កម្មវិធី “សួនសៀវភៅ” នេះធ្វើឡើងក្នុងគោលបំណងលើកកម្ពស់ការយល់ដឹងផ្ដើមចេញពីការអានសៀវភៅ និងជួយផ្សព្វផ្សាយលើកកម្ពស់វប្បធម៌នៃការអានឱ្យបានទូលំទូលាយជាសាធារណៈ។ កម្មវិធីនេះដំណើរការនៅរៀងរាល់ចុងសប្ដាហ៍នាថ្ងៃសៅរ៍និងថ្ងៃអាទិត្យ ចាប់ផ្ដើមម៉ោង៦ល្ងាចដល់ម៉ោង៨កន្លះយប់។

គួរបញ្ជាក់ផងដែរថា សកម្មភាពមួយចំនួនត្រូវបានបញ្ចូលក្នុងកម្មវិធី “សួនសៀវភៅ” របស់សមាគម
បណ្ណាល័យគំនិត ដូចជា សកម្មភាពអំណាន ដែលសាធារណជនទូទៅ ជាពិសេសសិស្សានុសិស្ស អាចចូលរួមអានសៀវភៅដោយសេរីនូវសៀវភៅច្រើនក្បាលនិងច្រើនប្រភេទ ភាគច្រើនសៀវភៅទាំងនេះសុទ្ធតែទទួលបានពីការបរិច្ចាគរបស់សំណាក់សាធារណជនទូទៅ។ សាធារណជនដែលមកដើរលំហែកម្សាន្តតាមបណ្ដោយផ្លូវថ្មើរជើង (Walk Street) នេះទៀតសោធក៏អាចមកអង្គុយអាននៅទីតាំងផ្ទាល់ ឬអាចស្នើយកទៅអាននៅគេហដ្ឋានបានដោយក្ដីរីករាយ។

បន្ថែមលើសពីការអានសៀវភៅនេះ សមាគមបានរៀបចំនូវ “វេទិកាចែករំលែក” ដោយបានអញ្ជើញកវីនិពន្ធគ្រប់ស្រទាប់មកចូលរួមធ្វើជាវាគ្មិនចែករំលែកបទពិសោធន៍នៃការតែងនិពន្ធរបស់ខ្លួនផងដែរ។ បងប្អូនអ្នកស្រឡាញ់ការអានសៀវភៅឬអ្នកដែលមាននិស្ស័យនឹងការតែងនិពន្ធ អាចមកជួបពិភាក្សាដោយផ្ទាល់ជាមួយនឹងអ្នកនិពន្ធដែលពោរពេញដោយសមត្ថភាពនិងបទពិសោធន៍នៃការតែងនិពន្ធ។ ការប្រឹក្សាយោបល់នានាពាក់ព័ន្ធនឹងការតែងនិពន្ធ ការចងក្រង ការស្វែងរកសៀវភៅឬប្រភពឯកសារចាំបាច់នានាក៏ត្រូវបានផ្ដល់ជូនពីសំណាក់កវីនិពន្ធដែលជាវាគ្មិនរបស់កម្មវិធីនេះផងដែរ។

ក្នុងនោះទៀតសោធ ខាងសមាគមក៏ទទួលការបរិច្ចាគសៀវភៅបន្ថែមទៀតពីសំណាក់សាធារណជនផងដែរ។ សាធារណជនដែលមានបំណងចង់បរិច្ចាគសៀវភៅ អាចមកបរិច្ចាគដោយផ្ទាល់នៅទីតាំង “សួនសៀវភៅ” ។ សៀវភៅទាំងនោះនឹងត្រូវឧបត្ថម្ភទៅកាន់បណ្ណាល័យដែលនៅតំបន់ដាច់ស្រយាល ខ្វះខាត និងមានតម្រូវការជាចាំបាច់។

សូមរំឭកផងដែរថា ក្នុងឱកាសអញ្ជើញជាអធិបតីប្រគល់សញ្ញាបត្រជូនដល់និស្សិតវិទ្យាស្ថាន វ៉ាន់ដា នៅព្រឹកថ្ងៃទី១១ ខែមីនា ឆ្នាំ២០២៥ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឱ្យដឹងថា មានតែចំណេះវិជ្ជាទេដែលអាចជួយបណ្ដុះនូវផ្នត់គំនិតចម្រើនជឿនលឿន ហើយអាចជួយលើកស្ទួយប្រទេសជាតិឱ្យកាន់តែរីកចម្រើនថែមទៀតផងដែរ។

សម្ដេចមានប្រសាសន៍ថា៖ «មិនចាំបាច់ទាល់តែប្អូន អុក វាន់ដេ ទៅដល់ទេ! ហើយចប់ពីហ្នឹងស្ងាត់ឈឹងទេ! យើងបង្កើតមួយខ្លួនឯង ទិវា ឬកន្លែងណាមួយ។ សៀវភៅអត់ខ្វះទេ ខ្ញុំថាមិនពិបាកទេ សៀវភៅ១ពាន់ក្បាល ដាក់សម្រាប់អានចុងសប្តាហ៍ ឬមួយយ៉ាងណា? នៅរាជធានីភ្នំពេញដូចគ្នា បើថាចាំបាច់ ផ្លូវដើរ (Walk street) ហ្នឹង កន្លែងណាដាក់ជ្រុងនៃអំណានទៅ»។

​បើតាម​រដ្ឋបាល​រាជធានី​ភ្នំពេញ គម្រោង​ផ្លូវ​ថ្មើរជើង (Walk Street) ធ្វើ​ឡើង​នៅតាម​បណ្ដោយ​ទន្លេចតុមុខ​ចាប់​ពីមុខ​ប្រៃសណីយ៍​កម្ពុជា រហូតដល់​មុខ​ព្រះបរមរាជវាំង ស្ថិតនៅក្នុង​សង្កាត់​វត្តភ្នំ សង្កាត់​ផ្សារកណ្ដាល​ទី​១ សង្កាត់​ផ្សារកណ្ដាល​ទី​២ និង​សង្កាត់​ជ័យជម្នះ ខណ្ឌដូនពេញ រាជធានី​ភ្នំពេញ​៕

The post សមាគមបណ្ណាល័យគំនិតដាក់ដំណើរការកម្មវិធី “សួនសៀវភៅ”នៅផ្លូវថ្មើជើងភ្នំពេញ appeared first on Kampuchea Thmey Daily.

តាមប្រភពបានសរសេរថា ៖ “៧ថ្ងៃនៅក្នុងក្រុងស្ទឹងត្រែង ទទួលបានអ្នកអាន១០០០នាក់ ថ្ងៃចុងក្រោយសម្រុកមកច្រើនមែនទែន។ អរគុណមិត្តអ្នកអានទាំងអស់គ្នា! ខ្ញុំសង្ឃឹមថាសកម្មភាពនេះនឹងជះផលល្អក្នុងខេត្តរបស់អ្នក”។

យុវតី ឆែម ស្រីគា ដែលជាស្ថាបនិកសួនអំណានភ្នំពេញ នឹងជាអ្នកធ្វើអំណានដោយម៉ូតូ ២៥ខេត្តក្រុង បានជិះម៉ូតូផ្ទាល់ខ្លួនដឹកសៀវភៅតាមបណ្តាខេត្តផ្សេងៗ ជាពិសេស តាមខេត្តដាច់ស្រយាល ដើម្បីនាំយកសៀវភៅជាច្រើនក្បាលដាក់តាំងលើសួនសាធារណៈនានាដើម្បីឱ្យប្រជាពលរដ្ឋខ្មែរបានអាន និងជួយលើកកម្ពស់ការអានសៀវភៅនៅកម្ពុជាឱ្យកាន់តែច្រើន។ សម្រាប់ខេត្តស្ទឹងត្រែងនេះ គឺជាលើកទី២ហើយ ដែលខ្លួនបាននាំយកសៀវភៅដោយម៉ូតូដាក់នៅសួនសាធារណៈសម្រាប់ឱ្យពលរដ្ឋគ្រប់រូបអានបង្កើនចំណេះ បើគិតត្រឹមថ្ងៃទី២៨ ខែមីនា គឺជាថ្ងៃទី៧ នៃការដាក់សៀវភៅក្នុងខេត្តស្ទឹងត្រែងនេះ។

តាមរយៈវីដេអូ ៣នាទីជាង ស្រីគា បានបង្ហាញពីក្តីរំភើបដែលប្រជាពលរដ្ឋគ្រប់វ័យគាំទ្រអានសៀវភៅលើសួននេះ មានទាំងក្មេង និងចាស់ ច្រើនកុះករបាននាំគ្នាកាន់សៀវភៅអាន។ ស្រីគាសង្កេតឃើញថា ឱ្យតែជាថ្ងៃចុងក្រោយនៃការតាំងសៀវភៅ គឺតែងមានមនុស្សមកគាំទ្រច្រើនមែនទែន។   

ឆែម ស្រីគា និយាយថា ខ្លួនពិតជាសប្បាយចិត្តខ្លាំងមែនទែន នៅពេលដែលប្រជាពលរដ្ឋ អាណាព្យាបាល មាតាបិតា នាំកូនៗ និងមកអានសៀវភៅនៅទីនេះ ដោយមិនប្រកាន់ថា ជាកន្លែងសាធារណៈ ព្រោះស្រីគាថា ការអានសៀវភៅនៅកន្លែងណាក៏សុទ្ធតែទទួលបានចំណេះដឹង ហើយចំពោះការអានតាមសាធារណៈនេះ ក៏ជាផ្នែកមួយទទួលបានចំណេះដឹង និងលើកទឹកចិត្ត បណ្តុះចិត្ត និងជាគំរូល្អដល់កូនខ្មែរជំនាន់ក្រោយ៕

ដោយ៖ អុន ស្រីមាន

The post រយៈពេល ១សប្តាហ៍ មានអ្នកអានសៀវភៅលើសួននៅក្រុងស្ទឹងត្រែង ១០០០នាក់ appeared first on Kampuchea Thmey Daily.

ការសំណូមពរនេះ ​ធ្វើឡើងស្របពេលដែលក្រសួងវប្បធម៌ និងវិចិត្រសិល្បៈ និងក្រសួងអប់រំយុវជន និងកីឡា បានរៀងចំការពិព័រណ៍សៀវភៅ ដើម្បីអបអរសាទរទិវាជាតិអំណានលើកទី១០ រយៈពេល៤ថ្ងៃ ចាប់ពីថ្ងៃទី៨ ដល់ថ្ងៃទី១១ ខែមីនា ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជា ក្រោមប្រធានបទ “ការអានផ្សារភ្ជាប់អន្តរជំនាន់មនុស្សក្នុងសង្គម”។ ក្នុងឱកាសពិព័រណ៍សៀវភៅនេះ លោក កុក រស់ ប្រធាននាយកដ្ឋានសៀវភៅ និងការអាន បានបញ្ជាក់ថា៖ “ពិព័រណ៍សៀវភៅ គឺបានបង្ហាញនិងបញ្ជូនសៀវភៅទៅដល់ដៃអ្នកអាន។  បន្ទាប់ពីនេះ យើងត្រូវជំរុញការអានបន្ថែមទៀត ដោយបង្ហាញឱ្យស្គាល់អំពីគុណប្រយោជន៍ទាំង១០នៃការអានសៀវភៅ នោះទើបជួយឱ្យកូនខ្មែរស្នេហាការអាននិងទទួលបានសារៈដ៏វិសេសវិសាលពីការអាន”។

ជាមួយគ្នានេះ ដើម្បីលើកស្ទួយការអានឱ្យកាន់តែមានការកើនឡើង និងល្អប្រសើរ លោក កុក រស់ បានសំណូមពរដល់យុវជនខ្មែរគ្រប់រូប គួរតែងាកមកអានសៀវភៅឱ្យបានច្រើនជាងការលេងហ្វេសប៊ុក ដើម្បីទទួលបានចំណេះដឹងថ្មីៗ។ បន្ថែមពីនេះ លោកក៏បានសំណូមពរដល់អាណាព្យាបាលគ្រប់រូប គួររៀបចំឱ្យមានសៀវភៅនៅតាមផ្ទះរៀងខ្លួនឱ្យបានច្រើន តាមពាក្យស្លោកថា “ផ្ទះមួយ បណ្ណាល័យមួយ” ដើម្បីបណ្តុះគំនិតកូនៗឱ្យស្រឡាញ់ និងចូលចិត្តងានសៀវភៅ ព្រោះសៀវភៅផ្តល់ចំណេះដឹងជ្រៅជ្រះ ធ្វើឱ្យមានអត្តចរិតថ្លៃថ្នូរ និងធ្វើឱ្យមនុស្សមានគុណធម៌ក្នុងការរស់នៅផងដែរ។

យ៉ាងណា កម្ពុជា តែងតែរៀបចំព្រឹត្តិការណ៍ពិព័រណ៍សៀវភៅជាបន្តបន្ទាប់ ដើម្បីជំរុញឱ្យការអានសៀវភៅមានការកើនឡើងបន្ថែមទៀត។ ទន្ទឹមនេះ តាមរយៈការពិព័រណ៍សៀវភៅកន្លងមក លោក កុក រស់ ក្នុងនាមជាប្រធាននាយកដ្ឋានសៀវភៅ និងការអាន សង្កេតឃើញថា សន្ទុះនៃការគាំទ្រ និងអានសៀវភៅ ពីមួយឆ្នាំទៅមួយឆ្នាំមានការកើនឡើងជាលំដាប់ ដោយក្នុងនោះមានការចូលរួម ទិញ និងលក់សៀវភៅរាប់ម៉ឺនក្បាល ចន្លោះពី១០-២០ម៉ឺនក្បាល។

សូមបញ្ជាក់ថា ពិព័រណ៍សៀវភៅរយៈពេល៤ថ្ងៃខាងមុខ ក្រៅពីការពិព័រណ៍សៀវភៅរាប់ម៉ឺនក្បាល ក៏មានការលេងល្បែងកម្សាន្តផ្សេងៗ កន្លែងថតរូបស្អាតៗ ការគូរគំនូរ និងផាត់ពណ៌សម្រាប់កុមារតូចៗថែមទៀត៕

អត្ថបទ៖ អុន ស្រីមាន

The post លោក កុក រស់ សំណូមពរយុវជនគ្រប់រូប នាំគ្នាអានសៀវភៅឱ្យបានច្រើនជាងលេងហ្វេសប៊ុក appeared first on Kampuchea Thmey Daily.

យុវតី ឆែម ស្រីគា បាននាំយកទេសចរណ៍អំណាន ដោយកញ្ញាជិះម៉ូតូផ្ទាល់ខ្លួនដល់ខេត្តមណ្ឌលគិរី ដើម្បីរៀបចំតាំងសៀវភៅជាង៥០០ក្បាល ជាប្រភេទសៀវភៅចម្រុះ មានដូចជា ការលើកទឹកចិត្ត ប្រវត្តិសាស្ត្រ អប់រំ សៀវភៅកុមារ និងសៀវភៅជំនួញជាដើម។ តាមរយៈ៣ថ្ងៃនេះ កញ្ញា ឆែម ស្រីគា ប្រាប់ កម្ពុជាថ្មី ថា ទោះបីខេត្តមណ្ឌលគិរីមានប្រជាជនតិចជាងគេ និងនៅឆ្ងាយពិតមែន ប៉ុន្តែ ប្រជាជននៅទីនោះ ទាំងក្មេង ទាំងចាស់ បានចូលរួមគាំទ្រ អានសៀវភៅច្រើន សរុបទាំង៣ថ្ងៃ មានជិត២០០នាក់ ហើយអ្នកដែលអានសៀវភៅចប់មួយក្បាលៗ មានជិត៥០%។ កញ្ញាយល់ថា ចំនួន២០០នាក់នេះ ជាចំនួនមួយដែលច្រើនលើសលប់ ក្នុងនាមជាខេត្តដែលមានប្រជាជនតិចជាងគេ និងជាតំបន់ដាច់ស្រយាលផងនោះ។

កញ្ញា ឆែម ស្រីគា និយាយថា៖ “ប្រជាជននៅទីនោះគឺគាត់ចូលចិត្តអានសៀវភៅ ទាំងក្មេង ទាំងចាស់ ទាំងយុវវ័យ ជាពិសេសសិស្សសាលាតែម្តង។ ក្មេងថ្នាក់ទី១ ទី២ អីក៏មកអានសៀវភៅដែរ ពួកគេសប្បាយចិត្តដែលខ្ញុំទៅទេសចរណ៍អំណាននៅខេត្តមណ្ឌលគិរីនោះ”។

បន្ថែមពីនេះ យុវតីរូបនេះបង្ហាញពីក្តីរំភើបដែលឃើញប្រជជននៅខេត្តមួយនេះស្រឡាញ់ និងចូលចិត្តអានសៀវភៅបែបនេះ។ ស្រីគា ថា ប្រជាជននៅទីនោះបានអរគុណខ្លួនចំពោះការនាំយកទេសចរណ៍អំណានទៅកាន់ខេត្តមណ្ឌលគិរី ព្រមទាំងបានជួយផ្សព្វផ្សាយពីទេសចរណ៍ក្នុងខេត្តនេះ និងប្រជាជនជនជាតិដើមភាគតិចផងដែរ។

កញ្ញា ឆែម ស្រីគា លើកទឹកចិត្តឱ្យប្រជាជនគ្រប់រូប គ្រប់ស្រទាប់វណ្ណៈ ចាប់កាន់អានសៀវភៅឱ្យបានច្រើន ឱ្យក្លាយជាទម្លាប់ប្រចាំថ្ងៃ ព្រោះសៀវភៅពិតជាសំខាន់ណាស់ ហើយប្រជាជនគួរយកភាពវិជ្ជមានពីសៀវភៅមកអនុវត្ត និងរៀនសូត្រតាមក្នុងជីវិតប្រចាំថ្ងៃ។ កញ្ញាថា ប្រទេសជាតិរីកចម្រើនបាន លុះត្រាមានប្រជាជនមានចំណេះដឹងច្រើន និងចូលចិត្តអានសៀវភៅ។

យុវតី ស្រីគា និយាយថា៖  “តាមជនបទដាច់ស្រយាលបែបហ្នឹងក៏មានសាលារៀន អ៊ីចឹង អាណាព្យាបាលគួរតែអានសៀវភៅ ហើយយកខ្លួនឯងជាគំរូល្អសម្រាប់កូនៗ។ ព្រោះថា បើយើងចុចតែទូរសព្ទ កូនរបស់យើងនឹងចុចតែទូរសព្ទតាមយើងដែរ។ អ៊ីចឹង គំរូភាពរបស់អាណាព្យាបាលពិតជាសំខាន់ក្នុងការលើកទឹកចិត្ត ក៏ដូចបណ្តុះកូនៗដែលជាកុមារក្នុងគ្រួសាររបស់ពួកគាត់ហ្នឹង ឱ្យចាប់អារម្មណ៍ និងចូលចិត្តអានសៀវភៅ”។

គួរម្លឹកថា ទេចរណ៍អំណាន នៅខេត្តមណ្ឌលគិរី ធ្វើរយៈពេល៣ថ្ងៃ ចាប់ពីថ្ងៃទី២៥ ដល់ទី២៧ នៅកន្លែងដំរីរណារ ក្នុងក្រុងសែនមនោរម្យ ខេត្តមណ្ឌលគិរី ចាប់ពីម៉ោង ៤រសៀល ដល់ម៉ោង ៨យប់។ បន្ទាប់ពីបញ្ចប់នៅខេត្តមណ្ឌលគិរី នៅពេលនេះ កញ្ញា ឆែម ស្រីគា កំពុងបន្តដំណើរ ទេចរណ៍អំណាន ទៅកាន់ខេត្តរតនគិរីម្តង៕

អត្ថបទ៖ អុន ស្រីមាន

The post ទោះបីខេត្តមណ្ឌលគិរីមានប្រជាជនតិច ប៉ុន្តែពលរដ្ឋទាំងចាស់-ក្មេង ​ចូលរួមអានសៀវភៅច្រើន appeared first on Kampuchea Thmey Daily.

នៅថ្ងៃទី ២១ ខែធ្នូ អតីតប្រធានាធិបតី បារ៉ាក់ អូបាម៉ា អាយុ ៦៣ឆ្នាំ បានប្រកាសសៀវភៅដែលគាត់ចូលចិត្តនៅឆ្នាំនេះ។ គាត់បាននិយាយថា «ខ្ញុំតែងតែទន្ទឹងរង់ចាំចែករំលែកជាមួយមនុស្សគ្រប់គ្នានូវបញ្ជីសៀវភៅ ភាពយន្ត និងតន្ត្រីដែលខ្ញុំចូលចិត្តជារៀងរាល់ឆ្នាំ។ ថ្ងៃនេះខ្ញុំចង់ចាប់ផ្តើមប្រពៃណីប្រចាំឆ្នាំរបស់ខ្ញុំជាមួយនឹងស្នាដៃដែលបន្សល់ទុកនូវចំណាប់អារម្មណ៍យូរអង្វែងមកលើខ្ញុំ។ ខ្ញុំ​បាន​អាន​វា​ចប់រួចរាល់ហើយ!»

ស្នាដៃគួរឲ្យកត់សម្គាល់មួយនៅក្នុងកាតាឡុកក្នុងឆ្នាំនេះគឺ The Anxious Generation ដោយអ្នកចិត្តសាស្រ្ត Jonathan Haidt ដែលបានចេញផ្សាយក្នុងខែមីនា ខ្លឹមសារគឺជាការស្រាវជ្រាវ និងទស្សនៈរបស់អ្នកនិពន្ធអំពីការកើនឡើងនៃជំងឺធ្លាក់ទឹកចិត្ត និងភាពឯកោក្នុងចំណោមមនុស្សវ័យក្មេងនាពេលបច្ចុប្បន្ននេះ។

យោងតាម ​​Haidt ការប្រើប្រាស់ស្មាតហ្វូន និងបណ្តាញសង្គមប៉ះពាល់អវិជ្ជមានដល់សុខភាពផ្លូវចិត្តនៃជំនាន់ Gen Z (អ្នកដែលកើតចន្លោះឆ្នាំ ១៩៩៧ និង ២០១២)។ នេះក៏ជាយោបល់មួយរបស់មហាសេដ្ឋី Bill Gates សម្រាប់សៀវភៅចំនួនបួនក្បាលដែលគួរអាននៅចុងឆ្នាំ។

ប្រលោមលោក Orbital និពន្ធដោយអ្នកនិពន្ធ Samathan Harvey ក៏ជាសៀវភៅឆ្នើមមួយទៀតដែលបានចេញផ្សាយនៅខែធ្នូ ឆ្នាំ ២០២៣។ សៀវភៅនេះបានឈ្នះរង្វាន់ Booker នៅថ្ងៃទី ១៣ខែវិច្ឆិកា។ ការងារនេះប្រាប់អំពីការធ្វើដំណើរអវកាសនៅលើស្ថានីយ៍អវកាសអន្តរជាតិរបស់អវកាសយានិកប្រាំមួយនាក់មកពីប្រាំប្រទេស។ តួអង្គទាំងនោះឆ្លងកាត់មួយថ្ងៃជាមួយនឹងថ្ងៃរះ និងថ្ងៃលិចចំនួន ១៦ ដែលបង្ហាញពីការឆ្លុះបញ្ចាំងដ៏ឆ្ងាញ់នៅលើផែនដី ភាពស្រស់ស្អាត និងសេចក្តីប្រាថ្នារបស់មនុស្ស នេះបើយោងតាមអ្នកនិពន្ធ Guardian Alexandra Harris ។

ស្នាដៃដែលនៅសេសសល់រួមមានរឿងប្រលោមលោកជាច្រើនពីរឿងមនោសញ្ចេតនាដូចជា The Anthropologist និង Intermezzo ទៅជារឿងប្រឌិតបែបវិទ្យាសាស្ត្រ In Ascension និង Human Life in Someone Like Us (Someone like us)។ លើសពីនេះ លោកបានណែនាំសៀវភៅនយោបាយ សិល្បៈ និងសេដ្ឋកិច្ច ដែលមានចំណងជើងថា Stolen Pride។

លើសពីនេះ អតីតប្រធានាធិបតីសង្ឃឹមថា អ្នកអាននឹងទិញសៀវភៅខាងលើនៅបណ្ណាគារ ឬចំណាយពេលអាននៅក្នុងបណ្ណាល័យ។ នៅក្នុងផ្នែកមតិយោបល់នៃការណែនាំ គាត់ក៏បានរៀបរាប់អំពីសៀវភៅដែលគាត់ចូលចិត្តបំផុតចំនួន ១៤ ក្បាលនៅក្នុងរដូវក្តៅឆ្នាំ២០២៤។ បច្ចុប្បន្ននេះ ការបង្ហោះនៅលើ X មានអ្នកចូលមើលច្រើនជាង ១៧លានដង។

បារ៉ាក់ អូបាម៉ា កើតនៅឆ្នាំ ១៩៦១ គឺជាប្រធានាធិបតីទី ៤៤ របស់សហរដ្ឋអាមេរិក (ពីរអាណត្តិ ២០០៨-២០១២, ២០១៣-២០១៧) និងជាមនុស្សដំបូងដែលមានពណ៌សម្បុរដែលកាន់តំណែងនេះ។ គាត់បានបញ្ចប់ការសិក្សាពីសាកលវិទ្យាល័យ Columbia និងសាលាច្បាប់ Harvard ហើយបានបម្រើការជាប្រធាននៃ Harvard Law Review ដែលជាទស្សនាវដ្តីដ៏មានកិត្យានុភាពរបស់សាលា។

អតីតប្រធានាធិបតីមានកេរ្តិ៍ឈ្មោះល្បីល្បាញដោយសារការចាប់អារម្មណ៍លើវប្បធម៌ប្រជាប្រិយ។ ចាប់តាំងពីចាកចេញពីសេតវិមានក្នុងឆ្នាំ ២០១៧ ជារៀងរាល់ឆ្នាំ គាត់ចែករំលែកបញ្ជីភាពយន្ត សៀវភៅ និងតន្ត្រីដែលគាត់ចូលចិត្តនៅលើបណ្តាញទំនាក់ទំនងសង្គម៕

អត្ថបទ៖ សាង​​ ស្រីល័ក្ខ

ចុចអាន៖Jack Ma ប្រាប់កំហុស និងបង្ហាញ ៣ វិធី​ជ្រើសរើស​មនុស្ស​ត្រឹមត្រូវមកធ្វើការ

The post អតីតប្រធានាធិបតីអាមេរិក អូបាម៉ា ចែករំលែកអ្នកអាន ពីសៀវភៅលោកចូលចិត្តបំផុត appeared first on Kampuchea Thmey Daily.

ឆ្លើយតបទៅនឹងសំណួររបស់អ្នកយកព័ត៌មានកម្ពុជាថ្មីនៅព្រឹកថ្ងៃទី១៩ ខែធ្នូ ឆ្នាំ២០២៤ បន្ទាប់ពីបើកពិព័ណ៌សៀវភៅលើកទី១១ នៅកោះពេជ្រ ដែលសុំឱ្យរដ្ឋមន្ត្រីទាំងពីរចែករម្លែកពីសៀវភៅមួយចំនួនដែលទាក់ទាញចំណាប់អារម្មណ៍។ លោកឧបនាយករដ្ឋមន្ត្រី ហង់ជួន ណារ៉ុន បានថ្លែងថាសៀវភៅប្រលោមលោកដែលលោកចូលចិត្តអានគឺជាសៀវភៅដែលបានតែងនិពន្ធក្នុងទស្សវត្ស៥០និង៦០ តែសម្រាប់សៀវភៅរឿងក្នុងពេលបច្ចុប្បន្នលោកថាបានចាប់អារម្មណ៍លើការតែងនិពន្ធរបស់អ្នកនិពន្ធ ជុត ខៃ។  

លោកឧបនាយករដ្ឋមន្ត្រីថា៖ «រឿង៣២ឆ្នាំក្រោយមកគឺប្រវត្តិកម្ពុជា៣២ឆ្នាំបន្ទាប់ពីគាត់រត់ភៀសខ្លួនទៅបារាំងហើយគាត់ត្រលប់មកវិញហើយគាត់ឃើញរឿង។ អ្នកសរសេរគាត់មានទឹកដមស្នាដៃនេះដែលនឹងបន្សល់ទុកសម្រាប់កូនខ្មែរជំនាន់ក្រោយ»។

រដ្ឋមន្ត្រីវប្បធម៌លោកស្រី ភឿង សកុណា ក៏មានប្រសាសន៍ប្រហាក់ប្រហែលគ្នានេះដែរពីចំណាប់អារម្មណ៍លើការតែងនិពន្ធរបស់លោក ជុត ខៃ។

លោកស្រីរដ្ឋមន្ត្រី៖ «ខ្ញុំគិតថាសៀវភៅចាប់អារម្មណ៍ទៅតាមអាយុអ្នកអាន។ អ្នកអានក្មេងៗគាត់ចាប់អារម្មណ៍រឿងក្មេងៗទៅអ្នកអាចដូចពួកខ្ញុំរៀងចំណាស់បន្តិចទៅ ចាប់អារម្មណ៍សៀវភៅដែលចំណេះដឹងរាងជ្រៅទៅក្នុងពុទ្ធវិជ្ជា ក្នុងឯកសារ ឬក៏ដូចឯកឧត្តមឧបគាត់មានប្រសាសន៍អំបាញ់មិញចឹងគឺអ្នកនិពន្ធ ជុត ខៃ គឺយើងខ្ញុំទាំងពីរនាក់ពេញចិត្ត»។

ស្ថាបនិកគ្រឹះស្ថានបោះពុម្ភផ្សាយ«អវតា» ដែលទទួលសិទ្ធិក្នុងការបោះពុម្ភផ្សាយសៀវភៅតែនិពន្ធរបស់លោក ជុត ខៃ គឺលោកស្រី ហួត សុជាតា បានប្រាប់កម្ពុជាថ្មីថាលោកស្រីមានមោទនភាពដែលបាននាំអ្នកនិពន្ធ ជុត ខៃ មកឱ្យពលរដ្ឋកម្ពុជាបានស្គាល់។ លោកស្រីថាសៀវភៅដែលបានតែងនិពន្ធដោយលោក ជុត ខៃ មិនត្រឹមតែទទួលបានការគាំទ្រពីមនុស្សវ័យកណ្ដាលទេ បច្ចុប្បន្នក៏ឃើញមានការគាំទ្រពីយុវ័យជំនាន់ក្រោយផងដែរ។

លោកស្រីថា៖ «គាត់ជាបញ្ញាវ័ន្តខ្មែរមួយរូបដែលគួរតែគេស្គាល់ច្រើនជាងហ្នឹងទៅទៀតដែលកូនខ្មែរគ្រប់រូបគួរតែអានស្នាដៃរបស់គាត់»។

អ្នកនិពន្ធ ជុត ខៃ កើតនៅថ្ងៃទី៣០ ខែតុលា ឆ្នាំ១៩៤០ នៅខេត្តកំពង់ចាម លោកគឺជាអតីតគ្រូបង្រៀនភាសាបារាំង និងច្បាប់ ព្រមទាំងជាអ្នកសរសេរអត្ថបទកាសែត និងជាព្រឹទ្ធបុរសនៅមហាវិទ្យាល័យនីតិសាស្ត្រភ្នំពេញពីឆ្នាំ១៩៧៣ ដល់ឆ្នាំ១៩៧៤។ លោកបានភៀសខ្លួនទៅរស់នៅប្រទេសបារាំងក្នុងឆ្នាំ១៩៨០។ លោកទទួលបានពានរង្វាន់អ្នកនិពន្ធអាស៊ីអាគ្នេយ៍កាលពីចុងខែវិច្ឆិកា ឆ្នាំ២០២៤។

លោក ជុត ខៃ មានទេពកោសល្យក្នុងការតែងនិពន្ធដោយប្រើពាក្យងាយយល់ពិព័ណ៌នាព្រឹត្តិការណ៍នានាដែលលោកជួបប្រទះធ្វើឱ្យអ្នកអានបានឃើញដូចហេតុការណ៍នោះកើតឡើងនៅហ្នឹងមុខ ជួនកាលក៏ផ្ទុះសំណើចតាមសំណេររបស់លោកផងដែរ៕

ដោយ ហ៊ុន សិរីវឌ្ឍន៍

The post អ្នកនិពន្ធម្នាក់ទទួលបានចំណាប់អារម្មណ៍ពីរដ្ឋមន្ត្រីអប់រំ និងវប្បធម៌ appeared first on Kampuchea Thmey Daily.

លោកស្រី ភឿង សកុណា លើកឡើងបែបនេះ ក្នុងកិច្ចសម្ភាសជាមួយ កម្ពុជាថ្មី នៅព្រឹកថ្ងៃទី១៩ ខែធ្នូ ឆ្នាំ២០២៤ ក្នុងឱកាសបើកពិព័រណ៍សៀវភៅកម្ពុជាលើកទី១១ ដែលរៀបចំរយៈពេល៤ថ្ងៃ ចាប់ពីថ្ងៃទី១៩ ដល់ថ្ងៃទី២២ ខែធ្នូ ឆ្នាំ២០២៤ នៅកោះពេជ្រ។

អំឡុងពេលពិព័រណ៍សៀវភៅ ៤ថ្ងៃនេះ បណ្ឌិតសភាចារ្យ ភឿង សកុណា បានជំរុញដល់អាណាព្យាបាល ម្តាយឪពុកគ្រប់រូបនាំកូនៗមកចូលរួមឱ្យបានច្រើន ព្រោះការអានជាទម្លាប់មួយ ប្រសិនជាមិនមានការអានពីក្មេងទេ នោះនៅពេលដែលធំទៅ នឹងមិនចេះអានសៀវភៅឡើយ។ ដូច្នេះ លោកស្រីថា ទម្លាប់អានសៀវភៅ គឺពឹងផ្អែកសំខាន់លើគ្រួសារតែម្តង។

រដ្ឋមន្ត្រីក្រសួងវប្បធម៌ បានបន្តថា ប្រសិនជាម្តាយឪពុក ទម្លាប់ឱ្យកូនៗអានតែសៀវភៅខ្លីៗ នោះពួកគេនឹងទទួលបានចំណេះដឹងបន្តិចបន្តួចប៉ុណ្ណោះ ប៉ុន្តែ នៅពេលរៀនដល់ថ្នាក់កាន់តែខ្ពស់ គឺតម្រូវឱ្យអានសៀវភៅឱ្យបានច្រើន ដើម្បីបង្កើនចំណេះដឹង។ ហេតុនេះ លោកស្រីយល់ថា អនាគតរបស់កុមារគឺអាស្រ័យលើម្តាយឪពុក គ្រូបង្រៀន នេះឯង អ៉ីចឹង ពិព័រណ៍សៀវភៅពិតជាមានសារសំខាន់ណាស់។

គួរជម្រាបថា កាលពីថ្ងៃទី១១ ខែធ្នូ ឆ្នាំ២០២៤ លោក ហុក សុទ្ធិ តំណាងគណៈកម្មការរៀបចំពិព័រណ៍សៀវភៅ បានសំណូមពរក្នុងសន្និសីទសារព័ត៌មាន ឱ្យអ្នកដែលមានលទ្ធភាពចូលរួមពិព័រណ៍ និងទិញសៀវភៅឱ្យបានច្រើន ព្រោះលោកឃើញថា  ឆ្នាំមុនៗមានអ្នកចូលរួមច្រើន តែការទិញសៀវភៅនៅមិនទាន់បានច្រើននោះទេ ព្រោះអ្នកចូលរួមភាគច្រើនជាយុវជន សិស្ស និស្សិត ដែលជីវភាពនៅមានកម្រិតនៅឡើយ។

ចំពោះថវិកាដែលរៀបចំពិព័រណ៍ឆ្នាំ២០២៤នេះ លោក ហុក សុទ្ធិ បានលើកឡើងក្នុងពិធីបើកពិព័រណ៍ ថ្ងៃទី១៩នេះថា ចំណាយខ្ទង់៨ម៉ឺនដុល្លារអាមេរិក ដោយមានស្តង់ចូលរួម ២៩២ស្តង់ ដែលជាចំនួនច្រើនជាងឆ្នាំមុន៕

The post រដ្ឋមន្ត្រីក្រសួងវប្បធម៌ សំណូមពរឱ្យអាណាព្យាបាលនាំកូនៗទៅចូលរួមពិព័រណ៍សៀវភៅឱ្យបានច្រើន ដើម្បីជំរុញការអាន appeared first on Kampuchea Thmey Daily.

លោករដ្ឋមន្ត្រី បានលើកឡើថា សៀវភៅ ការបោះពុម្ពផ្សាយ និងការតែងនិពន្ធ គឺបានឆ្លុះបញ្ជាំងពីការអភិវឌ្ឍសេដ្ឋកិច្ច សង្គម របស់ប្រទេស ហើយប្រសិនបើគ្មានសៀវភៅទេ ក៏មិនអាចផ្ទេចំណេះដឹងពីមួយជំនាន់ទៅមួយជំនាន់ដែរ។ ដូច្នេះសៀវភៅ មានការចាំបាច់ ទាំងការផ្សព្វផ្សាយនូវចំណេះដឹងទូទៅ ផ្សព្វផ្សាយចំណេះដឹងខាងផ្នែកវិទ្យាសាស្ត្រ បច្ចេកវិទ្យា ជាពិសេសផ្សព្វផ្សាយ វប្បធម៌ ក៏ដូចជា អក្សរសាស្ត្រជាតិ។

លោករដ្ឋមន្ត្រី បានបញ្ជាក់ថា «ដើម្បីឱ្យអក្សរសិល្ប៍ជាតិមានភាពរីកចម្រើន ទាល់តែយើងអានឱ្យបានច្រើន ហើយមិនត្រឹមតែអានអក្សរសិល្សជាតិប៉ុណ្តោះទេ គឺអានទាំងអក្សរសិល្សបរទេសផងដែរ ទើបយើងកាន់តែរីកចម្រើន ព្រោះថាអ្នកនិពន្ធដែលល្បី ហើយរីកចម្រើន គឺគាត់មានចំណេះដឹងទូលំទូលាយ»។

បើតាមលោករដ្ឋមន្ត្រី នៅយុគ្គសម័យហ្វេសប៊ុក យុវជនមានការអាចសៀវភៅតិចតួច ដែលធ្វើឱ្យចំណេះដឹងរបស់ពួកគេនៅមានកម្រិត ជាពិសេស នៅពេលដែលពួកគេ មើលតែរឿងរ៉ាវខ្លីៗ និងរឿងរ៉ាវឈ្លោះគ្នារបស់អ្នកដ៏ទៃ។ លោកថា ការដែលលេងហ្វេសប៊ុកច្រើន ជាពិសេស នៅពេលដែលមាន Chat GPT ឬ AI ធ្វើឱ្យមនុស្សកាន់តែមិនលែងចង់អានសៀវភៅ ព្រោះអាចបញ្ជារឱ្យម៉ាស៊ីនជាអ្នកធ្វើជំនួសវិញ ដែលនេះជាបញ្ហាប្រឈមធំមួយសម្រាប់មនុស្សមនុស្សជាតិ ពិសេសយុវជន។ ដូចនេះ លោករដ្ឋមន្ត្រី បានលើកទឹកចិត្តឱ្យយុវជនអានសៀវភៅឱ្យបានច្រើន ដើម្បីបង្កើនចំណេះដឹង ព្រោះថាការអានសៀវភៅ ផ្តល់នូវចំណេះដឹងកម្រិតខ្ពស់។

យ៉ាងណាមិញ ការរៀបចំនូវពិព័រណ៌សៀវភៅ នាពេលនេះ ជាការលើកទឹកចិត្តដល់អ្នកនិពន្ធទាំងសរសេរ និងអាន បានបង្ហាញស្នាដៃ ព្រមទាំងបានលើកស្ទួយដល់ខឿនវប្បធម៌ អរិយធម៌របស់ប្រជាជាតិផងដែរ។

សូមជម្រាបថា ពិព័រណ៍សៀវភៅកម្ពុជា លើកទី១១ នេះធ្វើឡើងរយៈពេល ៤ថ្ងៃ ពីថ្ងៃនេះ ដល់ថ្ងៃអាទិត្យទី ២២ ខែធ្នូ ដែលមានទីតាំងស្ថិត នៅមជ្ឈមណ្ឌលសន្និបាត និងពិព័រណ៍កោះពេជ្រ (បរិវេណសួនច្បារខាងមុខសាលាបុរីកោះពេជ្រ)៕

The post រដ្ឋមន្ត្រីក្រសួងអប់រំ លើកទឹកចិត្តយុវជនអានសៀវភៅឱ្យបានច្រើន ដើម្បីក្រេយកចំណេះដឹងកម្រិតខ្ពស់ appeared first on Kampuchea Thmey Daily.