អំពីមេដឹកនាំ Archives - Kampuchea Thmey Daily

មេដឹកនាំប្រកាន់អំណាចបែបនេះ ក្នុងស្ថាប័ន បុគ្គលិកគ្រប់គ្នា គង់រត់ចោលជួរគ្មានសល់

សាង ស្រីល័ក្ខ — Tue, 08 Feb 2022 03:40:05 +0000

ក្នុងនាមជាមេកោយ តែងចង់បានកូនចៅក្រាមបង្គាប់ពេញដោយសមត្ថភាព មានគំនិតច្នៃប្រឌិត និងរហ័ស ដែលគេហៅថា ឆ្លាតវ៉ៃក្នុងការធ្វើការ (Work smart) មិនមែនប្រឹងប្រែងធ្វើការ (work hard) ខ្លាំងក្លាពេកនោះទេ។

ទន្ទឹមនោះ បុគ្គលិកគ្រប់គ្នា ក៏ចង់បានមេដឹកនាំដែលពេញដោយសមត្ថភាពដឹកនាំ មានភាពឈ្លាសវៃ និងអាចមើលដឹងគ្រប់បុគ្គលិកខ្ជិលច្រអូស តម្អូញ កម្សោយជំនាញគ្រប់យ៉ាង។

ប្រសិនបើស្ថាប័នមួយមានមេដឹកនាំប្រកាន់អំណាចបែបនេះ ក្នុងស្ថាប័ន បុគ្គលិកគ្រប់គ្នា គង់រត់ចោលគ្មានសល់ម្នាក់ណាឡើយ។

១ អាងអំណាចគាបអ្នកទន់ខ្សោយ

អំណាចដែលគេប្រគល់ឲ្យមេដឹកនាំ មិនមែនយកមកសំឡុត អាងយ៉ាង ធ្វើបាបអ្នកតូចទាបជាងខ្លួននោះទេ។ មេកោយបែបនេះ មានអំណាចមែន តែកម្សោយជំនាញទន់ចេញពីក្នុងខ្លួន គ្មានភាពស៊ីចង្វាក់គ្នា ជាមួយអ្នកក្រោមៗ។ អាងមានអំណាច ចង់ធ្វើអ្វីតាមអំពើចិត្ត បើរបៀបៗនេះ បុគ្គលិកណាទ្រាំបាន ?

២ ចូលចិត្តសម្លឹងមើលជ្រុងតែម្ខាង

មេដឹកនាំត្រូវវ៉ៃឆ្លាត រហ័ស និងមានភាពក្លៀវក្លាចេញពីក្នុងខ្លួន។ ប្រសិនបើអ្នកជាមេដឹកនាំគេ ហើយនិយមសម្លឹងតែមួយជ្រុង គ្មានការគិតវែងឆ្ងាយ នោះគ្រប់គ្នាមិនអាចទ្រាំទ្របានទៀតទេ។ អ្នកត្រូវដឹងថា បុគ្គលណាធ្វើការ ឬមិនធ្វើការ ឬធ្វើលំៗយកតែប្រាក់ខែ។ ចំណុចតូចមួយ ដែលមេដឹកនាំរំលងចោល អាចធ្វើឲ្យបុគ្គលិកក្រាមបង្គាប់អាក់អន់ចិត្តនឹងគ្នា។

៣ ទម្លាប់ទម្លាក់ការងារឲ្យតែម្នាក់ៗ

ដូចនិយាយពីខាងលើ ប្រសិនបើអ្នកសម្លឹងតែមួយជ្រុង អ្នកនឹងរំលងរឿងតូចៗ។ មិនខុសអីពីមេដឹកនាំ សម្លឹងឃើញតែបុគ្គលិកណាប្រើបាន ឬធ្វើការនោះបាន ក៏រំលងចោលអ្នកផ្សេង។ យូរៗទៅ ពួកគេនឹងអន់ចិត្ត ធុញថប់ ហើយលែងចេះធ្វើការងារស្នូលរបស់ខ្លួនអស់គ្មានសល់។ ម៉្យាងវិញទៀត បុគ្គលិកនឹងកើតការថប់បារម្ភ ទន្ទេញតែពាក្យធ្វើច្រើន ខុសច្រើន។

៤ មិនបង្កើតទម្លាប់និយាយទល់មុខ ឬនិយាយឲ្យបានៗ

បុគ្គលិកដែលដាក់ពាក្យលាឈប់ពីអង្គភាពណាមួយ ច្រើនតែនិយាយថា មេដឹកនាំពួកគេកម្សោយទំនាក់ទំនង មិនទម្លាប់និយាយទល់មុខ ឬមានដំណោះស្រាយណាល្អ ជាមួយពួកគេសោះ។ អ្នកខ្លះធ្វើការងារនោះរាប់ឆ្នាំ តែមិនសូវបានជួបជជែក អញ្ជើញហូបកាហ្វេ ជាមួយមេដឹកនាំពួកគេម្ដងឡើយ។ មូលហេតុគឺពួកគេតូចទាបជាង គ្រាន់តែជាបុគ្គលិកកំប៉ិកកំប៉ុក គ្មានបានអីជាដំកំភួនដល់គេ។

យ៉ាងណាមិញ ចំណុចខាងលើដែលបានរៀបរាប់នេះ គ្រាន់តែជាផ្នែកមួយនៃស្ថាប័នខ្លះកំពុងមាន។ ប្រសិនបើនៅតែបែបនេះ នោះបុគ្គលិកល្អៗនឹងដាក់ពាក្យលាឈប់ម្ដងម្នាក់ៗ រហូតអស់គ្មានសល់។

មេដឹកនាំត្រូវតែរហ័ស ក្នុងការរកដំណោះស្រាយ កុំដំអក់ ហើយត្រូវវៃឆ្លាតនឹងការនិយាយទល់មុខជាមួយបុគ្គលិកគ្រប់គ្នា។ មិនថាពួកគេមានឋានៈតូច ឬធំ ព្រោះម្នាក់ៗជាឆ្អឹងខ្នងនៃស្ថាប័នទាំងអស់ បើគ្មានពីអ្នកតូច របស់ធំក៏មិនអាចកើតឡើងបានដូចគ្នា។ គ្រប់គ្នាជាផ្នែកមួយ ជួយឲ្យស្ថាប័នកាន់តែរីកចម្រើនទៅមុខ៕

អត្ថបទ៖ សាង ស្រីល័ក្ខ

ចុចអាន៖លក្ខណៈពិសេស ៤ យ៉ាងសម្រាប់អ្នកគ្រងតំណែងថ្មីដែលត្រូវមានជាចាំបាច់

ចុចអាន៖ចរិតលក្ខណៈ ៧ យ៉ាង មេដឹកនាំឆ្នើម គួររៀនរហូតមិនចេះចប់សោះឡើយ

The post មេដឹកនាំប្រកាន់អំណាចបែបនេះ ក្នុងស្ថាប័ន បុគ្គលិកគ្រប់គ្នា គង់រត់ចោលជួរគ្មានសល់ appeared first on Kampuchea Thmey Daily.

មានបុគ្គលិក ៧ ប្រភេទនេះក្នុងស្ថាប័ន ធានាថានឹងអន់ថយអាជីព ហើយមេដឹកនាំ គង់ដកចោលឆាប់ៗ

សាង ស្រីល័ក្ខ — Mon, 17 Jan 2022 04:02:22 +0000

នៅក្នុងក្រុមហ៊ុនមួយអាចរីកចម្រើន ឬលូតលាស់ទៅព្រមគ្នាបាន គឺអាស្រ័យលើការងារជាក្រុម ដែលមានទាំងមេដឹកនាំល្អ និងកូនចៅមានគំនិតច្នៃប្រឌិត ដើរស្របផ្លូវគ្នា។

ចុះបើមានមេកោយជាអ្នកដឹកនាំល្អ ប៉ុន្តែបែរជាមានបុគ្គលិកប្រភេទចេះទាំងអំនួតក្អេងក្អាង អាងថាខ្លួនជារៀមច្បង ឬចាស់ជាង មានចំណេះដឹងខ្ពស់ជាង ក៏មិនសូវឲ្យតម្លៃអ្នកតូចទាប។

ខាងក្រោមនេះ ជាប្រភេទបុគ្គលិកដែលស្ថាប័នមិនចង់បានមកបៀតខ្លួនសោះឡើយ ៖

១ បុគ្គលិកពូកែអែបអប

មិនខ្វះទេ នៅកន្លែងណាក៏មានដែរនាសម័យនេះ មិនថាក្រុមហ៊ុននោះតូចឬធំ។ យ៉ាងណាមិញ ស្ថាប័នដែលមានបុគ្គលិកវ៉ៃអេបស៊ីអបមួយថ្ងៃៗ មិនគិតធ្វើការងារមេកោយដាក់ឲ្យ បែរជាទៅទម្លាក់ការងារនោះឲ្យអ្នកផ្សេងធ្វើជំនួសវិញ។ យូរៗបុគ្គលិកគ្នាឯងអន់ចិត្ត លែងសូវមានអារម្មណ៍នឹងការងារដូចមុន ប្រសិនបើប៉ះមេដឹកនាំមិនពូកែសង្កេត បុគ្គលិកធន់នេះថែមទៀត។

២ មានអំនួតក្អេងក្អាងខុសបែបបទ

ក្នុងវិស័យការងារអត់ខ្វះទេ បុគ្គលិកប្រភេទនេះ អាងតែមេពេញចិត្តធ្វើការយូរឆ្នាំលើសគេ អ្នកថ្មីចូលមកមិនស្មើខ្លួន ឬប្រភេទអ្នកខ្លះ ជាអ្នកថ្មី តែមានចំណេះលើសបន្តិច ក៏តាំងខ្លួនម៉ាក់ងាយអ្នកចាស់វិញក៏មាន។ ស្ថាប័នមានបុគ្គលិកកម្សោយជំនាញទន់បែបនេះ មិនយូរទេ នឹងអាប់អោនខាតទុន ដោយសារពួកគេ។ ព្រោះពួកគេគិតថា ខ្លួនពូកែជាង អស្ចារ្យជាង ស្អាតជាងគេ និងមានចូលចិត្តច្រើនជាង ក៏ចាប់ផ្ដើមលេចភាពក្អេងក្អាងឡើងមក។

៣ ប្រភេទធ្វើការលំៗ

ទម្លាប់គិតថាធ្វើការងារឲ្យតែបានចំនួនច្រើនទៅ គ្មានមេកោយណាមកពិនិត្យល្អិតល្អន់នោះទេ។ ជាពិសេស គិតតែរឿងដល់ខែបើកប្រាក់ខែ មួយមុខ មិនគិតជួយជាគំនិតដល់សមាជិករួមក្រុមផ្សេងៗ។ ទោះមានចំណេះខ្ពស់ប៉ុណ្ណា បើរបៀបធ្វើការអន់ថយយ៉ាងនេះ កុំសង្ឃឹមថា មេដឹកនាំដំឡើងប្រាក់ខែ ឬតំណែងថ្មីនោះ។

៤ ចូលចិត្តឌឺដងដៀមដាមលើបណ្ដាញសង្គម

ពេលប្រជុំផ្លូវការ ឬមានវគ្គបង្រៀនខ្លីៗ បុគ្គលនេះមិនមានយោបល់ឬជជែកវែកញែកអ្វីទាំងអស់។ តែក្រោយម៉ោងការងារ បែរជាបង្ហោះលើហ្វេសបុក ឬបណ្ដាញសង្គមនានា លន់តួឲ្យគេអាណិតថា ខ្លួនរងសំពាធពីស្ថាប័នក៏មាន។

៥ គ្មានភាពស្មោះត្រង់

ភាពស្មោះត្រង់គឺសំខាន់ណាស់ បើទោះបីជាសម័យជឿនលឿនក្ដី។ យ៉ាងណាក៏ដោយ បុគ្គលិកបើមានភាពស្មោះត្រង់ទោះមិនសូវពូកែ ក៏គង់មេកោយបង្រៀនឲ្យវ៉ៃឆ្លាត ការងាររលូនទៅមុខដែរ។ ប៉ុន្តែបើបុគ្គលិកមិនស្មោះត្រង់ នឹងក្រុមហ៊ុនធ្វើឲ្យបែកធ្លាយសារប្រជុំសំខាន់ៗទៅកាន់អ្នកផ្សេង ដែលមិនមានវត្តមានក្នុងអង្គប្រជុំ ទោះខ្លាំងកម្រិតណា ក៏គង់មេដឹកនាំដកចោលដែរ។

៦ គ្មានបន្សល់ទុកលទ្ធផល

ធ្វើការមករាប់ឆ្នាំហើយ នៅតែដដែល គ្មានរីកចម្រើន ឬមិនបន្សល់លទ្ធផលជាដុំកំភួនសោះ។ មួយទៀត ចង់បានល្អតែមិនព្យាយាម បណ្ដែតការងារហីៗ អាងតែមិនមែនជារបស់ខ្លួន។ បុគ្គលិកប្រភេទនេះ មិនសូវជាស្រលាញ់ក្រុមហ៊ុនទេព្រោះធ្វើការចង់បានតែលទ្ធផលបណ្ដោះអាសន្ន ចង់បានលាភសក្ការៈ ឬសួនតួនិយមហួសហេតុ។

៧ ចូលចិត្តបង្កើតបក្សពួកបង្ករឿងបែបស្ងាត់ៗ

ភាពចុះចម្រុងគ្នានៅកន្លែងការងារ គឺសំខាន់ណាស់ ប្រសិនបើប៉ះបុគ្គលិកចូលចិត្តបង្កើតបក្សពួកក្នុងគ្រុបឆាត និយាយដើមមេកោយ ឬបុគ្គលិកគ្នាឯងក្នុងម៉ោងការងារ តើទំនាក់ទំនងការងារក្រុម នឹងទៅជាយ៉ាងណា? បុគ្គលិកប្រភេទនេះ មិនគួរមានក្នុងស្ថាប័នឡើយ។

មេដឹកនាំគួរសង្កេត ហើយផ្ដល់ជាមេរៀនដល់ពួកគេ បើនៅតែដដែល គួរដកចោលឆាប់ៗ។ មិនចឹងក្រុមហ៊ុនទាំងមូលនឹងកម្សោយពីខាងក្នុង គ្មានលំនឹង គ្មានភាពច្បាស់លាស់ ហើយបុគ្គលិកក្រាមបង្គាប់ ក៏លែងទុកចិត្តមេដឹកនាំ កាលបើគ្មានវិធានការចំពោះបុគ្គលិកធន់នេះ៕

អត្ថបទ៖ សាង ស្រីល័ក្ខ

ចុចអាន៖គន្លឹះធំៗ ៨ ដោះស្រាយបញ្ហា ជាមួយមេកោយគ្មានសមត្ថភាពដឹកនាំ ពូកែតែបង្គាប់បញ្ជា

ចុចអាន៖៥ យ៉ាងមេដឹកនាំដាច់ខាតគួរធ្វើ ដើម្បីឲ្យបុគ្គលិកមានកម្លាំងចិត្តធ្វើការ និងដើរតាមឥតងាករេ

The post មានបុគ្គលិក ៧ ប្រភេទនេះក្នុងស្ថាប័ន ធានាថានឹងអន់ថយអាជីព ហើយមេដឹកនាំ គង់ដកចោលឆាប់ៗ appeared first on Kampuchea Thmey Daily.

ចរិតលក្ខណៈ ៧ យ៉ាង មេដឹកនាំឆ្នើម គួររៀនរហូតមិនចេះចប់សោះឡើយ

សាង ស្រីល័ក្ខ — Tue, 28 Sep 2021 07:43:00 +0000

ប្រសិនបើអ្នក ចង់ក្លាយជាអ្នកដឹកនាំដែលមានភាពទាក់ទាញពីមនុស្សជុំវិញ អ្នកក៏ត្រូវក្លាយជាមនុស្សដែលមានគុណភាពជាខ្លួនឯងមុនសិន។ ភាពជាអ្នកដឹកនាំ គឺជាសមត្ថភាពក្នុងការទាក់ទាញអ្នកណាម្នាក់មករកយើង និងឱកាសដែលអ្នកផ្ដល់ជូន ក្នុងនាមជាម្ចាស់ ជាអ្នកគ្រប់គ្រង ជាឪពុកម្ដាយ។

នេះជារបៀបដែលអ្នកដឹកនាំឆ្នើមគួរមាន គួររៀន រហូតមិនឈប់សោះឡើយ ៖

១ រៀនធ្វើខ្លួនឲ្យរឹងមាំ ក៏មិនមែនងើយពេកដែរ

នេះជាគឺជាជាជំហានមួយដែលយើងត្រូវធ្វើ ដើម្បីក្លាយជាអ្នកដឹកនាំដ៏មានសមត្ថភាព និងសមត្ថភាពដែលមានវិសាលភាពធំទូលាយ ដើម្បីចែកចាយដល់អ្នកផ្សេងទៀត។ អ្នកខ្លះច្រឡំថា រឹងមាំគឺជាមនុស្សមានកម្លាំងខ្លាំងអស្ចារ្យ មានចំណេះដឹងខ្ពស់លើសគេ ឬល្អជាងគេទៅវិញ។

មេដឹកនាំល្អ គឺរឹងមាំពីខាងក្នុង ទន់ភ្លន់ពីខាងក្រៅ ចេះដាក់ខ្លួនជាមួយកូនចៅឬអ្នកជុំវិញជានិច្ច។

២ រៀនធ្វើចិត្តល្អតែមិនទន់ខ្សោយ

យើងមិនត្រូវច្រឡំភាពទន់ខ្សោយដូចគ្នា នឹងសេចក្ដីសប្បុរសឡើយ។ សេចក្ដីសប្បុរសចិត្តល្អ គឺមិនបានបង្ហាញពីភាពទន់ខ្សោយទេ។ វាជាកម្លាំងជាក់លាក់មួយប្រភេទ។ យើងត្រូវតែមានចិត្តសប្បុរស ដើម្បីប្រាប់ការពិតដល់នរណាម្នាក់។ យើងត្រូវតែមានចិត្តសប្បុរស និងមានការពិចារណាគ្រប់គ្រាន់ ដើម្បីដាក់វានៅលើបន្ទាត់មួយនៃភាពត្រឹមត្រូវ។

អ្នកដឹកនាំរូបណា ក៏ត្រូវរៀននិងមានជានិច្ចដែរ។

៣ រៀនធ្វើចិត្តឲ្យក្លាហាន ប៉ុន្តែមិនត្រូវកាចហួសហេតុពេក

ដើម្បីបង្កើតឥទ្ធិពល មេដឹកនាំត្រូវក្លាហាន ហ៊ានដើរកាត់ ហ៊ាននិយាយចំៗនៅចំពោះមុខក្រុមខ្លួនឯង។ ជាពិសេសមេដឹកនាំត្រូវតែមានឆន្ទៈខ្ពស់ ក្នុងការចាប់យកព្រួញដំបូង ដោះស្រាយបញ្ហាដំបូង រកឃើញសញ្ញាដំបូងនៃបញ្ហានោះ។ ត្រូចងចាំថា មេដឹកនាំក៏ដោយ អ្នកណាក៏ដោយ បើអ្នកមិនចេះចាប់យកឱកាស អ្នកនឹងស្ដាយ។ ព្រោះវាមិនមែនចេះតែមានឲ្យអ្នកចាប់បានរហូតឡើយ។

៤ រៀនដាក់ខ្លួនដាក់កាយអោនទាប មិនបាច់ខ្មាស

អ្នកមិនអាចឈានទៅដល់ចំណុចខ្ពស់បានទេ ប្រសិនបើគ្មានការលះបង់អ្វីម៉្យាង។ មនុស្សខ្លះយល់ច្រឡំចំពោះការដាក់ខ្លួនទាប គឺដូចបន្ទាបខ្លួនទៅរកកូនចៅក្រោមបង្គាប់ចឹងដែរ។ ប៉ុន្តែការបន្ទាបខ្លួន គឺជាគុណធម៌មួយ ហើយភាពខ្មាសអៀនគឺជាជំងឺវិញទេ។

៥ រៀនមានមោទនភាព តែមិនក្រអឺតក្រទម

មេដឹកនាំត្រូវការមោទនភាព ដើម្បីបង្កើតមហិច្ឆតា ឬចំពោះបុព្វហេតុមួយក្នុងការសម្រេចបាន។ ប៉ុន្តែគន្លឹះដើម្បីក្លាយជាអ្នកដឹកនាំល្អ គឺត្រូវមានមោទនភាពដោយមិនក្រអឺតក្រទម។ ភាពក្រអឺតក្រទមដូចបង្ហាញពីភាពល្ងង់ខ្លៅ មេដឹកនាំពុំគួរមានជាប់ខ្លួនឡើយ។

៦ រៀនបង្កើតការលេងសើច តែមិនហួសហេតុ

ក្នុងភាពជាអ្នកដឹកនាំ យើងរៀនលេង រៀនញញឹមដាក់គ្នា កុំចង់ចិញ្ចើមជ្រួញមុខមិនរីក។ វាមិនជាបញ្ហាឡើយ គ្រាន់តែសើចឬញញឹមដាក់ក្រុមនោះ គ្រាន់តែកុំលេងហួសពេកឬលើសពេក។

៧ រៀនដោះស្រាយតាមការពិត

ដោះស្រាយតាមការពិត គឺដូចជួយសង្គ្រោះខ្លួនឯងចេញពីពីភាពច្របូកច្របល់ ឬភាពរញ៉េរញ៉ៃ។ ការពិតនឹងបញ្ជាក់គ្រប់យ៉ាង ឲ្យតែយើងដោះស្រាយវាដោយសន្តិវិធី និងប្រកាន់ភាពត្រឹមត្រូវជាប់ជានិច្ច៕

ប្រែសម្រួល៖ សាង ស្រីល័ក្ខ

ចុចអាន៖គិត ៣ ចំណុចនេះសិន មុនដាក់ពាក្យលាឈប់ពីការងារបច្ចុប្បន្ន

ចុចអាន៖កំពូលជំនាញទន់ទាំងនេះ ដាក់ពាក្យកន្លែងណាក៏គេសួររក (ចាំបាច់)

The post ចរិតលក្ខណៈ ៧ យ៉ាង មេដឹកនាំឆ្នើម គួររៀនរហូតមិនចេះចប់សោះឡើយ appeared first on Kampuchea Thmey Daily.

ភាពខុសគ្នារវាងបុគ្គលិកបញ្ចេញមតិ និងបុគ្គលិក Yes/OK

សាង ស្រីល័ក្ខ — Tue, 24 Aug 2021 03:02:00 +0000

វប្បធម៌នៃការប្រកួតប្រជែងគំនិត មិនត្រឹមអាចនាំទៅរកជោគជ័យនិងការប្តូរថ្មី ថែមទាំងបង្ហាញថា អ្នកជាមេដឹកនាំល្អ ។ មេដឹកនាំ ឬប្រធានក្រុមការងារណាដែលចង់បានតែពាក្យលើកជើង រំពឹងទុក តែការយល់ស្របកំពុងឆ្ពោះទៅរកបរាជ័យជ្រៅ ដោយសារថា មនុស្សឡេមឡឺមទើបនៅក្នុងវប្បធម៌បែបនះបាន។

តើប្រព័ន្ធបញ្ចេញមតិដោយសេរី នាំមកនូវបរិយាកាសការងារបែបណាក្រៅពីបង្កើនភាពសប្បាយចិត្តនិងរីកចម្រើន?

មេដឹកនាំខ្លះប្រាថ្នាចង់បានការសម្រេចបាននូវការគាំទ្រគំនិតខ្លួន ឬទុកខ្លួនវាងវៃលើសគេ ខណៈមេដឹកនាំផ្សេងទៀត គ្រាន់តែចង់ឲ្យបុគ្គលិកបញ្ចេញឲ្យអស់ កុំលាក់លៀមនូវគំនិតក្នុងការ «ជួយ» គាត់។

ប្រព័ន្ធការងារអត្តនោមត័នាំមកនូវលទ្ធផលការងារបែបវាយអេបស៊ីអប ធ្វើឲ្យមេពេញចិត្តនិងកុហកលទ្ធផល។

រឿងដែលសាមញ្ញជាងនេះទៅទៀតគឺ បុគ្គលិកល្អចង់ធ្វើការឲ្យក្រុមហ៊ុនបានល្អ បុគ្គលិកឡេមឡឺមវិញខំរកវិធីនិយាយឲ្យមេដឹកនាំចូលចិត្តខ្លួន។ ពួកគេលាក់កំបាំងលទ្ធផលមិនល្អ លាក់ហានិភ័យ រុញទូកបណ្តោយទឹកឬរុញស៊ីក្លូបញ្ចូលឡាន កែរបាយការណ៍ កុហក និងមិនទទួលខុសត្រូវ។

នេះមិនមែនជាកំហុសពួកគេទាំងស្រុងទេ គឺកំហុសតាំងពីដំបូងដែលមេដឹកនាំបានលើកទឹកចិត្តឲ្យមនុស្សធ្វើរបៀបនេះ។

ប្រព័ន្ធ Yes និង OK ពិតជាអាចលូតលាស់យ៉ាងរហ័ស និងបំផ្លាញដោយភាពស្ងៀមស្ងាត់និងខ្វះការទំនាក់ទំនងពិត។

ដំណោះស្រាយល្អបំផុត គឺការទំនាក់ទំនងត្រឹមត្រូវនិងការផ្តល់រង្វាន់ឬដាក់ទោសគ្មានការយោគយល់ ។ នៅក្នុងនាយកដ្ឋានមួយ ដែលមេដឹកនាំម្នាក់យល់ច្បាស់ពីអ្វីដែលមនុស្សគ្រប់គ្នាកំពុងធ្វើប្រសើរជាង ការស្តាប់តែចេញពីមាត់មនុស្សម្នាក់។

វប្បធម៌ សំឡេងស្មើភាព អ្នកតូចតាចក៏មានសិទ្ធិនិយាយ គឺនាំទៅដល់ការបំបាត់វប្បធម៌ «១កុហកលទ្ធផលបាន។

ឧទាហរណ៍ ក្រុមការងាររបស់យើងបានចូលរួមក្នុងគម្រោងរយៈពេលប្រាំមួយខែ សម្រាប់កៀងគរអតិថិជនថ្មីៗ។ ភាគច្រើនគ្រប់គ្នាកំពុងធ្វើការពីចម្ងាយទៅការិយាល័យមិនកើត។ ប៉ុន្តែគ្រប់គ្នាគួរតែកំពុងធ្វើអ្វីៗ តាមតួនាទីផ្ទាល់ខ្លួន មិនមែនដល់មេហៅប្រជុំទើបរត់ទៅទេ។

ការមានបញ្ហាទំនាក់ទំនងមិនមែនមកពីមិនជួបមុខឡើយ គឺមកពីមិនផ្តល់សេចក្តីរាយការណ៍ពិត។ ទាំងនេះជាមហន្តរាយដែលកំពុងរង់ចាំយើងដួល។

កុំយកលេសកូវីដ ហើយថានេះជាពេលវេលាអាក្រក់ ដែលនាំឲ្យរញ៉េរញ៉ៃ។ តាមពិតស្ថានការណ៍មិនមែនជាហេតុផលសម្រាប់ប្រព្រឹត្តអាក្រក់ ភូតភ បំភាន់ឡើយ។

ប្រសិនបើអ្នកណាម្នាក់ មិនចង់ដោះស្រាយជាមួយបញ្ហារបស់បុគ្គលិក មិនចង់ដោះស្រាយជាមួយអតិថិជនមិន ចង់ដោះស្រាយពន្លឿនចក្ខុ ទស្សនវិស័យ ពន្យា បំភ្លៃ មិនចូលចិត្តទំនាក់ទំនងត្រង់ទៅត្រង់មក បង្កើតបរិយាកាសនៃការបំភិតបំភ័យឲ្យមានការភ័យខ្លាចនិងញុះញង់ ឲ្យរបាយការណ៍ក្លែងក្លាយ ជាកម្សោយការងាររបស់បុគ្គលនោះ មិនមែនមកពីកូវីដ១៩ឡើយ។

បុគ្គលិកល្អមិនដែលខ្លាចក្នុងការសួរសំណួរមេដឹកនាំទេ អ្នកដែលខ្លាច អំពីភាពត្រឹមត្រូវការពិតនិងតម្លាភាពគឺមកពីគេមិនសូវទទួលខុសត្រូវនិងខ្វះលទ្ធផលពិត៕

អត្ថបទ៖លីយា៉រ៉ា

ចុចអាន៖ចង់បានក្រុមការងារពេញដោយថាមពល និងស្វាហាប់ ព្រមទាំងស្ថិតស្ថេរផងដែរ?

ចុចអាន៖ល្បិចពិសេស ធ្វើការឆាប់ឡើងប្រាក់ខែ ហើយនាំខ្លួនរីកចម្រើនថែមទៀត

The post ភាពខុសគ្នារវាងបុគ្គលិកបញ្ចេញមតិ និងបុគ្គលិក Yes/OK appeared first on Kampuchea Thmey Daily.

គន្លឹះជោគជ័យក្នុងក្រុមការងារ ដែលអ្នកដឹកនាំច្រើនអនុវត្តជាប្រចាំ

សាង ស្រីល័ក្ខ — Thu, 24 Jun 2021 04:37:00 +0000

ចង់ក្លាយជាអ្នកដឹកនាំដ៏អស្ចារ្យមួយរូបសម្រាប់កូនក្រុម អ្នកត្រូវរៀនស្គាល់ និងលើកកម្ពស់គំនិតល្អបំផុត មិនថាមកពីណា ឬអ្នកនិយាយនោះជាបុរស ឬស្ត្រី ក្មេង ចាស់ ខ្មៅស ល្អ អាក្រក់ឡើយ។

មិនថាអ្នកមានដើមទុនច្រើន បទពិសោធន៍យូរឆ្នាំ ប៉ុន្តែបើគ្មានគំនិតពីសមាជិកក្រុមទេ កុំសង្ឃឹមថារីកចម្រើនទៅមុខឲ្យសោះ។

អ្នកដឹកនាំពូកែជួយបង្កើត និងបង្ហាញគំនិតល្អបំផុតពីក្រុមខ្លួន ហើយមេកោយនីមួយៗ ក៏ត្រូវមានវិធីសាមញ្ញមួយចំនួនសម្រាប់ក្រុមរបស់ខ្លួនដែរ។

១ ស្ដាប់គំនិតទាំងអស់

ការស្វែងរកគំនិតល្អៗ ចាប់ផ្ដើមដោយឆន្ទៈបើកចំហដើម្បីស្ដាប់គំនិតទាំងអស់។ ក្នុងអំឡុងពេលដំណើរការនៃការបង្កើតខួរក្បាល ការបិទគំនិតណាមួយអាចរារាំងអ្នកពីការរកឃើញគំនិតល្អៗ។ ការគិតជាក្រុម (មិនឲ្យច្របូកច្របល់ជាមួយក្រុមគិតពិចារណា) អាចមានភាពវិជ្ជមានបែបនេះ៖ នៅពេលដែលយើងចែករំលែកការគិតរបស់យើង ក្នុងចំណោមក្រុមយើង ការគិតនឹងកាន់តែលឿននៃច្នៃប្រឌិតថ្មី ហើយការគិតរបស់យើងមានតម្លៃច្រើនជាង។ ការគិតដ៏អស្ចារ្យកើតឡើងនៅពេលគំនិតល្អៗ ត្រូវបានបង្កើតឡើងនៅក្នុងបរិយាកាសរួមគ្នា។

២ មិនត្រូវដោះស្រាយដោយគំនិតតែមួយ

អ្នកដឹកនាំអាចផ្តោតលើសកម្មភាពហើយធ្វើអីគឺរហ័ស។បញ្ហាកើតឡើងនៅពេលដែលពួកគេច្បាំងនឹងផ្លូវខ្លួនឯង ទោះដឹងថាលឿនពេកឬខុសក៏ដោយ។ ដូចគ្នានេះដែរគឺថា គំនិតមួយមិនគ្រប់គ្រាន់ទេ។ គំនិតជាច្រើនធ្វើឲ្យយើងកាន់តែរឹងមាំ ទោះវានៅប្រើពេលពិចារណាក្ដី។ ការបញ្ចេញគំនិតច្រើននិងបង្កើតការច្នៃប្រឌិតខ្ពស់។

៣ រកមើលហេតុការណ៍ប្រចាំថ្ងៃសម្រាប់គំនិត

អ្នកដឹកនាំល្អតែងតែស្វែងរករឿងធំបន្ទាប់។ ពួកគេបណ្ដុះការយកចិត្តទុកដាក់និងអនុវត្តវាជាវិន័យទៀងទាត់។ នៅពេលពួកគេអានទស្សនាវដ្តី មើលភាពយន្ត រីករាយនឹងសកម្មភាពកម្សាន្ត ឬចូលរួមជាមួយមិត្តរួមការងារ ពួកគេតែងតែស្វែងរកគំនិតឬការអនុវត្តដែលពួកគេអាចប្រើ ដើម្បីកែលំអការងារនិងភាពជាអ្នកដឹកនាំ។

៤ កុំឲ្យបុគ្គលិកលក្ខណៈអ្នកផ្សេងស្រោបលើគោលបំណងរួម

នៅពេលនរណាម្នាក់ដែលអ្នកមិនចូលចិត្តគំនិតអ្នកផ្សេង គេនឹងបង្ហាញអ្វីមួយឲ្យយើងជឿជាក់ថាគំនិតនេះគួរពិចារណាសិន។ ទោះយ៉ាងណាវាមិនអាក្រក់ឡើយ សម្រាប់ការពិចារណា ប៉ុន្តែប្រសិនបើមិនប្រយ័ត្នអ្នកអាចនឹងបោះចោលរបស់ល្អឈោងយកអ្វីដែលពុំសមគួរ។

កុំបណ្ដោយឲ្យបុគ្គលិកលក្ខណៈរបស់នរណាម្នាក់ ដែលធ្វើការជាមួយយើង ធ្វើឲ្យយើងមិនអាចមើលឃើញពីគោលបំណងធំ ដែលជាការបន្ថែមតម្លៃដល់ក្រុមនិងជំរុញអង្គភាព។

៥ ការពារមនុស្សច្នៃប្រឌិតនិងគំនិតរបស់ពួកគេ

នាយកប្រតិបត្តិផ្សាយពាណិជ្ជកម្ម Charlie Brower មានប្រសាសន៍ថា គំនិតថ្មីមួយ “អាចត្រូវបានសម្លាប់ដោយសំដីសមាជិកក្រុមក្នុងការសើចចំអកជាដើម។ ” ក្នុងនាមជាមេដឹកនាំ ត្រូវចេះប្រើគំនិតប្រាជ្ញាមើលពួកគេ ប្រសិនបើអ្នកចង់បានគំនិតល្អបំផុតសម្រាប់ក្រុម។ មេកោយត្រូវគាំទ្រលើកកម្ពស់មនុស្សមានគំនិតច្នៃប្រឌិត ព្រោះពួកគេជាក្រុមដែលត្រូវការលូតលាស់ និងបន្តបង្កើតគំនិតដើម្បីជាប្រយោជន៍ដល់ក្រុមទាំងមូល។

៦ កុំទទួលយកការបដិសេធគំនិតផ្ទាល់ខ្លួន

នៅពេលគំនិតរបស់យើងមិនត្រូវបានទទួលការគាំទ្រពីអ្នកដទៃ បញ្ឈប់ការប្រកួតប្រជែង ហើយផ្តោតថាមពលយើងទៅលើការបង្កើត។ អ្នកនឹងបើកផ្លូវឲ្យមនុស្សនៅជុំវិញចាប់យកគំនិតច្នៃប្រឌិតរបស់ពួកគេដល់កម្រិតបន្ទាប់មួយទៀត។ គំនិតរបស់យើងមិនមែនតែងតែជាគំនិតល្អបំផុតនោះទេ។ តែយ៉ាងណាក៏កុំបោះបង់ឲ្យសោះ។

នៅពេលដែលមនុស្សគ្រប់គ្នានៅក្នុងបន្ទប់មានមតិខុសគ្នា ការច្នៃប្រឌិតនិងរឿងល្អៗសម្រាប់ក្រុមតែងកើតមាន ហើយជោគជ័យនៅជិតបង្កើយ បើសមាជិកក្រុមរួបរួមគ្នា៕

ប្រែសម្រួល៖ សាង ស្រីល័ក្ខ

ប្រភព៖success

ចុចអាន៖គន្លឹះ ៣ សាមញ្ញ ក្នុងនាមជាសហគ្រិនគួរមានជាប់ខ្លួន

ចុចអាន៖ទម្លាប់ ៦យ៉ាងដែលអ្នកដឹកនាំឆ្លាតវៃតែងធ្វើ សម្រាប់កូនក្រុម

The post គន្លឹះជោគជ័យក្នុងក្រុមការងារ ដែលអ្នកដឹកនាំច្រើនអនុវត្តជាប្រចាំ appeared first on Kampuchea Thmey Daily.

ហេតុផលដែលមេដឹកនាំល្អ កម្រប្រើពាក្យ«why» ពេលសន្ទនាជាមួយបុគ្គលិក

សាង ស្រីល័ក្ខ — Wed, 05 May 2021 04:00:00 +0000

គ្មានអ្នកណាម្នាក់ចង់ឆ្លើយមកជាមួយនឹងសំណួរអស់ទាំងនេះទេ ៖

ហេតុអ្វីបានជាតែងតែមកយឺតពេល?

ហេតុអ្វីបានជារបាយការណ៍ប្រចាំខែពោរពេញទៅដោយពាក្យបណ្ដឹងរបស់អតិថិជន?

ហេតុអ្វីបានជាគេចវេះមិនចង់ប្រជុំជាមួយខ្ញុំ?

ហេតុអ្វីបានជាពាក់អាវចាស់ដដែលៗរៀងរាល់ចុងសប្ដាហ៍?

និយាយ ឬសរសេរនូវសំនួរទាំងនេះ បានរំញោចថាមពលការពារខ្លួនដោយស្វ័យប្រវត្តិក្នុងខ្លួនអ្នកដែលកំពុងត្រូវគេសួរព្រោះជាប្រភេទសំណួរ“ បន្ទោស” នឹងដែលជារឿយៗបាននាំការសន្ទនាឲ្យលែងស្និទ្ធស្នាលអាចក្លាយជាតឹងតែងផង។

ហេតុផលដែលមេដឹកនាំល្អកម្រប្រើពាក្យWHYពេលសន្ទនាជាមួយបុគ្គលិក ៖

១ ពាក្យ«ហេតុអ្វី?»បង្កប់ការស្តីបន្ទោស និងពិរុទ្ធភាព

នៅពេល Mona បានសិក្សាថ្នាក់គ្រូបង្វឹកប្រមាណ៨ខែ ក្រោយមកគ្រូបង្វឹករបស់នាងបានសួរថាហេតុអ្វី ក៏មិនឃើញយកទៅប្រើឲ្យមានប្រយោជន៍ច្រើន Mona លែងចងចាំអ្វីដែលសន្ទនា បន្ទាប់មកទៀតបាន ព្រោះនាងកំពុងឈឺចាប់នឹងសំណួរមួយនោះ លែងឮអ្វីគ្រប់យ៉ាង។ ពាក្យ ហេតុអ្វីមិនត្រឹមមិនធ្វើឲ្យបុគ្គលិកអាចមានយោបល់បានត្រឹមត្រូវ មិនភ័យមិនមានសម្ពាធនោះទេ ប៉ុន្តែថែមទាំងបញ្ឈប់ការប្រជុំ និងរារាំងលែងឲ្យពួកគេស្តាប់សម្តីនានាផ្សេងទៀតបានតែម្តង។

សំណួរទាំងនេះរឹតអវិជ្ជមានខ្លាំងនៅពេលយើងសួរមកខ្លួនឯងផងដែរ ៖

ហេតុអ្វីបានជាខ្ញុំមិនដឹងពីរបៀបធ្វើការឲ្យរហ័សនិងជោគជ័យដូចអ្នកផ្សេង?

ហេតុអ្វីខ្ញុំមិនពូកែគ្រប់គ្រាន់ដដែលជាដដែល?

ហេតុអ្វីខ្ញុំមិនមានប្រាក់ច្រើនដូចគេបន្ថែម?

សំណួរ“ ហេតុអ្វី” ផ្ទាល់ខ្លួនដែល ចាក់ឫសយ៉ាងជ្រៅនៅក្នុងជួរ នៃអារម្មណ៍អវិជ្ជមាន រាប់តាំងពីនបានបង្កើតភាពអាម៉ាស់រហូតដល់ការខ្មាសអៀន។

ប្រសិនបើអ្នកដឹកនាំតែងតែចងចិញ្ចើម និងបោះពាក្យ“ ហេតុអ្វី” នៅពេលនិយាយគ្នា យើងនឹងសម្គាល់ឃើញថា គ្មានអ្នកណាចង់និយាយជាមួយនឹងយើងលើកក្រោយទៀតទេ។

ពាក្យ“ ហេតុអ្វី”អាចស្តាប់ទៅដូចជា យើងចាំបាច់ត្រូវតែឆ្លើយត្រូវតែរកហេតុនឹងផល ត្រូវតែពន្យល់ និងត្រូវតែការពារខ្លួនពុំនោះទេបើយើងមិនមានហេតុផលយើងជាប់ពិរុទ្ធ។

អ្នកដឹកនាំល្អអាចប្តូរពីហេតុអ្វីបានជាអតិថិជនរអ៊ូ មកជា យើងមានរឿងអីជាមួយអតិថិជន? ប្តូរពីហេតុអ្វីមកប្រជុំយឺត ទៅជា ស្ទះផ្លូវឬអី?

នៅក្នុងពិភពជំនួញ មានពេលខ្លះដែលសំណួរ“ ហេតុអ្វី” មានប្រយោជន៍ខ្លាំងឧទាហរណ៍ ក្រុមហ៊ុនតូយ៉ូតាបានចេញសៀវភៅមួយ ទទួលបានជោគជ័យយ៉ាងខ្លាំងហើយមានចំណងជើងថា“ ចាប់ផ្តើមជាមួយហេតុអ្វីក៏បង្កើតជាករណីដ៏អស្ចារ្យសម្រាប់សួរបញ្ជាក់ពីគោលបំណងសំខាន់របស់ក្រុមហ៊ុនយើង!

ជួនកាល ការផ្តល់អំណាចដល់កម្មករ និយោជិតបកសួរមកប្រធានវិញ ថា“ ហេតុអ្វី” ជារឿងល្អជាងដែលចៅហ្វាយសួរចុះមកឋានានុក្រមខាងក្រោម។

ទោះយ៉ាងណានៅក្នុងទំនាក់ទំនង មិនថានៅកន្លែងធ្វើការឬនៅផ្ទះទេ សំណួរ“ ហេតុអ្វី” អាចជារូបមន្តសម្រាប់ទំនាក់ទំនងគ្នាពេលខឹងសម្បា ទើសចិត្តតែប៉ុណ្ណោះ។

នៅពេលដែលមានអ្វីកើតឡើងដែលបណ្ដាលឲ្យមានការខកចិត្ត ឬមិនយល់ស្រប ជារឿងធម្មតាទេដែលយើងរមែងចង់សួរថា ហេតុអ្វី តែវាមិនប្រសើរឡើយក្នុងការសន្ទនាដោះស្រាយបញ្ហា វាភាគច្រើនបានត្រឹមបញ្ចេញអារម្មណ៍មកថាយើងខឹង៕

ប្រែសម្រួល ៖ សុភា

ប្រភព ៖ Ted

ចុចអាន៖៤ វិធី ពីអ្នកគ្រប់គ្រងទូទៅ ក្លាយជាប្រធានគ្រប់គ្រងក្រុមហ៊ុន

ចុចអាន៖អាជីពអ្វីក៏ដោយ បើគ្មាន ៥យ៉ាងនេះពិបាកជោគជ័យណាស់

The post ហេតុផលដែលមេដឹកនាំល្អ កម្រប្រើពាក្យ«why» ពេលសន្ទនាជាមួយបុគ្គលិក appeared first on Kampuchea Thmey Daily.

ជំនាញសំខាន់៥ ដែលអ្នកដឹកនាំផ្នែកលក់ត្រូវតែមានជាចាំបាច់

សាង ស្រីល័ក្ខ — Tue, 04 May 2021 01:23:03 +0000

ផ្នែកលក់ដែលនឹងទទួលបានជោគជ័យ ត្រូវដឹងថា ពួកគេមានជំនាញជាក់លាក់អ្វីមួយ ដើម្បីផ្ដល់ឲ្យអតិថិជនរបស់ពួកគេ។

នេះគឺជាចំណុចសំខាន់បំផុតចំនួន ៥ និងរបៀបដែលអ្នកអាចលក់គ្រប់គ្នា តែងទទួលបានជោគជ័យ ៖

១. ចេះកំណត់អាទិភាព

អ្នកលក់ទាំងអស់សុទ្ធតែរវល់! ដូច្នេះ ហេតុអ្វីបានជាអ្នកខ្លះហាក់ដូចជាស្ត្រេសខ្លាំង ខណៈពេលដែលអ្នកផ្សេងទៀតអាចរក្សាភាពត្រជាក់របស់ពួកគេបាន។ ពីព្រោះពួកគេ បានរៀនផ្ដល់អាទិភាពជាជម្រើសក្នុងក្រុម។

ការផ្ដល់អាទិភាព អនុញ្ញាតឲ្យអ្នកលក់បំបែកអ្វីដែលសំខាន់ ពីភារកិច្ចដែលរវល់ខ្លាំង និងជាជំនួយក្នុងការដោះស្រាយ បញ្ហាណាមួយកើតឡើង។ អាទិភាពមិនត្រឹមតែជាបញ្ហានៃការធ្វើបញ្ជីការងារដែលត្រូវធ្វើនោះទេ តែវាក៏អាចជួយបន្ធូរការងារដែលលំបាកៗ របស់យើងបានច្រើន។

២. ការចរចា

មិនថាអាជីវកម្មអ្នកជាអ្វីនោះទេ ក្នុងនាមជាអ្នកលក់ត្រូវដឹងពីរបៀបចរចា។ ទោះបីជាការចរចាជោគជ័យ ក៏ទាមទារឲ្យយើងយល់ពីតម្រូវការរបស់ភាគីផ្សេងទៀតដែរ។

ស្វែងយល់ឲ្យបានឆាប់នៅក្នុងដំណើរការនៃការលក់ថា តើអ្នកទិញរបស់អ្នកជានរណា។ ជាជាងផ្ញើឲ្យអតិថិជននូវការធ្វើតេស្តបុគ្គលិកលក្ខណៈ របស់ពួកគេជំនួសវិញ។

៣. ការទទួលខុសត្រូវ

ក្រុមហ៊ុនទាំងមូលកើនឡើងនិងធ្លាក់ចុះផ្អែកលើបទពិសោធន៍ អតិថិជនរបស់ពួកគេ។ អ្នកលក់ត្រូវតែឆ្លើយតប មិនត្រឹមតែនៅក្នុងពេលវេលាធ្វើការប៉ុណ្ណោះទេ ប៉ុន្តែថែមទាំងបញ្ចូលអារម្មណ៍ផងដែរ។

មានកត្តាជាច្រើនដែលអ្នកលក់គួរមាន ដូចជាល្បឿនឆ្លើយតប ភាពបត់បែននៅក្នុងបណ្ដាញ ទំនាក់ទំនង ការយល់ចិត្ត និងភាពវិជ្ជមាន សុទ្ធតែជាការរំពឹងទុកក្នុងទទួលខុសត្រូវទាំងអស់។

៤. ការសរសេរ

អ្នកលក់មិនចាំបាច់ក្លាយជាអ្នកជំនាញសរសេរទេ។ ប៉ុន្តែពួកគេចាំបាច់ត្រូវឆ្លងកាត់ជំនាញនិងភាពកក់ក្ដៅក្នុងការទំនាក់ទំនង ជាលាយលក្ខណ៍អក្សរ។ សូម្បីតែអ៊ីមែល ក៏អាចបង្កើតកំហុសបានដែរ បើសិនជាអ្នកលក់មិនបានប្រុងប្រយ័ត្ន ហើយធ្វើឲ្យមានការធ្វេសប្រហែសលើអតិជន។

៥. ការទំនាក់ទំនងមិនមែនពាក្យសំដី

ភាសារាងកាយគឺជាផ្នែកដ៏ធំមួយនៃសារដែលត្រូវបានបញ្ចេញ ក្នុងកំលុងពេលនៃការសន្ទនាអំពីការលក់ប្រាប់ទៅកាន់អតិថិជន។ ជាអ្នកលក់ត្រូវរៀនគ្រប់គ្រងអារម្មណ៍ បង្កើនល្បឿននៃការសន្ទនា និងសិទ្ធិអំណាចនៃទំនុកចិត្ត របស់ខ្លួន។

ចងចាំ ត្រូវរក្សាស្នាមញញឹមនៅលើមុខ ទោះបីមានរឿងតានតឹងពីផ្ទះក៏ដោយ៕

ប្រែសម្រួល៖ សាង ស្រីល័ក្ខ

ចុចអាន៖ក្រុមហ៊ុនដែលភាន់ច្រឡំគ្នារវាង ទីផ្សារនិងផ្នែកលក់តែងតែបរាជ័យ! ហេតុអ្វី?

ចុចអាន៖មេក្រុមល្អ រមែងស្វាគមន៍បុគ្គលិកថ្មីដោយសកម្មភាពទំាងនេះ

The post ជំនាញសំខាន់៥ ដែលអ្នកដឹកនាំផ្នែកលក់ត្រូវតែមានជាចាំបាច់ appeared first on Kampuchea Thmey Daily.

ជំនាញទន់សំខាន់ៗចំនួន ៥ ដែលអ្នកដឹកនាំគ្រប់រូបគួរមានជាចាំបាច់

សាង ស្រីល័ក្ខ — Tue, 27 Apr 2021 01:23:45 +0000

អ្នកគ្រប់គ្រងទាំងអស់ តែងចង់ក្លាយជាអ្នកដឹកនាំល្អម្នាក់ ប៉ុន្តែពួកគេខ្លះមិនបានដឹងពីផលប្រយោជន៍នៃជំនាញទន់ (Soft Skill )សំខាន់ៗចំនួន ៥ ដែលគេកំពុងតែខ្វះទេ។

Soft Skill ដែលអ្នកដឹកនាំឆ្នើមនិងពូកែម្នាក់ៗត្រូវមាន ៖

១. ភាពវៃឆ្លាត
២. មនុស្សធម៌
៣. ភាពគួរឱ្យទុកចិត្ត
៤. ភាពក្លាហាន
៥. វិន័យ
គុណធម៌ទាំង ៥ នេះ គឺចាំបាច់ដែលអ្នកគ្រប់គ្រង ត្រូវធ្វើក្នុងពេលតែមួយ ដើម្បីក្លាយជាអ្នកដឹកនាំឆ្នើមម្នាក់។

ភាពជាអ្នកដឹកនាំពាក់ព័ន្ធនឹងការមានសមត្ថភាព ក្នុងការគ្រប់គ្រងប្រភេទបុគ្គលិកលក្ខណៈផ្សេងៗគ្នា និងដឹងពីតម្រូវការរបស់អ្នកដទៃ ហើយធានាថាការងារកំពុងសម្រេចបានយ៉ាងមានប្រសិទ្ធភាព។

ក្នុងនាមជាអ្នកដឹកនាំគឺមិនងាយស្រួលទេ ដែលនេះជាមូលហេតុ ដែលអ្នកត្រូវតែស្គាល់ពីជំនាញនិងភាពជាអ្នកដឹកនាំផ្សេងៗ។

តើជំនាញទន់ជាអ្វី?

ជំនាញទន់មិនដូចជំនាញរឹង ដែលពួកគេមិនអាចវាស់វែងបាន និងពិបាកកំណត់បរិមាណ ប៉ុន្តែវាសំខាន់សម្រាប់អ្នកគ្រប់គ្រង។ ជំនាញទាំងនេះត្រូវបានគេសំដៅជាញឹកញាប់ថា ជា “ ជំនាញមនុស្ស” ឬ “ ជំនាញបុគ្គល” និងរាប់បញ្ចូលនូវអ្វីដែលអ្នកមាន ជាមួយមិត្តរួមការងាររបស់អ្នក ហើយតើអ្នកប្រាស្រ័យទាក់ទងជាមួយអ្នកដទៃបានល្អប៉ុណ្ណា។

ប្រភេទដែលជំនាញទន់រួមមាន ៖

ការងារជាក្រុម ការទំនាក់ទំនង ដោះស្រាយបញ្ហា ស្ដាប់ សីលធម៌ការងារ ការកសាងក្រុម ភាពបត់បែន ការច្នៃប្រឌិត ការលើកទឹកចិត្ត ការអត់ធ្មត់ ការអភិវឌ្ឍន៍ ភាពជាអ្នកដឹកនាំ ការគ្រប់គ្រងពេលវេលា និងការបញ្ចុះបញ្ចូល។

ហេតុអ្វីបានជាជំនាញទន់មានសារៈសំខាន់?

ដោយសារតែ ជំនាញទន់គឺជារបៀបដែលនិយោជិក ធ្វើអន្តរកម្មប្រកបដោយប្រសិទ្ធភាព និងទំនាក់ទំនងជាមួយមនុស្សជុំវិញខ្លួន។ ទោះបីជាជំនាញរឹងនិងទន់ មានសារៈសំខាន់ខ្លាំងដូចគ្នា នឹងត្រូវបានអះអាងថា បានបង្ហាញពីតម្លៃរបស់អ្នកដឹកនាំ តែយ៉ាងណា ក៏នៅមានមនុស្សមួយចំនួនគិតថា ជំនាញទន់គឺល្អជាង។

តាមពិត ៥៧% នៃអ្នកដឹកនាំជាន់ខ្ពស់សព្វថ្ងៃ និយាយថា ជំនាញទន់ពិតជាសំខាន់ជាងជំនាញរឹង ពិតមែន។ សមត្ថភាពអរូបីទាំងនេះ គឺជាអ្វីដែលសហគ្រិននិងម្ចាស់អាជីវកម្មគ្រប់គ្នា តែងប្រាថ្នាចង់បាន អ្នកដឹកនាំរបៀបនេះ៕

ប្រែសម្រួល ៖ សាង ស្រីល័ក្ខ

ចុចអាន៖មេដឹកនាំល្អគឺអ្នកដែលអាចបង្កើតមេដឹកនាំបន្តជាច្រើនទៀតបាន

ចុចអាន៖មេដឹកនាំឆ្នើមមានលក្ខណៈសម្បត្តិអ្វីខ្លះ

The post ជំនាញទន់សំខាន់ៗចំនួន ៥ ដែលអ្នកដឹកនាំគ្រប់រូបគួរមានជាចាំបាច់ appeared first on Kampuchea Thmey Daily.

អំពីមេដឹកនាំ Archives - Kampuchea Thmey Daily

មេដឹកនាំ​ប្រកាន់​អំណាច​បែបនេះ​ ​ក្នុង​ស្ថាប័ន ​បុគ្គលិក​គ្រប់គ្នា​ គង់​រត់ចោលជួរគ្មានសល់

មានបុគ្គលិក ៧ ប្រភេទនេះក្នុងស្ថាប័ន ធានាថានឹងអន់ថយអាជីព ហើយមេដឹកនាំ គង់ដកចោលឆាប់ៗ

ចរិតលក្ខណៈ ៧ យ៉ាង មេដឹកនាំឆ្នើម គួររៀនរហូតមិនចេះចប់សោះឡើយ

ភាពខុសគ្នារវាងបុគ្គលិកបញ្ចេញមតិ និងបុគ្គលិក Yes/OK

គន្លឹះជោគជ័យក្នុងក្រុមការងារ ដែលអ្នកដឹកនាំច្រើនអនុវត្តជាប្រចាំ

ហេតុផល​ដែល​មេដឹកនាំ​ល្អ កម្រ​ប្រើ​ពាក្យ​«why»​ ពេល​សន្ទនា​ជាមួយ​បុគ្គលិក​

ជំនាញសំខាន់៥ ដែល​អ្នកដឹកនាំ​ផ្នែក​​លក់​ត្រូវ​តែ​មាន​ជា​ចាំបាច់

ជំនាញ​ទន់​សំខាន់ៗ​ចំនួន ៥ ដែល​អ្នក​ដឹកនាំ​គ្រប់រូប​គួរ​​មាន​ជា​ចាំបាច់

មេដឹកនាំប្រកាន់អំណាចបែបនេះ ក្នុងស្ថាប័ន បុគ្គលិកគ្រប់គ្នា គង់រត់ចោលជួរគ្មានសល់

ហេតុផលដែលមេដឹកនាំល្អ កម្រប្រើពាក្យ«why» ពេលសន្ទនាជាមួយបុគ្គលិក

ជំនាញសំខាន់៥ ដែលអ្នកដឹកនាំផ្នែកលក់ត្រូវតែមានជាចាំបាច់

ជំនាញទន់សំខាន់ៗចំនួន ៥ ដែលអ្នកដឹកនាំគ្រប់រូបគួរមានជាចាំបាច់