AFF U-23 Championship Archives - Kampuchea Thmey Daily

លទ្ធផលចាប់ឆ្នោត ក្រុម U23 កម្ពុជា ប៉ះ វៀតណាម និង ឡាវ ពាន ASEAN U23 Championship

chean virakbot — Fri, 30 May 2025 02:48:53 +0000

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) ស្ថិតនៅក្នុងពូល B សម្រាប់ការប្រកួតជើងឯកយុវជនអាស៊ានអាយុក្រោម២៣ឆ្នាំ ASEAN U23 Championship ឆ្នាំ២០២៥ នៅប្រទេសឥណ្ឌូណេស៊ី។

ក្រុម U23 កម្ពុជា ស្ថិតនៅពូល B ជាមួយ ក្រុមខ្លាំង វៀតណាម និង ឡាវ ខណៈពូល A មានម្ចាស់ផ្ទះឥណ្ឌូណេស៊ី ម៉ាឡេស៊ី ហ្វីលីពីន និង ព្រុយណេ ហើយពូល C មានក្រុមខ្លាំង ថៃ មីយ៉ាន់ម៉ា និង ទីម័រខាងកើត។

រូបមន្តនៃការប្រកួតគឺ ក្រោយចប់វគ្គសន្សំពិន្ទុក្នុងពូល ក្រុមលេខ១នៃពូលទាំង៣ និងក្រុមលេខ២ល្អបំផុត១ក្រុម នឹងឡើងទៅកាន់វគ្គពាក់កណ្តាលផ្តាច់ព្រ័ត្រ។ រូបមន្តនេះក្រុមយុវជនកម្ពុជាបានខកចិត្តច្រើនលើកមកហើយ។

ការប្រកួត ASEAN U23 Championship ចាប់ពីថ្ងៃទី១៥ ដល់ទី៣១ ខែកក្កដា ឆ្នាំ២០២៥ នៅប្រទេសឥណ្ឌូណេស៊ី។ កាលពីឆ្នាំ២០២៣ ក្រុមវៀតណាមជាម្ចាស់ជើងឯក។

ពានរង្វាន់នេះ ក្រុមកម្ពុជាធ្លាប់ទទួលបានចំណាត់ថ្នាក់លេខ៤ម្តងកាលពីឆ្នាំ២០២១ជាពេលដែលកម្ពុជាទទួលធ្វើម្ចាស់ផ្ទះលើកទី២៕

អត្ថបទ៖ វីរបុត្រ

The post លទ្ធផលចាប់ឆ្នោត ក្រុម U23 កម្ពុជា ប៉ះ វៀតណាម និង ឡាវ ពាន ASEAN U23 Championship appeared first on Kampuchea Thmey Daily.

ក្រុមបាល់ទាត់កម្ពុជាខកចិត្តក្នុងព្រឹត្តិការណ៍អន្តរជាតិចំនួន៥ឆ្នាំ២០២៣

Pha Rothana — Sat, 21 Oct 2023 01:51:09 +0000

ក្រុមបាល់ទាត់កម្ពុជាជម្រើសជាតិទទួលបានលទ្ធផលមិនល្អប្រសើរទេសម្រាប់ការប្រកួតប្រជែងក្នុងឆ្នាំ២០២៣ ក្រោយពីក្រុមធំបានធ្លាក់ក្នុងវគ្គជម្រុះដំបូង ជើងឯកពិភពលោកឆ្នាំ២០២៦ ហើយទាំងក្រុម U23 និងក្រុមហ្វូតសាល ក៏សុទ្ធតែធ្វើមិនបានល្អ។

ក្រុមហ្វូតសាលកម្ពុជា

ពានរង្វាន់ AFC Futsal Asian Cup ត្រូវបានបង្កើតឡើងតាំងពីឆ្នាំ១៩៩៩ ដែលរហូតដល់ពេលនេះ១៧លើកហើយ។ ក្រុមហ្វូតសាលកម្ពុជាចូលរួម៦លើក។ កំណត់ត្រាល្អបំផុតរបស់ក្រុមហ្វូតសាលកម្ពុជាគឺឆ្លងផុតចូលទៅវគ្គចែកពូលក្នុងពានរង្វាន់ AFC Futsal Asian Cup កាលពីឆ្នាំ២០០៤។ ចាប់តាំងពីឆ្នាំ២០០៤ ក្រុមហ្វូតសាលកម្ពុជានៅតែមិនអាចឆ្លងផុតវគ្កជម្រុះដំបូងឡើយ។ ដោយឡែកក្នុងពានង្វាន់ AFC Futsal Asian Cup ឆ្នាំ២០២៤ ក្រុមហ្វូតសាលកម្ពុជាក៏បន្តធ្លាក់ក្នុងវគ្គជម្រុះដំបូង ក្រោយឆ្លងកាត់៣ប្រកួត។

ក្រុមបាល់ទាត់ជម្រើសជាតិកម្ពុជាជម្រុះជើងឯកពិភពលោក

ក្រុមបាល់ទាត់ជម្រើសជាតិបាល់ទាត់កម្ពុជា បានធ្វើឲ្យអ្នកគាំទ្រខកចិត្តយ៉ាងខ្លាំង បន្ទាប់ពីធ្លាក់ត្រឹមវគ្គជម្រុះបឋមក្នុងពានរង្វាន់ពិភពលោក ឆ្នាំ២០២៦ (FIFA World Cup 2026) ក្រោយចាញ់ក្រុមជម្រើសជាតិប៉ាគីស្ថាន ក្នុងការប្រកួតជើងទី២ ដោយលទ្ធផល ០-១ នៅទឹកដីប៉ាគីស្ថាន។ បរាជ័យវគ្គជម្រុះបឋមនេះជាលើកដំបូងគិតចាប់តាំងពីឆ្នាំ២០១៥ ខណៈកម្ពុជាធ្លាប់បានឡើងជុំទី២ពីរលើកជាប់គ្នាគឺជម្រុះជើងឯកពិភពលោកឆ្នាំ០១៨ និង២០២២។

U23 កម្ពុជា ក្នុងកីឡាស៊ីហ្គេម លើកទី៣២ ឆ្នាំ២០២៣

ក្នុងនាមជាម្ចាស់ផ្ទះ ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំបានធ្លាក់ត្រឹមវគ្គសន្សំពិន្ទុក្នុងពូលនៃព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។ កម្ពុជាស្ថិតនៅពូល A រកបាន៤ពិន្ទុពីការឈ្នះទីម័រខាងកើត ៤-០, ស្មើហ្វីលីពីន ១-១, ចាញ់ឥណ្ឌូណេស៊ី ១-២ និងចាញ់មីយ៉ាន់ម៉ា ០-១។

U23 កម្ពុជា ក្នុងពានរង្វាន់ AFF U23 Championship 2023

ក្នុងពានរង្វាន់ AFF U23 Championship នៅប្រទេសថៃ ក្រុមយុវជនកម្ពុជាធ្វើមិនបានល្អដែរ ដោយធ្លាក់ត្រឹមវគ្គជម្រុះក្នុងពូល។ ក្រុមកម្ពុជាស្ថិតក្នុងពូលA រួមមានក្រុមម្ចាស់ផ្ទះថៃ មីយ៉ាន់ម៉ា និង ប្រុយណេ។ ឆ្លងកាត់ការប្រកួត៣លើកកម្ពុជា ឈ្នះ១ ស្មើ១ និងចាញ់១ មាន៤ពិន្ទុឈរលេខ២ក្នុងពូល។

U23 កម្ពុជា ក្នុងវគ្គជម្រុះ AFC U23 Asian Cup 2024

ពានរង្វាន់ AFC U-23 Asian Cup 2024 វគ្គជម្រុះ ក្រុមយុវជនកម្ពុជាធ្វើមិនបានល្អទៀត ក្រោយធ្លាក់ត្រឹមវគ្គជម្រុះក្នុងពូល។ ក្រុមកម្ពុជាស្ថិតក្នុងពូលJ ជាមួយម្ចាស់ផ្ទះ អារ៉ាប៊ីសាអ៊ូឌីត, លីបង់ និងម៉ុងហ្គោលី។ ក្រោយឆ្លងកាត់ការប្រកួត៣លើក កម្ពុជា ឈ្នះ១ ស្មើ១ និងចាញ់១ មាន៤ពិន្ទុ ឈរលេខ២ក្នុងពូល៕

អត្ថបទ៖ ផា រតនា

The post ក្រុមបាល់ទាត់កម្ពុជាខកចិត្តក្នុងព្រឹត្តិការណ៍អន្តរជាតិចំនួន៥ឆ្នាំ២០២៣ appeared first on Kampuchea Thmey Daily.

យប់នេះ U23 កម្ពុជាដាច់ខាតត្រូវឈ្នះថៃទើបឡើងវគ្គបន្តជើងឯក AFF U23

chean virakbot — Mon, 21 Aug 2023 01:53:31 +0000

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំត្រូវប្រកួតជាមួយម្ចាស់ផ្ទះថៃ វេលាម៉ោង៨យប់ ថ្ងៃចន្ទ ទី២១ ខែសីហា វគ្គសន្សំពិន្ទុក្នុងពូល ចុងក្រោយពានរង្វាន់យុវជនអាស៊ានអាយុក្រោម២៣ឆ្នាំ AFF U23 Championship។

ក្រុមយុវជនកម្ពុជាមាន៤ពិន្ទុ ស្ថិតនៅចំណាត់ថ្នាក់លេខ២ក្នុងពូល A បន្ទាប់ពីឆ្លងកាត់២ប្រកួតដោយទទួលបានជ័យជម្នះ ១ និងស្មើ១ ក្នុងនោះឈ្នះព្រុយណេ ៥-០ និងស្មើមីយ៉ាន់ម៉ា១-១។ ចំណែក ថៃ មាន៦ពិន្ទុ ស្ថិតនៅចំណាត់ថ្នាក់លេខ១ បន្ទាប់ពីឈ្នះទាំងពីរប្រកួតគឺឈ្នះ មីយ៉ាន់ម៉ា ៣-០ និងឈ្នះព្រុយណេ ៣-០។

កម្ពុជាត្រូវការឈ្នះដាច់ខាតដើម្បីអស់មន្ទិលសង្ស័យក្នុងការឡើងទៅកាន់វគ្គ៤ក្រុមចុងក្រោយ ពីព្រោះប្រសិនបើឈ្នះថៃនឹងឈរលេខ១ក្នុងពូល ប៉ុន្តែបើចាញ់ឬស្មើថៃគឺអស់ឱកាសហើយ។

ពូល A មាន៤ក្រុមដូច្នេះ លទ្ធផលប្រកួតជាមួយក្រុមចំណាត់ថ្នាក់លេខ៤គឺ ព្រុយណេ មិនគិតនោះទេ ដោយសារពូលផ្សេងទៀតម៣ក្រុមដូចគ្នា។ ទាំងកម្ពុជា និងថៃដែលឈ្នះព្រុយណេមិនគិតពិន្ទុឡើយ ដូច្នេះមានន័យថា ថៃមាន៣ពិន្ទុ ខណៈកម្ពុជាមាន១ពិន្ទុ ហើយមីយ៉ាន់ម៉ាមាន១ពិន្ទុដែរ។

បច្ចុប្បន្ននេះ ក្រុមចំណាត់ថ្នាក់លេខ២ល្អជាងគេកំពុងកំពុងកាន់កាប់ដោយឥណ្ឌូណេស៊ី ស្ថិតនៅលេខ២ពូល B ដោយមាន៣ពិន្ទុ បន្ទាប់ពីឈ្នះ១ប្រកួត និងចាញ់១ប្រកួត ខណៈហ្វីលីពីនស្ថិតនៅលេខ២មាន១ពិន្ទុ ក្នុងពូល C ដូចកម្ពុជា មាន១ពិន្ទុ ស្ថិតនៅលេខ២ក្នុងពូល A។

ប្រសិនបើកម្ពុជាឈ្នះថៃនឹងមាន៧ពិន្ទុក្នុងពូល A (ប្រៀបធៀបនឹងពូលផ្សេង កម្ពុជាមាន៤ពិន្ទុ) ឈរលើកំពូលតារាងឡើងទៅកាន់វគ្គពាក់កណ្តាលផ្តាច់ព្រ័ត្រ ប៉ុន្តែប្រសិនបើកម្ពុជាចាញ់ ឬ ស្មើគឺអស់ឱកាសហើយ ពីព្រោះឥណ្ឌូណេស៊ីមាន៣ពិន្ទុ។ ប៉ុន្តែប្រសិនបើថៃចាញ់កម្ពុជា នោះថៃនឹងប្រជែងគ្នាជាមួយឥណ្ឌូណេស៊ីសម្រាប់កៅអីលេខ២ល្អបំផុត ពីព្រោះមាន៣ពិន្ទុដូចគ្នា។

ពូល A

ថៃ មាន៦ពិន្ទុ
កម្ពុជា មាន៤ពិន្ទុ
មីយ៉ាន់ម៉ា មាន១ពិន្ទុ
ព្រុយណេ មាន០ពិន្ទុ

ពូល B

ម៉ាឡេស៊ី មាន៣ពិន្ទុ
ឥណ្ឌូណេស៊ី មាន៣ពិន្ទុ
ទីម័រខាងកើត មាន០ពិន្ទុ

ពូល C

វៀតណាម មាន៣ពិន្ទុ
ហ្វីលីពីន មាន១ពិន្ទុ
ឡាវ មាន០ពិន្ទុ

ក្រុមលេខ២ល្អបំផុត

ពូល B ឥណ្ឌូណេស៊ី
ពូល C ហ្វីលីពីន
ពូល A កម្ពុជា

អត្ថបទ៖ វីរបុត្រ

The post យប់នេះ U23 កម្ពុជាដាច់ខាតត្រូវឈ្នះថៃទើបឡើងវគ្គបន្តជើងឯក AFF U23 appeared first on Kampuchea Thmey Daily.

ពានAFF U-23 កម្ពុជាធ្លាប់ឈ្នះមីយ៉ាន់ម៉ា ២-០ ចុះម៉ោង៤ថ្ងៃនេះ?

chean virakbot — Sat, 19 Aug 2023 01:44:26 +0000

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំនឹងប្រកួតជាមួយក្រុមយុវជនខ្លាំងមីយ៉ាន់ម៉ា វេលាម៉ោង៤រសៀលនេះ ក្នុងពានរង្វាន់ AFF U23 Championship 2023 នៅប្រទេសថៃ។

នេះជាការប្រកួតវគ្គសន្សំពិន្ទុក្នុងពូល A លើកទី២ សម្រាប់ក្រុមទាំងពីរ បន្ទាប់ពីបានឆ្លងកាត់ប្រកួតទី១ដូចគ្នា។ សម្រាប់ការប្រកួតទី១ ក្រុមកម្ពុជារកបាន៣ពិន្ទុពីជ័យជម្នះដោយលទ្ធផល ៥-០ លើក្រុមយុវជនព្រុយណេ ខណៈមីយ៉ាន់ម៉ាមិនទាន់មានពិន្ទុទេ ដោយសារបរាជ័យក្រោមថ្វីជើងម្ចាស់ផ្ទះថៃក្នុងលទ្ធផល ៣-០។

ការប្រកួតនេះពិតជាសំខាន់ណាស់សម្រាប់ក្រុមទាំងពីរដើម្បីរកកៅឡើងទៅកាន់វគ្គពាក់កណ្តាលផ្តាច់ព្រ័ត្រ។ បន្ទាប់ពីបរាជ័យក្រោមថ្វីជើងរបស់ម្ចាស់ផ្ទះថៃ ក្រុមយុវជនមីយ៉ាន់ម៉ាច្បាស់ជាខំប្រឹង១០០%ដើម្បីរកឲ្យបានពិន្ទុពេញពីក្រុមកម្ពុជាសម្រាប់ឱកាសចំណាត់ថ្នាក់លេខ២ល្អបំផុតក្នុងពូល។ ដូចគ្នានេះដែរ កម្ពុជាក៏ត្រូវការឈ្នះដាច់ខាតដើម្បីឱកាសចំណាត់ថ្នាក់លេខ២ល្អបំផុតក្នុងពូល ពីព្រោះប្រកួតបន្ទាប់កម្ពុជាត្រូវជួបក្រុមខ្លាំងថៃដែលជារឿងលំបាកខ្លាំងមែនទែន។

ប្រវត្តិជួបគ្នាក្នុងពានរង្វាន់ AFF U23 នេះ កម្ពុជាធ្លាប់ឈ្នះមីយ៉ាន់ម៉ាដោយលទ្ធផល ២-០ កាលពីឆ្នាំ២០១៩ដែល២គ្រាប់របស់កម្ពុជារកបានដោយកីឡា យ៉ើ សាហ្វវី និង ស៊ិន សុផាណាត។ ពេលនោះកម្ពុជាឈរលេខ១ក្នុងពូល និងបានឡើងទៅកាន់វគ្គ៤ក្រុមចុងក្រោយជាលើកដំបូង។

ដោយឡែកការជួបគ្នាក្នុងស៊ីហ្គេមនៅឆ្នាំ២០២៣នេះ កម្ពុជាបានចាញ់មីយ៉ាន់ម៉ាដោយលទ្ធផល ២-០។

តារាងពិន្ទុពូល A

កម្ពុជា មាន៣ពិន្ទុ
ថៃ មាន៣ពិន្ទុ
មីយ៉ាន់ម៉ា មានសូន្យពិន្ទុ
ព្រុយណេ មានសូន្យ

អត្ថបទ៖ វីរបុត្រ

The post ពានAFF U-23 កម្ពុជាធ្លាប់ឈ្នះមីយ៉ាន់ម៉ា ២-០ ចុះម៉ោង៤ថ្ងៃនេះ? appeared first on Kampuchea Thmey Daily.

U23 កម្ពុជា ឈ្នះ ព្រុយណេ ៥-០ ទទួលបាន៣ពិន្ទុ

chean virakbot — Thu, 17 Aug 2023 10:56:08 +0000

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) បានយកឈ្នះក្រុមយុវជនព្រុយណ ដោយលទ្ធផល ៥-០ សម្រាប់ការប្រកួតវគ្គសន្សំពិន្ទុក្នុងពូលទី១ ជើងឯកយុវជនអាស៊ានអាយុក្រោម២៣ឆ្នាំ AFF U23 Championship នៅប្រទេសថៃ។

ការប្រកួតគ្រាប់បាល់បានកើតឡើងយ៉ាងលឿនសម្រាប់ក្រុមយុវជនកម្ពុជា។ ការប្រកួតវគ្គទី១បានតែ៦នាទីប៉ុណ្ណោះ ស រតនា តែតបំប៉ោងសំណាញ់ទីរបស់ព្រុយណេដើម្បីនាំមុខ ១-០។ ៣នាទីបន្ទាប់ក្រុមកម្ពុជាស៊ុតពីមុខទីធ្វើឲ្យអ្នកចាំទីរបស់ព្រុយណេចាប់បាល់ទម្លាក់ និងក្រឡកចូលទីខ្លួនឯងនៅនាទីទី៩ ដើម្បីឲ្យកម្ពុជានាំមុខ ២-០។

នៅវគ្គទី៣ កម្ពុជារកបាន២គ្រាប់ទៀតដោយកីឡាករ ស រតនា តែតចូលគ្រាប់បាល់ទី៣ នៅនាទីទី៥០។ កីឡាករ មាន ចាន់រិទ្ធ ស៊ុតបានគ្រាប់ទី៤ នៅនាទីទី៧៣ និង អ៊ាន ពិសី ស៊ុតចូលគ្រាប់ទី៥។

អត្ថបទ៖ វីរបុត្រ

The post U23 កម្ពុជា ឈ្នះ ព្រុយណេ ៥-០ ទទួលបាន៣ពិន្ទុ appeared first on Kampuchea Thmey Daily.

U23 កម្ពុជា ប៉ះ ព្រុយណេ ម៉ោង៤រសៀលនេះជើងឯក AFF U-23

chean virakbot — Thu, 17 Aug 2023 00:24:38 +0000

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) នឹងប្រកួតជាមួយ ព្រុយណេ វគ្គសន្សំពិន្ទុ ក្នុងពូល ជើងឯកយុវជនអាស៊ានអាយុក្រោម២៣ឆ្នាំ AFF U-23 Championship វេលាម៉ោង៤រសៀល ថ្ងៃព្រហស្បតិ៍ ទី១៧ ខែសីហា ឆ្នាំ២០២៣ នៅប្រទេសថៃ ផ្សាយបន្តផ្ទាល់ដោយ BTV News។

ក្រុម U23 កម្ពុជា ស្ថិតនៅពូល A ជាមួយក្រុមខ្លាំង ថៃ មីយ៉ាន់ម៉ា និងព្រុយណេ។ នេះជាការប្រកួតវគ្គសន្សំពិន្ទុក្នុងពូលលើកទី១ ខណៈក្រុមម្ចាស់ផ្ទះថៃ ប្រកួតជាមួយ មីយ៉ាន់ម៉ា វេលាម៉ផង៨យប់ថ្ងៃដដែលនេះ។

ជុំការប្រកួតនេះ លោក Felix Dalmas គ្រូបង្វឹកក្រុមកម្ពុជាបាននិយាយថា ៖«យើងមានការលំបាកខ្លះៗ ក្នុងការប្រមូលផ្តុំកីឡាករ ពីព្រោះពានរង្វាន់នេះមិនស្ថិតក្នុងថ្ងៃ FIFA Day ដូច្នេះកីឡាករសំខាន់ៗមួយចំនួនមិនបានមកជាមួយពួកយើងទេ។ យើងមានកីឡាករថ្មីមួយចំនួនសម្រាប់ការប្រកួតថ្ងៃនេះ»។

ក្រុម U23 ព្រុយណេ មិនសូវបានចេញប្រកួតលក្ខណៈអន្តរជាតិរយៈពេលជិត២ឆ្នាំចុងក្រោយគិតចាប់តាំងពីខែកុម្ភៈ ឆ្នាំ២០២២ ក្នុងពានរង្វាន់ AFF U-23 Championship នៅប្រទេសកម្ពុជា។ ជាពិសេស បាល់ទាត់ព្រុយណេមិនបានចូលរួមប្រកួតក្នុងព្រឹត្តិការណ៍កីឡាស៊ីហ្គេម ពីរលើកចុងក្រោយ។ កាលពីថ្ងៃទី១២ ខែសីហានេះ ព្រុយណេ បានប្រកួតចាញ់ ឡាវ ២-០ ក្នុងជំនួបមិត្តភាពនៅទឹកដីឡាវ។

U23 កម្ពុជា និងព្រុយណេ ធ្លាប់មានប្រវត្តិជួបគ្នា៣ដងគឺ កម្ពុជាឈ្នះ២ដង និងស្មើគ្នា១ដង។ ក្នុងពានរង្វាន់ AFF U-23 កាលពីឆ្នាំ២០២២ កម្ពុជាបានឈ្នះព្រុយណេ ៦-០ ដែលគ្រាប់បាល់រកបានដោយ កីឡាករ សៀង ចន្ធា, ញាណ សុស៊ីដាន, សា ទី,តាំង ប៊ុនឆៃ, ស រតនា និង ណារ៉ុង កក្ដដា។

២លើកផ្សេងទៀតជួបគ្នាព្រឹត្តិការណ៍កីឡាស៊ីហ្គេម គឺនៅឆ្នាំ ១៩៩៧ កម្ពុជាបានឈ្នះព្រុយណេ ៤-០ និងឆ្នាំ១៩៩៩ជាពេលដែលព្រុយណេធ្វើម្ចាស់ផ្ទះស៊ីហ្គេមលើកដំបូងគឺស្មើគ្នា ៣-៣។

ដោយឡែក ពូល B មានឥណ្ឌូណេស៊ី ម៉ាឡេស៊ី និងទីម័រខាងកើត ខណៈពូល C មានវៀតណាម ហ្វីលីពីន និងឡាវ ដែលចាប់ប្រកួតនៅថ្ងៃទី១៨ ខែសីហា ឆ្នាំ២០២៣៕

កម្មវិធីប្រកួត

កម្ពុជា vs ព្រុយណេ វេលាម៉ោង៤រសៀល
ថៃ vs មីយ៉ាន់ម៉ា វេលាម៉ោង៨យប់

អត្ថបទ៖ វីរបុត្រ

The post U23 កម្ពុជា ប៉ះ ព្រុយណេ ម៉ោង៤រសៀលនេះជើងឯក AFF U-23 appeared first on Kampuchea Thmey Daily.

យុវជនពូកែបញ្ចប់ទី អ៊ន់ សីហា ទើបចូលរួមគិរីវង់សុខសែនជ័យជាប់U23កម្ពុជា

chean virakbot — Tue, 15 Aug 2023 05:05:52 +0000

កីឡាករវ័យក្មេង អ៊ន់ សីហា បានជាប់ក្នុងបញ្ជីឈ្មោះក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) ដើម្បីទៅចូលរួមប្រកួតជើងឯកយុវជនអាស៊ានអាយុក្រោម២៣ឆ្នាំនៅប្រទេសថៃ បន្ទាប់ពីរូបគេទើបបានចូលរួមជាមួយក្លិបអាជីពនៃលីគកំពូលកម្ពុជាប៉ុន្មានខែប៉ុណ្ណោះ។

កីឡាករ អ៊ន់ សីហា អាយុ២២ឆ្នាំ កម្ពស់១,៧៣ម៉ែត្រជាខ្សែប្រយុទ្ធវ័យក្មេងរបស់ក្លិបបាល់ទាត់គិរីវង់សុខសែនជ័យ។ រូបគេទើបតែបានចូលរួមជាក្លិបបាល់ទាត់ដែលមានមូលដ្ឋាននៅខេត្តតាកែវមួយនេះកាលពីខែមករា ឆ្នាំ២០២៣ និងជាក្លិបអាជីពដំបូងដែលរូបគេបានចូលរួម។

លោក សាប៊ូន វិនតា គ្រូបង្គោលរបស់គិរីវង់សុខសែនជ័យបានឲ្យដឹងថា នៅពេលលោកទទួលការងារជាគ្រូបង្វឹកនៅក្លិបគិរីវង់សុខសែនជ័យកាលពីដើមឆ្នាំ២០២៣ ក្លិបបានធ្វើតេស្តជ្រើសរើសកីឡាករត្រៀមប្រកួតខេមបូឌានលីគខាប់។ បន្ទាប់ពីធ្វើតេស្តរយៈពេល៣ថ្ងៃ ក៏ជ្រើសរើសបានកីឡាករមួយចំនួនក្នុងនោះមានកីឡាករ អ៊ន់ សីហា ម្នាក់ដែរ។

លោកបានលើកឡើងថា ៖«យើងបានមើលឃើញពីអនាគតយុវជនម្នាក់នេះ។ ដំបូងឡើយគាត់នៅមានកម្រិតទេ ប៉ុន្តែយើងឃើញទេពកោសល្យនៃការបញ្ចប់ទីរបស់គាត់ យើងក៏សម្រេចចិត្តផ្តល់ឱកាសឲ្យគាត់ដើម្បីទទួលបានការបណ្តុះបណ្តាលបន្ថែម»។

«នៅពេលប្រកួតលីគខាប់ ខ្ញុំបានផ្តល់ឱកាសឲ្យគាត់ ហើយពេលនោះគាត់បង្ហាញសមត្ថភាពបានល្អ អីចឹងខ្ញុំកាន់តែជួយពង្រឹងគាត់បន្ថែមទៀត ហើយគាត់ជួយក្រុមបានច្រើន»។ លោក សាប៊ូន វិនតា បានសង្កត់ធ្ងន់ពីយុវជន អ៊ន់ សីហា ក្នុងការបង្ហាញខ្លួនឲ្យគិរីវង់សុខសែនជ័យដែលបានឈានដល់វគ្គពាក់កណ្តាលផ្តាច់ព្រ័ត្រជាលើកដំបូងក្នុងប្រវត្តិសាស្ត្ររបស់ក្លិបសម្រាប់ខេមបូឌានលីគខាប់ ឆ្នាំ២០២៣។

លោក សាប៊ូន វិនតា បានលើកឡើងពីលក្ខណៈពិសេសរបស់យុវជនរូបនេះគឺជាខ្សែប្រយុទ្ធដែលមានជំនាញ និងទេពកោសល្យក្នុងការបញ្ចប់ទីដ៏មានប្រសិទ្ធភាព ហើយរូបគេរីកចម្រើនបានឆាប់រហ័ស។

បើនិយាយពីប្រភពដើមវិញ អ៊ន់ សីហា ជាអតីតយុវជនរបស់សាលាតម្រង់ទិសបាល់ទាត់ខេត្តកំពង់ចាមដែលស្ថិតក្រោមការអភិវឌ្ឍកីឡាបាល់ទាត់របស់សហព័ន្ធកីឡាបាល់ទាត់កម្ពុជា។ បន្ទាប់មក រូបគេមានឱកាសបានលេងឲ្យក្រុមខេត្តកំពង់ចាមនៅក្នុងពានរង្វាន់សម្តេច ហ៊ុន សែន រយៈពេល២ឆ្នាំ និងចុងក្រោយបានចូលរួមជាមួយក្លិបអាជីពគិរីវង់សុខសែនជ័យ នៅខែមករា ឆ្នាំ២០២៣។

ក្នុងរយៈពេលប៉ុន្មានខែជាមួយក្លិបដែលមានគ្រូបង្វឹកកាន់សញ្ញាប័ត្រ AFC “A” License អ៊ន់ សីហា ទទួលបានឱកាសឲ្យចូលរួមធ្វើតេស្តក្នុងក្រុមជម្រើសជាតិកម្ពុជា U23 ហើយទទួលបានជោគជ័យតាមបំណងប្រាថ្នារបស់ខ្លួន៕

អត្ថបទ៖ វីរបុត្រ

The post យុវជនពូកែបញ្ចប់ទី អ៊ន់ សីហា ទើបចូលរួមគិរីវង់សុខសែនជ័យជាប់U23កម្ពុជា appeared first on Kampuchea Thmey Daily.

មុនប៉ះគ្នាថ្ងៃព្រហស្បតិ៍នេះ U23 កម្ពុជាធ្លាប់ឈ្នះព្រុយណេ៦-០ពានAFF U-23

chean virakbot — Tue, 15 Aug 2023 03:42:30 +0000

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) បើកឆាកប៉ះជម្រើសជាតិព្រុយណេ ក្នុងពានរង្វាន់យុវជនអាស៊ានអាយុក្រោម២៣ឆ្នាំ AFF U-23 Championship នៅថ្ងៃព្រហស្បតិ៍ ទី១៧ ខែសីហា ឆ្នាំ២០២៣ នៅប្រទេសថៃ។

ក្រុម U23 កម្ពុជា ស្ថិតនៅពូល A ជាមួយក្រុមខ្លាំង ថៃ មីយ៉ាន់ម៉ា និងព្រុយណេ។ សម្រាប់ការប្រកួតបើកឆាក ក្រុមយុវជនកម្ពុជាប៉ះព្រុយណេដែលរំពឹងទទួលបានលទ្ធផលល្អសម្រាប់ជំនួបបើកឆាកដ៏សំខាន់នេះ។

និយាយត្រឹមក្នុងពានរង្វាន់ AFF U-23 Championship ដែលបានរៀបចំឡើងបាន៣លើកមកហើយគិតចាប់តាំងពីឆ្នាំ២០០៥មក កម្ពុជា និងព្រុយណេធ្លាប់ជួបគ្នាតែម្តងប៉ុណ្ណោះ។ ជួបគ្នាលើកដំបូងនោះគឺនៅថ្ងៃ១៤ ខែកុម្ភៈ ឆ្នាំ២០២២ នៅពហុកីឡដ្ឋានជាតិមរតកតេជោ ក្នុងប្រទេសកម្ពុជា ហើយក៏ជាលើកដំបូងដែលព្រុយណេចូលរួមប្រកួតពានរង្វាន់មួយនេះ។

កាលណោះ ក្រុមម្ចាស់ផ្ទះកម្ពុជាធ្វើបានល្អមែនទែនដោយបានយកឈ្នះលើព្រុយណេក្នុងលទ្ធផល ៦-០។ គ្រាប់បាល់របស់កម្ពុជារកបានដោយកីឡាករ៦រូបផ្សេងៗគ្នាកឺ សៀង ចន្ធា នៅ នាទី១៨, គ្រាប់ទី២ ស៊ុតបញ្ចូលទីពីចម្ងាយនៅនាទី ២០ ដោយខ្សែប្រយុទ្ធ ញាណ សុស៊ីដាន,គ្រាប់ទី៣ ស៊ុតដោយកីឡាករ សាទី នៅនាទី២៣, គ្រាប់ទី៤ ស៊ុតដោយខ្សែការពារ តាំង ប៊ុនឆៃ នៅនាទី៧២, គ្រាប់ទី៥ ស៊ុតដោយខ្សែការពារ ស រតនា នៅនាទី៨៦ និងគ្រាប់ទី៦ ស៊ុតដោយខ្សែប្រយុទ្ធ ណារ៉ុង កក្ដដា នៅនាទី៨៩។

ក្នុងចំណោម កីឡាករដែលរកបានគ្រាប់បាល់ទាំង៦រូបខាងលើនេះគឺ៣នាក់បានជាប់ក្នុងបញ្ជី២៣នាក់ចុងក្រោយដែលត្រូវទៅប្រកួតនៅប្រទេសថៃលើកនេះមានដូចជា សា ទី, តាំង ប៊ុនឆៃ និង ស រតនា។

ចាប់តាំងពីចូលរួមប្រកួតពានរង្វាន់ AFF U-23 នៅខែកុម្ភៈ ឆ្នាំ២០២២នោះមក ព្រុយណេមិនបានបញ្ជូនក្រុមរបស់ខ្លួនចូលរួមប្រកួតក្នុងព្រឹត្តិការណ៍កីឡាស៊ីហ្គេម ២លើកចុងក្រោយគឺស៊ីហ្គេម ឆ្នាំ២០២២ នៅប្រទេសវៀតណាម និងស៊ីហ្គេម ឆ្នាំ២០២៣ នៅប្រទេសកម្ពុជា។ ដូច្នេះពិបាកវាយតម្លៃលើសមត្ថភាព និងបច្ចេកទេសរបស់ក្រុម U23 ព្រុយណេ។

ក្រុមកម្ពុជាប្រកួតជាមួយព្រុយណេវេលាម៉ោង៤រសៀល ខណៈ ក្រុមម្ចាស់ផ្ទះថៃប្រកួតជាមួយមីយ៉ាន់ម៉ា វេលាម៉ោង៨យប់។

អត្ថបទ៖ ផា រតនា

The post មុនប៉ះគ្នាថ្ងៃព្រហស្បតិ៍នេះ U23 កម្ពុជាធ្លាប់ឈ្នះព្រុយណេ៦-០ពានAFF U-23 appeared first on Kampuchea Thmey Daily.

AFF U-23 Championship Archives - Kampuchea Thmey Daily

លទ្ធផល​ចាប់​ឆ្នោត ក្រុម U23 កម្ពុជា ប៉ះ វៀតណាម និង ឡាវ ពាន ASEAN U23 Championship

ក្រុមបាល់ទាត់កម្ពុជាខកចិត្តក្នុងព្រឹត្តិការណ៍អន្តរជាតិចំនួន៥ឆ្នាំ២០២៣

យប់​នេះ U23 កម្ពុជាដាច់ខាតត្រូវឈ្នះថៃទើបឡើងវគ្គបន្តជើងឯក AFF U23

ពានAFF U-23 កម្ពុជាធ្លាប់ឈ្នះមីយ៉ាន់ម៉ា ២-០ ចុះម៉ោង៤ថ្ងៃនេះ?

U23 កម្ពុជា ឈ្នះ ព្រុយណេ ៥-០ ទទួលបាន៣ពិន្ទុ

U23 កម្ពុជា ប៉ះ ព្រុយណេ ម៉ោង៤រសៀលនេះជើងឯក AFF U-23

យុវជនពូកែបញ្ចប់ទី អ៊ន់ សីហា ទើបចូលរួមគិរីវង់សុខសែនជ័យជាប់U23កម្ពុជា

មុនប៉ះគ្នាថ្ងៃព្រហស្បតិ៍នេះ U23 កម្ពុជាធ្លាប់ឈ្នះព្រុយណេ៦-០ពានAFF U-23

លទ្ធផលចាប់ឆ្នោត ក្រុម U23 កម្ពុជា ប៉ះ វៀតណាម និង ឡាវ ពាន ASEAN U23 Championship

យប់នេះ U23 កម្ពុជាដាច់ខាតត្រូវឈ្នះថៃទើបឡើងវគ្គបន្តជើងឯក AFF U23