អាល់កុល Archives - Kampuchea Thmey Daily

លោក ជួន ណារិន្ទ ៖ សមត្ថកិច្ច នៅតែបន្តត្រួតពិនិត្យអាវុធជាតិផ្ទុះ ជាតិអាល់កុល ដើម្បីកាត់បន្ថយគ្រោះថ្នាក់ចរាចរណ៍ នាឱកាសចូលឆ្នាំថ្មី

អ៊ិន ពិសី — Tue, 08 Apr 2025 03:29:17 +0000

លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ លើកឡើងថា ក្នុងឱកាសបុណ្យចូលឆ្នាំខ្មែរ ប្រពៃណីជាតិ សមត្ថកិច្ច នៅតែបន្តត្រួតពិនិត្យទាំងគោលដៅអាវុធជាតិផ្ទុះ និងជាតិអាល់កុល មិនឈប់សម្រាកនោះទេ ដើម្បីកាត់បន្ថយគ្រោះថ្នាក់ចរាចរណ៍ ព្រមទាំងរក្សាសុខសុវត្ថិភាពជូនប្រជាពលរដ្ឋ។

លោក ជួន ណារិន្ទ លើកឡើងបន្តថា ចំពោះបញ្ហាគ្រោះថ្នាក់ចរាចរណ៍គឺជាទុក្ខកង្វល់របស់ប្រមុខរាជរដ្ឋាភិបាល ហើយស្នងការនគរបាលរាជធានីភ្នំពេញ នៅតែឆ្មក់ដាក់គោលដៅត្រួតពិនិត្យជាតិអាល់កុលនេះ ជាកិច្ចការងារមួយ ដើម្បីបង្កើនសន្តិសុខជូនប្រជាពលរដ្ឋ ព្រោះថាកាលណាពួកគាត់ សេពគ្រឿងស្រវឹងខ្លាំង បណ្ដាលឲ្យបាត់បង់ស្មារតី។

លោក ជួន ណារិន្ទ សង្កត់ធ្ងន់ថា «ទោះតែរវល់យ៉ាងណាក្តី សមត្ថកិច្ច នៅតែបន្តត្រួតពិនិត្យ ទាំងគោលដៅអាវុធជាតិផ្ទុះ និងគោលដៅជាតិអាល់កុលនេះគឺដើម្បីប្រជាពលរដ្ឋទាំងអស់គ្នា មិនមែនដូចពាក្យគេថាសមត្ថកិច្ចឆ្លៀតណាស់នោះទេ ទោះបុណ្យទានក៏មិនលើកលែងដែរ»។ លោកបញ្ជាក់ថា ពាក្យទាំងនេះ លោកទទួលយក ប៉ុន្តែលោកទទួលតែជនមួយចំនួនតូចទេ តែលោកបានបម្រើផលប្រយោជន៍ដល់ប្រជាពលរដ្ឋរាប់លាននាក់។

ទន្ទឹមនេះ លោកស្នងការរាជធានី ក៏បានបញ្ជាក់ទៀតថា «សូមជឿជាក់លើនគរបាលរាជធានី យើងខ្ញុំទាំងអស់ធ្វើដើម្បីប្រជាពលរដ្ឋ មិនធ្វើដើម្បីរំខានប្រជាពលរដ្ឋនោះទេ»។ ការអនុវត្តច្បាប់នៅតែអនុវត្ត ហើយក៏ពង្រឹងវិន័យកងកម្លាំងផងដែរ។ ចំពោះកិច្ចការងារនេះ លោកស្នងការ បានបន្ថែមថា លើកលែងតែថយអត្រាគ្រោះថ្នាក់ចរាចរណ៍ដែលបង្កឡើងដោយជាតិស្រវឹង សមត្ថកិច្ច នឹងដកថយ សុំគោលការណ៍ថ្នាក់ដឹកនាំគ្រប់លំដាប់ថ្នាក់ ដើម្បីឈប់ចុះអនុវត្ត។

សូមបញ្ជាក់ថា ក្នុងមួយសប្ដាហ៍ ៥ ថ្ងៃ សមត្ថកិច្ចនគរបាល បានឆ្មក់ដាក់គោលដៅត្រួតពិនិត្យជាតិអាល់កុលនេះគឺបានរកឃើញអ្នកបើកបរក្នុងស្ថានភាពស្រវឹងនៅតែកើតមាន។ លោកស្នងការនគរបាលរាជធានី នៅតែអនុវត្តយ៉ាងម៉ឺងម៉ាត់ ហើយប្ដេជ្ញាចិត្តកាត់បន្ថយភាពអសកម្មឲ្យកាន់តែខ្ពស់ ដើម្បីកាត់បន្ថយការបើកបរដោយស្ថានភាពស្រវឹងនេះ៕

អត្ថបទ ៖ សំណាង

The post លោក ជួន ណារិន្ទ ៖ សមត្ថកិច្ច នៅតែបន្តត្រួតពិនិត្យអាវុធជាតិផ្ទុះ ជាតិអាល់កុល ដើម្បីកាត់បន្ថយគ្រោះថ្នាក់ចរាចរណ៍ នាឱកាសចូលឆ្នាំថ្មី appeared first on Kampuchea Thmey Daily.

អាល់កុល និងជែល មួយណាជាជម្រើសល្អ គួរប្រើជម្រះមេរោគ?

Sonya — Thu, 16 Dec 2021 04:15:59 +0000

ស្ថិតក្នុងវិបត្តិនៃរោគរាតត្បាត គ្រប់គ្នាចាប់ផ្ដើមគិតគូរពីអនាម័យផ្ទាល់ខ្លួន ក៏ដូចជាអនាម័យសាធារណខ្លាំងជាងពេលមុនៗ ខណៈអាល់កុល និងជែល ជាជម្រើសដ៏ពេញនិយមសម្រាប់មនុស្សសម័យនេះ ដើម្បីប្រើសម្អាតដៃជាប្រចាំ។

យ៉ាងណាមិញ ប្រសិនបើយើងប្រើអាល់កុលច្រើនខ្លាំងពេក វាមិនត្រឹមតែមិនអាចជួយសម្លាប់មេរោគនោះទេ ថែមទាំងអាចបង្កគ្រោះថ្នាក់ ឬខូចស្បែកទៀតផង។ ជាពិសេសការប្រើអាល់កុលដឺក្រេខ្ពស់ពេក នាំឲ្យប៉ះពាល់ចំពោះសុខភាពស្បែកដូចជា រលាកស្បែក ស្ងួតស្បែក ក្រហមស្បែក។ល។

ដោយឡែក ជែល ជាឧបករណ៍សំខាន់មួយទៀត អាចប្រើសម្លាប់មេរោគគ្រប់ទីកន្លែង ក៏ដូចជាប្រើសម្រាប់លាងដៃបានយ៉ាងងាយស្រួល ព្រមទាំងអាចម្លាប់មេរោគនៅលើដៃ មិនចាញ់ការលាងដៃនឹងសាប៊ូនោះឡើយ។ ជាពិសេស ជែល មានគុណសម្បត្តិជាច្រើន គួរពិចារណាទិញមកប្រើប្រាស់ ខណៈការលាងដៃនឹងសាប៊ូ អាចនឹងពិបាក រាល់ពេលយើងចេញក្រៅផ្ទះ។

តួយ៉ាង ជែលម៉ាក Purell ជាជែលលាងដៃសម្លាប់មេរោគបានភ្លាមៗ ផលិតតាមស្ដង់ដារ អនាម័យ នាំមកពីសហរដ្ឋអាមេរិក មានកំហាប់អេទីលអាល់កុល ៧០% និងគ្មានក្លិនឈួល ឬរំខានឡើយ។

មិនតែប៉ុណ្ណោះ ជែល Purell ងាយស្រួលដាក់តាមខ្លួន និងអាចប្រើបានទាំងលើកុមារថែមទៀតផង៕

អត្ថបទ៖ សន្យា

ចុចអាន៖ ប្រើអាល់កុលដឺក្រេខ្ពស់ មិនអាចសម្លាប់មេរោគបាន ហើយគ្រោះថ្នាក់ស្បែកទៀត!

The post អាល់កុល និងជែល មួយណាជាជម្រើសល្អ គួរប្រើជម្រះមេរោគ? appeared first on Kampuchea Thmey Daily.

កុំចេះតែហ៊ានដាក់ចូលមាត់! អាល់កុលក្នុងគ្រឿងស្រវឹង ខុសពីអាល់កុលលាងដៃ

Sonya — Sat, 13 Nov 2021 07:35:53 +0000

អាល់កុលមាន ៣ ប្រភេទ ក្នុងនោះមាន ១ ប្រភេទយើងអាចញុំាបាន តែ ២ ប្រភេទទៀតយើងមិនអាចញុំាបានទេ ព្រោះពួកវាអាចបណ្តាលឱ្យគ្រោះថ្នាក់។ តើអាល់កុលប្រភេទណាអាចញុំាបាន ប្រភេទណាញុំាមិនបាន?

អាល់កុលដែលយើងប្រើរាល់ថ្ងៃមាន ៣ ប្រភេទគឺ មេតាណុល អេតាណុល និងអ៊ីសូប្រូប៉ាណុល។

១. មេតាណុល

អាចហៅថាមេទីល ឬអាល់កុលឈើ ហើយយើងប្រើប្រាស់វានៅក្នុងឧស្សាហកម្ម។ យើងប្រើប្រាស់មេតាណុលជាសមាសធាតុផ្សំនៅក្នុងប្រេងឥន្ធនៈសម្រាប់រថយន្ត និងទូក ឬផលិតជាសារធាតុប្រឆាំងការកក ទឹកលាង ថ្នាំលាប ទឹកជូតកញ្ចក់ឡាន សារធាតុផ្ទុះ ឬផ្លាស្ទិច។

២. អេតាណុល

អាចហៅថាអាល់កុលអេទីល ឬអាល់កុលគ្រាប់ធញ្ញជាតិ គឺជាប្រភេទអាល់កុលដែលយើងអាចញុំាបាន។ អាចញ៉ាំបានមានន័យថា វត្តមានរបស់វានៅក្នុងផលិតផលណាមួយ ដែលអាចញាំបាន មិនបង្កគ្រោះថ្នាក់ មិនសំដៅលើការយកមកញ៉ាំផ្ទាល់នោះទេ។ យើងផលិតអាល់កុលប្រភេទនេះដោយការបណ្តុះមេជាមួយស្ករ និងជាតិម្សៅ ហើយប្រើក្នុងការបិតស្រា ឬផលិតស្រាបៀរ។ ទោះជាយ៉ាងណាក៏ដោយ អេតាណុលក៏មានផលប៉ះពាល់ដល់រាងកាយយើងដែរ។

ថ្លើមរបស់យើងអាចបំប្លែងអេតាណុលបាន តែក្នុងបរិមាណកំណត់ប៉ុណ្ណោះ។ ប្រសិនបើយើងញុំាច្រើនអាចបណ្តាលឱ្យខូចថ្លើម ខួរក្បាល និងសរីរាង្គផ្សេងទៀត ។ លើសពីនេះទៅទៀត ការញុំាគ្រឿងស្រវឹងច្រើនអាចបណ្តាលឱ្យយើងញៀន។

អាល់កុលអេទីលក៏ត្រូវបានផលិតដោយសំយោគផងដែរ។ យើងមិនប្រើអាល់កុលអេទីលសំយោគនៅក្នុងភេសជ្ជៈទេ ប៉ុន្តែយើងប្រើវាជាសារធាតុផ្សំនៅក្នុងជែលលាងដៃ និងទឹកអប់។

៣. អ៊ីសូប្រូប៉ាណុល

ឬអាល់កុលអ៊ីសូប្រូភីល (isopropyl alcohol) គឺជាឈ្មោះគីមីរបស់អាល់កុលសម្រាប់ជូតដែលយើងប្រើសម្រាប់សម្អាត និងសម្លាប់មេរោគ។ យើងផលិតវាពីឧស្ម័ន propylene និងទឹក។

យើងក៏ប្រើអាល់កុលសម្រាប់ជូតជាសារធាតុផ្សំនៅក្នុងគ្រឿងសម្អាង និងផលិតផលសម្អាតខ្លួនដូចជា ឡេលាបក្រោយពេលកោរពុកមាត់ សាប៊ូងូតទឹក ផលិតផលតុបតែងមុខ ក៏ដូចជាផលិតផលថែរក្សាក្រចក សក់ និងស្បែកផងដែរ។

អាល់កុលតែមួយប្រភេទគត់ដែលយើងអាចញុំាបាន គឺអេតាណុលនៅក្នុងស្រា ឬស្រាបៀរ។ យើងប្រើអាល់កុលពីរប្រភេទផ្សេងទៀតសម្រាប់ការសម្អាត និងក្នុងឧស្សាហ៍កម្ម។ ទាំងមេតាណុល និងអាល់កុលសម្រាប់ជូតមានជាតិពុល ហើយការញុំាអាល់កុលទាំង ២ ប្រភេទនេះអាចបណ្ដាលឲ្យស្លាប់៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ អាល់កុលអាចកម្ចាត់វីរុសកូវីដបាន តែមិនអាចផឹកស្រា-ស្រាបៀរមានជាតិអាល់កុលជំនួសទេ

The post កុំចេះតែហ៊ានដាក់ចូលមាត់! អាល់កុលក្នុងគ្រឿងស្រវឹង ខុសពីអាល់កុលលាងដៃ appeared first on Kampuchea Thmey Daily.

អាជ្ញាធរបង្កើនការរឹតបន្តឹងមណ្ឌលចត្តាឡីស័កកូបធំ ក្រោយមានអ្នកពុលស្លាប់៧នាក់

Sorn Phanith — Fri, 12 Nov 2021 09:31:54 +0000

លោកវេជ្ជៈបណ្ឌិត ឡេ ចាន់សង្វាត ប្រធានមន្ទីរសុខាភិបាលខេត្តបន្ទាយមានជ័យបានមានប្រសាសន៍នៅរសៀលថ្ងៃទី១២វិច្ឆិកានេះថា អាជ្ញាធរខេត្តបន្ទាយមានជ័យបានដាក់វិធានការបង្កើនការរឹតបន្តឹងត្រួតពិនិត្យការចេញចូលនៅមណ្ឌលចត្តាឡីស័កកូបធំ ក្រោយមានមនុស្ស៧នាក់បានស្លាប់ ដោយសង្ស័យពុលអាល់កុលលាយភេសជ្ជៈ។

លោកបានបន្តថា រហូតមកដល់ពេលរសៀលថ្ងៃទី១២វិច្ឆិកានេះ ក្នុងចំណោមអ្នកដែលបានផឹកអាល់កុល លាយភេសជ្ជៈតែអូអ៊ីឈីកូកាកូឡា និងទឹកបរិសុទ្ធ យកទៅផឹកជំនួសស្រាចំនួន ២១ នាក់ ស្រី២នាក់បានស្លាប់៧នាក់ ស្រីម្នាក់ ដែលក្នុងនោះស្លាប់នៅមន្ទីពេទ្យបង្អែកក្រុងប៉ោយប៉ែត១នាក់ ស្លាប់នៅមន្ទីពេទ្យមិត្តភាពកម្ពុជាជប៉ុនមង្គលបូរី៤នាក់ និងស្លាប់នៅមន្ទីរពេទ្យខេត្តសៀមរាបចំនួន២នាក់។ លោកបានបន្តទៀតថា ចំណែកអ្នកនៅសល់១៤នាក់ទៀត មាន២នាក់ កំពុងលាងឈាមនៅមន្ទីរពេទ្យខេត្តសៀមរាប និង១២នាក់ទៀត កំពុងសម្រាកព្យាបាលនៅមន្ទីរពេទ្យបង្អែកក្រុងប៉ោយប៉ែតមានសុខភាពធម្មតាទេ។ ប៉ុន្តែអាចមានការប្រែប្រួលទៅតាមអ្នករងគ្រោះផឹកអាល់កុលលាយជាមួយភេសជ្ជៈខាងលើ ព្រោះថាមានអ្នកខ្លះបានផឹកតាំងពីថ្ងៃទី៩ ខ្លះទី១០វិច្ឆិកាហើយមានបញ្ហានៅរសៀលថ្ងៃទី១១ម្សិលមិញ។

លោកបានបន្ថែមថា ចំពោះអាល់កុលដែលពួកគាត់បានលាយជាមួយភេសជ្ជៈនោះ គឺបើកនៅមណ្ឌលចត្តាឡីស័ក និងខ្លះទៀតសាច់ញាតិទិញមកពីខាងក្រៅ។ លោកបានបញ្ជាក់ថា បើតាមការសាកសួរមានអ្នកខ្លះផឹកជាងកន្លះលីត្រ អីចឹងហើយបានជាធ្វើឱ្យពួកគាត់មានអាការៈពុលខ្លាំងរហូតដក់បាត់បង់ជីវិត។

លោកប្រធានមន្ទីរបានបញ្ជាក់ថា« ខ្ញុំមិននឹកស្មានសោះថា ពួកគាត់ហ៊ានយកអាល់កុលលាងដៃយកមកលាយផឹកជាមួយភេសជ្ជៈអីចឹងសោះ»។ លោកបានឱ្យដឹងទៀតថា យើងបានយកសំណាកដែលអ្នកពុលទាំងនោះទៅធ្វើពិសោធន៍នៅមន្ទីរពិសោធន៍ជាតិ និងខាងកាំកុងត្រូក៏បានយកទៅពិនិត្យដែរ ដើម្បីដឹងថាតើកម្រិតជាតិពុលប៉ុន្មានបានជាបណ្តាលឱ្យមនុស្សស្លាប់បែបនេះ។

លោក វេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធ និងជំងឺឆ្លង នៃក្រសួងសុខាភិបាលបានឱ្យដឹងនៅរសៀលនេះថា ករណីមនុស្សស្លាប់នៅខេត្តបន្ទាយមានជ័យនេះ សង្ស័យអាល់កុលលាងដៃលាយជាមួយភេសជ្ជៈប៉ូវកម្លាំង។ លោកវេជ្ជបណ្ឌិតបានបន្តថា « យើងកំពុងធ្វើតេស្តបន្តនៅមន្ទីរពិសោធន៍ Lab Control Phnom Penh.ហើយនឹងដឹងលទ្ធផលឆាប់ៗនេះ»៕

អត្ថបទ៖ សំអឿន

The post អាជ្ញាធរបង្កើនការរឹតបន្តឹងមណ្ឌលចត្តាឡីស័កកូបធំ ក្រោយមានអ្នកពុលស្លាប់៧នាក់ appeared first on Kampuchea Thmey Daily.

ប្រើអាល់កុលដឺក្រេខ្ពស់ មិនអាចសម្លាប់មេរោគបាន ហើយគ្រោះថ្នាក់ស្បែកទៀត!

Sonya — Mon, 20 Sep 2021 06:23:14 +0000

បន្ទាប់ពីរកឃើញអ្នកផ្ទុក COVID-19 លើទឹកដីខ្មែរ ប្រជាជនមួយចំនួនធំជ្រួលច្របល់រកទិញម៉ាស់ និងទឹកលាងដៃ ឬជេល ហើយរបស់អស់ទាំងនេះគឺភាគច្រើនដាច់ស្ដុក ឯតម្លៃឡើងទ្វេដង។ ដូចនេះហើយបាន ជាមានអ្នកជំនាញជាច្រើនណែនាំឲ្យប្រើអាល់កុលជំនួសវិញ។

ប៉ុន្តែការប្រើអាល់កុលនេះទៀតសោតមិនបានអនុវត្តតាមវេជ្ជបញ្ជាគ្រូពេទ្យឡើយ ដោយជ្រើសរើសប្រភេទអាល់កុលមានដឺក្រេខ្ពស់បំផុតរហូតដល់ ៩៧ ដឺក្រេ ឬយកអាល់កុលសុទ្ធទៅលាងដៃតែម្ដង។ ឱសថការីឧត្តម សុធី នាងសុធា បានឲ្យដឹងថា នោះជារឿងមិនគួរធ្វើ ការប្រើអាល់កុលទាំងដឺក្រេខ្ពស់ ព្រោះគិតថាអាល់កុលកាន់តែខ្ពស់ កាន់តែអាចសម្លាប់មេរោគកាន់តែងាប់អស់ ជាទង្វើមិនត្រឹមត្រូវឡើយ ។

កញ្ញាបានបន្តទៀតថា ការប្រើអាល់កុលសុទ្ធ ឬដឺក្រេខ្ពស់មិនបានជួយសន្សំសំចៃយើងឡើយ តែជាការខាតបង់ទៅវិញ ព្រោះវាងាយហើរ ហើយមិនអាចនៅយូរសម្លាប់មេរោគកើតទេ។ ដូចនេះហើយយើងគួរយកអាល់កុលដែលមានកម្រិត ៦០ ទៅ ៨០ ដឺក្រេ ទើបអាចសម្លាប់មេរោគបាន។

ឱសថការីរូបនេះបានបន្តទៀតថា ប្រសិនបើយើងប្រើអាល់កុលដឺក្រេខ្ពស់ពេក នាំឲ្យប៉ះពាល់ចំពោះសុខភាពស្បែកទៅវិញទេ ដូចជារលាកស្បែក ស្ងួតស្បែក ក្រហមស្បែក។ ដូចនេះបើទិញអាល់កុល ៩៧ ដឺក្រេត្រូវយកមកពង្រាវជាមួយទឹក ហើយមួយវិញទៀតពេលយកអាល់កុលមកប្រើ ត្រូវបិទគម្របឲ្យបានភ្លាមៗ ព្រោះពេលចំហវានឹងថយចុះដឺក្រេ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ប្រុងប្រយ័ត្ន ជែលឬអាល់កុលអាចគ្មានប្រសិទ្ធភាពឬហួត ខណៈប្រើក្នុងរយៈពេល ២៨ ថ្ងៃ ក្រោយបើករួច

ចុចអាន៖ កែទម្លាប់បាញ់អាល់កុលសម្លាប់មេរោគលើខ្លួនចេញភ្លាម ប្រយ័ត្នសម្លាប់ទាំងមនុស្ស

ចុចអាន៖ ក្រើនរំឭកវិធីសម្អាតដៃដែលត្រឹមត្រូវអាចសម្លាប់មេរោគបាន តែមិនឱ្យខូចស្បែក

The post ប្រើអាល់កុលដឺក្រេខ្ពស់ មិនអាចសម្លាប់មេរោគបាន ហើយគ្រោះថ្នាក់ស្បែកទៀត! appeared first on Kampuchea Thmey Daily.

ក្រើនរំឭកវិធីសម្អាតដៃដែលត្រឹមត្រូវអាចសម្លាប់មេរោគបាន តែមិនឱ្យខូចស្បែក

Sonya — Fri, 10 Sep 2021 10:02:00 +0000

ស្ថិតក្នុងស្ថានភាពដែលវីរុសកូវីដ-១៩កំពុងអុកឡុកសហគមន៍ គ្រប់គ្នាមានទម្លាប់ថ្មីមួយដោយការសម្អាតដៃជាប្រចាំ ក្នុងគោលបំណងសម្លាប់មេរោគតោងជាប់។ ស្របពេលមនុស្សភាគច្រើនសម្អាតដៃជាប្រចាំ អ្នកខ្លះជួបប្រទះបញ្ហាដៃស្ងួត របក ព្រោះលាងសម្អាតជាមួយអាល់កុល ជែល ឬសាប៊ូច្រើនពេក។ ដូច្នេះខាងក្រោមជាគន្លឹះមួយចំនួនជួយកាត់បន្ថយបញ្ហានេះ។

១. កុំប្រើអាល់កុល ឬជែលច្រើនពេក

ប្រសិនបើយើងចាក់ ឬច្របាច់អាល់កុល ជែល ច្រើនហួសហេតុពីតម្រូវការ នោះគឺជាមូលហេតុនាំឲ្យដៃឆាប់របក ឬស្ងួត ប្រេះជាដើម។ បើប្រអប់ដៃតូចល្មម ហើយចាក់បរិមាណសារធាតុសម្លាប់មេរោគទាំងនោះចាល់ ឬសល់យូរ ទើបបណ្ដាលឲ្យឆាប់ស្ងួតគ្មានសំណើម។ ដើម្បីសម្លាប់មេរោគយើងត្រូវលាងចាប់ពី ២០-៤០ វិនាទី ហើយដុសឲ្យសព្វគន្លាក់ម្រាមដៃ ក្រចក និងកដៃ។

២. ប្រើសាប៊ូ និងទឹកស្អាត

សម្រាប់អាល់កុល ជែល គួរតែប្រើសម្រាប់ចេញទៅក្រៅផ្ទះគ្មានទឹក និងសាប៊ូ ដូចនេះពេលនៅផ្ទះគួរតែលាងជាមួយសាប៊ូ និងទឹកស្អាតវិញ ទើបដៃមិនសូវស្ងួត ឬរបក។ ការលាងសម្អាតដៃជាមួយសាប៊ូ និងទឹកត្រូវការរយៈពេលពី ៤០ វិនាទីទៅ ១:២០ នាទី ទើបសម្លាប់មេរោគ ឬបាក់តេរីបាន ហើយការលាងត្រូវដុសគ្រប់កន្លែងលើដៃ និងកដៃ។

ម្យ៉ាងវិញទៀត មិនថាលាងសម្អាតដៃជាមួយទឹក និងសាប៊ូ ឬជាមួយអាល់កុល ជែល ឡើយ យើងមិនត្រូវប្រើកម្លាំងខ្លាំងពេកឡើយ ព្រោះស្បែកកំពុងប៉ះពាល់ជាមួយសារធាតុកាត់ដែលអាចជួយជម្រះមេរោគហើយ ត្រូវមកកកិតជាមួយកម្លាំងខ្លាំងទៀតនោះ ធ្វើឲ្យវារបកជាមិនខាន។

៣. កុំចេះតែលាងដៃគ្រប់ពេល

ការលាងសម្អាតដៃ ធ្វើឡើងតែពេលសំខាន់ៗដូចជាប៉ះពាល់ជាមួយអ្នកដទៃ ឬវត្ថុដែលសង្ស័យថាអាចចម្លងកូវីដ-១៩ ឬមេរោគផ្សេងៗចូលខ្លួនបាន។ មិនមែនគ្រាន់តែនឹកឃើញ ឬមិនបានជួប ប៉ះពាល់អ្វីគគ្រិចផងក៏លាងដៃដែរនោះ ច្បាស់ណាស់ដៃប្រាកដជារបកមិនខាន៕

អត្ថបទ៖ សន្យា

ចុចអាន៖ ប្រើអាល់កុលរាល់ថ្ងៃ ឡើងអាចម៍រុយលើខ្នងដៃ ដោះស្រាយតាមតិចនិកនេះ

The post ក្រើនរំឭកវិធីសម្អាតដៃដែលត្រឹមត្រូវអាចសម្លាប់មេរោគបាន តែមិនឱ្យខូចស្បែក appeared first on Kampuchea Thmey Daily.

អាល់កុលអាចកម្ចាត់វីរុសកូវីដបាន តែមិនអាចផឹកស្រា-ស្រាបៀរមានជាតិអាល់កុលជំនួសទេ

Sonya — Fri, 10 Sep 2021 07:55:20 +0000

ក្រោយពេលផ្ទុះឡើងនូវវីរុស COVID-19 គេដឹងថាជាតិអាល់កុលអាចកម្ចាត់មេរោគ COVID-19 បាន ជាហេតុបណ្តាលឲ្យមានមនុស្សមួយចំនួនមានការយល់ច្រឡំខ្លាំង ចាប់ផ្តើមផឹកស្រា ស្រាបៀរ ឬអ្នកខ្លះបានចាប់ផ្តើមប្រើប្រាស់អាល់កុលក្លែងក្លាយមិនច្បាស់លាស់ធ្វើឲ្យប៉ះពាល់សុខភាពកាន់តែធ្ងន់ធ្ងរ។

អង្គការសុខភាពពិភពលោក (WHO) បានឲ្យដឹងថា ការផឹកអាល់កុលអេតាណុល មេតាណុល ឬទឹកអូសាវែល មិនអាចការពារវីរុស COVID-19 ទេ វាបណ្តាលឲ្យពិការ ឬស្លាប់បាន។ ពេលខ្លះអាល់កុលមេតាណុល អេតាណុល និងទឹកអូសាវែលត្រូវបានប្រើនៅក្នុងផលិតផលសម្អាតដើម្បីសម្លាប់មេរោគនៅលើវត្ថុផ្សេងៗ ប៉ុន្តែមិនត្រូវយកវាទៅផឹកទេ។ ផលិតផលសម្អាតដែលមានសារធាតុអេតាណុល មេតាណុល ឬទឹកអូសាវែល មិនអាចកម្ចាត់មេរោគនៅក្នុងខ្លួនអ្នកបានទេ តែវាបែរជាផ្តល់ផលប៉ះពាល់ដល់សរីរាង្គផ្សេងៗ។

ដើម្បីទប់ស្កាតពីការឆ្លងវីរុស COVID-19 អង្គការសុខភាពពិភពលោក បានបញ្ជាក់ថា ត្រូវសម្លាប់មេរោគនៅលើផ្ទៃវត្ថុផ្សេងៗ ជាពិសេសវត្ថុដែលអ្នកប្រើប្រាស់ញឹកញាប់ ត្រូវប្រាកដថា អ្នកលាងសម្អាតដៃបានទៀងទាត់ និងជៀសវាងប៉ះពាល់ភ្នែក មាត់និងច្រមុះ។ល៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ហេតុផលលម្អិតដែលអ្នកជំនាញហាមដាច់ខាតមិនឲ្យផឹកស្រាមុននិងក្រោយពេលចាក់វ៉ាក់សាំង

ចុចអាន៖ អ្នកខ្លាំងផឹកស្រារាល់ថ្ងៃ កំពុងប្រឈមហានិភ័យនៃវីរុសបំប្លែងខ្លួនគ្រប់ប្រភេទ ជាពិសេស Delta

The post អាល់កុលអាចកម្ចាត់វីរុសកូវីដបាន តែមិនអាចផឹកស្រា-ស្រាបៀរមានជាតិអាល់កុលជំនួសទេ appeared first on Kampuchea Thmey Daily.

ថៃ ហាមប្រជាជនកុំបាញ់អាកុលចូលក្នុងអាហារ គឺមិនជួយកាត់បន្ថយហានិភ័យនៃការឆ្លងកូវីដទេ

សាង ស្រីល័ក្ខ — Thu, 19 Aug 2021 02:08:09 +0000

នាយកដ្ឋានសុខាភិបាលថៃបានចេញការព្រមានមួយ ដោយហាមប្រាមប្រជាជនកុំឲ្យប្រើប្រាស់អាកុលចាក់ចូលទៅក្នុងម្ហូបអាហារណាមួយឲ្យសោះ។

ប្រសិនបើជាតិអាល់កុលត្រូវបានគេប្រើខុសលើអាហារ អាចបណ្ដាលឲ្យគ្រោះថ្នាក់ដល់ស្លាប់ក៏មាន។

ការបាញ់អាល់កុលនៅក្នុងអាហារមិនបានជួយសម្លាប់មេរោគទេ

វេជ្ជបណ្ឌិត Ekachai Peerasriwatchara ប្រធានការិយាល័យលើកកម្ពស់សុខភាពនិងជាអ្នកនាំពាក្យនៃនាយកដ្ឋានសុខាភិបាលបានបង្ហាញថា ក្នុងករណីដែលក្រុមមនុស្សមួយចំនួនមានការយល់ច្រឡំថា គ្រឿងស្រវឹងឬជាតិអាកុល អាចត្រូវបានប្រើដើម្បីចាក់ចូលអាហារ ដើម្បីសម្លាប់មេរោគឬកូវីដ តាមពិតអាល់កុលថ្នាក់អាហារ (ប្រើក្នុងរោងចក្រផលិតអាហារ) មិនត្រូវបានប្រើសម្រាប់ការញ៉ាំផ្ទាល់ទេ។ ប៉ុន្តែវាត្រូវបានគេប្រើជាញឹកញាប់ក្នុងឧស្សាហកម្ម ការផលិតគ្រឿងសម្អាង រោងចក្រអាហារនិងភេសជ្ជៈមានជាតិអាល់កុលទៅវិញទេ។ ហើយពួកវាភាគច្រើនមានកំហាប់តិចជាង ៧០ ភាគរយ ដូច្នេះវាមិនអាចសម្លាប់មេរោគបានទេ។

អាហារគ្រាន់តែចម្អិនវា១០០ភាគរយគឺអាចសម្លាប់មេរោគបានហើយ

យោងតាមរដ្ឋបាលចំណីអាហារនិងឱសថអាមេរិកបានបញ្ជាក់ថា ហានិភ័យនៃការឆ្លងមេរោគតាមរយៈអាហារគឺមានកម្រិតទាប។ ដូច្នេះសម្រាប់ហេតុផលសុវត្ថិភាពវាត្រូវបានគេណែនាំឲ្យញ៉ាំអាហារស្រស់ដែលចម្អិនដោយកម្ដៅ ៧០ អង្សាសេ ឬច្រើនជាងនេះរយៈពេល ៥ នាទី។ ជាពិសេសសូមប្រើស្លាបព្រាផ្ទាល់ខ្លួន ហើយអនុវត្តយ៉ាងតឹងរ៉ឹង ជាមួយវិធានការរបស់ក្រសួងសុខាភិបាល។

ប្រភេទនៃជាតិអាល់កុលអាចចាក់ចូលអាហារបាន

មានអាល់កុលពីរប្រភេទនៅលើទីផ្សារ៖ អាល់កុល methyl និងអាល់កុល ethyl ហើយតម្លៃនៃជាតិអាល់កុល ethyl គឺខ្ពស់ជាងបន្តិច ប៉ុន្តែលក្ខណៈនៃប្រភេទនីមួយៗមានភាពខុសប្លែកគ្នាយ៉ាងខ្លាំង។

ដោយអាល់កុល ethyl ត្រូវបានប្រើលើរាងកាយមនុស្សដូចជាលាយនៅក្នុងថ្នាំ ប្រើលាយជាមួយស្រាឬភេសជ្ជៈមានជាតិស្រវឹង ឬប្រើខាងក្រៅរាងកាយដូចជាលាងរបួស។ ល។

ដោយឡែកសម្រាប់អាល់កុល methyl គឺជាអាល់កុលពុល វាត្រូវបានប្រើសម្រាប់ឧស្សាហកម្មដូចជាភ្លើងបំភ្លឺឬប្រេងឥន្ធនៈ សម្រាប់លាយម្រ័ក្សណ៍ ខ្មុក ប៉ុន្តែវាត្រូវបានហាមឃាត់យ៉ាងតឹងរ៉ឹង ដើម្បីប្រើលើរាងកាយមនុស្ស៕

អត្ថបទ៖ សាង ស្រីល័ក្ខ

ប្រភព៖Sanook

ចុចអាន៖ថៃ ប្រាប់ប្រជាជនកុំយល់ច្រឡំឱសថចិនប្រើសម្រាប់ព្យាបាលកូវីដ តែអាចលេបជួយបន្ថយរោគសញ្ញា

ចុចអាន៖ទុកជាមេរៀន! តួស្រី “ស្នេហ៍ទ្វេរសជាតិ” ដួលសន្លប់ភ្លាមៗ បន្ទាប់ពីមានអាការញ័រទ្រូង ក្រោយចាក់វ៉ាក់សាំងដូសទី ២

ចុចអាន៖ស្ត្រីចំណាស់ថៃម្នាក់ត្រឹមតែប៉ុន្មាននាទីច្រឡំចាក់វ៉ាក់សាំង AZ ពីរដូស

The post ថៃ ហាមប្រជាជនកុំបាញ់អាកុលចូលក្នុងអាហារ គឺមិនជួយកាត់បន្ថយហានិភ័យនៃការឆ្លងកូវីដទេ appeared first on Kampuchea Thmey Daily.

អាល់កុល Archives - Kampuchea Thmey Daily

អាល់កុល និងជែល មួយណាជាជម្រើសល្អ គួរប្រើជម្រះមេរោគ?

កុំចេះតែហ៊ានដាក់ចូលមាត់! អាល់កុលក្នុងគ្រឿងស្រវឹង ខុសពីអាល់កុលលាងដៃ

១. មេតាណុល

២. អេតាណុល​

៣. អ៊ី​សូ​ប្រូ​ប៉ា​ណុល

អាជ្ញាធរបង្កើនការរឹតបន្តឹងមណ្ឌលចត្តាឡីស័កកូបធំ ក្រោយមានអ្នកពុលស្លាប់៧នាក់

ប្រើអាល់កុលដឺក្រេខ្ពស់ មិនអាចសម្លាប់មេរោគបាន ហើយគ្រោះថ្នាក់ស្បែកទៀត!

ក្រើនរំឭកវិធីសម្អាតដៃដែលត្រឹមត្រូវអាចសម្លាប់មេរោគបាន តែមិនឱ្យខូចស្បែក

អាល់កុលអាចកម្ចាត់វីរុសកូវីដបាន តែមិនអាចផឹកស្រា-ស្រាបៀរមានជាតិអាល់កុលជំនួសទេ

ថៃ ហាមប្រជាជនកុំបាញ់អាកុលចូលក្នុងអាហារ គឺមិនជួយកាត់បន្ថយហានិភ័យនៃការឆ្លងកូវីដទេ

២. អេតាណុល

៣. អ៊ីសូប្រូប៉ាណុល