Asian Games Archives - Kampuchea Thmey Daily

ក្រុម Esports កម្ពុជា សង្ឃឹមខ្ពស់ទទួលបានកៅអី ទៅកីឡា Asian Games នៅជប៉ុន

chean virakbot — Thu, 04 Jun 2026 05:20:00 +0000

ការប្រកួតជម្រុះកីឡាអេឡិចត្រូនិកលើវិញ្ញាសា Mobile Legends Bang Bang នឹងចាប់ផ្តើមពីថ្ងៃទី១៨ ដល់ទី២១ ខែមិថុនា ឆ្នាំ ២០២៦ នៅប្រទេសសិង្ហបុរី ដោយមានក្រុមជម្រើសជាតិចំនួន ២២ មកពីទូទាំងទ្វីបអាស៊ី។

ក្រុមជម្រើសជាតិចំនួន ២២ ត្រូវបានបែងចែកជា ៤ ពូល សម្រាប់ការប្រកួតជម្រុះ និងជ្រើសរើសយកតែ ១២ ក្រុមឡើងទៅជុំចុងក្រោយក្នុងព្រឹត្តិការណ៍កីឡាទ្វីបអាស៊ី លើកទី២០ នៅប្រទេសជប៉ុន ដើម្បីដណ្តើមមេដាយមាស ប្រាក់ និងសំរិទ្ធ។

ពូល A

ពូល A ប្រចាំតំបន់អាស៊ាន មានក្រុមច្រើនជាងគេគឺចំនួន ៨ ប្រទេស មានដូចជា កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី និង វៀតណាម។ ពូលនេះជ្រើសរើសយក ៥ ក្រុមឡើងទៅជុំចុងក្រោយ។

ផ្អែកតាមស្ថិតិ និងសមិទ្ធផលប្រកួតអន្តរជាតិកន្លងមក កម្ពុជា មានសង្ឃឹមខ្ពស់ក្នុងការឡើងទៅជុំចុងក្រោយ។ ក្រុមដែលមើលទៅមានកម្រិតទាបមិនលើសកម្ពុជា គឺ ឡាវ វៀតណាម និង សិង្ហបុរី ហើយក្រុមដែលមានគុណភាពខ្ពស់មានដូចជា ហ្វីលីពីន ឥណ្ឌូណេស៊ី ម៉ាឡេស៊ី និង មីយ៉ាន់ម៉ា។

កាលពីល្ងាចថ្ងៃទី៣ ខែមិថុនា ឆ្នាំ ២០២៦ សហព័ន្ធកីឡាអេឡិចត្រូនិកកម្ពុជា បានប្រកាសបញ្ជីឈ្មោះកីឡាករជម្រើសជាតិ និងគ្រូបង្វឹកជាផ្លូវការហើយដើម្បីទៅប្រកួតជម្រុះ។

នៅក្នុងប្រវត្តិសាស្ត្រកីឡាទ្វីបអាស៊ី កម្ពុជា បានឈ្នះមេដាយមាសចំនួន ៣ គ្រឿងគឺដោយកីឡាការិនី ស៊ន សៀវម៉ី លើប្រភេទកីឡាតេក្វាន់ដូ កាលពីឆ្នាំ ២០១៤ នៅកូរ៉េខាងត្បូង។ កីឡាការិនី ខាន់ ចេសា លើប្រភេទកីឡាជឺជីតស៊ូ និងកីឡាករ សាលី អ៊ូម៉ើត លើប្រភេទកីឡាម៉ូតូទឹក កាលពីឆ្នាំ ២០១៨ នៅឥណ្ឌូណេស៊ី។

ពូល B

ពូល B ប្រចាំតំបន់អាស៊ីខាងលិច មានប្រទេស ៥ ប្រទេសគឺ អ៉ីរ៉ង់ អារ៉ាប៊ីសាអ៊ូឌីត ហ្សក់ដានី អារ៉ាប់រួម និង អូម៉ង់។ ពូលនេះជ្រើសរើសយក ៣ ក្រុមឡើងទៅជុំចុងក្រោយ។

ពូល C

ពូល C តំណាងឲ្យ តំបន់អាស៊ីកណ្តាល មាន ៤ ប្រទេស គឺ កាហ្សាស្ថាន អ៊ូបេគីស្ថាន គៀរហ្ស៊ីស្ថាន និង តាហ្ស៊ីគីស្ថាន។ ពូលនេះជ្រើសរើសយក ២ ក្រុមឡើងទៅជុំចុងក្រោយ។

ពូល D

ពូល D ប្រចាំតំបន់អាស៊ីខាងកើត និងខាងត្បូង មាន ៥ ប្រទេស គឺ នេប៉ាល់ ស្រីលង្កា ហុងកុង ម៉ុងហ្គោលី និង ប៉ាគីស្ថាន។ ពូលនេះជ្រើសរើសយក ២ ក្រុមទៅជុំចុងក្រោយ។

សូមបញ្ជាក់ថា ការប្រកួតជម្រុះនឹងធ្វើនៅប្រទេស សិង្ហបុរី ចាប់ពីថ្ងៃទី១៨ ដល់ ថ្ងៃទី២១ ខែមិថុនា ឆ្នាំ ២០២៦។

យោងតាមកិច្ចប្រជុំ លើកទី ១០១ របស់ក្រុមប្រឹក្សាកីឡាអូឡាំពិកអាស៊ី បានបញ្ជាក់ថា ដំណើរការប្រកួតកីឡាអេឡិចត្រូនិកបគ្រប់គ្រងដោយ ក្រុមប្រឹក្សាកីឡាអូឡាំពិកអាស៊ី (OCA) ទាំងស្រុង សូម្បីតែ សហព័ន្ធកីឡាអេឡិចត្រូនិកអាស៊ី (AESF) ក៏មិនពាក់ព័ន្ធដែរ៕

អត្ថបទ៖ វិរបុត្រ

The post ក្រុម Esports កម្ពុជា សង្ឃឹមខ្ពស់ទទួលបានកៅអី ទៅកីឡា Asian Games នៅជប៉ុន appeared first on Kampuchea Thmey Daily.

ក្រុម MLBB កម្ពុជា សង្ឃឹមច្រើន ក្នុងការទទួលបានកៅអីទៅ កីឡា Asian Games នៅជប៉ុន

chean virakbot — Wed, 06 May 2026 05:36:00 +0000

ប្រទេសជប៉ុន ក្នុងនាមគណៈកម្មការរៀបចំការប្រកួតកីឡាទ្វីបអាស៊ី ឆ្នាំ ២០២៦ និងក្រុមប្រឹក្សាកីឡាអូឡាំពិកអាស៊ី (OCA) បានដាក់កីឡាអេឡិចត្រូនិក (Esports) ឲ្យប្រកួតប្រជែងដណ្តើមមេដាយជាផ្លូវការ ក្នុងព្រឹត្តិការណ៍កីឡាទ្វីបអាស៊ី (Asian Games) លើកទី២០ ចាប់ពីថ្ងៃទី ១៩ ខែកញ្ញា ដល់ថ្ងៃទី៤ ខែតុលា ឆ្នាំ ២០២៦។

កីឡាទ្វីបអាស៊ី ឆ្នាំ ២០២៦ មានចំនួន ៤៣ ប្រភេទកីឡាស្មើនឹង ៤៦១ វិញ្ញាសា។ ក្នុងនោះកីឡាអេឡិចត្រូនិកមាន ១១ វិញ្ញាសា ស្មើនឹង ១១ មេដាយមាស។ វិញ្ញាសាទាំង ១១ គឺ eFootball, Gran Turismo 7, Honor of Kings, Naraka: Bladepoint, Puyo Puyo Champions, Identity V, League of Legends, Mobile Legends: Bang Bang, Pokemon Unite, PUBG Mobile និង Competitive Martial Arts។

ប្រទេសអាស៊ីនីមួយៗត្រូវប្រកួតជម្រុះជាមុនសិនទើបទទួលបានសិទ្ធិពេញលេញទៅចូលរួមប្រកួតនៅប្រទេសជប៉ុន។

សម្រាប់កម្ពុជា នៅមិនទាន់ដឹងច្បាស់ថាតើត្រូវចូលរួមប្រកួតជម្រុះកីឡាអេឡិចត្រូនិកលើប្រភេទកីឡាអ្វីខ្លះទេ ប៉ុន្តែវិញ្ញាសាដែលច្បាស់គឺ Mobile Legends: Bang Bang ដែលមានឈ្មោះប្រកួតជម្រុះនៅតំបន់អាស៊ាន។

វិញ្ញាសា Mobile Legends: Bang Bang ត្រូវជ្រើសរើសយកចំនួន ១២ ប្រទេសឡើងទៅជុំចុងក្រោយនៅប្រទេសជប៉ុន។ កម្ពុជា ស្ថិតនៅពូល A ដែលមាន ៨ ប្រទេសគឺ ឥណ្ឌូណេស៊ី ឡាវ ម៉ាឡេស៊ី សិង្ហបុរី មីយ៉ាន់ម៉ា ហ្វីលីពីន និង វៀតណាម។ ពូល A នេះត្រូវជ្រើសរើស ៥ ក្រុម ឡើងទៅជុំចុងក្រោយ។

ចំណែកពូល B មាន ៦ ប្រទេសគឺ អ៉ីរ៉ង់ អារ៉ាប៊ីសាអ៊ូឌីត ហ្ស៊កដានី ប៉ាឡេស្ទីន អារ៉ាប់រួម និង អូម៉ង់ ដែលជ្រើសរើសយកចំនួន ៣ ក្រុម។ ពូល C មាន ៤ ប្រទេសគឺ កាហ្សាស្ថាន អ៊ូបេគីស្ថាន គៀរហ្ស៊ីស្ថាន និងតាជីហ្ស៊ីស្ថាន ដែលត្រូវជ្រើសរើស ២ ក្រុមឡើងទៅជុំចុងក្រោយ និងពូល D មាន ៤ ប្រទេសគឺ នេប៉ាល់ ស្រីលង្កា ហុងកុង និង ម៉ុងហ្គោលី ដែលត្រូវជ្រើសរើស ២ ក្រុមឡើងទៅជុំចុងក្រោយ។

សម្រាប់ កម្ពុជា ហាក់មានសង្ឃឹមច្រើនក្នុងការជាប់វគ្គជម្រុះដើម្បីទទួលបានកៅអីឡើងទៅជុំចុងក្រោយ ដោយសារ ឡាវ សិង្ហបុរី និង វៀតណាម មិនសូវជាខ្លាំងប៉ុន្មានទេ មានតែ ឥណ្ឌូណេស៊ី ហ្វីលីពីន ម៉ាឡេស៊ី និង មីយ៉ាន់ម៉ា ទើបជាក្រុមខ្លាំងៗ ប៉ុន្តែការជ្រើសរើសមាន ៥ ក្រុម ហើយមានតែ ៣ ក្រុមប៉ុណ្ណោះធ្លាក់នៅក្នុងពូល A៕

អត្ថបទ៖ វិរបុត្រ

The post ក្រុម MLBB កម្ពុជា សង្ឃឹមច្រើន ក្នុងការទទួលបានកៅអីទៅ កីឡា Asian Games នៅជប៉ុន appeared first on Kampuchea Thmey Daily.

នាយបេសកកម្ម NOCC ចូលរួមកិច្ចប្រជុំ Asian Games Aichi-Nagoya 2026 នៅជប៉ុនជាមួយបណ្ដាប្រទេសសរុប ៤៥

Sina Noun — Wed, 24 Sep 2025 08:38:10 +0000

លោក ញ៉ាន សុខវិសាល នាយបេសកកម្មនៃគណៈកម្មាធិការជាតិអូឡាំពិកកម្ពុជា (NOCC) បានចូលរួមកិច្ចប្រជុំជាមួយបណ្ដាប្រទេសសរុប ៤៥ នៅឯប្រទេសជប៉ុន ដើម្បីត្រៀមខ្លួនឆ្ពោះទៅការប្រកួត Asian Games Aichi-Nagoya 2026។

ទិដ្ឋភាពនៅជប៉ុន

លោក បានឲ្យដឹងថា កិច្ចប្រជុំនៅ Aichi-Nagoya ប្រទេសជប៉ុននេះគឺដូចតែការប្រជុំនាយបេសកកម្មរាល់ដងដែរស្ដាប់ពីវឌ្ឍនៈភាពការងាររបស់ម្ចាស់ផ្ទះពាក់ព័ន្ធ និងការស្នាក់នៅហូបចុក ទីលានប្រកួត ច្បាប់ទម្លាប់ នៃការចូលរួមប្រកួត សារធាតុមហាឃាត់ និងសន្តិសុខអំឡុងពេលព្រឹត្តិការណ៍នេះមកដល់ជាដើម។

លោក ញ៉ាន សុខវិសាល (ខាងឆ្វេង)

នាយបេសកកម្មខាងលើបន្តទៀតថា កម្ពុជា និងបណ្ដាប្រទេសទាំង៤៥ បានទៅពិនិត្យនៅទីលានប្រកួតផ្សេងៗ និងទីតាំងប្រារព្ធពិធីបើក-បិទ កីឡាអាស៊ានហ្គេម លើកទី២០ ដែលម្ចាស់ផ្ទះជប៉ុននឹងធ្វើផងដែរ។ ជាមួយគ្នានេះកម្ពុជា រួមទាំងប្រទេសផ្សេងៗសរុប ៦ប្រទេសបានអញ្ជើញឲ្យឡើងលើឆាកទទួលលិខិតអញ្ជើញជាផ្លូវការផងដែរ ខណៈមួយទៀតនោះដោយសារកម្ពុជាជាម្ចាស់ផ្ទះព្រឹត្តិការណ៍កីឡាយុវជនអាស៊ី (Asian Youth Games 2029) ផងទើបត្រូវបានផ្ដល់កិត្តិយសជាខ្លាំង។

លោក ញ៉ាន សុខវិសាល ទទួលលិខិតអញ្ជើញជាផ្លូវការ

បញ្ជាក់ដែរថា កិច្ចប្រជុំ Asian Games Aichi-Nagoya 2026 នៅប្រទេសជប៉ុន នេះធ្វើឡើងចាប់ពីថ្ងៃទី២២ ដល់ ២៦ ខែកញ្ញា ឆ្នាំ២០២៥។ តំណាងឲ្យកម្ពុជាចូលរួមក្នុងកិច្ចប្រជុំនេះមានលោក ញ៉ាន សុខវិសាល និងលោក អន ចិន្ត្រាសំរិត។ ព្រឹត្តិការណ៍កីឡាអាស៊ី (Asian Games) លើកទី២០ នឹងធ្វើឡើងនៅឯប្រទេសជប៉ុន ចាប់ពីថ្ងៃទី១៩ កញ្ញា ដល់ ៤ តុលា ឆ្នាំ២០២៦ ដែលនឹងមាន ៤១ប្រភេទកីឡាប្រកួតប្រជែង៕

អត្ថបទដោយ៖ នួន ស៊ីណា

The post នាយបេសកកម្ម NOCC ចូលរួមកិច្ចប្រជុំ Asian Games Aichi-Nagoya 2026 នៅជប៉ុនជាមួយបណ្ដាប្រទេសសរុប ៤៥ appeared first on Kampuchea Thmey Daily.

ម្ចាស់មេដាយមាសកីឡាអាស៊ីនៅចិន២រូបត្រូវបានរកឃើញសារធាតុហាមឃាត់

chean virakbot — Fri, 27 Oct 2023 06:14:00 +0000

ទីភ្នាក់ងារធ្វើតេស្តអន្តរជាតិបានប្រកាសថា ម្ចាស់មេដាយមាស ២រូបពីព្រឹត្តិការណ៍កីឡាអាស៊ី (Asian Games) នៅទីក្រុង Hangzhou ប្រទេសចិន បានរកឃើញភាពវិជ្ជមានក្នុងការធ្វើតេស្តរកសារធាតុហាមឃាត់។

អត្តទាំងពីរនោះគឺរួមមាន អ្នកប្រដាល់ជនជាតិម៉ុងហ្គោលី Chinzorig Baatarsukh និងកីឡាករបាល់បោះហ្វីលីពីន Justin Brownlee។

កីឡាករ Baatarsukh ទទួលបានមេដាយមាស លើវិញ្ញាសាទម្ងន់ស្រាលបុរស បន្ទាប់ពីយកឈ្នះកីឡាករ Lai Chu-en របស់ឆាយនីសតៃប៉ិ ក្នុងវគ្គផ្តាច់ព្រ័ត្រដោយពិន្ទុជាឯកច្ឆន្ទ។ កីឡាករវ័យ ៣២ឆ្នាំរូបនេះបានរកឃើញថា ប្រើថ្នាំ anabolic steroid metandienone។

ដោយឡែកកីឡាករ Brownlee ដើមកំណើតអាមេរិក ដែលបានចូលសញ្ជាតិហ្វីលីពីន កាលពីខែមករា ឆ្នាំ២០២៣ បានជួយក្រុមបាល់បោះជម្រើសជាតិហ្វីលីពីន ឈ្នះហ្ស៊កដានីដោយលទ្ធផល ៧០-៦០ ដើម្បីឈ្នះមេដាយមាសនៅក្នុងព្រឹត្តិការណ៍ដែលបានពន្យារពេលមួយឆ្នាំដោយសារជំងឺរាតត្បាតកូវីដ-១៩។

Brownlee រកបាន ២០ពិន្ទុ និងរកបានពីបាល់ rebounds ១០ដងក្នុងការប្រកួត ប៉ុន្តែកីឡាករដើមកំណើតអាមេរិករូបនេះបានរកឃើញពាក់ព័ន្ធ ដោយរបាយការណ៍នៅក្នុងប្រទេសហ្វីលីពីនបានបង្ហាញថា Brownlee ប្រហែលជាបានលេបថ្នាំដែលមានសារធាតុកញ្ឆា។

ជាមួយគ្នា កីឡាករ Sami Bzai របស់ហ៊្សកដានី ដែលបានលេងក្នុងវគ្គផ្តាច់ព្រ័ត្រក៏បានធ្វើតេស្តរកឃើញតេស្តូស្តេរ៉ូនវិជ្ជមានផងដែរ។ កីឡាករខាងភាគីនីមួយៗសុទ្ធតែបានរកឃើញក្នុងការសាកល្បងនោះ ក្រុមប្រឹក្សាអូឡាំពិកអាស៊ីបានបញ្ជាក់ថា លទ្ធផលពីការប្រកួតនឹងរក្សានៅដូចបច្ចុប្បន្នសិន។

អត្តពលិកទាំងអស់មានសិទ្ធិស្នើសុំការបើកគំរូ B របស់ពួកគេ មុនពេលករណីនេះត្រូវបានបញ្ជូនទៅផ្នែកប្រឆាំងសារធាតុហាមឃាត់នៃតុលាការអាជ្ញាកណ្តាលសម្រាប់កីឡាដើម្បីធ្វើការវិនិច្ឆ័យ៕

ប្រែសម្រួល៖ មន្នីរ័ត្ន

The post ម្ចាស់មេដាយមាសកីឡាអាស៊ីនៅចិន២រូបត្រូវបានរកឃើញសារធាតុហាមឃាត់ appeared first on Kampuchea Thmey Daily.

កីឡាអាស៊ីបិទបញ្ចប់មិញ កម្ពុជាបានឈ្នះមេដាយសំរិទ្ធ១គ្រឿង

chean virakbot — Mon, 09 Oct 2023 01:42:59 +0000

ព្រឹត្តិការណ៍កីឡាទ្វីបអាស៊ី លើកទី១៩ ឆ្នាំ២០២២ (លើកមកឆ្នាំ២០២៣) ត្រូវបានបិទបញ្ចប់កាលពីយប់មិញ បន្ទាប់ពីដំណើរការប្រកួតតាំងពីថ្ងៃទី១៩ ខែតុលា ឆ្នាំ២០២៣ នៅប្រទេសចិន។

កម្ពុជាបានបញ្ជូនអត្តពលិកចំនួន១០៩នាក់ លើកីឡាចំនួន១៧ប្រភេទ ប៉ុន្តែទទួលបានមេដាយសំរិទ្ធតែ១គ្រឿងប៉ុណ្ណោះ។ កីឡាករទាំង១៧ប្រភេទគឺ បាល់ទះ បាល់បោះ អត្តពលកម្ម ហែលទឹក គ្រីឃីត យូដូ ចំបាប់ វាយសី ជឺជីតស៊ូ ការ៉ាតេ ទូកក្ដោង តេក្វាន់ដូ WT ទ្រីយ៉ាត្លុង ទូកប្រពៃណី សូហ្វតិន្នីស អុកចិន និង គុនដាវ។

ភាគច្រើនបំផុត អត្តពលិកកម្ពុជាធ្លាក់នៅវគ្គជម្រុះដំបូង ខណៈអត្តពលិកខ្លះបានឡើងដល់វគ្គ១៦រូបចុងក្រោយ ដោយសារគ្មានដៃគូប្រកួតនៅវគ្គ៣២រូប ប៉ុន្តែកីឡាករខ្លះក៏បានឈ្នះនៅជុំដំបូងដែរដូចជាកីឡាករចំបាប់ ស៊ូ បាលី បានឡើងដល់វគ្គ៨រូបចុងក្រោយ។

កីឡាដែលទទួលបានមេដាយសំរិទ្ធ១គ្រឿងគឺក្រុមកីឡាការិនីការ៉ាតេកម្ពុជាមានកីឡាការិនី ថាត់ ឆេងហ័ង, អូន ស្រីដា និង ពុទ្ធា ស្រីណុច។

នេះជាការធ្លាក់ចុះមេដាយដ៏អាក្រក់បំផុត បើប្រៀបធៀបនឹងឆ្នាំ២០១៨ នៅឥណ្ឌូណេស៊ី កម្ពុជាបានបញ្ជូនអត្តពលិកចំនួន៤៣នាក់លើ១៣ប្រភេទគឺ អត្តពលកម្ម ហែលទឹក ទូកកានូអ៉ីង គុនដាវ កាយសម្ព័ន្ធ ម៉ូតូទឹក ជឺជីតស៊ូ យូដូ ការ៉ាតេ ទូកក្តោង សូហ្វតិន្នីស តេក្វាន់ដូ និង ចំបាប់។ ជាលទ្ធផល កម្ពុជាឈ្នះមេដាយមេដាយ៣គ្រឿងគឺ ខាន់ ចេសា ឈ្នះមេដាយមាស១ និងសាលី អ៊ូម៉ើត ឈ្នះមេដាយមាស១ និងសំរិទ្ធ១។

ប្រទេសអាស៊ានដែលឈ្នះមេដាយកីឡាអាស៊ី លើកទី១៩

ថៃ រកបានមេដាយមាស១២ ប្រាក់១៤ និងសំរិទ្ធ៣២
ឥណ្ឌូណេស៊ី រកបានមេដាយមាស៧ ប្រាក់១១ និងសំរិទ្ធ១៨
ម៉ាឡេស៊ី រកបានមេដាយមាស៦ ប្រាក់៨ និងសំរិទ្ធ១៨
ហ្វីលីពីន រកបានមេដាយមាស៤ ប្រាក់២ និងសំរិទ្ធ១២
សិង្ហបុរី រកបានមេដាយមាស៣ ប្រាក់៣ និងសំរិទ្ធ៧
វៀតណាម រកបានមេដាយមាស៣ ប្រាក់៥ និងសំរិទ្ធ១៩
មីយ៉ាន់ម៉ា រកបានមាស១ និងសំរិទ្ធ២
ព្រុយណេ រកបានមេដាយប្រាក់១ និងសំរិទ្ធ១
ឡាវ រកបានមេដាយសំរិទ្ធ៣
កម្ពុជា រកបានមេដាយសំរិទ្ធ១
ទីម័រខាងកើត មិនទទួលបាន

អត្ថបទ៖ វីរបុត្រ

The post កីឡាអាស៊ីបិទបញ្ចប់មិញ កម្ពុជាបានឈ្នះមេដាយសំរិទ្ធ១គ្រឿង appeared first on Kampuchea Thmey Daily.

លទ្ធផលការប្រកួតចំបាប់របស់កម្ពុជានៅកីឡាអាស៊ី ខណៈ៨រូបទៀតជាក្តីសង្ឃឹម

chean virakbot — Thu, 05 Oct 2023 08:31:10 +0000

កីឡារបស់កម្ពុជាមួយចំនួនបានបញ្ចប់ហើយក្នុងព្រឹត្តិការណ៍កីឡាអាស៊ី លើកទី១៩ នៅប្រទេសចិនដែលបានចាប់ប្រកួតតាំងពីថ្ងៃទី១៩ ខែតុលា និងគ្រោងបញ្ចប់នៅថ្ងៃទីអាទិត្យ ទី៨ ខែតុលា ចុងសប្តាហ៍នេះ។

កីឡាមួយចំនួនដែលបញ្ចប់ក្នុងចំណោម១៧ប្រភេទកីឡា ប៉ុន្តែកម្ពុជាមិនទាន់ឈ្នះមេដាយណាមួយឡើយ។ បើនិយាយពីកីឡាចំបាប់វិញ កម្ពុជាបានបញ្ជូនចូលរួមប្រកួតអត្តពលិក១៤រូបចូលរួមប្រកួតដែលបានចាប់ផ្តើមពីថ្ងៃទី៤ ខែតុលា ហើយកីឡាករ កីឡាការិនីចំបាប់កម្ពុជាបានបញ្ចប់ការប្រកួតចំនួនដែរ។

ខាងក្រោមជាលទ្ធផលនៃការប្រកួតរបស់កីឡាករ កីឡាការិនីចំបាប់កម្ពុជានៅថ្ងៃទី៤ និងទី៥ ខែតុលា ហើយនៅសល់កីឡាករ កីឡាការិនី៨រូបទៀតដែលជាក្តីសង្ឃឹមស្វែងរកមេដាយដើម្បីបំបែកកំណត់ត្រាដែលកម្ពុជាមិនទាន់ឈ្នះណាមួយសោះទាំងមាស ប្រាក់ និងសំរិទ្ធ។

ជាពិសេសកីឡាករ ស៊ូ បាលី ដែលជាម្ចាស់មេដាយមាសស៊ីហ្គេម និងជាម្ចាស់មេដាយសំរិទ្ធកីឡាចំបាប់អាស៊ីអាយុក្រោម២៣ឆ្នាំជាក្តីសង្ឃឹមរបស់កម្ពុជា នៅពេលរូបគេត្រូវប្រកួតទម្ងន់១២៥គីឡូក្រាមជាមួយកីឡាករនេប៉ាល់ Yadav Raj នៅវគ្គ៨រូបចុងក្រោយ។

លទ្ធផល ថ្ងៃទី៤ ខែតុលា

កីឡាករ ឈឿង វាសនា ចាញ់ជប៉ុន Sumi Masato ដោយពិន្ទុ ០-៨ ទម្ងន់៨៧គីឡូក្រាម វគ្គ៨រូបចុងក្រោយ
កីឡាករ កែវ សុភ័ក្តិ ចាញ់ម៉ុងហ្គោលី Makhudov Akzhol ដោយពិន្ទុ ០-៤ ទម្ងន់៧៧គីឡូក្រាម វគ្គ៨រូបចុងក្រោយ
កីឡាករ កែវ សុភ័ក្តិ បន្តឡើងវគ្គដណ្តើមមេដាយសំរិទ្ធ បន្ទាប់ពីគ្មានដៃគូ វគ្គជម្រុះ ទម្ងន់៧៧គីឡូគ្រាម (វិញ្ញាសាទី២)
កីឡាករ កែវ សុភ័ក្តិ ចាញ់កាហ្សាក់ស្ថាន Sadykov Azat វគ្គដណ្តើមមេដាយសំរិទ្ធ ទម្ងន់៧៧គីឡូក្រាម
កីឡាករ ច្រាយ ប្រុស ចាញ់ចិន Cao Liguo ទម្ងន់៦០គីឡូក្រាម វគ្គ១៦រូបចុងក្រោយ

លទ្ធផល ថ្ងៃទី៥ ខែតុលា

កីឡាការិនី ឌិត សំណាង ចាញ់ជប៉ុន Yoshimoto Remina ដោយពិន្ទុ ០-១០ វគ្គ១៦រូបចុងក្រោយ
កីឡាការិនី ឈឿន ស្រីឡែន ចាញ់ចិន Hong Kexin ដោយពិន្ទុ ០-៤ ទម្ងន់៥០គីឡូក្រាម វគ្គ១៦រូបចុងក្រោយ
កីឡាការិនី សម្បត្តិ វណ្ណៈ ចាញ់កូរ៉េខាងជើង Choe Hyogyong ដោយពិន្ទុ ០-១០ ទម្ងន់៥៣គីឡូក្រាម វគ្គ៨រូបចុងក្រោយ
កីឡាការិនី ឌិត សំណាង ចាញ់អ៊ូបេគីស្ថាន Keunimjaeva Aktenge ទម្ងន់៥០គីឡូក្រាម វគ្គជម្រុះដំបូង (វិញ្ញាសាទី២)

កម្មវិធីប្រកួត ថ្ងៃទី៦ ខែតុលា

កីឡាការិនី សឿន សម្ភស្ស ប្រកួតជាមួយកីឡាការិនីម៉ុងហ្គោលី Narmandakh Nasanb ទម្ងន់៥៧គីឡូក្រាម វគ្គ១៦រូប
កីឡាការិនី ជា កញ្ញា ប្រកួតជាមួយកីឡាការិនីចិន Zhou Feng ទម្ងន់៦៨គីឡក្រាម វគ្គ៨រូបចុងក្រោយ
កីឡាករ យុន ប៊ុណ្ណា រងចាំដៃគូទម្ងន់៦៥គីឡូក្រាម នៅវគ្គ១៦រូបចុងក្រោយ
កីឡាការិនី សឿន នឿន រង់ចាំដៃគូទម្ងន់៦២គីឡូក្រាម វគ្គ៨រូបចុងក្រោយ

កម្មវិធីប្រកួត ថ្ងៃទី៧ ខែតុលា

កីឡាករ ម៉ូ សារី ប្រកួតចាមួយកីឡាករតូកមេនីស្ថាន Hemelyayev Shatlyk ទម្ងន់៩៧គីឡូក្រាម វគ្គ១៦រូបចុងក្រោយ
កីឡាករ ឈឿន ឆេង ប្រកួតជាមួយកីឡាករឥណ្ឌា Yasg ទម្ងន់៧៤គីឡូក្រាម វគ្គ១៦រូបចុងក្រោយ
កីឡាករ ហេង វុទ្ធី ប្រកួតជាមួយកីឡាករម៉ុងហ្គោលី Byambasurenw Bat ទម្ងន់៨៦គីឡូក្រាម វគ្គ១៦រូបចុងក្រោយ
កីឡាករ ស៊ូ បាលី ប្រកួតជាមួយកីឡាករនេប៉ាល់ Yadav Raj ទម្ងន់១២៥គីឡូក្រាម វគ្គ១៨រូបចុងក្រោយ

អត្ថបទ៖ វីរបុត្រ

The post លទ្ធផលការប្រកួតចំបាប់របស់កម្ពុជានៅកីឡាអាស៊ី ខណៈ៨រូបទៀតជាក្តីសង្ឃឹម appeared first on Kampuchea Thmey Daily.

កុមារីវ័យ ១១ឆ្នាំ បង្កការភ្ញាក់ផ្អើលដល់ពិភពលោក ក្រោយបង្កើតប្រវត្តិសាស្ត្រនៅ Asian Games

Sonya — Thu, 28 Sep 2023 13:55:09 +0000

អត្តពលិកជនជាតិកូរ៉េខាងត្បូងម្នាក់ បានបង្កើតប្រវត្តិសាស្ត្រក្នុងព្រឹត្តិការណ៍ Asian Games ដំបូងគេ ក្លាយជាអ្នកលេងអុកវ័យក្មេងបំផុត ត្រឹមអាយុ ១១ឆ្នាំ។

កុមារី Kim Sarang វ័យ ១១ឆ្នាំ ជាអត្តពលិកម្នាក់កំពុងទទួលបានការចាប់អារម្មណ៍យ៉ាងខ្លាំងទូទាំងសកលលោក ក្រោមពេលនាងបង្ហាញខ្លួនចូលរួមប្រកួតលេងអុកក្នុងព្រឹត្តិការណ៍ Asian Games លើកទី១៩ នៅឯប្រទេសចិន។ ត្បិតថាជ័យជម្នះមិនទាន់រកឃើញពិតមែន ប៉ុន្តែអត្តពលិកវ័យក្មេងរូបនេះ ពិតជាបង្កការភ្ញាក់ផ្អើលដល់សាធារណជនជុំវិញពិភពលោក ដោយសារសមត្ថភាពលេងអុករបស់នាង។

ចំពោះប្រវត្តិខ្លះៗរបស់ Kim Sarang ប្រភពពី Koreaboo បានឱ្យដឹងថា នាងធំធាត់នៅខេត្ត Gyeonggi ប្រទេសកូរ៉េខាងត្បូង។ នាងចាប់ផ្តើមលេងអុកតាំងពីអាយុ ៧ឆ្នាំមកម្ល៉េះ ព្រោះនាងស្រឡាញ់ល្បែងល្បងបញ្ញា។

Kim Sarang មានសមត្ថភាពចងចាំពិសេសតាំងពីថ្នាក់ទី ២ ហើយនៅក្នុងថ្នាក់បឋមសិក្សាដំបូង នាងបានអាចទន្ទេញចាំតួអក្សរចំនួន ៧០០តួនៃអត្ថបទចម្រៀង ក្នុងប្រវត្តិសាស្ត្រកូរ៉េ។

ដើម្បីគាំទ្រកូនឱ្យមានឱកាសលេងអុកបានច្រើន ឪពុកម្តាយរបស់ Kim Sarang បានផ្លាស់ទៅទីក្រុង Seoul ក្នុងឆ្នាំ២០២០។ នៅអាយុត្រឹមតែ ១០ឆ្នាំ នាងទទួលបានងារជាផ្លូវការថា “គ្រូអុកស្រ្តីវ័យក្មេង” ។ នៅឆ្នាំ២០២១ នាងឈ្នះមេដាយមាសក្នុងការប្រកួតថ្នាក់ជាតិ។ នៅឆ្នាំ ២០២២ នាងបានចូលរួមនៅក្នុងការប្រកួតកីឡាអុកយុវជនអាស៊ីបូព៌ាដែលធ្វើឡើងនៅប្រទេសថៃ។ Kim Sarang ឈ្នះមេដាយប្រាក់លើវិញ្ញាសាឯកត្តជន។

ទោះយ៉ាងណា នៅថ្ងៃងនាគត Kim Sarang ពុំមានមានបំណងចង់ក្លាយជាអត្តពលិកឆ្នើមអ្វីនោះទេ នាងមានក្ដីស្រមៃធ្វើជារដ្ឋមន្ត្រីក្រសួងការពារជាតិ។

សូមបញ្ជាក់ថា ព្រឹត្តិការណ៍ Asian Games លើកទី១៩ ប្រាររព្ធឡើងពីថ្ងៃទី២៣ ខែកញ្ញា ដល់ថ្ងៃទី៨ ខែតុលា ឆ្នាំ២០២៣ ៕

ប្រែសម្រួល៖ សន្យា

ចុចអាន៖ មុនប៉ះគ្នាថ្ងៃសៅរ៍នេះ ខាន់ ចេសា រម្លឹកពី Danielle ពូកែខាងការពារ

The post កុមារីវ័យ ១១ឆ្នាំ បង្កការភ្ញាក់ផ្អើលដល់ពិភពលោក ក្រោយបង្កើតប្រវត្តិសាស្ត្រនៅ Asian Games appeared first on Kampuchea Thmey Daily.

ក្រុមអាស៊ាន៣ឡើងដល់វគ្គ១៦ក្រុមក្នុងកីឡាអាស៊ីនៅចិន

Pha Rothana — Wed, 27 Sep 2023 09:20:43 +0000

នៅក្នុងព្រឹត្តិការណ៍កីឡាអាស៊ី លើកទី១៩ នៅប្រទេសចិន វិញ្ញាសាបាល់ទាត់ផ្នែកបុរសរកឃើញក្រុមឡើងវគ្គ១៦ក្រុមចុងក្រោយហើយដោយក្នុងនោះ៣ក្រុមពីតំបន់អាស៊ាន។

ក្រុមក្នុងតំបន់អាស៊ានទាំង៣ រួមមានក្រុមជម្រើសជាតិថៃ ក្រុមជម្រើសឥណ្ឌូណេស៊ី និងក្រុមជម្រើសជាតិមីយ៉ាន់ម៉ា ដែលជាឆ្លងផុតវគ្គជ្រមុះក្នុងពូល។ វិញ្ញាសាបាល់ទាត់បុរសត្រូវបានបែងចែកជា៦ពូល និងមាន១៩ប្រទេសចូលរួមប្រកួត។

ក្រុមលេខ១និងលេខ២ ក្នុងពូលនីមួយៗនឹងត្រូវបានឡើងទៅវគ្គ១៦ក្រុម ដោយស្វ័យប្រវត្តិ ខណៈក្រុមលេខ៣ល្អបំផុតចំនួន៤ឡើងទៅវគ្គបន្ត។ ក្រុមអាស៊ានទាំង៣គឺបានឡើងទៅវគ្គ១៦ក្រុមចុងក្រោយក្នុងនាមជាក្រុមលេខ៣ល្អបំផុត។

សម្រាប់កាលវិភាគក្នុងការវគ្គ ១៦ក្រុមចុងក្រោយ៖

ថ្ងៃទី ២៧ខែកញ្ញា ឆ្នាំ ២០២៣

ចិន vs កាតារ
កូរ៉េខាងត្បូង vs កៀហ្ស៊ីស្ថាន
ថៃ vs អ៉ីរ៉ង់
ហុងកុង vs ប៉ាឡេស្ទីន
កូរ៉េខាងជើង vs បារ៉ែន

ថ្ងៃទី ២៨ខែកញ្ញា ឆ្នាំ ២០២៣

ឥណ្ឌូណេស៊ី vs អ៊ូបេគីស្ថាន
ជប៉ុន vs មីយ៉ាន់ម៉ា
ឥណ្ឌា vs អារ៉ាប៊ីសាអូឌីត

អត្ថបទ៖ រតនា

The post ក្រុមអាស៊ាន៣ឡើងដល់វគ្គ១៦ក្រុមក្នុងកីឡាអាស៊ីនៅចិន appeared first on Kampuchea Thmey Daily.

Asian Games Archives - Kampuchea Thmey Daily

ក្រុម Esports កម្ពុជា សង្ឃឹម​​ខ្ពស់​​​ទទួល​បាន​កៅអី ទៅ​កីឡា​ Asian Games នៅ​ជប៉ុន

ក្រុម MLBB កម្ពុជា​ សង្ឃឹម​ច្រើន ក្នុង​ការ​​ទទួល​បានកៅអី​ទៅ ​កីឡា​ Asian Games នៅ​ជប៉ុន

នាយបេសកកម្ម NOCC ចូលរួម​កិច្ច​ប្រជុំ​ Asian Games Aichi-Nagoya 2026 នៅ​ជប៉ុន​ជា​មួយ​បណ្ដា​ប្រទេស​សរុប​ ៤៥