កម្មវិធី “អំណានមាត់ទន្លេ” ប្រារព្ធឡើងនៅថ្ងៃទី១៥ និងទី១៦ ខែតុលាឆ្នាំ២០២២ វេលាម៉ោង៤ ដល់ ម៉ោង៧ល្ងាច នៅតាមដងទន្លេវ៉ៃគោ ខេត្តស្វាយរៀង។ កម្មវិធីនេះមានគោលបំណងបញ្ជៀប និងបង្កើតនូវទម្លាប់អានសៀវភៅតាមទី​សាធារណៈដល់ប្រជាជន ក៏ដូចជាវប្បធម៌ចែករំលែកសៀវភៅគ្នាទៅវិញទៅមករបស់សាធារណជនកម្ពុជាផងដែរ។

ក្រោយពីមានការបង្កើតនូវកម្មវិធីនេះឡើងមក ខាងសម្ព័ន្ធនិស្សិតស.ស.រ (SRUS Union) បានប្រាប់មកកាន់ “កម្ពុជាថ្មី”ថា កម្មវិធីមួយនេះ មានអ្នកចូលរួមច្រើនដែលហួសទៅនឹងអ្វីដែលបានរំពឹងទុក។ ក្នុងនោះ អ្ន​កដែលបានចូលរួមភាគច្រើន គឺជានិស្សិតដែលបានសិក្សានៅសាកលវិទ្យាល័យស្វាយរៀង និងជាប្រជាជនដែលបានទៅលំហែកាយនៅតាមដងទន្លេនាពេលល្ងាច។ សមិទ្ធផលមួយនេះ គឺជារឿងគួរឲ្យសោមនស្សមួយសម្រាប់អ្នករៀបចំកម្មវិធី អ្នកបរិច្ចាគសៀវភៅ និងប្រជាជនដែលរស់នៅក្បែរតំបន់នោះ។

ដោយឡែក “អំណានមាត់ទន្លេ” គឺជាការខ្ចីសៀវភៅអានដោយឥតគិតថ្លៃ ព្រមទាំងមានការចែកជូននូវសៀវភៅមួយចំនួនដោយឥតបង់ប្រាក់ដល់អ្នកអានផងដែរ ប៉ុន្តែស្ថិតនៅក្រោមលក្ខខណ្ឌផ្សេងៗ។ សៀវភៅដែលមានជិត១០០ក្បាល សម្រាប់អានដោយសេរីនេះ គឺបានមកពីការបរិច្ចាគពីសំណាក់លោកគ្រូ អ្នកគ្រូ និស្សិត និងអតីតនិស្សិត នៅសាកលវិទ្យាល័យស្វាយរៀង និងប្រជាជនដែលរស់នៅតំបន់ជិតនោះ។

ក្រោយពីទទួលបាននូវភាពជោគជ័យលើការបង្កើតកម្មវិធីនេះ២ដងរួចមក “អំណានមាត់ទន្លេ” នឹងធ្វើជាលើកទី៣ នៅខែវិច្ឆិកា ខាងមុខនេះ។ ជាមួយគ្នានេះដែរ ក្រុមសម្ព័ននិស្សិតស.ស.រ (SRUS Union) សង្ឃឹមតាមរយៈការបង្កើតកម្មវិធីនេះ អាចនាំឲ្យប្រជាជនកម្ពុជា ជាពិសេស អ្នកនៅខេត្តស្វាយរៀងតែម្តង មានទម្លាប់អានសៀវភៅ និងមានការចែករំលែកកាន់តែទូលំទូលាយជាងមុន ដែលជាផ្នែកមួយក្នុងការចូលរួមអភិវឌ្ឍន៍សង្គមជាតិ។

បន្ថែមពីនោះ សម្ព័ននិស្សិតស.ស.រ (SRUS Union) ក៏បានលើកទឹកចិត្តដល់យុវជនដែលជាទំពាំងស្នងឫស្សីជំនាន់ក្រោយគ្រប់រូប គួរបន្តពង្រឹង និងលើកស្ទួយវិស័យអានសៀវភៅបន្ថែមទៀត ដើម្បីចូលរួមចំណែកក្នុងក្នុងការកសាងសមត្ថភាពរបស់ខ្លួន និងអភិវឌ្ឍន៍សង្គមខ្មែរឲ្យកាន់តែមានភាពប្រសើរឡើង៕

ដោយ៖ អុន ស្រីមាន

The post «អំណានមាត់ទន្លេ» ទទួលបានការគាំទ្រលើសពីការរំពឹងទុកពីសំណាក់យុវជននៅខេត្តស្វាយរៀង appeared first on Kampuchea Thmey Daily.