អាជ្ញាធរ Archives - Kampuchea Thmey Daily

លោក ពុយ គា អំពាវនាវអាជ្ញាធរពិចារណាវិធានការចំពោះអ្នកសារព័ត៌មាន ដើម្បីរក្សាសេរីភាពសារព័ត៌មាន

អ៊ិន ពិសី — Sat, 14 Feb 2026 08:55:17 +0000

លោក ពុយ គា ប្រធានក្លិបអ្នកកាសែតកម្ពុជា បានលើកឡើងថា អ្នកសារព័ត៌មាន មានតួនាទីសំខាន់ក្នុងការតាមដាន និងឃ្លាំមើលបញ្ហាសង្គម ជាពិសេសចំណុចអសកម្ម ឬអវិជ្ជមាន ដើម្បីជំរុញឱ្យមានការកែប្រែ និងធ្វើឱ្យប្រសើរឡើង។

តាមរយៈសំណេរលើទំព័រហ្វេសប៊ុក លោក បានបញ្ជាក់ថា ទោះជាយ៉ាងណា នៅមានអ្នកសារព័ត៌មានមួយចំនួនតូច ដែលពេលខ្លះអាចសរសេរព័ត៌មានដោយផ្អែកលើពាក្យសំដី ឬដំណឹងដែលទទួលបាន ដោយខ្វះការផ្ទៀងផ្ទាត់ និងការថ្លឹងថ្លែងពាក្យពេចន៍តាមបែបវិជ្ជាជីវៈ។ លោកថា ការខ្វះការយកចិត្តទុកដាក់បែបនេះ អាចនាំឱ្យមានការប្តឹងផ្តល់តាមផ្លូវច្បាប់ ឬតម្រូវឱ្យធ្វើការកែតម្រូវភ្លាមៗ។

លោក ពុយ គា បានអះអាងថា ការតម្រូវឱ្យកែអត្ថបទដែលផ្សាយខុស ឬការប្តឹងទៅតុលាការ គឺជាវិធានការសកលដែលត្រូវបានអនុវត្តជាទូទៅ។ លោកបន្ថែមថា ប្រសិនបើអ្នកសារព័ត៌មានរូបណាមួយត្រូវបានរកឃើញថាមានកំហុសជាបន្តបន្ទាប់ វាអាចធ្វើឱ្យបាត់បង់ជំនឿទុកចិត្តពីមហាជន និងធ្វើឱ្យកេរ្តិ៍ឈ្មោះរងការខូចខាតក្នុងសង្គមអ្នកសារព័ត៌មានផងដែរ។ ក្នុងករណីខ្លះ អ្នកសារព័ត៌មានអាចត្រូវបានស្ថាប័នបណ្ដេញចេញពីការងារ។

ជាមួយគ្នានេះ លោកក៏បានលើកឡើងថា វិធានការផ្សេងៗ ដូចជាការចាប់ខ្លួន និងពេលខ្លះរហូតដល់វាយខ្នោះ ក្នុងករណីដែលមិនមែនជាបទល្មើសជាក់ស្តែង អាចបង្កផលប៉ះពាល់ដល់សេរីភាពសារព័ត៌មាន និងធ្វើឱ្យរូបភាពប្រទេសទាំងមូលរងការខូចខាតបន្ថែមទៀត ជាពិសេសក្នុងកាលៈទេសៈបច្ចុប្បន្ន។ លោក ពុយ គា បានអំពាវនាវឱ្យអាជ្ញាធរមេត្តាពិនិត្យ និងគិតគូរលើរូបភាពប្រទេសទាំងមូល ចាប់ពីពេលនេះរហូតទៅមុខ៕

The post លោក ពុយ គា អំពាវនាវអាជ្ញាធរពិចារណាវិធានការចំពោះអ្នកសារព័ត៌មាន ដើម្បីរក្សាសេរីភាពសារព័ត៌មាន appeared first on Kampuchea Thmey Daily.

អាជ្ញាធរខេត្តសៀមរាប ជំរុញដល់មគ្គុទ្ទេសក៍ទេសចរណ៍ ត្រូវគោរពឱ្យបានខ្ជាប់ខ្ជួន ក្រមសីលធម៌វិជ្ជាជីវៈ

អ៊ិន ពិសី — Thu, 20 Nov 2025 04:44:06 +0000

ថ្លែងក្នុងពិធីបើកវគ្គបណ្ដុះបណ្ដាលភាសាចិន ដើម្បីកសាងសមត្ថភាពកម្រិតខ្ពស់សម្រាប់មគ្គុទ្ទេសក៍ទេសចរណ៍ភាសាចិន នៅខេត្តសៀមរាប កាលពីថ្ងៃទី ១៩ ខែវិច្ឆិកា ឆ្នាំ ២០២៥ លោកស្រី យូ សុភា សមាជិកក្រុមប្រឹក្សាខេត្តសៀមរាប បានជំរុញដល់មគ្គុទ្ទេសក៍ទេសចរណ៍ទាំងអស់ ឱ្យយកចិត្តទុកដាក់ និងគោរពខ្ជាប់ខ្ជួននូវក្រមប្រតិបត្តិវិជ្ជាជីវៈ និងក្រមសីលធម៌វិជ្ជាជីវៈ ដើម្បីធានាការលើកកម្ពស់កិត្យានុភាពជាតិលើឆាកអន្តរជាតិ និងរួមចំណែកដល់ការអភិវឌ្ឍវិស័យទេសចរណ៍ប្រកបដោយនិរន្តរភាព។

លោកស្រី យូ សុភា សង្កត់ធ្ងន់ថា មគ្គុទ្ទេសក៍ទេសចរណ៍ ពុំអាចខ្វះបាននូវវគ្គតម្រង់ទិស គ្រប់គ្រង ត្រួតពិនិត្យ និងការចូលរួមជំរុញឱ្យមគ្គុទ្ទេសក៍ទេសចរណ៍ទាំងអស់យកចិត្តទុកដាក់ គោរពឱ្យបានខ្ជាប់ខ្ជួនក្រមប្រតិបត្តិវិជ្ជាជីវៈ និងក្រមសីលធម៌វិជ្ជាជីវៈមគ្គុទ្ទេសក៍ទេសចរណ៍ ធានាបានការលើកកម្ពស់កិត្យានុភាពជាតិលើឆាកអន្តរជាតិ ប្រកបដោយនិរន្តរភាព និងរួមចំណែកដល់កិច្ចអភិវឌ្ឍន៍វិស័យទេសចរណ៍។ ការគោរពនេះ នឹងធានាបាននូវការលើកកម្ពស់កិត្យានុភាពជាតិលើឆាកអន្តរជាតិ ប្រកបដោយនិរន្តរភាព និងរួមចំណែកដល់កិច្ចអភិវឌ្ឍន៍វិស័យទេសចរណ៍។

លោកស្រី វណ្ណ សេរីរ័ត្ន អនុរដ្ឋលេខាធិការក្រសួងទេសចរណ៍ មានប្រសាសន៍ថា ការអភិវឌ្ឍមូលធនមនុស្សក្នុងវិស័យទេសចរណ៍ ចាំបាច់ត្រូវមានការចូលរួមពីគ្រប់តួអង្គពាក់ព័ន្ធ ទាំងផ្នែករដ្ឋ និងឯកជន ដើម្បីឆ្លើយតបបានទាំងបរិមាណ និងគុណភាព តាមតម្រូវការជាក់ស្ដែង នៃការវិវត្តន៍វិស័យទេសចរណ៍។ វគ្គបណ្ដុះបណ្ដាលនេះ ជាយន្តការបណ្ដុះបណ្ដាលក្រោមកិច្ចសហប្រតិបត្តិការជិតស្និទ្ធជាមួយស្ថាប័នពាក់ព័ន្ធ ដើម្បីជំរុញការបណ្ដុះបណ្ដាលនៅនឹងកន្លែង ជូនដល់សិក្ខាកាមមានជំនាញស្រាប់។

លោកស្រី Zhong Jie ទីប្រឹក្សាសេដ្ឋកិច្ច និងពាណិជ្ជកម្ម និងជាអគ្គទីប្រឹក្សាអមស្ថានទូតចិនប្រចាំកម្ពុជា បានឱ្យដឹងថា វគ្គបណ្ដុះបណ្ដាលនេះមានរយៈពេល ១០ ថ្ងៃ ដោយមានគ្រូអ្នកជំនាញចិនដែលមានជំនាញវិជ្ជាជីវៈកម្រិតខ្ពស់ ចំនួន ៣ រូប មកពីសាកលវិទ្យាល័យ និងសមាគមទេសចរណ៍ផ្សេងៗ គ្នា នៅក្នុងខេត្តយូណាន។ សម្រាប់ប្រធានបទសំខាន់ នៃវគ្គបណ្ដុះបណ្ដាលនេះ ផ្ដោតលើផែនការយុទ្ធសាស្ត្រអភិវឌ្ឍន៍ទេសចរណ៍ប្រកបដោយចីរភាព ការអភិវឌ្ឍអេកូទេសចរណ៍ សីលធម៌ និងវិជ្ជាជីវៈសេវាកម្មទេសចរណ៍ និងការប្រាស្រ័យទាក់ទងគ្នាឆ្លងវប្បធម៌។

សូមជម្រាបថា វគ្គបណ្ដុះបណ្ដាលនេះ រៀបចំឡើងដោយវិទ្យាស្ថានវិជ្ជាជីវៈពាណិជ្ជកម្មអន្តរជាតិខេត្តយូណាន សហការជាមួយស្ថានទូតចិនប្រចាំកម្ពុជា និងក្រសួងទេសចរណ៍ ដោយមានមគ្គុទ្ទេសក៍ទេសចរណ៍ភាសាចិនចូលរួមជាសិក្ខាកាមចំនួន ៥០ នាក់៕

អត្ថបទ ៖ គឿនវេត

The post អាជ្ញាធរខេត្តសៀមរាប ជំរុញដល់មគ្គុទ្ទេសក៍ទេសចរណ៍ ត្រូវគោរពឱ្យបានខ្ជាប់ខ្ជួន ក្រមសីលធម៌វិជ្ជាជីវៈ appeared first on Kampuchea Thmey Daily.

អាជ្ញាធរខេត្តសៀមរាប ជំរុញអាជ្ញាធរមូលដ្ឋាន និងពលរដ្ឋ ចូលរួមត្រួតពិនិត្យ ស្តារប្រព័ន្ធធារាសាស្ត្រ បញ្ចៀសជំនន់ទឹកភ្លៀង

អ៊ិន ពិសី — Mon, 29 Sep 2025 03:24:53 +0000

អាជ្ញាធរខេត្តសៀមរាប បានណែនាំដល់អាជ្ញាធរមូលដ្ឋាន និងប្រជាពលរដ្ឋមានលំនៅឋានតាមដងផ្លូវដែលរងផលប៉ះពាល់ដោយជំនន់ទឹកភ្លៀង ត្រូវចូលរួមសម្អាត កម្ចាត់ការកកស្ទះក្នុងប្រព័ន្ធលូបង្ហូរទឹក ទំនប់ប្រឡាយសាធារណៈ ដើម្បីសម្រួលលំហូរទឹក ធានាមានលំហូរទឹកលឿនបំផុតនៅពេលភ្លៀងធ្លាក់ខ្លាំង ព្រមទាំងថែរក្សាប្រព័ន្ធធារាសាស្ត្របុរាណ និង ថ្មី ឲ្យដំណើរការល្អ សម្រាប់រំដោះទឹក បញ្ចៀសបញ្ហាជំនន់ទឹកភ្លៀងក្នុងមូលដ្ឋាន។

ក្នុងកិច្ចប្រជុំពិភាក្សា និងពិនិត្យលើស្ថានភាពប្រព័ន្ធធារាសាស្ត្រ ប្រព័ន្ធលូ និងប្រឡាយសាធារណៈ ដើម្បីរំដោះទឹក និងបញ្ចៀសបញ្ហាជំនន់ទឹកភ្លៀងនៅក្នុងភូមិសាស្ត្រប៉ែកខាងកើតក្រុងសៀមរាប និងភូមិសាស្ត្រស្រុកប្រាសាទបាគង នៅចុងសប្ដាហ៍ ខែកញ្ញា ឆ្នាំ ២០២៥ នេះ លោក អ៊ឹង គឹមលាង អភិបាលរងខេត្ត បានជំរុញឲ្យប្រជាពលរដ្ឋរងផលប៉ះពាល់ ចូលរួមដាក់លូថ្មី ឬពង្រីកលូដែលមានស្រាប់នៅតាមមុខផ្ទះ។ ការធ្វើដូច្នេះ គឺជាការបន្ថែមប្រព័ន្ធបង្ហូរទឹកភ្លៀង ឬទឹកដក់ឲ្យហូរចូលទៅក្នុងប្រព័ន្ធលូធំ ដើម្បីបង្កើនល្បឿន និងសមត្ថភាពរំដោះទឹក កុំឲ្យជន់លិចទីធ្លាសាធារណៈ ឬចូលក្នុងផ្ទះ។ តាមរយៈការដាក់លូនេះ អាចការពារផ្ទះសម្បែង ទ្រព្យសម្បត្តិ និងហេដ្ឋារចនាសម្ព័ន្ធផ្លូវ មិនឲ្យខូចខាតដោយសារទឹកជំនន់។

លោក អ៊ឹង គឹមលាង សង្កត់ធ្ងន់ថា ការដោះស្រាយបញ្ហាទឹកជំនន់ មិនមែនជាបន្ទុករបស់រដ្ឋាភិបាល ឬអាជ្ញាធរមូលដ្ឋានតែឯងនោះទេ តែគឺជាការងាររួម ដែលតម្រូវឲ្យប្រជាពលរដ្ឋចូលរួមទាំងកម្លាំងពលកម្ម ឬ ថវិកា និងជួយសម្របសម្រួលទីតាំង។ នៅពេលប្រជាពលរដ្ឋចូលរួមសហការដាក់លូនៅមុខផ្ទះខ្លួនឯង ពួកគាត់នឹងមានស្មារតីថែរក្សា និងការពារប្រព័ន្ធលូនោះមិនឲ្យកកស្ទះដោយសំរាម ឬសម្ភារៈផ្សេងៗ នាំឲ្យទឹកលិចឡើងវិញ។ បន្ថែមនេះ លោកបានជំរុញដល់មន្ទីរអង្គភាពជំនាញ និងអាជ្ញាធរក្រុង-ស្រុក ត្រូវពង្រឹងកិច្ចសហការរវាងអាជ្ញាធរពាក់ព័ន្ធ ដើម្បីធានាប្រសិទ្ធភាពការងារ។

លោកអភិបាលរងខេត្ត ក៏បានស្នើដល់អាជ្ញាធរពាក់ព័ន្ធ ត្រូវវាយតម្លៃឡើងវិញនូវស្ថានភាពលូ បំពង់បង្ហូរទឹក ប្រឡាយទឹក និងស្ថានីយបូមទឹកដែលមានស្រាប់ ថាតើមានបញ្ហាស្ទះ ខូចខាត ឬតម្រូវការជួសជុល និងពង្រីកកម្រិតណា កំណត់តំបន់ងាយរងគ្រោះដោយជំនន់ទឹកភ្លៀងខ្លាំងជាងគេ?។ ត្រូវដាក់ចេញនូវវិធានការអាទិភាព ដូចជា ការជីកស្តារប្រឡាយ និងការបំពាក់លូធំៗ ដើម្បីកាត់បន្ថយផលប៉ះពាល់ នៃជំនន់ទឹកភ្លៀងមកលើជីវភាពរស់នៅរបស់ប្រជាពលរដ្ឋ ហេដ្ឋារចនាសម្ព័ន្ធ និងសេដ្ឋកិច្ចក្នុងមូលដ្ឋាន៕

អត្ថបទ ៖ គឿន វេត

The post អាជ្ញាធរខេត្តសៀមរាប ជំរុញអាជ្ញាធរមូលដ្ឋាន និងពលរដ្ឋ ចូលរួមត្រួតពិនិត្យ ស្តារប្រព័ន្ធធារាសាស្ត្រ បញ្ចៀសជំនន់ទឹកភ្លៀង appeared first on Kampuchea Thmey Daily.

រដ្ឋបាលខេត្តតាកែវ ស្នើអាជ្ញាធរស្រុកជាប់ព្រំប្រទល់ព្រលានយន្តហោះអន្តរជាតិតេជោ ទប់ស្កាត់សកម្មភាពអាចប៉ះពាល់ការហោះហើរ

អ៊ិន ពិសី — Wed, 17 Sep 2025 07:24:16 +0000

រដ្ឋបាលខេត្តតាកែវ បញ្ជាឲ្យអាជ្ញាធរមូលដ្ឋាន ចាត់វិធានការទប់ស្កាត់ការបាញ់កាំជ្រួច ភ្លើងហ្វា ភ្លើងឡាស៊ែរ ការបង្ហោះដ្រូន គោម និងប៉េងប៉ោង នៅតំបន់ជុំវិញអាកាសយានដ្ឋានអន្តរជាតិតេជោ ដែលការហាមឃាត់នេះធ្វើឡើងក្នុងទិសដៅធានាសុវត្ថិភាពក្នុងប្រតិបត្តិការហោះហើររបស់យន្តហោះ។

តាមសេចក្ដីជូនដំណឹងរបស់រដ្ឋបាលខេត្តតាកែវ ចេញកាលពីថ្ងៃទី ១៦ ខែកញ្ញា ឆ្នាំ ២០២៥ បានស្នើទៅកាន់អភិបាលស្រុកបាទី និងស្រុកព្រៃកប្បាស ត្រូវចាត់វិធានការទប់ស្កាត់ការបង្ហោះដ្រូន ខ្លែង គោម ប៉េងប៉ោង បាញ់កាំជ្រួច ភ្លើងហ្វា ភ្លើងឡាស៊ែរបញ្ចាំងឡើងលើ និងសកម្មភាពផ្សេងៗ ទៀត ដែលអាចប៉ះពាល់ដល់សុវត្ថិភាពប្រតិបត្តិការហោះហើររបស់អាកាសយានដ្ឋានក្នុងភូមិសាស្ត្ររបស់ខ្លួន ស្ថិតនៅតំបន់ជុំវិញអាកាសយានដ្ឋានអន្តរជាតិតេជោ។ យ៉ាងណាមិញ សកម្មភាពទាំងនេះ អាចប្រព្រឹត្តទៅបានទាល់តែមានការអនុញ្ញាតពីរដ្ឋលេខាធិការអាកាសចរណ៍ស៊ីវិល និងជូនដំណឹងដល់អ្នកប្រើប្រាស់ដែនអាកាស។

សូមបញ្ជាក់ថា អាកាសយានដ្ឋានអន្តរជាតិតេជោ ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល និងមួយផ្នែកស្ថិតនៅស្រុកបាទី ខេត្តតាកែវ ត្រូវបានសាងសង់នៅលើផ្ទៃដីជាង ២៦០០ ហិតា។ អាកាសយានដ្ឋាន នេះ ជាប្រភេទព្រលាន 4F មានសមត្ថភាពទទួលបានការហោះហើរពីឆ្ងាយឆ្លងទ្វីបដោយអាចឲ្យយន្តហោះធុនធំរហូតដល់ Airbus A 380-800 និងយន្តហោះ Boeing 747 – 800 ចុះចតបាន។

អាកាសយានដ្ឋានអន្តរជាតិតេជោ នេះ បានបើកប្រតិបត្តិការហោះហើរជាផ្លូវការ កាលពីថ្ងៃទី ០៩ ខែកញ្ញា ឆ្នាំ ២០២៥ ថ្មីៗ នេះ។ ដោយឡែក ពិធីសម្ពោធជាផ្លូវការវិញ គ្រោងរៀបចំឡើងនៅថ្ងៃទី ២០ ខែតុលា ឆ្នាំ ២០២៥ ខាងមុខនេះ ក្រោមវត្តមាន សម្តេចនាយករដ្ឋមន្ត្រី ហ៊ុន ម៉ាណែត៕

អត្ថបទ ៖ វីរៈ

The post រដ្ឋបាលខេត្តតាកែវ ស្នើអាជ្ញាធរស្រុកជាប់ព្រំប្រទល់ព្រលានយន្តហោះអន្តរជាតិតេជោ ទប់ស្កាត់សកម្មភាពអាចប៉ះពាល់ការហោះហើរ appeared first on Kampuchea Thmey Daily.

អាជ្ញាធរខេត្តព្រះវិហារ ណែនាំឲ្យពលរដ្ឋប្រុងប្រយ័ត្នចំពោះទីតាំងសមរភូមិក្តៅ ខណៈត្រឡប់ទៅលំនៅឋានវិញអស់ប្រមាណ ៦០%

អ៊ិន ពិសី — Sat, 06 Sep 2025 05:18:46 +0000

ជនភៀសសឹកនៅភូមិសាស្ត្រស្រុកជាំក្សាន្ត នៃខេត្តព្រះវិហារ ដែលរត់គេចពីការឈ្លានពានប្រដាប់អាវុធរបស់យោធាថៃ បានវិលត្រឡប់ទៅលំនៅឋានរបស់ខ្លួនវិញ ប្រមាណជា ៦០ ភាគរយហើយ ជាមួយនេះ អាជ្ញាធរមូលដ្ឋាន ណែនាំពលរដ្ឋប្រុងប្រយ័ត្នខ្ពស់ចំពោះគ្រាប់មិនទាន់ផ្ទុះ និងការប្រើប្រាស់ទឹកភ្លៀង ក៏ដូចជាផលអនុផលព្រៃឈើ ព្រោះកាលពីពេលថ្មីៗ នេះ យោធាថៃ បានបាញ់ផ្សែងពុលបណ្តាលឲ្យពលរដ្ឋរបស់ខ្លួនឈឺ និងស្លាប់មួយចំនួនផងដែរ។

ជនភៀសសឹកស្នាក់នៅមណ្ឌលសុវត្ថិភាពទាំងអស់ នៃខេត្តព្រះវិហារ មានចំនួន ៣ ៥៦៧ គ្រួសារ ស្មើនឹង ១២ ០៥៤ នាក់ ក្នុងនោះ ស្រីចំនួន ៦ ៤៨១ នាក់។ នេះបើតាមអ្នកនាំពាក្យរដ្ឋបាលខេត្តព្រះវិហារ បានឲ្យដឹងនៅព្រឹកថ្ងៃទី ៦ ខែកញ្ញា ឆ្នាំ ២០២៥ នេះ។

ទោះបីជាពលរដ្ឋភៀសសឹកមួយចំនួនធំ បានវិលត្រឡប់ទៅលំនៅឋានវិញក៏ដោយ ក៏រដ្ឋបាលខេត្តព្រះវិហារ នៅបន្តយកចិត្តទុកដាក់ពិនិត្យទីតាំងមណ្ឌលសុវត្ថិភាព រក្សាសន្តិសុខ ទឹក កញ្ចប់អាហារ គ្រឿងឧបភោគបរិភោគ ប្រព័ន្ធទឹកស្អាត អគ្គិសនី បង្គន់អនាម័យ ក្រុមគ្រូពេទ្យថែទាំជំងឺ បន្តទទួល និងបែងចែកអំណោយរបស់ក្រសួង ស្ថាប័ន និងសប្បុរសជននានា ជូនដល់ពលរដ្ឋភៀសសឹកនៅតាមមណ្ឌលសុវត្ថិភាពជាបន្ត និងបន្តចាត់កម្លាំងល្បាតការពារសណ្ដាប់ធ្នាប់ និងទ្រព្យសម្បត្តិប្រជាពលរដ្ឋ។ រដ្ឋបាលខេត្ត ក៏នៅបន្តប្រមូលទិន្នន័យ នៃផលប៉ះពាល់ និងការខូចខាតបណ្ដាលមកពីការឈ្លានពានរបស់កងទ័ពថៃមកលើកម្ពុជាផងដែរ។

សូមជម្រាបថា ការប្រយុទ្ធគ្នានៅតាមបណ្ដោយព្រំដែនដែលបង្កឡើងពីការឈ្លានពានរបស់កងទ័ពថៃ បានធ្វើឱ្យប្រជាពលរដ្ឋរាប់ម៉ឺននាក់នៅក្នុងភូមិសាស្ត្រ នៃស្រុកជាំក្សាន្ត បាននាំគ្នាជម្លៀសខ្លួនចេញពីលំនៅឋានឆ្ពោះទៅទីសុវត្ថិភាព ក្នុងស្រុកគូលែន ស្រុកត្បែងមានជ័យ ស្រុករវៀង ស្រុកឆែប និងក្រុងព្រះវិហារ៕

អត្ថបទ ៖ ជុន កុសល

The post អាជ្ញាធរខេត្តព្រះវិហារ ណែនាំឲ្យពលរដ្ឋប្រុងប្រយ័ត្នចំពោះទីតាំងសមរភូមិក្តៅ ខណៈត្រឡប់ទៅលំនៅឋានវិញអស់ប្រមាណ ៦០% appeared first on Kampuchea Thmey Daily.

ពលរដ្ឋស្នើអាជ្ញាធរពិនិត្យមើលជង្ហុកដ៏ធំ ១ កន្លែង លើផ្លូវ ៥៩៨ នៅខណ្ឌសែនសុខ តែងបង្កគ្រោះថ្នាក់ដល់អ្នកដំណើរជាញឹកញាប់

អ៊ិន ពិសី — Fri, 29 Aug 2025 09:14:40 +0000

ប្រជាពលរដ្ឋ បានស្នើសុំអាជ្ញាធរ សូមមេត្តាជួយចុះពិនិត្យមើលជង្ហុកដ៏ធំ ១ កន្លែង នៅលើផ្លូវ ៥៩៨ ក្នុងមូលដ្ឋានខណ្ឌសែនសុខ ដែលតែងតែបង្កគ្រោះថ្នាក់ដល់អ្នកធ្វើដំណើរឆ្លងកាត់ជាញឹកញាប់។

ជាក់ស្ដែងទីតាំងជង្ហុកនេះស្ថិតនៅតាមបណ្ដោយផ្លូវ ៥៩៨ ត្រង់ចំណុចស្តុបប្រសប់ជា ៣ ផ្លូវ ៦០៨ និងផ្លូវ ៣១៥ ក្នុងមូលដ្ឋានខណ្ឌសែនសុខ ដែលតែងតែបង្កគ្រោះថ្នាក់ដល់អ្នកធ្វើដំណើរតាមផ្លូវ ហើយខ្លះទៀតដួលបែកមុខបែកមាត់។

អ្នកស្រី សុគន្ធ ជាប្រជាពលរដ្ឋ បានឲ្យដឹងថា ទីតាំងជង្ហុកនេះ ដំបូងឡើយ គ្មាននោះទេ តែដោយសារមានរថយន្តដឹកទំនិញធំៗ បើកមកកិន ទើបធ្វើឲ្យផ្លូវនេះខូចបន្តិចម្ដងៗ ចំណែកកន្លែងខ្លះក៏មានស្រុតផងដែរ ហើយប្រជាពលរដ្ឋដែលនៅក្បែរនោះបានយកថ្មមកចាក់បំពេញ ដើម្បីកុំឲ្យមានអ្នករងគ្រោះដោយសារជិះធ្លាក់ជង្ហុក។

ចំណែក លោក លីគា ដែលជាប្រជាពលរដ្ឋ ក៏បានបញ្ជាក់ដែរថា ជង្ហុកមួយនេះ តែងតែបង្កគ្រោះថ្នាក់ដល់ប្រជាពលរដ្ឋនៅពេលធ្វើដំណើរ ជាពិសេសពេលមានភ្លៀងធ្លាក់ទឹកដក់លិចបាត់មើលមិនឃើញ ធ្វើឲ្យអ្នកធ្វើដំណើរជិះមកធ្លាក់ដួលប្រឡាក់ខោអាវ និងរងរបួសផងដែរ។

លោក លីគា បានសំណូមពរដល់អាជ្ញាធរពាក់ព័ន្ធក្នុងមូលដ្ឋាន សូមមេត្តាជួយចុះពិនិត្យមើល និងធ្វើការជួសជុលជង្ហុកខាងលើនេះផង ជៀសវាងមានគ្រោះថ្នាក់ដល់អ្នកធ្វើដំណើរបន្តទៀត។

ពាក់ព័ន្ធបញ្ហានេះដែរ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឲ្យកម្ពុជាថ្មីដឹងថា លោកនឹងចាត់ឲ្យក្រុមការងារចុះទៅធ្វើការត្រួតពិនិត្យមើលជាបន្ទាន់។

បន្ថែមនោះ លោក ផន រឹម ក៏បានអរគុណសម្រាប់ការជួយផ្ដល់ព័ត៌មានផងដែរ៕

អត្ថបទ ៖ ម៉េង

The post ពលរដ្ឋស្នើអាជ្ញាធរពិនិត្យមើលជង្ហុកដ៏ធំ ១ កន្លែង លើផ្លូវ ៥៩៨ នៅខណ្ឌសែនសុខ តែងបង្កគ្រោះថ្នាក់ដល់អ្នកដំណើរជាញឹកញាប់ appeared first on Kampuchea Thmey Daily.

អាជ្ញាធរខេត្តកណ្ដាល ចុះពិនិត្យមើលបច្ចេកទេសដាក់ប្រព័ន្ធលូរំដោះទឹកភ្លៀង និង ប្រព័ន្ធលូចម្រោះទឹកកង្វក់ នៅក្រុងតាខ្មៅ

អ៊ិន ពិសី — Wed, 06 Aug 2025 07:01:42 +0000

អភិបាលខេត្តកណ្តាល បានដឹកនាំមន្ត្រីជំនាញចុះពិនិត្យមើលការដាក់ប្រព័ន្ធលូរំដោះទឹកភ្លៀង និងប្រព័ន្ធលូចម្រោះទឹកកង្វក់ ក្នុងក្រុងតាខ្មៅ នៅតាមបណ្តោយផ្លូវលេខ ១០៨ រហូតដល់ផ្លូវលេខ ២១A ដើម្បីពន្លឿនគម្រោងទាំងអស់ឲ្យឆាប់បានបញ្ចប់ការងារសាងសង់ឆាប់រហ័សទាន់ពេលវេលា។

លោក គួច ចំរើន អភិបាល នៃគណៈអភិបាលខេត្តកណ្ដាល បានឲ្យដឹងថា ជារៀងរាល់ឆ្នាំក្នុងតំបន់នេះ នារដូវវស្សាម្ដងៗ តែងតែរងនូវការជន់លិចដោយជំនន់ទឹកភ្លៀង ធ្វើឲ្យប្រជាពលរដ្ឋជួបការលំបាកក្នុងការធ្វើដំណើរ និងខូចខាតសម្ភារៈពេលទឹកជន់លិច ដូច្នេះ ក្រុមការងារបច្ចេកទេសដែលកំពុងអនុវត្តគម្រោងសាងសង់ប្រព័ន្ធរំដោះទឹកភ្លៀង សូមពន្លឿនការសាងសង់ឲ្យបានលឿន ហើយត្រូវបញ្ចប់គម្រោងមុនរដូវភ្លៀងធ្លាក់ខាងមុខនេះ ប្រកបដោយស្តង់ដារបច្ចេកទេស ដើម្បីធានាឲ្យប្រព័ន្ធលូរំដោះទឹកនេះ បានរំដោះទឹកភ្លៀង បញ្ចៀសការជន់លិច កាត់បន្ថយការលំបាករបស់ពលរដ្ឋនៅតំបន់នេះផងដែរ។

លោកអភិបាលខេត្តកណ្ដាល ក៏បានអំពាវនាវប្រជាពលរដ្ឋរស់នៅតំបន់ខាងលើ ក៏ដូចជាអ្នកធ្វើដំណើរឆ្លងកាត់ក្នុងអំឡុងពេលអនុវត្តគម្រោង សូមមេត្តាយោគយល់អធ្យាស្រ័យដែលធ្វើឲ្យប៉ះពាល់ការធ្វើដំណើរ បង្កការរំខានដល់ការរស់នៅ ប៉ុន្តែពេលគម្រោងនេះអនុវត្តរួចរាល់ តំបន់នេះ អាចនឹងជៀសផុតការជន់លិចដោយទឹកភ្លៀងដែលតែងតែលិចជារៀងរាល់ឆ្នាំ៕

អត្ថបទ ៖ ម៉េង

The post អាជ្ញាធរខេត្តកណ្ដាល ចុះពិនិត្យមើលបច្ចេកទេសដាក់ប្រព័ន្ធលូរំដោះទឹកភ្លៀង និង ប្រព័ន្ធលូចម្រោះទឹកកង្វក់ នៅក្រុងតាខ្មៅ appeared first on Kampuchea Thmey Daily.

អាជ្ញាធរសង្កាត់អូរឫស្សី ៤ បំភ្លឺជូនសាធារណជនថាមិនមានការយក ទីតាំងសង្កាត់ ធ្វើជាកន្លែងផ្ញើម៉ូតូនោះទេ

អ៊ិន ពិសី — Sat, 05 Jul 2025 05:12:32 +0000

នៅថ្ងៃទី ៥ ខែកក្កដា ឆ្នាំ ២០២៥ នេះ អាជ្ញាធរសង្កាត់អូរឫស្សី ៤ បានឆ្លើយបំភ្លឺ ក្រោយមានការបង្ហោះនៅលើបណ្ដាញសង្គម ពាក់ព័ន្ធនឹងអាជ្ញាធរសង្កាត់អូរឫស្សី ៤ ថា បានយកទីតាំងសាលាសង្កាត់ធ្វើជាកន្លែងផ្ញើម៉ូតូពេលយប់ ប៉ះពាល់ដល់សណ្ដាប់ធ្នាប់សាធារណៈ ដែលនាំឲ្យមហាជនមានការភាន់ច្រឡំ។

ប្រជាពលរដ្ឋម្នាក់ ដែលមានផ្ទះនៅជាន់ខាងលើ សាលាសង្កាត់អូរឫស្សី ៤ បានលើកឡើងថា ទីតាំងផ្ញើម៉ូតូផ្សេងៗ មានទីតាំងឆ្ងាយពីផ្លូវមកផ្ទះរបស់ពួកគាត់។ ដូច្នេះ ពួកគាត់ បានស្នើសុំឲ្យមន្ត្រី នៃរដ្ឋបាលសង្កាត់ ដាក់ទទួលផ្ញើម៉ូតូនៅពេលយប់ផង ដើម្បីងាយស្រួលដល់ពួកគាត់ពេលចេញពីធ្វើការចេញចូលពេលយប់ មិនលំបាកដើរឆ្ងាយទៅផ្ទះ។

បើតាមការលើកឡើងពីប្រជាពលរដ្ឋផ្សេងទៀត បានឲ្យដឹងថា ចំពោះកន្លែងផ្ញើម៉ូតូផ្សេងទៀត នៅឆ្ងាយពីផ្ទះ ដោយពិបាកក្នុងការដើរទៅយកម៉ូតូនៅពេលព្រឹក ហើយពេលចេញទៅសាលារៀន ឬ ទៅកន្លែងធ្វើការ វាខាតពេលវេលាច្រើន ដូច្នេះហើយទើបពួកគាត់បានសុំអាជ្ញាធរឲ្យជួយទទួលផ្ញើតែពេលយប់ ចាប់ពីម៉ោង ៧ ឬ ៨ យប់ និង យកចេញវិញ មុនម៉ោង ៧ ព្រឹក។

ជុំវិញបញ្ហានេះ លោក អៀង សុខឃីម ចៅសង្កាត់អូរឫស្សី ៤ បានប្រាប់កម្ពុជាថ្មីថា ចំពោះរឿងផ្ញើម៉ូតូមុខសាលាសង្កាត់ ដោយសារមានប្រជាពលរដ្ឋដែលមានផ្ទះជាន់លើ ប្រមាណ ១០ នាក់ បានសុំឲ្យខាងអាជ្ញាធរទទួលផ្ញើម៉ូតូរបស់ពួកគាត់។

ហេតុដូច្នេះ ទើបមន្ត្រី នៃសង្កាត់ ដាក់ទទួលផ្ញើម៉ូតូនៅពេលយប់តែប៉ុណ្ណោះ ដោយមិនមានការទាមទារតម្លៃផ្ញើនោះទេ ប៉ុន្តែប្រជាពលរដ្ឋគាត់បានឲ្យតាមមនោសញ្ចេតនា ១ ០០០ រៀល ២ ០០០ រៀល ក្នុង ១ ដង និងទទួលយកម៉ូតូទៅវិញមុនម៉ោង ៧ ព្រឹក រៀបចំសណ្ដាប់ធ្នាប់ឲ្យបានល្អប្រសើរ មិនឲ្យមានផលប៉ះពាល់ដល់ការធ្វើចរាចរណ៍លើដងផ្លូវសាធារណៈឡើយ៕

អត្ថបទ ៖ ម៉េង

The post អាជ្ញាធរសង្កាត់អូរឫស្សី ៤ បំភ្លឺជូនសាធារណជនថាមិនមានការយក ទីតាំងសង្កាត់ ធ្វើជាកន្លែងផ្ញើម៉ូតូនោះទេ appeared first on Kampuchea Thmey Daily.