AFF U19 Boys Championship Archives - Kampuchea Thmey Daily

វៀតណាម ផ្ទុះការតវ៉ា រឿង ថៃ ប្រើទង់ជាតិខុស ខណៈថៃចេញលិខិតសុំទោស

chean virakbot — Wed, 29 Oct 2025 02:25:27 +0000

ម្ចាស់ផ្ទះថៃដែលរៀបចំពិធីចាប់ឆ្នោតជ្រើសរើសពូលពានរង្វាន់ហ្វូតសាលអាស៊ាន ASEAN U19 Boys’ Futsal Championship 2025 បានប្រើទង់ជាតិរបស់ប្រទេស វៀតណាម ខុសដោយប្រើទង់ជាតិរបស់ចិនទៅវិញ។

ការប្រើទង់ជាតិខុសរបស់ម្ចាស់ផ្ទះថៃបានធ្វើឲ្យមានការចាប់អារម្មណ៍យ៉ាងខ្លាំង។ ជាពិសេស ប្រទេសវៀតណាម បានផ្ទុះការតវ៉ា រហូតដល់ដាក់លិខិតតវ៉ាទៅសមាគមកីឡាបាល់ទាត់ថៃ និងសហព័ន្ធកីឡាបាល់ទាត់អាស៊ាន (AFF)។

កំហុសឆ្គងរបស់ប្រទេសថៃ ត្រូវបានវៀតណាមចាត់ទុកជា«បញ្ហាធ្ងន់ធ្ងរ និងមិនអាចទទួលយកបាន»។ នៅថ្ងៃទី២៨ ខែតុលា ឆ្នាំ ២០២៥ សហព័ន្ធកីឡាបាល់ទាត់វៀតណាម (VFF) បានសង្កត់ធ្ងន់ថា កំហុសនេះធ្វើឲ្យប៉ះពាល់មុខមាត់របស់វៀតណាម និងជះផលអវិជ្ជមានលើសហគមន៍អាស៊ាន។ វៀតណាមជំរុញឲ្យសហព័ន្ធកីឡាបាល់ទាត់អាស៊ានដោះស្រាយជុំវិញ ករណីនេះ និងឲ្យមានការប្រយ័ត្នខ្ពស់ទៅថ្ងៃអនាគត។

បន្ទាប់មក សមាគមកីឡាបាល់ទាត់ថៃបានចេញសេចក្តីថ្លែងជុំវិញកំហុសឆ្គងរបស់ខ្លួននៅលើផេកផ្លូវការ FA Thailand និងរៀបចំលិខិតសុំទោសជាផ្លូវការ។ លោកស្រី Nualphan Lamsam ប្រធានសមាគមកីឡាបាល់ទាត់ថៃ បានរៀបចំលិខិតសុំទោសពីរគឺ ទៅប្រទេសវៀតណាម និងសហព័ន្ធកីឡាបាល់ទាត់អាស៊ាន។ លោក Adisak Benjasiriwan អនុប្រធានកីឡាបាល់ទាត់ហ្វូតសាល និងបាល់ទាត់លើឆ្នេរខ្សាច់ នឹងធ្វើដំណើរទៅប្រទេសវៀតណាម នៅថ្ងៃទី២៩ ខែតុលានេះ ដើម្បីប្រគល់លិខិតសុំទោសជាផ្លូវការ៕

ប្រែសម្រួល៖ វីរបុត្រ

The post វៀតណាម ផ្ទុះការតវ៉ា រឿង ថៃ ប្រើទង់ជាតិខុស ខណៈថៃចេញលិខិតសុំទោស appeared first on Kampuchea Thmey Daily.

យប់នេះ U19 កម្ពុជា ប៉ះ ហ្វីលីពីន មុនត្រឡប់ មកស្រុកវិញ

chean virakbot — Tue, 23 Jul 2024 02:20:10 +0000

ក្រុមបាល់ទាត់ជម្រើសជាតិកម្ពុជាអាយុក្រោម១៩ឆ្នាំ (U19) នឹងប្រកួតជាមួយ ក្រុមយុវជនហ្វីលីពីន វេលាម៉ោង៧:៣០នាទីយប់ ថ្ងៃទី២៣ ខែកក្កដា ឆ្នាំ២០២៤ សម្រាប់ការប្រកួតវគ្គសន្សំពិន្ទុក្នុងពូលចុងក្រោយពានរង្វាន់ ASEAN U19 Boys’ Championship នៅប្រទេសឥណ្ឌូណេស៊ី។

ក្រុមយុវជនកម្ពុជាបានអស់ឱកាសឡើងទៅកាន់វគ្គបន្តហើយ បន្ទាប់ពីចាញ់២ប្រកួតជាប់គ្នាគឺចាញ់ ទីម័រខាងកើត ២-៣ និងចាញ់ម្ចាស់ផ្ទះឥណ្ឌូណេស៊ី ០-២។ ចំណែក ហ្វីលីពីន បានចាញ់ ឥណ្ឌូណេស៊ី ៦-០ និងឈ្នះទីម័រខាងកើត ២-០ ដែលធ្វើឲ្យពួកគេនៅមានឱកាសអ៊ុតមើលក្រុមលេខ២ល្អបំផុតក្នុងពូល។

ប្រវត្តិជួបគ្នា៥ដងក្នុងពានរង្វាន់ ASEAN U19 Boys’ Championship កម្ពុជាធ្លាប់ឈ្នះ៤ដង ខណៈហ្វីលីពីន ធ្លាប់ឈ្នះតែ១ដងប៉ុណ្ណោះ។

កម្ពុជា ០-១ ហ្វីលីពីន (ឆ្នាំ២០០២)
កម្ពុជា ៣-០ ហ្វីលីពីន (ឆ្នាំ២០០៣)
កម្ពុជា ៥-៣ ហ្វីលីពីន (ឆ្នាំ២០១១)
កម្ពុជា ៤-១ ហ្វីលីពីន (ឆ្នាំ២០១៣)
កម្ពុជា ១-០ ហ្វីលីពីន (ឆ្នាំ២០១៥)

ពានរង្វាន់ ASEAN U19 Boys’ Championship ត្រូវបានរៀបចំការប្រកួតលើកដំបូងកាលពីឆ្នាំ២០០២ ដែលកម្ពុជាធ្វើជាម្ចាស់ផ្ទះតែម្តង។ កម្ពុជាមិនធ្លាប់មានប្រវត្តិឆ្លងផុតក្នុងពូលឡើយ។ ខាងក្រោមជាស្ថិតិរបស់ក្រុម U19 កម្ពុជាដែលធ្លាក់ក្នុងវគ្គជម្រុះក្នុងពូលទាំងអស់។

ឆ្នាំ២០០២៖ ស្មើ១ប្រកួត និងចាញ់៣ប្រកួត រកបាន១ពិន្ទុ
ឆ្នាំ២០០៣៖ ឈ្នះ១ប្រកួត និងចាញ់៣ប្រកួត រកបាន៣ពិន្ទុ
ឆ្នាំ២០០៧៖ ចាញ់៣ប្រកួត គ្មានពិន្ទុ
ឆ្នាំ២០០៩៖ ចាញ់៣ប្រកួត គ្មានពិន្ទុ
ឆ្នាំ២០១១៖ ឈ្នះ១ប្រកួត ស្មើ២ប្រកួត និងចាញ់១ប្រកួត រកបាន៥ពិន្ទុ
ឆ្នាំ២០១៣៖ ឈ្នះ២ប្រកួត និងចាញ់២ប្រកួត រកបាន៦ពិន្ទុ
ឆ្នាំ២០១៥៖ ឈ្នះ២ប្រកួត ស្មើ១ប្រកួត និងចាញ់១ប្រកួត រកបាន៧ពិន្ទុ
ឆ្នាំ២០១៦៖ ឈ្នះ១ប្រកួត និងចាញ់៤ប្រកួត រកបាន៣ពិន្ទុ
ឆ្នាំ២០១៧៖ ឈ្នះ១ប្រកួត ស្មើ១ប្រកួត និងចាញ់៣ប្រកួត រកបាន៤ពិន្ទុ
ឆ្នាំ២០១៨៖ ឈ្នះ២ប្រកួត និងចាញ់២ប្រកួត រកបាន៦ពិន្ទុ
ឆ្នាំ២០១៩៖ ឈ្នះ២ប្រកួត និងចាញ់៣ប្រកួត រកបាន៦ពិន្ទុ
ឆ្នាំ២០២២៖ ឈ្នះ១ប្រកួត និងចាញ់៣ប្រកួត រកបាន៣ពិន្ទុ

អត្ថបទ៖ វីរបុត្រ

The post យប់នេះ U19 កម្ពុជា ប៉ះ ហ្វីលីពីន មុនត្រឡប់ មកស្រុកវិញ appeared first on Kampuchea Thmey Daily.

U19 កម្ពុជា ប៉ះ ម្ចាស់ផ្ទះ ឥណ្ឌូណេស៊ី ម៉ោង៧:៣០នាទីយប់នេះ

chean virakbot — Sat, 20 Jul 2024 02:56:41 +0000

ក្រុមបាល់ទាត់ជម្រើសជាតិកម្ពុជាអាយុ១៩ឆ្នាំ (U19) នឹងប្រកួតជាមួយក្រុមម្ចាស់ផ្ទះឥណ្ឌូណេស៊ី ដែលជាក្រុមខ្លាំងក្នុងពូលសម្រាប់ការប្រកួតសន្សំពិន្ទុលើកទី២ ពានរង្វាន់យុវជនអាយុ១៩ឆ្នាំ វេលាម៉ោង៧:៣០នាទីយប់ ថ្ងៃសៅរ៍ ទី២០ ខែកក្កដា ឆ្នាំ២០២៤។

ការប្រកួតសន្សំពិន្ទុថ្ងៃបើកឆាក ក្រុមយុវជនកម្ពុជាបានខកចិត្តយ៉ាងខ្លាំង ដោយបានចាញ់ក្រុមទីម័រខាងកើត ដោយលទ្ធផល ២-៣។ ទីម័រខាងកើតជាក្រុមកម្រិតទាបដែលកម្ពុជាសង្ឃឹមរកបានពិន្ទុ ប៉ុន្តែបែរជាចាញ់ដែលបានធ្វើឲ្យក្តីសង្ឃឹមឡើងទៅកាន់វគ្គពាក់កណ្តាលផ្តាច់ព្រ័ត្រស្តួចស្តើងខ្លាំងមែនមែន។

ចំពោះឥណ្ឌូណេស៊ីបានលត់ក្រុមយុវជន ហ្វីលីពីន ដោយលទ្ធផល ៦-០ ថ្ងៃបើកឆាក ដូច្នេះថ្ងៃនេះពួកគេត្រូវតែរកឲ្យបានពិន្ទុពីកម្ពុជាដើម្បីប្រជែងយកលេខ១ក្នុងពូល A ខណៈបច្ចុប្បន្នពួកគេមាន៣ពិន្ទុ ឈរលេខ២ ទីម័រខាងកើត មាន៣ពិន្ទុ ឈរលេខ២ ហើយកម្ពុជា និងហ្វីលីពីនគ្មានពិន្ទុទេ។

នៅពូល B ក្រុមយុវជនអូស្ត្រាលីមាន៣ពិន្ទុ កំពុងឈរលេខ១ បន្ទាប់ពីឈ្នះឡាវដោយលទ្ធផល ៦-០ ខណៈវៀតណាម និង មីយ៉ាន់ម៉ា មាន១ពិន្ទុដូចគ្នា ក្រោយពួកគេស្មើគ្នា១-១ ហើយឡាវស្ថិតនៅបាតតារាង។

ដោយឡែកពូល C ក្រុមម៉ាឡេស៊ី មាន៣ពិន្ទុ កំពុងឈរលេខ១ បន្ទាប់ពីបានលត់ក្រុមយុវជនព្រុយណេដោយលទ្ធផល ១១-០ ខណៈថៃក៏មាន៣ពិន្ទុ ឈរលេខ២ តាមរយៈការវាយបកយកឈ្នះសិង្ហបុរី ដោយលទ្ធផល២-១។

សូមបញ្ជាក់ថា ក្រុមលេខ១នៃពូលទាំង៣ និងក្រុមលេខ២ល្អបំផុត១ក្រុមឡើងទៅកាន់វគ្គពាក់កណ្តាលផ្តាច់ព្រ័ត្រ។

កម្ពុជាត្រូវការឈ្នះឥណ្ឌូណេស៊ីដាច់ខាតទើបអាចអ៊ុតក្រុមលេខ២ល្អបំផុត ប៉ុន្តែប្រសិនបើស្មើ ឬចាញ់គឺអស់ឱកាសឡើងទៅវគ្គបន្តហើយ ទោះបីនៅសល់ប្រកួតជាមួយហ្វីលីពីន៕

កម្មវិធីប្រកួត

ហ្វីលីពីន vs ទីម័រខាងកើត វេលាម៉ោង៣រសៀល
កម្ពុជា vs ឥណ្ឌូណេស៊ី វេលាម៉ោង៧:៣០នាទីយប់

អត្ថបទ៖ វីរបុត្រ 

The post U19 កម្ពុជា ប៉ះ ម្ចាស់ផ្ទះ ឥណ្ឌូណេស៊ី ម៉ោង៧:៣០នាទីយប់នេះ appeared first on Kampuchea Thmey Daily.

ថ្ងៃបើកឆាក U19 កម្ពុជា បរាជ័យក្រោមថ្វីជើង U19 ទីម័រខាងកើត ២-៣

chean virakbot — Wed, 17 Jul 2024 09:54:15 +0000

ក្រុមបាល់ទាត់កម្ពុជាអាយុក្រោម១៩ឆ្នាំ (U19) បានខកចិត្តក្រោមថ្វីជើងរបស់ក្រុមយុវជនទីម័រខាងកើតដោយលទ្ធផល ២-៣ សម្រាប់ការប្រកួតបើកឆាក វគ្គសន្សំពិន្ទុក្នុងពូលពានរង្វាន់ ASEAN U19 Boys’ Championship 2024 នៅប្រទេសឥណ្ឌូណេស៊ី។

ការប្រកួតវគ្គទី១ ក្រុមយុវជនកម្ពុជាគ្រប់គ្រងបាល់បានច្រើន ប៉ុន្តែតំបន់ការពារ និងតំបន់ប្រយុទ្ធពិតជាធ្វើមិនបានល្អឡើយ។ ជាពិសេសចន្លោះនាទី៣៤ ដល់នាទី៣៩ ទីម័រខាងកើត អាចរកគ្រាប់បាល់បាន៣គ្រាប់ដែលបណ្តាលមកពីតំបន់ការពាររបស់កម្ពុជាលេងសហការគ្នាមិនបានល្អតែម្តង។

ចំណែកនៅតំបន់ប្រយុទ្ធវិញ ភាគច្រើនមិនសូវមានបញ្ជូនឲ្យគ្នាទេដោយកីឡាករនៅតំបន់ជួរមុខព្យាយាមអូសបាល់ចូលតំបន់គ្រោះថ្នាក់ដោយខ្លួនឯង។ យ៉ាងណា ខ្សែបម្រើកណ្តាលមានទម្រង់លេងបានល្អ ជាពិសេសខ្សែបម្រើកូនកាត់ខ្មែរ-នូវេសេឡង់ ថុង លឹមលូកា។

នៅវគ្គទី២ កម្ពុជាអាចប្រមូលចិត្តសាស្ត្របានល្អដោយអាចរកបាន២គ្រាប់នៅនាទី៥៥ និងនាទី៦០ ដែលលទ្ធផលតាមពីក្រោយ ២-៣ នេះរក្សារហូតចប់ការប្រកួត។ បរាជ័យនេះបានធ្វើឲ្យកម្ពុជាមានសង្ឃឹមតិចតូចប៉ុណ្ណោះសម្រាប់ការឡើងទៅវគ្គបន្ត ពីព្រោះត្រូវជួបក្រុមខ្លាំងម្ចាស់ផ្ទះឥណ្ឌូណេស៊ី និងចុងក្រោយជួបហ្វីលីពីន។

ហ្វីលីពីនថ្វីបើជាក្រុមដែលមានយុវជនកម្រិតទាបកន្លងមក ប៉ុន្តែសម្រាប់ការប្រកួតឆ្នាំ២០២៤នេះ ពួកគេបានជ្រើសរើសយកយុវជនមកពីក្រៅប្រទេសរហូតដល់១៤នាក់គឺ៥នាក់មកសហរដ្ឋអាមេរិក ៣នាក់មកពីប្រទេសអេស្ប៉ាញ ២នាក់មកពីប្រទេសកាណាដា ២នាក់មកពីអូស្ត្រាលី ១នាក់មកពីតួកគី និង១នាក់មកពីអាល្លឺម៉ង់៕

អត្ថបទ៖ វីរបុត្រ

The post ថ្ងៃបើកឆាក U19 កម្ពុជា បរាជ័យក្រោមថ្វីជើង U19 ទីម័រខាងកើត ២-៣ appeared first on Kampuchea Thmey Daily.

U19 កម្ពុជានៅពូល A ជាមួយម្ចាស់ផ្ទះអាចស្រួលបន្តិចក្នុងពាន AFF-U19 Boys

chean virakbot — Thu, 30 May 2024 09:27:10 +0000

ក្រុមបាល់ទាត់យុវជនកម្ពុជាអាយុក្រោម១៩ឆ្នាំ ស្ថិតនៅពូល A ជាមួយម្ចាស់ផ្ទះ ឥណ្ឌូណេស៊ី និង២ក្រុមទៀតដែលមានទីម័រខាងកើត និងហ្វីលីពីន ក្នុងពានរង្វាន់ យុវជនអាស៊ាន AFF-U19 Boys Championship 2024។

ម្ចាស់ផ្ទះឥណ្ឌូណេស៊ី ជាក្រុមខ្លាំង ប៉ុន្តែនិយាយពី ក្រុមយុវជន ទីម័រខាងកើត និងហ្វីលីពីន មិនលើសកម្ពុជាប៉ុន្មានឡើយ ដូច្នេះអាចជាឱកាសសម្រាប់ក្រុមយុវជនកម្ពុជាក្នុងការឡើងវគ្គពាក់កណ្តាលផ្តាច់ព្រ័ត្រ។ ការប្រកួតចាប់ពីថ្ងៃទី១៧ ដល់ទី២៩ ខែកក្កដា ឆ្នាំ២០២៤។ ក្រុមលេខ១នៃពូលនីមួយៗ និងក្រុមចំណាត់ថ្នាក់លេខ២ល្អបំបំផុតតែ១ក្រុមឡើងទៅកាន់វគ្គពាក់កណ្តាលផ្តាច់ព្រ័ត្រ។

ពូល A

ឥណ្ឌូណេស៊ី (ម្ចាស់ផ្ទះ)
ទីម័រខាងកើត
កម្ពុជា
ហ្វីលីពីន

ពូល B

ឡាវ
វៀតណាម
មីយ៉ាន់ម៉ា
អូស្ត្រាលី

ពូល C

ម៉ាឡេស៊ី
ថៃ
សិង្ហបុរី
ព្រុយណេ

អត្ថបទ៖ វីរបុត្រ

The post U19 កម្ពុជានៅពូល A ជាមួយម្ចាស់ផ្ទះអាចស្រួលបន្តិចក្នុងពាន AFF-U19 Boys appeared first on Kampuchea Thmey Daily.

AFF U19 Boys Championship Archives - Kampuchea Thmey Daily

វៀតណាម ផ្ទុះ​ការតវ៉ា រឿង​ ថៃ ប្រើ​​​ទង់​ជាតិ​ខុស ខណៈ​ថៃ​​ចេញលិខិត​សុំ​ទោស

យប់នេះ U19 កម្ពុជា ប៉ះ ហ្វីលីពីន មុនត្រឡប់ មកស្រុកវិញ

U19 កម្ពុជា ប៉ះ ម្ចាស់ផ្ទះ​ ឥណ្ឌូណេស៊ី ម៉ោង​៧:៣០នាទី​យប់​នេះ

ថ្ងៃ​បើក​ឆាក U19 កម្ពុជា បរាជ័យ​ក្រោម​ថ្វីជើង U19 ទីម័រ​ខាង​កើត ២-៣

U19 កម្ពុជា​នៅពូល A ជា​មួយ​ម្ចាស់​ផ្ទះ​អាច​ស្រួលបន្តិច​ក្នុង​ពាន AFF-U19 Boys

វៀតណាម ផ្ទុះការតវ៉ា រឿង ថៃ ប្រើទង់ជាតិខុស ខណៈថៃចេញលិខិតសុំទោស

U19 កម្ពុជា ប៉ះ ម្ចាស់ផ្ទះ ឥណ្ឌូណេស៊ី ម៉ោង៧:៣០នាទីយប់នេះ

ថ្ងៃបើកឆាក U19 កម្ពុជា បរាជ័យក្រោមថ្វីជើង U19 ទីម័រខាងកើត ២-៣

U19 កម្ពុជានៅពូល A ជាមួយម្ចាស់ផ្ទះអាចស្រួលបន្តិចក្នុងពាន AFF-U19 Boys