អាកាសយានដ្ឋានអន្តរជាតិសៀមរាបអង្គរ Archives - Kampuchea Thmey Daily

អាកាសយានដ្ឋានអន្តរជាតិសៀមរាប-អង្គរ ទទួលបានជើងហោះហើរដំបូង របស់ក្រុមហ៊ុនអាកាសចរណ៍ Firefly ពីទីក្រុងគូឡាឡាំពួ

អ៊ិន ពិសី — Thu, 27 Nov 2025 09:50:32 +0000

នៅថ្ងៃទី ២៧ ខែវិច្ឆិកា ឆ្នាំ ២០២៥ នេះ អាកាសយានដ្ឋានអន្តរជាតិសៀមរាប-អង្គរ ទទួលបានជើងហោះហើរដំបូងរបស់ក្រុមហ៊ុនអាកាសចរណ៍ Firefly ពីទីក្រុងគូឡាឡាំពួ មកកាន់ខេត្តសៀមរាប ដោយការចុះចតជោគជ័យ ជាមួយអ្នកដំណើរចំនួន ១៥៧ នាក់ ហើយក្រុមហ៊ុនអាកាសចរណ៍មួយនេះ នឹងបន្តចុះចតនៅអាកាសយានដ្ឋានអន្តរជាតិសៀមរាប-អង្គរ ក្នុងមួយសប្ដាហ៍ ៣ ជើង ជាប្រភេទយន្តហោះ Boeing 737-800 (B738)។

ក្រុមអ្នកដំណើរដែលបានដល់អាកាសយានដ្ឋានអន្តរជាតិសៀមរាប-អង្គរ បានលើកឡើងថា ពួកគាត់បានធ្វើដំណើរមកដល់ដោយសុវត្ថិភាព និងភាពរីករាយ ដែលបានមកដល់ខេត្តសៀមរាបអង្គរ។ តាមរយៈការធ្វើដំណើរឆ្លងកាត់អាកាសយានដ្ឋានមួយនេះ មានភាពស្រស់ស្អាត អមដោយទេសភាពស្រស់បំព្រង ជាពិសេសពួកគាត់ចង់ឃើញប្រាសាទអង្គរវត្ត ដែលជាក្ដីប៉ងប្រាថ្នាជាយូរមកហើយ។

ជាមួយគ្នានោះ ពួកគាត់មកដល់ខេត្តសៀមរាប មិនមានការព្រួយបារម្ភពីបញ្ហាអសន្តិសុខនោះឡើយ បើទោះបីកម្ពុជាមានជម្លោះព្រំដែនជាមួយប្រទេសជិតខាងក្ដី។ ពេលត្រឡប់ទៅកាន់ស្រុកកំណើតវិញ ពួកគាត់ នឹងនាំសារនៅកន្លែងទេសចរណ៍ស្អាតទៅកាន់ប្រទេសរបស់ខ្លួន ដើម្បីឱ្យគ្រួសារពួកគាត់មកលេងខេត្តសៀមរាបផងដែរ។

បើតាមអាជ្ញាធរខេត្ត ជើងហោះហើររបស់ក្រុមហ៊ុនអាកាសចរណ៍ Firefly នេះ នឹងរំពឹងថា មានការកើនឡើងនូវភ្ញៀវទេសចរមកកាន់ខេត្តសៀមរាប ជាបន្តបន្ទាប់ ហើយសង្ឃឹមថា ប្រតិបត្តិករទេសចរណ៍ ធ្វើយ៉ាងណាត្រៀមលក្ខណៈឱ្យបានល្អសម្រាប់ទទួលបដិសណ្ឋារកិច្ចអ្នកទេសចរមកពីជុំវិញពិភពលោក មកកាន់ប្រទេសកម្ពុជា ជាពិសេសខេត្តសៀមរាបផ្ទាល់៕

អត្ថបទ ៖ គឿនវេត

The post អាកាសយានដ្ឋានអន្តរជាតិសៀមរាប-អង្គរ ទទួលបានជើងហោះហើរដំបូង របស់ក្រុមហ៊ុនអាកាសចរណ៍ Firefly ពីទីក្រុងគូឡាឡាំពួ appeared first on Kampuchea Thmey Daily.

‎អាកាសយានដ្ឋានអន្តរជាតិសៀមរាប-អង្គរ ទទួលបានជើងហោះហើរលើកដំបូងពីក្រុមហ៊ុនអាកាសចរណ៍ឥណ្ឌា IndiGo

អ៊ិន ពិសី — Fri, 14 Nov 2025 02:48:21 +0000

‎យន្តហោះរបស់ក្រុមហ៊ុនអាកាសចរណ៍ IndiGo នៃប្រទេសឥណ្ឌា លើកដំបូង បានហោះហើរតភ្ជាប់ ពីប្រទេសឥណ្ឌា មកកាន់ប្រទេសកម្ពុជា ដែលធ្វើការចុះចតដោយសុវត្ថិភាព នៅអាកាសយានដ្ឋានសៀមរាប-អង្គរ កាលពីថ្ងៃទី ១៣ ខែវិច្ឆិកា ឆ្នាំ ២០២៥ ម្សិលមិញ។

លោក ស៊ីន សិរីវុត្ថា រដ្ឋលេខាធិការ និងជាអ្នកនាំពាក្យ រដ្ឋលេខាធិការដ្ឋានអាកាសចរណ៍ស៊ីវិល មានប្រសាសន៍ថា ក្រុមហ៊ុនអាកាសចរណ៍ឥណ្ឌា IndiGo ចុះចតនៅអាកាសយានដ្ឋានអន្តរជាតិសៀមរាប-អង្គរ ជាសញ្ញាណមួយដ៏ល្អបំផុតក្នុងការតភ្ជាប់ជើងហោះហើររវាងប្រទេសកម្ពុជា និងឥណ្ឌា ខណៈក្រុមហ៊ុនអាកាសចរណ៍មួយនេះ មានយន្តហោះជាង ៤០០ គ្រឿង បានហោះហើរនៅលើពិភពលោក និងមានភាពលេចធ្លោជាងគេនៅប្រទេសឥណ្ឌា។

លោកបន្តថា ជើងហោះហើរដំបូងនេះ ជាយន្តហោះអ៊ែបឹសហ្វាម៉ាលី 320-321 នឹងធ្វើការហោះហើរបីជើងក្នុងមួយសប្ដាហ៍ ក្នុងតំបន់ទេសចរណ៍ទឹកដីសៀមរាបអង្គរ ប្រទេសកម្ពុជា។ ការចុះចតលើកដំបូងជាប្រវត្តិសាស្ត្រនេះ មានអ្នកដំណើរជិត ១៣០ នាក់ និងត្រឡប់ទៅវិញមានអ្នកទេសចរជាង ៦០ នាក់ ដែលត្រូវបានស្វាគមន៍យ៉ាងអធិកអធមពីគណៈប្រតិភូកម្ពុជា។

លោកបន្តទៀតថា ប្រទេសឥណ្ឌា កំពុងក្លាយជាទីផ្សារយុទ្ធសាស្ត្រដ៏សំខាន់មួយសម្រាប់ប្រទេសកម្ពុជា ដូច្នេះហើយការពង្រីកការហោះហើររបស់ក្រុមហ៊ុនអាកាសចរណ៍មួយនេះ នឹងជួយជំរុញទាំងវិស័យទេសចរណ៍ និងពាណិជ្ជកម្ម បានកាន់តែរីកចម្រើន។ ផ្លូវហោះហើរថ្មីនេះ នឹងធ្វើឱ្យទំនាក់ទំនងទ្វេភាគីកាន់តែមានភាពស៊ីជម្រៅ ក៏ដូចជាជួយជំរុញកំណើនសេដ្ឋកិច្ចរបស់ប្រទេសទាំងពីរផងដែរ។

លោក ង៉ូវ សេងកាក់ អភិបាលរងខេត្តសៀមរាប បានបង្ហាញថា ជើងហោះហើរជាលក្ខណៈអន្តរជាតិ ដែលចុះចតនៅអាកាសយានដ្ឋានអន្តរជាតិសៀមរាប អង្គរ មានចន្លោះចាប់ពី ២២ ជើង ទៅ ២៣ ជើង ក្នុងមួយថ្ងៃ ហើយមានភ្ញៀវទេសចរអន្តរជាតិប្រមាណពី ២ ០០០ នាក់ ទៅ ៣ ០០០ នាក់។

លោករំពឹងថា ជើងហោះហើររបស់ក្រុមហ៊ុនអាកាសចរណ៍នេះ នឹងមានការកើនឡើងនូវភ្ញៀវទេសចរមកកាន់ខេត្តសៀមរាបជាបន្តបន្ទាប់ ហើយលោកក៏ណែនាំដល់ប្រត្ដិបត្ដិករទេសចរណ៍ ត្រូវធ្វើយ៉ាងណាត្រៀមលក្ខណៈឱ្យបានល្អសម្រាប់ទទួលបដិសណ្ឋារកិច្ចអ្នកទេសចរមកពីជុំវិញពិភពលោក៕

អត្ថបទ ៖ គឿនវេត

The post ‎អាកាសយានដ្ឋានអន្តរជាតិសៀមរាប-អង្គរ ទទួលបានជើងហោះហើរលើកដំបូងពីក្រុមហ៊ុនអាកាសចរណ៍ឥណ្ឌា IndiGo appeared first on Kampuchea Thmey Daily.

ក្រុមហ៊ុនកាសចរណ៍ Indigo តភ្ជាប់ជើងហោះហើរមកកម្ពុជា នឹងជំរុញលំហូរទេសចរណ៍ និងពាណិជ្ជកម្ម

deth leng — Wed, 12 Nov 2025 09:15:16 +0000

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យ នៃរដ្ឋលេខាធិការដ្ឋានអាកាសចរណ៍ស៊ីវិលមានប្រសាសន៍ថា ការតភ្ជាប់ផ្លូវហោះហើរថ្មីរបស់ក្រុមហ៊ុនអាកាសចរណ៍ឥណ្ឌា Indigo (6E) ពីទីក្រុង Kolkata មកខេត្តសៀមរាប មិនត្រឹមតែបង្កើនការតភ្ជាប់អន្តរជាតិនៅក្រុង Kolkata ប៉ុណ្ណោះទេ ប៉ុន្តែថែម ទាំងផ្តល់នូវការតភ្ជាប់ងាយស្រួលពីតំបន់ផ្សេងៗនៃប្រទេសឥណ្ឌាមកកាន់ប្រទេសកម្ពុជា។

លោក ជា អូន រដ្ឋលេខាធិការប្រចាំការ តំណាងលោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល នៅថ្ងៃទី ១៣ ខែវិច្ឆិកា ឆ្នាំ ២០២៥ នឹងអញ្ជើញជាអធិបតី ក្នុងពិធីសម្ពោធជើងហោះហើរត្រង់ទី១ របស់ក្រុមហ៊ុនអាកាសចរណ៍ Indigo សម្រាប់ការតភ្ជាប់ជើងហោះហើរលើដំណាក់ផ្លូវ Kolkata-Siem Reap នៅអាកាសយានដ្ឋានអន្តរជាតិសៀមរាបអង្គរ, ដោយមានការចូលរួមពីតំណាងថ្នាក់ដឹកនាំរបស់ក្រសួងទេសចរណ៍, លោក Pieter Elbers នាយកប្រតិបត្តិក្រុមហ៊ុន IndiGo, ក្រុមហ៊ុនវិនិយោគអាកាសយានដ្ឋាន CAIC និងភ្នាក់ងារទេសចរណ៍ប្រមាណ ១០០ នាក់។

នេះជាផ្លែផ្កាថ្មីមួយទៀត ក្រោមការដឹកនាំតម្រង់ទិសរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងកិច្ចខិតខំប្រឹងប្រែងរបស់រដ្ឋលេខាធិការដ្ឋានអាកាសចរណ៍ស៊ីវិល និងក្រសួងស្ថាប័នពាក់ព័ន្ធ ដោយគួបផ្សំជាមួយចំណងការទូតដ៏ជិតស្និទ្ធរវាងរាជរដ្ឋាភិបាលកម្ពុជា និងសាធារណរដ្ឋឥណ្ឌា។

ក្រុមហ៊ុនអាកាសចរណ៍ Indigo មានជើងហោះហើរត្រង់រវាង Kolkata-សៀមរាប ចំនួន ៣ ជើងក្នុងមួយសប្តាហ៍ ពោលគឺរៀងរាល់ថ្ងៃចន្ទ ព្រហស្បតិ៍ និងសៅរ៍ ដោយប្រើយន្តហោះ ប្រភេទ Airbus A320neo។

ដោយឡែក ក្រុមហ៊ុនអាកាសចរណ៍ជាតិ Air Cambodia ក៏មានជើងហោះហើររវាង ភ្នំពេញ-New Delhi នៃប្រទេសឥណ្ឌា ចំនួន ២ ជើងក្នងមួយសប្តាហ៍ ពោលគឺរៀងរាល់ថ្ងៃអង្គារ និងសៅរ៍។

កន្លងមក ក្រុមហ៊ុនអាកាសចរណ៍ឈានមុខរបស់ប្រទេសឥណ្ឌា Indigo មួយនេះ ត្រៀមនឹង បើកការហោះហើរត្រង់ពីទីក្រុងញូវដេលី មកសៀមរាប និងពីប៉ុមបៃ មកសៀមរាបចំនួន ២ លើកមកហើយ តែដោយសារកត្តាស្ថានភាពសេដ្ឋកិច្ចសកល ទីផ្សារហោះហើររវាងកម្ពុជា-ឥណ្ឌា ហាក់មិនទាន់ល្អប្រសើរនោះ ដោយសប្តាហ៍ខ្លះមានការហោះហើរចំនួន ៤ជើង ខ្លះទៀតចុះមកនៅត្រឹម ៣ជើង ឬ ២ជើងប៉ុណ្ណោះ ទើបធ្វើឱ្យការបើកការហោះហើរត្រង់ត្រូវពន្យា។

បើតាមលោក ស៊ីន ចាន់សិរីវុត្ថា ទីតាំងយុទ្ធសាស្ត្ររបស់ទីក្រុង Kolkata និងសៀមរាបជាទិសដៅទេសចរណ៍អន្តរជាតិក្រៅប្រទេសទី៧ ផ្លូវហោះហើរត្រង់នេះគឺសមស្របយ៉ាងល្អសម្រាប់ការតភ្ជាប់ រួមជាមួយតម្រូវការដំណើរកម្សាន្តកើនឡើងរវាងប្រទេសទាំងពីរ ការធ្វើទិដ្ឋាការមានភាពងាយស្រួល និងពាណិជ្ជកម្មកំពុងរីកចម្រើន។

លោកមានទំនុកចិត្តថា សេវាហោះហើរថ្មីនេះ នឹងជួយលើកកម្ពស់វិស័យទេសចរណ៍ និងបើកឱកាសថ្មីៗសម្រាប់ការផ្លាស់ប្តូរវប្បធម៌ និងសហប្រតិបត្តិការសេដ្ឋកិច្ចរវាងប្រទេសទាំងពីរ ក៏ដូចជាពង្រីកជើងមេឃកម្ពុជាឱ្យកាន់តែទូលាយ ពង្រឹងនូវចំណងការទូតរវាងរាជរដ្ឋាភិបាលកម្ពុជា និងសាធារណរដ្ឋឥណ្ឌាឱ្យកាន់តែជិតស្និទ្ធ បង្កើតលំហូរចូលដល់សេដ្ឋកិច្ចបេតិកភណ្ឌរបស់ខេត្តសៀមរាប ក្រោមក្របខណ្ឌដឹកជញ្ជូនផ្លូវអាកាសអាស៊ាន-ឥណ្ឌាកាន់តែទូលំទូលាយ និងការតភ្ជាប់គំនិតផ្តួចផ្តើមខ្សែក្រវាត់ និងផ្លូវ (BRI) ដើម្បីពង្រីកច្រកផ្លូវក្នុងតំបន់ និងជំរុញលំហូរទេសចរណ៍ ពាណិជ្ជកម្ម និងការធ្វើដំណើរក្នុងប្រទេស៕

អត្ថបទ៖ ឡេង ដេត

The post ក្រុមហ៊ុនកាសចរណ៍ Indigo តភ្ជាប់ជើងហោះហើរមកកម្ពុជា នឹងជំរុញលំហូរទេសចរណ៍ និងពាណិជ្ជកម្ម appeared first on Kampuchea Thmey Daily.

រូបសំណាក អ្នកប្រាជ្ញខ្មែរសម័យអង្គរ និងលោក ជីវ តាក្វាន់ រំលេចនៅព្រលានយន្តហោះសៀមរាប

deth leng — Thu, 16 Oct 2025 03:19:19 +0000

កម្ពុជាប្រារព្ធខួប២ឆ្នាំ នៃការបើកដំណើរការជាផ្លូវការអាកាសយានដ្ឋានអន្តរជាតិសៀមរាបអង្គរ (SAI) នៅខេត្ត សៀមរាបនៅថ្ងៃទី ១៦ ខែតុលា ឆ្នាំ ២០២៥ ក្រោមវត្តមានលោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល។

ទន្ទឹមនឹងការប្រារព្វខួប២ឆ្នាំនេះ ក៏មានពិធីសម្ពោធរូបសំណាក «ព្រះរាជគ្រូទិវាករបណ្ឌិត» និងរូបសំណាក លោក «ជីវ តាក្វាន់» នៅអាកាសយានដ្ឋានអន្តរជាតិសៀមរាបអង្គរ។ នេះបើតាមការបញ្ជាក់របស់លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរស៊ីវិល។

ការប្រាព្ធខួប២ឆ្នាំនេះ គឺជាឱកាសដើម្បីអបអរសាទរខួបលើកទី៦៧ នៃការបង្កើតទំនាក់ទំនងការទូតរវាងកម្ពុជា-ចិន ជាទំនាក់ទំនងវប្បធម៌យ៉ាងទូលំទូលាយ រវាងប្រទេសទាំងពីរ និងដើម្បីលើកកម្ពស់ពីប្រវត្តិ នៃការផ្លាស់ប្តូរគ្នានូវទំនាក់ទំនងវប្បធម៌ និងការទូតជាង២០០០ឆ្នាំកន្លងមក។

ការតម្លើងរូបសំណាក «ព្រះរាជគ្រូទិវាករបណ្ឌិត» និងរូបសំណាកលោក «ជីវ តាក្វាន់» ជាគំនិតផ្តួចផ្តើមរបស់រដ្ឋលេខាធិការដ្ឋានអាកាសចរណ៍ស៊ីវិល ដោយបានទទួល កិច្ចសហការយ៉ាងជិតស្និទ្ធពីក្រសួងវប្បធម៌ និងវិចិត្រសិល្បៈ និងក្រុមហ៊ុន អង្គរ អ៊ិនធើណេសិនណល អ៊ែរផត អ៊ិនវេសមិន (ខេមបូឌា) ឯ.ក (AIAI) ដើម្បីអបអរសាទរគម្រប់ខួប២ឆ្នាំ នៃការបើកដំណើរការជាផ្លូវការ អាកាសយានដ្ឋានអន្តរជាតិសៀមរាបអង្គរ។

ការកំណត់ចម្លាក់ និងព័ត៌មានលម្អិតនានាអំពី «ព្រះរាជគ្រូទិវាករបណ្ឌិត» ត្រូវបានដកស្រង់ និងសម្រួលចេញពីសៀវភៅ “កវីបណ្ឌិតសម័យអង្គរ៖ ប្រវត្តិ និងស្នាដៃ” ដែលនឹងធ្វើការបោះពុម្ពផ្សាយនាពេលឆាប់ៗខាងមុខ ជារបកគំហើញស្រាវជ្រាវ និងដឹកនាំដោយមហាវិទ្យាល័យសង្គមសាស្រ្ត និងមនុស្សសាស្រ្ត នៃសាកលវិទ្យាល័យភូមិន្ទភ្នំពេញ។

«ព្រះរាជគ្រូទិវាករបណ្ឌិត» ជាតួអង្គដ៏សំខាន់មួយ នៅក្នុងប្រវត្តិសាស្រ្តនាសម័យអង្គរ មានចំណេះវិជ្ជាខ្ពង់ខ្ពស់ ដោយបានបម្រើព្រះមហាក្សត្ររហូតដល់ ៥ ព្រះអង្គ ហើយចុងក្រោយ គឺក្នុងរាជ្យព្រះបាទសូរ្យវរ័្មនទី២
(សូយ៌វម៌ទី២)។

នៅដើមសតវត្សទី១២ ក្នុងរាជ្យនោះ «ព្រះរាជគ្រូទិវាករបណ្ឌិត» បានផ្ដួចផ្ដើមគំនិតក្នុងការសាងសង់ ប្រាសាទអង្គរវត្ត ដែលជាស្ថាបត្យកម្មឯកដ៏ស្កឹមស្កៃ និងល្បីល្បាញជុំវិញពិភពលោក។

ចំណែកលោក «ជីវ តាក្វាន់» ជាបេសកទូតចិន និងជាឥស្សរជនប្រវត្តិសាស្ត្រ ដែលបានមកទស្សនកិច្ចនៅប្រទេសកម្ពុជានាចុងសម័យអង្គរ (ពីឆ្នាំ១២៩៦ – ឆ្នាំ១២៩៧)។

លោក «ជីវ តាក្វាន់» ជាជនបរទេសម្នាក់ដែលបានឃើញប្រាសាទអង្គរវត្តជាលើកដំបូង និងបានចូលរួមចំណែកយ៉ាងសំខាន់ ក្នុងការសរសេររៀបរាប់លម្អិតអំពីកំណត់ត្រា «ប្រពៃណីនៃអ្នកស្រុកចេនឡា» ជាឯកសារដ៏សំខាន់ ក្នុងការសិក្សាអំពីទំនៀមទម្លាប់ និងប្រវត្តិសាស្ត្ររបស់ប្រទេសកម្ពុជា។

រូបសំណាក «ព្រះរាជគ្រូទិវាករបណ្ឌិត» និងរូបសំណាកលោក «ជីវ តាក្វាន់» ជានិមិត្តរូបនៃស្ពានសាមគ្គីសហ ប្រតិបត្តិការសំខាន់មួយ សម្រាប់ការតភ្ជាប់ព្រះរាជាណាចក្រកម្ពុជា ទៅកាន់ពិភពលោកកាន់តែទូលំទូលាយ។ យើងក៏រំពឹងទុកថា អាកាសយានដ្ឋានអន្តរជាតិសៀមរាបអង្គរ (SAI) នឹងបន្តមានកំណើនជើងហោះហើរ អ្នកដំណើរ និងក្រុមហ៊ុនអាកាសចរណ៍ កើនឡើងជាលំដាប់នាពេលខាងមុខ៕

The post រូបសំណាក អ្នកប្រាជ្ញខ្មែរសម័យអង្គរ និងលោក ជីវ តាក្វាន់ រំលេចនៅព្រលានយន្តហោះសៀមរាប appeared first on Kampuchea Thmey Daily.

ប្រៀបធៀបព្រលានយន្តហោះថ្មីនៅសៀមរាប និងតេជោ សមត្ថភាពខុសគ្នាយ៉ាងណា?

Dy Bunnara — Fri, 12 Sep 2025 03:34:22 +0000

អាកាសយានដ្ឋានអន្តរជាតិចំនួនពីររបស់កម្ពុជាបានដាក់ឲ្យដំណើរការព្រមគ្នា ដែលជាការបើកជើងមេឃថ្មីបន្ថែមរបស់ប្រទេសកម្ពុជាក្នុងការភ្ជាប់ការធ្វើដំណើរទៅកាន់ពិភពលោក។

អាកាសយានដ្ឋានអន្តរជាតិខេត្តសៀមរាប បានសម្ពោធដាក់ឲ្យដំណើរការនៅឆ្នាំ ២០២៣ ស្របពេលដែលអាកាសយានដ្ឋានអន្តរជាតិតេជោ បានបើកឲ្យដំណើរការសាកល្បងកាលពីថ្ងៃ ០៩ ខែកញ្ញាឆ្នាំ ២០២៥ ដែលអាចនាំការធ្វើដំណើរពីគ្រប់ទ្វីបនៃពិភពលោកតភ្ជាប់មករាជធានីជាបេះដូងនៃប្រទេសកម្ពុជា។

ការដាក់ឲ្យដំណើរការអាកាសយានដ្ឋានទាំងពីរជាសមិទ្ធផលបង្ហាញពីភាពរីកចម្រើននៃវិស័យអាកាសចរណ៍របស់ប្រទេសកម្ពុជា និងជាមោទនភាពសម្រាប់ពលរដ្ឋខ្មែរគ្រប់រូប។

ស្របពេលដែលព្រលានថ្មីទាំងពីរនេះ បានដាក់ឲ្យប្រតិបត្តិការទទួលជើងហោះហើរពីជុំវិញពិភពលោក តើព្រលានទាំងពីរមានសមត្ថភាពខុសគ្នាយ៉ាងណា?

អាកាសយានដ្ឋានអន្តរជាតិសៀមរាបអង្គរ៖

-អាកាសយានដ្ឋានអន្តរជាតិសៀមរាបអង្គរ ត្រូវបានអភិវឌ្ឍនៅលើផ្ទៃដីទំហំ ៧០០ ហិកតា ដោយក្រុមហ៊ុន AIAI ក្រោមទុនវិនិយោគប្រមាណ ១ ១០០ លានដុល្លារ
-អាកាសយានដ្ឋានអន្តរជាតិសៀមរាបអង្គរ មានទីតាំងស្ថិតនៅក្នុងភូមិសាស្ត្រ ឃុំតាយ៉ែក ស្រុកសូទ្រនិគម និង ឃុំគោកធ្លកលើ ស្រុកជីក្រែង ខេត្តសៀមរាប ចម្ងាយប្រមាណជាង ៤០ គីឡូម៉ែត្រពីរមណីយដ្ឋានអង្គរ និងប្រមាណ ៥០ គីឡូម៉ែត្រពីទីប្រជុំជនក្រុងសៀមរាប
-អាកាសយានដ្ឋានអន្តរជាតិសៀមរាបអង្គរ ជាប្រភេទអាកាសយានដ្ឋានអន្តរជាតិខ្នាត ៤អី (4E) និងមានគម្រោងអភិវឌ្ឍទៅលំដាប់ថ្នាក់ ៤ អេហ្វ (4F) នៅដំណាក់កាលទី២
-អាកាសយានដ្ឋាននេះ បានចាប់ផ្ដើមសាងសង់កាលពីខែមីនា ឆ្នាំ២០២០ និងសម្ពោធឱ្យប្រើប្រាស់ជាផ្លូវការក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជានៅថ្ងៃទី១៦ ខែវិច្ឆិកា ឆ្នាំ២០២៣
>អាកាសយានដ្ឋានអន្តរជាតិសៀមរាបអង្គរ (SAI) មាន៖
-សមត្ថភាពអាចទទួលយន្តហោះរហូតដល់កូដអី (Code E: A-340-300, A350-900 and B777- 200/ 300ER, B747-300/400) និងមានចំណតយន្តហោះចំនួន ៣៨
-សមត្ថភាពអាចទទួលបានអ្នកដំណើរប្រចាំឆ្នាំរយៈពេលខ្លី-មធ្យម ៧ លាននាក់/ឆ្នាំ និងរយៈពេលវែង ២០ លាននាក់/ឆ្នាំ
-សមត្ថភាពអាចទទួលបានទំនិញប្រចាំឆ្នាំរយៈពេលខ្លី-មធ្យម ១០,០០០តោន/ឆ្នាំ និងរយៈពេលវែង ៦០,០០០តោន/ឆ្នាំ
-មន្ត្រី បុគ្កលិក សមត្ថកិច្ចចម្រុះពាក់ព័ន្ធចំនួន ១ ០៣៣ នាក់ (រដ្ឋ និងឯកជន) កំពុងបម្រើការនៅក្នុងអាកាសយានដ្ឋាននេះ

អាកាសយានដ្ឋានអន្តរជាតិតេជោ៖

-អាកាសយានដ្ឋានអន្តរជាតិតេជោ ត្រូវបានអភិវឌ្ឍនៅលើផ្ទៃដីទំហំ ២ ៦០០ ហិកតា ដោយក្រុមហ៊ុន OCIC ក្រោមទុនវិនិយោគប្រមាណ ១ ៥០០ លានដុល្លារ
-អាកាសយានដ្ឋានអន្តរជាតិតេជោ មានភូមិសាស្ត្រនៅក្នុងខេត្តកណ្តាល និងខេត្តតាកែវ មានចម្ងាយជាង ២០ គីឡូម៉ែត្រពីរាជធានីភ្នំពេញ។
-អាកាសយានដ្ឋានអន្តរជាតិតេជោ ត្រូវបានអភិវឌ្ឍជាអាកាសយានដ្ឋានលំដាប់ 4F
-អាកាសយានដ្ឋានតេជោ បានចាប់ផ្ដើមដំណើរការសាងសង់នៅឆ្នាំ ២០១៩ និងដាក់ឲ្យដំណើរការសាកល្បងនៅថ្ងៃ ០៩ ខែកញ្ញា ឆ្នាំ ២០២៥ និងគ្រោងសម្ពោធដាក់ឱ្យប្រើប្រាស់ជាផ្លូវការនៅថ្ងៃទី២០ ខែតុលា ឆ្នាំ២០២៥ ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា
>អាកាសយានដ្ឋានអន្តរជាតិតេជោ (KTI) បច្ចុប្បន្នមាន៖
-សមត្ថភាពអាចទទួលបានយន្តហោះខ្នាតធំៗដូចជា Airbus A380-800 និង យន្តហោះ Boeing 747-800 ចុះចតបាន
-សមត្ថភាពអាចទទួលបានអ្នកដំណើរ ១៣ លាននាក់/ឆ្នាំ នៅដំណាក់កាលទី ១ និង ៣០ លាននាក់ នៅដំណាក់កាលទី ២ និង ៥០ លាននាក់នៅដំណាក់កាលពី ៣
-សមត្ថភាពអាចទទួលបានទំនិញប្រចាំឆ្នាំបបានប្រមាណ ២៦ ០០០តោន/ឆ្នាំ
-មន្ត្រី បុគ្កលិក សមត្ថកិច្ចចម្រុះពាក់ព័ន្ធប្រមាណ ១ ០០០ នាក់ (រដ្ឋ និងឯកជន) បម្រើការនៅក្នុងអាកាសយានដ្ឋានថ្មីនេះ

ក្នុងការដាក់ឲ្យដំណើរការអាកាសយានដ្ឋានអន្តរជាតិតេជោនៅព្រឹកថ្ងៃទី៩ ខែកញ្ញា ឆ្នាំ២០២៥ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបង្ហោះសារអបអរសាទរអាកាសយានដ្ឋានអន្តរជាតិភ្នំពេញតេជោ ដែលបានចាប់ផ្តើមដំណើរការបម្រើសេវាកម្មហោះហើរជូនភ្ញៀវជាតិ និងអន្តរជាតិ។

ប្រមុខរដ្ឋាភិបាលបានហៅការដាក់ឲ្យដំណើរការអាកាសយានដ្ឋានអន្តរជាតិតេជោដែលជាសមិទ្ធផលប្រវត្ដិសាស្ដ្ររបស់់កម្ពុជាថា ជាតភ្ជាប់ជើងមេឃកម្ពុជាទៅកាន់ពិភពលោកកាន់តែធំនិងទូលាយជាងមុន។

សម្តេចនាយករដ្ឋមន្ត្រីលើកឡើងថា វិស័យអាកាសចរគឺជាមធ្យោបាយធ្វើដំណើរដឹកជញ្ជូនមួយ ក្នុងចំណោមមធ្យោបាយជាច្រើន ដែលអាចភ្ជាប់ទំនាក់ទំនងរបស់អ្នកទេសចរណ៍ ធុរកិច្ច នយោបាយ និងបេសកកម្មពហុបំណង និងជាប្រភពសេដ្ឋកិច្ចយ៉ាងសំខាន់សម្រាប់ប្រទេស ពិសេសឈរលើគោលនយោបាយ យ៉ាងជាក់លាក់ក្នុងការទាក់ទាញការវិនិយោគ ទំនាក់ទំនង កាទូត និងគោលដៅផ្សេងៗរាប់មិនអស់។

អាស្រ័យហេតុនេះ កម្ពុជា ក៏បានពង្រឹងនិងពង្រីកខ្លួនយ៉ាងសកម្មក្នុងការកសាងអាកាសយានដ្ឋានកម្រិតអន្តរជាតិនេះ ដើម្បីចូលរួមចំណែកក្នុងការបម្រើដល់សេចក្តីត្រូវការ កំណើននៃការធ្វើដំណើរ តភ្ជាប់ទំនាក់ទំនងយ៉ាងសកម្មរបស់អ្នកដំណើរ ពិសេសការតម្រង់គោលដៅមកកាន់កម្ពុជា៕

The post ប្រៀបធៀបព្រលានយន្តហោះថ្មីនៅសៀមរាប និងតេជោ សមត្ថភាពខុសគ្នាយ៉ាងណា? appeared first on Kampuchea Thmey Daily.

ទីក្រុងធំៗចំនួនពីររបស់ចិន មានជើងហោះហើរតភ្ជាប់ត្រង់មកអាកាសយានដ្ឋានខេត្តសៀមរាប

Dy Bunnara — Fri, 08 Aug 2025 03:22:11 +0000

ទីក្រុងធំៗចំនួនពីររបស់ចិន បច្ចុប្បន្នមានជើងហោះហើរតភ្ជាប់គោលដៅមកខេត្តសៀមរាប។ នេះបើតាមការឲ្យដឹងពីមន្រ្តីអាកាសយានដ្ឋានសៀមរាបអង្គរ។

លោក យឹម សានីរាន មន្រ្តីសម្របសម្រួលនៅអាកាសយានដ្ឋានសៀមរាបអង្គរបានឲ្យកម្ពុជាថ្មីដឹងថា រហូតមកដល់ពេលនេះ មានក្រុមហ៊ុនអាកាសចរណ៍ចំនួនពីរ ដែលបានប្រតិបត្តិការតភ្ជាប់ជើងហោះហើរពីខេត្តសៀមរាបទៅទីក្រុងធំៗចំនួនពីរនៅក្នុងប្រទេសចិន។

លោកថា ក្រុមហ៊ុន China Eastern បានធ្វើការតភ្ជាប់ការហោះហើរទៅទីក្រុងគុនមីងរបស់ប្រទេសចិន ដោយធ្វើឡើង ៣ ជើងក្នុងមួយសប្តាហ៍។ ដោយឡែកក្រុមហ៊ុនអាកាសចរជាតិ Air Cambodia ក៏មានជើងហោះហើរទៅក្រុងសិនជិនដោយធ្វើឡើងមួយជើងក្នុងមួយសប្តាហ៍។

របាយការណ៍ពីមន្ទីរទេសចរណ៍ខេត្តសៀមរាបបង្ហាញថា ក្នុងឆមាសទី ១ ឆ្នាំ ២០២៥ ខេត្តសៀមរាបទទួលបានកំណើនភ្ញៀវទេសចរបរទេសកើនឡើងប្រមាណ ៨% បើប្រៀបធៀបរយៈពេលដូចគ្នាក្នុងឆ្នាំ ២០២៤។

ក្នុងឆមាសទី ១ ឆ្នាំ ២០២៥ ភ្ញៀវទេសចរអន្តរជាតិមកកម្សាន្តខេត្តសៀមរាបមានចំនួន ៥៦៧ ៦៧៣ នាក់ កើនឡើង ៨.៧៦% បើប្រៀបធៀបរយៈពេលដូចគ្នាឆ្នាំ ២០២៤ ដែលមានចំនួន ៥២១ ៩៥០ នាក់។

នៅឆ្នាំ ២០២៥ អាកាសយានដ្ឋានសៀមរាបអង្គរ បានទទួលជើងហោះហើរថ្មីៗបន្ថែមដែលបាននាំលំហូរភ្ញៀវទេសចរមកកម្សាន្តក្នុងខេត្តសៀមរាប។

កាលពីអំឡុងខែមិថុនា ក្រុមហ៊ុនអាកាសចរណ៍មកពីតំបន់មជ្ឍឹមបូព៌ា Emirates Airline បានបើកជើងហោះហើរពីទីក្រុងឌុយបៃ មកខេត្តសៀមរាប។

យន្តហោះរបស់ក្រុមហ៊ុនអាកាសចរណ៍ Emirates Airline បានចុះចតដោយសុវត្ថិភាពនៅអាកាសយានដ្ឋានអន្តរជាតិសៀមរាប-អង្គរ (SAI) ដែលជាព្រឹត្តិការណ៍ប្រវត្តិសាស្ត្រដ៏សំខាន់សម្រាប់វិស័យអាកាសចរណ៍ និងទេសចរណ៍កម្ពុជា។

ដោយឡែក កាលពីខែកក្កដា ក្រុមហ៊ុនអាកាសចរណ៍ជាតិកម្ពុជា (Air Cambodia) ក៏បានសម្ពោធជើងហោះហើរត្រង់ពីទីក្រុងសិនជិននៃប្រទេសចិន ជាលើកដំបូងមកកាន់ទឹកដីអង្គរនៃខេត្តសៀមរាប។

ការពង្រីកជើងហោះហើរបន្ថែមទៅប្រទេសចិនរបស់ក្រុមហ៊ុនអាកាសចរក្នុងស្រុក Air Cambodia ទៅទីក្រុងសិនជិនស្ថិតនៅក្នុងចំណោមទីក្រុងលំដាប់ធំៗទាំងបួនរបស់ប្រទេសចិន (ទីក្រុង ប៉េកាំង ទីក្រុងសៀងហៃ ទីក្រុងក្វាងចូវ និង ទីក្រុងសិនជិន)។

បន្ថែមពីនេះ អាកាសយានដ្ឋានខេត្តសៀមរាបក៏មានការបង្កើនការហោះហើរទៅមកពីខេត្តសៀមរាបទៅទីក្រុងបាងកក ស្របពេលដែលមានបិទខ្ទប់ព្រំដែនគោករវាងប្រទេសកម្ពុជានិងថៃ ក្រោយទាហានថៃបានចូលឈ្លានពានបូរណភាពទឹកដីប្រទេសកម្ពុជា៕

The post ទីក្រុងធំៗចំនួនពីររបស់ចិន មានជើងហោះហើរតភ្ជាប់ត្រង់មកអាកាសយានដ្ឋានខេត្តសៀមរាប appeared first on Kampuchea Thmey Daily.

បើកជើងហោះហើរថ្មីលើកដំបូង ទេសចរចិន ១៤០ នាក់ ជិះធ្វើដំណើរពីទីក្រុងសិនជិនមកខេត្តសៀមរាប

Dy Bunnara — Sat, 19 Jul 2025 02:32:03 +0000

មន្រ្តីទទួលបន្ទុកអភិវឌ្ឍន៍ការហោះហើរ នៃអាកាសយានដ្ឋានអន្តរជាតិសៀមរាបអង្គរបានឲ្យកម្ពុជាថ្មីដឹងថា ការសម្ពោធផ្លូវហោះហើរថ្មីរបស់ក្រុមហ៊ុនអាកាសចរណ៍ជាតិកម្ពុជាពីទីក្រុងសិនជិនប្រទេសចិនមកខេត្តសៀមរាប មានភ្ញៀវជិះធ្វើដំណើរចំនួន ១៤០ នាក់ ដែលជាទេសចរចិន។

មន្រ្តីរូបនេះបានបន្តថា ក្រុមហ៊ុនអាកាសចរណ៍ជាតិ ដែលបើកភ្ជាប់ជើងហោះហើរថ្មីពីខេត្តសៀមរាបនិងទីក្រុងសិនជិនប្រទេសចិន មានកាលបរិច្ឆេទការហោះហើរ ១ ជើង ក្នុង១ សប្តាហ៍ ដោយចេញដំណើររៀងរាល់ល្ងាចថ្ងៃព្រហស្បតិ៍ និងត្រឡប់មកវិញរៀងរាល់ព្រឹកថ្ងៃសុក្រ ដោយប្រើប្រាស់ប្រភេទយន្តហោះ A321 មាន ១៧៨ កៅអី។

ការបើកជើងហោះហើរត្រង់លើកដំបូងពីសិនជិនទៅខេត្តសៀមរាបដែលផ្ទុកអ្នកដំណើរពេញនេះ លោក វ៉ាង វិនពីន ឯកអគ្គរដ្ឋទូតចិនប្រចាំនៅកម្ពុជាក៏បានបង្ហោះសារអបអរសាទរ ដោយលោកបានហៅការបើកការតភ្ជាប់នេះ បានបំពេញចន្លោះជើងហោះហើរត្រង់រវាងតំបន់ឆកធំៗក្នុងប្រទេសចិនមានដូចជាក្វាងទុង ហុងកុង ម៉ាកាវ និងទីក្រុងលំដាប់ជួរមុខចំនួន ៤ នៅចិន មានដូចជាប៉េកាំង សៀងហៃ ក្វាងចូវ និងសិនជិន ជាមួយនឹងខេត្តសៀមរាប ដែលនឹងបញ្ចូលនូវកម្លាំងរស់រវើកថ្មីសម្រាប់ឆ្នាំទេសចរណ៍ចិននិងកម្ពុជា២០២៥។

នៅចុងឆ្នាំ ២០២៥ នេះ មានក្រុមហ៊ុនអាកាសចរណ៍ចំនួន ៤ ទៀត នឹងតភ្ជាប់ជើងហោះហើរមកអាកាសយានដ្ឋានសៀមរាបអង្គរ។ នេះបើតាមប្រភពពីមន្រ្តីបម្រើការនៅអាកាសយានដ្ឋានសៀមរាបអង្គរប្រាប់កម្ពុជាថ្មី។

ក្រុមហ៊ុនថ្មីបន្តបន្ទាប់ ដែលនឹងភ្ជាប់ប្រតិបត្តិការហោះហើរមកអាកាសយានដ្ឋានសៀមរាបអង្គរមានដូចជា ក្រុមហ៊ុន Qatar Airways មកពីដូហា ក្រុមហ៊ុន IndiGo មកពីឥណ្ឌា ក្រុមហ៊ុន Eastarjet មកពីសេអ៊ូល ប្រទេសកូរ៉េ និងក្រុមហ៊ុនអាកាសចរណ៍ Firefly មកពីកូឡាឡាំពួ ប្រទេសម៉ាឡេស៊ី។

ក្រុមហ៊ុន Emirate ដែលជាក្រុមហ៊ុនអាកាសចរណ៍លំដាប់ពិភពលោកមានមូលដ្ឋាននៅទីក្រុងឌុយបៃ ក៏ទើបបើកជើងហោះហើរជាប្រវត្តិសាស្ត្រមកអាកាសយានដ្ឋានសៀមរាបអង្គរកាលពីខែមិថុនានេះ។

ប្រភពពីមន្រ្តីនៅអាកាសយានដ្ឋានសៀមរាបអង្គរបានឲ្យដឹងថា មួយរយៈចុងក្រោយនេះសង្កេតឃើញមានសន្ទុះកើនឡើងការធ្វើដំណើរតាមផ្លូវអាកាសពីខេត្តសៀមរាបទៅទីក្រុងបាងកក និងពីទីក្រុងបាងកកមកខេត្តសៀមរាប ក្រោយមានការបិទខ្ទប់ព្រំដែនរវាងប្រទេសទាំងពីរ៕

The post បើកជើងហោះហើរថ្មីលើកដំបូង ទេសចរចិន ១៤០ នាក់ ជិះធ្វើដំណើរពីទីក្រុងសិនជិនមកខេត្តសៀមរាប appeared first on Kampuchea Thmey Daily.

ចុងឆ្នាំនេះ ក្រុមហ៊ុនអាកាសចរណ៍ ៤ ទៀត ភ្ជាប់ការហោះហើរមកអាកាសយានដ្ឋានសៀមរាបអង្គរ

Dy Bunnara — Fri, 18 Jul 2025 02:37:26 +0000

បើតាមប្រភពពីមន្រ្តីបម្រើការនៅអាកាសយានដ្ឋានសៀមរាបអង្គរបានបញ្ជាក់ដល់កម្ពុជាថ្មីថា នៅចុងឆ្នាំ ២០២៥ នេះ នឹងមានក្រុមហ៊ុនអាកាសចរណ៍ចំនួន ៤ ទៀត នឹងតភ្ជាប់ជើងហោះហើរមកអាកាសយានដ្ឋានសៀមរាបអង្គរ។

លោក ពេជ្រ សុប៉ុនតារា មន្រ្តីទទួលបន្ទុកអភិវឌ្ឍន៍ការហោះហើរ នៃអាកាសយានដ្ឋានអន្តរជាតិសៀមរាប-អង្គរបានឲ្យដឹងថា អាកាសយានដ្ឋានសៀមរាបអង្គរនឹងទទួលបានជើងហោះហើរពីក្រុមហ៊ុនអាកាសចរណ៍ថ្មីចំនួន ៤ ទៀត ដែលគ្រោងតភ្ជាប់មកអាកាសយានដ្ឋានសៀមរាបអង្គរក្នុងខេត្តសៀមរាបនៅចុងឆ្នាំ ២០២៥ នេះ។

ក្រុមហ៊ុនថ្មីបន្តបន្ទាប់ដែលនឹងភ្ជាប់ប្រតិបត្តិការហោះហើរមកអាកាសយានដ្ឋានសៀមរាបអង្គរមាន ក្រុមហ៊ុន Qatar Airways មកពីដូហា ក្រុមហ៊ុន IndiGo មកពីឥណ្ឌា ក្រុមហ៊ុន Eastarjet មកពីសេអ៊ូល ប្រទេសកូរ៉េ និងក្រុមហ៊ុនអាកាសចរណ៍ Firefly មកពីកូឡាឡាំពួ ប្រទេសម៉ាឡេស៊ី។

លោក ពេជ្រ សុប៉ុនតារា បានបន្តថា ក្រុមហ៊ុន Emirate ដែលជាក្រុមហ៊ុនអាកាសចរណ៍លំដាប់ពិភពលោកមានមូលដ្ឋាននៅទីក្រុងឌុយបៃ ក៏ទើបបើកការតភ្ជាប់ជើងហោះហើរជាប្រវត្តិសាស្ត្រមកអាកាសយានដ្ឋានសៀមរាបអង្គរកាលពីខែមិថុនានេះ។

បើតាមប្រភពពីមន្រ្តីនៅអាកាសយានដ្ឋានសៀមរាបអង្គរបានឲ្យដឹងថា ថ្មីៗនេះមានសន្ទុះកើនឡើងការធ្វើដំណើរតាមជើងហោះហើរពីខេត្តសៀមរាបទៅទីក្រុងបាងកក និងពីទីក្រុងបាងកកមកខេត្តសៀមរាប ក្រោយមានការបិទខ្ទប់ព្រំដែនរវាងប្រទេសទាំងពីរ។

ស្របពេលគ្នានេះដែរ ក្រុមហ៊ុនអាកាសចរណ៍ក្នុងស្រុក ក៏កំពុងពង្រីកតភ្ជាប់ជើងហោះហើរទៅកាន់គោលដៅថ្មីៗដែលនឹងរុញកំណើនភ្ញៀវទេសចរធ្វើដំណើរតាមផ្លូវអាកាសមកខេត្តសៀមរាបកាន់តែកើនឡើងថែមទៀត។

របាយការណ៍របស់មន្ទីរទេសចរណ៍ខេត្តសៀមរាបបានបង្ហាញថា ក្នុងឆមាសទី ១ ឆ្នាំ ២០២៥ ខេត្តសៀមរាបទទួលបានភ្ញៀវទេសចរបរទេសកើនឡើងប្រមាណ ៨% បើប្រៀបធៀបរយៈពេលដូចគ្នាក្នុងឆ្នាំ ២០២៤។

ភ្ញៀវទេសចរអន្តរជាតិមកកម្សាន្តខេត្តសៀមរាបមានចំនួន ៥៦៧ ៦៧៣ នាក់ កើនឡើង ៨.៧៦% ខណៈភ្ញៀវទេសចរក្នុងស្រុកក៏មានកំណើនបើប្រៀបធៀបនឹងរយៈពេលដូចគ្នាឆ្នាំ២០២៤៕

The post ចុងឆ្នាំនេះ ក្រុមហ៊ុនអាកាសចរណ៍ ៤ ទៀត ភ្ជាប់ការហោះហើរមកអាកាសយានដ្ឋានសៀមរាបអង្គរ appeared first on Kampuchea Thmey Daily.

អាកាសយានដ្ឋានអន្តរជាតិ​សៀមរាបអង្គរ Archives - Kampuchea Thmey Daily

អាកាសយានដ្ឋានអន្តរជាតិសៀមរាប-អង្គរ ទទួលបានជើងហោះហើរដំបូង របស់ក្រុមហ៊ុនអាកាសចរណ៍ Firefly ពីទីក្រុងគូឡាឡាំពួ

‎អាកាសយានដ្ឋានអន្តរជាតិសៀមរាប-អង្គរ ទទួលបានជើងហោះហើរលើកដំបូង​ពីក្រុមហ៊ុនអាកាសចរណ៍ឥណ្ឌា IndiGo

​ក្រុមហ៊ុនកាសចរណ៍ ​Indigo ​តភ្ជាប់ជើងហោះ​ហើរមកកម្ពុជា ​នឹង​ជំរុញលំហូរទេសចរណ៍ និងពាណិជ្ជកម្ម​

​រូបសំណាក អ្នកប្រាជ្ញខ្មែរសម័យអង្គរ និងលោក ជីវ តាក្វាន់ រំលេច​នៅព្រលានយន្តហោះសៀមរាប

ប្រៀបធៀប​​ព្រលានយន្តហោះ​ថ្មី​​នៅ​សៀមរាប និង​តេជោ​ សមត្ថភាពខុស​គ្នា​យ៉ាង​ណា?

ទីក្រុង​ធំៗ​ចំនួន​ពីរ​របស់​ចិន មាន​ជើង​ហោះហើរ​តភ្ជាប់​ត្រង់​​មក​អាកាសយានដ្ឋាន​ខេត្ត​សៀមរាប

​​​បើក​ជើង​ហោះហើរថ្មីលើកដំបូង ទេសចរចិន ១៤០ នាក់ ជិះ​ធ្វើដំណើរ​​ពីទីក្រុងសិនជិន​មក​ខេត្តសៀមរាប

ចុងឆ្នាំនេះ ក្រុមហ៊ុន​អាកាសចរណ៍ ៤ ទៀត ភ្ជាប់​ការ​ហោះហើរ​មក​អាកាសយានដ្ឋាន​សៀមរាប​អង្គរ