea Thmey Daily.

អាកាសចរណ៍ចិន Global X Airlines គ្រោងបើកដំណើការនៅកម្ពុជា

May Kunmakara — Tue, 24 Jun 2025 07:23:24 +0000

ក្រុមហ៊ុនអាកាសចរណ៍ចិន Global X Airlines បានធ្វើការសិក្សាក្នុងការបើកដំណើការអាជីវកម្មរបស់ខ្លួននៅកម្ពុជា ដោយមើលឃើញអំពីសក្តានុពលនៃការកើនឡើងលំហូរទេសចរចិនមក ស្របពេលដែលរដ្ឋាភិបាលនៃប្រទេសទាំងពីរទើបប្រកាសអំពីឆ្នាំ២០២៥ជាឆ្នាំទេសចរណ៍កម្ពុជា-ចិន។

ក្នុងដំណើរទស្សនកិច្ចផ្លូវរដ្ឋរបស់ប្រធានាធិបតីចិន លោក ស៊ី ជីនពីង មកកាន់កម្ពុជា កាលពីពាក់កណ្តាលខែមេសា ឆ្នាំ២០២៥ ប្រទេសទាំងពីរបានកំណត់និងប្រកាសជាផ្លូវការនៃការយកឆ្នាំ២០២៥ ជាឆ្នាំទេសចរណ៍កម្ពុជា-ចិន។

យោងតាម លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលកម្ពុជាបានឱ្យដឹងថា នៅព្រឹកថ្ងៃអង្គារ ទី២៤ ខែមិថុនា ឆ្នាំ២០២៥ នៅរដ្ឋលេខាធិការដ្ឋានអាកាសចរណ៍ស៊ីវិល លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុក រដ្ឋលេខាធិការដ្ឋានអាកាសចរណ៍ស៊ីវិល បានអនុញ្ញាតឱ្យគណៈប្រតិភូ ក្រុមហ៊ុន Global X Airlines ពិភាក្សាការងារ ក្នុងគោលបំណងចង់បើកក្រុមហ៊ុនអាកាសចរណ៏នៅកម្ពុជា។

ទោះយ៉ាងណាក៏ដោយ លោកពុំបានបង្ហាញព័ត៌មានលម្អិតបន្ថែមទៀត ថាតើក្រុមហ៊ុនអាកាសចរណ៍នេះនឹងធ្វើការបើកដំណើការនៅពេលណា ខណៈការប្រជុំនាព្រឹកមិញនេះគឺជាការស្វែងយល់បន្ថែមអំពីច្បាប់ និងគតិយុទ្ធនានាមុននឹងចាប់ផ្តើមអាជីវកម្មរបស់ខ្លួននៅកម្ពុជា។

យោងតាមក្រសួងទេសចរណ៍ កម្ពុជាទទួលបានភ្ញៀវទេសចរអន្តរជាតិជាតិជាង ២,៤ លាននាក់ នៅក្នុងរយៈពេល ៤ ខែ ដើមឆ្នាំ ២០២៥ (មករា-មេសា) កើនឡើង ១៣,៦% ធៀបនឹងរយៈពេលដូចគ្នាកាលពីឆ្នាំមុន។ ក្នុងចំណោមទេសចរណ៍ជាង ២,៤ លាននាក់ មានទេសចរណ៍ថៃ ជាង ៦៧ ម៉ឺននាក់ កើន ១៤,៦% វៀតណាម ៤១ ម៉ឺននាក់ ធ្លាក់ចុះ ១% ចិនជាង ៣៨ ម៉ឺននាក់ កើន ៣៨,៨% និងអាមេរិកជាង ៩ ម៉ឺននាក់ កើន ៩,៥%។

កម្ពុជារំពឹងស្វាគមន៍ភ្ញៀវទេចរអន្តជាតិប្រមាណ ៧,៥ លាននាក់នៅឆ្នាំ២០២៥ ដែលនឹងបង្កើតចំណូលចូលសេដ្ឋកិច្ចជាង៥ពាន់លានដុល្លារ៕

The post អាកាសចរណ៍ចិន Global X Airlines គ្រោងបើកដំណើការនៅកម្ពុជា appeared first on Kampuchea Thmey Daily.

គិតដល់ពេលនេះ មានប្រទេសចំនួន ១២ ភ្ជាប់ជើងហោះហើរត្រង់មកប្រទេសកម្ពុជា

Dy Bunnara — Wed, 02 Apr 2025 04:02:08 +0000

តាមរយៈអាកាសយានដ្ឋានអន្តរជាតិទាំងបីរបស់កម្ពុជា (ភ្នំពេញ សៀមរាប និងព្រះសីហនុ) មានប្រទេសចំនួន ១២ បានតភ្ជាប់ជើងហោះហើរអន្តរជាតិមកកាន់ប្រទេសកម្ពុជា។

ជើងហោះហើរអន្តរជាតិត្រូវបានពង្រឹងនិងពង្រីក ដោយទទួលបានលទ្ធផលយ៉ាងល្អប្រសើរ។ ជាក់ស្តែងការតភ្ជាប់ជើងហោះហើរជាប្រវត្តិសាស្ត្ររវាងរាជធានីភ្នំពេញ និងរដ្ឋធានីញូវដែលីប្រទេសឥណ្ឌា និងការចាប់ផ្តើមហោះហើរឡើងវិញរបស់ក្រុមហ៊ុនអាកាសចរណ៍អេមីរ៉ាត និងកាតា ដែលផ្សារភ្ជាប់ជើងហោះហើររវាងរាជធានីភ្នំពេញ និងទីក្រុងឌូបៃ និងទីក្រុងដូហា។

បើតាមមន្រ្តីអាកាសចរស៊ីវិល អាកាសយានដ្ឋានអន្តរជាតិទាំងបីរបស់កម្ពុជា (ភ្នំពេញ សៀមរាប និងព្រះសីហនុ) បានតភ្ជាប់ជើងហោះហើរអន្តរជាតិទៅកាន់ប្រទេសចំនួន ១២ ព្រមទាំងតំបន់រដ្ឋបាលពិសេសហុងកុង និងកោះតៃវ៉ាន់ ដោយគិតជាសរុបបានតភ្ជាប់ការហោះហើរទៅកាន់គោលដៅ ឬរាជធានី/ទីក្រុងចំនួន ៣៤ នៅក្នុងតំបន់ និងសកលលោក និងមានក្រុមហ៊ុនអាកាសចរណ៍ជាតិ និងអន្តរជាតិប្រតិបត្តិការសរុបចំនួន ៣១ ក្រុមហ៊ុន។

នៅឆ្នាំ ២០២៤ អ្នកដំណើរតាមផ្លូវអាកាសមកប្រទេសកម្ពុជាមានប្រមាណ ៦,២៤ លាននាក់ ដែលមានកំណើនប្រមាណ ២២% បើប្រៀបធៀបទៅនឹងរយៈពេលដូចគ្នានៅក្នុងឆ្នាំ២០២៣ ដែលមានចំនួនអ្នកដំណើរសរុបចំនួន ៥,១១ លាននាក់។

ស្របពេលដែលអាកាសយានដ្ឋានអន្តរជាតិតេជោកំពុងសាងសង់សម្រេចបានជាង ៩៥% និងគ្រោងដាក់ឲ្យដំណើរការនៅអំឡុងខែកក្កដានេះ ក៏រំពឹងនឹងមានក្រុមហ៊ុនអាកាសចរណ៍ថ្មីៗបន្ថែមទៀត នឹងពង្រីកការតភ្ជាប់ជើងហោះហើរមកប្រទេសកម្ពុជា។

បើតាមការបង្ហើបពីក្រុមហ៊ុនអភិវឌ្ឍអាកាសយានដ្ឋានអន្តរជាតិតេជោ មានក្រុមហ៊ុនអាកាសចរណ៍ថ្មីចំនួន ៣ ទៀត គ្រោងនឹងតភ្ជាប់ការហោះហើរមកព្រលានអន្តរជាតិតេជោ ដែលគ្រោងនឹងដាក់ឲ្យដំណើរការនៅពេលខាងមុខ។

អ្នកឧកញ៉ា ឆារស៍ វ៉ាន់ អភិបាលក្រុមហ៊ុន Cambodia Airport Investment បានប្រាប់អ្នកសារព័ត៌មានក្នុងដំណើរទស្សនកិច្ចអាកាសយានដ្ឋានអន្តរជាតិតេជោកាលពីពេលថ្មីៗនេះថា មានក្រុមហ៊ុនអាកាសចរណ៍ថ្មីចំនួន ៣ បន្ថែម បានប្រកាសនឹងបើកការហោះហើរមកអាកាសយានដ្ឋានអន្តរជាតិតេជោ។

ក្រុមហ៊ុនអាកាសចរណ៍ទាំង ៣ ជាក្រុមហ៊ុនថ្មីសន្លាង ដែលនឹងចាប់ផ្តើមបើកប្រតិបត្តិការភ្ជាប់ជើងហោះហើរមកកាន់អាកាសយានដ្ឋានអន្តរជាតិតេជោជាបន្តបន្ទាប់នៅឆ្នាំ ២០២៥។ នេះបើតាម អ្នកឧកញ៉ា ឆារស៍ វ៉ាន់។

ក្រុមហ៊ុនអាកាសចរណ៍ Turkish Airlines កាលពីពេលថ្មីៗនេះ ក៏បានចេញសេចក្តីប្រកាសព័ត៌មានពីគម្រោងបើកការហោះហើរពីទីក្រុងអ៊ីស្តង់ប៊ុលប្រទេសតួគី មកទីក្រុងភ្នំពេញនៅអំឡុងខែធ្នូ ឆ្នាំ២០២៥។

ក្នុងសេចក្តីប្រកាសព័ត៌មាន ក្រុមហ៊ុនអាកាសចរណ៍ Turkish Airlines បានបញ្ជាក់ថា ការតភ្ជាប់ជើងហោះហើរពីទីក្រុងអ៊ីស្តង់ប៊ុល ប្រទេសតួគី មកទីក្រុងភ្នំពេញ ក្រុមហ៊ុននឹងប្រើប្រាស់យន្តហោះខ្នាតធំប្រភេទ Airbus A330 ឬ Boeing 777។

សេចក្តីប្រកាសព័ត៌មានរបស់ក្រុមហ៊ុនក៏បានបញ្ជាក់ថា កម្ពុជាជាប្រទេសទី ៧ នៅតំបន់អាស៊ីអាគ្នេយ៍ ដែលក្រុបហ៊ុននឹងបើកប្រតិបត្តិការភ្ជាប់ការហោះហើរដោយផ្ទាល់ ខណៈក្រុមហ៊ុនមានបណ្តាញដឹកជញ្ជូនគ្របដណ្តប់ ២១ ប្រទេស និង ២០ ទីក្រុងនៅជុំវិញពិភពលោក។

កម្ពុជាបានដាក់គោលដៅទាក់ទាញអ្នកដំណើរតាមផ្លូវអាកាសឲ្យបានចំនួន ៧,៥ លាននាក់ និងទំនិញចំនួន ៨០ ពាន់តោន នៅក្នុងឆ្នាំ២០២៥។

ពាក់ព័ន្ធការអនុវត្តគោលនយោបាយបើកចំហជើងមេឃរបស់រដ្ឋាភិបាល អាកាសចរស៊ីវិលកម្ពុជាកំពុងជំរុញឱ្យមានការហោះហើរជាលក្ខណៈជួល (Charter Flights) ឲ្យកាន់តែច្រើនឡើងថែមទៀត និងសម្រួលនីតិវិធីដើម្បីគាំទ្រដល់ការរៀបចំជើងហោះហើរថ្មីៗរបស់ក្រុមហ៊ុនផ្សេងៗ ក្នុងន័យជំរុញឱ្យមានសន្ទុះរីកចម្រើនដល់ការដឹកជញ្ជូនតាមផ្លូវអាកាស ឆ្លើយតបតម្រូវការទេសចរណ៍ ធុរកិច្ច ពាណិជ្ជកម្ម និងការផ្សារភ្ជាប់ទំនាក់ទំនងសង្គម-វប្បធម៌កម្ពុជាទៅកាន់អន្តរជាតិ និងអន្តរជាតិមកកាន់កម្ពុជា៕

The post គិតដល់ពេលនេះ មានប្រទេសចំនួន ១២ ភ្ជាប់ជើងហោះហើរត្រង់មកប្រទេសកម្ពុជា appeared first on Kampuchea Thmey Daily.

អាកាសយានដ្ឋានអន្តរជាតិព្រះសីហនុ ត្រៀមធ្វើលំហាត់សមយុទ្ធដើម្បីឆ្លើយតបគ្រាអាសន្ន

Samean Lay — Wed, 05 Mar 2025 01:48:41 +0000

អាកាសយានដ្ឋានអន្តរជាតិខេត្តព្រះសីហនុ នឹងធ្វើលំហាត់សមយុទ្ធទ្រង់ទ្រាយធំ KOS EX 24 ប្រចាំឆ្នាំ២០២៤ ដើម្បីឆ្លើយតបទៅនឹងគ្រាអាសន្ននានាទាន់ពេលវលា នៅទី១២ ខែមីនា ឆ្នាំ២០២៥ ចាប់ពីម៉ោង ១៣:០០ នាទី រហូតដល់ ១៧:០០ នាទីរសៀល។

លំហាត់សមយុទ្ធនេះ នឹងមានដុតប្រេង និងកង់ឡានចាស់ៗ បង្កើតបានជាអណ្តាតភ្លើងសន្ធោសន្ធៅ នៅក្នុងបរិវេណអាកាសយានដ្ឋានអន្តរជាតិខេត្តព្រះសីហនុ ក្នុងនោះផងដែរក៏មានការចល័តរថយន្តអគ្គិភ័យ រថយន្តសង្គ្រោះ ដោយមានការចូលរួមពីអាជ្ញាធរដែនដី សាលាខេត្តព្រះសីហនុ កងកម្លាំងប្រដាប់អាវុធ មន្ទីរពេទ្យនានា ក្រុមហ៊ុនសម្បទានអាកាសយានដ្ឋាន SCA / CAMS និងក្រុមហ៊ុនចរាចរណ៍ដែនអាកាសCATS។ នេះបើយោងតាមសេចក្តីជូនដំណឹងអាកាសយានដ្ឋានអន្តរជាតិខេត្តព្រះសីហុ ចុះថ្ងៃទី ៤ ខែមីនា ឆ្នាំ ២០២៥។

អាកាសចរណ៍សុីវិលកម្ពុជា រៀបចំលំហាត់សមយុទ្ធកាលពីខែកុម្ភៈឆ្នាំ ២០២៥

ជាមួយគ្នានេះ អាកាសយានដ្ឋានអន្តរជាតិ ស្នើឱ្យពលរដ្ឋពលរដ្ឋដែលរស់នៅតំបន់ក្បែរនោះមេជ្រាបជាព័ត៌មាន និងជួយសម្រួលដល់ការចល័តរបស់រថយន្តអគ្គិភ័យ រថយន្តសង្គ្រោះ ក្នុងការធ្វើលំហាត់សមយុទ្ធខាងលើនេះ។

ដោយយោងទៅតាមច្បាប់ស្តីពីអាកាសចរណ៍នៃព្រះរាជាណាចក្រកម្ពុជា និងអង្គការអាកាសចរណ៍ស៊ីវិលអន្តរជាតិ(ICAO) រដ្ឋនីមួយៗដែលជាសមាជិក តម្រូវឱ្យធ្វើផែនការគ្រប់គ្រងគ្រោះអាសន្ន នៅអាកាសយានដ្ឋានអន្តរជាតិ (Airport Emergency plan) ហើយត្រូវធ្វើលំហាត់សមយុទ្ធទ្រង់ទ្រាយ ធំ(Full Scale Airport Emergency Exercise)រៀងរាល់ពីរឆ្នាំម្ដង ដើម្បីធានាបាននូវពេលវេលាឆ្លើយតប ការទំនាក់ទំនងសាកល្បងសមត្ថភាព និងការទទួលខុសត្រូវរបស់ស្ថាប័ននីមួយៗ៕

The post អាកាសយានដ្ឋានអន្តរជាតិព្រះសីហនុ ត្រៀមធ្វើលំហាត់សមយុទ្ធដើម្បីឆ្លើយតបគ្រាអាសន្ន appeared first on Kampuchea Thmey Daily.

អាកាសចរណ៍សុីវិលធ្វើលំហាត់សមយុទ្ធ AIRPEX-23 ដើម្បីជាបទពិសោធន៍ និងចំណេះដឹងលើការងារជួយសង្រ្គោះនៅពេលមានឧបទ្ទវហេតុធ្លាក់យន្តហោះ

Sokhom Khon — Fri, 21 Feb 2025 08:41:38 +0000

អាកាសចរណ៍សុីវិលកម្ពុជា នៅព្រឹកថ្ងៃទី២១ ខែកុម្ភៈ ឆ្នាំ២០២៥ នេះ បានរៀបចំលំហាត់សមយុទ្ធទ្រង់ទ្រាយធំ AIRPEX-23 ដើម្បីជាបទពិសោធន៍ និងចំណេះដឹងលើការងារជួយសង្រ្គោះជនរងគ្រោះនៅពេលមានឧបទ្ទវហេតុធ្លាក់យន្តហោះកេីតឡេីង។

គេសង្កេតឃើញថា ក្នុងសកម្មភាពលំហាត់មានការដុតប្រេង និងកង់ឡានចាស់ៗ បង្កើតបានជាអណ្តាតភ្លើងសន្ធោសន្ធៅ (ជាសិប្បនិម្មិតនៃការធ្លាក់យន្តហោះ) នៅក្នុងបរិវេណអាកាសយានដ្ឋានអន្តរជាតិភ្នំពេញ ក្នុងនោះក៏មានការចល័តរថយន្តអគ្គិភ័យ រថយន្តសង្គ្រោះ ដោយមានការចូលរួមពីអាជ្ញាធរដែនដីសាលារាជធានីភ្នំពេញ កងកម្លាំងប្រដាប់អាវុធ មន្ទីរពេទ្យនានា ក្រុមហ៊ុនសម្បទានអាកាសយានដ្ឋាន SCA/CAMS និងក្រុមហ៊ុនចរាចរណ៍ដែនអាកាស CATS ។

រដ្ឋលេខាធិការដ្ឋានអាកាសចរណ៍ស៊ីវិល បានបញ្ជាក់ថា លំហាត់សមយុទ្ធនេះ រៀបចំឡើងដើម្បីជាបទពិសោធន៍ និងចំណេះដឹងដល់ស្ថាប័ន ភ្នាក់ងារពាក់ព័ន្ធនានាលើការងារជួយសង្គ្រោះជនរងគ្រោះនៅពេលមានឧបទ្ទវហេតុគ្រោះថ្នាក់ធ្លាក់យន្តហោះដែលអាចកើតមានជាយថាហេតុ។

គួរបញ្ជាក់ថា លំហាត់សមយុទ្ធទ្រង់ទ្រាយធំ AIRPEX-23 នេះ រៀបចំឡើងដើម្បីជាបទពិសោធន៍ និងចំណេះដឹងដល់ស្ថាប័ន ភ្នាក់ងារពាក់ព័ន្ធនានា លើការងារជួយសង្គ្រោះជនរងគ្រោះ នៅពេលមានឧបទ្ទវហេតុគ្រោះថ្នាក់ធ្លាក់យន្តហោះដែលអាចកើតមានជាយថាហេតុ។ ការធ្វើលំហាត់សមយុទ្ធនេះ ក៏នឹងមានការប្រកាសអាសន្នដល់អាជ្ញាធរដែនដី កងកម្លាំងប្រដាប់ អាវុធ ក្រុមរថយន្តសង្គ្រោះបន្ទាន់នៅតាមមន្ទីរពេទ្យនានា និងក្រុមពន្លត់អគ្គិភ័យដែលមានទីតាំងនៅក្នុងរាជធានី ភ្នំពេញផងដែរ ក្នុងនោះនឹងមានការដុតប្រេង និងកង់ឡានចាស់ៗ ដើម្បីបង្កើតបានជាអណ្តាតភ្លើង និងផ្សែងខ្មួលខ្មាញ់ (ជាសិប្បនិម្មិតនៃការធ្លាក់យន្តហោះ) ដែលជាប្រធានបទក្នុងការធ្វើលំហាត់សមយុទ្ធនេះ៕

អត្ថបទ៖ សុខា

The post អាកាសចរណ៍សុីវិលធ្វើលំហាត់សមយុទ្ធ AIRPEX-23 ដើម្បីជាបទពិសោធន៍ និងចំណេះដឹងលើការងារជួយសង្រ្គោះនៅពេលមានឧបទ្ទវហេតុធ្លាក់យន្តហោះ appeared first on Kampuchea Thmey Daily.