អាល្លឺម៉ង់ Archives - Kampuchea Thmey Daily

ក្រុមហ៊ុនផលិតអាវុធធំៗរបស់អាល្លឺម៉ង់ ប្រកាសផែនការអភិវឌ្ឍខែលការពារដ្រូន

Minea Neu — Tue, 12 May 2026 10:59:00 +0000

ក្រុមហ៊ុនការពារជាតិខ្នាតយក្សរបស់ប្រទេសអាល្លឺម៉ង់ Rheinmetall និងក្រុមហ៊ុនទូរគមនាគមន៍ Deutsche Telekom នៅថ្ងៃចន្ទ បានប្រកាសពីផែនការអភិវឌ្ឍខែលការពារដ្រូន ដើម្បីការពារទីក្រុងនិងហេដ្ឋារចនាសម្ព័ន្ធសំខាន់ៗ។

យោងតាមភ្នាក់ងារសារព័ត៌មានតួកគី Anadolu ផ្សាយថ្ងៃទី១១ ខែឧសភា ឆ្នាំ២០២៦ ក្នុងសេចក្តីថ្លែងការណ៍រួមមួយ ក្រុមហ៊ុនទាំងពីរ បានបញ្ជាក់ថា ពួកគេនឹងអភិវឌ្ឍបច្ចេកវិទ្យានិងសមត្ថភាព ដើម្បីទប់ទល់នឹងសេណារីយ៉ូគំរាមកំហែងស្មុគស្មាញ រួមទាំងការវាយប្រហារដែលអាចកើតមានលើហេដ្ឋារចនាសម្ព័ន្ធសំខាន់ៗ ពាក់ព័ន្ធនឹងដ្រូនគ្រប់ប្រភេទ។

ក្រុមហ៊ុនការពារជាតិយក្សអាល្លឺម៉ង់ Rheinmetall. រូបភាព៖ Reuters

លោក Armin Papperger នាយកប្រតិបត្តិក្រុមហ៊ុន Rheinmetall លើកឡើងក្នុងសេចក្តីថ្លែងការណ៍ថា៖ « ការគំរាមកំហែងបង្កឡើងដោយដ្រូនគឺជាឌីជីថលកម្រិតខ្ពស់។ នេះជាមូលហេតុនៃការការពារប្រកបដោយប្រសិទ្ធភាព តម្រូវឱ្យមានការរួមបញ្ចូលគ្នានៃឧបករណ៍ចាប់សញ្ញា និងបណ្តាញទំនាក់ទំនងដែលមានសុវត្ថិភាព»។

ដោយឡែក លោក Tim Hoettges នាយកប្រតិបត្តិក្រុមហ៊ុន Deutsche Telekom លើកឡើងថា៖ « គម្រោងនេះនឹងពឹងផ្អែកលើឆ្អឹងខ្នងទំនាក់ទំនង និងសមត្ថភាពទិន្នន័យរបស់ក្រុមហ៊ុន។ ដោយមានជំនាញរបស់យើងក្នុងការតភ្ជាប់ ពពក និងការវិភាគទិន្នន័យ យើងកំពុងលើកកម្ពស់ការការពារដ្រូនដល់កម្រិតថ្មីមួយ»។

យោងតាមក្រុមហ៊ុននានា ដ្រូនកាន់តែច្រើនកំពុងត្រូវបានគ្រប់គ្រងតាមរយៈបណ្តាញទូរស័ព្ទចល័ត។

ក្រុមហ៊ុនទាំងពីរនិយាយថា៖ « មិនយូរប៉ុន្មានបណ្តាញទូរស័ព្ទចល័តអាចដំណើរការជាឧបករណ៍ចាប់សញ្ញាជាមូលដ្ឋានគឺរ៉ាដាតំបន់ធំទូលាយ។ មិនតែប៉ុណ្ណោះ វាមានលំនាំមិនធម្មតានៅក្នុងចរាចរណ៍ទិន្នន័យដែលអាចជាសញ្ញានៃតំណភ្ជាប់បញ្ជារបស់ដ្រូន។ ឧបករណ៍ទាំងនោះនឹងជួយអ្នកឆ្លើយតប បន្ទាន់ រកឃើញដ្រូននិងកំណត់អត្តសញ្ញាណប្រតិបត្តិករបានយ៉ាងឆាប់រហ័ស រួមទាំងក្នុងតំបន់ហាមឃាត់ការហោះហើរបណ្តោះអាសន្នផងដែរ»៕

ប្រែដោយ៖ ណឺ មិនា

The post ក្រុមហ៊ុនផលិតអាវុធធំៗរបស់អាល្លឺម៉ង់ ប្រកាសផែនការអភិវឌ្ឍខែលការពារដ្រូន appeared first on Kampuchea Thmey Daily.

អាល្លឺម៉ង់និងអ៊ុយក្រែន ត្រៀមសហការអភិវឌ្ឍអាវុធប្រើបច្ចេកវិទ្យាទំនើប វាយប្រហារបានឆ្ងាយ

Minea Neu — Mon, 11 May 2026 12:00:00 +0000

ប្រទេសអាល្លឺម៉ង់ លើកឡើងនៅថ្ងៃចន្ទថា ខ្លួនមានគោលបំណងពង្រីកកិច្ចសហប្រតិបត្តិការជាមួយអ៊ុយក្រែនក្នុងការអភិវឌ្ឍអាវុធបច្ចេកវិទ្យាខ្ពស់ វាយប្រហារបានឆ្ងាយនិងមានសមត្ថភាពខ្លាំងជាងមុន។

យោងតាមភ្នាក់ងារសារព័ត៌មាន AFP ផ្សាយថ្ងៃទី១១ ខែឧសភា ឆ្នាំ២០២៦ រដ្ឋមន្ត្រីក្រសួងការពារជាតិអាល្លឺម៉ង់ លោក Boris Pistorius ប្រាប់ទីភ្នាក់ងារសារព័ត៌មានអាល្លឺម៉ង់ (DPA) នៅទីក្រុងគៀវ ថា៖ « ទីក្រុងប៊ែរឡាំងប្តេជ្ញាចិត្តក្នុងការអភិវឌ្ឍប្រព័ន្ធអាវុធថ្មីៗដោយសហការជាមួយអ៊ុយក្រែន។ ការពង្រឹងកិច្ចសហប្រតិបត្តិការនេះជាផ្នែកមួយនៃភាពជាដៃគូយុទ្ធសាស្ត្រ វាគឺជាគោលដៅសំខាន់នៃដំណើរទស្សនកិច្ច»។

រដ្ឋមន្ត្រីក្រសួងការពារជាតិអាល្លឺម៉ង់ លោក Boris Pistorius ។ រូបភាព៖ Reuters

យ៉ាងណា ដំណើរទស្សនកិច្ចរបស់រដ្ឋមន្រ្តីអាល្លឺម៉ង់នៅថ្ងៃចន្ទនេះ មិនបានប្រកាសជាសាធារណៈទេ។

លោកលើកឡើងថា៖ « ការផ្តោតសំខាន់គឺទៅលើការអភិវឌ្ឍរួមគ្នានៃប្រព័ន្ធដ្រូនទំនើបៗនៅគ្រប់ចម្ងាយទាំងអស់ ជាពិសេក្នុងតំបន់នៃការវាយប្រហារដ៏ជ្រៅ»។

ប្រយោគ «ការវាយប្រហារដ៏ជ្រៅ» កន្លែងនេះ សំដៅទៅលើសមត្ថភាពក្នុងការបំផ្លាញគោលដៅសំខាន់ៗយ៉ាងជ្រៅក្នុងទឹកដីរបស់ប្រទេសសត្រូវ។

ដោយឡែក អ្នកវិភាគនិយាយថា ដៃគូណាតូអឺរ៉ុបមានចន្លោះប្រហោងក្នុងវិស័យអាវុធរយៈចម្ងាយឆ្ងាយដែលអនុវត្តការវាយប្រហារឆ្ងាយៗ។

លោក Pistorius ថា ជារឿងចាំបាច់សម្រាប់រដ្ឋជាសមាជិកណាតូក្នុងការធ្វើសកម្មភាពយ៉ាងឆាប់រហ័ស។ រដ្ឋាភិបាលអាល្លឺម៉ង់កំពុងបន្តផែនការសម្រាប់ការបណ្តាក់ទុនរួមគ្នាបន្ថែមទៀតជាមួយអ៊ុយក្រែន។

រដ្ឋមន្ត្រីរូបនេះបន្តថា «ក្នុងការធ្វើដូច្នេះ យើងទទួលបានអត្ថប្រយោជន៍ពីបទពិសោធន៍របស់អ៊ុយក្រែននៅលើសមរភូមិ»៕

ប្រែដោយ៖ ណឺ មិនា

The post អាល្លឺម៉ង់និងអ៊ុយក្រែន ត្រៀមសហការអភិវឌ្ឍអាវុធប្រើបច្ចេកវិទ្យាទំនើប វាយប្រហារបានឆ្ងាយ appeared first on Kampuchea Thmey Daily.

មេដឹកនាំអឺរ៉ុបភ្ញាក់ផ្អើល ដែល ត្រាំ ដកទ័ពភ្លាមៗចេញពីអាល្លឺម៉ង់ ខណៈស្ថានភាពពិភពលោកកាន់តែអាក្រក់

Minea Neu — Tue, 05 May 2026 11:30:00 +0000

មេដឹកនាំអឺរ៉ុប បានលើកឡើងកាលពីថ្ងៃចន្ទថា ការសម្រេចចិត្តភ្លាមៗរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ក្នុងការដកកងទ័ពអាមេរិករាប់ពាន់នាក់ចេញពីប្រទេសអាល្លឺម៉ង់ជារឿងគួរឱ្យភ្ញាក់ផ្អើល ប៉ុន្តែវាជាសញ្ញាថ្មីមួយបង្ហាញថា អឺរ៉ុបត្រូវតែពង្រឹងសមត្ថភាពវិស័យការពារជាតិផ្ទាល់ខ្លួន។

យោងតាមសារព័ត៌មាន ABC ផ្សាយថ្ងៃទី០៤ ខែឧសភា ឆ្នាំ២០២៦ មន្ទីរបញ្ចកោណបានប្រកាសកាលពីសប្តាហ៍មុនថា ខ្លួននឹងដកកងទ័ពប្រមាណ ៥ ០០០នាក់ ចេញពីប្រទេសអាល្លឺម៉ង់ ប៉ុន្តែ លោក ត្រាំ ប្រាប់អ្នកយកព័ត៌មានកាលពីថ្ងៃសៅរ៍ថា៖ « យើងនឹងកាត់បន្ថយចំនួនកងទ័ពបន្ថែមទៀត! យើងនឹងកាត់បន្ថយច្រើនជាង ៥ ០០០នាក់»។

យោធាអាមេរិក។ រូបភាព៖ Reuters

ការសម្រេចចិត្តរបស់លោក ត្រាំ កើតឡើង ចំពេលមានជម្លោះពាក្យសម្តីកាន់តែខ្លាំងជាមួយអធិការបតីអាល្លឺម៉ង់ លោក Friedrich Merz ជុំវិញសង្គ្រាមអាមេរិក-អ៊ីស្រាអែលលើអ៊ីរ៉ង់ និងការស្ទាក់ស្ទើររបស់សម្ព័ន្ធមិត្តអឺរ៉ុបក្នុងការចូលរួមក្នុងជម្លោះនៅមជ្ឈិមបូព៌ា។

ពេលសួរពីការសម្រេចចិត្តរបស់សហរដ្ឋអាមេរិក នាយករដ្ឋមន្ត្រីន័រវេស លោក Jonas Gahr Støre លើកឡើងថា៖ « ខ្ញុំមិននិយាយបំផ្លើសទេ ព្រោះខ្ញុំរំពឹងថាអឺរ៉ុបនឹងទទួលបន្ទុកផ្នែកសន្តិសុខផ្ទាល់ខ្លួនកាន់តែខ្លាំង»។

លោកប្រាប់អ្នកយកព័ត៌មាននៅទីក្រុង Yerevan ប្រទេសអាមេនី ថា៖ « ខ្ញុំមើលមិនឃើញតួលេខទាំងនោះគួរឱ្យភ្ញាក់ផ្អើលទេ ប៉ុន្តែខ្ញុំគិតថា រឿងនេះគួរតែត្រូវបានដោះស្រាយតាមរបៀបក្នុងក្របខ័ណ្ឌនៃអង្គការណាតូ»។

ដោយឡែក នាយករដ្ឋមន្ត្រីអង់គ្លេស លោក Keir Starmer និយាយថា៖ « ខ្ញុំគ្មានការសង្ស័យទេ ព្រោះវាចាំបាច់ត្រូវមានធាតុផ្សំអឺរ៉ុបដ៏រឹងមាំមួយនៅក្នុងអង្គការណាតូ។ […] វាជារឿងសារៈសំខាន់ខ្លាំងណាស់ដែលយើងត្រូវប្រឈមមុខនឹងរឿងនេះ[អឺរ៉ុបត្រូវរឹងមាំខ្លួនឯង]»។

ទាក់ទងនឹងបញ្ហានេះ ប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas ថា៖ « វាមានការពិភាក្សាអំពីការដកកងទ័ពអាមេរិកចេញពីអឺរ៉ុបយូរមកហើយ។ ប៉ុន្តែជាការពិត! ពេលវេលានៃការប្រកាសនេះបានក្លាយជារឿងគួរឱ្យភ្ញាក់ផ្អើល»។

លោកស្រីបន្ថែមថា៖ « ខ្ញុំគិតថាបញ្ហានេះបង្ហាញថា យើងត្រូវតែពង្រឹងសសរស្តម្ភអឺរ៉ុបនៅក្នុងអង្គការណាតូ»៕

ប្រែសម្រួល៖ ណឺ មិនា

The post មេដឹកនាំអឺរ៉ុបភ្ញាក់ផ្អើល ដែល ត្រាំ ដកទ័ពភ្លាមៗចេញពីអាល្លឺម៉ង់ ខណៈស្ថានភាពពិភពលោកកាន់តែអាក្រក់ appeared first on Kampuchea Thmey Daily.

អាល្លឺម៉ង់ រៀបចំផែនការពង្រឹងវិស័យយោធា ដើម្បីការពារសមាជិកណាតូ

Minea Neu — Fri, 24 Apr 2026 14:00:00 +0000

រដ្ឋមន្ត្រីក្រសួងការពារជាតិអាល្លឺម៉ង់ លោក Boris Pistorius បង្ហាញយុទ្ធសាស្ត្រយោធាដ៏សំខាន់មួយសម្រាប់ប្រទេសអាល្លឺម៉ង់ ដែលឲ្យឈ្មោះថា «ការទទួលខុសត្រូវចំពោះអឺរ៉ុប» ក្នុងសន្និសីទសារព័ត៌មានមួយនៅថ្ងៃទី២២ ខែមេសា។

យុទ្ធសាស្ត្រនេះ បង្ហាញពីការគំរាមកំហែងកាន់តែខ្លាំងពីរុស្ស៊ី ដែលបង្កឡើងចំពោះសន្តិសុខអឺរ៉ុបនិងសមាជិករបស់អង្គការណាតូ ហើយក៏គូសបញ្ជាក់ពីមាគ៌ារបស់អាល្លឺម៉ង់ក្នុងការកសាងលើវិស័យកងទ័ពរឹងមាំបំផុតរបស់អឺរ៉ុប នៅឆ្នាំ ២០៣៩ ។ នេះបើយោងតាមសារព័ត៌មាន Kyiv Independent របស់អ៊ុយក្រែន ផ្សាយថ្ងៃទី២៣ ខែមេសា ឆ្នាំ២០២៦ ។

រដ្ឋមន្ត្រីក្រសួងការពារជាតិអាល្លឺម៉ង់ លោក Boris Pistorius ។ រូបភាព៖ Reuters

លោក Pistorius មានប្រសាសន៍ថា៖ « យើងកំពុងផ្លាស់ប្តូរកងកម្លាំងប្រដាប់អាវុធ Bundeswehr ទៅជាកងទ័ពដ៏រឹងមាំបំផុតរបស់អឺរ៉ុប។ ក្នុងរយៈពេលខ្លី យើងកំពុងបង្កើនសមត្ថភាពការពាររបស់យើង។ យើងមានគោលបំណងកសាងសមត្ថភាពយ៉ាងសំខាន់ ហើយក្នុងរយៈពេលវែង យើងនឹងធានាបាននូវឧត្តមភាពបច្ចេកវិទ្យា»។

កិច្ចព្រមព្រៀងរបស់អាល្លឺម៉ង់សម្គាល់ពីការផ្លាស់ប្តូរដ៏សំខាន់មួយនៅក្នុងគោលនយោបាយការពារជាតិរបស់ខ្លួន បណ្តាលមកពីសង្គ្រាមរបស់រុស្ស៊ីលើអ៊ុយក្រែននិងការគំរាមកំហែងកាន់តែខ្លាំង ចំពោះសន្តិសុខអឺរ៉ុប។

ការប្រកាសរបស់ លោក Pistorius នៅថ្ងៃទី២២ ខែមេសា ក៏ជាលើកដំបូងរបស់អាល្លឺម៉ង់ដែលដាក់ចេញនូវយុទ្ធសាស្ត្រយោធាជាតិចាប់តាំងពីសង្គ្រាមលោកលើកទី២។ យុទ្ធសាស្ត្រ «ការទទួលខុសត្រូវចំពោះអឺរ៉ុប» របស់អាល្លឺម៉ង់ព្រមានថា ការគំរាមកំហែងរបស់រុស្ស៊ីគឺធ្ងន់ធ្ងរនិងជិតមកដល់។

ក្នុងឯកសារយុទ្ធសាស្រ្តលើកឡើងថា៖ « រុស្ស៊ីកំពុងបង្កើតលក្ខខណ្ឌសម្រាប់សង្គ្រាមប្រឆាំងនឹងណាតូ ហើយកំពុងធ្វើប្រតិបត្តិការចម្រុះប្រឆាំងនឹងរដ្ឋជាសមាជិកនៃសម្ព័ន្ធមិត្ត។ ដូច្នេះ រុស្ស៊ីសព្វថ្ងៃនេះបង្កការគំរាមកំហែងភ្លាមៗដ៏ធំបំផុតចំពោះសន្តិភាព និងសន្តិសុខនៅក្នុងប្រទេសអាល្លឺម៉ង់ និងតំបន់អឺរ៉ុប-អាត្លង់ទិកពេលអនាគត»។

ផែនការខាងលើក៏អំពាវនាវឱ្យមានកងកម្លាំងអាល្លឺម៉ង់យ៉ាងហោចណាស់ ៤៦០ ០០០ នាក់ ទប់ទល់នឹងការគំរាមកំហែងរបស់រុស្ស៊ី។

ដើម្បីសម្រេចគោលដៅនេះ ប្រទេសអាល្លឺម៉ង់នឹងត្រូវពង្រីកទាហានបំពេញកាតព្វកិច្ចរបស់ខ្លួនពីកងទ័ពជាង ១៨៥ ៤២០នាក់ នាពេលបច្ចុប្បន្ន ដល់ ២៦០ ០០០នាក់ នៅពាក់កណ្តាលឆ្នាំ២០៣០ ខណៈការបង្កើនចំនួនទាហានបម្រុងពី ៦០ ០០០នាក់ ដល់ ២០០ ០០០នាក់។

មិនតែប៉ុណ្ណោះ ផែនការក៏អំពាវនាវឱ្យប្រទេសអាល្លឺម៉ង់ដើរតួនាទីជាអ្នកដឹកនាំដ៏រឹងមាំក្នុងអង្គការណាតូ ដោយផ្លាស់ប្តូរបន្ទុកការពារជាតិសម្ព័ន្ធមិត្តមួយចំនួនពីសហរដ្ឋអាមេរិក។

យ៉ាងណា ក្រោមការដឹកនាំរបស់ប្រធានាធិបតីអាមេរិក លោក ដូណាល់ ត្រាំ ដែលជាអ្នករិះគន់អង្គការណាតូដ៏ចាស់ដៃម្នាក់ ហើយតែងតែគំរាមកំហែងដកខ្លួនចេញពីសម្ព័ន្ធមិត្ត៕

ប្រែសម្រួល៖ ណឺ មិនា

The post អាល្លឺម៉ង់ រៀបចំផែនការពង្រឹងវិស័យយោធា ដើម្បីការពារសមាជិកណាតូ appeared first on Kampuchea Thmey Daily.

ពលរដ្ឋនៅហូឡង់ បែលហ្ស៊ិក និងអាល្លឺម៉ង់ ច្រឡំអាចម៍ផ្កាយថាមីស៊ីល

Minea Neu — Mon, 09 Mar 2026 10:11:53 +0000

មនុស្សជាច្រើនក្នុងប្រទេសហូឡង់ បែលហ្ស៊ិក និងអាល្លឺម៉ង់ ប្រទះឃើញដុំភ្លើងមួយធ្លាក់ពីលើមេឃពេលព្រលប់ថ្ងៃអាទិត្យ។ នាពេលនោះ ប៉ូលិសហូឡង់ បានទទួលការហៅទូរស័ព្ទយ៉ាងច្រើន ដោយមនុស្សបានរាយការណ៍ថា មានភ្លើងអ្វីម្យ៉ាងចេញពីមីស៊ីលរហូតដល់បុកយន្តហោះ។ យោងតាមអ្នកជំនាញ វាគឺជាអាចម៍ផ្កាយមួយប៉ុណ្ណោះ។ កម្ទេចកម្ទីរបស់វាធ្លាក់នៅប្រទេសអាល្លឺម៉ង់ ជាកន្លែងដែលអាចម៍ផ្កាយនេះ បានបំផ្លាញដំបូលផ្ទះជាច្រើន។

អាចម៍ផ្កាយមួយបង្កើតជាខ្សែពន្លឺឆ្លងកាត់លើមេឃពេលយប់នៅអង់គ្លេស។ រូបភាព៖ Reuters

អ្នកនាំពាក្យប៉ូលិសប្រាប់សារព័ត៌មាន NOS ថា បន្ទប់ត្រួតពិនិត្យប៉ូលិសទូទាំងប្រទេសហូឡង់ទទួលបានរបាយការណ៍ពីដុំភ្លើងដែលកំពុងហោះ។ ការសង្កេតមានភាពខុសប្លែកគ្នា ទៅតាមទីតាំងនីមួយៗ។

យោងតាមសារព័ត៌មានហូឡង់ NL Times, កាលពីថ្ងៃទី៩ខែមីនា, មនុស្សមួយចំនួនគិតថាវាជារ៉ុក្កែត ប្រហែលដោយសារតែសង្គ្រាមនៅអ៊ុយក្រែន និងមជ្ឈិមបូព៌ា។ អ្នកផ្សេងទៀតរាយការណ៍ថាជាផ្កាយដុះកន្ទុយ។ ចំណែកនៅតំបន់ Lelystad ប៉ូលិសទទួលរបាយការណ៍ជាច្រើនអំពីការធ្លាក់យន្តហោះ។

លោក Joost Hartman ជាអ្នកជំនាញអវកាស Rob van den Berg របស់ប្រទេសហូឡង់ ប្រាប់អ្នកសារព័ត៌មានថា៖ «ដុំភ្លើងនេះទំនងជាអាចម៍ផ្កាយ បំណែកថ្ម ឬលោហៈពីលំហអាកាស»។

ផ្ទុយពីរឿងពិតដែលកើតជាក់ស្តែងនិងអះអាងដោយប៉ូលិសនិងអ្នកវិទ្យាសាស្ត្ត្រ វីដេអូនៃដុំភ្លើងនេះកំពុងចរាចរនៅលើបណ្តាញសង្គម។ វាបានបង្ហាញពីការផ្ទុះមួយ។

លោក Hartman ឱ្យដឹងថា វាជាកម្ទេចកម្ទីរបស់អវកាសចូលទៅក្នុងបរិយាកាសប៉ុណ្ណោះ។

លោកប្រាប់សារប័ត៌មាន NOS ថា៖ «វាមានផ្កាយដុះកន្ទុយជាធម្មតារាប់សិបជារៀងរាល់យប់។ អ្នកឃើញពួកវានៅយប់ដែលមានអាកាសធាតុល្អ។ ផ្កាយដុះកន្ទុយភ្លឺឡើង ហើយរសាត់បាត់ទៅវិញ បន្ទាប់ពីពីរបីវិនាទី។ ប្រសិនបើវត្ថុដែលមានទំហំប៉ុនឥដ្ឋ បាល់ទាត់ ឬបាល់ហោះចូលទៅក្នុងបរិយាកាសក្នុងល្បឿនលឿន បំណែកនោះអាចបែកខ្ទេចខ្ទីបាន»។

យ៉ាងណា ប៉ូលិសអាល្លឺម៉ង់រាយការណ៍ថា កម្ទេចកម្ទីអាចម៍ផ្កាយបានធ្លាក់នៅរដ្ឋ Rhineland-Palatinate ភាគខាងលិច បង្កឱ្យខូចខាតដល់ដំបូលផ្ទះក្នុងតំបន់ Hunsrück ភ្នំ Eifel និង Koblenz។

ចំណែកនៅប្រទេសហូឡង់ និងបែលហ្ស៊ិកមិនមានការខូចខាតណាមួយកើតឡើងទេ៕

ប្រែសម្រួល៖ ណឺ មិនា

The post ពលរដ្ឋនៅហូឡង់ បែលហ្ស៊ិក និងអាល្លឺម៉ង់ ច្រឡំអាចម៍ផ្កាយថាមីស៊ីល appeared first on Kampuchea Thmey Daily.

ថ្នាក់ដឹកនាំធនាគារ ARDB និង អង្គការ GIZ របស់អាល្លឺម៉ង់ ជួបពិភាក្សាអំពីវិស័យហិរញ្ញវត្ថុបៃតង

Din Thary — Thu, 04 Dec 2025 08:30:08 +0000

លោក កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម (ARDB) នៅថ្ងៃទី ០១ ខែធ្នូ ឆ្នាំ ២០២៥ បានទទួលជួបក្រុមការងារនៃ Deutsche Gesellschaft fur Internationale Zusammenarbeit (GIZ) ដើម្បីពិភាក្សាលើបទពិសោធន៍ និងការអនុវត្តរបស់ ARDB ពាក់ព័ន្ធនឹង Green Finance និង Taxonomies ក៏ដូចជាបញ្ហាប្រឈមនានា ព្រមទាំងស្វែងយល់ពីកាលានុវត្តភាពនៃកិច្ចសហការនាពេលអនាគត។

បើតាមលោកបណ្ឌិត កៅ ថាច បានឱ្យដឹងថា ជំនួបរវាង ARDB និង GIZ ដើម្បីសុំពិភាក្សាដោយផ្ទាល់ជាមួយលោក អំពីវិស័យ Green Finance (ហិរញ្ញប្បទានបៃតង) និង Taxonomies (ប្រព័ន្ធកំណត់ស្តង់ដារបៃតង)។

ជាក់ស្តែង ពាក់ព័ន្ធទៅនឹងការងារនេះ ក្រោយពេលដែល GIZ ពិភាក្សា និងសុំយោបល់រួច GIZ ក៏នឹងបន្តជួបជាមួយស្ថាប័នពាក់ព័ន្ធមួយចំនួន ដើម្បីពិភាក្សាបន្ថែមទៅលើការងារនេះបន្ថែមផងដែរ។

ឆ្លៀតក្នុងឱកាសនេះ លោកបណ្ឌិត កៅ ថាច ក៏បានស្នើសុំឱ្យ GIZ ជួយពិនិត្យមើលលទ្ធភាពនៅកម្ពុជាធ្វើយ៉ាងណាឱ្យមានការទាក់ទងគ្នាឱ្យមានទីផ្សារកាបូនណាមួយច្បាស់លាស់ ដើម្បីជុំរុញកិច្ចការងារ ជាពិសេសកិច្ចការងារកសិកម្មដែលមានការបំភាយឱស្ម័នកាបូនិចតិចតួចបំផុតទៅលើបរិយាកាស។

លោកបណ្ឌិត កៅ ថាច ក៏បានស្នើសុំភ្ជាប់បន្ថែមទៅដល់ GIZ ឱ្យពិនិត្យមើលជួយការបច្ចេកទេសណាម្នាក់(Technical assistance) ឬក៏នរណាម្នាក់ដើម្បីធ្វើកិច្ចការទៅលើការដាំដុះស្រូវដែលមានការបំភាយឧស្ម័នកាបូនិចតិចតួចទៅលើអាកាស។

ជាការឆ្លើយតប GIZ បានភ្ជាប់កិច្ចពិភាក្សាលើការងារខាងលើនេះទៅកាន់អ្នកពាក់ព័ន្ធដែលបានពិភាក្សានាពេលកន្លងមក ដែលសន្យាថានឹងផ្តល់លេខទំនាក់ទំនងដែលពាក់ព័ន្ធទៅនិងកិច្ចការនេះ៕

The post ថ្នាក់ដឹកនាំធនាគារ ARDB និង អង្គការ GIZ របស់អាល្លឺម៉ង់ ជួបពិភាក្សាអំពីវិស័យហិរញ្ញវត្ថុបៃតង appeared first on Kampuchea Thmey Daily.

ចិនវ៉ាដាច់អាមេរិក ក្លាយជាដៃគូពាណិជ្ជកម្មធំបំផុតរបស់អាល្លឺម៉ង់

Huon Dina — Wed, 22 Oct 2025 07:34:57 +0000

ប្រទេសចិនបានវ៉ាដាច់សហរដ្ឋអាមេរិកជាថ្មី ក្លាយជាដៃគូពាណិជ្ជកម្មដ៏ធំបំផុតរបស់អាល្លឺម៉ង់ ដែលរងហានិភ័យនៃការធ្លាក់ចុះទៅទីផ្សារអាមេរិក ដោយសារតែពន្ធខ្ពស់របស់ប្រធានាធិបតី ដូណាល់ ត្រាំ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រនៅថ្ងៃពុធ (២២ តុលា)។

ទិន្នន័យបឋមពីការិយាល័យស្ថិតិអាល្លឺម៉ង់ បានបង្ហាញថា ពាណិជ្ជកម្មទ្វេភាគីរបស់អាល្លឺម៉ង់ និងចិន មានប្រមាណ ១៦៣,៤ ប៊ីលានអឺរ៉ូ (១៩០,៧ ប៊ីលានដុល្លារអាមេរិក) ចន្លោះពីខែមករា ដល់ខែសីហា។ ក្នុងរយៈពេលដូចគ្នា ពាណិជ្ជកម្មភាគីជាមួយអាមេរិកវិញ មានប្រមាណ ១៦២,៨ ប៊ីលានអឺរ៉ូ។

សហរដ្ឋអាមេរិក គឺជាដៃគូពាណិជ្ជកម្មកំពូលរបស់អាល្លឺម៉ង់ក្នុងឆ្នាំ ២០២៤ ក្រោយចិនកាន់ដំណែងនេះអស់រយៈពេល ៨ ឆ្នាំ។ វាកើតឡើងចំពេលដែលអាល្លឺម៉ង់ព្យាយាមកាត់បន្ថយការពឹងផ្អែកលើចិន ដោយសារបញ្ហានយោបាយ និងពាណិជ្ជកម្មរវាងប្រទេសទាំង២។ អាល្លឺម៉ង់ និងលោកខាងលិចផ្សេងទៀត បានចោទចិនថាអនុវត្តទីផ្សារមិនស្មើភាពគ្នា រួមទាំងការឧបត្ថម្ភធនដល់ក្រុមហ៊ុនខ្លួនជាដើម។

យ៉ាងណាមិញ និន្នាការថ្មីបានកើតឡើងម្ដងទៀត ចំពេលដែលពន្ធខ្ពស់របស់ ត្រាំ ធ្វើឱ្យអាល្លឺម៉ង់ពង្រឹងនូវការធ្វើពិពិធកម្មទីផ្សាររបស់ខ្លួន។ ពន្ធខ្ពស់ បានធ្វើឱ្យការនាំចេញរបស់អាល្លឺម៉ង់ទៅអាមេរិក ធ្លាក់ចុះ ៧,៤ ភាគរយ ក្នុងរយៈពេល ៨ ខែដើមឆ្នាំនេះ ធៀបនឹងរយៈពេលដូចគ្នាឆ្នាំមុន មកត្រឹម ៩៩,៦ ប៊ីលានអឺរ៉ូ។ នៅខែសីហា ការនាំចេញទៅកាន់អាមេរិកបានធ្លាក់ចុះ ២៣,៥ ភាគរយ ដែលនេះបង្ហាញពីកំណើននៃនិន្នាការធ្លាក់ចុះ។

ការនាំចេញទៅកាន់ចិនបានធ្លាក់ចុះកាន់តែខ្លាំងជាងការនាំចេញទៅអាមេរិក ប្រមាណ ១៣,៥ ភាគរយ មកត្រឹម ៥៤,៧ ប៊ីលានអឺរ៉ូ នៅ ៨ ខែដើមឆ្នាំ។ ការនាំចូលពីចិនវិញ កើនឡើង ៨,៣ ភាគរយ ដល់ ១០៨,៨ ប៊ីលានអឺរ៉ូ។

អ្នកជំនាញលើកឡើងថា ដោយសារតែពន្ធខ្ពស់ និងភាពរឹងមាំនៃប្រាក់អឺរ៉ូ ការនាំចេញរបស់អាល្លឺម៉ង់ទៅអាមេរិក មិនងើបឡើងវិញភ្លាមៗទេ ខណៈកំណើនការនាំចូលពីចិនបង្កើនកង្វល់សម្រាប់ផលិតកម្មក្នុងស្រុក និងជំរុញការពឹងផ្អែកលើចិន៕

The post ចិនវ៉ាដាច់អាមេរិក ក្លាយជាដៃគូពាណិជ្ជកម្មធំបំផុតរបស់អាល្លឺម៉ង់ appeared first on Kampuchea Thmey Daily.

អាល្លីម៉ង់ស្វែងរកកិច្ចសហប្រតិបត្តិការជាមួយកម្ពុជា

deth leng — Wed, 22 Oct 2025 05:21:56 +0000

អាល្លីម៉ង់កំពុងបង្កើនការពង្រឹងទំនាក់ទំនង និងស្វែងរកកិច្ចសហប្រតិបត្តិការជាមួយបណ្តាប្រទេសនៅអាស៊ី រួមទាំងកម្ពុជា ដែលជាគោលដៅលេចធ្លោទទួលបានការចាប់អារម្មណ៍។

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅព្រឹកថ្ងៃទី ២២ ខែតុលា ឆ្នាំ ២០២៥ បានអនុញ្ញាតឱ្យលោក Andreas Scheuer ប្រធានក្រុមប្រឹក្សាភិបាលស្ថាប័ន Asia Bridge និងជាអតីតរដ្ឋមន្ត្រីសាធារណរដ្ឋសហព័ន្ធអាល្លឺម៉ង់ ទទួលបន្ទុកវិស័យដឹកជញ្ជូន និងហេដ្ឋារចនាសម្ព័ន្ធឌីជីថល ចូលជួបពិភាក្សាការងារ ក្រោមការសម្របសម្រួលរបស់លោក Stefan Messerer ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសហព័ន្ធអាល្លឺម៉ង់ប្រចាំកម្ពុជា។

លោកឧបនាយករដ្ឋមន្ត្រី និងលោក Andreas Scheuer បានពិភាក្សាផ្លាស់ប្តូរយោបល់ពាក់ព័ន្ធនឹង៖ បទពិសោធន៍ការងារកន្លងមក, បរិយាកាសវិនិយោគនៅកម្ពុជា, ពិពិធកម្មសេដ្ឋកិច្ច និងគោលដៅវិនិយោគ, ពាណិជ្ជកម្មអន្តរជាតិ, ការអភិវឌ្ឍលើវិស័យហេដ្ឋារចនាសម្ព័ន្ធ និងបច្ចេកវិទ្យាឌីជីថល។

លោកឧបនាយករដ្ឋមន្ត្រី ក៏បានជម្រាបបន្ថែមអំពីការបំបែកកំណត់ត្រាការអនុម័តគម្រោងវិនិយោគក្នុងឆ្នាំ២០២៤ និងការឈានទៅបំបែកកំណត់ត្រាសារជាថ្មីម្តងទៀតក្នុងឆ្នាំ២០២៥ ដែលលទ្ធផលនេះបានបង្ហាញឱ្យឃើញពីការយកចិត្តទុកដាក់ខ្ពស់ ក្នុងការលើកកម្ពស់បរិយាកាសវិនិយោគនៅកម្ពុជាឱ្យកាន់តែមានភាពអំណោយផល និងជាទីទុកចិត្តសម្រាប់ការវិនិយោគដោយផ្ទាល់ពីបរទេស។

លោកប្រធានក្រុមប្រឹក្សាភិបាល បានសម្តែងនូវការកត់សម្គាល់ខ្ពស់ចំពោះកំណែទម្រង់នានាដែលនាំឱ្យកម្ពុជាមានការផ្លាស់ប្តូរមុខមាត់ក្នុងរយៈពេលចុងក្រោយ ព្រមទាំងបានសម្តែងនូវការកោតសសើរខ្ពស់ចំពោះចក្ខុវិស័យ និងឆន្ទៈយ៉ាងមោះមុតរបស់ឧបនាយករដ្ឋមន្ត្រី ក្នុងការជំរុញកម្ពុជាជាមួយនឹង ចក្ខុវិស័យកម្ពុជាឆ្នាំ២០៥០ ជាប្រទេសដែលមានចំណូលខ្ពស់។

លោកប្រធានក្រុមប្រឹក្សាភិបាល បានបង្ហាញនូវការតាំងចិត្តក្នុងការពាំនាំអំពីចំនុចវិជ្ជមាន និងសក្តានុពលនានារបស់កម្ពុជាដែលលោកបានស្វែងយល់ក្នុងទស្សនកិច្ចនេះ ទៅផ្សព្វផ្សាយបន្តនៅក្នុងសហគមន៍ធុរកិច្ច និងពាណិជ្ជកម្ម ដែលមានទំនាក់ទំនងជាមួយស្ថាប័ន Asia Bridge ផងដែរ។

លោកឧបនាយករដ្ឋមន្ត្រី និងប្រធានក្រុមប្រឹក្សាភិបាល សង្ឃឹមយ៉ាងមុតមាំថា ទំនាក់ទំនងកិច្ចសហប្រតិបត្តិការរវាងកម្ពុជា និងអាល្លឺម៉ង់ កាន់តែប្រសើរឡើងនាពេលអនាគត។

យោងតាមក្រសួងពាណិជ្ជកម្ម នៅក្នុងរយៈពេល ៩ ខែ (មករា-កញ្ញា) ឆ្នាំ ២០២៥ ការដោះដូរទំនិញកម្ពុជា-អាល្លឺម៉ង់ សម្រេចបាន ៨៤៤ លានដុល្លារ កើនឡើង ៧,៦៤% ក្នុងនោះកម្ពុជានាំចេញទៅអាល្លឺម៉ង់ជាង ៦៩០ លានដុល្លារ កើន ២,៧៩% ចំណែកឯអាល្លឺម៉ង់នាំចូលមកវិញមានទំហំ ១៥៤ លានដុល្លារ កើន ៣៦,៥៣%៕

The post អាល្លីម៉ង់ស្វែងរកកិច្ចសហប្រតិបត្តិការជាមួយកម្ពុជា appeared first on Kampuchea Thmey Daily.

អាល្លឺម៉ង់ Archives - Kampuchea Thmey Daily

ក្រុម​ហ៊ុន​ផលិត​អាវុធធំៗ​​របស់​​អាល្លឺម៉ង់ ប្រកាស​​​ផែនការ​អភិវឌ្ឍ​ខែល​ការពារដ្រូន​​

អាល្លឺម៉ង់និង​អ៊ុយក្រែន ​ត្រៀម​សហការ​អភិវឌ្ឍ​អាវុធ​ប្រើ​បច្ចេកវិទ្យា​ទំនើប វាយប្រហារ​បាន​ឆ្ងាយ​

អាល្លឺម៉ង់ ​រៀប​ចំផែន​ការ​​ពង្រឹង​វិស័យ​យោធា ​ដើម្បី​ការពារ​សមាជិក​ណា​តូ

ពល​រដ្ឋនៅ​ហូឡង់ បែល​ហ្ស៊ិក និង​អាល្លឺម៉ង់ ​ច្រឡំ​​អាចម៍​ផ្កាយ​​ថា​មីស៊ីល

ថ្នាក់ដឹកនាំធនាគារ ARDB និង អង្គការ GIZ របស់​អាល្លឺម៉ង់ ជួបពិភាក្សាអំពីវិស័យហិរញ្ញវត្ថុបៃតង

ចិនវ៉ាដាច់អាមេរិក ក្លាយជាដៃគូពាណិជ្ជកម្មធំបំផុតរបស់អាល្លឺម៉ង់

​អាល្លីម៉ង់​ស្វែងរក​កិច្ច​សហប្រតិបត្តិការ​ជាមួយ​កម្ពុជា​

ក្រុមហ៊ុនផលិតអាវុធធំៗរបស់អាល្លឺម៉ង់ ប្រកាសផែនការអភិវឌ្ឍខែលការពារដ្រូន

អាល្លឺម៉ង់និងអ៊ុយក្រែន ត្រៀមសហការអភិវឌ្ឍអាវុធប្រើបច្ចេកវិទ្យាទំនើប វាយប្រហារបានឆ្ងាយ

អាល្លឺម៉ង់ រៀបចំផែនការពង្រឹងវិស័យយោធា ដើម្បីការពារសមាជិកណាតូ

ពលរដ្ឋនៅហូឡង់ បែលហ្ស៊ិក និងអាល្លឺម៉ង់ ច្រឡំអាចម៍ផ្កាយថាមីស៊ីល

ថ្នាក់ដឹកនាំធនាគារ ARDB និង អង្គការ GIZ របស់អាល្លឺម៉ង់ ជួបពិភាក្សាអំពីវិស័យហិរញ្ញវត្ថុបៃតង

អាល្លីម៉ង់ស្វែងរកកិច្ចសហប្រតិបត្តិការជាមួយកម្ពុជា