បុរសជនជាតិអ៊ុយក្រែនវ័យ៣៨ឆ្នាំ បានចាប់ផ្ដើមការងារដំបូងជាមួយបាល់ទាត់កម្ពុជា​នៅ​ឆ្នាំ២០១៦ ក្នុងនាមជាគ្រូជំនួយក្រុមជម្រើសជាតិកម្ពុជាអាយុក្រោម១៩ឆ្នាំ។ បន្ទាប់មក លោក​ត្រូវបានតែងជាគ្រូបង្វឹកក្រុមយុវជនអាយុក្រោម១៩ឆ្នាំរបស់ក្រុមភ្នំពេញក្រោន ហើយ​ឆ្នាំ២០១៧ ត្រូវបានតែងតាំងជាគ្រូបង្វឹកក្រុមធំរបស់ភ្នំពេញក្រោន។ យ៉ាង​ណា ការ​ដឹក​នាំ​លើក​ទី​១​នោះ ​លោកមិន​សូវ​ទទួល​បាន​លទ្ធផល​ល្អ​ទេ ​ដោយ​បាន​បញ្ចប់រដូវកាលឆ្នាំ២០១៧ ភ្នំពេញក្រោនឈរនៅលេខ៥ មាន៤២ពិន្ទុ​ បន្ទាប់ពីប្រកួត២២លើក ឈ្នះ១២ ស្មើ៦ ចាញ់៤។

ក្រោយធ្វើមិនល្អ លោក Oleg Starynskyi បាន​ចាក​ចេញ​ពី​ការងារ​នៅកម្ពុជា។ នៅ​ពេល​នោះ លោក​បានទៅធ្វើគ្រូជំនួយរបស់ក្លិបបាល់ទាត់ Speranța Nisporeni ក្នុងប្រទេសម៉ុលដាវី ក្នុង​ឆ្នាំ​២០១៩ បន្ទាប់មក​លោក​បានធ្វើជាគ្រូវិភាគរបស់ក្រុម​យុវជនអាយុក្រោម១៩ឆ្នាំ FC Shakhtar Donetsk ប្រទេសអ៊ុយក្រែន។

នៅចុងឆ្នាំ២០២០ លោក Oleg Starynskyi បានវិលមកចូលដឹកនាំក្រុមភ្នំពេញក្រោន​ជា​លើក​ទី​២​។ ក្នុងរយៈពេល​៤ឆ្នាំ​​ចុង​ក្រោយ​នេះ ភ្នំពេញ​ក្រោន ត្រូវ​បាន​ចាត់​ទុក​ជា​ក្លិប​មួយ​ដ៏​ជោគជ័យ​ទាំង​ក្នុងស្រុក និង​ក្រៅ​ស្រុក។ បុរសសញ្ជាតិអ៊ុយក្រែន​បាន​ជួយ​​ឲ្យ​ក្លិប​ភ្នំពេញ​ក្រោន បានសម្រេចសមិទ្ធផលជាច្រើន។ ក្នុងនោះ​ក្លិប​បាន​​ឈ្នះពានរង្វាន់លីគកំពូលកម្ពុជា២​រដូវ​កាល​ជាប់គ្នា, ឈ្នះពានរង្វាន់ Cambodian Super Cup ២ឆ្នាំជាប់គ្នា, ឈ្នះពានរង្វាន់ Cambodian League Cup ២ ឆ្នាំជាប់គ្នា។

លោក​បាន​ដឹក​នាំ ភ្នំពេញ​ក្រោន ឆ្លង​ផុត​វគ្គ​ជម្រុះ​​ ឆ្លង​ផុត​វគ្គ​សន្សំពិន្ទុ និង​ឈាន​ដល់​វគ្គ​ពាក់​កណ្តាល​ផ្តាច់​ព្រ័ត្រ ពាន​រង្វាន់ AFC Cup ប្រចាំ​ឆ្នាំ​២០២៣។

បច្ចុប្បន្ន លោក Oleg Starynskyi ត្រូវបានចាត់ទុកជាគ្រូបង្វឹកដ៏ជោគជ័យបំផុតនៅក្នុងប្រវត្តិសាស្រ្តបាល់ទាត់កម្ពុជា បន្ទាប់ពីលោកត្រឡប់មកចូលដឹកនាំក្លិបភ្នំពេញក្រោនលើកទី២៕

អត្ថបទ៖ ផា រតនា

The post ៤​ឆ្នាំក្រោម​ការ​ដឹក​នាំ​របស់​លោក Oleg ភ្នំពេញ​ក្រោន ជោគជ័យ​ខ្លាំង appeared first on Kampuchea Thmey Daily.

ថ្វី​បើ​បញ្ចប់​ភារកិច្ច​ត្រឹម​វគ្គ​នេះ​មែន ប៉ុន្តែ​បើ​ក្រឡែក​មើល​ដំណើរ​ដ៏​វែង​ឆ្ងាយ​​បង្ហាញ​យ៉ាង​ច្បាស់​ថា ភ្នំពេញ​ក្រោន បាន​បង្កើត​កំណត់​ត្រា​ជា​បន្ត​បន្ទាប់​​សម្រាប់​វិស័យ​បាល់ទាត់​កម្ពុជា​ដែល​បាន​ធ្វើ​ឲ្យ​​លោក Oleg Starynskyi ជា​គ្រូ​បង្វឹក​សញ្ជាតិ​អ៊ុយក្រែន​មាន​មោទនភាព។

លោកគ្រូ​បង្វឹក​ភ្នំពេញ​ក្រោន​បាន​លើក​ឡើង​ថា ៖​«ខ្ញុំ​ពិត​ជា​មាន​មោទនភាព​សម្រាប់​ក្រុម​ដែលបាន​លេង​ពានរង្វាន់​ AFC CUP។ វា​ពិបាក​នឹង​ជឿថា យើង​បាន​ធ្វើ​រឿង​ដ៏អស្ចារ្យ​ក្នុង​ការ​ប្រកួត AFC CUP។ ខ្ញុំពិតជាមានមោទនភាពចំពោះអ្វីដែលយើងបានធ្វើនេះ»។

ពិត​ណាស់ អ្វី​ដែល​ភ្នំពេញ​ក្រោន​បាន​បង្កើត​ឡើង​គឺ​​ជា​អ្វី​ថ្មី​​មិន​ធ្លាប់​មាន​ក្នុង​ប្រវត្តិ​សាស្ត្រ​បាល់ទាត់​កម្ពុជា។ លោក Oleg ធ្លាប់​បាន​និយាយ​ថា តាំង​ពី​ដំបូង​មក គ្មាន​ក្រុម​ណា​មួយ​ប្រចាំ​តំបន់​អាស៊ាន​មើល​ឃើញ​​ភ្នំពេញ​ក្រោន​នៅ​ក្នុង​ក្រសែ​ភ្នែក​ទេ ប៉ុន្តែ​​ភ្នំពេញ​ក្រោន​បាន​ធ្វើ​ឲ្យ​តំបន់​អាស៊ាន​បើក​ភ្នែក​ធំៗ។

មើល​កំណត់​ត្រា​ដែល​ភ្នំពេញ​ក្រោន​បាន​បង្កើត​៖

• ១. សហព័ន្ធកីឡា​បាល់ទាត់​ទ្វីប​អាស៊ី (AFC) បាន​ផ្តល់​​ឲ្យ​ក្លិប​តំណាង​កម្ពុជា​ត្រឹម​តែ​២៥​%​ប៉ុណ្ណោះ​​សម្រាប់​ការ​ចូល​រួម​ប្រកួត​ក្នុង​ពាន​រង្វាន់ AFC Cup។ ក្នុង​នាម​ជា​ក្រុម​ជើង​ឯក​លីគ​កំពូល​កម្ពុជា ភ្នំពេញ​ក្រោន​ត្រូវ​ប្រកួត​ជម្រុះ​បឋម​ជា​មួយ​ក្រុម​ជើង​ឯក​ឡាវ ដោយ​បាន​យក​ឈ្នះ Young Elephants ដោយ​លទ្ធផល ៣-០ ទើប​ទទួល​បាន​៥០​%​ស្មើ​នឹង​កន្លះ​កៅអី​ឡើង​ទៅ​វគ្គ​ជម្រុះ​ជុំ​ទី​២។
• ២. វគ្គ​ជម្រុះ​ជុំ​ទី២ ​ភ្នំពេញ​ក្រោន ​បាន​ប្រកួត​ជា​មួយ​ក្រុម Tampines Rovers របស់​ប្រទេស​សិង្ហបុរី​ នៅ​វគ្គ​ Play-off និង​បាន​យក​ឈ្នះ​​ដោយ​លទ្ធផល ៣-២ នៅ​ទឹក​ដី​សិង្ហបុរី ដើម្បី​ទទួល​បាន​១០០​%​ស្មើ​នឹង​១​កៅអី​ចូល​ទៅ​វគ្គ​ចែក​ពូល។
• ៣. ភ្នំពេញ​ក្រោន​បាន​ស្ថិត​នៅ​ក្នុង​ពូល F ដែល​មាន​ក្រុម​ Macarthur របស់​អូស្ត្រាលី ក្រុម Shan United របស់​មីយ៉ាន់ម៉ា និង​ក្រុម Dynamic Her Cebu របស់​ហ្វីលីពីន។ ភ្នំពេញ​ក្រោន​បាន​ឈ្នះ DH Cedub ០-៣ នៅ​ទឹក​ដី​ហ្វីលីពីន និងឈ្នះ ៤-០ នៅទឹក​ដី​កម្ពុជា។ ភ្នំពេញ​ក្រោន​​បាន​ឈ្នះ Shan United ៤-០ នៅ​ទឹកដី​កម្ពុជា និង​ចាញ់ ២-១ នៅ​ទឹក​ដី​មីយ៉ាន់ម៉ា។ ភ្នំពេញ​ក្រោន​បានឈ្នះ​ Macarthur ៣-០ នៅ​ទឹក​ដី​កម្ពុជា និង​ចាញ់៥-០ នៅ​ទឹក​ដី​អូស្ត្រាលី។ សរុប​ទាំង​​៦​ប្រកួត​​វគ្គ​សន្សំ​ពិន្ទុ​ក្នុង​ពូល ភ្នំពេញ​ក្រោន បាន​ឈ្នះ​៤ និង​ចាញ់​២ រក​បាន​១២​ពិន្ទុ​ ឈរ​លេខ​២​ក្នុង​ពូល។
• ៤. ភ្នំពេញ​ក្រោន បាន​ឡើង​ទៅ​កាន់​វគ្គ​ពាក់​កណ្តាល​ផ្តាច់​ព្រ័ត្រ​ប្រចាំ​តំបន់​អាស៊ាន​ក្នុង​នាម​ជា​ក្រុម​លេខ​២​ល្អ​បំផុត​។ វគ្គ​នេះ​ការ​ប្រកួត​តែ​១​ជើង​ប៉ុណ្ណោះ​ដោយ​លេង​នៅ​ទឹក​ដី​អូស្ត្រាលី ភ្នំពេញ​ក្រោន​បាន​ចាញ់ Central Coast Mariners ដោយ​លទ្ធផល ៤-០ ដើម្បី​បញ្ចប់​ភារកិច្ច​ត្រឹម​វគ្គ​នេះ។

កំណត់​ត្រា​លើ​នេះ​គឺ​​​ជា​អ្វី​ដែល​លោក​គ្រូ​ Oleg Starynskyi ពិបាក​នឹង​ជឿ​ថា ភ្នំពេញ​ក្រោន​​​​អាច​បង្កើត​បាន និង​គួរ​ជាទីមោទនភាព​សម្រាប់​វិស័យ​បាល់ទាត់​កម្ពុជា៕

អត្ថបទ៖ វីរបុត្រ

The post លោក Oleg៖«ពិបាកនឹងជឿដែលភ្នំពេញក្រោនធ្វើរឿងដ៏អស្ចារ្យនៅ AFC Cup» appeared first on Kampuchea Thmey Daily.

ភ្នំពេញក្រោន​ធ្វើ​បានយ៉ាងល្អ​ក្នុង​ពាន​រង្វាន់​ AFC Cup ​ក្នុង​ដំណើរយ៉ាងវែងឆ្ងាយតាំងពីវគ្គជម្រុះបឋមរហូតដល់វគ្គពាក់កណ្ដាលផ្ដាច់ព្រ័ត្រក្នុងតំបន់អាស៊ាន។

ការ​ប្រកួត​វគ្គទី១ ភ្នំពេញក្រោនមិនអាចបង្កើតល្អណាមួយក្នុងការស៊ុតសំដៅទីគូប្រកួតបានទេ។ ផ្ទុយទៅវិញត្រូវបានក្រុម Central Coast Mariners បើកការនាំមុខ ១-០ នៅនាទី៣៧ ស៊ុតបញ្ចូលដោយកីឡាករ Jing Reec។ នៅ​​វគ្គទី២ ក្រុមម្ចាស់​ផ្ទះ​នៅតែបន្តសម្រុក និង​ព្យាយាមបង្កើត​ឱកាស​ជាច្រើន។ ​នាទី៧២ រក​បាន​គ្រាប់បាល់ទី២ នាទី៧៨​រក​បាន​​គ្រាប់​ទី៣ និង​នាទី​៩០+៥ រក​បាន​គ្រាប់​ទី៤ ​​ដោយ​កីឡាករ​អង់គ្លេស​ Ryan Edmondson ​ដែល​ទើប​ប្តូរ​ចូល​រក​បាន​៣​គ្រាប់​ម្នាក់ឯង។

ក្រុម Central Coast Mariners បាន​ឡើង​ទៅ​ជួប​ក្រុម​អូស្ត្រាលី​ជា​មួយ​គ្នា​គឺ Macarthur FC វគ្គផ្ដាច់ព្រ័ត្រ AFC Cup ​ប្រចាំ​តំបន់អាស៊ាន នៅថ្ងៃទី២២ ខែកុម្ភៈ ឆ្នាំ២០២៤។ ស្រប​ពេល ភ្នំពេញក្រោន ជា​ក្លិប​តំណាង​កម្ពុជា​ និង ក្រុម Sabah មកពីម៉ាឡេស៊ី ធ្លាក់ត្រឹមវគ្គពាក់ព្រ័ត្រនៅទឹកដីប្រទេសអូស្រ្ដាលីដូចគ្នា៕

អត្ថបទ៖ ផា រតនា

The post ភ្នំពេញក្រោនចប់ភារកិច្ច AFC Cup ត្រឹមវគ្គពាក់កណ្តាលផ្តាច់ព្រ័ត្រតំបន់អាស៊ាន appeared first on Kampuchea Thmey Daily.

ការប្រកូតក្នុងវគ្គទី១ក្រុម Macarthur បានបើកការនាំមុខមុន ១-០ នៅនាទី៤០ ស៊ុតបញ្ចូលដោយកីឡាករ Davila ចូលដល់វគ្គទី២ គ្រាប់បាល់២គ្រាប់ទៀតបន្តកើតមានឡើង ក្រោយការស៊ុតបញ្ចូលទី២គ្រាប់ម្នាក់ឯងពី Jed Drew នៅនាទី៤៦និងនាទី៨០។ ក្នុងការប្រកួតនេះក្រុម Sabah ក៏បានព្យាយាមបង្កើតឱកាស​ ដើម្បីរកគ្រាប់បាល់បំប៉ោងសំណាញ់ទីដែរ ប៉ុន្តែធ្វើមិនបានល្អសោះ ក្រោយការព្យាយាមស៊ុត១១លើក តែមិនចំគោលដៅសូម្បី១លើក។

ក្រោយបញ្ចប់ការប្រកួតក្រុម Macarthur FC បានកក់កៅអីក្នុងវគ្គផ្ដាច់ព្រ័ត្រ AFC Cup ក្នុងតំបន់អាស៊ាន ជាលើកដំបូងក្នុងប្រវត្តិសាស្រ្ដរបស់ខ្លួន ខណៈត្រូវរង់ចាំមើលលទ្ធផលការប្រកួតរបស់ក្រុម Central Coast Mariners និងក្រុមភ្នំពេញក្រោន។

ក្រុម Macarthur សុទ្ធតែស្គាល់ពីសមត្ថភាពក្រុមទាំង២នេះច្បាស់ណាស់ ក្នុងនោះដោយសារពួកគេធ្លាប់ជួបក្រុមភ្នំពេញក្រោន ២លើកក្នុងការប្រកួតវគ្គសន្សំពិន្ទុក្នុងពូល។ ចំណែក​ក្រុម Central Coast Mariners នៅលីគ​អូស្ត្រាលី​ជា​មួយ​គ្នា។

បើមិនមានការប្រែប្រួលអ្វីទេ ការប្រកួតវគ្គផ្ដាច់ព្រ័ត្រ AFC Cup ក្នុងតំបន់អាស៊ាននឹងធ្វើឡើងនៅថ្ងៃទី២២ ខែកុម្ភៈ ឆ្នាំ២០២៤៕

អត្ថបទ៖ ផា រតនា

The post Macarthur ឡើងវគ្គផ្ដាច់ព្រ័ត្រ AFC Cup ក្នុងតំបន់អាស៊ានលើកដំបូង appeared first on Kampuchea Thmey Daily.

មុនជួបជាមួយភ្នំពេញក្រោន ក្រុម Central Coast Mariners ធ្វើមិនសូវបានល្អទេក្នុងការប្រកួត២លើកចុងក្រោយក្នុង​លីគកំពូលអូស្រ្ដាលី ប៉ុន្តែពួកគេក៏នៅតែជាក្រុមដ៏គ្រោះថ្នាក់។ ពួកគេមានផលចំណេញការប្រកួតធ្វើនៅទឹកដីរបស់ខ្លួន នៅកីឡដ្ឋាន Industree Group ​ដែល​ពួកគេមិន​ចាំបាច់ធ្វើដំណើរឆ្ងាយ និងសម្របខ្លួន​នឹង​បញ្ហាអាកាសធាតុ​ទេ។

ចំណែកក្រុមតំណាងឲ្យកម្ពុជា ភ្នំពេញក្រោន បាន​ធ្វើដំណើរទៅទឹកដីអូស្រ្ដាលីលើកទី២ បន្ទាប់ពីការប្រកួត​​ជា​មួយក្រុម Macarthur ក្នុងវគ្គសន្សំពិន្ទុក្នុងពូល ​ប៉ុន្តែក្រុមទាំងមូល​បាន​ប្តេជ្ញា​​​​អស់ពីលទ្ធភាព​ដើម្បីស្វែងរក​ឱកាស​ឡើងទៅវគ្គបន្ត។

លោក Oleg Starynskyi គ្រូបង្វឹកភ្នំពេញក្រោន បាននិយាយាថា៖«យើងបានចំណាយពេលវេលា និងកម្លាំងច្រើន​សម្រាប់ការមកដល់ទីនេះ ប៉ុន្តែយើងក៏​រំភើប​ដែរ។ ការប៉ះ Central Coast Mariners គឺ​តានតឹងខ្លាំង»។

លោក​រៀប​រាប់​ថា ៖«នេះជាការប្រកួត​តែមួយជើង អ្នកឈ្នះឡើងទៅវគ្គបន្ត។ វានឹងក្លាយ​ជាការប្រកួតដ៏អស្ចារ្យ ព្រោះក្រុមអូស្រ្តាលីនេះគឺជាក្រុម​លេចធ្លោ​ជាង​គេ​​ ប្រៀបធៀប​នឹង​​ក្រុមផ្សេងៗ។ យ៉ាង​ណា បាល់ទាត់អ្វីៗក៏អាចកើតឡើងដែរ។ យើងសង្ឃឹមថា យើងនឹង​ធ្វើវាបាន ព្រោះគ្រប់គ្នា​មកទីនេះបានត្រៀមខ្លួនរួចជាស្រេច»។

កំណត់ត្រា៥ប្រកួតចុងក្រោយរបស់ក្រុម Central Coast Mariners
-Central Coast Mariners ២-១ Melbourne City FC
-Central Coast Mariners ២-០ Brisbane Roar
-Adelaide United ០-៤ Central Coast Mariners
-Wellington Phoenix ០-០ Central Coast Mariners
-Central Coast Mariners ៣-១ Sydney FC
កំណត់ត្រា៥ប្រកួតចុងក្រោយរបស់ក្រុម ភ្នំពេញក្រោន
-គិរីវង់សុខសែនជ័យ ១-៤ ភ្នំពេញក្រោន (ពានរង្វាន់លីគកំពូលកម្ពុជា)
-ភ្នំពេញក្រោន ៩-០ ត្បូងឃ្មុំ (ពានរង្វាន់សម្ដេចតេជោ)
-ភ្នំពេញក្រោន ១-០ បឹងកេត (ពានរង្វាន់លីគកំពូលកម្ពុជា)
-ព្រះខ័នរាជស្វាយរៀង ៣-២ ភ្នំពេញក្រោន (ពានរង្វាន់លីគកំពូលកម្ពុជា)
-គិរីវង់សុខសែនជ័យ ០-២ ភ្នំពេញក្រោន (ពានរង្វាន់សម្ដេចតេជោ)

ក្រុមភ្នំពេញក្រោន​អវត្តមានខ្សែការពារឆ្នើម ជួន ចាន់ចាវ ដោយសារ​បញ្ហារបួសអំឡុងពេលប្រកួតជាមួយក្រុម អាយ អេស អាយ ខណៈ​ខ្សែ​ប្រយុទ្ធ​គ្រោះ​ថ្នាក់​របស់ Central Coast Mariners គឺ​កីឡាករ Marco Tulio បានផ្លាស់ទៅក្លិប Kyoto Sanga របស់ប្រទេសជប៉ុន៕

អត្ថបទ៖ ផា​ រតនា

The post ល្ងាចនេះ ភ្នំពេញក្រោន ឬ Central Coast ជើងឯក AFC Cup? appeared first on Kampuchea Thmey Daily.

ការ​លក់​ខ្សែ​ប្រយុទ្ធ​ដ៏​ល្អ​នេះ​​បាន​កើត​មាន​ឡើង​មុន​ពេល​ក្រុម​អូស្ត្រាលី​​​ត្រូវ​ប្រកួត​ជា​មួយ​ក្លិប​របស់​កម្ពុជា​ ភ្នំពេញ​ក្រោន ក្នុង​វគ្គ​ពាក់​កណ្តាល​ផ្តាច់​ព្រ័ត្រ​ប្រចាំ​តំបន់​អាស៊ាន​នៃ​ពាន​រង្វាន់ AFC Cup។

នៅ​វគ្គ​សន្សំ​ពិន្ទុ​ក្នុង​ពូល​ កីឡាករប្រេស៊ីល Marco ​បាន​បង្កើត​កំណត់​ត្រា​ដោយ​រក​បាន៨​គ្រាប់​​ក្លាយ​ជា​កីឡាករ​រក​បាន​គ្រាប់​បាល់​ច្រើន​ជាង​គេ​​នាំ​មុខ​កីឡាករ Shintaro Shimizu ខ្សែ​ប្រយុទ្ធ​របស់​ភ្នំពេញ​ក្រោន​ដែល​រក​បាន​៧​គ្រាប់។

Marco បាន​ចូល​រួម​ជា​មួយ​ក្លិប Central Coast Mariners កាល​ពី​ខែ​កញ្ញា ឆ្នាំ​២០២២​ដោយ​ជួយ​ក្លិប​ឈ្នះ​ជើង​ឯក​លីគ​កំពូល​អូស្ត្រាលី​កាល​ពី​រដូវ​កាល​មុន។ រូប​គេ​បាន​​បង្ហាញ​ខ្លួន​លើ​ទី​លាន១៤​ប្រកួត​រក​បាន​១២​គ្រាប់។ ​

កីឡាករ Tulio បាន​អរគុណ​ដល់​ក្លិប Mariners និង​និយាយ​ទៅ​កាន់​អ្នក​គាំទ្រ​ថា ៖«ខ្ញុំសូម​អរគុណ​ដល់​អ្នក​រាល់​គ្នា​នៅ​ក្លិប Mariners សម្រាប់​រយៈ​ពេល​កន្លង​ទៅ​។ ខ្ញុំ​មាន​ពេល​វេលា​ដ៏​អស្ចារ្យ​​ជា​មួយ​ក្លិប​ដោយ​បាន​ឈ្នះជើងឯក​កាល​ពី​រដូវ​កាល​មុន ហើយ​ការ​គាំទ្រ​របស់​អ្នក​ពិត​ជា​អស្ចារ្យ​ណាស់​សម្រាប់​ខ្ញុំ»៕

ប្រែសម្រួល៖ វីរបុត្រ
ប្រភព៖ ccmariners.com.

The post មុនប៉ះភ្នំពេញក្រោន ក្លិប Mariners លក់ខ្សែប្រយុទ្ធដ៏ល្អ Tulio ទៅលីគជប៉ុន appeared first on Kampuchea Thmey Daily.

ភ្នំពេញក្រោន ត្រូវបន្តធ្វើការធ្ងន់ក្នុងវគ្គជម្រុះ៤ក្រុមចុងក្រោយ ប្រចាំ​តំបន់អាស៊ាន ដោយ​ត្រូវជួបក្រុមខ្លាំងរបស់អូស្រ្ដាលី​ទៀត​គឺ​ Central Coast Mariners FC ជាក្រុមឈរ​លេខ១ក្នុងពូល G ដែល​ពួក​គេ​​ឆ្លង​កាត់​៦​ប្រកួត​គឺ​ ឈ្នះ៤ ចាញ់១ ស្មើ១ មាន១៥ពិន្ទុ។

Central Coast Mariners FC ជា​ក្រុម​ទី២​របស់​អូស្ត្រាលី ដែល​ភ្នំពេញក្រោន ជួប​ក្នុង​ពាន​ AFC Cup ឆ្នាំ​២០២៣​ បន្ទាប់​ពី​ជួប​ក្រុម​ Macarthur FC នៅ​វគ្គ​សន្សំ​ពិន្ទុ​ក្នុង​ពូល។ ក្រុម Central Coast Mariners បច្ចុប្បន្នកំពុងឈរនៅចំណាត់ថ្នាក់៩ ក្នុងលីគកំពូល​អូស្រ្ដាលី ដោយ​៧​ប្រកួត​កន្លង​ទៅ​​ ពួក​គេ​ឈ្នះ២ ចាញ់១ ស្មើ៤ ទើប​មាន៧ពិន្ទុ។

ក្រុម Central Coast Mariners មាន​កីឡាករ​បរទេស​៥រូប ​គឺ​ខ្សែការពារសញ្ជាតិប្រេស៊ីល Mikael Doka, ខ្សែប្រយុទ្ធសញ្ជាតិប្រេស៊ីល Marco Túlio, ខ្សែប្រយុទ្ធសញ្ជាតិកូឡុំប៊ី Ángel Torres និងខ្សែបម្រើសញ្ជាតិហ្វីជី Dan Hall។

ក្រុមទាំង២សុទ្ធ​តែមានខ្សែប្រយុទ្ធឆ្នើមដូចគ្នា​គឺ​​ខ្សែប្រយុទ្ធសញ្ជាតិប្រេស៊ីល Marco Túlio កំពុងឈរលេខ១ ក្នុងតារាង​​កីឡាករ​​រក​​​គ្រាប់​បាល់​ច្រើន​ជាង​គេ​ AFC Cup ដោយ​រកបាន៨គ្រាប់ តាម​ពី​ក្រោយ​​ដោយ​​ខ្សែ​ប្រយុទ្ធ​ភ្នំពេញ​ក្រោន​ Shintaro Shimizu រកបាន៧គ្រាប់។

ការ​ប្រកួត​វគ្គ​ពាក់​កណ្តាល​ផ្តាច់​ព្រ័ត្រ​ប្រចាំ​តំបន់​អាស៊ាន​មាន​តែ​១​ជើង​ប៉ុណ្ណោះ​ដោយ​ភ្នំពេញ​ក្រោន​ត្រូវ​ធ្វើ​ដំណើរ​ទៅ​ទឹក​ដី​របស់ Central Coast Mariners ​ថ្ងៃ​ទី​១៣ ខែ​កុម្ភៈ ឆ្នាំ​២០២៤៕​

អត្ថបទ៖ ផា រតនា

The post ភ្នំពេញក្រោន ប៉ះក្រុមខ្លាំង Central Coast វគ្គពាក់កណ្តាលផ្តាច់ព្រ័ត្រ AFC Cup តំបន់អាស៊ាន appeared first on Kampuchea Thmey Daily.

ការ​ប្រកួត​វគ្គ​សន្សំ​ពិន្ទុ​ក្នុង​ពូល F ចុង​ក្រោយ ភ្នំពេញ​ក្រោន​បាន​ចាញ់​​ម្ចាស់​ផ្ទះ​មីយ៉ាន់ម៉ា Shan United ​ដោយ​លទ្ធផល ២-១ ដើម្បី​រក​បាន​១២​ពិន្ទុ ​​នៅ​តែ​បន្ត​ចំណាត់​ថ្នាក់​លេខ​២​ ខណៈក្រុម​អូស្ត្រាលី​​ Macarthur FC ឈរ​លេខ​១ មាន​១៥ពិន្ទុ។ ដូច្នេះក្រុម​របស់​អូស្ត្រាលី​ Marcarthur FC បាន​ឡើង​ទៅ​កាន់​វគ្គ​បន្ត​ក្នុងនាម​ជា​ក្រុម​លេខ​១​ក្នុង​ពូល F ខណៈ​ក្រុម​ភ្នំពេញ​ក្រោន​បាន​ឡើង​ទៅ​កាន់​វគ្គ​បន្ត​ក្នុង​នាមជា​ក្រុម​ចំណាត់​ថ្នាក់​លេខ​២​​ល្អ​បំផុត។

ឆ្លង​កាត់​៦​ប្រកួត​វគ្គ​សន្សំ​ពិន្ទុ​ក្នុង​ពូល ភ្នំពេញ​ក្រោន បាន​ឈ្នះ​៤​ប្រកួត​ និង​ចាញ់​​២​ប្រកួត ប៉ុន្តែ​បូក​ទាំង​២​ប្រកួត​នៅ​វគ្គជម្រុះ ក្លិប​តំណាង​កម្ពុជា​បាន​ឈ្នះ​​៦​ប្រកួត​ក្នុង​ពាន​រង្វាន់ AFC Cup ឆ្នាំ​២០២៣។

នៅ​ក្នុង​ប្រវត្តិ​សាស្ត្រ​ ក្លិប​បាល់ទាត់​កម្ពុជា​មិន​ធ្លាប់​បាន​ឆ្លង​ផុត​វគ្គ​សន្សំ​ពិន្ទុ​ក្នុង​ពូល​នៃ​ពាន​រង្វាន់ AFC Cup ឡើយ​ គឺ​មាន​តែ​ភ្នំពេញ​ក្រោន​​ដែល​បាន​ក្លាយ​ជា​ក្រុម​​កម្ពុជា​ដំបូង​គេ​បានឡើង​ទៅ​កាន់​វគ្គ​បន្ត។

ក្រុម​៤​ដែល​បាន​ឡើង​ទៅ​កាន់​វគ្គ​ពាក់​កណ្តាល​ផ្តាច់​ព្រ័ត្រ​ប្រចាំ​តំបន់​អាស៊ាន​មាន Central Coast Mariners (អូស្ត្រាលី) លេខ១ពូល G ក្រុម​ Sabah (ម៉ាឡេស៊ី) លេខ១ពូល H ក្រុម Macarthur FC លេខ១ពូល F និង​ក្រុម ភ្នំពេញ​ក្រោន​ បាន​ឡើង​ទៅ​ក្នុង​នាម​ជា​ក្រុម​លេខ២​​ល្អ​បំផុត​ក្នុង​ពូល៕

អត្ថបទ៖ វីរបុត្រ

The post អបអរសាទរ! ភ្នំពេញក្រោន បានបង្កើតប្រវត្តិសាស្ត្រឡើងវគ្គបន្តពាន AFC Cup appeared first on Kampuchea Thmey Daily.