ឯកឧត្ដម ហ៊ុន ម៉ានី Archives - Kampuchea Thmey Daily

ឯកឧត្តម ហ៊ុន ម៉ានី ដឹកនាំកិច្ចប្រជុំបូកសរុបលទ្ធផលការងារខែមេសា និងលើកទិសដៅភារកិច្ចបន្ដសម្រាប់ខែឧសភា របស់គណបក្សប្រជាជននៅខេត្តកំពង់ស្ពឺ

កម្ពុជាថ្មី — Sat, 25 Apr 2026 09:47:08 +0000

ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍ គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ នាព្រឹកថ្ងៃទី២៥ ខែមេសា ឆ្នាំ២០២៦ បានអញ្ជើញដឹកនាំកិច្ចប្រជុំបូកសរុបលទ្ធផលការងារខែមេសា និងលើកទិសដៅភារកិច្ចបន្ដសម្រាប់ខែឧសភា របស់គណបក្សខេត្តកំពង់ស្ពឺ នៅមន្ទីរគណបក្សខេត្តកំពង់ស្ពឺ។

កិច្ចប្រជុំនេះ មានការចូលរួមពីអនុប្រធានទី១ អនុប្រធាន សមាជិក សមាជិកា ក្រុមការងាចុះជួយខេត្ត ក្រុង ស្រុក ឃុំ សង្កាត់ និងថ្នាក់ដឹកនាំគណបក្សចុះមូលដ្ឋានគ្រប់ជាន់ថ្នាក់ សរុបប្រមាណ ៤៥០នាក់។

ជាកិច្ចចាប់ផ្ដើម អនុប្រធានគណៈកម្មាធិការគណបក្សខេត្តកំពង់ស្ពឺ អុិន ឃុន បានឡើងថ្លែងរបាយការណ៍សង្ខេប ស្ដីពីលទ្ធផលការងារសម្រេចបាន និងសភាពការណ៍ទូទៅរបស់ខេត្ត ព្រមទាំងបានពិនិត្យ និងវាយតម្លៃលើវឌ្ឍនភាពនៃការអនុវត្តកម្មវិធីនយោបាយ លិខិតបទដ្ឋាន និងសេចក្តីណែនាំនានារបស់ថ្នាក់កណ្តាលក្នុងខែមេសាកន្លងទៅ។

បន្ទាប់ពីបានស្ដាប់របាយការណ៍ ឯកឧត្តម ហ៊ុន ម៉ានី បានផ្តល់អនុសាសន៍ណែនាំជូនដល់ក្រុមការងារគណបក្ស និងគណៈកម្មាធិការបក្សមូលដ្ឋានគ្រប់ជាន់ថ្នាក់ ត្រូវបន្តថែរក្សា នូវសាមគ្គី ឯកភាពផ្ទៃក្នុងរបស់គណបក្ស និងលើកទឹកចិត្តឱ្យមានការរាយការណ៍ជាប្រចាំ។

ឯកឧត្តមក៏បានណែនាំឱ្យក្រុមការងារទាំងអស់បន្តយកចិត្តទុកដាក់ និងដោះស្រាយជូនបងប្អូនប្រជាពលរដ្ឋក្នុងខេត្តតាមដែលអាចធ្វើទៅបាន និងបន្តពង្រឹងការអនុវត្តនយោបាយ ភូមិ-ឃុំមានសុវត្ថិភាព ដែលសុខទុក្ខរបស់ពួកគាត់គឺជាស្នូលនៃបេសកកម្មរបស់គណបក្សប្រជាជនកម្ពុជា៕

The post ឯកឧត្តម ហ៊ុន ម៉ានី ដឹកនាំកិច្ចប្រជុំបូកសរុបលទ្ធផលការងារខែមេសា និងលើកទិសដៅភារកិច្ចបន្ដសម្រាប់ខែឧសភា របស់គណបក្សប្រជាជននៅខេត្តកំពង់ស្ពឺ appeared first on Kampuchea Thmey Daily.

ឯកឧត្ដម ហ៊ុន ម៉ានី លើកទឹកចិត្តយុវជនខ្មែរ បន្តលើកស្ទួយអក្សរសាស្ត្រជាតិ និងស្វែងយល់ឲ្យកាន់តែច្បាស់អំពីប្រវត្តិសាស្ត្រខ្មែរ

អ៊ិន ពិសី — Mon, 19 Jan 2026 04:54:10 +0000

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានលើកទឹកចិត្តយុវជនខ្មែរ បន្តលើកស្ទួយអក្សរសាស្ត្រជាតិឲ្យបានខ្ជាប់ខ្ជួន និងស្វែងយល់ឲ្យកាន់តែច្បាស់អំពីប្រវត្តិសាស្ត្រខ្មែរ។

ការលើកទឹកចិត្តនេះ ក្នុងឱកាស ឯកឧត្ដម ហ៊ុន ម៉ានី ថ្លែងក្នុងព្រឹត្តិការណ៍ “សំណេរអង្គរ” លើកទី ៣ កាលពីថ្ងៃទី ១៨ ខែមករា ឆ្នាំ ២០២៦ ម្សិលមិញ។

នាឱកាសនោះ ឯកឧត្ដម ហ៊ុន ម៉ានី គូសបញ្ជាក់ថា ការរៀបចំព្រឹត្តិការណ៍នេះ គឺជាការរួមចំណែកមិនអាចកាត់ថ្លៃបានក្នុងការការពារអក្សរសាស្ត្រខ្មែរមិនឲ្យបាត់បង់ និងលើកទឹកចិត្តឲ្យយុវជនខ្មែរ បន្តស្រឡាញ់ និងលើកស្ទួយអក្សរសាស្ត្រជាតិឲ្យបានខ្ជាប់ខ្ជួន ផ្សព្វផ្សាយបន្ថែមនូវតម្លៃរមណីយដ្ឋានអង្គរ និងវប្បធម៌ខ្មែរ តាមរយៈការសរសេរ ជាពិសេសត្រូវស្វែងយល់ឲ្យកាន់តែច្បាស់អំពីប្រវត្តិសាស្ត្រ ដើម្បីកសាងមោទនភាពជាតិ។

ឯកឧត្ដម ហ៊ុន ម៉ានី ក៏បានជំរុញឲ្យកូនខ្មែរកាន់តែស្រឡាញ់អក្សរសាស្ត្រខ្មែរ ព្រមទាំងផ្សព្វផ្សាយបន្ថែមនូវរមណីយដ្ឋានអង្គរ ក៏ដូចជាការផ្សារភ្ជាប់ទៅនឹងវប្បធម៌ដ៏ល្អល្អះរបស់ព្រះរាជាណាចក្រកម្ពុជា តាមរយៈប្រធានបទ នៃសំណេរដែលបានដកស្រង់ចេញពីចំណេះដឹងវប្បធម៌ និងប្រវត្តិសាស្ត្រ ហើយ ឯកឧត្ដម បានកោតសរសើរថា វាជួយឲ្យអ្នកចូលរួមបានយល់ដឹងកាន់តែច្បាស់អំពីតម្លៃ នៃប្រាសាទបុរាណអត្តសញ្ញាណជាតិ និងមោទនភាពជាតិផងដែរ។

ជាមួយនេះ លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងថា ការពង្រឹងការអាន និងការសរសេរភាសាខ្មែរតាំងពីកម្រិតថ្នាក់ដំបូង គឺជាគ្រឹះដ៏សំខាន់សម្រាប់ជោគជ័យក្នុងការសិក្សា។ ក្នុងន័យនេះ ក្រសួងអប់រំ បាននិងកំពុងអនុវត្តយ៉ាងសកម្មនូវកញ្ចប់សម្ភារអំណានថ្នាក់ដំបូង ដែលជាយុទ្ធសាស្ត្រកំណែទម្រង់ដ៏មុតស្រួចបំផុតមួយសម្រាប់ការលើកកម្ពស់គុណភាពអប់រំបឋមសិក្សា។

លោកបណ្ឌិតសភាចារ្យ មានប្រសាសន៍ថា ការរៀបចំព្រឹត្តិការណ៍ក្នុងការប្រកួតសរសេរតាមអាន ក្រោមប្រធានបទ “សំណេរអង្គរ” នាពេលនេះ ក៏ឆ្លុះបញ្ចាំងពីការយកចិត្តទុកដាក់របស់ប្រមុខរាជរដ្ឋាភិបាល ក៏ដូចជាក្រសួងអប់រំ ក្រសួង-ស្ថាប័នពាក់ព័ន្ធ ពិសេសអ្នកស្រឡាញ់ចូលចិត្តការសរសេរអក្សរខ្មែរ សំដៅលើកកម្ពស់សមត្ថភាពការសរសេរឲ្យបានត្រឹមត្រូវតាមអក្ខរាវិរុទ្ធ ក្បួនខ្នាតវេយ្យាករណ៍ និងចេះពីរបៀបសរសេរអត្ថបទឲ្យបានច្បាស់លាស់ ដែលទាំងអស់នេះជាបំណិនដ៏សំខាន់ក្នុងការសិក្សាភាសាខ្មែរ និងអក្សរសាស្ត្រខ្មែរ។ ក្នុងនាមជារដ្ឋមន្ត្រីក្រសួងអប់រំ លោកតែងតែលើកទឹកចិត្តឲ្យសិស្សានុសិស្ស និងសាធារណជន “អានឲ្យបានច្រើន សរសេរឲ្យបានច្រើន” ដើម្បីរក្សាភាពត្រឹមត្រូវ នៃភាសាជាតិ។

លោករដ្ឋមន្ត្រី ក៏បានលើកទឹកចិត្តដល់គ្រប់ក្រសួង-ស្ថាប័ន រដ្ឋបាលគ្រប់លំដាប់ថ្នាក់ ជាពិសេសគណៈគ្រប់គ្រងសាលា លោកគ្រូអ្នកគ្រូ ឲ្យរៀបចំការប្រឡងប្រណាំងអំណាន និងសំណេរ ឬបង្កើតព្រឹត្តិការណ៍អប់រំនានា ដើម្បីជំរុញដល់ការរៀនសូត្ររបស់សិស្សានុសិស្ស និងអ្នកចូលចិត្តអក្សរសាស្ត្រខ្មែរ អាចបញ្ចេញសមត្ថភាពប្រកបដោយភាពក្លាហាន ទំនុកចិត្ត និងទទួលយកការពិតអំពីសមត្ថភាពពិតប្រាកដដែលខ្លួនមាន ព្រមទាំងខិតខំប្រឹងប្រែងសិក្សារៀនសូត្រ និងពង្រឹងការអាន សរសេរ និងនិពន្ធបន្ថែមទៀត សម្រាប់ត្រៀមខ្លួនក្នុងការប្រឡងប្រណាំងនានាក្នុងពេលខាងមុខ។

សូមជម្រាបថា ព្រឹត្តិការណ៍ “សំណេរអង្គរ” លើកទី ៣ មានចូលរួមចំនួន ១ ៨៦០ អង្គ/នាក់ ដែលមានអាយុតិចជាងគេ ៥ ឆ្នាំ និងចាស់ជាងគេអាយុ ៨២ ឆ្នាំ ដោយគណៈកម្មការ និងអ្នករៀបចំកម្មវិធីបាននិមន្ត ព្រះបញ្ញាមុនីញាណ ហាក់ សៀងហៃ ដើម្បីអានអត្ថបទសំណេរ៕

អត្ថបទ ៖ គឿនវេត

The post ឯកឧត្ដម ហ៊ុន ម៉ានី លើកទឹកចិត្តយុវជនខ្មែរ បន្តលើកស្ទួយអក្សរសាស្ត្រជាតិ និងស្វែងយល់ឲ្យកាន់តែច្បាស់អំពីប្រវត្តិសាស្ត្រខ្មែរ appeared first on Kampuchea Thmey Daily.

ឯកឧត្ដម ហ៊ុន ម៉ានី៖ យុវជនជំនាន់ក្រោយនឹងចងចាំ និងដឹងគុណជានិច្ចនូវគុណូបការៈថ្ងៃរំដោះ ៧មករា

Sokhom Khon — Wed, 07 Jan 2026 01:07:13 +0000

នៅក្នុងឱកាសអបអរសាទរខួបលើកទី៤៧ នៃទិវាជ័យជម្នះ ៧មករា ១៩៧៩ -២០២៦ ដែលជាថ្ងៃរំដោះ និងសង្រ្គោះប្រទេសជាតិកម្ពុជា បានរួចផុតពីរបបប្រល័យពូជសាសន៍ ប៉ុល ពត ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានសម្ដែងការដឹងគុណ និងចងចាំជានិច្ចនូវគុណូបការៈដ៏ខ្ពង់ខ្ពស់បំផុតចំពោះវីរយុទ្ធជន យុទ្ធនារីក្លាហានគ្រប់រូបដែលបានលះបង់សាច់ស្រស់ ឈាមស្រស់ក្នុងសមរភូមិ ដើម្បីការពារអធិបតេយ្យ បូរណភាពដែនដី និងការពារសន្តិភាពជូនជាតិមាតុភូមិទាំងក្នុងអតីតកាល និងបច្ចុប្បន្ននេះ។ ក្នុងនាមយុវជនជំនាន់ក្រោយ ឯកឧត្ដម ហ៊ុន ម៉ានី នឹងចងចាំជានិច្ច និងបេ្តជ្ញាយ៉ាងមោះមុតក្នុងការការពារឱ្យបានដាច់ខាតនូវភាពសុខដុមរមនា បូរណភាពទឹកដី និងអធិបតេយ្យភាពជាតិបន្តទៅថ្ងៃអនាគត។

តាមរយៈសំណេរនៅលើទំព័រហ្វេសប៊ុក នាព្រឹកថ្ងៃទី៧ ខែមករា ឆ្នាំ២០២៦នេះ ឯកឧត្ដម ហ៊ុន ម៉ានី បានលើកឡើងថា សូមឱ្យស្មារតីថ្ងៃ៧មករា ស្ថិតនៅក្នុងក្រអៅបេះដូងប្រជាពលរដ្ឋគ្រប់ៗរូប និងជានិមិត្តរូបនៃសាមគ្គីជាតិ និងមហាគ្រួសារខ្មែរជាអមតៈ ក្រោមម្លប់សុខសន្តិភាពជានិច្ចនិរន្ត៍។

រយៈពេល៣ឆ្នាំ ៨ខែ និង២០ថ្ងៃ ប្រជាជនខ្មែរ រួមទាំងកុមារតូចៗត្រូវរស់នៅក្រោមការបង្ខិតបង្ខំឱ្យធ្វើការលើសកម្លាំង គ្មានថ្ងៃឈប់សម្រាក អាហារមិនគ្រប់គ្រាន់ គ្មានមន្ទីរពេទ្យ គ្មានសាលារៀន គ្មានវត្តអារាម និងគ្មានសិទ្ធិសេរីភាពទាំងអស់។ ជាងនេះទៅទៀត ប្រជាជនស្លូតត្រង់ ជាង ៣លាននាក់ បានស្លាប់យ៉ាងអយុត្តិធម៌ដោយសាររបបប្រល័យពូជសាសន៍ ប៉ុល ពត។

លោកឧបនាយករដ្ឋមន្ត្រី បន្ថែមថា ក្រោយពីប្រទេសជាតិត្រូវបានរំដោះនៅថ្ងៃ៧ ខែមករា ឆ្នាំ១៩៧៩ ប្រជាពលរដ្ឋគ្រប់រូបបានរស់រានមានជីវិតសារជាថ្មី ជួបជុំក្រុមគ្រួសារ និងក៏ជាថ្ងៃដែលទទួលបានមកវិញនូវសិទ្ធិសេរីភាពពេញលេញ។ ដោយយល់ច្បាស់ពីពលិកម្មមិនអាចកាត់ថ្លៃបានរបស់យុវជនជំនាន់មុនក្នុងបុព្វហេតុស្វែងរកសុខសន្តិភាពជូនជាតិ និងមាតុភូមិ យុវជនជំនាន់ក្រោយនឹងចងចាំជានិច្ច និងបេ្តជ្ញាយ៉ាងមោះមុតក្នុងការការពារឱ្យបានដាច់ខាតនូវភាពសុខដុមរមនា បូរណភាពទឹកដី និងអធិបតេយ្យភាពជាតិបន្តទៅថ្ងៃអនាគត ហើយសូមឱ្យស្មារតីថ្ងៃ៧មករា ស្ថិតនៅក្នុងក្រអៅបេះដូងប្រជាពលរដ្ឋគ្រប់ៗរូប និងជានិមិត្តរូបនៃសាមគ្គីជាតិ និងមហាគ្រួសារខ្មែរជាអមតៈ ក្រោមម្លប់សុខសន្តិភាពជានិច្ចនិរន្ត៍៕

The post ឯកឧត្ដម ហ៊ុន ម៉ានី៖ យុវជនជំនាន់ក្រោយនឹងចងចាំ និងដឹងគុណជានិច្ចនូវគុណូបការៈថ្ងៃរំដោះ ៧មករា appeared first on Kampuchea Thmey Daily.

ឯកឧត្ដម ហ៊ុន ម៉ានី ៖ ការកែលម្អគុណភាពសេវាសុខាភិបាលមូលដ្ឋាន ជាការរួមចំណែកដ៏មានតម្លៃលើកកម្ពស់វិស័យសុខាភិបាលកម្ពុជា

អ៊ិន ពិសី — Tue, 18 Nov 2025 02:36:03 +0000

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ លើកឡើងថា ការពង្រឹងអភិបាលកិច្ច និងកែលម្អគុណភាពសេវាសុខាភិបាលមូលដ្ឋាន គឺជាការរួមចំណែកដ៏មានតម្លៃក្នុងការចូលរួមអនុវត្តគោលនយោបាយ និងបង្កើនប្រសិទ្ធភាពសេវាសុខាភិបាលនៅកម្ពុជា។

ការលើកឡើងយ៉ាងដូច្នេះរបស់ ឯកឧត្ដម ហ៊ុន ម៉ានី បានធ្វើឡើងក្នុងសិក្ខាសាលាចែករំលែកបទពិសោធ នៃការគ្រប់គ្រង និងការផ្តល់សេវាសាធារណៈរបស់ជ័យលាភីអង្គភាពផ្ដល់សេវាសាធារណៈគំរូក្នុងវិស័យសុខាភិបាលឆ្នាំ ២០២៤ នៅខេត្តកោះកុង។

ឯកឧត្ដម ហ៊ុន ម៉ានី បន្តថា វិធានការស្នូរចម្បង ជាគន្លឹះក្នុងការកែទម្រង់រដ្ឋបាលសាធារណៈ និងការលើកកម្ពស់គុណភាព , ពង្រីកវិសាលភាព គ្របដណ្ដប់ និងបង្កើនប្រសិទ្ធភាព នៃសេវាសុខាភិបាលប្រកបដោយទំនុកចិត្តខ្ពស់ពីសំណាក់មហាជនទូទៅ។

ឯកឧត្ដម បន្តទៀតថា នៅក្នុងក្របខណ្ឌ នៃការលើកកម្ពស់គុណភាពសេវាសុខាភិបាលនៅមូលដ្ឋាន រាជរដ្ឋាភិបាល បានផ្ដោតចម្បងលើការពង្រឹងសមត្ថភាពផ្ដល់សេវាសុខភាពបឋមនៅមូលដ្ឋាន តាមរយៈការដាក់ចេញឱ្យអនុវត្តវិធានការគន្លឹះជាក់ស្ដែង រួមមាន ៖ (១) ការពង្រឹងសមត្ថភាពផ្ដល់សេវានៅមណ្ឌលសុខភាព និងមន្ទីរពេទ្យបង្អែក (២) ការអភិវឌ្ឍសមត្ថភាពស្ថាប័នសុខាភិបាលថ្នាក់ជាតិ និងថ្នាក់ក្រោមជាតិ និង (៣) ការកសាងភាពជាដៃគូរឹងមាំ រវាងវិស័យសុខាភិបាលសាធារណៈ និងឯកជន។

ជាមួយនេះ លោកស្រី ឈី វ៉ា អភិបាលខេត្តកោះកុង លើកឡើងដែរថា សិក្ខាសាលា នឹងរៀបរាប់អំពីស្ថានភាពភូមិសាស្ត្រលក្ខណៈទូទៅរបស់ខេត្តកោះកុង ព្រមទាំងសមិទ្ធផលនានា ជាពិសេសភាពជោគជ័យសម្រេចបានលើវិស័យសុខាភិបាលនៅខេត្តកោះកុង ដោយទទួលបានការយកចិត្តទុកដាក់ពីប្រមុខរាជរដ្ឋាភិបាល ក៏ដូចជាក្រសួងសុខាភិបាល ក្នុងការចូលរួមលើកកម្ពស់ ប្រសិទ្ធភាព និងអភិវឌ្ឍន៍សមត្ថភាព ផ្ដល់សេវាថែទាំសុខភាពជូនប្រជាជនកាន់តែប្រសើរឡើង។

លោកស្រីអភិបាលខេត្ត រំពឹងទុកជាមុនថា ក្រោយបញ្ចប់សិក្ខាសាលានេះដែរ ថ្នាក់ដឹកនាំ និងមន្ត្រីសុខាភិបាលពាក់ព័ន្ធ នឹងយកចំណេះដឹង បទពិសោធ និងគន្លឹះបច្ចេកទេសថ្មីៗ យកទៅកែច្នៃ ហើយអនុវត្តការងារទៅតាមបរិបទរបស់អង្គភាពនីមួយៗ ប្រកបដោយភាពជោគជ័យ៕

អត្ថបទ ៖ សិរីវឌ្ឍនៈ

The post ឯកឧត្ដម ហ៊ុន ម៉ានី ៖ ការកែលម្អគុណភាពសេវាសុខាភិបាលមូលដ្ឋាន ជាការរួមចំណែកដ៏មានតម្លៃលើកកម្ពស់វិស័យសុខាភិបាលកម្ពុជា appeared first on Kampuchea Thmey Daily.

និស្សិតពេទ្យជិត ៦០០ នាក់ បន្ថែមទៀត បានចូលរួមជាសមាជិកក្រុមការងារ គ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី

អ៊ិន ពិសី — Thu, 17 Jul 2025 08:32:31 +0000

និស្សិតសាកលវិទ្យាល័យវិទ្យាសាស្ត្រសុខាភិបាលចំនួន ៥៨៤ នាក់ បន្ថែមទៀត បានចូលរួមជាសមាជិកក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ដែលធ្វើឱ្យចំនួនសមាជិកក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យ កើនឡើងដល់ជាង ៣ ៤០០ នាក់។

ថ្លែងក្នុងពិធីសំណេះសំណាលជាមួយសមាជិកថ្មីរបស់ក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល កាលពីព្រឹកថ្ងៃទី ១៧ កក្កដា នេះ ក្រោមអធិបតីភាពដ៏ខ្ពង់ខ្ពស់ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ប្រធានសហភាពសហព័ន្ធយុវជនកម្ពុជា និងជាប្រធានកិត្តិយសក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី , លោកសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល សកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល និងជាអនុប្រធានប្រតិបត្តិទទួលបន្ទុកជាប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល បានគោរពថ្លែងអំណរគុណយ៉ាងជ្រាលជ្រៅចំពោះ ឯកឧត្ដមប្រធាន ហ៊ុន ម៉ានី ដែលបានផ្តល់កិត្តិយស និងឱកាសដល់និស្សិតសាកលវិទ្យាល័យវិទ្យាសាស្ត្រសុខាភិបាល បានទទួលការរៀនសូត្របន្ថែម អនុវត្តផ្ទាល់នៅមូលដ្ឋាន និងឱកាសចូលរួមលើកកម្ពស់សុខភាព និងសុខុមាលភាពរបស់ប្រជាពលរដ្ឋ ដែលជាអាទិភាពមួយដ៏សំខាន់របស់រាជរដ្ឋាភិបាល នៃព្រះរាជាណាចក្រកម្ពុជា ដែលមាន សម្តេចមហាបវរធិបតី ហ៊ុន ម៉ាណែត ជាប្រមុខដឹកនាំដ៏ខ្ពង់ខ្ពស់។

លោកសាស្ត្រាចារ្យ បានបន្តទៀតថា «ការចូលរួមសកម្មភាពមនុស្សធម៌ និងសង្គមទាំងនេះ បានបង្ហាញច្បាស់អំពីការយកចិត្តទុកដាក់របស់ ឯកឧត្ដមប្រធាន និងក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ទាំងអស់ ដែលតែងតែខ្វល់ខ្វាយគិតគូរ និងរួមសុខ រួមទុក្ខ ជាមួយប្រជាពលរដ្ឋដែលជួបការលំបាកក្នុងគ្រប់កាលៈទេសៈ។ ប្រជាពលរដ្ឋ បានយល់អំពីអំពើល្អរបស់ ឯកឧត្ដមប្រធាន ហ៊ុន ម៉ានី ក៏ដូចជា សម្តេចតេជោ សម្តេចមហាបវរធិបតី និងក្រុមគ្រួសារ ថ្នាក់ដឹកនាំក្នុងជួររាជរដ្ឋាភិបាលកម្ពុជា ហើយមានទឹកចិត្តកាន់តែស្រលាញ់ គាំទ្រ សម្តេចមហាបវរធិបតី ហ៊ុន ម៉ាណែត បន្តជាប្រមុខដឹកនាំនាវាកម្ពុជាទៅមុខទៀត ដើម្បីធ្វើឱ្យប្រទេសជាតិយើង ឱ្យកាន់តែមានការរីកចម្រើន ក្រោមម្លប់សន្តិភាពដ៏ត្រជាក់ត្រជំ»។

លោកសាស្ត្រាចារ្យ បានបន្ថែមថា អំពើល្អទាំងនេះ ក៏ជាគំរូដ៏ឧត្តុង្គឧត្ដមសម្រាប់និស្សិតសាកលវិទ្យាល័យវិទ្យាសាស្ត្រសុខាភិបាល អនុវត្តតាម ដើម្បីអភិវឌ្ឍន៍ខ្លួនឱ្យក្លាយជាអ្នកវិជ្ជាជីវៈសុខាភិបាលដែលមាន គុណធម៌ សីលធម៌វិជ្ជាជីវៈខ្ពស់ និងតែងតែប្រកាន់ខ្ជាប់នូវស្មារតី ស្រឡាញ់ជាតិ ប្រព្រឹត្តតែអំពើល្អ សុចរិត ត្រឹមត្រូវ និង មិនទុកឱ្យប្រជាពលរដ្ឋណាម្នាក់ មិនទទួលបានសេវាសុខាភិបាលប្រកបដោយគុណភាពឡើយ។

អញ្ជើញមានមតិក្នុងឱកាសនោះ ឯកឧត្ដមឧបនាយករដ្ឋមន្ត្រី បានរំលេចពីសារៈសំខាន់ នៃការងារស្ម័គ្រចិត្តដែលត្រូវការទឹកចិត្តចេញពីបេះដូង ស ពីការវាស់វែងភាពអត់ធ្មត់ និងការជួបប្រទះនូវការប្រតិបត្តិដោយផ្ទាល់រវាងការរៀននៅក្នុងថ្នាក់ និងការអនុវត្តជាក់ស្តែង ដើម្បីទទួលការហ្វឹកហាត់ជាក់ស្ដែង និងទទួលបទពិសោធនាំមកនូវអនុស្សាវរីយ៍យូរអង្វែង។

គួរបញ្ជាក់ថា គិតពីឆ្នាំ ២០២៣ មកដល់បច្ចុប្បន្ននេះ ក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល បានចូលរួមចំណែកផ្តល់សេវាអប់រំ ថែទាំ ព្យាបាលសុខភាពជូនប្រជាពលរដ្ឋដោយឥតគិតថ្លៃ បានចំនួន ២០ លើក សរុបប្រជាពលរដ្ឋមកទទួលសេវា ចំនួន ១៥៦ ៩១៥ នាក់។ ក្រៅពីសកម្មភាពចុះអប់រំ ថែទាំ ព្យាបាល សុខភាពនេះ មន្ត្រី បុគ្គលិក និស្សិតសាកលវិទ្យាល័យវិទ្យាសាស្ត្រសុខាភិបាល បានចូលរួមយ៉ាងសកម្មជាមួយការងារសង្គមផ្សេងៗ ដែលរួមមាន ការចូលរួមសកម្មភាពក្នុងនាមជាសមាជិកសហភាពសហព័ន្ធយុវជនកម្ពុជា សកម្មភាពកាកបាទក្រហមកម្ពុជា សកម្មភាពសប្បុរសធម៌ជួយនិស្សិតខ្វះខាតលទ្ធភាពបន្តការសិក្សា ការងារបរិច្ចាគឈាម ការងារបរិស្ថាន កីឡា និងសិល្បៈ និងជាពិសេសការចូលរួមជាមួយរាជរដ្ឋាភិបាល គាំទ្រលើកទឹកចិត្តកងទ័ពកំពុងប្រចាំការ ការពារប្រទេស នៅសមរភូមិមុខ៕

អត្ថបទ ៖ សំអឿន

The post និស្សិតពេទ្យជិត ៦០០ នាក់ បន្ថែមទៀត បានចូលរួមជាសមាជិកក្រុមការងារ គ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី appeared first on Kampuchea Thmey Daily.

ឯកឧត្ដម ហ៊ុន ម៉ានី ៖ «ចំពោះកិច្ចការការពារបូរណភាពទឹកដី និងមុខមាត់ប្រទេសជាតិ ប្រជាជនខ្មែរ ត្រូវតែរួបរួមគ្នា»

អ៊ិន ពិសី — Wed, 02 Jul 2025 07:12:13 +0000

ឯកឧត្ដម ហ៊ុន ម៉ានី លើកឡើងថា «ចំពោះកិច្ចការការពារបូរណភាពទឹកដី និងមុខមាត់ប្រទេសជាតិ ប្រជាជនខ្មែរ ត្រូវតែរួបរួមគ្នា» ដោយក្នុងនោះ ឯកឧត្ដម បានគូសបញ្ជាក់ពីការចូលរួមរបស់ប្រជាជនខ្មែរគ្រប់ស្រទាប់វណ្ណៈ។

ការលើកឡើងនេះ ក្នុងឱកាស ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា បានអញ្ជើញជាអធិបតីក្នុងពិធីសំណេះសំណាលសួរសុខទុក្ខ និងប្រគល់អំណោយរបស់សហភាពសហព័ន្ធយុវជនកម្ពុជា ជូនដល់ នាយទាហាន នាយទាហានរង ពលទាហាន និងកងកម្លាំងប្រដាប់អាវុធដែលឈរជើងនៅជួរមុខតាមបណ្ដោយព្រំដែន ទិសទី ២ និងទិសទី ៣ ខេត្តឧត្តរមានជ័យ នាទីបញ្ជាការតំបន់ប្រតិបត្តិការសឹករងខេត្តឧត្តរមានជ័យ កាលពីព្រឹកថ្ងៃទី ២ ខែកក្កដា ឆ្នាំ ២០២៥ នេះ។

នាឱកាសនោះ ឯកឧត្ដម ហ៊ុន ម៉ានី បានថ្លែងអំណរគុណចំពោះគ្រប់ភាគីពាក់ព័ន្ធទាំងអស់មកពីមជ្ឈដ្ឋានផ្សេងៗ គ្នា ក្នុងនោះ មានតំណាងមកពីវិស័យរដ្ឋ វិស័យឯកជន គ្រឹះស្ថានឧត្ដមសិក្សា ដែលបានចំណាយពេលវេលា និងធនធាន មកដល់ទីតាំង ដើម្បីផ្តល់ជាកម្លាំងចិត្ត និងការគាំទ្រដល់កងទ័ពជួរមុខ។ ទន្ទឹមនេះ ឯកឧត្ដម បានកោតសរសើរ និងបង្ហាញនូវមោទនភាពដែលទទួលបានភាពកក់ក្ដៅជាស្មារតីរួម ក្រោមការត្រៀមខ្លួនយ៉ាងស្វាហាប់របស់កងកម្លាំងមិនរាថយក្នុងការការពារបូរណភាពទឹកដី។

សាជាថ្មីម្ដងទៀត ឯកឧត្ដម ក៏បានថ្លែងអំណរព្រះរាជគុណ សម្តេចព្រះមហាក្សត្រី នរោត្តម មុនិនាថ សីហនុ ដែលបានប្រោសព្រះរាជទានព្រះរាជទ្រព្យ ចំនួន ៤០ លានរៀល មកកាន់សហភាពសហព័ន្ធយុវជនកម្ពុជា សម្រាប់ជាព្រះរាជូបត្ថម្ភដ៏ឧត្តុង្គឧត្ដមជូនដល់កងទ័ពជួរមុខនៅខេត្តព្រះវិហារដែលកំពុងបំពេញបេសកកម្មការពារបូរណភាពទឹកដីផងដែរ។

អំណោយនាំយកមកប្រគល់ជូនកងទ័ព នាពេលនេះ គឺជាការចូលរួមពី សមាជិក សមាជិកា ស.ស.យ.ក វិស័យឯកជន គ្រឹះស្ថានអប់រំ និងប្រជាពលរដ្ឋ ដែលបង្ហាញពីការគាំទ្រពីសមរភូមិក្រោយ (ប្រជាជន) ដល់កងទ័ពឈរត្រៀមនៅសមរភូមិមុខ។

គួររំលឹកដែរថា កាលពីថ្ងៃទី ១៨ ខែមិថុនា ឆ្នាំ ២០២៥ កន្លងទៅ សហភាពសហព័ន្ធយុវជនកម្ពុជា បានផ្ដួចផ្ដើមរៀបចំកម្មវិធីដំណើរថ្មើរជើង “Solidarity March” ដែលមានការចូលរួមពីប្រជាជនកម្ពុជាប្រមាណ ១៥ ម៉ឺននាក់ ក្នុងស្មារតីគាំទ្រដល់ចំណាត់ការរបស់រាជរដ្ឋាភិបាលកម្ពុជាលើការដោះស្រាយបញ្ហាព្រំដែនជាមួយប្រទេសជិតខាង ក្រោមស្មារតី“ខឿនការពារជាតិប្រជាជន ជាខែលការពារជាតិដ៏រឹងមាំ”៕

The post ឯកឧត្ដម ហ៊ុន ម៉ានី ៖ «ចំពោះកិច្ចការការពារបូរណភាពទឹកដី និងមុខមាត់ប្រទេសជាតិ ប្រជាជនខ្មែរ ត្រូវតែរួបរួមគ្នា» appeared first on Kampuchea Thmey Daily.

ឯកឧត្ដម ហ៊ុន ម៉ានី អំពាវនាវរដ្ឋបាលពាក់ព័ន្ធក្តាប់ឲ្យបានចំនួនពលរដ្ឋត្រឡប់ពី ថៃ ខណៈបញ្ហាព្រំដែនកម្ពុជា-ថៃ នៅតែតានតឹង

អ៊ិន ពិសី — Mon, 30 Jun 2025 04:19:22 +0000

ឯកឧត្ដម ហ៊ុន ម៉ានី បានអំពាវនាវដល់រដ្ឋបាលក្រុង ស្រុក ឃុំ សង្កាត់ និងភូមិ សម្របសម្រួល និងក្តាប់ ឲ្យបាននូវចំនួនប្រជាពលរដ្ឋដែលវិលត្រឡប់មកពីប្រទេសថៃវិញ ខណៈបញ្ហាព្រំដែនកម្ពុជា-ថៃ នៅតែតានតឹង។

ការអំពាវនាវនេះ ក្នុងឱកាស ឯកឧត្ដម ហ៊ុន ម៉ានី សមាជិកគណៈអចិន្ត្រៃយ៍គណៈកម្មាធិការកណ្ដាល គណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ បានអញ្ជើញដឹកនាំកិច្ចប្រជុំបូកសរុបលទ្ធផលការងារគណបក្សក្នុងខែមិថុនា នៅមន្ទីរគណបក្សខេត្ត កាលពីព្រឹកថ្ងៃទី ២៩ ខែមិថុនា ឆ្នាំ ២០២៥។ កិច្ចប្រជុំនេះ ក៏មានការអញ្ជើញចូលរួមពី ឯកឧត្ដមអនុប្រធាន សមាជិក សមាជិកា ក្រុមការងារចុះជួយមូលដ្ឋានខេត្ត ក្រុង ស្រុក-ឃុំ-សង្កាត់ ថ្នាក់ដឹកនាំគណៈកម្មាធិការបក្ស ខេត្ត ក្រុង-ស្រុក និងឃុំ-សង្កាត់ ជាច្រើនរូបផងដែរ។

នាឱកាសនោះ ឯកឧត្ដម ហ៊ុន ម៉ានី បានកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងរបស់ក្រុមការងារ និងគណបក្សគ្រប់ថ្នាក់ ជាពិសេសគណៈកម្មាធិការគណបក្សឃុំ សង្កាត់ និងគណៈកម្មាធិការសាខាបក្សភូមិ ដែលបានអនុវត្តការងារប្រកបដោយការទទួលខុសត្រូវ ស្របតាមប្រតិទិនសម្រាប់អនុវត្តការងារគណបក្សឆ្ពោះទៅកាន់ការបោះឆ្នោត។

ឯកឧត្ដម ហ៊ុន ម៉ានី បានយកឱកាស នៃកិច្ចប្រជុំ អបអរសាទរខួបលើកទី ៧៤ នៃថ្ងៃកំណើតគណបក្ស ដែលបានឆ្លុះបញ្ចាំងពីសកម្មភាព និងការដឹកនាំរបស់គណបក្សប្រជាជនកម្ពុជា នាំមកសុខសន្តិភាព និងសាមគ្គីភាព។

ទន្ទឹមនេះ ឯកឧត្ដម ក៏បានចែករំលែកនូវសារដ៏មានអត្ថន័យរបស់ សម្តេចតេជោ ប្រធានគណបក្ស ជូនទៅកាន់អង្គប្រជុំផងដែរ។ ខ្លឹមសារ នៃសារនោះ សម្តេច បានគូសបញ្ជាក់ពីសារៈសំខាន់ នៃការកសាងអំពើល្អរបស់មន្ត្រីគណបក្សជាមួយប្រជាជន ដែលនាំមកនូវជំនឿទុកចិត្ត ក៏ដូចជាយុទ្ធសាស្ត្រឈ្នះរបស់គណបក្សនៅគ្រប់កាលៈទេសៈ។ តាមរយៈសារនេះ ឯកឧត្ដម ហ៊ុន ម៉ានី បានលើកទឹកចិត្តឲ្យមន្ត្រីគណបក្សទាំងអស់ ប្រកាន់ភ្ជាប់នូវភាពស្មោះត្រង់ សាមគ្គីឯកភាពផ្ទៃក្នុង បម្រើ និងគិតគូរផលប្រយោជន៍ប្រជាជនជាធំ។

ជាមួយនេះ ស្ថិតក្នុងស្ថានភាព នៃការវិវត្តន៍ដ៏តានតឹង នៃបញ្ហាព្រំដែនកម្ពុជា-ថៃ ឯកឧត្ដម ហ៊ុន ម៉ានី ក៏បានអំពាវនាវដល់រដ្ឋបាលក្រុង ស្រុក ឃុំ សង្កាត់ និងភូមិ សម្របសម្រួល និងក្តាប់ ឲ្យបាននូវចំនួនប្រជាពលរដ្ឋដែលវិលត្រឡប់មកពីប្រទេសថៃវិញ និងត្រូវសហការជាមួយមន្ទីរការងារ ដើម្បីផ្តល់ព័ត៌មានអំពីតម្រូវការកម្លាំងពលកម្មនៅតាមបណ្ដារោងចក្រ សហគ្រាស ក្នុងមូលដ្ឋានរបស់ខ្លួន៕

អត្ថបទ ៖ ពិសី

The post ឯកឧត្ដម ហ៊ុន ម៉ានី អំពាវនាវរដ្ឋបាលពាក់ព័ន្ធក្តាប់ឲ្យបានចំនួនពលរដ្ឋត្រឡប់ពី ថៃ ខណៈបញ្ហាព្រំដែនកម្ពុជា-ថៃ នៅតែតានតឹង appeared first on Kampuchea Thmey Daily.

ការបរិច្ចាគឈាមលើកទី១៥ របស់ឯកឧត្តម ហ៊ុន ម៉ានី មានអត្ថន័យរំលឹកពីការលះបង់របស់សម្តេចតេជោ ក្នុងឱកាសខួប៤៨ នៃការចាកចេញរបស់សម្តេចឆ្ពោះទៅកាន់ការស្វែងរកការសង្រ្គោះជាតិ និងប្រជាជន ពីរបបប្រល័យពូជសាសន៍

Kang Tola — Fri, 20 Jun 2025 10:46:23 +0000

ការបរិច្ចាគឈាមលើកទី១៥ របស់ឯកឧត្តម ហ៊ុន ម៉ានី មានអត្ថន័យរំលឹកពីការលះបង់របស់សម្តេចតេជោ ក្នុងឱកាសខួប៤៨ នៃការចាកចេញរបស់សម្តេចឆ្ពោះទៅកាន់ការស្វែងរកការសង្រ្គោះជាតិ និងប្រជាជន ពីរបបប្រល័យពូជសាសន៍ឯកឧត្តម ហ៊ុន ម៉ានី ប្រធានសហភាពសហព័ន្ធយយុវជនកម្ពុជា និងជាប្រធានកិត្តិយសក្រុមបាល់ទាត់ពិធីករកីឡាកម្ពុជា បានអញ្ជើញចូលរួមក្នុងកម្មវិធីបរិច្ចាគឈាម ដែលបានប្រពឹត្តទៅនៅសួនច្បារខាងជើងព្រះអង្គចេក ព្រះអង្គចម ក្នុងខេត្តសៀមរាប នាព្រឹកថ្ងៃទី ២០ ខែមិថុនា ឆ្នាំ ២០២៥។

ឯកឧត្តមបានមានប្រសាសន៍ថា ថ្ងៃនេះត្រូវជាខួបទី៤៨ នៃការចាកចេញរបស់ពុក ដើម្បីទៅស្វែងរកការសង្រ្គោះជាតិ និងប្រជាជន ពីរបបប្រល័យពូជសាសន៍ ឃ្លាតឆ្ងាយពីម៉ែ និងក្រុមគ្រួសារនៅពេលនោះ ដោយយកអាយុជីវិតធ្វើជាដើមទុន ខ្ញុំបានមកចូលរួមបរិច្ចាគឈាម ជាមួយយុទ្ធនាការ «យើងរួមគ្នាបរិច្ចាគឈាម ដើម្បីសង្រ្គោះជីវិត» ដែលសហការរៀបចំដោយរដ្ឋបាលខេត្តសៀមរាប មជ្ឈមណ្ឌជាតិផ្តល់ឈាម សហភាពសហព័ន្ធយុវជនកម្ពុជា និងក្រុមបាល់ទាត់ពិធីករកីឡាកម្ពុជា នៅខេត្តសៀមរាប ដែលជាការបរិច្ចាគ លើកទី ១៥ របស់ខ្ញុំ។ ឈាមមានសារៈសំខាន់សម្រាប់សង្រ្គោះជីវិត មិនថាអ្នកជំងឺដែលត្រូវការវះកាត់ អ្នករងរបួសដែលត្រូវការឈាម និងស្រ្តីឆ្លងទន្លេដែលបាត់បង់ឈាម ហើយដែលមានតម្រូវការជារៀងរាល់ថ្ងៃ។

ទន្ទឹមនឹងនេះ ឯកឧត្តមសូមលើកទឹកចិត្ត ក៏ដូចជាអំពាវនាវដល់ពុកម៉ែ អ៊ុ ពូមីង បងប្អូនទាំងអស់សូមចូលរួមបរិច្ចាគឈាម ដើម្បីជួយសង្រ្គោះជីវិតអ្នកដែលត្រូវការឈាម។ នេះជាអំពើជាកុសលមួយដ៏មានតម្លៃ ដែលបានមគ្គផលខ្ពស់ណាស់ មិនថាយើងមានជំនឿសាសនាណាទេ។ ម្យ៉ាងទៀត នៅពេលបងប្អូនបរិច្ចាគឈាម បងប្អូននឹងនឹកឃើញដល់សមាជិកគ្រួសារ ឬមនុស្សជាទីស្រលាញ់របស់យើង ប្រសិនបើអ្នកត្រូវការឈាមនោះជាពួកគាត់វិញ តើអារម្មណ៍របស់ក្រុមគ្រួសារដែលកំពុងស្រែកដង្ហោយហៅរកជំនួយនោះយ៉ាងណា៕

The post ការបរិច្ចាគឈាមលើកទី១៥ របស់ឯកឧត្តម ហ៊ុន ម៉ានី មានអត្ថន័យរំលឹកពីការលះបង់របស់សម្តេចតេជោ ក្នុងឱកាសខួប៤៨ នៃការចាកចេញរបស់សម្តេចឆ្ពោះទៅកាន់ការស្វែងរកការសង្រ្គោះជាតិ និងប្រជាជន ពីរបបប្រល័យពូជសាសន៍ appeared first on Kampuchea Thmey Daily.