អាស៊ានប៉ារ៉ាហ្គេម ២០២៣ Archives - Kampuchea Thmey Daily

កីឡាអាស៊ានប៉ារ៉ាហ្គេម២០២៥នៅថៃ ដាក់១៩ប្រភេទកីឡា

chean virakbot — Wed, 05 Mar 2025 02:35:44 +0000

សហព័ន្ធកីឡាជនពិការអាស៊ានគ្រោងដាក់កីឡាចំនួន១៩ប្រភេទ សម្រាប់ព្រឹត្តិការណ៍កីឡាអាស៊ានប៉ារ៉ាហ្គេម លើកទី១៣ ដែលត្រូវធ្វើនៅក្នុងឆ្នាំ២០២៥ ប៉ុន្តែត្រូវបានលើកទៅក្នុងខែមករា ឆ្នាំ២០២៦ ដោយសាររៀបចំការប្រកួតកីឡាស៊ីហ្គេម នៅក្នុងខែធ្នូ ឆ្នាំ២០២៦។

តាមសេចក្តីប្រកាសរបស់សហព័ន្ធកីឡាជនពិការអាស៊ានកាលពីថ្ងៃទី៣ ខែមីនា ឆ្នាំ២០២៥ ថា បន្ទាប់ពីកិច្ចប្រជុំជាមួយភាគីម្ចាស់ផ្ទះថៃរួចមក គណៈកម្មាធិការប្រតិបត្តិបានសម្រេចជាបឋមនូវកីឡាចំនួន១៩ប្រភេទដែលត្រូវដាក់ឲ្យប្រកួតក្នុងកីឡាអាស៊ានប៉ារ៉ាហ្គេម លើកទី១៣។

កីឡាទាំង១៩ប្រភេទមានកីឡា បាញ់ធ្នូ វាយសី បាល់ទាត់ ប៊ូស្យា ប៊ូលីង អុក ទោចក្រយាន បាល់ទាត់CP យូដូ លើកទម្ងន់ បាញ់កាំភ្លើង បាល់ទះអង្គុយ ហែលទឹក វាយកូនឃ្លីលើតុ បាល់បោះរទេះ គុនដាវ និង តិន្នីស។ កីឡាទាំង១៣ប្រភេទនេះ បើគិតជាវិញ្ញាសាចំនួន៥៣៦ ឬស្មើនឹងចំនួន៥៣៦មេដាយមាស។

ចំនួនកីឡា និងវិញ្ញាសាក្នុងព្រឹត្តិការណ៍លើកទី១៣នៅប្រទេសថៃនេះគឺច្រើនជាងកាលពីឆ្នាំ២០២៣ នៅប្រទេសកម្ពុជាដែលមាន១២ប្រភេទកីឡា ស្មើនឹង៤៣៩វិញ្ញាសា។

តាមការគ្រោង កីឡាជនពិការអាស៊ាន លើកទី១៣ នឹងចាប់ផ្តើមបើកជាផ្លូវការនៅថ្ងៃទី២០ ខែមករា និងបិទបញ្ចប់នៅថ្ងៃទី២៧ ខែមករា ឆ្នាំ២០២៦ ដោយទីកន្លែងប្រកួតនៅទីក្រុងបាងកក និងខេត្ត ណាខន រជ្ជស៊ីម៉ា។

កាលបរិច្ឆេទនៃដំណើរការប្រកួត

ថ្ងៃទី១៥-១៦ ខែមករា ការធ្វើដំណើរទៅដល់របស់គណៈប្រតិភូ
ថ្ងៃទី១៧ ដល់ ១៩ ខែមករា៖ ការវាយតម្លៃចំណាត់ថ្នាក់ពិការភាព
ថ្ងៃទី២០ ខែមករា៖ ពិធីបើកព្រឹត្តិការណ៍ជាផ្លូវការ
ថ្ងៃទី២៦ ខែមករា៖ ពិធីបិទព្រឹត្តិការណ៍ជាផ្លូវការ
ថ្ងៃទី២៧ ខែមករា៖ គណៈប្រតិភូវិលត្រឡប់ទៅប្រទេសកំណើតវិញ

អត្ថបទ៖ វីរបុត្រ

The post កីឡាអាស៊ានប៉ារ៉ាហ្គេម២០២៥នៅថៃ ដាក់១៩ប្រភេទកីឡា appeared first on Kampuchea Thmey Daily.

ជយលាភីមេដាយស៊ីហ្គេម-អាស៊ានប៉ារ៉ាហ្គេម ២០២៣ទទួលប្រាក់ឧបត្ថម្ភពីសម្តេចតេជោ

chean virakbot — Tue, 14 Nov 2023 03:09:24 +0000

ជយលាភីទាំងអស់ក្នុងព្រឹត្តិការណ៍កីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលប្រទេសកម្ពុជាធ្វើជាម្ចាស់ផ្ទះបានទទួលប្រាក់ឧបត្ថម្ភពីសម្តេចតេជោ ហ៊ុន សែន ប្រធានក្រុមឧត្ដមប្រឹក្សាផ្ទាល់ព្រះមហាក្សត្រ នៅព្រឹកថ្ងៃអង្គារ៍ ទី១៤ ខែវិច្ឆិកា ឆ្នាំ២០២៣ នៅទីស្តីការក្រសួងការពារជាតិ។

សម្រាប់មេដាយមាស១គ្រឿងទទួលបាន៥០០០ដុល្លារ មេដាយប្រាក់១គ្រឿងទទួលបាន៣០០០ដុល្លារ និងមេដាយសំរិទ្ធ១គ្រឿងទទួលបាន២០០០ដុល្លារ។ នេះជាការទទួលបានប្រាក់រង្វាន់លើកទី២សម្រាប់ម្ចាស់មេដាយពីព្រឹត្តិការណ៍កីឡាធំទាំងពីរ បន្ទាប់ពីលើកទី១ទទួលបានប្រាក់រង្វាន់រាជរដ្ឋាភិបាលកម្ពុជាតាមរយៈក្រសួងអប់រំ យុវជន និងកីឡា។

ការទទួលបានប្រាក់រង្វាន់ពីរាជរដ្ឋាភិបាលកាលថ្ងៃទី២៧ ខែមិថុនា មេដាយមាស១គ្រឿងទទួលបាន៤០លានរៀល ប្រាក់១គ្រឿងទទួលបាន៣០លានរៀល និងសំរិទ្ធ១គ្រឿងទទួលបាន១៥លានរៀល។ រាជរដ្ឋាភិបាលបានផ្តល់ប្រាក់រង្វាន់តាមចំនួនមេដាយដែលអត្តពលិកម្នាក់ៗទទួលបាន។ ជយលាភីមេដាយមាស១គ្រឿងលើវិញ្ញាសាឯកត្តជនទទួលបាន៤០លានរៀល ប៉ុន្តែបើមេដាយមាស១គ្រឿងលើវិញ្ញាសាជាក្រុមចាប់ពី២នាក់ឡើងទៅគឺម្នាក់ៗទទួលបាន៤០លានរៀលដូចគ្នា។

ក្នុងនាមជាម្ចាស់ផ្ទះរៀបចំការប្រកួត កម្ពុជាទទួលបានមេដាយមាស៨១ ប្រាក់៧៤ និងសំរិទ្ធ១២៧ សរុប២៨២គ្រឿងសម្រាប់ព្រឹត្តិការណ៍កីឡាស៊ីហ្គេម លើកទី៣២ និងទទួលបានមាស៩ ប្រាក់១៨ និងសំរិទ្ធ៤៤ សរុប៧១គ្រឿងសម្រាប់ព្រឹត្តិការណ៍កីឡាអាស៊ានប៉ារ៉ាហ្គេម លើកទី១២៕

អត្ថបទ៖ វីរបុត្រ

The post ជយលាភីមេដាយស៊ីហ្គេម-អាស៊ានប៉ារ៉ាហ្គេម ២០២៣ទទួលប្រាក់ឧបត្ថម្ភពីសម្តេចតេជោ appeared first on Kampuchea Thmey Daily.

កីឡាករ កីឡាការិនី៤រូបទទួលបានប្រាក់រង្វាន់ច្រើនជាងគេបំផុត

chean virakbot — Wed, 28 Jun 2023 02:44:44 +0000

រាជរដ្ឋាភិបាលកម្ពុជាបានផ្តល់ប្រាក់រង្វាន់ដល់ជយលាភីមេដាយស៊ីហ្គេម លើកទី៣២ និងកីឡាអាស៊ានប៉ារ៉ាហ្គេម លើកទី១២ កាលពីព្រឹកថ្ងៃទី២៧ ខែមិថុនា ឆ្នាំ២០២៣ នៅក្រសួងការពារជាតិក្រោមអធិបតីភាពសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេមនៅកម្ពុជា។

ក្នុងនាមជាម្ចាស់ផ្ទះរៀបចំការប្រកួត កម្ពុជាទទួលបានមេដាយមាស៨១ ប្រាក់៧៤ និងសំរិទ្ធ១២៧ សរុប២៨២គ្រឿងពីកីឡាស៊ីហ្គេម និងមាស៩ ប្រាក់១៨ និងសំរិទ្ធ៤៤ សរុប៧១គ្រឿងពីកីឡាអាស៊ានប៉ារ៉ាហ្គេម។

សម្រាប់ប្រាក់រង្វាន់ទាំងស៊ីហ្គេម និងអាស៊ានប៉ារ៉ាហ្គេមទទួលបានដូចគ្នាគឺ មាស១គ្រឿងទទួលបាន៤០លានរៀល ប្រាក់១គ្រឿងទទួលបាន៣០លានរៀល និងសំរិទ្ធ១គ្រឿងទទួលបាន១៥លានរៀល។ រាជរដ្ឋាភិបាលបានផ្តល់ប្រាក់រង្វាន់តាមចំនួនមេដាយដែលអត្តពលិកម្នាក់ៗទទួលបាន។ ជយលាភីមេដាយមាស១គ្រឿងលើវិញ្ញាសាឯកត្តជនទទួលបាន៤០លានរៀល ប៉ុន្តែបើមេដាយមាស១គ្រឿងលើវិញ្ញាសាជាក្រុមចាប់ពី២នាក់ឡើងទៅគឺម្នាក់ៗទទួលបាន៤០លានរៀលដូចគ្នា។

ខាងក្រោមជាកីឡាករ កីឡាការិនី៤រូបដែលទទួលបានប្រាក់រង្វាន់ច្រើនជាងគេ៖

កីឡាការិនី វ៉ិត ចន្ថា

វ៉ិត ចន្ថា បានឈ្នះមេដាយមាស៣គ្រឿងគឺវិញ្ញាសាឯកត្តជនទាំង៣សម្រាប់ការប្រកួតកីឡាអត្តពលកម្ម ក្នុងកីឡាអាស៊ានប៉ារ៉ាហ្គេម លើកទី១២ ដូច្នេះកីឡាការិនីមានពិការភាពរូបនេះទទួលបានប្រាក់រង្វាន់១២០លានរៀល។

កីឡាករ លី បូរ៉ាមី

លី បូរ៉ាមី បានឈ្នះមេដាយមាស៣គ្រឿងគឺឯកត្តជន២គ្រឿង និងក្រុម១គ្រឿង សម្រាប់ការប្រកួតកីឡាវ៉ូវីណាមក្នុងកីឡាស៊ីហ្គេម លើកទី៣២ ដូច្នេះរូបគេទទួលបានប្រាក់រង្វាន់១២០លានរៀល។

កីឡាការិនី ពៅ សុខា

ពៅ សុខា បានឈ្នះមេដាយមាស៣ ប្រាក់១ និងសំរិទ្ធ១គឺមាស៣លើវិញ្ញាសាក្រុមទាំង៣ ប្រាក់១លើវិញ្ញាសាឯកត្តជន និងសំរិទ្ធលើវិញ្ញាសាក្រុម សម្រាប់ការប្រកួតកីឡាវ៉ូវីណាម ក្នុងកីឡាស៊ីហ្គេម លើកទី៣២ ដូច្នេះកីឡាការិនីរូបនេះទទួលបានប្រាក់រង្វាន់១៦៦លានរៀល។

កីឡាការិនី ប៉ាល់ ឆរស្មី

ប៉ាល់ ឆរស្មី បានឈ្នះមេដាយមាស៤ ប្រាក់១ និងសំរិទ្ធ១គឺមាស២លើវិញ្ញាសាឯកត្តជន មាស២លើវិញ្ញាសាក្រុម ប្រាក់១លើវិញ្ញាសាក្រុម និងសំរិទ្ធ១លើវិញ្ញាសាឯកត្តជន សម្រាប់ការប្រកួតកីឡាវ៉ូវីណាមក្នុងកីឡាស៊ីហ្គេម លើកទី៣២ ដូច្នេះកីឡាការិនីឆ្នើមរូបនេះទទួលបានប្រាក់រង្វាន់ ២០៦លានរៀល៕

អត្ថបទ៖ វីរបុត្រ

The post កីឡាករ កីឡាការិនី៤រូបទទួលបានប្រាក់រង្វាន់ច្រើនជាងគេបំផុត appeared first on Kampuchea Thmey Daily.

កម្ពុជានឹងបង្កើតសៀវភៅ«មរតកស៊ីហ្គេម-អាស៊ានប៉ារ៉ា២០២៣»ឆាប់ៗ

chean virakbot — Tue, 27 Jun 2023 07:18:28 +0000

គណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម (CAMSOC-CAMPAGCO) កំពុងរៀបចំបង្កើតសៀវភៅ«មរតកកីឡាអាស៊ីអាគ្នេយ៍ លើកទី៣២ និងកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣» ដើម្បីជាកំណត់ត្រាផ្សព្វផ្សាយសម្រាប់ក្មេងជំនាន់ក្រោយ។

សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេមបានឲ្យដឹងពីគម្រោងបង្កើតសៀវភៅមរតកស៊ីហ្គេម-អាស៊ានប៉ារ៉ាហ្គេមនេះក្នុងពិធីប្រគល់ប្រាក់រង្វាន់ដល់ជយលាភីមេដាយស៊ីហ្គេម-អាស៊ានប៉ារ៉ាហ្គេម នៅព្រឹកថ្ងៃទី២៧ ខែមិថុនា ឆ្នាំ២០២៣ នៅទីស្តីការក្រសួងការពារជាតិ។

សម្តេចពិជ័យសេនា ទៀ បាញ់ មានប្រសាសន៍ថា ៖«បន្តិចទៀតនេះ អគ្គលេខាធិការដ្ឋាន នឹងរៀបចំសៀវភៅរបាយការណ៍ និងសៀវភៅមរតកកម្រងអនុស្សាវរីយ៍ តាមស្តង់ដាអន្តរជាតិ ទុកជាកំណត់ត្រាប្រវត្តិសាស្ត្រ និងបន្តធ្វើការផ្សព្វផ្សាយសមិទ្ធផលជាតិដ៏អស្ចារ្យ និងមហាជោគជ័យស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះដល់គ្រប់ក្រសួង ស្ថាប័ន និងប្រជាជន។ ចំណុចនេះសំខាន់ណាស់ដើម្បីចងក្រងព្រឹត្តិការណ៍កីឡាដ៏អស្ចារ្យលើកដំបូងនៅកម្ពុជា»។

ក្នុងពិធីប្រគល់ប្រាក់រង្វាន់ដល់ជយលាភីមេដាយស៊ីហ្គេម-អាស៊ានប៉ារ៉ាហ្គេមនេះដែរ សម្តេចពិជ័យសេនា ទៀ បាញ់ បានជំរុញឲ្យក្រសួងអប់រំ យុវជន និងកីឡា ក៏ដូចជាគណៈកម្មាធិការជាតិអូឡាំពិកកម្ពុជាសហការជាមួយសហព័ន្ធកីឡាជាតិដើម្បីរៀបចំព្រឹត្តិការណ៍កីឡាឲ្យបានញឹកញាប់ដើម្បីរក្សាគុណផលកីឡារបស់អត្តពលិកជម្រើសជាតិ។

សម្តេចពិជ័យសេនា ទៀ បាញ់ មានប្រសាសន៍ថា ៖«ការបង្កើតឲ្យមានការប្រកួតញឹកញាប់គឺវាធ្វើឲ្យសមត្ថភាពកីឡារបស់យើងរក្សាគុណភាព កើនឡើង។ ឥឡូវនេះចប់ស៊ីហ្គេម-អាស៊ានប៉ារ៉ាហ្គេមហើយ នៅរយៈពេលយូរទៀតទើបមានការប្រកួតនៅប្រទេសផ្សេង ដូច្នេះបើយើងអត់រៀបចំការប្រកួតក្នុងស្រុកទេឲ្យបានញឹកញាប់ទេ វាអាចធ្វើឲ្យធ្លាក់ចុះ។ និយាយមែនទែន កីឡាស្មុគស្មាញដែរ»។

កម្ពុជាក្នុងនាមជាម្ចាស់ផ្ទះកីឡាស៊ីហ្គេម លើកទី៣២ ទទួលបានមេដាយសរុប២៨២គ្រឿងក្នុងនោះ មាស៨១ ប្រាក់៧៤ និងសំរិទ្ធ១២៧ ខណៈកីឡាអាស៊ានប៉ារ៉ាហ្គេមទទួលបានមេដាយសរុប៧១គ្រឿងគឺមាស៩ ប្រាក់១៨ និងសំរិទ្ធ៤៤។ ដូច្នេះរាជរដ្ឋាភិបាលកម្ពុជាបានចំណាយថវិកាសរុបប្រាក់ ២៧ ៣០៣ ៦០០ ០០០ រៀល (៦ ៦៥៩ ៤១៤ដុល្លារអាមេរិក) ជាប្រាក់រង្វាន់ដល់ជយលាភីមេដាយទាំង៣៥៣គ្រឿង។

សម្រាប់មេដាយមាស១គ្រឿងទទួលបានប្រាក់រង្វាន់ ៤០លានរៀល ប្រាក់១គ្រឿងទទួលបានប្រាក់រង្វាន់ ៣០លានរៀល និងសំរិទ្ធ១គ្រឿងទទួលបានប្រាក់រង្វាន់ ១៥លានរៀល។ ស្របពេលគ្រូបង្គោលទទួលបាន១០០%ស្មើនឹងមេដាយរបស់កូនសិស្ស និងគ្រូជំនួយទទួលបាន៧០%នៃមេដាយកូនសិស្ស៕

អត្ថបទ៖ វីរបុត្រ

The post កម្ពុជានឹងបង្កើតសៀវភៅ«មរតកស៊ីហ្គេម-អាស៊ានប៉ារ៉ា២០២៣»ឆាប់ៗ appeared first on Kampuchea Thmey Daily.

ម្ចាស់មេដាយស៊ីហ្គេម-អាស៊ានប៉ារ៉ាហ្គេម៣៥៣គ្រឿងទទួលប្រាក់រង្វាន់ព្រឹកនេះ

chean virakbot — Tue, 27 Jun 2023 02:42:12 +0000

ជយលាភីពីកីឡាអាស៊ីអាគ្នេយ៍ លើកទី៣២ និងកីឡាជនពិការអាស៊ីអាគ្នេយ៍ លើកទី១២ ឆ្នាំ២០២៣ ទទួលបានប្រាក់រង្វាន់ពីរាជរដ្ឋាភិបាលកម្ពុជា នៅព្រឹកអង្គារ៍ ទី២៧ ខែមិថុនា ឆ្នាំ២០២៣នេះ នៅក្រសួងការពារជាតិ។

កម្ពុជាក្នុងនាមជាម្ចាស់ផ្ទះកីឡាស៊ីហ្គេម លើកទី៣២ ទទួលបានមេដាយសរុប២៨២គ្រឿងក្នុងនោះ មាស៨១គ្រឿង ប្រាក់៧៤គ្រឿង និងសំរិទ្ធ១២៧គ្រឿង ខណៈកីឡាអាស៊ានប៉ារ៉ាហ្គេមទទួលបានមេដាយសរុប៧១គ្រឿងគឺមាស៩គ្រឿង ប្រាក់១៨គ្រឿង និងសំរិទ្ធ៤៤គ្រឿង។

ជយលាភីមេដាយមាស១គ្រឿងទទួលបានប្រាក់រង្វាន់ ៤០លានរៀល
ជយលាភីមេដាយប្រាក់១គ្រឿងទទួលបានប្រាក់រង្វាន់ ៣០លានរៀល
ជយលាភីមេដាយសំរិទ្ធ១គ្រឿងទទួលបានប្រាក់រង្វាន់ ១៥លានរៀល

ជាមួយគ្នានេះ គ្រូបង្វឹកក៏ទទួលបានប្រាក់ស្មើនឹងមេដាយខ្ពស់បំផុតដែលកូនសិស្សទទួលបានដែរ ខណៈគ្រូជំនួយទទួលបានប្រាក់រង្វាន់៧០%នៃមេដាយដែលកូនសិស្សទទួលបាន។

តាមរយរបាយការណ៍របស់លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា បង្ហាញថា ជយលាភីកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ សរុបប្រាក់ចំនួន ២៧ ៣០៣ ៦០០ ០០០ រៀល (៦ ៦៥៩ ៤១៤ដុល្លារអាមេរិក)។ ក្នុងចំណោមជយលាភីស៊ីហ្គេមចំនួន៥៩៨នាក់ មានគ្រូបង្វឹក កីឡាករ កីឡាការិនីជាកូនខ្មែរនៅក្រៅប្រទេសចំនួន៨៦នាក់ គិតជាប្រាក់ ៣ ៩៣៥ ០០០ ០០០ រៀល បានបើកជូនមុនពេលពួកគាត់បានចេញពីប្រទេសកម្ពុជារួចហើយ។ ឥឡូវនេះនៅសល់ជយលាភីចំនួន៥១២នាក់ត្រូវទទួលបានប្រាក់រង្វាន់ថ្ងៃនេះគិតជាប្រាក់ចំនួន ១៩ ១២៧ ២០០ ០០០រៀល។ ចំពោះជយលាភីកីឡាអាស៊ានប៉ារ៉ាហ្គេម លើកទី១២គិតជាប្រាក់ ៤ ២៤១ ៤០០ ០០០រៀល។

ពិធីប្រគល់ប្រាក់រង្វាន់នេះក្រោមអធិបតីភាពសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីកក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម៕

អត្ថបទ៖ វីរបុត្រ

The post ម្ចាស់មេដាយស៊ីហ្គេម-អាស៊ានប៉ារ៉ាហ្គេម៣៥៣គ្រឿងទទួលប្រាក់រង្វាន់ព្រឹកនេះ appeared first on Kampuchea Thmey Daily.

អ្នកជំនាញកីឡាយល់ឃើញថា កីឡាកម្ពុជាឈានដល់កម្រិតខ្ពស់ទាំងបច្ចេកទេស និងស្មារតី

chean virakbot — Wed, 14 Jun 2023 02:02:13 +0000

ក្រោយរៀបចំការព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ចប់ ប្រតិបត្តិករកីឡាកម្ពុជាបានយល់ពីវិស័យកីឡាទាំងកីឡាធម្មតា និងកីឡាជនពិការឈានដល់កម្រិតខ្ពស់មួយទៀតទាំងផ្នែកបច្ចេកទេស និងស្មារតី។

លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជារដ្ឋលេខាធិការក្រសួងទេចរណ៍បានលើកឡើងថា រហូតដលពេលនេះវិស័យកីឡាកម្ពុជាឈានឡើងដល់របត់ថ្មីមួយទាំងផ្នែកបច្ចេកទេស និងស្មារតីដើម្បីក្លាយជាមូលដ្ឋានគ្រឹះឆ្ពោះទៅរកវឌ្ឍនភាព និងសក្តានុពលលើឆាកអន្តរជាតិ។

លោកបានពន្យល់ថា ៖«គឺបានន័យថា ដោយសារស៊ីហ្គេម និងអាស៊ានប៉ារ៉ាហ្គេមនេះហើយដែលបានធ្វើឲ្យឆន្ទៈ ការតស៊ូ ក៏ដូចជាចិត្តសាស្ត្រ និងភាពកក់ក្តៅរបស់កីឡាករ កីឡាការិនីជម្រើសជាតិកម្ពុជាមានកម្រិតខ្ពស់នៅក្នុងការតស៊ូ ការលះបង់ដើម្បីជោគជ័យសម្រាប់ប្រទេសជាតិ។ ពួកគាត់បានយល់ឡើងវិញហើយថា កីឡាពិតជានាំមកនូវជីវិតមួយដោយមានគុណភាព និងអនាគត»។

«មូលដ្ឋានកីឡារបស់យើងរីកចម្រើនស្តែងចេញពីលទ្ធផលដែលយើងទទួលបាន។ យើងមិននឹកស្មានថា ទទួលបានដល់ទៅ៨១មេដាយមាសទេ។ មេដាយមាសដែលបាន៨១គ្រឿងនេះគឺជាកម្រិតខ្ពស់បំផុតដោយសារតែកម្លាំងចិត្ត តែមិនមែនដោយសារកម្លាំងកាយ១០០%ទេ។ កម្លាំងចិត្តជាម្ចាស់ផ្ទះហ្នឹងមុះមុតខ្លាំងណាស់ ព្រោះថាមពលលើកទឹកចិត្តពីប្រជាជនទាំង១៧លាននាក់ដែលផ្តល់ឲ្យពួកគាត់ខ្លាំង»។ លោកអគ្គលេខាធិការបានប្រាប់ពីចំណុចសំខាន់។

លោកបានបន្ថែមថា មូលដ្ឋានគ្រឹះមួយទៀតគឺហេដ្ឋារចនាសម្ព័ន្ធល្អកម្រិតស្តង់ដាក្នុងនោះមានពហុកីឡដ្ឋានជាតិមរតកតេជោ ការកែលំអពហុកីឡដ្ឋានជាតិអូឡាំពិកឲ្យក្លាយជាមុខមាត់ថ្មី និងទីលានកីឡាជាច្រើនទៀត។ ទាំងអស់នេះហើយជាមូលដ្ឋានគ្រឹះសម្រាប់អភិវឌ្ឍកីឡាកម្ពុជាទាំងកីឡាធម្មតា និងកីឡាជនពិការ។

កម្ពុជាក្នុងនាមជាម្ចាស់ផ្ទះស៊ីហ្គេម លើកទី៣២ ទទួលបានមេដាយសរុប២៨៤គ្រឿងគឺមាស៨១ ប្រាក់៧៤ និងសំរិទ្ធ១២៩ ខណៈអាស៊ានប៉ារ៉ាហ្គេម លើកទី១២ ទទួលបានមេដាយសរុប៧០គ្រឿងគឺមាស៩ ប្រាក់១៨ និងសំរិទ្ធ៤៣៕

អត្ថបទ៖ វីរបុត្រ

The post អ្នកជំនាញកីឡាយល់ឃើញថា កីឡាកម្ពុជាឈានដល់កម្រិតខ្ពស់ទាំងបច្ចេកទេស និងស្មារតី appeared first on Kampuchea Thmey Daily.

លោកស្រី Wandee អគ្គលេខាធិការ APSF រំភើបបានជួយកម្ពុជារៀបចំអាស៊ានប៉ារ៉ាហ្គេមបានល្អឥតខ្ចោះ

chean virakbot — Tue, 13 Jun 2023 01:35:55 +0000

លោកស្រី Wandee Tosuwan អគ្គលេខាធិការសហព័ន្ធកីឡាជនពិការអាស៊ីអាគ្នេយ៍ (APSF) មានកិត្តិយស និងមោនភាពដែលបានចូលរួមជួយដល់ប្រទេសកម្ពុជាក្នុងការរៀបចំព្រឹត្តិការណ៍កីឡាអាស៊ានប៉ារ៉ាហ្គេមបានយ៉ាងល្អឥតខ្ចោះ និងជោគជ័យ។

ស្ត្រីជនជាតិថៃ Wandee Tosuwan បានមកដល់ប្រទេសកម្ពុជាមុនមួយសប្តាហ៍នៃព្រឹត្តិការណ៍កីឡាអាស៊ានប៉ារ៉ាហ្គេម និងបានធ្វើការងារយ៉ាងសកម្មភាពជាមួយគណៈកម្មាធិការជាតិរៀបចំការប្រកួតកីឡាអាស៊ានប៉ារ៉ាហ្គេម (CAMPAGOC) និងទើបតែវិលត្រឡប់ទៅប្រទេសថៃកាលពីថ្ងៃអាទិត្យ ទី១១ ខែមិថុនា កន្លងទៅនេះ ក្រោយពិធីបិទចប់កាលពីថ្ងៃសុក្រ ទី៩ ខែមិថុនា ឆ្នាំ២០២៣។

លោកស្រី Wandee Tosuwan បានប្រាប់សារព័ត៌មានកម្ពុជាថ្មីថា ៖«ពិតជាមានមោទនភាពណាស់ក្នុងនាមជាអគ្គលេខាធិការនៃសហព័ន្ធកីឡាជនពិការអាស៊ីអាគ្នេយ៍បានចូលរួមជួយដល់ប្រទេសកម្ពុជាធ្វើជាម្ចាស់ផ្ទះរៀបចំការប្រកួតកីឡាអាស៊ានប៉ារ៉ាហ្គេម លើកទី១២ យ៉ាងល្អឥតខ្ចោះ និងជោគជ័យ ក្នុងនោះពិធីបើក-បិទពិតជាអស្ចារ្យបំផុតក្នុងចំណោមប្រទេសអាស៊ានដែលបានរៀបចំកន្លងមក»។

«វាជាមហាកិត្តិយស និងបុព្វសិទ្ធិដែលបានអង្គុយក្នុងវេទិការពិសេស (Royal Box) សម្រាប់ពិធីបើកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ»។ លោកស្រីបានបញ្ជាក់។

អគ្គលេខាធិការសហព័ន្ធកីឡាជនពិការរូបនេះបានឲ្យដឹងថា លោកស្រីផ្ទាល់ទទួលបានសារអបអរសាទរ និងអរគុណយ៉ាងច្រើនពីប្រទេសអាស៊ានដល់ម្ចាស់ផ្ទះកម្ពុជា និងសហព័ន្ធកីឡាជនពិការអាស៊ីអាគ្នេយ៍ដែលបានសហការគ្នាយ៉ាងល្អក្នុងការរៀបចំព្រឹត្តិការណ៍កីឡាអាស៊ានប៉ារ៉ាហ្គេមលើកដំបូងនៅកម្ពុជាដោយជោគជ័យ។

ព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ដែលជាការរៀបចំដំបូងនៅប្រទេសកម្ពុជាបានបិទបញ្ចប់ជាផ្លូវការកាលពីថ្ងៃទី៩ ខែមិថុនា បន្ទាប់ពីបានបើកជាផ្លូវការកាលពីថ្ងៃទី៣ ខែមិថុនា ឆ្នាំ២០២៣ នៅពហុកីឡដ្ឋានជាតិមរតកតេជោ៕

អត្ថបទ៖ វីរបុត្រ

The post លោកស្រី Wandee អគ្គលេខាធិការ APSF រំភើបបានជួយកម្ពុជារៀបចំអាស៊ានប៉ារ៉ាហ្គេមបានល្អឥតខ្ចោះ appeared first on Kampuchea Thmey Daily.

ឯកឧត្តម ហ៊ុន ម៉ានី៖«ការប្រឹងប្រែងរបស់អត្តពលិកពិការធ្វើឲ្យយើងខ្ញុំមានមោទនៈ»

chean virakbot — Sat, 10 Jun 2023 04:37:37 +0000

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាអនុប្រធានគណៈកម្មាធិការជាតិប៉ារ៉ាឡាំពិកកម្ពុជាសម្តែងមោទនភាពចំពោះអត្តពលិកជនមានការភាពគ្រប់រូបដែលបានតស៊ូ ខិតខំប្រឹងប្រែង និងបញ្ចេញសមត្ថភាពក្នុងការប្រកួតអាស៊ានប៉ារ៉ាហ្គេម លើកទី១២ ឆ្នាំ២០២៣។

ក្នុងពិធីបិទព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ នៅយប់ថ្ងៃទី៩ ខែមិថុនា ឆ្នាំ២០២៣ នៅពហុកីឡដ្ឋានជាតិមរតកតេជោ ឯកឧត្តម ហ៊ុន ម៉ានី បានថ្លែងថា ៖«ទោះបីការប្រកួតបានបញ្ចប់ទៅហើយក្តី ប៉ុន្តែអនុស្សាវរីយ៍ និងការចងចាំជាច្រើនស្ថិតនៅក្នុងចិត្តរបស់យើងទាំងអស់គ្នាក្រោមស្មារតី Beyond the Games។ ជាការពិតណាស់ ការប្រកួតតែងតែមានឈ្នះ មានចាញ់ ក្នុងន័យនេះ ខ្ញុំសូមអបអរសាទរចំពោះអត្តពលិកដែលទទួលបានមេដាយជយលាភីទាំងអស់។ ចំពោះអត្តពលិកដែលមិនបានទទួលជយលាភី សូមថែរក្សាស្មារតី និងឆន្ទៈជឿជាក់របស់អ្នកជាបន្តទៀត»។

«សូមអ្នកទាំងអស់គ្នាចងចាំថា បើទោះបីជាអ្នកមិនបានឈ្នះមេដាយក៏ដោយ ក៏អ្នកបានឈ្នះបេះដូង និងផ្តល់ភាពជាគំរូដល់យើងខ្ញុំតាមរយៈការខិតខំប្រឹងប្រែង តស៊ូ របស់អ្នកទាំងអស់គ្នា។ នៅពេលអ្នកវិលត្រឡប់ទៅប្រទេសកំណើតវិញ សូមយកអនុស្សាវរីយ៍ល្អៗទៅជាមួយទាំងអស់គ្នា»។ ឯកឧត្តមបានបន្ត។

ឯកឧត្តម ហ៊ុន ម៉ានី បន្ថែមថា ៖«ខ្ញុំសូមជំរាបជូនបងប្អូនអត្តពលិកជនមានការពិការភាពគ្រប់រូបថា ទោះបីកាយសម្បទារបស់អ្នកយ៉ាងណាក៏ដោយ ពួកខ្ញុំពិតជាថ្លែងអំណរគុណ និងមានមោទនភាពសម្រាប់ការប្រឹងប្រែងរបស់អ្នកទាំងអស់គ្នា ពិតជាបាននាំមកនូវមោទនភាពសម្រាប់ប្រទេសរបស់អ្នក»។

ពិធីបិទកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលជាការរៀបចំលើកដំបូងនៅប្រទេសកម្ពុជាបានរៀបចំនាល្ងាចថ្ងៃទី៩ ខែមិថុនា នៅពហុកីឡដ្ឋានជាតិមរតកតេជោក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកឧត្តមសេនីយ៍ Osoth Bhavilai ប្រធានសហព័ន្ធកីឡាជនពិការអាស៊ាន សម្តេចពិជ័យសេនា ទៀ បាញ់ ប្រធានគណៈកម្មាធិការជាតិរៀបចំការប្រកួតកីឡាជនពិការអាស៊ាននៅកម្ពុជា ឯកឧត្តម ហ៊ុន ម៉ានី អនុប្រធានគណៈកម្មាធិការជាតិប៉ារ៉ាឡាំពិកកម្ពុជា ឯកឧត្តម លោកជំទាវ អ្នកឧកញ៉ា លោកឧកញ៉ា ប្រតិភូកីឡាជនពិការទាំង១១ប្រទេស អត្តពលិកជនមានពិការភាព ភ្ញៀវកិត្តិយសជាតិ អន្តរជាតិ និងអ្នកគាំទ្ររាប់ម៉ឺននាក់៕

អត្ថបទ៖ វីរបុត្រ

The post ឯកឧត្តម ហ៊ុន ម៉ានី៖«ការប្រឹងប្រែងរបស់អត្តពលិកពិការធ្វើឲ្យយើងខ្ញុំមានមោទនៈ» appeared first on Kampuchea Thmey Daily.

អាស៊ានប៉ារ៉ាហ្គេម ២០២៣ Archives - Kampuchea Thmey Daily

កីឡាអាស៊ាន​ប៉ារ៉ាហ្គេម​២០២៥នៅ​ថៃ​ ដាក់​១៩​ប្រភេទ​កីឡា

ជយលាភីមេដាយស៊ីហ្គេម-អាស៊ានប៉ារ៉ាហ្គេម ២០២៣ទទួលប្រាក់ឧបត្ថម្ភពីសម្តេចតេជោ

កីឡាករ កីឡាការិនី៤​រូប​ទទួល​បាន​ប្រាក់រង្វាន់​ច្រើន​ជាង​គេបំផុត

កម្ពុជា​នឹង​បង្កើត​សៀវភៅ​«មរតក​ស៊ីហ្គេម-អាស៊ាន​ប៉ារ៉ា២០២៣»ឆាប់ៗ

ម្ចាស់​មេដាយ​ស៊ីហ្គេម-អាស៊ាន​ប៉ារ៉ាហ្គេម៣៥៣​គ្រឿង​ទទួលប្រាក់រង្វាន់ព្រឹកនេះ

អ្នកជំនាញកីឡា​យល់​ឃើញថា កីឡា​កម្ពុជា​ឈាន​ដល់​​កម្រិត​ខ្ពស់​ទាំង​បច្ចេកទេស និង​ស្មារតី

លោក​ស្រី Wandee អគ្គលេខាធិការ APSF រំភើប​បាន​ជួយ​កម្ពុជា​រៀបចំអាស៊ាន​ប៉ារ៉ាហ្គេមបានល្អឥតខ្ចោះ

ឯកឧត្តម ហ៊ុន ម៉ានី៖«ការប្រឹង​ប្រែង​របស់​អត្តពលិក​ពិការ​​ធ្វើ​ឲ្យ​យើង​ខ្ញុំមានមោទនៈ»

កីឡាអាស៊ានប៉ារ៉ាហ្គេម២០២៥នៅថៃ ដាក់១៩ប្រភេទកីឡា

កីឡាករ កីឡាការិនី៤រូបទទួលបានប្រាក់រង្វាន់ច្រើនជាងគេបំផុត

កម្ពុជានឹងបង្កើតសៀវភៅ«មរតកស៊ីហ្គេម-អាស៊ានប៉ារ៉ា២០២៣»ឆាប់ៗ

ម្ចាស់មេដាយស៊ីហ្គេម-អាស៊ានប៉ារ៉ាហ្គេម៣៥៣គ្រឿងទទួលប្រាក់រង្វាន់ព្រឹកនេះ

អ្នកជំនាញកីឡាយល់ឃើញថា កីឡាកម្ពុជាឈានដល់កម្រិតខ្ពស់ទាំងបច្ចេកទេស និងស្មារតី

លោកស្រី Wandee អគ្គលេខាធិការ APSF រំភើបបានជួយកម្ពុជារៀបចំអាស៊ានប៉ារ៉ាហ្គេមបានល្អឥតខ្ចោះ

ឯកឧត្តម ហ៊ុន ម៉ានី៖«ការប្រឹងប្រែងរបស់អត្តពលិកពិការធ្វើឲ្យយើងខ្ញុំមានមោទនៈ»