ឧបករណ៍តេស្តរហ័ស Archives - Kampuchea Thmey Daily

ប្រយ័ត្នចំពោះក្មេង! ឧបករណ៍តេស្តរហ័ស អាចធ្វើឲ្យក្មេងពុលបាន

សាង ស្រីល័ក្ខ — Thu, 10 Feb 2022 03:50:52 +0000

ឧបករណ៍ធ្វើតេស្តរហ័ស ស្វែងរកជំងឺកូវីដ អាចផ្ទុកសារធាតុ Sodium Azide ដែលអាចធ្វើឲ្យយើងពុល និងបង្កជាបញ្ហាសុខភាពធ្ងន់ធ្ងរមួយចំនួន។ ជាក់ស្ដែង ប្រូតេអ៊ីនមេរោគ (អង់ទីហ្សែន) ដែលទាក់ទងនឹងមេរោគកូវីដ-១៩ អាចត្រូវបានរកឃើញដោយប្រើឧបករណ៍តេស្តរហ័ស ដើម្បីធានាថាការធ្វើរោគវិនិច្ឆ័យមានភាពរហ័ស និងត្រឹមត្រូវ។ យ៉ាងណាមិញ អ្នកជំនាញព្រមានថា ដបតូចនៃសារធាតុរាវនៅក្នុងឧបករណ៍តេស្តរហ័សមួយចំនួន មានផ្ទុកសារធាតុ Sodium Azide ដែលមានជាតិពុល និងគ្រោះថ្នាក់ ជាពិសេសសម្រាប់កុមារតូចៗ។

រដ្ឋបាលចំណីអាហារ និងឪសថ(FDA) អាមេរិក ក៏ព្រមានទាក់ទងនឹងផលប៉ះពាល់ដ៏គ្រោះថ្នាក់នៃSodium Azide នៅក្នុងឧបករណ៍ធ្វើតេស្តរហ័សនេះដែរ ដោយបញ្ជាក់ថាសារធាតុសម្រាប់ធ្វើតេស្តផ្ទុក Sodium Azide អាចបង្កគ្រោះថ្នាក់ ប្រសិនបើយើងស្រូប លេប ឬប៉ះពាល់ស្បែក។ ដូច្នេះហើយ ក្នុងករណីប៉ះពាល់នឹងស្បែក គ្នាយើងគួរលាងសម្អាតភ្លាមៗជាមួយនឹងទឹកឲ្យបានស្អាត។

អ្វីទៅជាSodium Azide ?

Sodium Azideជាសារធាតុរឹងពណ៌សដែលគ្មានក្លិន មានសកម្មភាពរហ័ស និងអាចក្លាយជាសារធាតុគីមីដ៏សាហាវ នេះបើយោងតាមមជ្ឈមណ្ឌលត្រួតពិនិត្យ និងបង្ការជំងឺឆ្លង (CDC) អាមេរិក។ នៅពេលដែលលាយជាមួយទឹក ឬអាស៊ីដ Sodium Azideបានផ្លាស់ប្ដូរយ៉ាងឆាប់រហ័សទៅជាឧស្ម័នពុល។

រោគសញ្ញានៅពេលដែលយើងប៉ះពាល់នឹង Sodium Azide

ពិតណាស់ សូម្បីតែកម្រិតតិចតួចនៃ Sodium Azide ក៏អាចធ្វើឲ្យសម្ពាធឈាមចុះទាប វិលមុខ ដួលសន្លប់ ឬគាំងបេះដូង ក៏ដូចជាគ្រោះថ្នាក់សរសៃឈាមខួរក្បាលចំពោះមនុស្សពេញវ័យ។ ក្រុមអ្នកស្រាវជ្រាវបានរាយការណ៍នៅក្នុងទស្សនាវដ្ដីAmerican Journal of Emergency Medicine ថាការប៉ះពាល់នឹងសារធាតុដ៏គ្រោះថ្នាក់នេះក្នុងបរិមាណច្រើន អាចបណ្ដាលឲ្យស្លាប់បាន។ ជាទូទៅ កម្រិតSodium Azide នៅក្នុងឧបករណ៍តេស្តរហ័ស មិនសូវខ្ពស់ប៉ុន្មានទេ ហើយក៏មិនគ្រប់គ្រាន់ធ្វើឲ្យសម្ពាធឈាមមនុស្សពេញវ័យចុះទាបផងដែរ។ លោកស្រីវេជ្ជបណ្ឌិត Johnson-Arbor មានប្រសាសន៍ថា កុមារមានហានិភ័យខ្ពស់ក្នុងការប្រឈមនឹងជាតិពុល ក្រោយពេលដែលលេបសារធាតុ Sodium Azide នៅក្នុងកម្រិតណាមួយក៏ដោយ។

ជាក់ស្ដែង មានការរាយការណ៍អំពីការប៉ះពាល់ដោយចៃដន្យទៅនឹងសារធាតុរាវសម្រាប់ធ្វើតេស្ត ដោយអ្នកខ្លះបានលេបសូលុយស្យុង ខ្លះទៀតបានធ្វើឲ្យកំពប់នៅលើស្បែក និងខ្លះទៀតយកមកដាក់ភ្នែកដោយការភ័ន្តច្រឡំ។ ប្រសិនបើគ្នាយើង ឬអ្នកជាទីស្រលាញ់ ជាពិសេសអាអូនតូចៗប៉ះពាល់នឹងសារធាតុនេះ ចូរប្រញាប់ទៅជួបជាមួយនឹងគ្រូពេទ្យជាបន្ទាន់៕

អត្ថបទផ្ដល់ដោយ៖ Hello Krupet

ចុចអាន៖វីរុសបំប្លែង អូមីក្រុង ភាគច្រើនឆ្លងតែក្មេងជាងមនុស្សធំ?

ចុចអាន៖អ្នកជាសះស្បើយពីកូវីដ-១៩ អាចជួបផលវិបាក ទាំងនេះ

The post ប្រយ័ត្នចំពោះក្មេង! ឧបករណ៍តេស្តរហ័ស អាចធ្វើឲ្យក្មេងពុលបាន appeared first on Kampuchea Thmey Daily.

សិស្សសាលានៅរដ្ឋ អូស្ត្រាលី នឹងធ្វើតេស្តរហ័សរក អូមីក្រុង ២ ដងក្នុងមួយសប្ដាហ៍

Sok Chivon — Tue, 25 Jan 2022 03:53:45 +0000

រដ្ឋដែលមានប្រជាជនច្រើនជាងគេចំនួន ២ របស់អូស្ត្រាលីគឺរដ្ឋ New South Wales និងរដ្ឋ Victoria បាននិយាយថា សិស្សសាលានឹងត្រូវធ្វើតេស្តរកវីរុសបំប្លែងខ្លួនអូមីក្រុង ២ ដងក្នុងមួយសប្តាហ៍ នៅពេលដែលថ្នាក់រៀនបើកឡើងវិញនៅសប្តាហ៍ក្រោយ បន្ទាប់ពីសម្រាករដូវក្តៅ ។

មន្ត្រីសុខាភិបាលបាននិយាយថា ពួកគេជឿថា ការផ្ទុះឡើងនៃវីរុសបំប្លែងខ្លួនអូមីក្រុងបានឈានដល់កម្រិតកំពូលនៅក្នុងរដ្ឋ New South Wales និងរដ្ឋ Victoria ដែលបានរាយការណ៍ពីករណីឆ្លងថ្មីចំនួន ២០,៣២៤ ករណី និង ១៣,០៩១ ករណីក្នុងរដ្ឋនីមួយៗកាលពីថ្ងៃអាទិត្យ ។

ទន្ទឹមនោះនាយករដ្ឋមន្ត្រី New South Wales លោក Dominic Perrottet បាននិយាយថា ឪពុកម្តាយនឹងត្រូវបានស្នើសុំឲ្យប្រើការធ្វើតេស្តរហ័ស ២ ដងក្នុងមួយសប្តាហ៍ដើម្បីពិនិត្យកូនរបស់ពួកគេថាមានកូវីដឬអត់ ហើយរាយការណ៍ពីលទ្ធផលវិជ្ជមានណាមួយទៅកាន់សាលា និងរដ្ឋាភិបាល ។

លោកបានប្រាប់អ្នកយកព័ត៌មាននៅទីក្រុងស៊ីដនីថា ឧបករណ៍ធ្វើតេស្តរហ័សរាប់លានត្រូវបានចែកចាយទៅសាលារៀនចំនួន ៣,០០០ នៅសប្តាហ៍នេះ ហើយសិស្សត្រូវធ្វើតេស្តមុនពេលចូលរៀនថ្ងៃដំបូង ខណៈគ្រូបង្រៀន និងសិស្សវិទ្យាល័យនឹងតម្រូវឲ្យពាក់ម៉ាសជាដាច់ខាត ។

ចំណែករដ្ឋ Victoria វិញក៏បានផ្តល់ការណែនាំឲ្យធ្វើតេស្តលើសិស្សសាលាចំនួន ២ ដងក្នុងមួយសប្តាហ៍ផងដែរ ក្រោមផែនការត្រឡប់ទៅរៀននៅសាលាវិញ ។

ជាចុងក្រោយមន្ត្រីសុខាភិបាលរដ្ឋ Victorian បាននិយាយថា ទាំងបុគ្គលិកសាលានៅរដ្ឋ New South Wales និង Victoria ត្រូវតែចាក់វ៉ាក់សាំងការពារកូវីដ ហើយគ្រូបង្រៀននៅរដ្ឋ Victoria ទុកឱកាសរហូតដល់ចុងខែកុម្ភៈដើម្បីទទួលការចាក់វ៉ាក់សាំងដូសជំរុញ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ អូស្ត្រាលី បង្ខំអ្នកដំណើរមកប្រទេសវិញ ប្រគល់ទូរស័ព្ទ និងដោះ Password ឲ្យប៉ូលិសពិនិត្យ (មានវីដេអូ)

The post សិស្សសាលានៅរដ្ឋ អូស្ត្រាលី នឹងធ្វើតេស្តរហ័សរក អូមីក្រុង ២ ដងក្នុងមួយសប្ដាហ៍ appeared first on Kampuchea Thmey Daily.

ថៃ ថា អ្នកដែលតេស្តរហ័សឃើញវិជ្ជមានកូវីដ គួរតែតេស្តម៉ាស៊ីនធំ PCR ទៀត ទើបច្បាស់

Sok Chivon — Wed, 10 Nov 2021 08:13:16 +0000

ក្រសួងសុខាភិបាលសាធារណៈថៃបានណែនាំឲ្យអាជីវកម្ម និងសាលារៀនប្រើតែឧបករណ៍តេស្តរហ័សរកកូវីដណាដែលត្រូវបានអនុម័តដោយរដ្ឋបាលចំណីអាហារ និងឱសថ (FDA) ប៉ុណ្ណោះ ។

លោក Suphakit Sirilak អគ្គនាយកនៃនាយកដ្ឋានវិទ្យាសាស្ត្រវេជ្ជសាស្ត្របាននិយាយថា កន្លងមកឧបករណ៍ទាំងនេះមានភាពងាយស្រួល និងមានតម្លៃថោក ប៉ុន្តែលទ្ធផលចេញមកអាចនឹងមិនច្បាស់លាស់ ។

ផ្ទុយទៅវិញ សាលារៀន ឬក្រុមហ៊ុនគួរតែទាក់ទងទៅការិយាល័យសុខាភិបាលខេត្តដែលនៅជិតពួកគេបំផុត ហើយឲ្យប្រជាជនដែលតេស្តវិជ្ជមាន បើចង់ដឹងច្បាស់ ត្រូវធ្វើតេស្ដឡើងវិញដោយប្រើម៉ាស៊ីនធំ RT-PCR ។

លោកបានបន្តថា ចំណែកអ្នកដែលនៅក្បែរអ្នកឆ្លងកូវីដ ១៩ ត្រូវរង់ចាំពី ៣ ទៅ ៥ ថ្ងៃ មុននឹងធ្វើតេស្ត ។ ទោះជាយ៉ាងណាក៏ដោយ អ្នកដែលមានគ្រុនក្តៅ ផ្តាសាយ ឬក្អក អាចធ្វើតេស្តបានភ្លាមៗ ។

លោក Suphakit បាននិយាយថា ឧបករណ៍តេស្តរហ័សរកកូវីដដែលមិនមានត្រានៃការអនុម័តរបស់ FDA អាចផ្តល់លទ្ធផលតេស្តមិនពិត ។ លោកក៏បាននិយាយដែរថា ការពិនិត្យមុន ឬក្រោយពេលកំណត់ ឬការប្រើប្រាស់មិនត្រឹមត្រូវក៏អាចផ្តល់លទ្ធផលមិនពិតផងដែរ ។

លោកបានចង្អុលបង្ហាញថា ប្រសិនបើការធ្វើតេស្តជាច្រើនចេញមកវិជ្ជមាននៅក្នុងកន្លែងមួយនោះ មនុស្សមិនគួរធ្វើចត្តាឡីស័កភ្លាមៗនោះទេ ហើយត្រូវតែទៅតេស្តដោយម៉ាស៊ីនធំ RT-PCR ទើបលទ្ធផលយកជាផ្លូវការបាន ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ ថៃ បកស្រាយ ក្រោយការធ្វើតេស្តរហ័សរកកូវីដ ចេញលទ្ធផលខុស កាន់តែច្រើន

The post ថៃ ថា អ្នកដែលតេស្តរហ័សឃើញវិជ្ជមានកូវីដ គួរតែតេស្តម៉ាស៊ីនធំ PCR ទៀត ទើបច្បាស់ appeared first on Kampuchea Thmey Daily.

ថៃ បកស្រាយ ក្រោយការធ្វើតេស្តរហ័សរកកូវីដ ចេញលទ្ធផលខុស កាន់តែច្រើន

Sok Sovann — Sun, 07 Nov 2021 03:20:00 +0000

ឧបករណ៍ធ្វើតេស្តរហ័សរកជំងឺកូវីដ-១៩ ដែលប្រើលើសិស្ស និងគ្រូបង្រៀននៅសាលារៀនក្នុងខេត្ត Mukdahan បានបញ្ចេញលទ្ធផលតេស្តវិជ្ជមានខុសទាំងអស់។

តាមការឲ្យដឹងពីប្រទេសថៃ ឧបករណ៍តេស្តនោះ មិនត្រូវបានអនុញ្ញាតឲ្យប្រើប្រាស់ដោយរដ្ឋបាលចំណីអាហារ និងឱសថ (FDA) ទេ ដូច្នេះគួរតែជ្រើសរើសឧបករណ៍ដែលមានការទទួលស្គាល់ត្រឹមត្រូវ។

ដំបូងឡើយ ការធ្វើតេស្តរហ័សនៅសាលារៀន Kham Soi Phitthayasan ក្នុងស្រុក Nikhom Kham Soi នៃខេត្ត Mukdahan បានចេញលទ្ធផលវិជ្ជមាន តែក្រោយមក ការធ្វើតេស្តម៉ាស៊ីនធំ RT-PCR បែរជាចេញលទ្ធផលអវិជ្ជមានទៅវិញ។

អគ្គលេខាធិការរង FDA លោក Surachok Tangwiwat បាននិយាយកាលពីថ្ងៃសៅរ៍ទី ០៧ ខែវិច្ឆិកាថា ការត្រួតពិនិត្យដោយ FDA បានរកឃើញថា ឧបករណ៍តេស្តរហ័សនោះគឺជាម៉ាក Dvot ហើយត្រូវបានបរិច្ចាគទៅឲ្យសាលា។ យ៉ាងណាក្តី ឧបករណ៍ទាំងនោះ មិនត្រូវបានអនុម័តឲ្យប្រើដោយ FDA ទេ។

ទាក់ទិននឹងករណីនេះ លោកវេជ្ជបណ្ឌិត Surachok បានជំរុញឲ្យភ្នាក់ងារ និងសាធារណជនទាំងអស់ ត្រូវប្រាកដថា ពួកគេជ្រើសរើស ឧបករណ៍តេស្តរហ័ស ដែលត្រូវបានអនុម័តសម្រាប់ប្រើប្រាស់ក្នុងការពិនិត្យរកជំងឺកូវីដ-១៩ លើបុគ្គលិករបស់ពួកគេ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថៃ ធ្វើតេស្តរហ័សលើគ្រូនិងសិស្ស ចេញលទ្ធផលខុស

The post ថៃ បកស្រាយ ក្រោយការធ្វើតេស្តរហ័សរកកូវីដ ចេញលទ្ធផលខុស កាន់តែច្រើន appeared first on Kampuchea Thmey Daily.

សិង្ហបុរី អនុញ្ញាតឲ្យបុគ្គលិកបានចាក់វ៉ាក់សាំងគ្រប់ដូសប៉ុណ្ណោះ ទើបមានសិទ្ធចូលធ្វើការបាន

សាង ស្រីល័ក្ខ — Sat, 23 Oct 2021 10:05:24 +0000

ក្រសួងសុខាភិបាលសិង្ហបុរី (MOH) បាននិយាយនៅថ្ងៃសៅរ៍នេះថា ចាប់ពីថ្ងៃទី ១ ខែមករា ឆ្នាំ ២០២២ តទៅ និយោជិត ដែលបានចាក់វ៉ាក់សាំងការពារជំងឺកូវីដ ១៩ ឬបានជាសះស្បើយពីជំងឺ ក្នុងរយៈពេល ២៧០ ថ្ងៃចុងក្រោយនេះ នឹងត្រូវអនុញ្ញាតឲ្យត្រឡប់ទៅកន្លែងធ្វើការវិញ។

បុគ្គលិកដែលមិនបានចាក់វ៉ាក់សាំង មិនអនុញ្ញាតឲ្យវិលត្រលប់ទៅកន្លែងធ្វើការរបស់ពួកគេទេ លុះត្រាតែពួកគេធ្វើតេស្តអវិជ្ជមានចំពោះកូវីដ ១៩ ។ ដូច្នេះបុគ្គលិកទាំងនេះ ត្រូវចំណាយពេលលើការធ្វើតេស្តមុនចូលធ្វើការ។

ទោះយ៉ាងណា តម្រូវការធ្វើតេស្តរកកូវីដ ក៏ត្រូវអនុវត្តចំពោះបុគ្គលិកដែលមានផ្ទៃពោះ ឬមិនមានសិទ្ធិទទួលថ្នាំបង្ការផងដែរ។

ក្រសួងក៏បានប្រកាសពីការលើកលែងពីវិធានការគ្រប់គ្រងសុវត្ថិភាព ដែលមានលក្ខណៈខុសប្លែកគ្នា ដោយការចាក់វ៉ាក់សាំងសម្រាប់អ្នកដែលមិនមានសិទ្ធិផ្នែកវេជ្ជសាស្ត្រ (មានបញ្ហាចាក់វ៉ាក់សាំងមិនបាន) សម្រាប់វ៉ាក់សាំងទាំងអស់ ក្រោមកម្មវិធីចាក់ថ្នាំបង្ការថ្នាក់ជាតិ។

លោក Gan Kim Yong សហប្រធាននៃក្រុមការងារកូវីដ ១៩ សិង្ហបុរី បាននិយាយថា ការលើកលែងនឹងអនុវត្តចាប់ពីខែក្រោយ។ “ ចំពោះបុគ្គលដែលមិនមានលក្ខណៈសម្បត្តិគ្រប់គ្រាន់ ផ្នែកវេជ្ជសាស្ត្រ សម្រាប់កម្មវិធីចាក់ថ្នាំបង្ការជាតិ យើងនឹងផ្តល់សម្បទានពិសេសសម្រាប់ពួកគេ ដើម្បីចូលទៅក្នុងបរិវេណឬចូលរួមសកម្មភាពដែលប្រព័ន្ធគ្រប់គ្រងសុវត្ថិភាព មានភាពខុសប្លែកគ្នាពីការចាក់វ៉ាក់សាំង ត្រូវបានទាមទារដូចជា ផ្សារទំនើប កន្លែងផ្សេងៗ មជ្ឈមណ្ឌលលក់ដូរ និងហាងកាហ្វេ ដោយចាប់ផ្តើមពីថ្ងៃទី ១ ខែ វិច្ឆិកា ឆ្នាំ ២០២១ តទៅ ៕

ប្រែសម្រួល៖ សាង ស្រីល័ក្ខ

ប្រភព៖CNA

ចុចអាន៖សិង្ហបុរី នឹងធ្វើតេស្តរហ័សរកកូវីដលើសិស្សសាលាបឋមសិក្សារៀងរាល់ ២ សប្ដាហ៍ម្ដង

ចុចអាន៖ម៉ាឡេស៊ី ប្រើធម៌ក្ដៅលើមន្ត្រីរាជការដែលមិនចាក់វ៉ាក់សាំង

The post សិង្ហបុរី អនុញ្ញាតឲ្យបុគ្គលិកបានចាក់វ៉ាក់សាំងគ្រប់ដូសប៉ុណ្ណោះ ទើបមានសិទ្ធចូលធ្វើការបាន appeared first on Kampuchea Thmey Daily.

ចិន បង្កើតឧបករណ៍តេស្តកូវីដតាមដង្ហើម ឃើញលទ្ធផលក្នុងពេលត្រឹម ១០ នាទី ឯប្រសិទ្ធភាពកប់

Sok Chivon — Thu, 21 Oct 2021 09:20:22 +0000

ការស្រាវជ្រាវចុងក្រោយដោយក្រុមជនជាតិចិន បានរកឃើញពិធីជួយសង្គ្រោះមនុស្សពីការឈឺចាប់ ឬមិនស្រួលក្នុងការតម្បារបំពង់ក ឬច្រមុះសម្រាប់ការធ្វើតេស្តរកជំងឺកូវីដ ១៩ ហើយវាក៏ចំណេញពេលវេលាផងដែរ ។

វិធីសាស្ត្រធ្វើតេស្តថ្មីនេះ គឺតម្រូវឲ្យអ្នកជំងឺដកដង្ហើមចូលក្នុងថង់មួយរយៈពេល ៣០ វិនាទី និងរកឃើញលទ្ធផលត្រឹម ៥ ទៅ ១០ នាទីប៉ុណ្ណោះ ។

ដោយដកស្រង់សម្ដីពីលោក Yao Maosheng សាស្រ្តាចារ្យនៅមហាវិទ្យាល័យវិទ្យាសាស្ត្របរិស្ថាន និងវិស្វកម្មនៃសាកលវិទ្យាល័យ Peking, កាសែត The Global Times កាលពីថ្ងៃពុធបានរាយការណ៍ថា ការធ្វើតេស្តនេះមានភាពត្រឹមត្រូវខ្ពស់ និងអាចបែងចែកភាពខុសគ្នារវាងអ្នកផ្ទុកកូវីដ មនុស្សដែលមានសុខភាពល្អ និងអ្នកជំងឺផ្លូវដង្ហើមផ្សេងទៀតជាដើម ។

ការសិក្សាស្រាវជ្រាវនេះផ្អែកលើការដកដង្ហើមរបស់អ្នកជំងឺកូវីដចំនួន ៧៤ នាក់ អ្នកជំងឺផ្លូវដង្ហើមផ្សេងទៀតចំនួន ៣០ នាក់ និងមនុស្សមានសុខភាពល្អចំនួន ៨៧ នាក់ ហើយលទ្ធផលត្រឹមត្រូវរបស់វាមានពី ៩១ ទៅ ១០០ ភាគរយ ។

ទន្ទឹមនោះ វិធីតេស្តរហ័ស និងភាពត្រឹមត្រូវខ្ពស់នេះ ធ្វើឲ្យវិធីសាស្ត្រថ្មីនេះមានភាពប្រសើរជាងការប្រៀបធៀបជាមួយតេស្តរហ័សផ្អែកលើអង់ទីហ្សែន ខណៈវាក៏មានតម្លៃទាបផងដែរ ពោលចំណាយអស់ ១០ យ័ន (១.៥0 ដុល្លារ) បើប្រៀបធៀបជាមួយតេស្តម៉ាស៊ីន PCR ដែលគិតថ្លៃ ៨០ យ័ន (១២.៥០ ដុល្លារ) ។

គួរបញ្ជាក់ថា ការធ្វើតេស្តនេះក៏មានសមត្ថភាពកំណត់អត្តសញ្ញាណអ្នកឆ្លងជំងឺកូវីដ ដែលបានធ្វើសំណាកបំពង់ ក អវិជ្ជមានមិនពិតផងដែរ ខណៈអ្នកឆ្លងមិនបញ្ចេញរោគសញ្ញា និងចេញរោគសញ្ញាមុន អាចត្រូវបានរកឃើញនៅដំណាក់កាលឆ្លងដំបូង ៕

ប្រែសម្រួលដោយ ៖ ជីវ័ន្ត

ប្រភព ៖ Global Times

ចុចអាន ៖ ផ្ទុះករណីឆ្លងកូវីដថ្មីភ្លាម ចិន ចាត់វិធានការតឹងរ៉ឹង ដោយមិនបង្អង់យូរ

The post ចិន បង្កើតឧបករណ៍តេស្តកូវីដតាមដង្ហើម ឃើញលទ្ធផលក្នុងពេលត្រឹម ១០ នាទី ឯប្រសិទ្ធភាពកប់ appeared first on Kampuchea Thmey Daily.

សិង្ហបុរី នឹងធ្វើតេស្តរហ័សរកកូវីដលើសិស្សសាលាបឋមសិក្សារៀងរាល់ ២ សប្ដាហ៍ម្ដង

Sok Chivon — Thu, 21 Oct 2021 07:45:17 +0000

ក្រសួងអប់រំសិង្ហបុរី (MOE) បាននិយាយថា សិស្សនៅសាលាបឋមសិក្សានឹងត្រូវធ្វើតេស្តរហ័សរកកូវីដ (ART) រៀងរាល់ ២ សប្តាហ៍ម្តង រហូតដល់រៀនចប់ឆ្នាំ ។

ក្រសួងអប់រំបាននិយាយនៅថ្ងៃព្រហស្បតិ៍ទី ២១ ខែតុលានេះថា ការធ្វើតេស្តនេះនឹងបង្កើតការទទួលខុសត្រូវសង្គម ក្នុងចំណោមសិស្ស និងធ្វើឲ្យសាលារៀនមានសុវត្ថិភាពក្នុងការរៀនសូត្រ ខណៈតម្រូវការនេះក៏នឹងអនុវត្តចំពោះសិស្សនៅអនុវិទ្យាល័យផងដែរ ។

ទន្ទឹមនោះ សាលានឹងត្រូវបានចែកជូននូវឧបករណ៍ ART ចំនួន ១០ ដល់សិស្សម្នាក់ៗ ចាប់ពីខែតុលានេះតទៅ ហើយការធ្វើតេស្តលើកដំបូងគួរតែត្រូវបានធ្វើឡើងនៅថ្ងៃទី ២៥ ខែតុលាដល់ថ្ងៃទី ៣១ ខែតុលា និងមួយលើកទៀតនៅថ្ងៃទី ៨ ខែវិច្ឆិកាដល់ថ្ងៃទី ១៤ ខែវិច្ឆិកា ។

ក្រសួងនិយាយថា សិស្សសាលាដែលទទួលបានលទ្ធផលវិជ្ជមានពីការធ្វើតេស្ត ART ប៉ុន្តែមានសុខភាពល្អ គួរតែអនុវត្តតាមការណែនាំរបស់ក្រសួងសុខាភិបាល និងធ្វើចត្តាឡីស័ករយៈពេល ៧២ ម៉ោង ខណៈការធ្វើតេស្ត ART ដោយខ្លួនឯងក៏គួរតែត្រូវបានធ្វើឡើងផងដែរ ។

ក្រសួងបាននិយាយទៀតថា “ក្រោយមកសិស្សអាចបញ្ចប់ការធ្វើចត្តាឡីស័ក ហើយត្រឡប់ទៅសាលារៀនវិញ នៅពេលទទួលបានលទ្ធផលអវិជ្ជមានពេលតេស្ត ART រួច ។ ចំណែកអ្នកដែលមិនស្រួលខ្លួនគួរតែស្វែងរកការព្យាបាលនៅមន្ទីរពេទ្យ ឬព្យាបាលនៅផ្ទះ” ។

ជាចុងក្រោយក្រសួងអប់រំបន្ថែមថា “យើងសូមជំរុញឲ្យសិស្សសាលា និងបុគ្គលិកទាំងអស់បន្តអនុវត្តអនាម័យផ្ទាល់ខ្លួនឲ្យបានល្អ និងអនុវត្តទំនួលខុសត្រូវតាមរយៈការធ្វើតេស្តជាប្រចាំនេះ” ។

គួរបញ្ជាក់ថា ប្រទេសសិង្ហបុរីដែលបានដាក់ការរឹតត្បិតពាក់ព័ន្ធនឹងជំងឺកូវីដ ១៩ កាលពីថ្ងៃទី ២៧ ខែកញ្ញា ហើយដើមឡើយគ្រោងនឹងបញ្ចប់នៅថ្ងៃទី ២៤ ខែតុលា ដើម្បីកាត់បន្ថយភាពតានតឹងលើប្រព័ន្ធថែទាំសុខភាពរបស់ប្រទេស ឥឡូវនេះត្រូវបានពន្យារដល់ថ្ងៃទី ២១ ខែវិច្ឆិកា ហើយក្នុងនោះហាមមិនឲ្យមានការជួបជុំគ្នា ២ នាក់ ក៏ដូចជាបន្តធ្វើការងារពីផ្ទះជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ប្រព័ន្ធសុខាភិបាល សិង្ហបុរី កំពុងធ្ងន់ធ្ងរនឹងអ្នកជំងឺកូវីដច្រើនលើសលប់

The post សិង្ហបុរី នឹងធ្វើតេស្តរហ័សរកកូវីដលើសិស្សសាលាបឋមសិក្សារៀងរាល់ ២ សប្ដាហ៍ម្ដង appeared first on Kampuchea Thmey Daily.

តើឧបករណ៍តេស្តរហ័ស និងតេស្ត PCR ខុសគ្នាដូចម្តេច?

Sonya — Fri, 01 Oct 2021 07:27:48 +0000

ឧបករណ៍តេស្តរហ័ស និងឧបករណ៍តេស្ត PCR រកអង់ទីហ្សែនកូវីដ-១៩ ដែលកំពុងដាក់ឲ្យប្រើប្រាស់នៅលើពិភពលោក រួមទាំងនៅកម្ពុជាផង សុទ្ធតែមានគុណសម្បត្តិ និងគុណវិបត្តិរៀងខ្លួនដូចខាងក្រោម៖

ឧបករណ៍តេស្ត PCR

-តម្រូវឱ្យគ្រូពេទ្យឬអ្នកជំនាញជាអ្នកយកសំណាក

-ត្រូវឆ្លងកាត់បន្ទប់ពិសោធន៍

-អាចប្រើប្រាស់បានតែនៅមន្ទីរពេទ្យរដ្ឋឬឯកជនដែលក្រសួងអនុញ្ញាតប៉ុណ្ណោះ

-ត្រូវរង់ចាំលទ្ធផលយ៉ាងហោច ៣ ថ្ងៃ

-ផ្ដល់លទ្ធផលវិជ្ជមានឬអវិជ្ជមានច្បាស់ ១០០ភាគរយ

ឧបករណ៍តេស្តរហ័ស (Rapid Test)

-ងាយស្រួលក្នុងការប្រើប្រាស់ មិនត្រូវការអ្នកជំនាញ ដោយមិនតម្រូវឲ្យឆ្លងកាត់បន្ទប់ពិសោធន៍ និងអាចធ្វើតេស្តដោយខ្លួនឯងបាន

-តម្លៃសមរម្យដែលអាចប្រើប្រាស់បានទូលំទូលាយ

-អាចផ្តល់លទ្ធផលលឿនក្នុងរយៈពេល ១៥ នាទី

– លទ្ធផលតេស្តមិនអាចជឿជាក់ ១០០ ភាគរយ (បើតេស្តវិជ្ជមាន តម្រូវឱ្យតេស្ត PCR ម្ដងទៀត)

-អាកាសយានដ្ឋាន ពហុកីឡាដ្ឋាន ឧទ្យានកម្សាន្ត ការិយាល័យ រោងចក្រ និងតំបន់ដែលមានមនុស្សកុះករជាច្រើនអាចផ្តល់ការធ្វើតេស្តកូវីដ-១៩ យ៉ាងឆាប់រហ័ស ដើម្បីស្វែងរកករណីវិជ្ជមានដែលអាចកើតមាននៅទីតាំងរបស់ខ្លួន។

ទោះបីជាបែបនេះក្តី ឧបករណ៍តេស្តរហ័សគឺជាឧបករណ៍យុទ្ធសាស្ត្រដែលអាចជួយកាត់ផ្តាច់ខ្សែបណ្តាញចម្លងជំងឺកូវីដ-១៩ ហើយប្រសិនបើរកឃើញលទ្ធផលវិជ្ជមាន អ្នកជំងឺត្រូវជូនដំណឹងដល់អាជ្ញាធរដើម្បីទទួលការតេស្តបន្ថែម ក៏ដូចជាស្វែងរកវិធីព្យាបាលដែលត្រឹមត្រូវ៕

អត្ថបទ៖ សន្យា

ចុចអាន៖ តើឧបករណ៍តេស្តរហ័សរកវីរុសកូវីដ-១៩ អាចជឿជាក់ប៉ុន្មានភាគរយ?

ចុចអាន៖ ប្រសិទ្ធភាព និងគុណសម្បត្តិ ឧបករណ៍តេស្តរហ័សអង់ទីហ្សែនកូវីដ-១៩

The post តើឧបករណ៍តេស្តរហ័ស និងតេស្ត PCR ខុសគ្នាដូចម្តេច? appeared first on Kampuchea Thmey Daily.