ឧស្ម័នធម្មជាតិពង្រាវ Archives - Kampuchea Thmey Daily

ថៃគ្រោងបង្កើនការនាំចូលឧស្ម័នធម្មជាតិពីអាមេរិក ដល់ ២,២ លានតោន/ឆ្នាំ

Huon Dina — Thu, 01 May 2025 07:11:02 +0000

រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira បានឱ្យដឹងថា ប្រទេសថៃគ្រោងបង្កើនការទិញឧស្ម័នធម្មជាតិពង្រាវ (LNG) ពីសហរដ្ឋអាមេរិកដល់ ២,២ លានតោន/ឆ្នាំ ក្នុងរយៈពេល ៥ ឆ្នាំ ពីត្រឹម ១ លានតោន ក្រោមកិច្ចសន្យានាពេលបច្ចុប្បន្ន។ នេះបើតាមការចុះផ្សាយរបស់កាសែតបាងកកប៉ុស្តិ៍។

ការបង្កើនការទិញនេះ គឺជាផ្នែកមួយនៃកិច្ចប្រឹងប្រែងរបស់រដ្ឋាភិបាលថៃ ក្នុងការកាត់បន្ថយអតិរេកពាណិជ្ជកម្មជាមួយសហរដ្ឋអាមេរិក ដើម្បីជាការចរចាជុំវិញបញ្ហាពន្ធគយបដិការ ៣៦ ភាគរយ ដែលប្រធានាធិបតី ដូណាល់ ត្រាំ ដាក់លើប្រទេសថៃ។

ក្រុមហ៊ុនប្រេង និងឧស្ម័នជាតិថៃ PTT បានចុះហត្ថលេខាលើកិច្ចសន្យារយៈពេល ១៥ ឆ្នាំ ជាមួយអ្នកផ្គត់ផ្គង់នៅសហរដ្ឋអាមេរិក សម្រាប់ការផ្គត់ផ្គង់ LNG ចំនួន ១ លានតោន/ឆ្នាំ ក្រោមតម្លៃ ៥០០ លានដុល្លារ ដោយចាប់ផ្តើមពីឆ្នាំ ២០២៦។ ថៃបាននាំចូល LNG ប្រហែល ១០ លានតោន/ឆ្នាំ ភាគច្រើនមកពីមជ្ឈិមបូព៌ា សម្រាប់រោងចក្រថាមពល និងការប្រើប្រាស់ផ្សេងៗទៀត។

តាមការឱ្យដឹងនៅថ្ងៃព្រហស្បតិ៍នេះរបស់លោក Pichai ប្រហែល ៦០ ភាគរយ នៃឧស្ម័នធម្មជាតិទាំងអស់ ដែលប្រើប្រាស់ក្នុងប្រទេសថៃ ត្រូវបាននាំចូល ខណៈអត្រានេះមានចំនួន ៩០ ភាគរយ សម្រាប់ប្រេងឆៅ៕

The post ថៃគ្រោងបង្កើនការនាំចូលឧស្ម័នធម្មជាតិពីអាមេរិក ដល់ ២,២ លានតោន/ឆ្នាំ appeared first on Kampuchea Thmey Daily.

អាមេរិកបង្កើនការនាំចេញឧស្ម័នធម្មជាតិពង្រាវទៅចិន មុន ត្រាំ ឡើងកាន់អំណាច

Huon Dina — Wed, 20 Nov 2024 07:45:22 +0000

សហរដ្ឋអាមេរិកបានបង្កើនការនាំចេញឧស្ម័នធម្មជាតិពង្រាវទៅឱ្យប្រទេសចិននៅឆ្នាំនេះ ខណៈមានក្ដីបារម្ភពីភាពកាន់តែតានតឹងនៃជម្លោះពាណិញ្ជកម្ម ពេលលោក ដូណាល់ ត្រាំ ឡើងកាន់អំណាចជាប្រធានាធិបតីអាមេរិកជាថ្មី។ នេះបើតាមការចុះផ្សាយរបស់សារព័ត៌មាន Bloomberg។

ទិន្នន័យគយចិន ដែលចេញផ្សាយកាលពីថ្ងៃពុធនេះ បានបង្ហាញថា ការនាំចូលឧស្ម័នធម្មជាតិពង្រាវរបស់ចិនពីសហរដ្ឋអាមេរិក បានកើនឡើងរហូតដល់ជាង ៦៣ ភាគរយ ក្នុងរយៈពេល១០ខែដើមឆ្នាំនេះ ធៀបនឹងរយៈពេលដូចគ្នាកាលពីឆ្នាំមុន។ ការណ៍នេះ បានធ្វើឱ្យអាមេរិកក្លាយជាប្រទេសទី៥ ដែលជាប់ក្នុងបញ្ជីអ្នកផ្គត់ផ្គង់ឧស្ម័នធម្មជាតិពង្រាវដល់ចិនធំជាងគេ ដោយឈរនៅពីក្រោយអូស្ត្រាលី កាតា រុស្ស៊ី និងម៉ាឡេស៊ី។

អាមេរិកបាននាំចេញឧស្ម័នធម្មជាតិពង្រាវទៅចិន ប្រមាណ ៣,៩ លានតោន គិតមកទល់ពេលនេះ ឆ្នាំនេះ។ ទោះបីជាចំនួនដដែលបង្ហាញពីកំណើនគួរឱ្យកត់សម្គាល់ក្ដី វារួមចំណែកត្រឹមតែប្រមាណ ៦ ភាគរយ នៃការនាំចូលឧស្ម័នធម្មជាតិពង្រាវសរុបរបស់ចិនប៉ុណ្ណោះ។

យ៉ាងណាមិញ យោងតាមការចុះផ្សាយរបស់ Bloomberg អ្នកនាំចូលរបស់ចិន បានចុះកិច្ចសន្យានាំចូលឧស្ម័នធម្មជាតិពង្រាវពីសហរដ្ឋអាមេរិក ប្រមាណ ១៤ លានតោន ចាប់ពីឆ្នាំ ២០២៦ ទៅ។

អ្នកវិភាគខ្លះលើកឡើងថា កំណើននៃការនាំចូលឧស្ម័នធម្មជាតិទៅចិន អាចគ្រាន់តែជាបណ្ដោះអាសន្នប៉ុណ្ណោះ ដោយអាចធ្លាក់ចុះមកវិញ ដោយសារតែគោលនយោបាយពន្ធរបស់លោក ត្រាំ។ ប្រសិនបើរដ្ឋបាល ត្រាំ នឹងអនុវត្តការដំឡើងពន្ធ ៦០ ភាគរយ លើទំនិញនាំចូលពីចិន ដូចការគំរាមរបស់ ត្រាំ មែននោះ នោះចិនអាចនឹងសងសឹកទៅលើសហរដ្ឋអាមេរិកវិញ ដោយកំណត់គោលដៅលើមុខទំនិញផ្សាយៗ រួមទាំងឧស្ម័ន។

រូបភាពបែបនេះ បានកើតឡើងក្នុងអំឡុងសង្គ្រាមពាណិជ្ជកម្មនៅអាណត្តិមុនរបស់លោក ត្រាំ រួចហើយ ដែលកាលនោះ វាបានធ្វើឱ្យមានការរំខានខ្លាំងដល់ការផ្គត់ផ្គង់ឧស្ម័នពីអាមេរិកទៅចិនស្ទើរតែពេញមួយឆ្នាំ ២០១៩៕

The post អាមេរិកបង្កើនការនាំចេញឧស្ម័នធម្មជាតិពង្រាវទៅចិន មុន ត្រាំ ឡើងកាន់អំណាច appeared first on Kampuchea Thmey Daily.

TotalEnergies៖ ការផ្គត់ផ្គង់ឧស្ម័នធម្មជាតិពង្រាវវគ្គថ្មី នឹងពន្យារដល់ឆ្នាំ ២០២៧

Huon Dina — Wed, 23 Oct 2024 02:57:04 +0000

អនុប្រធានជាន់ខ្ពស់របស់ក្រុមហ៊ុនថាមពល TotalEnergies លោក Gregory Joffroy បានឱ្យដឹងកាលពីថ្ងៃអង្គារថា ការផ្គត់ផ្គង់ឧស្ម័នធម្មជាតិពង្រាវ (LNG) សម្រាប់វគ្គបន្ទាប់ថ្មី នឹងត្រូវពន្យារពេលរហូតដល់ឆ្នាំ ២០២៧ ដោយយឺតយ៉ាវជាងការរំពឹងទុក ដោយសារតែគម្រោងពាក់ព័ន្ធផ្សេងៗត្រូវបានពន្យារ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោក Joffroy បាននិយាយក្នុងសន្និសីទ Asia Gas Markets ថា៖ «[ទស្សនវិស័យ] សម្រាប់រយៈពេលខ្លី យើងឃើញគម្រោង LNG មួយចំនួនដែលគ្រោងនឹងចេញលក់ក្នុងប៉ុន្មានខែខាងមុខនេះ ត្រូវបានពន្យារពេល។ កាលបរិច្ឆេទចាប់ផ្តើមពិតប្រាកដ នឹងប៉ះពាល់ដល់សមតុល្យឧស្ម័ន និងការផ្គត់ផ្គង់»។

លោកបន្តថា៖ «ក្នុងរយៈពេលវែង វាច្បាស់ណាស់ថា យើងនឹងមានវគ្គផ្គត់ផ្គង់ថ្មីនៅឆ្នាំ ២០២៧ រហូតដល់ឆ្នាំ ២០៣០»។

នៅសហរដ្ឋអាមេរិក កង្វះកម្លាំងពលកម្មជំនាញ អតិផរណាពីកំណើនប្រាក់ឈ្នួលដ៏រឹងមាំ និងកង្វះខាតឧបករណ៍សម្រាប់រោងចក្រផលិត LNG បានដាក់សម្ពាធដល់ក្រុមហ៊ុនផលិត LNG និងពន្យារពេលគម្រោងមួយចំនួននៅអាមេរិក ខណៈការផ្អាករបស់លោកប្រធានាធិបតី Joe Biden លើការអនុម័តគម្រោងនាំចេញ LNG ថ្មីនៅខែមករា ក៏បានបង្កើតភាពមិនច្បាស់លាស់ផងដែរ។

លោក Joffroy រំពឹងថា តម្រូវការ LNG នឹងកើនឡើងខ្ពស់នៅឆ្នាំ ២០៣៥ ពីកម្រិតនៃការប្រើប្រាស់បច្ចុប្បន្ន៕

The post TotalEnergies៖ ការផ្គត់ផ្គង់ឧស្ម័នធម្មជាតិពង្រាវវគ្គថ្មី នឹងពន្យារដល់ឆ្នាំ ២០២៧ appeared first on Kampuchea Thmey Daily.

ឧស្ម័នធម្មជាតិពង្រាវ Archives - Kampuchea Thmey Daily

ថៃគ្រោងបង្កើនការនាំចូលឧស្ម័នធម្មជាតិពីអាមេរិក ដល់ ២,២ លានតោន/ឆ្នាំ

អាមេរិក​​បង្កើន​ការ​នាំចេញឧស្ម័នធម្មជាតិពង្រាវ​ទៅ​ចិន​ មុន​ ត្រាំ​ ឡើង​កាន់​អំណាច​

TotalEnergies៖ ការផ្គត់ផ្គង់ឧស្ម័នធម្មជាតិពង្រាវវគ្គថ្មី​ នឹង​ពន្យារដល់ឆ្នាំ​ ២០២៧

អាមេរិកបង្កើនការនាំចេញឧស្ម័នធម្មជាតិពង្រាវទៅចិន មុន ត្រាំ ឡើងកាន់អំណាច

TotalEnergies៖ ការផ្គត់ផ្គង់ឧស្ម័នធម្មជាតិពង្រាវវគ្គថ្មី នឹងពន្យារដល់ឆ្នាំ ២០២៧