ថ្លែង​នៅ​ក្នុង​ពិធី​បិទបញ្ចប់គម្រោងមេគង្គ-ឡានឆាង ដោយពង្រឹងសមត្ថភាពអ្នកជំនាញប្រព័ន្ធគ្រប់គ្រងគុណភាព នៅប្រទេសកម្ពុជា ឡាវ មីយ៉ាន់ម៉ា នៅ​ថ្ងៃ​ទី​២៣ ខែ​ធ្នូ ឆ្នាំ​២០២៥ នេះ លោក រដ្ឋមន្ត្រី ហែម វណ្ណឌី បាន​មាន​ប្រសាសន៍​ថា ស្តង់ដារ​បានដើរតួយ៉ាងសំខាន់នៅក្នុងចរន្តពាណិជ្ជកម្មអន្តរជាតិ។ ជាក់ស្តែង ស្តង់ដារ ISO 9001:2015 ស្តីពីប្រព័ន្ធគ្រប់គ្រងគុណភាព ត្រូវបានប្រើជាចលករប្រកួតប្រជែងគន្លឹះ ដើម្បីបង្កើត​កាលានុវត្តភាព​សម្រាប់​ឧស្សាហកម្ម​ផលិត អាជីវកម្ម​នាំ​ចេញ រួម​ទាំង​អ្នក​ចែកចាយ​ទំនិញ ឬ​ផលិតផល​នៅ​លើទីផ្សារ សម្រាប់​ធ្វើការ​ប្រកួតប្រជែង និង​កសាង​ទំនុក​ចិត្ត​របស់​អ្នកប្រើប្រាស់ និងអាជ្ញាធរពាក់ព័ន្ធ។

លោក​រដ្ឋមន្ត្រី បានបន្ថែមថា ស្តង់ដារ ISO 9001:2015 ផ្តោតទៅលើទំនួលខុសត្រូវ និងគណនេយ្យភាពស្ថាប័ន​ទាំងមូល ចាប់ពីប្រធានអង្គភាពរហូតដល់បុគ្គលិក តាមច្រវាក់ផលិតកម្ម និងដំណើរការនីមួយៗ ដើម្បីធានា​បាន​នូវ​ផលិតផល​សម្រេច​ដែល​អនុលោម​ទៅ​តាម​ស្តង់ដារ បទប្បញ្ញត្តិបច្ចេកទេស និង​លក្ខខណ្ឌ​តម្រូវ​ទីផ្សារ​ពាក់ព័ន្ធ។

គម្រោងនេះ​បានបណ្តុះបណ្តាលអ្នកជំនាញ ដែលត្រូវបានវាយតម្លៃជាអន្តរជាតិពីស្ថាប័នវិជ្ជាជីវៈផ្នែកគុណភាព Chartered Quality Institute ដោយជោគជ័យ ក្នុងនោះមានគ្រូបង្គោលចំនួន ១៥ នាក់ ដែល ១០ នាក់​មកពី​ប្រទេសកម្ពុជា ២ នាក់មកពីប្រទេសឡាវ និង ៣ នាក់មកពីមីយ៉ាន់ម៉ា ព្រមទាំងអ្នកដឹកនាំសវនករចំនួន ១០ នាក់ ដែលមាន ៧ នាក់ ជាជនជាតិខ្មែរ។

ក្នុង​ឱកាស​នោះ​ដែរ លោក ចាន់ សុផា អគ្គនាយកវិទ្យាស្ថានស្តង់ដារកម្ពុជា បានលើកឡើងថា គម្រោងនេះ​បាន​កសាង​មូលដ្ឋាន​គ្រឹះដ៏រឹងមាំ​សម្រាប់​ការលើកកម្ពស់​ប្រព័ន្ធ​គ្រប់គ្រង​គុណភាព​ប្រកប​ដោយ​និរន្តរភាព​នៅ​ក្នុងតំបន់។

លោក​បានបន្តថា តាមរយៈការបណ្តុះបណ្តាលគ្រូបង្គោល និងអ្នកដឹកនាំ​សវនករ​សម្រាប់​​ប្រព័ន្ធ​គ្រប់គ្រងគុណភាព ISO 9001: 2015 ដែលទទួលស្គាល់ជាអន្តរជាតិនេះ យើងកំពុងពង្រឹងសមត្ថភាពថ្នាក់ជាតិ និងតំបន់ ដើម្បីគាំទ្ររោងចក្រ-សហគ្រាស និងសិប្បកម្មនានា ក្នុងការអនុវត្តប្រព័ន្ធគ្រប់គ្រងគុណភាព ដែលបំពេញតាមតម្រូវការទីផ្សារអន្តរជាតិ។

សូម​ជម្រាប​ថា គម្រោងបណ្តុះបណ្តាលគ្រូបង្គោល និងអ្នកដឹកនាំសវនករសម្រាប់ប្រព័ន្ធគ្រប់គ្រងគុណភាព ISO 9001:2015 ត្រូវបានអនុវត្តដោយវិទ្យាស្ថានស្តង់ដារកម្ពុជា ក្រោមក្របខ័ណ្ឌកិច្ចសហប្រតិបត្តិការ មេគង្គ-ឡានឆាង ក្នុងគោលបំណងរួមចំណែកដល់ការកសាងប្រព័ន្ធគ្រប់គ្រងគុណភាពកាន់តែរឹងមាំ និង​លើក​កម្ពស់​ការ​អភិវឌ្ឍ​សេដ្ឋកិច្ច​ប្រកប​ដោយ​និរន្តរភាព​សម្រាប់​ប្រទេស មេគង្គ-ឡានឆាង ទាំងបី៕

The post រដ្ឋមន្ត្រីឧស្សាហកម្ម៖ ISO 9001:2015 ត្រូវបានប្រើជាចលករប្រកួតប្រជែងសម្រាប់ឧស្សាហកម្មផលិត appeared first on Kampuchea Thmey Daily.

លោក ស៊ុន ចាន់ថុល បានថ្លែងសុន្ទរកថា គន្លឹះនៅក្នុងកិច្ចប្រជុំកំពូលខ្សែក្រវាត់ និងផ្លូវ លើកទី១០ នៅទីក្រុងហុងកុង សាធារណរដ្ឋប្រជាមានិតចិននៅថ្ងៃទី ១០ ខែកញ្ញា ឆ្នាំ ២០២៥។

កិច្ចប្រជុំកំពូលខ្សែក្រវាត់ និងផ្លូវ លើកទី១០ បានប្រមូលផ្ដុំទៅដោយមន្ត្រីជាន់ខ្ពស់នៃរដ្ឋាភិបាល ថ្នាក់ដឹកនាំធុរកិច្ច វាគ្មិនអន្តរជាតិ និងអ្នកចូលរួមប្រមាណ ៦០០០នាក់ ពី៧០ប្រទេសទូទាំងពិភពលោក។

គម្រោងវិនិយោគប្រមាណ ២៩០គម្រោង និងការផ្គូផ្គងធុរកិច្ចច្រើនជាង៨០០ ត្រូវបានបង្ហាញ និងរៀបចំឡើងតាមរយៈកិច្ចប្រជុំនេះ។ កិច្ចប្រជុំកំពូលខ្សែក្រវាត់ និងផ្លូវ គឺជាវេទិកាអន្តរជាតិដ៏សំខាន់មួយសម្រាប់លើកកម្ពស់កិច្ចសហប្រតិបត្តិការពហុភាគី និងឱកាសអាជីវកម្ម។

លោកឧបនាយករដ្ឋមន្រ្តី បានបង្ហាញអំពីការចូលរួមយ៉ាងសំខាន់របស់គំនិតផ្តួចផ្តើមខ្សែក្រវាត់ និងផ្លូវ ចំពោះការអភិវឌ្ឍសេដ្ឋកិច្ចសង្គម ពិសេសគឺការចូលរួមកសាងមូលដ្ឋានគ្រឹះសម្រាប់កំណើនហេដ្ឋារចនាសម្ព័ន្ធរបស់កម្ពុជា។

កិច្ចសហប្រតិបត្តិការនេះបានជួយជំរុញកម្ពុជាពង្រឹងសេដ្ឋកិច្ចកាន់តែប្រសើរឡើង និងកសាងបានហេដ្ឋារចនាសម្ព័ន្ធទាំងផ្លូវគោក ផ្លូវអាកាស និងផ្លូវទឹកផងដែរ។

គម្រោងគួរជាទីចាប់អារម្មណ៍មានជាអាទិ៍ ផ្លូវល្បឿនលឿនភ្នំពេញ-ក្រុងព្រះសីហនុ, ព្រលានយន្តហោះអន្តរជាតិសៀមរាបអង្គរ, អាកាសយានដ្ឋានអន្តរជាតិភ្នំពេញតេជោ, និងគម្រោងព្រែកជីកហ្វូណនតេជោជាដើម។

កំណើនសេដ្ឋកិច្ចកម្ពុជាបានកើនឡើងគួរឱ្យកត់សម្គាល់ដោយមានការចូលរួមជំរុញពីផលិតកម្ម, កសិកម្ម, សំណង់, និងសេវាកម្មជាដើម។ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគចំនួន ៤១៤គម្រោង កាលពីឆ្នាំ២០២៤ ហើយសម្រាប់រយៈពេល ៨ខែដំបូងឆ្នាំ២០២៥នេះបានអនុម័តចំនួន ៤៩១គម្រោង។

ការកើនឡើងយ៉ាងច្រើននៃចំនួនគម្រោង​វិនិយោគនេះអាចសម្រេចបានលុះត្រាណាតែរាជរដ្ឋាភិបាលកម្ពុជាទទួលបានការទុកចិត្តពីវិនិយោគិន។ ចក្ខុវិស័យកម្ពុជាឆ្នាំ២០៥០ បានផ្ដោតលើធនធានមនុស្ស និងនិរន្តរភាពជាស្នូលសម្រាប់ការអភិវឌ្ឍ។

តាមរយៈអាស៊ាន និងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) កម្ពុជាកំពុងជួយជំរុញសមាហរណកម្មពាណិជ្ជកម្ម ធ្វើពិពិធកម្មខ្សែច្រវាក់ផ្គត់ផ្គង់ និងកសាងមូលដ្ឋានគ្រឹះនៃកំណើនរយៈពេលវែង។

កម្ពុជាជឿជាក់ថាអាស៊ាន រួមជាមួយនឹងកិច្ចសហប្រតិបត្តិការខ្សែក្រវាត់ និងផ្លូវ នឹងផ្តល់នូវមាគ៌ាយ៉ាងល្អឆ្ពោះទៅរកវិបុលភាពរួមគ្នាសម្រាប់ប្រជាជន ៦៨០លាននាក់នៅក្នុងអាស៊ាន និង ២,៣ពាន់លាននាក់នៅក្នុងតំបន់ ដូចសុភាសិតចិនបានពោលថា “បើចង់ទៅលឿន ត្រូវដើរម្នាក់ឯង បើចង់ទៅបានឆ្ងាយ ត្រូវដើរទៅជាមួយគ្នា”៕

The post ​កម្ពុជា​កំពុង​ធ្វើ​ពិពិធ​កម្ម​ទៅ​រក​ប្រភេទ​ឧស្សាហកម្ម​ មានតម្លៃ​បន្ថែម​ខ្ពស់​ appeared first on Kampuchea Thmey Daily.

នៅថ្ងៃទី ០៨ ខែមករា ឆ្នាំ ២០២៥ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានចូលរួមក្នុងកិច្ចប្រជុំពិភាក្សាលើសេចក្តីព្រាងរបាយការណ៍ ស្តីពីវឌ្ឍនភាពនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា IDP ក្នុងឆ្នាំ២០២១-២០២៣ ក្រោមវត្តមានលោកបណ្ឌិតសភាចារ្យ អូន ព័ន្ធមុនីរ័ត្ន ឧប​នាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (គ.ស.ហ.)។

យោងតាមសេចក្ដីប្រកាសព័ត៌មាន លទ្ធផលកិច្ចប្រជុំពិភាក្សារបស់គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បញ្ជាក់ថា គោលបំណងនៃកិច្ចប្រជុំរៀបចំឡើងដើម្បី ទី ១ ពិនិត្យ ពិភាក្សា និងផ្ដល់ធាតុចូល លើសេចក្តីព្រាងរបាយការណ៍ ស្តីពីវឌ្ឍនភាពនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា IDP ក្នុងឆ្នាំ២០២១-២០២៣ ទី២ ពិនិត្យ ផ្ដល់អនុសាសន៍ជំរុញការអនុវត្តវិធានការ ដែលនៅសេសសល់ និងមានភាពយឺតយ៉ាវ និងទី ៣ ផ្ដល់អនុសាសន៍ណែនាំក្នុងការត្រៀមរៀបចំរបាយការណ៍វាយតម្លៃ ចុងអាណត្តិនៃការអនុវត្តគោលនយោបាយ IDP។

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងពីចក្ខុវិស័យរបស់រាជរដ្ឋាភិបាលក្នុងការអភិវឌ្ឍវិស័យឧស្សាហកម្មកម្ពុជា ដែលផ្ដោតលើការជំរុញ កែប្រែ និងធ្វើទំនើបកម្មរចនាសម្ព័ន្ធឧស្សា​ហកម្ម ឧស្សាហកម្មអតិពលកម្មឱ្យឈានទៅរកឧស្សាហកម្មផ្អែកលើជំនាញ, ការធ្វើពិពិធកម្មសេដ្ឋកិច្ច, ការពង្រឹងភាពប្រកួតប្រជែង និងលើកកម្ពស់ផលិតភាពសេដ្ឋកិច្ច ឆ្លើយតបទៅនឹងការប្រែប្រួលរចនាសម្ព័ន្ធសេដ្ឋកិច្ចក្នុងស្រុក និងសភាពការណ៍ប្រែប្រួលនៃនិម្មាបនកម្មសេដ្ឋកិច្ចតំបន់ និងសកល៕

The post វិស័យឧស្សាហកម្មកម្ពុជា កំពុងងើបឡើងគួរឱ្យ​កត់​សម្គាល់ appeared first on Kampuchea Thmey Daily.

លោក​ កែវ​ រតនៈ​ រដ្ឋមន្រ្តីក្រសួងរ៉ែ​ និងថាមពលបានបញ្ជាក់ប្រាប់ឱ្យដឹងនៅថ្ងៃទី ១៩ ខែមិថុនានេះថា រោងចក្រនេះ បានដក​ប្រតិបត្តិការ​មួយចំនួនចេញពីប្រទេសសិង្ហបុរី មកម្ពុជាដោយសម្លឹងឃើញសក្ដានុពល ការគាំទ្រថា​មពលអគ្គិសនី ខណៈកម្ពុជាកំពុងផលិតថាមពលអគ្គិសនីករកើត​ឡើងវិញ​ច្រើនលើសលប់ ដែលមានភាពការទាក់ទាញ។

លោក​ កែវ​ រតនៈ បញ្ជាក់ថា ថាមពលកកើតឡើងវិញ ដែលជាថាមពលចេញពីពន្លឺព្រះអាទិត្យ នឹងក្លាយជាជន្ទល់ធ្វើឱ្យរោងក្រដំណើរការនៅកម្ពុជា។

សូមជំរាបថា ក្រុមហ៊ុន Minebea Mitsumi បានបើកដំណើរការអាជីវកម្មរបស់ខ្លួនដំបូងនៅកម្ពុជា កាលពី​ឆ្នាំ២០១១ វិនិយោគ​លើមុខសញ្ញាផលិតម៉ូទ័រខ្នាតតូច ម៉ូទ័រកង្ហារ គ្រឿងបំណែកម៉ាស៊ីន ឧបករណ៍អុបទិចសម្រាប់ទូរសព្ទ ប៊ិកអេឡិច​ត្រូនិក ឧបករណ៍រំញ័រសម្រាប់ហ្គេមកុំព្យូទ័រ គ្រឿងបង្គុំសៀគ្វីអេឡិចត្រូនិក ផ្ទាំងបញ្ចេញពន្លឺ LED ឧបករណ៍វាស់ជាតិស្ករក្នុងឈាម និងប្រព័ន្ធអំពូលភ្លើងសាធារណៈឆ្លាតវៃ។ បច្ចុប្បន្នក្រុមហ៊ុន Minebea កំពុងផ្ដល់ឱកាស​ការងារជូនប្រជាពលរដ្ឋជិត ៧ ពាន់នាក់៕

អត្ថបទ៖ ឡេង ដេត

The post ក្រុមហ៊ុនខ្នាតយក្សជប៉ុន ត្រៀមសាង​សង់រោងចក្រ​ទី២ នៅខេត្តពោធិ៍សាត់ ជាមួយទុន​វិនិយោគ​ជាង ៦៥០ លានដុល្លារ appeared first on Kampuchea Thmey Daily.

​លោកRuan Linbing អនុប្រធានក្រុមហ៊ុនJack Technology​

ថ្លែង​ក្នុង​ព្រឹត្តិការណ៍​សម្ពោធ​ផលិតផល​សកល​របស់​ក្រុមហ៊ុន​ កាលពី​ថ្ងៃទី​១៦​ ខែមិថុនា ​ឆ្នាំ​២០២៤​លោក Ruan Linbing អនុប្រធាន​ក្រុមហ៊ុន​Jack Technology បាន​មានប្រសាសន៍ថា បច្ចុប្បន្ន​មាន​រោងចក្រ​កាត់ដេរ​កាន់តែច្រើន​ប្រើប្រាស់​ម៉ាស៊ីនដេរ​ម៉ាក Jack ដោយ​ក្រុមហ៊ុន​បានផ្តល់​នូវ​សេវាកម្ម​ដំណោះស្រាយ​យ៉ាង​ល្អឥតខ្ចោះ ដើម្បី​ជួយ​បង្កើន​ផលិតភាព​របស់​រោងចក្រ​ទាំងនោះ​។

លោក​បាន​បន្តថា​ តាម​គម្រោង​យើង​នឹង​នាំចូល​ម៉ាស៊ីនដេរ​ម៉ាក Jack​ចំនួន​ពី​២​ម៉ឺន​ន​ទៅ​៣​ម៉ឺន​គ្រឿង​ដែលមាន​តម្លៃ​ប្រមាណ​១០​លាន​ដុល្លារ​មកកាន់​ទីផ្សារ​កម្ពុ​ជា​ដើម្បី​ចូលរួម​លើ​កម្ពស់​ផលិតភាព​វិស័យ​កាត់ដេរ​នៅ​កម្ពុជា​កាន់តែ​ប្រសើរឡើង​បន្ថែមទៀត​ ខណៈ​បច្ចុប្បន្ននេះ​យើង​នាំចូល​មកកាន់​ទីផ្សារ​ក​ម្ពុ​ជា​ក្នុង​មួយឆ្នាំៗ​មាន​កំណើន​ជា​មធ្យម​ពី​២០%​ទៅ​៣០%​។

ចំណែក លោក​Kong Bai fan អនុប្រធាន​សមាគម​វាយ​ន​ភណ្ឌ​កម្ពុជា​ចិន​និង​ជា​សមាជិក​ក្រុមប្រឹក្សា​សមាគម​វាយ​ន​ភណ្ឌ សំលៀកបំពាក់ ស្បែកជើង និង​ផលិតផល​ធ្វើដំណើរ​នៅ​កម្ពុជា (TAFTAC)​បាន​មានប្រសាសន៍ថា ឧស្សាហកម្ម​កាត់ដេរ និង​ឧស្សាហកម្ម​ឧបករណ៍​ដេរ​តែងតែ​ជា​ឧស្សាហកម្ម​ពីរ​ដែលមាន​ទំនាក់ទំនង​យ៉ាង​ជិតស្និទ្ធ ការពង្រឹង​គ្នា​ទៅវិញទៅមក និង​ស៊ីមេទ្រី​ជាមួយគ្នា​។

​លោក​បាន​បន្ត​ថា ​«​ការខិតខំ​ប្រឹងប្រែងរ​បស់ Jack ក្នុង​វិស័យ​ឧបករណ៍​កាត់ដេរ​បាន​ចូលរួម​ក្នុងការ​អភិវឌ្ឍ​គុណភាព​ខ្ពស់​របស់​ឧស្សាហកម្ម ដែល​ប្រាកដជា​នឹង​ជំរុញ​ឱ្យមាន​ការរីកចម្រើន​ជារួម​នៃ​ឧស្សាហកម្ម​កាត់ដេរ និង​បង្កើត​គុណសម្បត្តិ​ថ្មីៗ​នៅក្នុង​វិស័យ​ឧស្សាហកម្ម​កាត់ដេរ​»​។

លោក Kong Bai fan អនុប្រធាន​សមាគមវាយន​ភណ្ឌកម្ពុជា​ចិន​ និង​ជាសមាជិកក្រុមប្រឹក្សាសមាគមវាយនភណ្ឌ សម្លៀក​បំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC)

លោក​បាន​បង្ហាញ​នូវ​ក្តី​សង្ឃឹមថា សហគ្រាស​កាត់ដេរ​ទាំង​អស់​នឹង​បន្ត​គាំទ្រ​ដល់​ឧស្សាហកម្ម​កាត់ដេរ​កម្ពុ​ជា គាំទ្រ​គំនិត​ច្នៃប្រឌិត វិធានការ​ច្នៃប្រឌិត និង​ផលិតផល​ប្រកបដោយ​ភាព​ច្នៃប្រឌិត​របស់​សហគ្រាស​កាត់ដេរ ចែករំលែក​ឱកាស​ថ្មី​សម្រាប់​ការ​អភិវឌ្ឍ​ក្នុង​កិច្ចសហប្រតិបត្តិការ​ខ្សែ​សង្វាក់​ឧស្សាហកម្ម និង​ស្វែងរក​ការ​ឈ្នះ​-​ឈ្នះ​។​ព្រោះថា​ម៉ាស៊ីនដេរ​នេះ​នឹង​ដើរ​តួនាទី​ឈានមុខ​គេ​ក្នុង​ការបង្ហាញ និង​ភាពជា​អ្នកដឹកនាំ​នៃ​សហគ្រាស​ឈានមុខ​ជំរុញ​ការផ្លាស់ប្តូរ​សហគ្រាស​សំលៀ​ក​បំពាក់​ខ្នាត​តូច និង​មធ្យម ឱ្យមាន​ភាព​បត់បែន និង​លើកកម្ពស់​ការធ្វើ​ឌីជីថល​នីយកម្ម​៕

​អត្ថបទ​ ៖​ សំអឿន

The post ក្រុមហ៊ុន​ចិន​មួយ​នឹង​នាំ​ចូល​ម៉ាស៊ីនដេរ​ប្រើ​បច្ចេកវិទ្យា​ទំនើប​មកកាន់​ទីផ្សារ​ក​ម្ពុ​ជា ​លើកកម្ពស់​ផលិតភាព​ក្នុង​ឧស្សាហកម្ម​កាត់ដេរ appeared first on Kampuchea Thmey Daily.

សេចក្ដីប្រកាសព័ត៌មានដដែលបានឱ្យដឹងថា លោក ហាន់ ដុកស៊ូ បានសម្តែងនូវកិច្ចស្វាគមន៍យ៉ាងកក់ក្តៅចំពោះការអញ្ជើញបំពេញទស្សនកិច្ចផ្លូវការរបស់ សម្តេចធិបតី ហ៊ុន ម៉ាណែត និងគណៈប្រតិភូជាន់ខ្ពស់ នៃរាជរដ្ឋាភិបាលកម្ពុជា នៅក្នុងសាធារណរដ្ឋកូរ៉េ និងបានរំលេចអំពីការឯកភាពដំឡើងនូវកម្រិតទំនាក់ទំនងកូរ៉េ-កម្ពុជាឈានដល់កម្រិត “ភាពជាដៃគូយុទ្ធសាស្រ្ត” ដែលនេះនឹងចូលរួមចំណែកក្នុងការពង្រឹងនូវទំនាក់ទំនង និងកិច្ចសហប្រតិបត្តិការលើវិស័យនានារវាងប្រទេសទាំងពីរ។

លោកនាយករដ្ឋមន្រ្តីកូរ៉េ បានបញ្ជាក់ជូនសម្តេចធិបតី ថា កម្ពុជាគឺជាទិសដៅនៃការវិនិយោគ និងជាទីផ្សារដ៏មានសក្ដានុពលសម្រាប់វិស័យឧស្សាហកម្មកូរ៉េ ជាពិសេសឧស្សាហកម្មយានយន្ត ហើយលោក ក៏បានសម្តែងនូវការគាំទ្រ និងពេញចិត្តចំពោះគំនិតផ្តួចផ្តើមរបស់សម្តេចធិបតី ក្នុងការបង្កើតតំបន់សេដ្ឋកិច្ចពិសេសសម្រាប់ក្រុមហ៊ុនកូរ៉េ និងការជំរុញឱ្យមានយន្តការនៃការជួបពិគ្រោះយោបល់ជាទៀងទាត់រវាងសមាគមធុរកិច្ចកូរ៉េនៅកម្ពុជា និងបានបង្ហាញនូវក្តីរីករាយក្នុងការបង្កើនជំនួយអភិវឌ្ឍន៍ផ្លូវការបន្ថែម តាមរយៈហិរញ្ញប្បទានឥតសំណង របស់ទីភ្នាក់ងារសហប្រតិបត្តការអន្តរជាតិកូរ៉េ (KOICA)  និងឥណទានសម្បទានតាមរយៈមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF Loan)។

ជាការឆ្លើយតប សម្តេចធិបតី បានសម្តែងនូវក្តីសោមនស្សរីករាយដែលបានជួបពិភាក្សាការងារជាមួយលោកនាយករដ្ឋមន្រ្តីកូរ៉េ ព្រមទាំងបានវាយតម្លៃខ្ពស់ចំពោះទំនាក់ទំនងនិងកិច្ចសហប្រតិបត្តិការរវាងកម្ពុជា-កូរ៉េ ដែលបានឈានដល់កម្រិត “ភាពជាដៃគូយុទ្ធសាស្រ្ត” ដែលជាទំនាក់ទំនងដ៏ល្អប្រសើរ។ សម្តេចធិបតីបានកោតសរសើរចំពោះការចូលរួមចំណែកយ៉ាងសកម្មរបស់រដ្ឋាភិបាលកូរ៉េ ក្នុងការកសាង និងអភិវឌ្ឍន៍សង្គម-សេដ្ឋកិច្ចកម្ពុជានាពេលកន្លងមក។

 ទន្ទឹមនោះ សម្តេចធិបតីក៏បានជម្រាបជូនលោកនាយករដ្ឋមន្រ្តីកូរ៉េថា វិស័យឯកជនមានសារៈសំខាន់ណាស់ក្នុងការអភិវឌ្ឍប្រទេសកម្ពុជា ដោយការ ពង្រឹងតួនាទីរបស់វិស័យឯកជននឹងធ្វើឱ្យការអភិវឌ្ឍសង្គម-សេដ្ឋកិច្ចកម្ពុជាកាន់តែរីកចម្រើនបន្ថែមទៀត។ ក្នុងន័យនេះ សម្តេចធិបតី ក៏នឹងចូលរួមជាអធិបតី និងថ្លែងសន្ទរកថា នៅក្នុងវេទិកាធុរកិច្ចកម្ពុជា-កូរ៉េផងដែរ។ 

បន្ថែមលើនេះ សម្ដេចធិបតី ក៏បានជម្រាប លោកនាយករដ្ឋមន្រ្តីអំពីលទ្ធផលដ៏ប្រសើរ នៃកិច្ចពិភាក្សាប្រកបដោយផ្លែផ្កាជាមួយលោកប្រធានាធិបតី យូន ស៊កយ៉ល កាលពីព្រឹក ជាពិសេសអំពីការរំលេចនូវគំនិតផ្តួចផ្តើមស្តីអំពីការបង្កើតយន្តការពិគ្រោះយោបល់ទៀងទាត់ (Regular Consultation Sessions) រវាងសមាគមធុរកិច្ចកូរ៉េនៅកម្ពុជា និងរាជរដ្ឋាភិបាលកម្ពុជា និង ការបង្កើតតំបន់សេដ្ឋកិច្ចពិសេស សម្រាប់តែក្រុមហ៊ុនវិនិយោគកូរ៉េ។

ជាមួយគ្នានេះ សម្តេចធិបតី ក៏បានគូសរំលេចជូនលោកនាយករដ្ឋមន្រ្តី អំពីគម្រោងនិមិត្តរូបនៃស្ពានមិត្តភាពកម្ពុជា-កូរ៉េ ដែលគ្រោងនឹងបើកការដ្ឋានសាងសង់នាពេលខាងមុខ។ ស្ពានមិត្តភាពនេះតំណាងឱ្យមិត្តភាពយូរអង្វែងរវាងប្រទេសទាំងពីរ ហើយសម្តេចធិបតី ក៏បានថ្លែងអំណរគុណ និងវាយតម្លៃខ្ពស់ចំពោះការចូលរួមចំណែកដ៏ថ្លៃថ្លា របស់រដ្ឋាភិបាលកូរ៉េក្នុងគម្រោងនេះផងដែរ។

មុននឹងបញ្ចប់ ថ្នាក់ដឹកនាំទាំងពីរបានបញ្ជាក់នូវជំហរ និងជំនឿជាក់ថា ទំនាក់ទំនង និងកិច្ចសហប្រតិបត្តិការទ្វេភាគី ក្រោមកម្រិតនៃភាពជាដៃគូយុទ្ធសាស្រ្ត នឹងតែល្អរីកចម្រើន និងរឹងមាំបន្ថែមទៀត៕

The post នាយករដ្ឋមន្រ្តីកូរ៉េ៖ កម្ពុជា ជាទិសដៅនៃការវិនិយោគ និងជាទីផ្សារដ៏មានសក្ដានុពលសម្រាប់វិស័យឧស្សាហកម្មកូរ៉េ appeared first on Kampuchea Thmey Daily.

ការ​បង្ហាញ​បំណង​វិនិយោគ​នេះ ក្នុង​ឱកាស សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រ​កម្ពុជា បាន​អនុញ្ញាត​ឱ្យ លោក Neil Brimacombe ប្រធាន​ក្រុមហ៊ុន SPC Group ចូល​ជួប​សម្តែង​ការ​គួរសម និង​ពិភាក្សា​ការងារ នា​ឱកាស​ចូលរួម​កិច្ចប្រជុំ​កំពូល​ពិសេស អាស៊ាន​-​អូស្ត្រាលី នៅ​ទីក្រុង​ម៉ែល​ប៊ន ប្រទេស​អូស្ត្រាលី នា​ព្រឹក​ថ្ងៃ​ទី ៥ ខែ​មីនា ឆ្នាំ ២០២៤ នេះ។

ក្នុង​ឱកាស នៃ​ជំនួប លោក​ប្រធាន​ក្រុមហ៊ុន បាន​ថ្លែងអំណរគុណ​ចំពោះ សម្តេច​ធិបតី ដែល​បាន​ឆ្លៀត​ពេល​ដ៏​មមាញឹក​អនុញ្ញាត​ឱ្យ​រូបលោក និង​សហការី បាន​ចូល​ជួប​សម្តែង​ការ​គួរសម និង​ពិភាក្សា​ការងារ ព្រមទាំង​បាន​គោរព​ជម្រាប​ជូន សម្ដេច​ធិបតី ថា ក្រុមហ៊ុន មាន​មូលដ្ឋាន​នៅ​ប្រទេស​អូស្ត្រាលី ហើយ​ក៏​មាន​ប្រតិបត្តិការ​អាជីវកម្ម​នៅ​តាម​បណ្ដា​ប្រទេស​ជាច្រើន​លើ​ពិភពលោក រួម​ទាំង​តំបន់​អាស៊ាន។

លោក​ប្រធាន​ក្រុមហ៊ុន បាន​បន្ថែម​ទៀត​ថា ក្រុមហ៊ុន​ផ្ដោត​លើ​វិស័យ​កសិ​-​ឧស្សាហកម្ម ហើយ​មាន​ជំនាញ​លើ​ការ​ផលិត​ចំណី​អាហារ និង​ការ​កែច្នៃ​វេច​ខ្ចប់​ផ្លែឈើ ដែល​បច្ចុប្បន្ន​នេះ​ក្រុមហ៊ុន​ក៏​មាន​រោងចក្រ​ក្នុង​ការ​កែច្នៃ​ផលិតផល​ពី​ផ្លែឈើ​ដើម្បី​នាំចេញ​ទៅ​បណ្តា​ទីផ្សារ​ទាំង​នៅក្នុង​តំបន់​អាស៊ី និង​ពិភពលោក​ផងដែរ ហើយ​ក្រុមហ៊ុន​ក៏មាន​នាំចូល​នូវ​វត្ថុធាតុដើម​ពី​បណ្ដា​ប្រទេស​មួយចំនួន ដើម្បី​គាំទ្រ​ដល់​ខ្សែ​ច្រវាក់​ផលិតកម្ម​របស់​ខ្លួន​។ ជាមួយ​គ្នា​នេះ លោកនាយក​ប្រតិបត្តិ ក៏បាន​បង្ហាញ​បំណង​វិនិយោគ​លើ​វិស័យ​ឧស្សាហកម្ម​ចំណីអាហារ​នៅ​កម្ពុជា ដែល​ជា​ជំនាញ​របស់​ក្រុមហ៊ុន SPC Group។

ជា​ការ​ឆ្លើយតប សម្តេច​ធិបតី បាន​សម្តែង​នូវ​ការ​ស្វាគមន៍ និង​រីករាយ​ដែល​បាន​ជួបពិភាក្សា​ការងារ​ជាមួយ​លោក​ប្រធាន​ក្រុមហ៊ុន និង​បាន​គូស​បញ្ជាក់​អំពី​ភាព​ទាក់ទាញ នៃ​បរិស្ថាន​វិនិយោគ​ដែល​មាន​ភាព​ប្រាកដ​និយម អនុគ្រោះ និង​បត់បែន ដោយ​រាជរដ្ឋាភិបាល​បាន​ដាក់​ចេញ គោលនយោបាយ ច្បាប់​ស្តីពី​វិនិយោគ នៃ​ព្រះរាជាណាចក្រ​កម្ពុជា និង​ការ​លើកទឹកចិត្ត​នានា សម្រាប់​វិនិយោគិន និង​ធុរជន ជាពិសេស​លើ​វិស័យ​កសិកម្ម។ សម្ដេច​ធិបតី ក៏បាន​បន្ថែម​ថា វិស័យ​កសិកម្ម ជា​វិស័យ​អាទិភាព​មួយ ហើយ​រាជរដ្ឋាភិបាល​បាន​ដាក់​ចេញ​នូវ​គោលនយោបាយ​អភិវឌ្ឍន៍​វិស័យ​កសិកម្ម​ដែល​រួមមាន​ការ​ប្រើប្រាស់​នូវ​បច្ចេកវិទ្យា​ទំនើបៗ ការ​បង្កើត​ឱ្យ​មាន​នូវ​យន្តការ​ក្នុង​ការ​គាំទ្រ​ដល់​ប្រជាកសិករ ការ​បង្កើត​នូវ​សមាគម​កសិករ​ទំនើប ការលើកកម្ពស់​នូវ​គុណភាព​ផលិតផល ដើម្បី​ពង្រឹង​នូវ​ផលិតភាព និង​គុណភាព​ផលិតផល​កសិកម្ម​នៅក្នុង​ព្រះរាជាណាចក្រ​កម្ពុជា។

ទន្ទឹម​នឹង​នេះ សម្ដេច​ធិបតី ក៏បាន​គូស​រំលេច​ពី​គោលនយោបាយ​គាំទ្រ និង​លើកទឹកចិត្ត​ដល់​ការ​វិនិយោគ​លើ​វិស័យ​កសិកម្ម ដែល​រួមមាន​ការ​លើកលែង​ពន្ធ​លើ​ដី​កសិកម្ម ពន្ធ​នាំចូល​សម្ភារៈ​កសិកម្ម និង​ពន្ធ​កសិផល​កសិកម្ម ក៏ដូចជា​ការធានា​នូវ​តម្លៃ​អគ្គិសនី ការ​កសាង​ហេដ្ឋារចនាសម្ព័ន្ធ​ដឹកជញ្ជូន ប្រព័ន្ធ​ធារាសាស្ត្រ ដែល​ជា​កត្តា​គន្លឹះ​ជួយ​កាត់បន្ថយ​ថ្លៃដើម​ផលិត ដើម្បី​រក្សា​នូវ​ភាព​ប្រកួតប្រជែង​ក្នុង​ទីផ្សារ។ ឆ្លើយតប​ទៅ​នឹង​បំណង​វិនិយោគ​របស់​ក្រុមហ៊ុន សម្ដេច​ធិបតី បាន​ស្វាគមន៍ និង​លើក​ទឹកចិត្ត​ឱ្យ​ក្រុមហ៊ុន​បំពេញ​ទស្សនកិច្ច​នៅ​កម្ពុជា ដើម្បី​ពិនិត្យ​លទ្ធភាព​ក្នុង​ការ​ស្វែងរក​ឱកាស​វិនិយោគ​នៅ​ក្នុង​ព្រះរាជាណាចក្រ​កម្ពុជា ដោយ​សហការ​ជាមួយ​ក្រសួង​-​ស្ថាប័ន​ពាក់ព័ន្ធ៕

The post ក្រុមហ៊ុន SPC បង្ហាញបំណងវិនិយោគលើឧស្សាហកម្មចំណីអាហារ នៅកម្ពុជា appeared first on Kampuchea Thmey Daily.

នេះ​បើតាម​ការចុះផ្សាយ​ព្រឹត្តិបត្រ​ព័ត៌មាន​ទីផ្សារការងារ សម្រាប់​ឆមាស​ទី​១ ឆ្នាំ​២០២៤ របស់​ក្រសួង​ការងារ កាលពី​ថ្ងៃទី​០៩ ខែកុម្ភៈ ឆ្នាំ​២០២៤​។

បើតាម​ការ​ព្យាករ​បាន​បញ្ជាក់ថា ចន្លោះ​ឆ្នាំ​២០២៤-២០២៦​ខាងមុខ កម្ពុជា​អាច​បឹង​បង្កើត​ការងារ​បន្ថែម​ជូន​ប្រជាពលរដ្ឋ​ប្រមាណ​២៣,៥​ម៉ឺន​នាក់​ក្នុង​មួយឆ្នាំ​។ កំណើន​ការងារ​ជា​មធ្យម​ប្រមាណ​២,៥%​ក្នុង​មួយឆ្នាំ​នឹងធ្វើ​ឱ្យចំ​នួន​អ្នកមាន​ការងារ​សរុប​កើន​ឡើងដល់​ប្រមាណ​១០,២​លាន​នាក់​នៅ​ឆ្នាំ​២០២៦​។

គួរ​កត់សម្គាល់​ដែរ​ថា វិស័យ​ឧស្សាហកម្ម​ដែល​ជា​ក្បាលម៉ាស៊ីន​បង្កើត​ការងារ​ត្រូវបាន​ព្យាករ​ថា នឹង​បង្កើត​ការងារ​ប្រមាណ​១៦,៥​ម៉ឺន​នាក់​ក្នុង​មួយឆ្នាំ ឬ​ស្មើនឹង​អត្រាកំណើន​ការងារ​៥,៧%​។ រីឯ​វិស័យ​សេវាកម្ម​វិញ ត្រូវបាន​រំពឹងថា​នឹង​បង្កើត​ការងារ​ប្រមាណ​១៦,៧​ម៉ឺន​នាក់​ក្នុង​មួយឆ្នាំ ស្មើនឹង​អត្រាកំណើន​ការងារ​៤,៤%​។ និន្នាការ​កំណើន​ការងារ​នៅក្នុង​វិស័យ​ទាំង​២​នេះ គឺ​ដោយសារ​ការកើនឡើង​នៃ​តម្រូវការ​ក្នុងការ​ពង្រីក​ផលិតកម្ម​និង​អាជីវកម្ម ព្រមទាំង​ការផ្លាស់ប្តូរ​ការងារ​ពី​វិស័យ​កសិកម្ម ដែល​ត្រូវបាន​ព្យាករ​ថា​ចំនួន​ការងារ​នឹង​ថយ​ចុះ​ប្រមាណ​៩,៨​ម៉ឺន​នាក់​ក្នុង​មួយឆ្នាំ​ស្មើនឹង​អត្រា​ថយចុះ​ការងារ​៣,៥%​ក្នុង​មួយឆ្នាំ​៕

The post នៅ​ឆ្នាំ​២០២៥! វិស័យ​សេវាកម្ម និង​ឧស្សាហកម្ម​នឹង​មាន​កំណើន​ការងារ​ខ្ពស់ ខណៈ​វិស័យ​កសិកម្ម​ធ្លាក់ចុះ appeared first on Kampuchea Thmey Daily.