អាជ្ញាធរខណ្ឌឫស្សីកែវ Archives - Kampuchea Thmey Daily

អភិបាលខណ្ឌឬស្សីកែវ ៖ ចំពោះពលរដ្ឋសាងសង់សំណង់ អនាធិបតេយ្យ ឬលក់ដូរ រំលោភចំណីផ្លូវ មិនស្តាប់តាមការណែនាំ អាជ្ញាធរ នឹងចាត់វិធានការក្តៅ

Ung Meng — Fri, 27 Feb 2026 02:33:47 +0000

អាជ្ញាធរខណ្ឌឬស្សីកែវ ចុះចាត់វិធានការក្តៅ ទីតាំងសាងសង់សំណង់អនាធិបតេយ្យ រំលោភលើចំណីផ្លូវ ក្រោយណែនាំច្រើនលើក ច្រើនសារមិនអនុវត្តន៍តាម។ ជាក់ស្តែងកាលពីថ្ងៃទី២៦ ខែកុម្ភៈ ឆ្នាំ២០២៦នេះ គណៈបញ្ជាការឯកភាពរដ្ឋបាលខណ្ឌឫស្សីកែវ បានបន្តការរៀបចំសណ្តាប់ធ្នាប់ ចំពោះសំណង់អនាធិបតេយ្យ នៅសង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ។

លោក ជិន ប៊ុនធឿន អភិបាលខណ្ឌឫស្សីកែវ និងជាប្រធានគណៈបញ្ជាការឯកភាពរដ្ឋបាលខណ្ឌឫស្សីកែវ បានដឹកនាំកម្លាំងគណៈបញ្ជាការឯកភាពរដ្ឋបាលខណ្ឌ ចុះអនុវត្តវិធានការរដ្ឋបាល ដោយប្រើប្រាស់គ្រឿងចក្រ រុះរើសំណង់អាណាធិបតេយ្យ នៅសង្កាត់ស្វាយប៉ាក ដែលបានសង់រំលោភលើដីចំណីផ្លូវសាធារណៈ។

អភិបាលខណ្ឌឫស្សីកែវបានបន្តថា អាជ្ញាធរមិនដែលចង់ប៉ះពាល់ការរស់ ក៏ដូចជាប្រកបអាជីវកម្មនោះរបស់ប្រជាពលរដ្ឋនោះឡើយ។ ហើយអាជ្ញាធរតែងធ្វើការណែនាំ និងប្រកាសប្រាប់ពលរដ្ឋជានិច្ច កុំអោយមានការសាងសង់រំលោភដីចំណីផ្លូវសាធារណៈ ដែលបង្កអោយបាត់បង់សោភ័ណភាព សណ្តាប់ធ្នាប់ដងផ្លូវ។ ហើយបើសិន ក្នុងលក្ខខណ្ឌណែនាំច្រើនដង នៅតែមិនចូលរួមសហការ អាជ្ញាធរ នឹង ប្រើប្រាស់វិធានការក្ដៅណាមួយ ក្នុងការអនុវត្តការរៀបចំសណ្ដាប់ធ្នាប់របៀបរៀបរយតាមដងផ្លូវសាធារណៈ។ ជាក់ស្តែង ចំពោះទីតាំងខាងលើនេះ ត្រូវបានអាជ្ញាធរសង្កាត់-ភូមិ ចុះណែនាំអោយរុះរើជាច្រើនលើក ច្រើនសារមកហើយ ទើបកម្លាំងគណៈបញ្ជាការឯកភាពរដ្ឋបាលខណ្ឌ សម្រេចអនុវត្តវិធានការរដ្ឋបាលនេះតែម្ដង។

ជាមួយគ្នានេះដែរ លោកអភិបាល នៅតែស្នើរសុំអោយប្រជាពលរដ្ឋទាំងអស់ នៅក្នុងមូលដ្ឋានខណ្ឌ សូមចូលរួមសហការក្នុងការរៀបចំសណ្ដាប់ធ្នាប់ របៀបរៀបរយ អនាម័យ និងបរិស្ថាន នៅតាមដងផ្លូវសាធារណៈ ជាពិសេសសូមបញ្ឈប់ជាបន្ទាន់នូវវប្បធម៌អន្ដរាគមន៍ណាមួយដោយមិនទំនងចំពោះការរំលោភយកដីចំណីផ្លូវសាធារណៈមកធ្វើជាប្រយោជន៍ផ្ទាល់ខ្លួន៕ អត្ថបទ ៖ រដ្ឋា

The post អភិបាលខណ្ឌឬស្សីកែវ ៖ ចំពោះពលរដ្ឋសាងសង់សំណង់ អនាធិបតេយ្យ ឬលក់ដូរ រំលោភចំណីផ្លូវ មិនស្តាប់តាមការណែនាំ អាជ្ញាធរ នឹងចាត់វិធានការក្តៅ appeared first on Kampuchea Thmey Daily.

អភិបាលខណ្ឌឫស្សីកែវ ចុះពិនិត្យសណ្ដាប់ធ្នាប់ផ្សារសាំហាន់ និងសិក្សាគម្រោងជួសជុលហេដ្ឋារចនាសម្ព័ន្ធ

អ៊ិន ពិសី — Thu, 05 Feb 2026 05:30:00 +0000

កាលពីល្ងាចថ្ងៃទី ០៤ ខែកុម្ភៈ ឆ្នាំ ២០២៦ ម្សិលមិញ រដ្ឋបាលខណ្ឌឫស្សីកែវ ដឹកនាំដោយ លោក ជិន ប៊ុនធឿន អភិបាលខណ្ឌឫស្សីកែវ និង លោក ឡុង ង៉ែត អភិបាលរងខណ្ឌ ព្រមទាំងមន្ត្រីជំនាញពាក់ព័ន្ធ នៃរដ្ឋបាលខណ្ឌ និងរដ្ឋបាលសង្កាត់ បានចុះសួរសុខទុក្ខ សំណេះសំណាល និងពិនិត្យស្ថានភាពជាក់ស្ដែងជាមួយប្រជាពលរដ្ឋដែលជាអាជីវករលក់ដូរនៅផ្សារសាំហាន់ និង ផ្សារឫស្សីកែវថ្មី។

ក្នុងដំណើរចុះពិនិត្យនេះ គណៈដឹកនាំខណ្ឌបានផ្តោតសំខាន់ទៅលើការពិនិត្យសណ្ដាប់ធ្នាប់សាធារណៈ អនាម័យបរិស្ថាន សុវត្ថិភាព និងលក្ខខណ្ឌជុំវិញបរិវេណផ្សារ ព្រមទាំងសិក្សាគម្រោង ជួសជុល និងស្ថាបនាផ្លូវក្នុងមូលដ្ឋាន ដើម្បីឆ្លើយតបតម្រូវការរស់នៅ និងការប្រកបអាជីវកម្មរបស់ប្រជាពលរដ្ឋឲ្យកាន់តែល្អប្រសើរ។

នាឱកាសនោះ លោក ជិន ប៊ុនធឿន បានថ្លែងអំណរគុណ និងកោតសរសើរដល់អាជីវករលក់ដូរទាំងអស់ ដែលបានចូលរួមយ៉ាងសកម្មក្នុងការថែរក្សាអនាម័យបរិស្ថាន និងសណ្ដាប់ធ្នាប់ក្នុងផ្សារ ឲ្យមានភាពស្អាត រៀបរយ និងមានសុវត្ថិភាពជាបន្តបន្ទាប់។ ជាមួយគ្នានេះ លោកអភិបាលខណ្ឌ ក៏បានស្នើសុំឲ្យម្ចាស់ផ្សារទាំងពីរ ពង្រឹងប្រព័ន្ធពន្លត់អគ្គិភ័យ ដោយត្រូវរៀបចំឧបករណ៍ពន្លត់អគ្គិភ័យឲ្យគ្រប់គ្រាន់ និងងាយស្រួលប្រើប្រាស់ ដើម្បីអាចអន្តរាគមន៍បានទាន់ពេលវេលា ក្នុងករណីមានគ្រោះអគ្គិភ័យកើតឡើងជាយថាហេតុ។

លោកអភិបាលខណ្ឌ គូសបញ្ជាក់ថា រដ្ឋបាលខណ្ឌឫស្សីកែវ នឹងបន្តយកចិត្តទុកដាក់ខ្ពស់ក្នុងការអភិវឌ្ឍហេដ្ឋារចនាសម្ព័ន្ធមូលដ្ឋាន ដោយគ្រោងនឹងបើកការដ្ឋានជួសជុល និងស្ថាបនាផ្លូវឡើងវិញ រៀបចំប្រព័ន្ធលូបង្ហូរទឹក ដាក់ធុងសំរាមតាមដងផ្លូវ និងដំឡើងបង្គោលភ្លើងបំភ្លឺផ្លូវបន្ថែម ដើម្បីធានាឲ្យមានភាពងាយស្រួល និងសុវត្ថិភាព ក្នុងការធ្វើដំណើររបស់ប្រជាពលរដ្ឋ ជាពិសេសនៅពេលយប់ និងជួយគាំទ្រដល់ការប្រកបអាជីវកម្មរបស់អាជីវករដែលលក់ដូររហូតដល់យប់ជ្រៅ។

លើសពីនេះទៅទៀត លោកអភិបាលខណ្ឌ ក៏បានបញ្ជាកម្លាំងជំនាញឲ្យត្រៀមប្រើប្រាស់រថយន្តបាញ់ទឹក លាងសម្អាតផ្លូវជុំវិញបរិវេណផ្សារ ក្នុងពេលឆាប់ៗ ខាងមុខ ដើម្បីលើកកម្ពស់អនាម័យបរិស្ថាន សោភ័ណភាពទីក្រុង និងបង្កើនគុណភាពជីវិតរបស់ប្រជាពលរដ្ឋក្នុងមូលដ្ឋាន៕

អត្ថបទ ៖ សំណាង

The post អភិបាលខណ្ឌឫស្សីកែវ ចុះពិនិត្យសណ្ដាប់ធ្នាប់ផ្សារសាំហាន់ និងសិក្សាគម្រោងជួសជុលហេដ្ឋារចនាសម្ព័ន្ធ appeared first on Kampuchea Thmey Daily.

អាជ្ញាធរខណ្ឌឫស្សីកែវ ចាត់វិធានការក្តៅរុះរើកាត់សំយាបរំលោភចិញ្ចើមផ្លូវ ៥៩៨ ផ្សារទំនប់

អ៊ិន ពិសី — Mon, 01 Dec 2025 09:49:09 +0000

ក្រោយផុតថ្ងៃឱសានវាទអំពីសេចក្ដីជូនដំណឹង រុះរើ កាត់សំយាប នៅចំណុចផ្សារទំនប់ ៥៩៨ អាជ្ញាធរខណ្ឌឫស្សីកែវ បានចុះអនុវត្តវិធានការក្តៅ រុះរើកាត់ស្លាកយីហោ សំយាប ដែលអាជីវករ និងប្រជាពលរដ្ឋសាងសង់រំលោភចិញ្ចើមផ្លូវសាធារណៈ។

សកម្មភាពចុះរុះរើនេះកាលពីព្រឹកថ្ងៃទី ១ ខែធ្នូ ឆ្នាំ ២០២៥ នៅចំណុចផ្សារទំនប់ ហៅផ្សារ ងិន អាន ស្ថិតនៅមូលដ្ឋានសង្កាត់ទួលសង្កែទី ១ ខណ្ឌឫស្សីកែវ។

លោក គន់ សោភា ប្រធានការិយាល័យសាធារណៈខណ្ឌឫស្សីកែវ ដែលចូលរួមក្នុងសកម្មភាពខាងលើនេះ បានប្រាប់កម្ពុជាថ្មីថា មុននិងរដ្ឋបាលខណ្ឌឫស្សីកែវចាត់វិធានការក្តៅបែបនេះ អាជ្ញាធរទាំងថ្នាក់សង្កាត់ រហូតដល់ថ្នាក់ខណ្ឌ បានជូនសេចក្ដីជូនដំណឹង និងជម្រាបដោយផ្ទាល់មាត់ជាច្រើនលើកច្រើនសារួចមកហើយ។

លោក គន់ សោភា បានបន្តថា កាលពីថ្ងៃទី ២៩ ខែវិច្ឆិកា ឆ្នាំ ២០២៥ ថ្មីៗ នេះ រដ្ឋបាលសង្កាត់ទួលសង្កែទី ១ ក៏បានចុះសំពះជម្រាបជូនម្តងទៀត ជាលើកចុងក្រោយ មុនអាជ្ញាធរចាត់វិធានការក្តៅនេះផងដែរ។

រដ្ឋបាលខណ្ឌឫស្សីកែវ ជឿជាក់ថា ប្រជាពលរដ្ឋ និងអាជីវករ ក្នុងមូលដ្ឋានខណ្ឌឫស្សីកែវទាំងអស់ នឹងចូលរួមសហការយ៉ាងសកម្ម ដើម្បីរក្សាសណ្ដាប់ធ្នាប់ សោភ័ណភាព និងបរិស្ថានស្អាតល្អ។

គួរជម្រាបផងដែរថា សកម្មភាពខាងលើនេះ កម្លាំងអាជ្ញាធរខណ្ឌ បានចុះរុះរើ កាត់ស្លាកយីហោ កាត់សំយាប ដែលប្រជាពលរដ្ឋ និងអាជីវករ មិនព្រមចូលរួមសហការក្រោយជូនដំណឹងរបស់រដ្ឋបាលខណ្ឌជាច្រើនសា៕

អត្ថបទ ៖ សំណាង

The post អាជ្ញាធរខណ្ឌឫស្សីកែវ ចាត់វិធានការក្តៅរុះរើកាត់សំយាបរំលោភចិញ្ចើមផ្លូវ ៥៩៨ ផ្សារទំនប់ appeared first on Kampuchea Thmey Daily.

រដ្ឋបាលខណ្ឌឫស្សីកែវ ចាត់វិធានការរុះរើដេប៉ូសំណង់ ១ កន្លែង រំលោភផ្លូវសាធារណៈ

អ៊ិន ពិសី — Fri, 21 Nov 2025 07:38:46 +0000

កាលពីល្ងាចថ្ងៃទី ២០ ខែវិច្ឆិកា ឆ្នាំ ២០២៥ ម្សិលមិញ លោក ជិន ប៊ុនធឿន អភិបាលខណ្ឌឫស្សីកែវ និងជាប្រធានគណៈបញ្ជាការឯកភាពរដ្ឋបាលខណ្ឌ បានដឹកនាំកម្លាំងរៀបចំសណ្ដាប់ធ្នាប់ និងចាត់វិធានការរុះរើដេប៉ូសំណង់ ឃាងដា ស្ថិតក្នុងសង្កាត់គីឡូម៉ែត្រលេខ ៦ ខណៈទីតាំងលក់គ្រឿងសំណង់នេះបន្តតាំងលក់គ្រឿងសំណង់រំលោភដីចំណីផ្លូវសាធារណៈ។

អាជ្ញាធរខណ្ឌឫស្សីកែវ បានឱ្យដឹងថា ទីតាំងខាងលើនេះ ត្រូវបានអាជ្ញាធរណែនាំជាច្រើនលើកច្រើនសាមកហើយ តែម្ចាស់ដេប៉ូនៅតែគឃ្លើន បន្តបំពានរំលោភដីចំណីផ្លូវសាធារណៈម្តងហើយម្តងទៀត ដោយមិនចូលរួមសហការជាមួយអាជ្ញាធរមូលដ្ឋានទាល់តែសោះ។

បន្ទាប់ពីបញ្ចប់ការរុះរើ លោក ជិន ប៊ុនធឿន បានចាត់ឱ្យមន្ត្រីពាក់ព័ន្ធប្រើប្រាស់រថយន្តបាញ់ទឹកលាងសម្អាតតាមបណ្ដោយផ្លូវបេតុងថ្មី (អតីតផ្លូវរថភ្លើងចាស់) ដើម្បីរក្សាទុកភាពស្អាត និងបង្កើនសណ្ដាប់ធ្នាប់ក្នុងតំបន់កាន់តែប្រសើរ។

អាជ្ញាធរខណ្ឌឫស្សីកែវ បញ្ជាក់ថា នឹងមិនរំលងចំពោះករណីណាដែលរំលោភលើដីចំណីផ្លូវសាធារណៈ ឬបង្កការរំខានដល់សណ្ដាប់ធ្នាប់របស់មូលដ្ឋានឡើយ។ ការអនុវត្តវិធានការប្រកបដោយភាពតឹងរ៉ឹងនេះ មានគោលបំណងរក្សាសុវត្ថិភាព បន្ថយគ្រោះថ្នាក់ជាយថាហេតុ និងបង្កើតបរិយាកាសរស់នៅល្អប្រសើរជូនប្រជាពលរដ្ឋទាំងអស់។

អាជ្ញាធរ ក៏បានអំពាវនាវដល់ម្ចាស់អាជីវកម្មទាំងឡាយ សូមចូលរួមសហការ គោរពតាមបទបញ្ញត្តិ និងការណែនាំរបស់អាជ្ញាធរ ដើម្បីរួមគ្នាទប់ស្កាត់ការរំលោភសាធារណៈ៕

អត្ថបទ ៖ សំណាង

The post រដ្ឋបាលខណ្ឌឫស្សីកែវ ចាត់វិធានការរុះរើដេប៉ូសំណង់ ១ កន្លែង រំលោភផ្លូវសាធារណៈ appeared first on Kampuchea Thmey Daily.

អាជ្ញាធរសង្កាត់ឫស្សីកែវ ជួសជុលផ្លូវសំបុកមាន់ សម្អាតបរិស្ថានតាមតំបន់ ក្នុងមូលដ្ឋាន

អ៊ិន ពិសី — Tue, 07 Oct 2025 03:31:03 +0000

កាលពីថ្ងៃទី ៦ ខែតុលា ឆ្នាំ ២០២៥ ម្សិលមិញ លោក ជិន ប៊ុនធឿន អភិបាលខណ្ឌឫស្សីកែវ បានឲ្យ លោក មូល វីរៈ ចៅសង្កាត់ឫស្សីកែវ ដឹកនាំក្រុមការងារសង្កាត់ និងភូមិ ចុះអនុវត្តកិច្ចការជួសជុលផ្លូវ ជង្ហុកសំបុកមាន់ និងសម្អាតបរិស្ថាននៅតាមតំបន់ក្នុងសង្កាត់ឫស្សីកែវ។

លោក មូល វីរៈ បានឲ្យដឹងថា ក្រុមការងារបានធ្វើការជួសជុលលុបជង្ហុក (ផ្លូវសំបុកមាន់) នៅតាមផ្លូវចាក់បេតុងមួយចំនួនមានការខូចខាតដោយសារប្រើប្រាស់រយៈពេលយូរ ដែលបណ្ដាលឲ្យមានការលំបាកក្នុងការធ្វើចរាចរណ៍។ ការជួសជុលនេះ មានគោលបំណងធ្វើឲ្យប្រជាពលរដ្ឋអាចធ្វើដំណើរបានដោយសុវត្ថិភាព និងងាយស្រួលជាងមុន។

លោកចៅសង្កាត់ឫស្សីកែវ បន្តថា ក្រោយពីបញ្ចប់ការជួសជុលផ្លូវ លោកបានបន្តដឹកនាំក្រុមការងារធ្វើការបាញ់សំអាតលាងផ្លូវ និងលាងសំអាតការ៉ូឡា សម្អាតកាកសំណល់នៅក្រោមស្ពានអាកាសឫស្សីកែវ ដើម្បីរក្សាភាពស្អាត និងមានសោភ័ណភាព។

ដោយឡែក លោក សួង សុជាតិ ប្រជាពលរដ្ឋភូមិឫស្សីកែវ សង្កាត់ឫស្សីកែវ បានបង្ហាញការសប្បាយចិត្តដែលរដ្ឋបាលខណ្ឌ-សង្កាត់ ឫស្សីកែវ មកជួយជួសជុលផ្លូវ និងសម្អាតបរិស្ថាន។

លោកថា ឥឡូវនេះ ការធ្វើដំណើរងាយស្រួលជាងមុន ហើយផ្លូវក៏ស្អាតផងដែរ ទាំងនេះជាការយកចិត្តទុកដាក់របស់រដ្ឋបាលសង្កាត់ និងរដ្ឋបាលខណ្ឌ៕

អត្ថបទ ៖ សំណាង

The post អាជ្ញាធរសង្កាត់ឫស្សីកែវ ជួសជុលផ្លូវសំបុកមាន់ សម្អាតបរិស្ថានតាមតំបន់ ក្នុងមូលដ្ឋាន appeared first on Kampuchea Thmey Daily.

អភិបាលខណ្ឌឫស្សីកែវ ឲ្យអាជ្ញាធរចាត់វិធានការរថយន្តដឹកសំណល់សំណង់ ឬ កាកសំណល់ផ្សេងៗ ដែលចាក់តាមផ្លូវពាសវាលពាសកាល

អ៊ិន ពិសី — Fri, 26 Sep 2025 03:06:18 +0000

លោក ជិន ប៊ុនធឿន អភិបាល នៃគណៈអភិបាលខណ្ឌឫស្សីកែវ បានដាក់បទបញ្ជាដល់អាជ្ញាធរពាក់ព័ន្ធ ត្រូវឃាត់រថយន្តដឹកសំណល់សំណង់ ឬ កាកសំណល់ផ្សេងៗ ដែលតែងយកមកចាក់តាមផ្លូវពាសវាលពាសកាល យកមកអនុវត្តវិធានការតាមផ្លូវច្បាប់ជាដាច់ខាត។

ការដាក់បទបញ្ជាបែបនេះ ក្នុងឱកាស លោក ជិន ប៊ុនធឿន ដឹកនាំមន្ត្រី ចុះរៀបចំសណ្ដាប់ធ្នាប់ និង យកគ្រឿងចក្រឈូសសម្អាតចិញ្ចើមផ្លូវសាធារណៈ នៅមូលដ្ឋានសង្កាត់គីឡូម៉ែត្រលេខ ៦ កាលពីថ្ងៃទី ២៥ ខែកញ្ញា ឆ្នាំ ២០២៥ ម្សិលមិញ។

នាឱកាសនោះ លោក ជិន ប៊ុនធឿន បានឲ្យដឹងថា កន្លងមក រដ្ឋបាលខណ្ឌឫស្សីកែវ បានធ្វើការឃាត់ និងចុះកិច្ចសន្យាជាច្រើនលើកជាមួយម្ចាស់យានយន្តដែលរំលោភបំពាន។ ទោះជាយ៉ាងណា នៅតែមានការបំពានឡើងវិញ ជាកត្តាដែលប៉ះពាល់ដល់អនាម័យ និងសុខភាពប្រជាពលរដ្ឋក្នុងតំបន់។

លោក អ៊ុក សំបូរ ពលរដ្ឋរស់នៅសង្កាត់គីឡូម៉ែត្រលេខ ៦ បានឲ្យដឹងដែរថា គាត់មានការពេញចិត្តចំពោះការចូលរួមរបស់អាជ្ញាធរក្នុងការទប់ស្កាត់ការចាក់កាកសំណល់ពាសផ្លូវ។ លោកថា នេះជាការបំពុលដោយកាកសំណល់ និងសំណង់ផ្សេងៗ។ មិនត្រឹមប៉ុណ្ណឹងទេ វាអាចបង្កគ្រោះថ្នាក់ចរាចរណ៍ផងដែរ។

ក្នុងនាមពលរដ្ឋ លោកក៏បានសំណូមពរដល់អាជ្ញាធរ ត្រូវអនុវត្តតាមវិធានការតឹងរ៉ឹងបន្តទៀត ដើម្បីកុំឲ្យមានការបំពានឡើងវិញ៕

អត្ថបទ ៖ សំណាង

The post អភិបាលខណ្ឌឫស្សីកែវ ឲ្យអាជ្ញាធរចាត់វិធានការរថយន្តដឹកសំណល់សំណង់ ឬ កាកសំណល់ផ្សេងៗ ដែលចាក់តាមផ្លូវពាសវាលពាសកាល appeared first on Kampuchea Thmey Daily.

អាជ្ញាធរចុះចែកអត្តសញ្ញាណប័ណ្ណថ្មី ប្រគេនព្រះសង្ឃចំនួន ០២ វត្ត នៅមូលដ្ឋានខណ្ឌឫស្សីកែវ

អ៊ិន ពិសី — Tue, 16 Sep 2025 07:29:51 +0000

អាជ្ញាធរខណ្ឌឫស្សីកែវ បានចុះប្រគេនអត្តសញ្ញាណប័ណ្ណថ្មី ដល់ព្រះសង្ឃនៅវត្តទួលសុវណ្ណារាម និង វត្តឧត្តរាវតី ស្ថិតក្នុងសង្កាត់ឫស្សីកែវ ដើម្បីសម្រួលការប្រើប្រាស់ងាយស្រួលរបស់ព្រះសង្ឃ។

ការចុះប្រគេនអត្តសញ្ញាណប័ណ្ណថ្មីជូនព្រះសង្ឃបានធ្វើឡើងកាលពីព្រឹកថ្ងៃទី ១៦ ខែកញ្ញា ឆ្នាំ ២០២៥ ក្រោមវត្តមានលោក ជិន ប៊ុនធឿន អភិបាលខណ្ឌឫស្សីកែវ និងជាប្រធានគណៈបញ្ជាការឯកភាពរដ្ឋបាលខណ្ឌ និង លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវ បានអញ្ជើញចុះផ្ដល់អត្តសញ្ញាណប័ណ្ណថ្មី ប្រគេនព្រះសង្ឃដែលគង់នៅវត្តទួលសុវណ្ណារាម ស្ថិតក្នុងក្រុមទី ២ ភូមិទួលសង្កែ សង្កាត់ទួលសង្កែទី ១ និង វត្តឧត្តរាវតី សង្កាត់ឫស្សីកែវ ខណ្ឌឫស្សីកែវ។

សូមបញ្ជាក់ថា ក្នុងយុទ្ធនាការចុះថតអត្តសញ្ញាណប័ណ្ណប្រគេនជូនដល់ព្រះសង្ឃ យោងតាមសេចក្ដីប្រកាសរបស់ក្រសួងមហាផ្ទៃ និងមានការអនុញ្ញាតពីថ្នាក់ដឹកនាំ តម្រូវឲ្យប៉ុស្តិ៍នគរបាលទូទាំងប្រទេសថតអត្តសញ្ញាណប័ណ្ណជូនព្រះសង្ឃ។ បន្ថែមទៀតនោះ ដោយបានការអនុញ្ញាតពី លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ អធិការនគរបាលខណ្ឌទាំង ១៤ និង ១០៥ ប៉ុស្តិ៍រដ្ឋបាល ចុះធ្វើ ប្រគេនព្រះសង្ឃដល់ក្នុងទីវត្តអារាមដោយផ្ទាល់ ដែលនេះជាការគិតគូររបស់រាជរដ្ឋាភិបាលលើព្រះសង្ឃនៅតាមទីវត្តអារាមទាំងអស់ ដើម្បីទទួលបាននូវអត្តសញ្ញាណប័ណ្ណយកទៅប្រើប្រាស់តាមតម្រូវការ។

លោកអធិការបញ្ជាក់ថា កន្លងទៅ នគរបាល ថតតែអត្តសញ្ញាណប័ណ្ណជូនដល់ពលរដ្ឋទូទៅ តែពេលនេះ ចុះថតជូនដល់ព្រះសង្ឃ។ មុនឈានដល់ការចុះថតអត្តសញ្ញាណប័ណ្ណជូនដល់ព្រះសង្ឃបាន ព្រះសង្ឃត្រូវបញ្ជាក់ពីកន្លែងស្នាក់នៅអចិន្ត្រៃយ៍ជាមុនសិន និងមានសំបុត្រកំណើតផងដែរ។ពេលដែលបញ្ជាក់រួចរាល់ មន្ត្រីនគរបាលប៉ុស្តិ៍ អាចថតអត្តសញ្ញាណប័ណ្ណសញ្ជាតិខ្មែរជូនដល់ព្រះអង្គបាន។

ព្រះសង្ឃគង់នៅវត្តទាំង ០២ ខាងលើ បានមានសង្ឃដីកាឲ្យដឹងថា ព្រះសង្ឃគ្រប់អង្គ មានការសប្បាយចិត្តរីករាយនៅពេលដែលអាជ្ញាធរផ្ដល់ជូនអត្តសញ្ញាណប័ណ្ណព្រះសង្ឃយ៉ាងដូច្នេះ គឺមានភាពងាយស្រួលដល់ព្រះសង្ឃ ពេលធ្វើដំណើរទៅណាមកណា នឹងមានអាស្រ័យស្នាក់នៅច្បាស់ពិតប្រាកដ។ កាលដែលពីសម័យមុន ព្រះសង្ឃគ្រប់អង្គ មានតែកាតព្រះឆាយាល័ក្ខណ៍ប៉ុណ្ណោះ ពេលនេះមានអត្តសញ្ញាណប័ណ្ណ ព្រះសង្ឃអាចធ្វើការងារ ឬឯកសារ តាមតម្រូវការរបស់ព្រះសង្ឃបាន៕

អត្ថបទ ៖ សុភា

The post អាជ្ញាធរចុះចែកអត្តសញ្ញាណប័ណ្ណថ្មី ប្រគេនព្រះសង្ឃចំនួន ០២ វត្ត នៅមូលដ្ឋានខណ្ឌឫស្សីកែវ appeared first on Kampuchea Thmey Daily.

អាជ្ញាធរខណ្ឌឫស្សីកែវ ចុះសិក្សាការងារគម្រោងដាក់ប្រព័ន្ធលូរំដោះទឹក ដោះស្រាយការជន់លិចនៅភូមិសាមគ្គី និងភូមិផ្សារតូច

អ៊ិន ពិសី — Tue, 16 Sep 2025 07:04:21 +0000

កាលពីរសៀលថ្ងៃទី ១៥ ខែកញ្ញា ឆ្នាំ ២០២៥ ម្សិលមិញ ក្រុមការងាររដ្ឋបាលខណ្ឌឫស្សីកែវ ដឹកនាំដោយលោក ប៊ុត បូវណ្ណារ័ត្ន អភិបាលរងខណ្ឌ រួមជាមួយលោក ឡេង ចាន់វិសិដ្ឋ ប្រធានការិយាល័យផែនការ ហិរញ្ញវត្ថុ និងអភិវឌ្ឍន៍ខណ្ឌ ព្រមទាំងមេភូមិ ក្រុមជំនាញបច្ចេកទេស បានចុះសិក្សាការងារផ្ទាល់ទីតាំង ដើម្បីពិនិត្យបញ្ហាការដក់ទឹក នៅក្នុងភូមិសាមគ្គី សង្កាត់ឫស្សីកែវ និងភូមិផ្សារតូច សង្កាត់ទួលសង្កែទី ១។

ជាលទ្ធផល ក្រុមការងាររដ្ឋបាលខណ្ឌ បានឱ្យដឹងថា តំបន់ទាំងពីរនេះ ជាញឹកញាប់ប្រឈមនឹងបញ្ហាទឹកជំនន់ ដោយសារតែការរីកចម្រើន នៃសំណង់លំនៅឋាន និងផ្លូវថ្នល់។ ទឹកដក់មកពីតំបន់ខាងលើហូរចូលតាមប្រឡាយ ទំហំ ៥ ម៉ែត្រ តាមរយៈលូភ្លោះទំហំ ០.៨ ម៉ែត្រ ហើយភ្ជាប់ទៅលូប្រអប់ទម្លាក់ទៅលូទំហំ ១ ម៉ែត្រ តាមផ្លូវលេខ ៩៩ មុនចូលប្រឡាយអូរវែងក្បែរបេនឡានសូរិយា។

លោក ឡេង ចាន់វិសិដ្ឋ បានប្រាប់ថា ការពិនិត្យពិតប្រាកដបង្ហាញថា លូផ្លូវលេខ ៩៩ ទំហំតែ ១ ម៉ែត្រ មានប្រវែងវែង មិនអាចរំដោះទឹកបានទាន់ពេល។ ដូច្នេះ ក្រុមការងារ បានសម្រេចលើកសំណើស្នើឱ្យបន្ថែមលូទំហំ ១ ម៉ែត្រ ១ ខ្សែទៀត ដើម្បីជួយកាត់បន្ថយបញ្ហាទឹកជំនន់ (បានលើកស្នើសុំរាជធានីភ្នំពេញ ក្នុងសៀវភៅកម្មវិធីវិនិយោគ ៣ ឆ្នាំ ២០២៦) និង ស្តារមុខទឹកប្រឡាយ ៥ ម៉ែត្រ និងមុខទម្លាក់ទឹកប្រឡាយអូរវែងកន្លែងបេឡានសូរិយា (ដោយសភាពបច្ចុប្បន្ន មានសំរាមបាំងមុខទឹកមួយចំនួន)។

សកម្មភាពដ៏សកម្មនេះ បង្ហាញពីការយកចិត្តទុកដាក់របស់រដ្ឋបាលខណ្ឌឫស្សីកែវ ក្នុងការកែលម្អសេវាសាធារណៈ និងបង្កើនគុណភាពជីវភាពប្រជាពលរដ្ឋឱ្យកាន់តែប្រសើរ៕

អត្ថបទ ៖ សំណាង

The post អាជ្ញាធរខណ្ឌឫស្សីកែវ ចុះសិក្សាការងារគម្រោងដាក់ប្រព័ន្ធលូរំដោះទឹក ដោះស្រាយការជន់លិចនៅភូមិសាមគ្គី និងភូមិផ្សារតូច appeared first on Kampuchea Thmey Daily.