ប្រទេសជាច្រើនបានបង្អួតពីភាពអស្ចារ្យរបស់ខ្លួនក្នុងការផលិតនិងអភិវឌ្ឍន៍សព្វាវុធទំនើបៗថ្មីៗ ចំពេលដែលកម្តៅនៃស្ថានការណ៍ពិភពលោកក៏កាន់តែក្តៅ ហើយហានិភ័យផ្ទុះសង្គ្រាមលោកលើកទី៣ ក៏ចេះតែកើនឡើងផងដែរ។

ថ្ងៃនេះ កម្ពុជាថ្មី សូមបង្ហាញជូននូវអាវុធទំនើបចំនួន៥ប្រភេទដែលពិភពលោកកំពុងផ្ដោតការចាប់អារម្មណ៍ខ្លាំងបំផុតក្នុងឆ្នាំ២០២៦។

១. អាវុធឡាស៊ែរ

២០២៦ គឺជាឆ្នាំរបកគំហើញនៃអាវុធឡាស៊ែរ ដែលវាលែងត្រឹមតែជាការសាកល្បងទៀតហើយ។

តាមការផ្សាយរបស់គេហទំព័រ Blue Halo, អាវុធ LOCUST របស់អាមេរិក គឺជាប្រព័ន្ធឡាស៊ែរកម្លាំង ២០ ០០០ វ៉ាត់ បំពាក់លើរថយន្តយោធា Oshkosh ដែលអាចបាញ់កម្ទេចដ្រូន និងមីស៊ីលក្នុងតម្លៃត្រឹមតែប៉ុន្មានដុល្លារក្នុងមួយគ្រាប់។

ចំណែក Iron Beam របស់អ៊ីស្រាអែល គឺជាប្រព័ន្ធឡាស៊ែរខ្នាត ១០០ គីឡូវ៉ាត់ ដំបូងបង្អស់របស់ពិភពលោកដែលត្រូវបានដាក់ឲ្យប្រើប្រាស់ជាផ្លូវការ ដើម្បីស្ទាក់ចាប់គ្រាប់រ៉ុកកែតនិងដ្រូនក្នុងតម្លៃទាបបំផុត។

២. អាវុធល្បឿនលឿនជាងសំឡេងខ្លាំង

មហាអំណាចកំពុងប្រកួតប្រជែងគ្នាយ៉ាងខ្លាំងលើល្បឿនដែលលើសពី ៥ ដងនៃល្បឿនសំឡេង។ ក្នុងនោះ បើយោងតាមគេហទំព័រ Missile Defense Advocacy, មីស៊ីល Zircon របស់រុស្ស៊ី ត្រូវបានបំពាក់លើយន្តហោះចម្បាំង Su-57 ដែលមានសមត្ថភាពហោះក្នុងល្បឿនដល់ទៅ Mach 9 (៩ ដងនៃល្បឿនសំឡេង) និងអាចគេចផុតពីប្រព័ន្ធការពារអាកាសទំនើបៗបំផុតបាន។

ចំណែល Dark Eagle របស់​អាមេរិក គឺជាមីស៊ីលរយៈចម្ងាយឆ្ងាយ អាចបាញ់បានល្បឿនលឿនបំផុត ដែលអាមេរិកកំពុងសម្រុកដាក់ពង្រាយដើម្បីប្រកួតប្រជែងជាមួយចិន និងរុស្ស៊ី។

៣. នាវាផ្ទុកយន្តហោះក្នុងលម្ហអាកាសនិងយន្តហោះជំនាន់ទី៦

គម្រោងទ្វារមេឃខាងត្បូង Nantian Gate Plan របស់ចិន កំពុងត្រូវបានពិភពលោកតាមដានយ៉ាងយកចិត្តទុកដាក់។ គម្រោងនេះគឺជាការសង់ នាវាផ្ទុកយន្តហោះអវកាស Luan Niao ទម្ងន់ ១២០,០០០ តោន ដែលអាចដឹកយន្តហោះចម្បាំងគ្មានមនុស្សបើកបាន ៨៨ គ្រឿង។ ទោះបីជាបច្ចុប្បន្នវាស្ថិតក្នុងដំណាក់កាលរៀបចំ ប៉ុន្តែបច្ចេកវិទ្យាខ្លះក្នុងគម្រោងនេះកំពុងត្រូវបានអនុវត្តមែនទែន។

សព្វាវុធខ្លាំងផ្សេងទៀត មានដូចជា យន្តហោះចម្បាំងជំនាន់ទី៦របស់ចិន White Emperor ដែលអាចហោះហើរបានទាំងក្នុងបរិយាកាស និងលម្ហអាកាស និងយន្តហោះចម្បាំងអាថ៌កំបាំងជំនាន់ថ្មីរបស់អាមេរិក F-47 ដែលស្ថិតក្នុងកញ្ចប់ថវិកាយោធា ៩០០ ពាន់លានដុល្លាររបស់អាមេរិកសម្រាប់ឆ្នាំ ២០២៦។

៤. កងទ័ពដ្រូនឆ្លាតវៃ

ដ្រូនក្នុងឆ្នាំ២០២៦នេះ មិនមែនគ្រាន់តែជាឧបករណ៍បញ្ជាពីចម្ងាយទៀតនោះទេ ប៉ុន្តែវាប្រើ AI ក្នុងការប្រយុទ្ធជាក្រុម។ MUM-T គឺជាបច្ចេកវិទ្យាដែលអនុញ្ញាតឲ្យយន្តហោះចម្បាំងមានមនុស្សបើក (ដូចជា F-35) ដឹកនាំដ្រូនចម្បាំងរាប់សិបគ្រឿងឲ្យទៅវាយប្រហារគោលដៅដោយស្វ័យប្រវត្តិ។

៥. ប្រព័ន្ធ Golden Dome

ក្នុងកញ្ចប់ថវិកាយោធាថ្មីរបស់អាមេរិក មានលេចចេញនូវឈ្មោះ «Golden Dome» ដែលជាខែលការពារដោយប្រើប្រព័ន្ធផ្កាយរណប ដើម្បីស្ទាក់ចាប់មីស៊ីលឆ្លងទ្វីបពីលើអាកាស ដែលផ្តល់សុវត្ថិភាពខ្ពស់ជាងប្រព័ន្ធការពារលើដីធម្មតា៕

អត្ថបទ៖ សុខ សុវណ្ណ

The post អាវុធទំនើបបំផុតទាំង៥ប្រភេទ ដែលពិភពលោកកំពុងតាមមើល ក្នុងឆ្នាំ២០២៦ appeared first on Kampuchea Thmey Daily.

​កាល​ពី​សប្តាហ៍​មុន​ សហរដ្ឋ​អាមេរិកបាន​ប្រកាស​​ថា ​​​ខ្លួន​លក់​អាវុធ​ឱ្យ​តៃ​វ៉ាន់​ក្នុង​តម្លៃ​ ១១.១ប៊ីលាន​ដុល្លារ ដែល​ជា​តម្លៃ​មួយ​ដ៏​ថ្លៃ​និង​មាន​អាវុធ​ធុន​ធ្ងន់​ជា​ច្រើន​មិន​ធ្លាប់​មាន​លើ​កោះ​នេះ​។

អ្នក​នាំ​ពាក្យ​ក្រសួង​ការពារ​ជាតិចិន​ លោក Zhang Xiaogang ​បាន​និយាយ​ថា​៖«ភាគី​អាមេរិក​បាន​ក្បត់​ពាក្យ​សម្តី​របស់​ខ្លួន​ ញុះ​ញង់បង្កើត​ឱ្យ​មាន​សង្គ្រាម​កាន់​តែ​ខ្លាំង​​ និងបាន​​​ពន្លឿន​ការ​គំរាម​កំហែង​ឱ្យ​មាន​សង្គ្រាម​នៅ​ច្រក​សមុទ្រ​តៃវ៉ាន់​»។

លោក​ Zhang បាន​បន្តទៀត​ថា​ សហរដ្ឋ​អាមេរិក​គឺ​ជា​អ្នក​បង្ក​ហេតុ​ហើយ​វា​​ជា​សកម្មភាព​ដែល​ខុស​ធ្ងន់​ធ្ងរ​ណាស់​។

លោក​បាន​​​បន្ត​ថា ការ​លូក​ដៃ​របស់​សហរដ្ឋ​អាមេរិក​គឺ​នាំ​ឱ្យ​មាន​ភាព​អវិជ្ជមាន​​ផ្នែក​ទំ​នាក់​ទំនង​កាទូត​របស់​តៃ​វ៉ាន់​ ជា​ពិសេស​បាន​ជ្រៀត​ជ្រែក​ចូល​ក្នុង​កិច្ច​ការ​ផ្ទៃ​ក្នុង​របស់​ចិន​។​ វា​ជា​ការ​បង្ហាញ​ឱ្យ​ឃើញ​​​ថា​ជា​ទង្វើ​​​ខុស​​ធ្ងន់​​ធ្ងរ​​ដល់​កង​កម្លាំង​​ឯករាជ្យ​ពិសេស​របស់តៃវ៉ាន់ ដែល​បំផ្លាញ​យ៉ាង​ខ្លាំង​ក្លា​​ដល់​សន្តិភាពនានា និង​ស្ថិរ​ភាព​នៅ​ច្រក​សមុទ្រ​តៃវ៉ាន់​។

អ្នក​នាំ​ពាក្យ​​​ក្រសួង​ការ​ពារជាតិចិន ក៏​បាន​ជំរុញ​ឱ្យ​សហរដ្ឋ​អាមេរិក​គួរ​យល់ដឹង​​ឱ្យ​បានស៊ីជម្រៅ​ពី​បញ្ហា​របស់​​តៃវ៉ាន់​ ដោយ​គោ​រព​តាម​គោលការណ៍​ចិន​តែ​មួយ និង​សេច​ក្តី​ថ្លែង​ការណ៍​រួម​បី​ចំណុច​របស់​ចិន-អាមេរិក។

លោក​ក៏​បាន​បន្ថែម​ថា សហរដ្ឋ​អាមេរិក​គួរ​តែ​ប្រុងប្រយ័ត្ន​បំផុត​ក្នុង​ការ​ដោះ​ស្រាយ​បញ្ហា​ទាក់​ទង​នឹង​កោះ​តៃវ៉ាន់ បញ្ឈប់​ការ​បំពាក់​អាវុធ​ដល់​ដែនកោះ​នេះ​តាម​គ្រប់​មធ្យោបាយ​ទាំង​អស់​ និងចាត់​វិធាន​ការ​ជាក់​ស្តែង​ដើម្បី​​រក្សា​​​ស្ថានភាព​​​នៃ​ទំនាក់​ទំនង​​​​​ភាគី​ជារួម និង រវាង​ប្រជាជាតិ​ទាំងពីរ​​​និង​យោធា​​ទាំងពីរ​​៕​

ប្រែសម្រួល៖ ណឺ មិនា​

The post ចិន​​​​ថា អាមេរិក​បញ្ឆេះ​សង្គ្រាម​ ​​ក្រោយ​​​​​​ការ​​សម្រេច​​លក់​អាវុធ​ធុនធ្ងន់​​ឱ្យ​តៃវ៉ាន់​ appeared first on Kampuchea Thmey Daily.

បើតាមការលើកឡើងរបស់លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានឲ្យដឹងនៅព្រឹកថ្ងៃទី១៥កក្កដា ​នេះថា អាវុធដែលមន្ត្រីជំនាញរកឃើញនេះ គឺជាអាវុធដែលកប់លាក់ទុកត្រៀមប្រយុទ្ធរវាងខ្មែរ និងខ្មែរនៅសមយ័សង្រ្គាម ហើយកន្លែងដែលរកឃើញអាវុធទាំងនេះ ក៏ជាកន្លែងអតីតសមរភូមិប្រយុទ្ធផងដែរ តែបច្ចុប្បន្នបានប្រែក្លាយជាតំបន់អភិវឌ្ឍន៍ដំណាំកសិកម្ម។ ក្រៅពីអាវុធ មន្ត្រីជំនាញក៏បានរកឃើញវិទ្យុទាក់ទងចំនួន៣គ្រឿងទៀតដែរ។

លោកក៏សូមអរគុណដល់សន្តិភាព​ ដែលបានធ្វើឱ្យអាវុធកប់ទុកត្រៀមប្រយុទ្ធរវាងខ្មែរ និងខ្មែរត្រូវបានបញ្ចប់ទាំងស្រុង ហើយអាវុធទាំងនេះ​ គ្មានសមរភូមិបម្រេីការរហូតបាត់បង់សមត្ថភាពប្រយុទ្ធ និងក្លាយជាសាកសពអាវុធតែម្តង៕

The post CMAC រកឃើញអាវុធវែង៥២ដើមកប់ទុកក្នុងដីបម្រើឲ្យសមរភូមិកាលពីសម័យសង្គ្រាម appeared first on Kampuchea Thmey Daily.

ប្រតិបត្តិការនេះត្រូវបានឥណ្ឌាដាក់ឈ្មោះថា «Sindoor» ដោយកំណត់គោលដៅលើជំរំភេរវករនៅក្នុងទឹកដីប៉ាគីស្ថាន ប៉ុន្តែបែរជាសម្លាប់ជនស៊ីវិលចំនួន៨នាក់ទៅវិញ។

ដោយសារតែប្រទេសជិតខាងទាំងពីរសុទ្ធតែមានអាវុធនុយក្លេអ៊ែរ ទើបធ្វើឲ្យពិភលោកបារម្ភផ្ទុះសង្គ្រាមធំ។ យ៉ាងណា ក្តៅពីនុយក្លេអ៊ែរ ឥណ្ឌានិងប៉ាគីស្ថាន ក៏មានអាវុធទំនើបៗនិងពោរពេញដោយអនុភាពផ្សេងទៀតផងដែរ។

ថ្ងៃនេះ កម្ពុជាថ្មី សូមបង្ហាញជូនអាវុធទំនើបនិងមានអនុភាពទាំង៥ របស់ឥណ្ឌានិងប៉ាគីស្ថាន!

ឥណ្ឌា

១. មីស៊ីលបាលីស្ទិកអន្តរទ្វីប Agni-V ហោះបានចម្ងាយ៥ ៥០០ទៅ៨ ០០០គីឡូម៉ែត្រ ហើយមានសមត្ថភាពបំពាក់ក្បាលគ្រាប់នុយក្លេអ៊ែរ ដែលអាចវាយប្រហារគ្រប់កន្លែងនៅប្រទេសចិននិងទ្វីបអឺរ៉ុប ព្រមទាំងផ្នែកខ្លះនៃទ្វីបអាហ្វ្រិកទៀតផង។

២. នាវាមុជទឹក SSBN ថ្នាក់ INS Arihant ដើរដោយថាមពលនុយក្លេអ៊ែរ មានទម្ងន់៦ ០០០តោន។ វាបំពាក់ជាមួយមីស៊ីលនុយក្លេអ៊ែរ SLBM ប្រភេទ K-15 (រយៈចម្ងាយ ៧៥០ គីឡូម៉ែត្រ) និង K-4 (រយៈចម្ងាយ ៣ ៥០០គីឡូម៉ែត្រ)។ អ្វីដែលអស្ចារ្យគឺ SSBN អាចលាក់ខ្លួននៅបាតសមុទ្រ គេចពីរ៉ាដាបាន។

៣. មីស៊ីលល្បឿនលឿនជាងសំឡេង BrahMos ដែលផលិតរួមគ្នាដោយឥណ្ឌានិងរុស្ស៊ី។ វាមានល្បឿនលឿនជាងសំឡេង២.៨ទៅ៣ដង ជាមួយរយៈចម្ងាយជាង ៨០០គីឡូម៉ែត្រ។ វាជាមីស៊ីលគ្រូសលឿនជាងគេបំផុតក្នុងចំណោមមីស៊ីលដែលឥណ្ឌាកំពុងដាក់ឲ្យធ្វើប្រតិបត្តិការ ជាមួយសមត្ថភាពបាញ់ចេញបានពីគ្រប់កន្លែងដូចជាដីគោក ដែនអាកាស កប៉ាល់ និងនាវាមុជទឹក។

៤. យន្តហោះចម្បាំងពហុមុខងារ Rafale ជំនាន់ទី៤​.៥ បំពាក់ជាមួយរ៉ាដា AESA, មីស៊ីល Meteor និង SCALP ព្រមទាំងប្រព័ន្ធធ្វើសង្គ្រាមអាឡិចត្រូនិក។ យន្តហោះនេះ ត្រូវគេទទួលស្គាល់ថា ជាឧត្តមភាពដែនអាកាសល្អផ្តាច់គេនៅក្នុងតំបន់អាស៊ីខាងត្បូង។

៥. ប្រ័ពន្ធការពារដែនអាកាស S-400 Triumf ដែលមានប្រភពដើមពីប្រទេសរុស្ស៊ី។ វាមានសមត្ថភាពចាប់សញ្ញាគោលដៅបានច្រើនក្នុងពេលតែមួយ និងបង្កការគំរាមកំហែងដល់សត្រូវ ហើយវាគឺស្ថិតក្នុងចំណោមប្រព័ន្ធ SAM ដែលទំនើបបំផុតលើពិភពលោក។

ប៉ាគីស្ថាន

១. មីស៊ីលបាលីស្ទិក Ababeel ដែលមានរយៈចម្ងាយ២ ២០០គីឡូម៉ែត្រ បំពាក់ជាមួយក្បាលគ្រាប់នុយក្លេអ៊ែរច្រើនគ្រាប់។ មីស៊ីលនេះត្រូវបានប៉ាគីស្ថានអួតថា ទុកកម្ទេចខែលការពារ BMD និង S-400 របស់ឥណ្ឌា។

២. មីស៊ីលគ្រូស Babur ដែលមានសមត្ថភាពបាញ់ចេញពីនាវាមុជទឹក។ វាហោះបានចម្ងាយពី៤៥០ទៅ៧០០គីឡូម៉ែត្រ បំពាក់ជាមួយក្បាលគ្រាប់នុយក្លេអ៊ែរ។

៣. មីស៊ីលបាញ់ពីអាកាស Ra’ad-II ដែលមានសមត្ថភាពហោះបាន៦០០គីឡូម៉ែត្រ បំពាក់ជាមួយយន្តហោះ Mirage III ឬ V និង JF-17។ វាអាចបំពាក់ជាមួយអាវុធនុយក្លេអ៊ែរបាន ហើយវាយប្រហារចំគោលដៅច្បាស់ៗ និងចូលជ្រៅក្នុងទឹកដីសត្រូវបាន។

៤. យន្តហោះចម្បាំងពហុមុខងារ JF-17 Thunder Block III ដែលសហការណ៍ផលិតជាមួយប្រទេសចិន។ វាភ្ជាប់ជាមួយរ៉ាដា AESA និងមីស៊ីល PL-15 មានរយៈចម្ងាយ ២០០គីឡូម៉ែត្រ។ យន្តហោះនេះ ត្រូវគេឲ្យឈ្មោះថា «ស្តេចលើអាកាស» ដោយសារតែភាពខ្លាំងរបស់វា។

៥. ប្រព័ន្ធបាញ់រ៉ុកកែត Fatah-II ដែលមានរយៈចម្ងាយ១២០គីឡូម៉ែត្រ ភ្ជាប់ជាមួយ GPS និងInertial។ វាអាចជួយប្រយុទ្ធនៅក្នុងសមរភូមិនិងអាចដាក់ពង្រាយក្នុងល្បឿនដ៏លឿន៕

អត្ថបទ៖ សុខ សុវណ្ណ

ចុចអាន៖ ប៉ាគីស្ថាន បាញ់ទម្លាក់យន្តហោះចម្បាំងឥណ្ឌា៥គ្រឿង ខណៈជនស៊ីវិលស្លាប់កើនឡើងជាបន្ត

The post មកស្គាល់អាវុធទំនើបបំផុតនិងមានអនុភាព របស់ឥណ្ឌានិងប៉ាគីស្ថាន appeared first on Kampuchea Thmey Daily.

​ការ​ប្រកាស​ដក​ខ្លួន​ចេញ​ពី​​«អនុសញ្ញា​ត​​គ្រាប់​បែក​ចង្កោម និង​អនុសញ្ញា​​​​​អូតាវ៉ា​ស្តីពី​គ្រាប់​មីន»​ ​​ជា​​​សញ្ញា​​​បង្ហាញ​យ៉ាង​ច្បាស់​ថា ពួក​គេ​​​បាន​ត្រៀម​ខ្លួន​សម្រាប់​​​​​​ការ​ផលិត​​អាវុធ កា​រប្រើប្រាស់អាវុធ ក្នុងសង្គ្រាម​ជាមួយរុស្ស៊ី​​ដែលអាច​កើតមាន​។​

​ប្រទេសទាំងនោះ​ បានផ្តល់​ហេតុផល​ថា ការសម្រេច​របស់​ពួកគេ​គឺ​ដើម្បី​ជា​ជម្រើស​​ដែល​មាន​ភាពបត់បែន និងសេរីភាពនៃ​ការប្រើប្រាស់ប្រព័ន្ធអាវុធថ្មីៗ ខណៈប្រទេសនៅតំបន់​អឺរ៉ុប​​​​កាន់តែ​ពង្រឹង​គ្នា​​​បង្កើន​​ថវិកា​​សម្រាប់​វិស័យ​ការពារជាតិ​សម្រាប់​សន្តិសុខ​​តំបន់​អឺរ៉ុប​​ ដោយសហរដ្ឋអាមេរិក​​​ក្រោម​ការ​ដឹកនាំ​​​​​របស់​ប្រធានាធិបតី​ដូណាល់ ត្រាំ ហាក់​លែង​ខ្វល់​ពីសន្តិសុខអឺរ៉ុប ដូច​​ប្រធានាធិបតី​​មុនៗ​ធ្លាប់សន្យា​។

​ CCM ហាមឃាត់ទាំងស្រុងនូវការប្រើប្រាស់ ការផលិត ការផ្ទេរ និងសន្និធិ (ការស្តុកទុក)គ្រាប់បែកចង្កោម គោលបំណងដើម្បីដោះស្រាយផលវិបាកមនុស្សធម៌ដែលទាក់ទងនឹងការប្រើប្រាស់របស់វា ប៉ុន្តែ​ចាប់​តាំង​ពីសង្គ្រាម​​​រុស្ស៊ី​ឈ្លាន​ពាន​អ៊ុយក្រែន​​កាល​​​ជាង​៣ឆ្នាំ​មុន ​គ្រាប់បែក​ចង្កោម​ត្រូវបាន​គេរាយការណ៍​ថា ​ភាគី​​សង្គ្រាម​អ៊ុយក្រែន​និង​​​រុស្ស៊ី​សុទ្ធតែ​បាន​ប្រើ​ប្រាស់វា​រួច​ទៅហើយ​។​​​​

ស្ថិត​នៅ​​អឺរ៉ុប​ប៉ែ​ក​ខាងកើត ​​ប្រទេស​ទាំង​៤​​​ដែល​បាន​​​​​​​ប្រកាស​ដកខ្លួន​ចេញ​ពី​អនុសញ្ញា​​ខាងលើ សុទ្ធ​តែមាន​ព្រំដែន​ជាប់​មហាអំណាច​រុស្ស៊ី និង​ប្រទេសបេឡារុស​ដែលជាសម្ព័ន្ធមិត្ត​​​រុស្ស៊ី និង​ជា​ប្រទេសដែល​​ធ្លាប់​បង្ហាញ​ការ​ព្រួយ​បារម្ភ​​ខ្លាំង​ចំពោះ​ការឈ្លាន​ពា​ន​ពីសំណាក់​មហាអំណាចរុស្ស៊ី​​ក្នុងពេលណា​មួយដែលរុស្ស៊ី​ទទួលបានជោគជ័យ​​ក្នុងសង្គ្រាម​នៅអ៊ុយក្រែន​។

​​អនុសញ្ញា​គ្រាប់​បែក​ចង្កោម​ គិតត្រឹមខែធ្នូ ឆ្នាំ ២០២៣​ ​មាន​​​ប្រទេស​​​​ជារដ្ឋភាគី​​​​ជាង​១១០​​ប្រទេស​​​ដែលបានផ្តល់សច្ចាប័ន និង​ក៏មាន​ប្រទេស​ខ្លះ​​បាន​បង្ហាញ​ការ​ប្តេជ្ញាចិត្ត​រួច​ទៅ​ហើយ ប៉ុន្តែ​​​​​នៅ​មិនទាន់​ផ្តល់​សច្ចាប័ន​ដែល​ប្រទេស​សាមី។ ក្រៅ​ពីនេះ ក៏​មាន​ប្រទេសមហា​អំណា​ចប្រជែង​​ឥទ្ធិពល​ និង​ភូមិសាស្រ្តនយោបាយ ដូចជា សហរដ្ឋអាមេរិក រុស្ស៊ី និង ​ចិនមិនខ្វល់​ពី​អនុសញ្ញា​នេះ​ឡើយ​។

CCM ត្រូវបានអនុម័តនៅខែឧសភា ឆ្នាំ ២០០៨ ហើយចូលជាធរមាននៅថ្ងៃទី១ ខែសីហា ឆ្នាំ២០១០។

​ប្រទេស​ទាំង​៤​ខាង​លើ​នេះក៏បាន​​ប្រកាស​​ពី​ការ​ដក​ខ្លួន​ពី​​​​អនុសញ្ញា​​ទីក្រុង​​​អូតាវ៉ាស្តី​ពី​​​ការ​ទប់ស្កាត់​ការរីកសាយ​គ្រាប់​​​មីន​ប្រឆាំង​​​មនុស្ស។ ​ការ​ប្រកាស​របស់​ប្រទេស​នៅ​តំបន់​អឺរ៉ុប​ខាងកើត​នេះ គឺ​ស្រប​គ្នា​​នឹង​​​ការ​បញ្ចេញផែនការ​​​ការ​​ពារជាតិ​របស់​​​តំបន់អឺរ៉ុប​ ក្រោយ​​លោកដូណាល់ ត្រាំ លែង​ខ្វល់​ពី​សម្ព័ន្ធមិត្ត​អឺរ៉ុប​ដោយ​ងាក​ទៅចរចា​ជាមួយ​រុស្ស៊ី​ ដើម្បី​យក​គុណសម្បត្តិតែ​​ខ្លួនឯង​ ក្នុង​បំណង​​បញ្ចប់សង្គ្រាមដោយបង្ខំ​​​អ៊ុយក្រែន​​​ឲ្យទទួលយក​លក្ខខណ្ឌ​ដែល​​ខ្លួន​កំណត់​ជាមួយ​មហាអំណាច​រុស្ស៊ី​។

​​កាល​ពី​​ដើម​ខែ​មីនា​នេះ​ ប្រទេស​​តំបន់អឺរ៉ុប​​បាន​បញ្ចេញ​ផែន​ការ​​ការ​ពារជាតិដែល​មាន​ទឹកប្រាក់​ជាង​៨០០ពាន់​លាន​អឺរ៉ូ ដែលក្នុងនោះ​ក៏​​មាន​ផែនការ​ពង្រីក​ការផលិតអាវុធ​​​ក្នុងតំបន់អឺរ៉ុប​​ដោយ​លែង​ពឹង​ការ​នាំ​ចូល​អាវុធ​ពីសហរដ្ឋអាមេរិក​ដែរ​។​

ការប្រណាំងសព្វាវុធសំដៅទៅលើការបង្កើនសមត្ថភាពយោធារវាងប្រទេសនានា ដែលជារឿយៗត្រូវបានជំរុញដោយការព្រួយបារម្ភផ្នែកសន្តិសុខ ការប្រជែងគ្នាក្នុងតំបន់ និងការរីកចំរើនផ្នែកបច្ចេកវិទ្យា។ នៅឆ្នាំ២០២៥​ ការប្រណាំងសព្វាវុធជាសាកលបានកាន់តែខ្លាំងឡើង ដោយសារតែភាពតានតឹងផ្នែកភូមិសាស្ត្រនយោបាយ បច្ចេកវិជ្ជាយោធាដែលកំពុងរីកចម្រើន និងការផ្លាស់ប្តូរសម្ព័ន្ធភាព។

​ក្នុង​រយៈពេលចុង​ក្រោយ​នេះ ប្រទេសបារាំង​ដែល​មានក្បាលគ្រាប់​នុយក្លេអ៊ែរ​ប្រហែល​២៩០​គ្រាប់ ដែលជាមហា​អំណាច​​​​​នុយក្លេអ៊ែរ​លំដាប់ទី៤ បានព្រមាន​​​​ពីការដាក់​ពង្រាយ​​ក្បាលគ្រាប់​នុយក្លេអ៊ែរ​ដើម្បី​ការពារ​​អឺរ៉ុ​ប​។

ប្រធានាធិបតីបារាំងលោក Emmanuel Macron ថ្មីៗនេះបានសង្កត់ធ្ងន់លើសារៈសំខាន់នៃ​ការធ្វើទំនើបកម្មសមត្ថភាពរារាំងនុយក្លេអ៊ែររបស់ប្រទេស។ នេះរួមបញ្ចូលទាំងផែនការធ្វើឱ្យប្រសើរឡើងនូវមូលដ្ឋានអាកាស Luxeuil-les-Bains ដើម្បីផ្ទុកយន្តហោះ Rafale ចំនួន ៤០​គ្រឿងដែលបំពាក់ដោយមីស៊ីលលឿនជាងសំឡេងជំនាន់ក្រោយនៅឆ្នាំ២០៣៥។

​ក្នុងមហាសន្និបាត​អង្គការ​សហប្រជាជាតិ​កាល​ខែ​កញ្ញា​​ឆ្នាំ​២០២៤ អគ្គលេខាធិការអង្គការសហប្រជាជាតិ លោក Antonio Guterres បាន​ព្រមាន​ពីពេលវេលា​ដ៏​អាក្រក់​បំផុត​សម្រាប់​មនុស្សជាតិ​​ក្នុងសម័យ​នេះដោយសារ​តែ​​មេដឹកនាំ​​ប្រទេសមហាអំណាច​​គំរាមម្តងហើយ​ម្តងទៀត​​ក្នុងការ​ប្រើប្រាស់អាវុធនុយក្លេអ៊ែរ ជាពិសេស​​មេដឹកនាំរុស្ស៊ី ក្នុង​​ពេល​ដែលរដ្ឋបាល​របស់​លោក ចូ បៃ​ដិន បានផ្តល់​ការគាំទ្រ​ខ្លាំង​ដល់​អ៊ុយក្រែន។

លោក Antonio Guterres និយាយថា៖«​យើង​កំពុងធ្វើដំណើរក្នុងទិសដៅខុសទាំងស្រុង ។ ​ចាប់តាំងពីថ្ងៃដ៏អាក្រក់បំផុតនៃសង្រ្គាមត្រជាក់មក ទើបមានទិដ្ឋភាពនៃអាវុធនុយក្លេអ៊ែរ​ជះស្រមោលដ៏​ងងឹតបែបនេះ។ ការវាយលុកនុយក្លេអ៊ែរបានឈានដល់កម្រិតក្តៅបំផុត​​។ យើងថែមទាំងបានឮការគំរាមប្រើអាវុធនុយក្លេអ៊ែរទៀតផង»។​

លោក​បាន​បន្ថែម​ថា៖«នេះ​គឺ​ខណៈ​ពេល​ដែល​បទដ្ឋាន​ដែល​បាន​បង្កើត​ឡើង​ជុំវិញ​ការ​រីក​រាល​ដាល​អាវុធ​នុយក្លេអ៊ែរ​កំពុង​ត្រូវ​បាន​លុប​បំបាត់»៕​

ដោយ រ៉ាន់ រើយ

The post ​​ពិភពលោកឈាន​ដល់​ដំណាក់កាល​​រីកសាយ​ភាយ​អាវុធ​​​​គ្រប់ប្រភេទ​​ឡើងវិញ​ កាត់ផ្តាច់​កិច្ចខិត​​ខំ​ច្រើន​ទសវត្សរ៍​ appeared first on Kampuchea Thmey Daily.

កិច្ចប្រតិបត្តិការរបស់សមត្ថកិច្ចថៃ បន្ទាប់ពីតាមប្រមាញ់មុខសញ្ញាអស់រយៈពេលជាច្រើនថ្ងៃ នឹងត្រូវបានឃាត់ខ្លួននាពេលរំលងអាធ្រាត្រ ឈានចូលថ្ងៃទី ២៤ ខែមករា ឆ្នាំ២០២៥ នៅចំណុចក្បែរផ្លូវសន្តិព្រីឆា ក្នុងឃុំដនកៃឌី ស្រុកក្រាក់ធំបែន ខេត្តសាមុតសាខន ប្រទេសថៃ។

យោងតាមការផ្សាយរបស់គេហទំព័រថៃរ៉ាត់ បានបញ្ជាក់ថា នៅយប់នោះសមត្ថកិច្ចថៃបានតាមប្រមាញ់មុខសញ្ញាដែលជាជនរកស៊ីជួញដូរអាវុធខុសច្បាប់ ដោយបានប្រទេសឃើញរថយន្តចំនួនពីរគ្រឿង នៅចតត្រង់ចំណុចខាងលើ ដោយពួកគេត្រៀមដឹក អាវុធយកទៅចែកចាយទីតាំងដទៃទៀត។ ភ្លាមៗនោះដែរសមត្ថកិច្ចថៃបានឡោមព័ទ្ធនិងបានឃាត់ខ្លួនជនសង្ស័យម្នាក់ឈ្មោះ ផាត់ ត្រាកន ភេទប្រុស អាយុ ២៨ ឆ្នាំ ជាជនជាតិថៃ។

នៅក្នុងកិច្ចប្រតិបត្តិការ សមត្ថកិច្ចបានដកហូតអាវុធខ្នាត M79 ចំនួនមួយដើម អាវុធប្រភេទ AK ស្វ័យបត់ ចំនួនមួយដើម អាវុធប្រភេទ AK ស្វ័យវែង ចំនួន ៥ដើម បង់ចំនួន ១៧ គ្រាប់កាំភ្លើងខ្នាត 7,62 ចំនួន ៨.០០០ គ្រាប់ និងគ្រាប់កាំភ្លើងខ្នាត M60 ចំនួន ៥០០គ្រាប់។

តាមការសារភាពនៅចំពោះមុខសមត្ថកិច្ច ជនសង្ស័យរូបនេះ បានរៀបរាប់ថា ខ្លួនគឺជាអ្នកស៊ីឈ្នួលដឹកជញ្ជូនអាវុធទាំងអស់នេះមកពីស្រុកអារញ្ញ ខេត្តស្រះកែវ ដោយយកមកស្តុកទុកនៅចំណុចខាងលើ ដើម្បីចែកចាយបន្ត ហើយក្នុងមួយជើងរូបគេបានទទួលថ្លៃឈ្នួល ២០.០០០បាត ដោយការទិញនិងលក់នេះ គឺទាក់ទងគ្នាផ្ទាល់ ហើយតម្លៃកាំភ្លើងគឺទៅតាមប្រភេទ ដោយចាប់ពី ៤០.០០០ បាត ទៅ ៦០.០០០ បាត ក្នុងមួយដើម ប៉ុន្តែសម្រាប់អ្នកដែលឈរជើងនៅស្រុកអារញ្ញបានអាវុធមកពីណានោះរូបគេមិនបានដឹងឡើយ។ បច្ចុប្បន្នសមត្ថកិច្ចកំពុងធ្វើការសិក្សានិងស្រាវជ្រាវដើម្បីរកអ្នកនៅពីក្រោយនិងមុខសញ្ញាដែលកាន់កាប់អាវុធនៅស្រុកអារញ្ញ ដើម្បីយកមកអនុវត្តតាមផ្លូវច្បាប់៕

អត្ថបទ៖ សោ និយមរ័ត្ន

The post ការជួញដូរអាវុធខុសច្បាប់ចេញពីស្រុកអារញ្ញ ត្រូវសមត្ថកិច្ចថៃចាប់បាន appeared first on Kampuchea Thmey Daily.

ប្រតិបត្តិការនេះធ្វើឡើងកាលពីរសៀលថ្ងៃទី១៦ ខែកញ្ញា ឆ្នាំ២០២៤ នៅចំណុចខុនដូរស្តារស៊ីធី បន្ទប់លេខ១១២៥ ជាន់ទី១១ អគារទី៧ តាមមហាវិថីសហព័ន្ធរុស្សី ក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ បន្ទាប់ពីជនសង្ស័យប្រើប្រាស់អាវុធខ្លីគំរាមជនជាតិចិនដូចគ្នា។

ជនសង្ស័យដែលត្រូវឃាត់ខ្លួន ១,ឈ្មោះ ស៊ី មីងយ៉ុង (SHI MING YUNG) ភេទប្រុស អាយុ៣៣ឆ្នាំ ជនជាតិចិន មុខរបរ អនឡាញ (ឃាត់ខ្លួន មានសារធាតុញៀន) , ២.ឈ្មោះ វែង ជីន (WANG JUN) ភេទប្រុស អាយុ៣៣ឆ្នាំ ជនជាតិចិន មុខរបរអនឡាញ (ឃាត់ខ្លួន មានសារធាតុញៀន) ,៣.ឈ្មោះ វ័ន ជឺឡែង (WAN CHI LIANG) ភេទប្រុស អាយុ២៥ឆ្នាំ ជនជាតិចិន មុខរបរ អនឡាញ។ អ្នកទាំង៣នាក់ស្នាក់នៅបន្ទប់លេខ១១២៥ ជាន់ទី១១ អគារទី៧ ក្នុងខុនដូរស្តារស៊ីធី ផ្លូវសហព័ន្ធរុស្សី ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ។

តាមនគរបាលខណ្ឌសែនសុខបានឱ្យដឹងថា កាលពីថ្ងៃទី១៦ ខែកញ្ញា ឆ្នាំ២០២៤ វេលាម៉ោងប្រហែល ១៥និង០០នាទី សមត្ថកិច្ចប៉ុស្តិ៍នគរបាលរដ្ឋបាលអូរបែកក្អម បានទទួលព័ត៌មានពីខាងខុនដូរស្តារស៊ីធី ថា មានជនសង្ស័យ០១នាក់ជាជនជាតិចិន ស្នាក់នៅបន្ទប់លេខ១១២៥ ជាន់ទី១១ បានធ្វើសកម្មភាពប្រើអាវុធខ្លី គំរាមជនជាតិចិនដូចគ្នា នៅក្នុងផ្សារម៉ាត ជាន់ផ្ទាល់ដី បរិវេណខុនដូរស្តារស៊ីធី បន្ទាប់មកសមត្ថកិច្ចប៉ុស្តិ៍អូរបែកក្អម សហការជាមួយផ្នែកជំនាញនៃអធិការដ្ឋាននគរបាលខណ្ឌសែនសុខចុះសហការជាមួយខាងខុនដូរស្តារស៊ីធី ធ្វើការត្រួតពិនិត្យឆែកឆេរ នៅក្នុងបន្ទប់លេខ​១១២៥ រកឃើញ អាវុធខ្លី០១ដើម ម៉ាកឡុក បង់ចំនួន ០១ គ្រាប់ចំនួន ០៤គ្រាប់ ,ក្រាមពណ៌សថ្លា(សង្ស័យជាគ្រឿងញៀន) ចំនួន០១កញ្ចប់ថង់ធំល្មម ជញ្ជីងថ្លឹងថ្នាំញៀន ចំនួន ០១ ,លិខិតឆ្លងដែន ចំនួន០១ក្បាល ,កាតចំនួន ០៥សន្លឹក(របស់ ជនសង្ស័យ) និងធ្វើការឃាត់ខ្លួនជនសង្ស័យដែលជាជនជាតិចិនចំនួន៣នាក់។

តាមជនសង្ស័យឈ្មោះ វ័ន ជឺឡែង (WAN CHI LIANG) បានសារភាពអោយដឹងថា នៅក្នុងខែកក្កដា ឆ្នាំ២០២៤ ជនសង្ស័យឈ្មោះ ស៊ី មីងយ៉ុង បានទិញអាវុធខ្លីម៉ាកឡុកពីជនសង្ស័យឈ្មោះ ហៅ ប៉ាជេ ភេទប្រុស អាយុប្រហែល ២៨ឆ្នាំ ជនជាតិខ្មែរ ក្នុងតម្លៃ១៦០០ដុល្លារអាមេរិក នៅក្រុងកំពង់សោម យកមកទុកប្រើប្រាស់ការពារខ្លួន។ បន្ទាប់មក នៅខែសីហា ឆ្នាំ២០២៤ ជនសង្ស័យឈ្មោះ ស៊ី មីងយ៉ុង បានទៅយកថ្នាំញៀនមួយកញ្ចប់ថង់ធំល្មម និងជញ្ជីងថ្លឹងថ្នាំញៀន ចំនួន ០១គ្រឿង ពីជនសង្ស័យឈ្មោះ ហៅ ស៊ែវ័លី ភេទប្រុស អាយុប្រហែល៣០ឆ្នាំ ជនជាតិចិន(ដែលជំពាក់ប្រាក់របស់ជនសង្ស័យ ឈ្មោះ ស៊ី មីងយ៉ុង ចំនួន ៧០០ដុល្លា) នៅក្នុងបុរីមួយកន្លែងក្បែរខុនដូរស្តារស៊ីធី យកមកទុកប្រើ ប្រាស់នៅក្នុងបន្ទប់ខុនដូរស្នាក់នៅ ។ ក្រោយមកទៀត នៅរសៀលថ្ងៃទី១៦ ខែកញ្ញា ឆ្នាំ២០២៤ ជនសង្ស័យឈ្មោះ ស៊ី មីងយ៉ុង បានចេញពីបន្ទប់ ចុះមកទិញថ្នាំដុសធ្មេញ នៅម៉ាតបរិវេណខុនដូរ ស្តារស៊ីធ ជាន់ផ្ទាល់ដី ពេលចូលដល់ក្នុងម៉ាត ក៏មានមនុស្សប្រុស០៣នាក់ ជាជនជាតិចិនបានមើលមុខឌឺដងធ្វើឲ្យជនសង្ស័យមានចិត្តខឹង ក៏ឡើងទៅបន្ទប់ខុនដូរ យកអាវុធខ្លីម៉ាកឡុក ចេញពីថតតុមកសៀតនៅចង្កេះខោចុះមកសួរនាំជនជាតិចិនទាំង៣នាក់នោះ និងដកកាំភ្លើងដាក់លើភ្លៅគំរាមរួចក៏សៀតចូលចង្កេះឡើងទៅបន្ទប់ខុនដូរវិញ។

ក្រោយពីឃើញដូចនេះ ខាងខុនដូរក៏បានរាយការណ៍ទៅសមត្ថកិច្ចរហូតមានការចុះទៅឡោមព័ទ្ធឆែកឆេរឃាត់ខ្លួនតែម្តង៕

អត្ថបទ៖ សុខា

The post ឃាត់ខ្លួនជនជាតិចិន៣នាក់ ក្រោយដកកាំភ្លើងគំរាមជនជាតិចិនដូចគ្នា appeared first on Kampuchea Thmey Daily.

លោក ទូច សុខៈ អ្នកនាំពាក្យរងក្រសួងមហាផ្ទៃ បានវាយតម្លៃជារួមថា ការគ្រប់គ្រងអាវុធជាតិផ្ទុះគឺមានភាពល្អប្រសើរច្រើន បើទោះបីជាមានជាអន្លើណាមួយនោះក៏ដោយ។ លោក ទូច សុខៈ បានបញ្ជាក់ឱ្យដឹងថា ក្រសួងមហាផ្ទៃ ដែលសេនាធិការរាជរដ្ឋាភិបាលលើការងារសន្តិសុខ សណ្ដាប់ធ្នាប់ បានផ្ដោតការយកចិត្តទុកដាក់ទៅលើវិធានការមុខព្រួយចំនួន២ គឺ១)ការគ្រប់គ្រងអាវុធពីផ្ទៃក្នុងនៃចំណោមមន្ត្រីក្របខណ្ឌក្រសួងមហាផ្ទៃ និង២​)ការទប់ស្កាត់ការចរាចរអាវុធឆ្លងដែនខុសច្បាប់។

ជុំវិញវិធានការផ្ទៃក្នុង អ្នកនាំពាក្យរងក្រសួងមហាផ្ទៃរូបនេះ បានរៀបរាប់ឱ្យថា ក្នុងក្របខណ្ឌក្រសួងមហាផ្ទៃ ក្រោមការដឹកនាំរបស់លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានដាក់ចេញគោលការណ៍ និងបទបញ្ជាយ៉ាងម៉ឺងម៉ាត់ ដោយរាល់មន្ត្រីរាជការចំណុះក្រសួងមហាផ្ទៃទាំងឡាយណាដែលកាន់កាប់អាវុធខុសច្បាប់ នឹងត្រូវប្រឈមមុខនឹងទណ្ឌកម្មធ្ងន់ធ្ងរ បន្ថែមពីការផ្ដន្ទាទោសតាមអំណាចតុលាការ។ ក្នុងន័យនេះ​ លោក បានបញ្ជាក់ថា ក្នុងករណីមន្ត្រីក្រសួងមហាផ្ទៃមានការប្រើប្រាស់អាវុធ ត្រូវតែធ្វើលិខិតស្នើសុំកាន់អាវុធឱ្យបានស្របច្បាប់ ត្រឹមត្រូវ មិនអាចកាន់អាវុធដោយអនាធិបតេយ្យ ឬតាមតែលទ្ធភាពរបស់ខ្លួន តាមរយៈការទិញពីប្រភពផ្សេងៗបានឡើយ។

ចំណែក មុខព្រួយទី២ គឺមហាជនទូទៅ ដោយក្រសួងមហាផ្ទៃ បានយកចិត្តទុកដាក់ទៅលើវិធានការទប់ស្កាត់ការចរាចរអាវុធឆ្លងដែនខុសច្បាប់ ខណៈកន្លងទៅ កម្លាំងមានសមត្ថកិច្ច ក៏ចាប់បានការចរាចរអាវុធឆ្លងដែនខុសច្បាប់ចូលកម្ពុជាមួយចំនួន។ ទន្ទឹមគ្នានេះ កម្លាំងមានសមត្ថកិច្ច ក៏បានដាក់គោលដៅត្រួតពិនិត្យតាមដងផ្លូវនៅពេលយប់ដើម្បីត្រួតពិនិត្យរាល់ការល្មើសច្បាប់ផ្សេងៗ ពិសេសការដាក់តាមខ្លួន ឬប្រើប្រាស់អាវុធដោយខុសច្បាប់ផងដែរ។ នេះជាការបញ្ជាក់បន្ថែមរបស់អ្នកនាំពាក្យរងក្រសួងមហាផ្ទៃ ដដែល។

លោក អះអាងថា តាមរយៈវិធានការទាំងនេះមានប្រសិទ្ធភាពគួរឱ្យកត់សម្គាល់ បើទោះបីជាមានករណីជាអន្លើបានកើតមានឡើងក៏ដោយ។ លោក សង្កត់ធ្ងន់ថា ជនល្មើសតែងមានកលល្បិច លាក់លៀមរក្សាទុក និងប្រើប្រាស់អាវុធដោយខុសច្បាប់។ តែយ៉ាងនេះក៏ដោយ នៅពេលមានបទល្មើស សមត្ថកិច្ចបានដាក់ចេញវិធានការ រហូតចាប់បានជនល្មើសបានទាន់ពេលវេលា។

គួររម្លឹកដែរថា នៅក្នុងសន្និបាតបូកសរុបលទ្ធផលការងាររបស់ក្រសួងមហាផ្ទៃ កាលពីចុងខែកុម្ភៈ ឆ្នាំ២០២៤ រដ្ឋមន្ត្រីក្រសួងមហាផ្ទៃ លោក ស សុខា បានព្រមានដកចេញពីក្របខ័ណ្ឌចំពោះមន្ត្រីរូបណា ដែលបានប្រើប្រាស់អាវុធខុសច្បាប់ ដោយមិនមានការអនុញ្ញាត ឬឱ្យអ្នកដទៃខ្ចីអាវុធរបស់ខ្លួន។

លោករដ្ឋមន្ត្រីក្រសួងមហាផ្ទៃ បញ្ជាក់ថា ប្រសិនបើកម្លាំងនគរបាលបានប្រើប្រាស់អាវុធដោយខុសច្បាប់ មិនមានការអនុញ្ញាត ឬមួយបានយកអាវុធរបស់ខ្លួនទៅឱ្យអ្នកដទៃខ្ចីនោះ លោកយល់ថា មិនចាំបាច់ទុកក្នុងក្របខ័ណ្ឌទៀតនោះទេ គឺត្រូវបណ្ដេញចេញពីក្របខ័ណ្ឌតែម្ដងទៅ។

លោក ស សុខា បានលើកឡើងថា ការប្រើប្រាស់អាវុធដោយខុសច្បាប់ មិនមានការគ្រប់គ្រងត្រឹមត្រូវបែបនេះ នឹងអាចបង្កជាគ្រោះថ្នាក់ទៅលើប្រជាពលរដ្ឋទូទៅ ជាពិសេសការប្រើប្រាស់អាវុធ ដោយគ្មានច្បាប់អនុញ្ញាតនេះ នឹងឈានរហូតដល់ការប៉ះពាល់ដល់អាយុជីវិតអ្នកដទៃថែមទៀតផង។ ដូច្នេះ ក្នុងនាមជាប្រមុខក្រសួងមហាផ្ទៃ លោក ស សុខា បានណែនាំដល់អគ្គស្នងការដ្ឋាននគរបាលជាតិ ស្នងការដ្ឋាននគរបាលរាជធានី-ខេត្តទាំងអស់ បន្តត្រួតពិនិត្យលើការងារនេះបន្ថែមទៀត ខណៈកន្លងទៅ ក្រសួង ក៏បានប្រមូលអាវុធពីអ្នកដែលយាមតាមក្រុមហ៊ុនធំៗមួយចំនួនរួចហើយ ដែលអាចនៅសេសសល់តិចតួចប៉ុណ្ណោះ៕

អត្ថបទ៖ ធឿន វ៉ាន់សុង

The post អ្នកនាំពាក្យ ថា ការគ្រប់គ្រងអាវុធក្នុងចំណោមមន្ត្រីត្រូវបានពង្រឹង ខណៈអាវុធឆ្លងដែនក៏បានទប់ស្កាត់ appeared first on Kampuchea Thmey Daily.