AFF Championship Archives - Kampuchea Thmey Daily

កម្ពុជា ស្ថិតក្នុង ៩ ប្រទេស នៅវគ្គចែកពូល AFF Cup ខណៈ ព្រុយណេ និង ទីម័រខាងកើត ត្រូវជម្រុះ

chean virakbot — Wed, 24 Dec 2025 07:05:43 +0000

ការប្រកួតបាល់ទាត់ជើងឯកអាស៊ីអាគ្នេយ៍កម្រិតទី១ ASEAN Championship លើកទី១៦ នឹងចាប់ផ្តើមពី២៤ ខែកក្កដា ដល់ទី២៦ ខែសីហា ឆ្នាំ ២០២៦ ដែលមាន ១០ ប្រទេសចូលរួមប្រកួត។

ក្រុមជម្រើសជាតិកម្ពុជា

រូបមន្តនៃការប្រកួតគ្មានអ្វីប្រែប្រួលទេគឺទម្រង់ដដែលគិតចាប់តាំងពីឆ្នាំ ២០១៨។ ក្រុមដែលមានចំណាត់ថ្នាក់ខ្ពស់ជាងគេនៅ FIFA Ranking ប្រចាំតំបន់អាស៊ាន ចំនួន ៩ ស្ថិតនៅវគ្គចែកពូល ខណៈក្រុមស្ថិតកម្រិតទាបជាងគេចំនួន ២ ត្រូវប្រកួតជម្រុះដើម្បីយក ១ ក្រុមឡើងវគ្គចែកពូល។

ពានរង្វាន់ AFF Cup

នៅវគ្គចែកពូល ក្រុមទាំង ១០ ត្រូវបែងចែកជា ២ ពូល ហើយក្នុង ១ ពូល មានចំនួន ៥ ក្រុមត្រូវប្រកួតសន្សំពិន្ទុមួយជើង គឺក្នុងដី ២ ប្រកួត និង ២ ប្រកួតនៅក្រៅដី។ ក្រុមលេខ ១ និងលេខ ២ នៃពូលទាំង ២ បានឡើងទៅកាន់វគ្គពាក់កណ្តាលផ្តាច់ព្រ័ត្រ ដែលមានការប្រកួត ២ ជើងគឺ ក្នុងដៃ និងក្រៅដី ហើយវគ្គផ្តាច់ព្រ័ត្រ ក៏ប្រកួត ២ ជើងដែរ។

ក្រុមជម្រើសជាតិកម្ពុជា

ក្រុមជម្រើសជាតិចំនួន ៩ ដែលស្ថិតនៅក្នុងវគ្គចែកពូលដោយមាន កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និង វៀតណាម។ ចំណែក ទីម័រខាងកើត និង ព្រុយណេ ត្រូវប្រកួតជម្រុះដើម្បីជ្រើសរើសយក ១ ក្រុម ឡើងទៅវគ្គចែកពូល ដែលមាន ១០ ប្រទេស។

ការប្រកួតជម្រុះរវាង ព្រុយណេ និង ទីម័រខាងកើត ជើងទី ១ នៅថ្ងៃទី ២ ខែមិថុនា ឆ្នាំ ២០២៦ នៅប្រទេសទីម័រខាងកើត និងជើងទី ២ នៅថ្ងៃទី ៩ ខែមិថុនា ឆ្នាំ ២០២៦ នៅប្រទេសព្រុយណេ។

ក្រុមជម្រើសជាតិម៉ាឡេស៊ី

ព្រឹត្តិការណ៍ប្រកួតលើកទី ១៦ នេះគឺធ្វើឡើងនៅរដូវក្តៅ ឬពាក់កណ្តាលឆ្នាំជាលើកដំបូងដើម្បីអបអរខួបលើកទី ៣០ ឆ្នាំ បន្ទាប់ពីពានរង្វាន់នេះបានចាប់ផ្តើមរៀបចំឡើងដំបូងនៅឆ្នាំ ១៩៩៦។ ក្រុមបាល់ទាត់ជម្រើសជាតិ វៀតណាម គឺជាក្រុមការពារជើងឯកឆ្នាំចាស់ បន្ទាប់ពីពួកគេបានឈ្នះកាលពីឆ្នាំ ២០២៤។

ក្រុមជម្រើសជាតិទីម័រខាងកើត

ចំពោះក្រុមបាល់ទាត់ជម្រើសជាតិកម្ពុជាធ្លាប់ចូលរួមប្រកួតវគ្គសន្សំពិន្ទុក្នុងពូលចំនួន ១១ លើក ប៉ុន្តែមិនធ្លាប់ឆ្លងផុតវគ្គសន្សំពិន្ទុពូលឡើយ។ ការចាប់ឆ្នោតជ្រើសរើសពូល ធ្វើនៅថ្ងៃទី១៥ ខែមករា ឆ្នាំ ២០២៦ នៅទីក្រុងហ្សាកាតា ប្រទេសឥណ្ឌូណេស៊ី៕

អ្នកគាំទ្រកម្ពុជា

អត្ថបទ៖ វីរបុត្រ

The post កម្ពុជា ស្ថិតក្នុង ៩ ប្រទេស នៅវគ្គចែកពូល AFF Cup ខណៈ ព្រុយណេ និង ទីម័រខាងកើត ត្រូវជម្រុះ appeared first on Kampuchea Thmey Daily.

Xuan Son ម្ចាស់ស្បែកជើងមាស ASEAN Cup ទទួលការវះកាត់ជោគជ័យ

Pha Rothana — Wed, 08 Jan 2025 03:31:59 +0000

ខ្សែប្រយុទ្ធទើបចូលសញ្ជាតិវៀតណាម Nguyen Xuan Son បានទទួលការវះកាត់ដោយជោគជ័យ បន្ទាប់ពីរបួសធ្ងន់ធ្ងរក្នុងការប្រកួតវគ្គផ្តាច់ព្រ័ត្រ ជើងទី២ ពានរង្វាន់ ASEAN Championship កាលពីថ្ងៃអាទិត្យ ទី៥ ខែមករា ឆ្នាំ២០២៥ ជាមួយម្ចាស់ផ្ទះថៃ។

លោកវេជ្ជបណ្ឌិត Tran Trung Dung នៅមន្ទីរពេទ្យ Vinmec បាននិយាយថា Son អាចផ្លាស់ទីដោយប្រើឈើច្រត់ បន្ទាប់ពីការវះកាត់រួច។ សម្រាប់ជំហានបន្ទាប់ គាត់នឹងចាប់ផ្តើមព្យាបាលរាងកាយ និងស្តារនីតិសម្បទា រួមផ្សំនឹងរបបអាហារូបត្ថម្ភ ដើម្បីជាសះស្បើយលឿន។

ការវះកាត់បានបញ្ចប់នៅម៉ោង១០យប់ កាលពីថ្ងៃចន្ទ ដោយមានការចូលរួមពីក្រុមគ្រូពេទ្យ សុទ្ធតែមានបទពិសោធផ្នែកវេជ្ជសាស្ត្រកីឡា និងបានព្យាបាលកីឡាករជម្រើសជាតិវៀតណាមជាច្រើនរូប។

Son មានឈ្មោះជាប្រេស៊ីល Rafaelson Fernades កើតក្នុងឆ្នាំ១៩៩៧ ទទួលបានសញ្ជាតិវៀតណាមក្នុងខែកញ្ញា ឆ្នាំ២០២៤។ គាត់បានក្លាយជាកីឡាករចូលសញ្ជាតិវៀតណាមដំបូងគេ ត្រូវបានកោះហៅចូលក្រុមជម្រើសជាតិចាប់តាំងពីឆ្នាំ២០០៩។

ខ្សែប្រយុទ្ធវ័យ២៧ឆ្នាំរូបនេះជាកម្លាំងសំខាន់មួយរូប ជួយក្រុមជម្រើសជាតិវៀតណាមទទួលបានជោគជ័យក្នុងព្រឹត្តិការណ៍ ASEAN Championship ឆ្នាំ២០២៤ ក្រោយស៊ុតបញ្ចូលទីបាន៧គ្រាប់ក្នុងការប្រកួត៤លើក។ ទោះបីជាមិនបានលេងវគ្គផ្តាច់ព្រ័ត្រពេញម៉ោង ប៉ុន្តែគាត់បានឈ្នះពានរង្វាន់កីឡាករល្អប្រចាំព្រឹត្តិការណ៍ និងអ្នកស៊ុតបញ្ចូលទីច្រើនជាងគេ ដែលបានជួយវៀតណាមឈ្នះពានជើងរង្វាន់មួយនេះ៕

ប្រែសម្រួល៖ ផា រតនា

The post Xuan Son ម្ចាស់ស្បែកជើងមាស ASEAN Cup ទទួលការវះកាត់ជោគជ័យ appeared first on Kampuchea Thmey Daily.

ហ្វីលីពីន ប្រើពេល៥២ឆ្នាំទើបបានឈ្នះថៃ

chean virakbot — Sat, 28 Dec 2024 01:59:59 +0000

ក្រុមបាល់ទាត់ជម្រើសជាតិហ្វីលីពីន បានយកឈ្នះ ក្រុមបាល់ទាត់ជម្រើសជាតិថៃ ដោយលទ្ធផល ២-១ សម្រាប់ការប្រកួតជើងទី១ វគ្គពាក់កណ្តាលផ្តាច់ព្រ័ត្រ ពានរង្វាន់ ASEAN Championship ឆ្នាំ២០២៤។

ការប្រកួតនៅកីឡដ្ឋាន Rizal Memoriial ក្នុងទីក្រុងម៉ានីល ម្ចាស់ផ្ទះហ្វីលីពីនបានបង្ហាញទម្រង់លេងដ៏គួរឲ្យចាប់អារម្មណ៍ក្រោមក្រសែភ្នែកអ្នកទស្សនាប្រមាណ៧១៦០នាក់។ នៅនាទី២១ កីឡាករ Reyes បានបង្កើតឲ្យអ្នកគាំទ្ររបស់ខ្លួនសប្បាយរីករាយខ្លាំងមែនទែនតាមរយៈការស៊ុតគ្រាប់បាល់នាំមុខ ១-០ ប៉ុន្តែភាពសប្បាយរីករាយត្រូវបានស្ងប់ស្ងាត់ទៅវិញនៅពេលថៃបានតាមស្មើ ១-១ ចុងវគ្គទី១ដោយកីឡាករ Suphanan នៅនាទី៤៥។

ការប្រកួតនៅវគ្គទី២ មានការសម្រុកគ្នាទៅវិញទៅមក និងបង្កើតឱកាសគ្រោះថ្នាក់រៀងៗខ្លួន។ ការប្រកួតស្ទើរតែបញ្ចប់ដោយលទ្ធផលស្មើគ្នាទៅហើយ ប៉ុន្តែខ្សែការពារ Linares បានក្លាយជាវីរបុរសក្នុងការនាំឲ្យម្ចាស់ផ្ទះទទួលបានជោគជ័យ។ រូបគេបានតែតចូលទីថៃនៅនាទី៩០+៥ ដើម្បីទទួលបានជ័យជម្នះដោយលទ្ធផល ២-១។

ជ័យជម្នះនេះបានធ្វើឲ្យកីឡាករ ក្រុមការងារគ្រូបង្វឹក និងអ្នកគាំទ្រសប្បាយរីករាយខ្លាំងមែន។ អ្វីដែលកាន់តែពិសេសនោះគឺហ្វីលីពីនបានបញ្ចប់កំណត់ត្រាមិនដែលឈ្នះរបស់ខ្លួនរយៈពេល៥២ឆ្នាំទៅលើក្រុមជម្រើសជាតិថៃ។ ក្នុងនោះក៏មានខ្សែប្រយុទ្ធ Gayoso សមាជិកក្រុមភ្នំពេញក្រោននៃលីគកំពូលកម្ពុជាផងដែរ។

ហ្វីលីពីន ជាក្រុមមួយដែលមិនសូវខ្លាំងទេទាំងក្រុមយុវជន និងក្រុមជម្រើសទី១ ហើយឆ្នាំនេះអាចចាត់ទុកជាពេលវេលាដែលពួកគេធ្វើបានល្អបំផុតដោយឈានដល់វគ្គពាក់កណ្តាលផ្តាច់ព្រ័ត្រ។

ការប្រកួតជើងទី២នឹងធ្វើនៅថ្ងៃទី៣០ ខែធ្នូ ឆ្នាំ២០២៤ នៅប្រទេសថៃដើម្បីស្វែងរកក្រុមឡើងវគ្គផ្តាច់ព្រ័ត្រ៕

អត្ថបទ៖ វីរបុត្រ

The post ហ្វីលីពីន ប្រើពេល៥២ឆ្នាំទើបបានឈ្នះថៃ appeared first on Kampuchea Thmey Daily.

ឆ្នាំ២០២៤ កម្ពុជា រកបានពិន្ទុតិចជាងឆ្នាំ២០២២ ក្នុងពាន AFF Cup

chean virakbot — Sat, 21 Dec 2024 04:24:50 +0000

ក្រុមបាល់ទាត់ជម្រើសជាតិកម្ពុជាបានបញ្ចប់ភារកិច្ចរបស់ខ្លួនក្នុងពានរង្វាន់ AFF Championship ឆ្នាំ២០២៤ ដោយរកបាន៤ពិន្ទុ ស្ថិតនៅចំណាត់ថ្នាក់លេខ៤ ក្នុងពូល A បន្ទាប់ពីឈ្នះ១ប្រកួត ស្មើ១ប្រកួត និងចាញ់២ប្រកួត។

ការរកបាន៤ពិន្ទុនេះគឺតិចជាងកាលពីឆ្នាំ២០២២ដែលកម្ពុជារកបាន៦ពិន្ទុពីការឈ្នះ២ប្រកួត និងចាញ់២ប្រកួត ស្ថិតនៅលេខ៣ក្នុង។

កម្ពុជាធ្លាប់បានចូលរួមប្រកួតនៅវគ្គសន្សំពិន្ទុក្នុងពូលចំនួន១០លើក គឺធ្លាក់ត្រឹមវគ្គសន្សំពិន្ទុក្នុងពូលទាំងអស់។ ឆ្នាំ២០២២គឺជាឆ្នាំដែលកម្ពុជារកបានពិន្ទុខ្ពស់បំផុតរហូតដល់៦ពិន្ទុ បន្ទាប់ពីឈ្នះ២ និងចាញ់២។

ខាងក្រោមជាស្ថិតិរបស់ក្រុមបាល់ទាត់ជម្រើសជាតិកម្ពុជាវគ្គសន្សំពិន្ទុក្នុងពូល៖

១៩៩៦៖ ចាញ់ទាំង៤ប្រកួត ស៊ុតបាន១គ្រាប់ នងដៃគូស៊ុតចូល១២គ្រាប់

ចាញ់ វៀតណាម ១-៣
ចាញ់ មីយ៉ាន់ម៉ា ០-៥
ចាញ់ ឥណ្ឌូណេស៊ី ០-៣
ចាញ់ ឡាវ ០-១

២០០០៖ ឈ្នះ១ ចាញ់៣ រកបាន៣ពិន្ទុ ស៊ុតបាន៥គ្រាប់ និងត្រូវដៃគូស៊ុតចូល១០គ្រាប់

ចាញ់ សិង្ហបុរី ០-១
ចាញ់ វៀតណាម ០-៦
ចាញ់ ម៉ាឡេស៊ី ២-៣
ឈ្នះ ឡាវ ៣-០

២០០២៖ ឈ្នះ១ ចាញ់៣ រកបាន៣ពិន្ទុ ស៊ុតចូលបាន៥គ្រាប់ និងត្រូវដៃគូស៊ុតចូល១៨គ្រាប់

ចាញ់ វៀតណាម ២-៩
ចាញ់ ឥណ្ឌូណេស៊ី ២-៤
ចាញ់ មីយ៉ាន់ម៉ា ០-៥
ឈ្នះ ហ្វីលីពីន ១-០

២០០៤៖ ចាញ់ទាំង៤ប្រកួត ស៊ុតចូលបាន២គ្រាប់ និងត្រូវដៃគូស៊ុតចូល២២គ្រាប់

ចាញ់ វៀតណាម ១-៩
ចាញ់ ឡាវ ១-២
ចាញ់ ឥណ្ឌូណេស៊ី ០-៨
ចាញ់ សិង្ហបុរី ០-៣

២០០៨៖ ចាញ់ទាំង៣ប្រកួត ស៊ុតបាន២គ្រាប់ និងត្រូវដៃគូស៊ុតចូល១២គ្រាប់

ចាញ់ សិង្ហបុរី ០-៥
ចាញ់ ឥណ្ឌូណេស៊ី ០-៤
ចាញ់ មីយ៉ាន់ម៉ា ២-៣

២០១៦៖ ចាញ់ទាំង៣ប្រកួត ស៊ុតបាន៤គ្រាប់ និងត្រូវដៃគូស៊ុតចូល៨គ្រាប់

ចាញ់ ម៉ាឡេស៊ី ២-៣
ចាញ់ មីយ៉ាន់ម៉ា ១-៣
ចាញ់ វៀតណាម ១-២

២០១៨៖ ឈ្នះ១ ចាញ់៣ រកបាន៣ពិន្ទុ ស៊ុតបាន៤គ្រាប់ និងត្រូវដៃគូស៊ុតចូល៩គ្រាប់

ចាញ់ ម៉ាឡេស៊ី ០-១
ចាញ់ មីយ៉ាន់ម៉ា ១-៤
ឈ្នះ ឡាវ ៣-១
ចាញ់ វៀតណាម ០-៣

២០២០៖ ឈ្នះ១ ចាញ់៣ រកបាន៣ពិន្ទុ ស៊ុតបាន៦គ្រាប់ និងត្រូវដៃគូស៊ុតចូល១១គ្រាប់

ចាញ់ ម៉ាឡេស៊ី ១-៣
ចាញ់ ឥណ្ឌូណេស៊ី ២-៤
ឈ្នះ ឡាវ ៣-០
ចាញ់ វៀតណាម ០-៤

២០២២៖ ឈ្នះ២ ចាញ់២ រកបាន៦ពិន្ទុ ស៊ុតបាន១០គ្រាប់ និងត្រូវដៃគូស៊ុតចូល៨គ្រាប់

ឈ្នះ ហ្វីលីពីន ៣-២
ចាញ់ ឥណ្ឌូណេស៊ី ១-២
ឈ្នះ ព្រុយណេ ៥-១
ចាញ់ ថៃ ១-៣

២០២៤៖ ឈ្នះ១ ស្មើ១ ចាញ់២ រកបាន៤ពិន្ទុ ស៊ុតបាន៧គ្រាប់ និងត្រូវដៃគូស៊ុតចូល៨គ្រាប់

ស្មើ ម៉ាឡេស៊ី ២-២
ចាញ់ សិង្ហបុរី ១-២
ឈ្នះ ទីម័រខាងកើត ២-១
ចាញ់ ថៃ ២-៣

អត្ថបទ៖ វីរបុត្រ

The post ឆ្នាំ២០២៤ កម្ពុជា រកបានពិន្ទុតិចជាងឆ្នាំ២០២២ ក្នុងពាន AFF Cup appeared first on Kampuchea Thmey Daily.

រាត្រីកាត់សេចក្តីពូល A កម្ពុជា ប៉ះ ថៃ ដោយគ្មានកម្លាំងសំខាន់ច្រើនរូប

Pha Rothana — Fri, 20 Dec 2024 01:36:01 +0000

ក្រុមបាល់ទាត់ជម្រើសជាតិកម្ពុជាត្រូវធ្វើធ្ងន់ទល់នឹងក្រុមជម្រើសជាតិថៃ វគ្គសន្សំពិន្ទុក្នុងពូល A ចុងក្រោយ ពានរង្វាន់ ASEAN Championship 2024 វេលាម៉ោង៨យប់នៅប្រទេសថៃ។

រាត្រីនេះ ក្រុមកម្ពុជាកាន់ពិបាកខ្លាំង ដោយសារគ្មានកម្លាំងសំខាន់ជាច្រើននាក់។ ខ្សែបម្រើកណ្តាលដ៏សំខាន់ យូឌៃ អូកាវ៉ា មិនអាចបង្ហាញខ្លួនបានទេ បន្ទាប់ពីទទួលបានកាតលឿង២ប្រកួតជាប់គ្នា ស្មើនឹងជាប់ពិន័យមួយប្រកួត។ ជាពិសេសខ្សែការពារដ៏សំខាន់ កាន់ ម៉ូ និងខ្សែបម្រើដ៏ឆ្នើម គឹម សុខយុទ្ធ របួសមិនអាចលេងបានទេ ខណៈខ្សែការពារ សឿយ វិសាល ក៏មិនច្បាស់ថាអាចលេងបានឬទេ។

ជម្រើសរបស់កម្ពុជាត្រូវការតែមួយគត់គឺឈ្នះថៃទើបអាចមានឱកាសអ៊ុតក្នុងការឡើងវគ្គពាក់កណ្តាលផ្តាច់ព្រ័ត្រ ប៉ុន្តែត្រឹមស្មើក៏អស់ឱកាសដែរ។ នៅម៉ោងដំណាលគ្នានេះ សិង្ហបុរី នឹងឡើងទៅកាន់វគ្គពាក់កណ្តាលផ្តាច់ព្រ័ត្រ ប្រសិនបើឈ្នះ ម៉ាឡេស៊ី ប៉ុន្តែប្រសិនបើស្មើគឺ ត្រូវអ៊ុតមើលលទ្ធផលរបស់កម្ពុជាជាមួយថៃ។ ចំណែកម៉ាឡេស៊ី វិញត្រូវការឈ្នះសិង្ហបុរីទើបអាចមានឱកាសអ៊ុតក្នុងការឡើងវគ្គបន្ត ប៉ុន្តែប្រសិនបើត្រឹមស្មើក៏អស់ឱកាសដែរ។

ទោះបីជាថៃបានកក់កៅអីឡើងវគ្គបន្តហើយក្តី ប៉ុន្តែថៃហាក់ដូចជាមិនបន្ធូរជើងក្នុងការលេងជាមួយកម្ពុជាឡើយ។ ពួកគេបានកោះហៅខ្សែបម្រើប្រយុទ្ធវ័យ២៦ឆ្នាំ Supachok Sarachat មកពីក្លិប Hokkaido Consadole Sapporo នៃលីគកំពូលជប៉ុនថែមទៀត។

ប្រវត្តិជួបគ្នារវាង ថៃ និងកម្ពុជា គឺចំនួន៨លើក គិតចាប់តាំងពីឆ្នាំ១៩៥៧។ ក្នុងនោះ កម្ពុជា ធ្លាប់ស្មើ១ និងចាញ់៧។

ប្រវត្តិជួបគ្នា៨លើក

ថៃ ៣-០ កម្ពុជា ឆ្នាំ១៩៥៧
កម្ពុជា ០-១ ថៃ ឆ្នាំ១៩៦៤
ថៃ ១-១ កម្ពុជា ឆ្នាំ១៩៧១
ថៃ ៩-០ កម្ពុជា ឆ្នាំ១៩៩៥
ថៃ ៤-០ កម្ពុជា ឆ្នាំ១៩៩៧
ថៃ ៧-០ កម្ពុជា ឆ្នាំ២០០១
ថៃ ១-០ កម្ពុជា ឆ្នាំ២០០៥
ថៃ ៣-១ កម្ពុជា ឆ្នាំ២០២៣

ការប្រកួត៥លើកចុងក្រោយរបស់កម្ពុជាគឺឈ្នះ២ ស្មើ១ និងចាញ់២ ខណៈថៃ ឈ្នះ៣ និងស្មើ២។ ម្ចាស់ផ្ទះថៃមិនមានសម្ពោធទេ ក្នុងការលេងជាមួយក្រុមភ្ញៀវកម្ពុជា ដោយសារពួកគេបានកក់កៅអីឡើងទៅជុំបន្ដហើយ ក្រោយឆ្លងកាត់ ការប្រកួត៣លើក ឈ្នះទាំង៣ មាន៩ពិន្ទុ៕

អត្ថបទ៖ ផា រតនា

The post រាត្រីកាត់សេចក្តីពូល A កម្ពុជា ប៉ះ ថៃ ដោយគ្មានកម្លាំងសំខាន់ច្រើនរូប appeared first on Kampuchea Thmey Daily.

១២ឆ្នាំចុងក្រោយ វៀតណាម មិនចាញ់សោះក្នុងវគ្គចែកពូល AFF Cup

Pha Rothana — Thu, 19 Dec 2024 02:02:20 +0000

ក្រុមបាល់ទាត់ជម្រើសជាតិវៀតណាមធ្វើបានយ៉ាងល្អ នៅវគ្គសំន្សពិន្ទុក្នុងពូល ពានរង្វាន់ ASEAN Championship ក្រោយការប្រកួត២១លើកចុងក្រោយ ពួកគេមិនចាញ់ទាល់តែសោះ។

វៀតណាមបានបន្តការមិនស្គាល់បរាជ័យរបស់ពួកគេក្នុងវគ្គចែកពូលនៃពានរង្វាន់ ASEAN Championship បន្ទាប់ពីស្មើជាមួយ ហ្វិលីពីន ដោយលទ្ធផល ១-១ កាលពីយប់មិញ។ ខ្សែប្រយុទ្ធរបស់ភ្នំពេញក្រោន Gayoso បានស៊ុតគ្រាប់បាល់ឲ្យ ហ្វីលីពីន នាំមុខ ១-០ នៅនាទី៦៨ ប៉ុន្តែវៀតណាមបានតាមស្មើ ១-១ ដោយកីឡាករ Doãn Ngọc Tân នៅនាទី៩០+៧។

គិតត្រឹមពេលនះមានរយៈពេល១២ឆ្នាំហើយដែលពួកគេនៅតែបន្ដកំណត់ត្រាមិនចាញ់ ខណៈការចាញ់លើកចុងក្រោយក្នុងវគ្គចែកពូលបានកើតឡើងក្នុងឆ្នាំ២០១២។ ពេលនោះ ក្រុមវៀតណាមស្ថិតក្រោមការដឹកនាំរបស់លោក Phan Thanh Hung បានចាប់ផ្តើមដោយលទ្ធផល ១-១ ជាមួយមីយ៉ាន់ម៉ា ប៉ុន្តែបានចាញ់ ហ្វីលីពីន ដោយលទ្ធផល ០-១ និងបន្តចាញ់ ថៃ ដោយលទ្ធផល ១-៣។ បរាជ័យ២លើកបានធ្វើឲ្យវៀតណាម ធ្លាក់ត្រឹមវគ្គសន្សំពិន្ទុក្នុងពូល ហើយនោះជាលើកចុងក្រោយដែលពួកគេមិនអាចឆ្លងផុតវគ្គចែកពូល។

ចាប់តាំងពីពេលនោះមក វៀតណាមប្រកួតក្នុងវគ្គចែកពូលបានចំនួន២១ប្រកួត ហើយឈ្នះ១៦លើក និងស្មើ៥លើក ស៊ុតបញ្ចូលទីបាន៤៨គ្រាប់ និងរបូតគ្រាប់បាល់ចំនួន៧គ្រាប់ប៉ុណ្ណោះ។

ក្រៅពីមិនស្គាល់បរាជ័យក្នុងវគ្គចែកពូល ពានរង្វាន់ AFF Championship វៀតណាមថែមទាំងរក្សាកំណត់ត្រាមិនរបូតគ្រាប់បាល់ក្នុងវគ្គសំន្សពិន្ទុចំនួន១២ប្រកួតជាប់គ្នា ប៉ុន្តែកំណត់ត្រានេះត្រូវបំបែក ដោយក្រុមឡាវក្នុងការប្រកួតបើកឆាក ASEAN Championship ឆ្នាំ២០២៤ នៅពេលប្រធានក្រុមឡាវ Bounphachan Bounkong ស៊ុតបញ្ចូលទីដោយបាល់ពិន័យ១១ម៉ែត្រ។

ការប្រកួតវគ្គសំន្សពិន្ទុឆ្នាំ២០២៤ វៀតណាម រកបាន៧ពិន្ទុពីការឈ្នះ២ និងស្មើ១ (ឈ្នះឡាវ ១-៤, ឈ្នះ ឥណ្ឌូណេស៊ី ១-០) និងស្មើ ហ្វីលីពីន ១-១)។ ការប្រកួតចុងក្រោយ ពួកគេ បើកទ្វារ ទទួល មីយ៉ាន់ម៉ា ក្នុងផ្ទះរបស់ខ្លួន៕

ប្រែសម្រួល៖ ផា រតនា

The post ១២ឆ្នាំចុងក្រោយ វៀតណាម មិនចាញ់សោះក្នុងវគ្គចែកពូល AFF Cup appeared first on Kampuchea Thmey Daily.

គ្រូទីម័រខាងកើតថា VAR ពេលខ្លះល្អ ពេលខ្លះមិនល្អក្នុងបាល់ទាត់សម័យទំនើប

Pha Rothana — Wed, 18 Dec 2024 03:35:34 +0000

ក្រុមបាល់ទាត់ជម្រើសជាតិទីម័រខាងកើត បានបរាជ័យដោយលទ្ធផល ១-២ ក្នុងការប្រកួតជាមួយម្ចាស់ផ្ទះកម្ពុជា វគ្គសន្សំពិន្ទុក្នុងពូល ពានរង្វាន់ ASEAN Championship ថ្ងៃទី១៧ ខែធ្នូ ឆ្នាំ២០២៤។

ការប្រកួតនៅពហុកីឡដ្ឋានជាតិអូឡាំពិក សង្កេតឃើញថា ប្រព័ន្ធបច្ចេកវិទ្យាជំនួយអាជ្ញាកណ្តាល «VAR» ត្រូវបានប្រើប្រាស់ច្រើន។ ក្រោយចប់ការប្រកួត លោក Simón Elissetche គ្រូបង្វឹកទីម័រខាងកើត ត្រូវបានអ្នកសារព័ត៌មានចោទសួរថា លោកយល់ឃើញយ៉ាងណា ចំពោះការសម្រេចមិនផ្ដល់គ្រាប់បាល់ទី២ដល់ទីម័រខាងកើត ក្រោយការត្រួតពិនិត្យ VAR។

លោក Simón Elissetche បាននិយាយថា ៖«ខ្ញុំមិនអាចនិយាយអ្វីបានទេ ទាល់តែខ្ញុំមើលវីដេអូឡើងវិញទើបអាចនិយាយបាន។ បើនៅលើទីលាន ខ្ញុំមើលឃើញគ្រាប់ទី២របស់ទីម័រខាងកើតគួរតែផ្ដល់ឲ្យ តែ VAR ពិនិត្យមើលហើយគឺមិនឲ្យ។ នៅក្នុងបាល់ទាត់សម័យទំនើបមានបចេ្ចកវិទ្យាមកជំនួយ តែងតែមានចំណុចវិជ្ជមាន និងអវិជ្ជមាន។ យ៉ាងណានេះជាលទ្ធផល ខ្ញុំត្រូវតែទទួលយក»។

មិនមែនមានទីម័រខាងកើតទេ ប៉ុន្តែគ្រាប់បាល់ទាត់ទី១ដែលស៊ុតចូលដោយកីឡាករកម្ពុជា Nieto នៅដើមវគ្គទី១ត្រូវបានសម្រេចមិនផ្ដល់ឲ្យវិញ ក្រោយការឆែក VAR។ គ្រាប់ទី២ក៏ដូចគ្នា ក្រោយកីឡាករទីម័រខាងកើត រំខានអ្នកចាំទីកម្ពុជា។ ក្នុងបាល់ទាត់សម័យនេះ ទោះបីមានបច្ចេកវិទ្យាទំនើប ជួយសម្រួលដល់អាជ្ញាកណ្ដាលក្នុងការកាត់សេចក្ដីនៅលើទីលានពិតមែន ប៉ុន្តែក៏នៅតែកើតមានបញ្ហាអសកម្មភាពខ្លះ។ យ៉ាងមិញភាពអវិជ្ជមានត្រូវបានកាត់បន្ថយឲ្យនៅសល់តិច៕

អត្ថបទ៖ ផា រតនា

The post គ្រូទីម័រខាងកើតថា VAR ពេលខ្លះល្អ ពេលខ្លះមិនល្អក្នុងបាល់ទាត់សម័យទំនើប appeared first on Kampuchea Thmey Daily.

ទឹកចិត្តម្តាយរបស់អ្នកចាំទី វីរៈ ដារ៉ា បានធ្វើឲ្យមហាជនរំជួលចិត្ត

chean virakbot — Wed, 18 Dec 2024 00:28:17 +0000

បន្ទាប់ពីចប់ការប្រកួតរវាងក្រុមបាល់ទាត់ជម្រើសជាតិកម្ពុជា និងទីម័រខាងកើត នៅច្រក-ចូលក្នុងបរិវេណទីលាននៃពហុកីឡដ្ឋានជាតិអូឡាំពិក យប់ថ្ងៃទី១៧ ខែធ្នូ ឆ្នាំ២០២៤ ម្តាយរបស់អ្នកចាំទី វីរៈ ដារ៉ា បានអោប និងទប់អារម្មណ៍មិនបានរហូតដល់យំ។

សកម្មភាពត្រូវបានមើលឃើញថា ម្តាយរបស់ វីរៈ ដារ៉ា បានកំពុងរង់ចាំកូនដែលដើរចេញមកក្រៅដើម្បីចូលរថយន្តត្រឡប់ទៅកន្លែងស្នាក់នៅវិញ បន្ទាប់ពីចប់ការប្រកួតដែលកម្ពុជាបានយកឈ្នះទីម័រខាងកើតដោយលទ្ធផល ២-១។ នៅពេល វីរៈ ដារ៉ា ដើរចេញមក ហើយអ្នកម្តាយក៏បានដើរទៅរកកូន។ អ្នកស្រីបានអោបកូនប្រុស ដោយទប់អារម្មណ៍មិនបាន អ្នកស្រីយំនៅលើទ្រូងកូនប្រុសជាទីស្រឡាញ់។ នេះហើយជាទំហំចិត្តរបស់អ្នកម្ដាយដែលស្រឡាញ់ អាណិត និងយល់ពីជម្រៅចិត្តកូនដោយគ្មានលក្ខខណ្ឌ។

សកម្មភាពនេះបានធ្វើឲ្យអ្នកនៅជុំវិញទីនោះ និងមហាជន ជាពិសេសអ្នកគាំទ្របាល់ទាត់កម្ពុជារំជើបរំជួលចិត្តយ៉ាងខ្លាំងដែលយល់ពីជម្រៅចិត្តរបស់អ្នកម្តាយដែលអាណិតកូន។

រឿងនេះបានកើតមានឡើង បន្ទាប់ពីអ្នកចាំទី វីរៈ ដារ៉ា មិនបានជាប់ក្នុងជម្រើសដៃទី១នៅពេលកម្ពុជាប្រកួតជាមួយ ទីម័រខាងកើត និងក្រោយពេលដែលរូបគេបង្កើតឲ្យមានកំហុសបច្ចេកទេសពីរដងជាហេតុធ្វើឲ្យ សិង្ហបុរី ស៊ុតចូល២គ្រាប់កាលពីថ្ងៃទី១១ ខែធ្នូ ជាពេលដែលកម្ពុជាបានចាញ់ ១-២។

កំហុសបច្ចេកទេសនេះហើយដែលបានធ្វើឲ្យអ្នកគាំទ្ររិះគន់យ៉ាងខ្លាំងទៅលើអ្នកចាំទី វីរៈ ដារ៉ា ដែលបានក្លាយជាបន្ទុកយ៉ាងធ្ងន់។

អ្នកចាំទី រ៉េត លីហេង មកពីក្លិបណាហ្គាវើលដ៍ បានជាប់ជម្រើស១១នាក់ដំបូងក្នុងការប្រកួតដែលកម្ពុជា យកឈ្នះ ទីម័រខាងកើត ដោយលទ្ធផល ២-១។ នៅថ្ងៃទី២០ ខែធ្នូ ខាងមុខនេះ កម្ពុជានឹងប្រកួតជាមួយ ថៃ សម្រាប់ការប្រកួតវគ្គសន្សំពិន្ទុក្នុងពូលចុងក្រោយពានរង្វាន់ ASEAN Championship 2024៕

អត្ថបទ៖ វីរបុត្រ

The post ទឹកចិត្តម្តាយរបស់អ្នកចាំទី វីរៈ ដារ៉ា បានធ្វើឲ្យមហាជនរំជួលចិត្ត appeared first on Kampuchea Thmey Daily.

AFF Championship Archives - Kampuchea Thmey Daily

កម្ពុជា ស្ថិត​ក្នុង​ ៩ ប្រទេស នៅ​វគ្គ​ចែក​ពូល AFF Cup ខណៈ ព្រុយណេ និង ទីម័រ​ខាង​កើត ត្រូវ​ជម្រុះ

Xuan Son ម្ចាស់ស្បែកជើងមាស ASEAN Cup ទទួលការវះកាត់ជោគជ័យ

ហ្វីលីពីន ប្រើ​ពេល​៥២​ឆ្នាំ​ទើប​បាន​ឈ្នះថៃ

ឆ្នាំ​២០២៤ កម្ពុជា រក​បាន​​ពិន្ទុ​តិចជាង​ឆ្នាំ​២០២២ ក្នុង​ពាន AFF Cup

រាត្រី​កាត់​សេចក្តីពូល A កម្ពុជា ប៉ះ ថៃ ដោយគ្មានកម្លាំង​សំខាន់ច្រើនរូប

១២ឆ្នាំចុងក្រោយ វៀតណាម មិន​ចាញ់សោះ​ក្នុង​​វគ្គចែកពូល​ AFF Cup

គ្រូទីម័រខាងកើត​ថា VAR ពេលខ្លះល្អ ពេលខ្លះមិនល្អក្នុងបាល់ទាត់សម័យទំនើប

ទឹក​ចិត្ត​​ម្តាយ​របស់​អ្នក​ចាំទី​ វីរៈ ដារ៉ា បាន​ធ្វើ​ឲ្យ​មហាជន​រំជួលចិត្ត

កម្ពុជា ស្ថិតក្នុង ៩ ប្រទេស នៅវគ្គចែកពូល AFF Cup ខណៈ ព្រុយណេ និង ទីម័រខាងកើត ត្រូវជម្រុះ

ហ្វីលីពីន ប្រើពេល៥២ឆ្នាំទើបបានឈ្នះថៃ

ឆ្នាំ២០២៤ កម្ពុជា រកបានពិន្ទុតិចជាងឆ្នាំ២០២២ ក្នុងពាន AFF Cup

រាត្រីកាត់សេចក្តីពូល A កម្ពុជា ប៉ះ ថៃ ដោយគ្មានកម្លាំងសំខាន់ច្រើនរូប

១២ឆ្នាំចុងក្រោយ វៀតណាម មិនចាញ់សោះក្នុងវគ្គចែកពូល AFF Cup

គ្រូទីម័រខាងកើតថា VAR ពេលខ្លះល្អ ពេលខ្លះមិនល្អក្នុងបាល់ទាត់សម័យទំនើប

ទឹកចិត្តម្តាយរបស់អ្នកចាំទី វីរៈ ដារ៉ា បានធ្វើឲ្យមហាជនរំជួលចិត្ត