AFC U23 Asian Cup Archives - Kampuchea Thmey Daily

ផ្លូវការ រកឃើញ ក្រុម ១៦ ឡើងជុំចុងក្រោយពាន AFC U23 Asian Cup 2026

chean virakbot — Wed, 10 Sep 2025 01:43:22 +0000

ការប្រកួតបាល់ទាត់ពានយុវជនអាស៊ី អាយុ២៣ ឆ្នាំ AFC U23 Asian Cup 2026 បានរកឃើញក្រុមចំនួន ១៦ ឡើងទៅជុំចុងក្រោយហើយ បន្ទាប់ពីប្រកួតម្រុះក្នុងពូលបានបញ្ចប់កាលពីថ្ងៃទី៩ ខែកញ្ញា ឆ្នាំ ២០២៥។

នៅវគ្គ ១៦ ក្រុមចុងក្រោយ នឹងត្រូវធ្វើការចាប់ឆ្នោតជ្រើសរើសជា ៤ ពូល ដែលក្នុង ១ ពូលមាន ៤ ក្រុម។ សម្រាប់ការប្រកួតនៅប្រទេសអារ៉ាប៊ីសាអ៊ូឌីត ចាប់ពីថ្ងៃ ៧ ដល់ ២៥ ខែមករា ឆ្នាំ ២០២៦។

អារ៉ាប៊ីសាអ៊ូឌីត (ម្ចាស់ផ្ទះ)
ហ៊្សក់ដានី លេខ១ពូល A
ជប៉ុន លេខ ១ ពល B
វៀតណាម លេខ ១ ពូល C
អូស្ត្រាលី លេខ ១ ពូល D
គីជីស្ថាន លេខ ១ ពូល E
ថៃ លេខ ១ ពូល F
អ៉ីរ៉ាក់ លេខ ១ ពូល G
កាតា លេខ ១ ពូល H
អ៉ីរ៉ង់ លេខ ១ ពូល I
កូរ៉េខាងត្បូង លេខ ១ ពូល J
ស៊ីរី លេខ ១ ពូល K
ចិន លេខ ២ ល្អបំផុត
អ៊ូបេគីស្ថាន លេខ ២ ល្អបំផុត
លីបង់ លេខ ២ ល្អបំផុត
អារ៉ាប់រួម លេខ ២ ល្អបំផុត

អត្ថបទ៖ វីរបុត្រ

The post ផ្លូវការ រកឃើញ ក្រុម ១៦ ឡើងជុំចុងក្រោយពាន AFC U23 Asian Cup 2026 appeared first on Kampuchea Thmey Daily.

កម្ពុជា បង្កើតស្ថិតិថ្មីចំនួន ៣ ក្នុងពាន AFC U23 Asian Cup ទោះមិនបានឡើងជុំចុងក្រោយ

chean virakbot — Tue, 09 Sep 2025 14:34:37 +0000

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) បានបញ្ចប់ព្រឹត្តិការណ៍ប្រកួតជម្រុះក្នុងពូល G ពានរង្វាន់ AFC U23 Asian Cup ដោយបានបង្កើតស្ថិតិថ្មីគួរឲ្យចាប់អារម្មណ៍ បើទោះជាមិនបានឡើងទៅជុំចុងក្រោយ។

ស្ថិតិថ្មីទី១

ក្រុមយុវជនកម្ពុជា បានបង្កើតស្ថិតិមិនចាញ់សោះ នៅវគ្គជម្រុះក្នុងពូល នាឆ្នាំ ២០២៥។ កម្ពុជា បានឈ្នះ ប៉ាគីស្ថាន ១-០, ស្មើ អ៉ីរ៉ាក់ ០-០ និងស្មើ អូម៉ង់ ០-០។ នេះជាលើកដំបូងដែលកម្ពុជាមិនចាញ់សោះក្នុងប្រវត្តិសាស្ត្ររបស់ខ្លួន បន្ទាប់ពីធ្លាប់ចូលរួមប្រកួតវគ្គជម្រុះដូចគ្នាចំនួន ៦ លើកកន្លងមកគឺតែងតែមាន ឈ្នះ ស្មើ និង ចាញ់។

ស្ថិតិទី២

ក្រុមយុវជនកម្ពុជា បានរក្សាសំណាញ់ទីស្អាត (Clean Sheet) ៣ ប្រកួតជាប់គ្នា ជាលើកដំបូង ដោយគ្មានដៃគូណាស៊ុតចូលកម្ពុជាបានឡើយនៅឆ្នាំ ២០២៥។ ឆ្នាំ ២០១៣ កម្ពុជា បានប្រកួត ៥ លើកគឺ រកបាន ៦ គ្រាប់ និងត្រូវដៃគូស៊ុតចូល ១៥ គ្រាប់។ ឆ្នាំ ២០១៦ កម្ពុជា បានប្រកួត ៣ លើកគឺ រកបាន ៥ គ្រាប់ និងត្រូវបានដៃគូស៊ុតចូល ៧ គ្រាប់។ ឆ្នាំ ២០១៨ កម្ពុជា បានប្រកួត ៣ លើក គឺ រកបាន ១ គ្រាប់ និងត្រូវបានដៃគូស៊ុតចូល ២ គ្រាប់។ ឆ្នាំ ២០២០ កម្ពុជា បានប្រកួត ៣ លើក គឺ រកបាន ២ គ្រាប់ និងត្រូវបានដៃគូស៊ុតចូល ១៣ គ្រាប់។ ឆ្នាំ ២០២២ កម្ពុជា បានប្រកួត ២ លើក គឺ រកបាន ៤ គ្រាប់ និងត្រូវបានដៃគូស៊ុតចូល ៦ គ្រាប់។ ឆ្នាំ ២០២៤ កម្ពុជា បានប្រកួត ៣ លើក គឺ រកបាន ៥ គ្រាប់ និងត្រូវបានដៃគូស៊ុតចូល ៩ គ្រាប។ ឆ្នាំ ២០២៥ កម្ពុជា បានប្រកួត ៣ លើកគឺ រកបាន ១ គ្រាប់ និងមិនមានដៃគូស៊ុតចូលទេ។

ស្ថិតិថ្មីទី៣

ក្រុមយុវជនកម្ពុជា រកបាន ៥ ពិន្ទុជាលើកដំបូងនៅក្នុងប្រវត្តិសាស្ត្ររបស់ខ្លួន បន្ទាប់ពីធ្លាប់ចូលរួមប្រកួត ៦ លើកកន្លងមកគឺមិនធ្លាប់បានពិន្ទុច្រើនបែបនេះ។ លើកទី១ ឆ្នាំ ២០១៣ កម្ពុជា រក ៤ ពិន្ទុ។ លើកទី២ ឆ្នាំ ២០១៦ កម្ពុជា រកបាន ៣ ពិន្ទុ។ លើកទី៣ ឆ្នាំ ២០១៨ កម្ពុជា រកបាន ៤ ពិន្ទុ។ លើកទី៤ ឆ្នាំ ២០២០ កម្ពុជា រកបាន ១ ពិន្ទុ។ លើកទី៥ ឆ្នាំ ២០២២២ កម្ពុជា រកបាន ៣ ពិន្ទុ និងលើកទី៦ ឆ្នាំ ២០២៤ កម្ពុជា រកបាន ៤ ពិន្ទុ ហើយលើកទី៧ ឆ្នាំ ២០២៥ កម្ពុជា រកបាន ៥ ពិន្ទុ។

ស្ថិតិរបស់កម្ពុជា វគ្គជម្រុះពានរង្វាន់ AFC U23 Asian Cup

ឆ្នាំ ២០១៣ ធ្លាក់វគ្គជម្រុះក្នុងពូល ក្រោយ ឈ្នះ ១ ប្រកួត ស្មើ ១ ប្រកួត និងចាញ់ ៣ ប្រកួត
ឆ្នាំ ២០១៦ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត និងចាញ់ ២ ប្រកួត
ឆ្នាំ ២០១៨ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត ស្មើ ១ ប្រកួត និងចាញ់ ១ ប្រកួត
ឆ្នាំ ២០២០ ធ្លាក់វគ្គជម្រុះក្នុងពូល ក្រោយស្មើ ១ ប្រកួត និងចាញ់ ២ ប្រកួត
ឆ្នាំ ២០២២ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត និងចាញ់ ១ ប្រកួត
ឆ្នាំ ២០២៤ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត ស្មើ១ និងចាញ់ ១ ប្រកួត
ឆ្នាំ ២០២៥ ធ្លាក់វគ្គជម្រុះក្នុងពូល ក្រោយឈ្នះ១ និងស្មើ ២

អត្ថបទ៖ វីរបុត្រ

The post កម្ពុជា បង្កើតស្ថិតិថ្មីចំនួន ៣ ក្នុងពាន AFC U23 Asian Cup ទោះមិនបានឡើងជុំចុងក្រោយ appeared first on Kampuchea Thmey Daily.

ខ្សែប្រយុទ្ធដ៏គ្រោះថ្នាក់ម្នាក់របស់ U23 អ៉ីរ៉ាក់ មកពីលីគកំពូលអារ៉ាប៊ីសាអ៊ូឌីត ប៉ះ កម្ពុជា យប់នេះ

chean virakbot — Tue, 09 Sep 2025 01:17:00 +0000

កីឡាករ Ali Jasim Elaibi ជាខ្សែប្រយុទ្ធដ៏លេចធ្លោរបស់ ក្រុមបាល់ទាត់ជម្រើសជាតិ អ៉ីរ៉ាក់ អាយុក្រោម ២៣ (U23) ក្នុងព្រឹត្តិការណ៍ជម្រុះក្នុងពូល G ពានរង្វាន់ AFC U23 Asian Cup នៅប្រទេសកម្ពុជា។

កីឡាករ Ali Jasim Elaibi ដែលមានអាយុ ២១ ឆ្នាំ កម្ពស់ ១.៧៨ ម៉ែត្រ រូបនេះ រកបាន ៣ គ្រាប់នៅពេល ក្រុម អ៉ីរ៉ាក់ បានយកឈ្នះលើ ប៉ាគីស្ថាន ដោយលទ្ធផល ៨-១ និងរួមចំណែកដ៏សំខាន់សម្រាប់ជ័យជម្នះ ១-០ លើ អូម៉ង់។

ស្ថិតនៅក្នុងវ័យទើប ២១ ឆ្នាំ រូបគេបានជាប់ជម្រើសជាតិ អ៉ីរ៉ាក់ ទាំងក្រុមជម្រើសក្រុមទី១ និងក្រុមយុវជនតាំងពីកម្រិត U17 ដល់ U23។ សម្រាប់ការលេងឲ្យជម្រើសជាតិកម្រិតយុវជន រូបគេរកបាន ១០គ្រាប់ និងការបង្ហាញខ្លួនឲ្យក្រុមជម្រើសដៃទី១ចំនួន ២៤ ប្រកួត រូបគេរកបាន ២ គ្រាប់។

បើនិយាយពីក្លិបវិញ Ali Jasim Elaibi ដ៏មានទេពកោសល្យរូបនេះបានលេងឲ្យក្លិបជាច្រើន ក្នុងនោះរាប់ទាំងខ្ចីជើងទៅក្លិបផ្សេងៗផង។ កាលពីក្មេង រូបគេជាយុវជនក្រុម Al-Naft រហូតដល់ ឆ្នាំ ២០១៨ ទើបចូលក្រុមធំ Al Karkh រហូតដល់ ឆ្នាំ ២០២០ នៅលីគអ៉ីរ៉ាក់។ ចន្លោះឆ្នាំ ២០២០ ដល់ ២០២១ រូបគេលេងឲ្យក្លិប Al-Shorta និងឆ្នាំ ២០២១-២៤ លេងឲ្យក្លិប Al Kahrabaa មុនពេលខ្ចីជើងទៅក្លិប Al-Quwa Al-Jawiya, Como, Almere City (ហូឡង់) និងក្លិប Al Najma (អារ៉ាប៊ីសាអ៊ូឌីត) ពីឆ្នាំ ២០២៤ ដល់ ២០២៥។

បច្ចុប្បន្ន Ali Jasim កំពុងលេងឲ្យក្លិប Al Najma នៅលីគបាល់ទាត់កំពូលអារ៉ាប៊ីសាអ៊ូឌីត ដែលមានកីឡាករបាល់ទាត់ឆ្នើមៗនៅលើពិភពលោកនៅទីនោះ។

រូបគេមិនត្រូវបានគ្រូបង្វឹកក្រុមធំកោះហៅលេងពានស្តេចថៃ King’s Cup ឡើយដើម្បីជួយក្រុម U23 ក្នុងពានរង្វាន់ AFC U23 Asian Cup នៅប្រទេសកម្ពុជា៕

អត្ថបទ៖ វីរបុត្រ

The post ខ្សែប្រយុទ្ធដ៏គ្រោះថ្នាក់ម្នាក់របស់ U23 អ៉ីរ៉ាក់ មកពីលីគកំពូលអារ៉ាប៊ីសាអ៊ូឌីត ប៉ះ កម្ពុជា យប់នេះ appeared first on Kampuchea Thmey Daily.

ប៉ះ អ៉ីរ៉ាក់ ថ្ងៃស្អែក លោក Koji ត្រូវការពិន្ទុ ដើម្បីបង្កើតកំណត់ត្រាលើកទី២ សម្រាប់យុវជនកម្ពុជា

chean virakbot — Mon, 08 Sep 2025 04:10:25 +0000

លោកគ្រូ Koji Gyotoku ត្រូវដឹកនាំក្រុម U23 កម្ពុជា រកឲ្យបានពិន្ទុពីក្រុម U23 អ៉ីរ៉ាក់ ទើបអាចមានឱកាសអ៊ុតក្រុមចំណាត់ថ្នាក់លេខ ២ ល្អបំផុតក្នុងពូលនៅពេលក្រុមទាំងពីរត្រូវប្រកួតកាត់សេចក្តីចុងក្រោយ ក្នុងពូល G ពានរង្វាន់យុវជនអាស៊ី AFC U23 Asian Cup វេលាម៉ោង៧យប់ថ្ងៃទី៩ ខែកញ្ញា ឆ្នាំ ២០២៥នេះ។

ក្រុម U23 កម្ពុជា

ឆ្លងកាត់ ២ ប្រកួតដូចគ្នា ក្រុមទាំងពីរមិនទាន់បរាជ័យដូចគ្នា។ អ៉ីរ៉ាក់ រកបាន ៦ ពិន្ទុពេញ កំពុងឈរលើកំពូលតារាង បន្ទាប់ពីឈ្នះ ប៉ាគីស្ថាន ៨-១ និងឈ្នះ អូម៉ង់ ១-០។ ចំណែក កម្ពុជា រកបាន ៤ ពិន្ទុ ឈរលេខ២ តាមរយៈជ័យជម្នះ ១-០ លើ ប៉ាគីស្ថាន និងស្មើ អូម៉ង់ ០-០។

ការប្រកួតនេះ ក្រុមណាឈ្នះ នឹងទទួលបានលេខ ១ ក្នុងពូល ឡើងទៅជុំចុងក្រោយដោយស្វ័យប្រវត្តិ។ ប្រសិនបើ អ៉ីរ៉ាក់ ចាញ់ ក៏ពួកគេនៅតែមានភាគរយខ្ពស់ក្នុងការឡើងទៅជុំចុងក្រោយក្នុងនាមជាក្រុមលេខ២ល្អបំផុត។ ផ្ទុយទៅវិញ ប្រសិនបើ កម្ពុជា ចាញ់គឺអស់ឱកាសហើយ ប៉ុន្តែ ប្រសិនបើស្មើគ្នាគឺ អ៉ីរ៉ាក់ លេខ១ ហើយ កម្ពុជាអាចមានឱកាសអ៊ុតមើលចំណាតត់ថ្នាក់លេខ ២ ល្អបំផុតក្នុងពូល។

កីឡាករកម្ពុជា ប្រកួតជាមួយ អូម៉ង់

ការប្រកួតនេះនឹងពិបាកខ្លាំងសម្រាប់ម្ចាស់ផ្ទះកម្ពុជា។ ក្រុមអ៉ីរ៉ាក់ ពិតជាមានទម្រង់លេងល្អហួសពីការស្មាន ដោយស្ទើរតែដូចមកពីតំបន់អឺរ៉ុបទៅហើយ។ ពួកគេមានបច្ចេកទេសលេងបាល់មួយប៉ះដ៏មានប្រសិទ្ធភាព ហើយលេងចង្វាក់លឿនៗ និងបោះបាល់ចោះចូលកណ្តាលដ៏គ្រោះថ្នាក់។ ទាំងតំបន់ការពារ បម្រើ និងប្រយុទ្ធសុទ្ធតែល្អ ហើយកាយសម្បទារបស់ពួកគេក៏មានប្រៀបជាងកម្ពុជាថែមទៀត។

ក្រុម អ៉ីរ៉ាក់ មិនធ្លាប់ធ្លាក់ត្រឹមវគ្គជម្រុះក្នុងពូលឡើយ។ ពួកគេតែងតែបានឡើងទៅជុំចុងក្រោយរហូតគិតចាប់តាំងពីឆ្នាំដំបូង ២០១៣ មក ហើយពួកគេធ្លាប់បានឈ្នះជើងឯកពានរង្វាន់នេះថែមទៀត។

ក្រុម U23 អ៉ីរ៉ាក់

កម្ពុជា ត្រូវការប្រុងប្រយ័ត្នខ្លាំងមែនទែនសម្រាប់ការប្រកួតនេះ។ កម្ពុជា ត្រូវគ្រប់គ្រងបាល់ឲ្យបានច្រើន ការពារឲ្យបានល្អ និងកាត់ផ្តាច់ចង្វាក់ពួកគេតាមដែលអាចទៅបាន ពីព្រោះពួកគេលេងបាល់មួយប៉ះកម្រខូចណាស់។ ការប្រកួតនេះពិបាកយកឈ្នះ អ៉ីរ៉ាក់ ណាស់ ដូច្នេះត្រឹមលទ្ធផលស្មើក៏ជារឿងល្អដែរ។

កម្ពុជាមិនធ្លាប់មានប្រវត្តិឡើងដល់ជុំចុងក្រោយឡើយ ពោលគឺធ្លាក់ត្រឹមវគ្គជម្រុះក្នុងពូលរហូត។ ឆ្នាំ ២០២៥ គឺជាការទទួលធ្វើម្ចាស់ផ្ទះលើកទី ៣ បន្ទាប់ពីធ្លាប់ធ្វើម្ចាស់ផ្ទះឆ្នាំ ២០១៧ និង ឆ្នាំ ២០១៩។

កីឡាករអ៉ីរ៉ាក់ ប្រកួតជាមួយ ប៉ាគីស្ថាន

លោក Koji Gyotoku គ្រូបង្វឹកជម្រើសជាតិកម្ពុជា បានដឹកនាំក្រុម U20 កម្ពុជា បង្កើតប្រវត្តិសាស្ត្រដំបូងក្នុងការឡើងទៅជុំចុងក្រោយពានរង្វាន់ AFC U20 Asian Cup ឆ្នាំ២០២០។ លទ្ធផលការប្រកួតនៅពេលនោះធ្វើឲ្យមានការភ្ញាក់ផ្អើលមែនទែន ពីព្រោះស្ទើរតែឈ្នះគ្រប់ការប្រកួតក្នុងពូល ហើយជាពិសេសគឺបានឈ្នះថៃ។ ការប្រកួតពហុកីឡដ្ឋានជាតិអូឡាំពិក បើកឆាកចាញ់ ម៉ាឡេស៊ី ប្រផុតប្រផើយគឺ ៤-៥ ប៉ុន្តែ៣ប្រកួតចុងក្រោយ បានឈ្នះ កោះម៉ារីណា ៩-០, ឈ្នះ ថៃ ២-១ និង ឈ្នះ ព្រុយណេ ៣-០ ដើម្បីទទួលបានលេខ ២ ក្នុងពូល ឡើងទៅជុំចុងក្រោយ។ ទោះបីជាយ៉ាងណា ដោយសារវិបត្តិកូវីដ-១៩ ម្ចាស់ផ្ទះ អ៊ូបេគីស្ថាន បានលុបចោលសម្រាប់ការរៀបចំប្រកួតជុំចុងក្រោយ។

ឥឡូវនេះ គ្រូបង្វឹកសញ្ជាតិជប៉ុនកំពុងសម្លឹងឆ្ពោះទៅរកការបង្កើតកំណត់ត្រាជាលើកទី២ សម្រាប់ការដឹកនាំក្រុមបាល់ទាត់យុវជនកម្ពុជា នៅពានរង្វាន់កម្រិតអាស៊ី។

លោកគ្រូ Koji Gyotoku និងគ្រូជំនួយ ឃឹម បូរី

កុំភ្លេច វេលាម៉ោង ៧យប់ ថ្ងៃអង្គារ ទី៩ ខែកញ្ញា កម្ពុជា ប្រកួតជាមួយ អ៉ីរ៉ាក់ វគ្គសន្សំពិន្ទុក្នុងពូលចុងក្រោយ ពានរង្វាន់ AFC U23 Asian Cup នៅពហុកីឡដ្ឋានជាតិអូឡាំពិក៕

អត្ថបទ៖ វីរបុត្រ

The post ប៉ះ អ៉ីរ៉ាក់ ថ្ងៃស្អែក លោក Koji ត្រូវការពិន្ទុ ដើម្បីបង្កើតកំណត់ត្រាលើកទី២ សម្រាប់យុវជនកម្ពុជា appeared first on Kampuchea Thmey Daily.

កម្ពុជា ត្រូវការឈ្នះ ប៉ាគីស្ថាន ដាច់ខាត ថ្ងៃស្អែកដើម្បីបន្តក្តីសង្ឃឹម

Kosal Sem — Fri, 05 Sep 2025 08:23:17 +0000

ក្រុមបាល់ទាត់ជម្រើសជាតិ កម្ពុជា អាយុក្រោម ២៣ ឆ្នាំ នឹងត្រូវធ្វើការប្រកួតទី ២ ក្នុងពូល G នៃវគ្គជម្រុះពាន AFC U23 Asian Cup ២០២៦ ជាមួយក្រុមជម្រើសជាតិ ប៉ាគីស្ថាន នាយប់ថ្ងៃសៅរិ៍ ទី ៦ ខែ កញ្ញា ឆ្នាំ ២០២៥ នៅពហុកីឡដ្ឋានជាតិអូឡាំពិក។

សម្រាប់ការប្រកួតនេះ នឹងក្លាយជាការប្រកួតដ៏តឹងតែង ដោយសារក្រុមទាំងពីរ សុទ្ធតែត្រូវការពិន្ទុរៀងៗខ្លួន ដើម្បីដណ្តើមយកចំណាត់ថ្នាក់ឱ្យបានល្អបំផុតនៅក្នុងពូល G។ មុនការប្រកួតនេះមកដល់គ្រូបង្វឹកកម្ពុជា លោក Koji Gyotoku បានលើកឡើងថា ការជួបក្រុម ប៉ាគីស្ថាន លោកមិនហ៊ានដាក់ក្តីរំពឹងនឹងឈ្នះឡើយ ប៉ុន្តែអ្វីដែលក្រុមរបស់លោកគិត គឺត្រូវតែប្រឹងឱ្យអស់ពីសម្ថភាព។

រីឯគ្រូប៉ាគីស្ថាន លោក Nolberto Solano បានលើកឡើងថា លោកគោរពលើគ្រប់ក្រុមទាំងអស់ក្នុងពូល G។ លោកមិនរំពឹងការប្រកួតណាមួយក្នុងវគ្គជម្រុះក្នុងពូលនេះងាយស្រួលឡើយ ដោយសារសុទ្ធតែក្រុមខ្លាំង។ ទោះបីយ៉ាងណា ក្រុមរបស់លោកនឹងប្រឹងធ្វើឱ្យអស់ពីសមត្ថភាព។

បើមើលអំពីស្ថិតិ ៥ ប្រកួតចុងក្រោយរវាងក្រុមទាំង ២ វិញ គឺលទ្ធផលមិនខុសគ្នាច្រើនឡើយ។ ៥ ប្រកួតចុងក្រោយរបស់ កម្ពុជា គឺ ស្មើ ២ និងចាញ់ ៣។ ចំណែកក្រុម ប៉ាគីស្ថាន គឺឈ្នះ ១ និងចាញ់ ៤។

+ក្រុម U-23 កម្ពុជា៖

ចាញ់ U-23 អារ៉ាប៊ីសាអ៊ូឌីត ៦-១ ក្នុងវគ្គជម្រុះពាន AFC U23 Asian Cup (ខែ កញ្ញា ឆ្នាំ ២០២៣)
ចាញ់ U-23 កាតា ២-១ ក្នុងការប្រកួតមិត្តភាព (ខែ វិច្ឆិកា ឆ្នាំ ២០២៤)
ស្មើ U-23 ឡាវ ១-១ ក្នុងពាន ASEAN Championship U23 (ខែ កក្កដា ឆ្នាំ ២០២៥)
ចាញ់ U23 វៀតណាម ២-១ ក្នុងពាន ASEAN Championship U23 (ខែ កក្កដា ឆ្នាំ ២០២៥)
ស្មើក្រុម U-23 អូម៉ង់ ០-០ ក្នុងវគ្គជម្រុះពាន AFC U23 Asian Cup (ខែ កញ្ញា ឆ្នាំ ២០២៥)។

+ ក្រុម U-23 ប៉ាគីស្ថាន

ឈ្នះ U-23 នេប៉ាល់ ២-១ ក្នុងពាន Asian Games (ខែ សីហា ឆ្នាំ ២០១៨)
ចាញ់ U-23 ជប៉ុន ៦-0 ក្នុងវគ្គជម្រុះពាន AFC U-23 Asian Cup (ខែ កញ្ញា ឆ្នាំ ២០២៣)
ចាញ់ U-23 បារ៉ែន ៣-១ ក្នុងវគ្គជម្រុះពាន AFC U-23 Asian Cup (ខែ កញ្ញា ឆ្នាំ ២០២៣)
ចាញ់ U-23 ប៉ាឡេស្ទីន ២-១ ក្នុងវគ្គជម្រុះពាន AFC U-23 Asian Cup (ខែ កញ្ញា ឆ្នាំ ២០២៣)
ចាញ់ U-23 អ៊ីរ៉ាក់ ៨-១ ក្នុងវគ្គជម្រុះពាន AFC U-23 Asian Cup (ខែ កញ្ញា ឆ្នាំ ២០២៥)។

ចំពោះនៅក្នុងពាន AFC U23 Asian Cup កម្ពុជាមិនធ្លាប់មានប្រវត្តិឈានដល់ជុំចុងក្រោយឡើយ ពោលគឺធ្លាក់ត្រឹមវគ្គជម្រុះក្នុងពូលរហូត។ ឆ្នាំ ២០២៥ គឺជាការទទួលធ្វើម្ចាស់ផ្ទះលើកទី ៣ បន្ទាប់ពីធ្លាប់ធ្វើម្ចាស់ផ្ទះឆ្នាំ ២០១៧ និង ឆ្នាំ ២០១៩។ ចំណែកក្រុម ប៉ាគីស្ថាន វិញក៏មិនសូវមានស្ថិតិល្អដែរ ក្នុងពាន AFC U23 Asian Cup ដោយធ្លាប់បានចូលរួមប្រកួតជម្រុះក្នុងពូល ៣ ដង និងមិនបានចូលរួម៣ដង ហើយពុំធ្លាប់បានឡើងដល់ជុំចុងក្រោយដែរ។

+ U-23 កម្ពុជា

ឆ្នាំ ២០១៣ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត ស្មើ ១ ប្រកួត និងចាញ់ ៣ ប្រកួត
ឆ្នាំ ២០១៦ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត និងចាញ់ ២ ប្រកួត
ឆ្នាំ ២០១៨ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត ស្មើ ១ ប្រកួត និងចាញ់ ១ ប្រកួត
ឆ្នាំ ២០២០ ធ្លាក់វគ្គជម្រុះក្នុងពូល ក្រោយស្មើ ១ ប្រកួត និងចាញ់ ២ ប្រកួត
ឆ្នាំ ២០២២ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត និងចាញ់ ១ ប្រកួត
ឆ្នាំ ២០២៤ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត ស្មើ១ និងចាញ់ ១ ប្រកួត។

+U-23 ប៉ាគីស្ថាន

ឆ្នាំ ២០១៣ ធ្លាក់វគ្គជម្រុះក្នុងពូល ក្រោយស្មើ១ប្រកួត និងចាញ់៤ប្រកួត
ឆ្នាំ ២០១៦ ធ្លាក់វគ្គជម្រុះក្នុងពូល ក្រោយឈ្នះ១ប្រកួត និងចាញ់៣ប្រកួត
ឆ្នាំ ២០១៨ មិនបានចូលរួមប្រកួតជម្រុះក្នុងពូល
ឆ្នាំ ២០២០ មិនបានចូលរួមប្រកួតជម្រុះក្នុងពូល
ឆ្នាំ ២០២២ មិនបានចូលរួមប្រកួតជម្រុះក្នុងពូល
ឆ្នាំ ២០២៤ ធ្លាក់ជម្រុះក្នុងពូល ក្រោយចាញ់ទាំង៣ប្រកួត។

កម្ពុជា អាចមានប្រៀបលើ ប៉ាគីស្ថាន តិចតួចក្នុងនាមម្ចាស់ផ្ទះ ដែលកីឡាករសាំចំពោះទីលាន និង អាកាសធាតុ។ បើមើលអំពីកត្តាចិត្តសាស្ត្រវិញ កម្ពុជា ក៏ល្អផងដែរ ដោយការប្រកួតលើកទី១ បានស្មើ អូម៉ង់ ០-០។ ចំណែក ប៉ាគីស្ថាន បានចាញ់ អ៉ីរ៉ាក់ ធ្ងន់កដល់ទៅ ៨-១។ ទោះបីជាយ៉ាងណា អ្វីដែលជាក្តីបារម្ភសម្រាប់ កម្ពុជា គឺបញ្ហាកាយសម្បទា ដែលអាចចាញ់ប្រៀប ប៉ាគីស្ថាន។

កម្ពុជា ត្រូវការឈ្នះដាច់ខាត ទើបអាចទទួលបាន ៣ ពិន្ទុ បន្ថែមដើម្បីឱកាសអ៊ុតក្រុមចំណាត់ថ្នាក់លេខ ២ ល្អបំផុតក្នុងពូល បន្ទាប់ពីស្មើ អូម៉ង់ 0-0 កាលប្រកួតលើកទី១ ហើយការប្រកួតចុងក្រោយប៉ះក្រុមខ្លាំងបំផុតគឺ អ៉ីរ៉ាក់ នៅថ្ងៃទី ៩ ខែកញ្ញា។

គួរបញ្ជាក់ថា បន្ទាប់ពីឆ្លងកាត់ការប្រកួតដំបូងដូចគ្នា គឺ កម្ពុជា កំពុងឈរលេខ ២ ក្នុងពូល G បណ្តោះអាសន្ន ដោយមាន ១ ពិន្ទុក្នុងដៃ។ ចំណែកក្រុម ប៉ាគីស្ថាន នៅបាតារាង ដោយមិនមានពិន្ទុរាប់នោះទេ ជាមួយគ្នានេះបានជំពាក់គ្រាប់បាល់រហូតដល់ទៅ ៧ គ្រាប់ឯណោះ៕

អត្ថបទ៖ សេម កុសល

The post កម្ពុជា ត្រូវការឈ្នះ ប៉ាគីស្ថាន ដាច់ខាត ថ្ងៃស្អែកដើម្បីបន្តក្តីសង្ឃឹម appeared first on Kampuchea Thmey Daily.

ក្រោយស្មើ កម្ពុជា គ្រូអូម៉ង់ ខឹងសម្បាយ៉ាងខ្លាំងចំពោះស្នងការប្រកួត

Kosal Sem — Thu, 04 Sep 2025 05:01:14 +0000

គ្រូបង្គោលរបស់ក្រុមជម្រើសជាតិ អូម៉ង់ អាយុក្រោម ២៣ ឆ្នាំ លោក Badar Al-Maimani បានបង្ហាញការខឹងសម្បាយ៉ាងខ្លាំងចំពោះស្នងការប្រកួត ដែលអនុញ្ញាតឱ្យការប្រកួតវគ្គជម្រុះពូល G ពាន AFC U23 Asian Cup ទល់នឹងក្រុមជម្រើសជាតិ កម្ពុជា នៅពហុកីឡដ្ឋានជាតិ អូឡាំពិក ថ្ងៃទី ០៣ ខែ កញ្ញា ឆ្នាំ ២០២៥ ដំណើរការទាំងមានភ្លៀងខ្លាំង និងទឹកដក់ជោកជាំនៅលើទីលាន។

លោក Badar Al-Maimani

ថ្លែងនៅក្នុងសន្និសីទសារព័ត៌មាន ក្រោយការប្រកួត លោក Badar Al-Maimani និយាយទាំងមិនសប្បាយចិត្តថា៖ «ខ្ញុំអត់សប្បាយចិត្តជាមួយអាកាសធាតុទេ។ ខ្ញុំអត់សប្បាយចិត្តជាមួយស្នងការប្រកួតទេ ដែលគាត់នៅតែឱ្យលេង ទាំងដែលទីលានពោរពេញដោយទឹកដក់ និងភ្លៀងខ្លាំងបែបនេះ។ បើនៅក្រៅវិញ ខ្ញុំគិតថា ប្រហែលជាគេមិនឱ្យលេងនោះទេ ប៉ុន្តែស្នងការនៅតែឱ្យលេង»។

លោក Badar Al-Maimani មិនសប្បាយចិត្តនឹងលទ្ធផលស្មើគ្នាជាមួយនឹងក្រុមជម្រើសជាតិ កម្ពុជា កាលពីយប់មិញឡើយ។ អ្វីដែលលោកមិនពេញចិត្តថែមទៀតនោះ គឺទៅលើស្នងការរៀបចំការប្រកួត ដែលអនុញ្ញាតឱ្យការប្រកួតនេះ ប្រព្រឹត្តទៅទាំងមានភ្លៀង និងទឹកដក់នៅលើទីលាន។ លោកថា បើនៅប្រទេសផ្សេងវិញ ចំពោះស្ថានភាពអាកាសធាតុ និងទីលានដូចយប់មិញនេះ គឺគេនឹងមិនអនុញ្ញាតឱ្យលេងនោះទេ។

ទិដ្ឋភាពប្រកួត

គួរបញ្ជាក់ជាថ្មី ថា ការប្រកួតរវាង អូម៉ង់ និង កម្ពុជា បានបញ្ចប់ទៅដោយលទ្ធផលស្មើគ្នា ០-០។ បច្ចុប្បន្នក្រុម អូម៉ង់ កំពុងឈរនៅលេខ ៣ ក្នុងពូល G។ ចំណែក កម្ពុជា ឈរលេខ ២, ក្រុមអ៉ីរ៉ាក់ ឈរនៅកំពូលតារាង ខណៈប៉ាគីស្ថាន ស្ថិតនៅបាតតារាង៕

ទិដ្ឋភាពប្រកួត

អត្ថបទ៖ សេម កុសល

The post ក្រោយស្មើ កម្ពុជា គ្រូអូម៉ង់ ខឹងសម្បាយ៉ាងខ្លាំងចំពោះស្នងការប្រកួត appeared first on Kampuchea Thmey Daily.

យប់នេះ កម្ពុជា ប៉ះ អូម៉ង់ ជាក្រុមមានកំណត់ត្រាល្អជាង ក្នុងពាន AFC U23 Asian Cup

chean virakbot — Wed, 03 Sep 2025 01:35:30 +0000

ក្រុមបាល់ទាត់ជម្រើសជាតិកម្ពុជាអាយុ ២៣ ឆ្នាំ (U23) ត្រូវប្រកួតក្រុម U23 អូម៉ង់ វេលាម៉ោង ៧យប់ ថ្ងៃទី៣ ខែកញ្ញា ឆ្នាំ ២០២៥ វគ្គជម្រុះក្នុងពូល G ពានរង្វាន់ AFC U23 Asian Cup ឆ្នាំ ២០២៥។

កម្រិតគុណភាពនៃក្រុមទាំងពីរមិនលើសខ្វះគ្នាប៉ុន្មានឡើយ បើតាមស្ថិតិ និងប្រវត្តិក្នុងពានរង្វាន់យុវជនអាស៊ីមួយនេះ។ ទោះបីជាយ៉ាងណា បើគិតលើតារាងចំណាត់ថ្នាក់កម្ពុជាស្ថិតនៅលើ អូម៉ង់។

ក្រុម U23 កម្ពុជា បានចូលរួមប្រកួតជម្រុះក្នុងពូលពានរង្វាន់នេះគ្រប់សម័យកាល គិតចាប់តាំងពីពានរង្វាន់នេះត្រូវបានរៀបចំដំបូងនៅឆ្នាំ ២០១៣ ប៉ុន្តែមិនធ្លាប់ឆ្លងផុតវគ្គជម្រុះក្នុងពូលឡើយ។ ឆ្នាំ ២០២៥ នេះ គឺជាការទទួលធ្វើម្ចាស់ផ្ទះលើកទី ៣ សម្រាប់កម្ពុជា បន្ទាប់ពីធ្លាប់ធ្វើម្ចាស់ផ្ទះឆ្នាំ ២០១៧ និង ឆ្នាំ ២០១៩។

ស្ថិតិរបស់ កម្ពុជា

ឆ្នាំ ២០១៣ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត ស្មើ ១ ប្រកួត និងចាញ់ ៣ ប្រកួត
ឆ្នាំ ២០១៦ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត និងចាញ់ ២ ប្រកួត
ឆ្នាំ ២០១៨ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត ស្មើ ១ ប្រកួត និងចាញ់ ១ ប្រកួត
ឆ្នាំ ២០២០ ធ្លាក់វគ្គជម្រុះក្នុងពូល ក្រោយស្មើ ១ ប្រកួត និងចាញ់ ២ ប្រកួត
ឆ្នាំ ២០២២ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត និងចាញ់ ១ ប្រកួត
ឆ្នាំ ២០២៤ ធ្លាក់វគ្គជម្រុះក្នុងពូល ក្រោយឈ្នះ ១ ប្រកួត ស្មើ ១ និងចាញ់ ១ ប្រកួត

អូម៉ង់ ដែលជាដៃគូរបស់ កម្ពុជា មានតារាងចំណាត់ថ្នាក់នៅក្រោមកម្ពុជា ប៉ុន្តែពួកគេមានកំណត់ត្រាល្អជាងកម្ពុជា។ អូម៉ង់ បានចូលរួមប្រកួតជម្រុះក្នុងពូលគ្រប់សម័យកាលដែរ ហើយពួកគេធ្លាប់បានឆ្លងផុតវគ្គជម្រុះក្នុងពូល ២ លើកដើម្បីឡើងទៅដល់ជុំចុងក្រោយ។ ពួកគេធ្លាប់បានឡើងជុំចុងក្រោយ នៅឆ្នាំ ២០១៣ និង ឆ្នាំ ២០១៨។

ស្ថិតិរបស់ អូម៉ង់

ឆ្នាំ ២០១៣ បានឡើងដល់ជុំចុងក្រោយ ក្រោយឈ្នះ ៣ ស្មើ ១ និងចាញ់ ១ ។ នៅជុំចុងក្រោយ ពួកគេធ្លាក់ក្នុងពូល ក្រោយ ឈ្នះ ១ និងចាញ់ ២
ឆ្នាំ ២០១៦ ធ្លាក់វគ្គជម្រុះក្នុងពូល ក្រោយឈ្នះ ២ និងស្មើ ២
ឆ្នាំ ២០១៨ បានឡើងជុំចុងក្រោយ បន្ទាប់ពីឈ្នះទាំង ២ ប្រកួត។ នៅជុំចុងក្រោយ ពួកគេចាញ់ទាំង ៣ ប្រកួតនៅវគ្គក្នុងសន្សំពិន្ទុក្នុងពូល។
ឆ្នាំ ២០២០ ធ្លាក់វគ្គជម្រុះក្នុងពូល ក្រោយឈ្នះ ១ និងស្មើ ១
ឆ្នាំ ២០២២ ធ្លាក់វគ្គជម្រុះក្នុងពូល ក្រោយឈ្នះ ១ និងចាញ់ ២
ឆ្នាំ ២០២៤ ធ្លាក់វគ្គជម្រុះក្នុងពូល ក្រោយឈ្នះ ២ និងចាញ់ ១

កម្ពុជា មានផលល្អក្នុងនាមជាម្ចាស់ផ្ទះដែលសាំនឹងអាកាសធាតុ ខណៈ អូម៉ង់ មានផលចំណេញ ដោយសារពួកគេមានកាយសម្បទាធំខ្ពស់ជាងកម្ពុជា។ ទោះបីជាយ៉ាងណា សមត្ថភាព និងបច្ចេកទេសនាពេលបច្ចុប្បន្នរបស់អូម៉ង់ពិតជាពិបាកស្មានណាស់៕

អត្ថបទ៖ វីរបុត្រ

The post យប់នេះ កម្ពុជា ប៉ះ អូម៉ង់ ជាក្រុមមានកំណត់ត្រាល្អជាង ក្នុងពាន AFC U23 Asian Cup appeared first on Kampuchea Thmey Daily.

ខ្សែប្រយុទ្ធ ៧ រូបរបស់ កម្ពុជា ត្រៀមប្រកួតពាន AFC U23 Asian Cup សប្តាហ៍ក្រោយ

chean virakbot — Fri, 29 Aug 2025 08:03:14 +0000

ក្រុមបាល់ទាត់ជម្រើសជាតិកម្ពុជាអាយុ២៣ឆ្នាំ ដាក់គោលដៅបង្កើតកំណត់ត្រាជាលើកដំបូងក្នុងការឡើងទៅជុំចុងក្រោយ ពានរង្វាន់អាស៊ីអាយុ២៣ឆ្នាំ AFC U23 Asian Cup ក្នុងនាមជាម្ចាស់ផ្ទះពូល G ចាប់ពីថ្ងៃទី ៣ ដល់ ទី៩ ខែកញ្ញា ឆ្នាំ ២០២៥។

លោក Koji Gyotoku គ្រូបង្វឹកជម្រើសជាតិកម្ពុជា បានដឹកនាំក្រុម U18 កម្ពុជា បានឡើងជុំចុងក្រោយជាលើកដំបូងក្នុងប្រវត្តិសាស្ត្ររបស់ខ្លួនក្នុងពានរង្វាន់ AFF U-18 Youth Championship នៅប្រទេសអ៊ូបេគីស្ថាន ឆ្នាំ ២០២០ ប៉ុន្តែដោយសារវិបត្តិកូវីដ-១៩ ម្ចាស់ផ្ទះបានលុបចោលការប្រកួត។ ពេលនេះ គ្រូបង្វឹកសញ្ជាតិជប៉ុនដាក់គោលដៅធំទៀតតាមរយៈការសម្រិតសម្រាំងកីឡាករល្អៗតាមអ្វីដែលលោកចង់បាន។ លោកបានបញ្ជាក់ហើយថា ការជ្រើសរើសកីឡាករលើកនេះគឺល្អៗ និងពេញចិត្តតាមអ្វីដែលលោកចង់បានច្រើន។

កីឡាករ ចាន់វិបុល ដេវីត

លោកបានជ្រើសរើសខ្សែបម្រើសុទ្ធតែល្អៗមានដូចជា ជូ ស៊ីនទិ, ស៊ីន សុវណ្ណមករា, បុង សាំអូអែល និង ឈឿន ដាវីនជាដើម ប៉ុន្តែបើមើលតំបន់ប្រយុទ្ធវិញហាក់ដូចជានៅមានកម្រិត។ ក្លិបទាំងអស់នៃលីគបាល់ទាត់កំពូលកម្ពុជា បានប្រើប្រាស់ខ្សែប្រយុទ្ធបរទេសស្ទើរតែទាំងអស់។ បើខ្សែប្រយុទ្ធជាកីឡាករកម្ពុជាវិញក៏សុទ្ធតែលើសអាយុ២៣ឆ្នាំ។ ដូច្នេះខ្សែប្រយុទ្ធជម្រើសល្អបំផុតសម្រាប់លោក Koji Gyotoku គឺមានចំនួន ៧ នាក់ដែលមកពី ៧ ក្លិបផ្សេងគ្នា។

កីឡាករ វឿន វ៉ា

ក្នុងចំណោមកីឡាករទាំង ៧ នាក់នេះគឺមានកីឡាករខ្លះមិនសូវបានបង្ហាញខ្លួននៅក្នុងលីគទេ ប៉ុន្តែក៏មានកីឡាករខ្លះលេងបានច្រើននៅក្នុងលីគកម្ពុជាដើមរដូវកាលនេះ។ ខ្សែប្រយុទ្ធ ម៉ុន រ៉ាដូ របស់ក្លិប វិសាខា និង សុវណ្ណ ដូណា របស់ក្លិបព្រះខ័នរាជស្វាយរៀង មិនសូវបានលេងឡើយ។ ទោះបីជាយ៉ាងណា ចាន់វិបុល ដេវីត លេងបានច្រើន និងរកបាន ២ គ្រាប់ឲ្យ អង្គរថាយហ្គឺរ រដូវកាលនេះ។ ដូចគ្នានេះដែរ ខ្សែប្រយុទ្ធ វឿន វ៉ា ក៏រកបាន ២ គ្រាប់ឲ្យ អឹមអូអាយ កំពង់ដេវ៉ា សម្រាប់ការបង្ហាញខ្លួនគ្រប់ការប្រកួតនៅរដូវកាលនេះ។

កីឡាករ សំអុល ទីណា

៣នាក់ទៀត គឺខ្សែប្រយុទ្ធ សំអុល ទីណា របស់ អាយអេសអាយ ដង្កោសែនជ័យ កីឡាករ ឃាន់ សុបិន្ត របស់ បឹងកេត និងកីឡាករ យ៉ែម ដេវីត របស់ ភ្នំពេញក្រោន ក៏លេងបានច្រើនគួរសមដែរឲ្យក្លិបនៅក្នុងលីគដែរ ប៉ុន្តែមិនទាន់លេចធ្លោគួរឲ្យចាប់អារម្មណ៍ឡោះ។

កីឡាករ ឃាន់ សុបិន្ត

បន្ថែមលើខ្សែប្រយុទ្ធ លោក Koji Gyotoku អាចនឹងប្រើប្រាស់កីឡាករខ្សែបម្រើខ្លះដើម្បីឲ្យលេងលេងនៅតំបន់ប្រយុទ្ធដូចជាកីឡាករ ខន ណារ៉ុង ដែលកំពុងលេចធ្លោនៅក្លិប កងយោធពលខេមរភូមិន្ទ កីឡាករ សំ បូរិទ្ធ ក៏ធ្វើបានល្អនៅ ភ្នំពេញក្រោន ព្រមទាំងខ្សែបម្រើមួយចំនួនទៀត។ តាមរយៈការប្រកួតអន្តរជាតិកន្លងមករបស់ ក្រុមយុវជនជម្រើសជាតិកម្ពុជាគឺ តំបន់ការពារ និងប្រយុទ្ធមានចំណុចខ្វះខាតច្រើន ប៉ុន្តែល្អនៅតំបន់បម្រើកណ្តាល៕

កីឡាករ សុវណ្ណ ដូណា

កម្មវិធីប្រកួត

កម្ពុជា vs អូម៉ង់ ថ្ងៃទី៣ កញ្ញា
កម្ពុជា vs ប៉ាគីស្ថាន ថ្ងៃទី៦ កញ្ញា
កម្ពុជា vs អ៉ីរ៉ាក់ ថ្ងៃទី៩ កញ្ញា

ខ្សែប្រយុទ្ធរបស់ U23 កម្ពុជា

កីឡាករ ម៉ុន រ៉ាដូ អាយុ ២១ ឆ្នាំ មកពីក្លិប វិសាខា
កីឡាករ សំអុល ទីណា អាយុ ២២ ឆ្នាំ មកពីក្លិប អាយអេសអាយ ដង្កោសែនជ័យ
កីឡាករ ចាន់វិបុល ដេវីត អាយុ ២១ ឆ្នាំ មកពីក្លិប អង្គរថាយហ្គឺរ
កីឡាករ ឃាន់ សុបិន្ត អាយុ ២០ ឆ្នាំ មកពីក្លិប បឹងកេត
កីឡាករ សុវណ្ណ ដូណា អាយុ ២១ ឆ្នាំ មកពីក្លិប ព្រះខ័នរាជស្វាយរៀង
កីឡាករ យ៉ែម ដេវីត អាយុ ២១ ឆ្នាំ មកពីក្លិប ភ្នំពេញក្រោន
កីឡាករ វឿន វ៉ា អាយុ ២២ ឆ្នាំ មកពីក្លិប អឹមអូអាយ កំពង់ដេវ៉ា

អត្ថបទ៖ វីរបុត្រ

The post ខ្សែប្រយុទ្ធ ៧ រូបរបស់ កម្ពុជា ត្រៀមប្រកួតពាន AFC U23 Asian Cup សប្តាហ៍ក្រោយ appeared first on Kampuchea Thmey Daily.

AFC U23 Asian Cup Archives - Kampuchea Thmey Daily

ផ្លូវ​ការ រក​ឃើញ ក្រុម​ ១៦ ឡើង​ជុំ​ចុង​ក្រោយ​ពាន AFC U23 Asian Cup 2026

កម្ពុជា បង្កើត​ស្ថិតិ​ថ្មីចំនួន ៣ ក្នុង​ពាន AFC U23 Asian Cup ទោះមិនបានឡើង​ជុំ​ចុង​ក្រោយ

ប៉ះ អ៉ីរ៉ាក់ ថ្ងៃ​ស្អែក ​លោក Koji ត្រូវ​ការ​ពិន្ទុ​ ដើម្បី​បង្កើត​កំណត់​ត្រា​លើក​ទី​២ សម្រាប់​យុវជន​កម្ពុជា

កម្ពុជា ត្រូវ​ការឈ្នះ ប៉ាគីស្ថាន ដាច់​ខាត​ ថ្ងៃ​ស្អែក​ដើម្បី​បន្ត​ក្តី​សង្ឃឹម

ក្រោយស្មើ កម្ពុជា គ្រូអូម៉ង់ ខឹងសម្បា​យ៉ាង​ខ្លាំង​ចំពោះ​ស្នងការ​ប្រកួត

យប់​នេះ កម្ពុជា ប៉ះ អូម៉ង់ ជាក្រុមមានកំណត់ត្រាល្អជាង ក្នុងពាន AFC U23​ Asian Cup

ខ្សែ​ប្រយុទ្ធ ៧ រូប​របស់​ កម្ពុជា ត្រៀម​ប្រកួត​ពាន AFC U23 Asian Cup សប្តាហ៍​ក្រោយ

ផ្លូវការ រកឃើញ ក្រុម ១៦ ឡើងជុំចុងក្រោយពាន AFC U23 Asian Cup 2026

កម្ពុជា បង្កើតស្ថិតិថ្មីចំនួន ៣ ក្នុងពាន AFC U23 Asian Cup ទោះមិនបានឡើងជុំចុងក្រោយ

ប៉ះ អ៉ីរ៉ាក់ ថ្ងៃស្អែក លោក Koji ត្រូវការពិន្ទុ ដើម្បីបង្កើតកំណត់ត្រាលើកទី២ សម្រាប់យុវជនកម្ពុជា

កម្ពុជា ត្រូវការឈ្នះ ប៉ាគីស្ថាន ដាច់ខាត ថ្ងៃស្អែកដើម្បីបន្តក្តីសង្ឃឹម

ក្រោយស្មើ កម្ពុជា គ្រូអូម៉ង់ ខឹងសម្បាយ៉ាងខ្លាំងចំពោះស្នងការប្រកួត

យប់នេះ កម្ពុជា ប៉ះ អូម៉ង់ ជាក្រុមមានកំណត់ត្រាល្អជាង ក្នុងពាន AFC U23 Asian Cup

ខ្សែប្រយុទ្ធ ៧ រូបរបស់ កម្ពុជា ត្រៀមប្រកួតពាន AFC U23 Asian Cup សប្តាហ៍ក្រោយ