ថ្ងៃ​ឈប់​សម្រាក​នៃ​លីគ​បាល់ទាត់​របស់​ប្រទេស​ទូទាំង​អាស៊ី គឺ​ជា​​ពេល​វេលា​សម្រាប់​​ក្រុម​បាល់ទាត់​ជម្រើស​ជាតិ​ប្រមូល​ផ្តុំ​ដើម្បី​ប្រកួត​ពាន​រង្វាន់​អន្តរជាតិ ឬ​មិត្តភាព​អន្តរជាតិ ប៉ុន្តែ​នៅ​ពេល​នេះ AFC បាន​សម្រេច​បង្កើត​ពាន​រង្វាន់​ Nations League ដែល​ងាយ​ស្រួល​ក្រុម​ជម្រើស​ជាតិ​ទូទាំង​អាស៊ី​ប្រកួត​អន្តរជាតិ។

សហព័ន្ធ​កីឡា​បាល់ទាត់​អាស៊ី​គោល​បំណង​នៃការ​បង្កើត​ពាន​រង្វាន់​នេះ​ឡើង​គឺ​ដើម្បី​ធានា​ឲ្យ​បាន​នូវការ​ប្រកួត​អន្តរជាតិ​ទៀង​ទាត់​សម្រាប់​ក្រុម​ជម្រើស​ជាតិ​ទាំង​អស់​អំឡុង FIFA Day, ជំរុញ​ឲ្យ​ក្រុម​ជម្រើស​ជាតិ​នីមួយ​ៗ​កាន់​តែ​បង្កើន​គុណភាព សមត្ថភាព ​និង​ទាក់ទាញ​អ្នក​គាំទ្រ។

អគ្គលេខាធិការ​សហព័ន្ធ​កីឡា​បាល់ទាត់​អាស៊ី លោក Datuk Seri Windsor John បាន​និយាយ​ថា ៖«ពាន​ AFC Nations League ជា​ជំហាន​មួយ​ដ៏​មាន​សារសំខាន់​ឆ្ពោះ​ទៅ​រក​ការ​ជំរុញ គាំទ្រ និង​អភិវឌ្ឍ​ដល់​សមាជិក​អាស៊ី​ទាំង ៤៧ ​ប្រទេស។ ចន្លោះ​​ថ្ងៃ FIFA Day យើង​មាន​កម្មវិធី​ប្រកួត​ច្បាស់​លាស់ ទៀងទាត់ ដើម្បី​ឲ្យ​​ក្រុម​ជម្រើស​ជាតិ​នីមួយៗ​​កាន់​តែ​មាន​គុណភាព​ល្អ​ប្រសើរ»។

ព័ត៌តមាន​លំអិត​នៃ​កម្មវិធី​ប្រកួត​ពាន​រង្វាន់​មិត្តភាព​អន្តរជាតិ AFC Nations League មិន​ទាន់​ត្រូវ​បាន​ប្រកាស​ជា​ផ្លូវ​ការ​ឡើយ ប៉ុន្តែ​តាមរូប​ភាព​ផ្សព្វផ្សាយ​ ក្រុម​បាល់ទាត់​ជម្រើស​ជាតិ​កម្ពុជា​ស្ថិត​នៅ League C ដែល​មាន ១២​ប្រទេស ហើយ League A និង League B ក៏​មាន​ ១២ ប្រទេស​ដូច​គ្នា ខណៈ League D មាន​ ១០ ​ប្រទេស។

ពាន​រង្វាន់​ AFC Nations League ស្រដៀង​ទៅ​នឹង​ពាន​រង្វាន់ UEFA Nations League របស់​ទ្វីប​អឺរ៉ុប​បាន​ចាប់​ផ្តើម​កាល​ពី​ឆ្នាំ ២០១៨ ដែល​ក្រុម​ជម្រើស​ជាតិ​អឺរ៉ុប​ទាំង​អស់​ប្រកួត​នៅ​ថ្ងៃ​ FIFA Days៕

អត្ថបទ៖ វីរបុត្រ

The post AFC បង្កើត​ពាន​ថ្មី Nations League ដោយ​កម្ពុជា​ស្ថិត​នៅ League C appeared first on Kampuchea Thmey Daily.