ក្រុម Bayern Munich បានក្លាយជាជើងឯកលីគកំពូល អាល្លឺម៉ង់ Bundesliga រដូវកាល ២០២៤-២០២៥ ជាផ្លូវការហើយ ដ្បិតនៅសល់ ២ ប្រកួតទៀតក៏ដោយ បន្ទាប់ពីក្រុមឈរលេខ ២ Bayer Leverkusen ភ្លាត់ស្មើទល់នឹងក្រុម SC Freiburg ២ ទល់នឹង ២ កាលពីថ្ងៃ អាទិត្យ ទី ៤ យប់មិញ ខណៈលទ្ធផលនេះធ្វើឱ្យពួកគេត្រូវ Bayern Munich វ៉ាដាច់ពិន្ទុដល់ទៅ ៨ ពិន្ទុ។

ជុំវិញការឈ្នះពានលីគ Bundesliga របស់ Bayern Munich នៅរដូវកាលនេះ វាគឺជាពានផ្លូវការលើកដំបូងសម្រាប់ Kane នៅក្នុងអាជីពរបស់គេ។ Kane បានប្រឡូកនៅក្នុងអាជីពជាកីឡាករបាល់ទាត់អស់រយៈពេល ១៥ ឆ្នាំហើយ ខណៈក្លិបដែលគេរួមរស់ជាមួយយូរជាងគេ គឺក្រុម Tottenham Hotspur ប៉ុន្តែជារឿងអកុសល រូបគេមិនដែលបានឈ្នះពានណាមួយសោះនៅទីនោះ។ ទើបតែឥឡូវរូបគេមកដល់ក្លិបយក្ស អាល្លឺម៉ង់ ក្នុងរដូវកាលទី ២ ទើបរូបគេអាចសម្រេចក្តីស្រមៃឈ្នះពានលើកដំបូងនៅក្នុងអាជីព៕

អត្ថបទ៖ សេម កុសល

The post ទីបំផុត Kane ស្គាល់រស់ជាតិពានលើកដំបូងក្នុងអាជីព ក្រោយ Bayern លើកពាន Bundesliga appeared first on Kampuchea Thmey Daily.

យោងតាមសារព័ត៌មាន Sky Sport នៅប្រទេសអាឡឺម៉ង់បានចុះផ្សាយថា តារាឆ្នើមរបស់ Bayer Leverkusen Florian Wirtz មិនទាន់យល់ព្រមជាផ្លូវការលើការចុះកុងត្រាថ្មីនៅឡើយទេ ប៉ុន្តែក្លិបកំពុងដុតដៃដុតជើង ធ្វើយ៉ាងណាដើម្បីអាចរក្សាទុករូបគេ ឲ្យស្នាក់បន្តទៀត។ កិច្ចសន្យាថ្មីរបស់គាត់ទំនងជាមានសុពលភាពរហូតដល់ឆ្នាំ២០២៨ ហើយរូបគេអាចទទួលបានការដំឡើងប្រាក់ឈ្នួល​ដល់១១លានដុល្លារក្នុងមួយរដូវកាល។

Wirtz ត្រូវបានគេមើលឃើញ​ពីការ​រួម​ចំណែកសំខាន់មួយក្នុងក្រុម Leverkusen និងបានជួយលោក Xabi Alonso ឈ្នះជើងឯក Bundesliga ជាលើកដំបូងក្នុងប្រវត្តិសាស្ត្ររបស់ពួកគេកាលពីរដូវកាលមុន។ កាលពីប៉ុន្មានខែមុន ក្លិបកំពូលៗនៅអឺរ៉ុបដូចជា Bayern Munich, Manchester City និង Real Madrid មានទំនាក់ទំនងយ៉ាងជិតស្និទ្ធជាមួយកីឡាករជម្រើសជាតិអាឡឺម៉ង់ ប៉ុន្តែយោងតាមរបាយការណ៍បន្ថែមចំពោះការផ្ទេរទៅក្លិបមួយក្នុងចំណោមក្លិបទាំងនោះទំនងជាមិនអាចកើតឡើងទេ ដោយសារគាត់អាចនឹងបន្ដស្នាក់នៅជាមួយក្លិបយ៉ាងហោចណាស់ដល់ព្រឹត្តិការណ៍ World Cup ឆ្នាំ២០២៦។

នៅក្នុងយុទ្ធនាការប្រកួតនៅរដូវកាលឆ្នាំ ២០២៤-២៥ ខ្សែបម្រើវ័យ២១ឆ្នាំរូបនេះបានបង្ហាញទម្រង់លេងដ៏អស្ចារ្យ ក្រោយស៊ុតបញ្ចូលទីបាន១១គ្រាប់ និងបានបញ្ជូនបាល់ឱ្យមិត្តរួមក្រុមចំនួន៥ដងក្នុងការបង្ហាញខ្លួន២៤ប្រកួត៕

ប្រែសម្រួល៖ ផា រតនា

The post Leverkusen ត្រៀមផ្ដល់កិច្ចសន្យា​ថ្មី​ជា​មួយ​ប្រាក់ឈ្នួល​កើន​ឡើងដើម្បីរក្សា Wirtz appeared first on Kampuchea Thmey Daily.

ជារឿងដ៏គួរឲ្យភ្ញាក់ក្នុងរដូវកាលនេះ សម្រាប់អ្នកគាំទ្រ​ក្នុងប្រទេសអាល្លឺម៉ង់ និងទូទាំង​ពិភពលោក គឺ​ក្រុមខ្លាំង Bayern Munich ជិត​អស់​​ឱកាស​ប្រជែងជើង​ឯក​ Bundesliga ក្នុងរដូវកាលនេះ និង​​អាច​ជា​ការ​អ​ត់​ឈ្នះ​ជើង​ឯក​លីគ​ជា​លើក​ដំបូង​​រយៈពេល១១​រដូវ​កាល​ចុង​ក្រោយ​ ពី​ឆ្នាំ២០១២-២០១៣ ដល់​២០២២​-​២០២៣។ អ្វីៗ​នឹង​ត្រូវបានបញ្ចប់ក្នុងរដូវកាលនេះ បន្ទាប់ពីក្រុម Bayer Leverkusen ដឹកនាំដោយលោក Xabi Alonso ត្រូវ​ការ​ត្រឹម​តែ​២​ពិន្ទុ​ទៀត​​​ នឹងក្លាយជា​ជើងឯកលីគកំពូលអាល្លឺម៉ង់​ ខណៈការប្រកួតនៅសល់​៦​លើក​ទៀត។

ក្រុម Bayer Leverkusen ត្រូវការឈ្នះតែ១ប្រកូតទៀត ដើម្បីក្លាយជា​ជើង​ឯក​លីគកំពូលអាល្លឺម៉ង់។ បច្ចុប្បន្នគិតត្រឹមសប្ដាហ៍ទី២៨ ពួកគេមាន៧៦ពិន្ទុ ហើយ​ក្រុម​លេខ​២ Bayern Munich មាន​៦០ពិន្ទុ ទោះ​ឈ្នះ​ទាំង​៦​ប្រកួត​ដែល​នៅ​សល់​ក៏​មិន​អាច​ប្រជែង​នឹង Bayer Leverkusen បាន​ឡើយ។

ក្រុម Bayer Leverkusen កំពុងឆ្ពោះទៅ​បំបែកកំណត់ត្រាជាក្រុមមិនទាន់ចាញ់សោះ ក្រោយការប្រកួត២៨លើក ឈ្នះ២៤ ស្មើ៤ ដូច្នេះ​ចាំមើល៦ប្រកួត​នៅ​សល់ ថា​តើ​​លោក Xabi Alonso អាចបំបែកកំណត់ត្រាជាក្រុមឈ្នះជើងឯកលីគកំពូលអាល្លឺម៉ង់​មិនស្គាល់បរាជ័យសោះក្នុង១រដូវកាល៕

អត្ថបទ៖ ផា រតនា

The post មិនទាន់ចាញ់សោះ Leverkusen ត្រូវការ២ពិន្ទុទៀត នឹងឈ្នះជើងឯកលីគអាល្លឺម៉ង់លើកដំបូង appeared first on Kampuchea Thmey Daily.

បច្ចុប្បន្នកៅអីរបស់លោក Thomas Tuchel កំពុងឡើងកម្ដៅ បន្ទាប់​ពី​៣ប្រកួតចុងក្រោយរបស់ក្រុម Bayern Munich ចាញ់ទាំង៣ គិតត្រឹមសប្ដាហ៍ទី២២ ក្របខណ្ឌលីគកំពូលរបស់ប្រទេសអាឡឺម៉ង់។ ពួគគេកំពុងតាមពីក្រោយក្រុមលេខ១ Bayer Leverkusen ដល់ទៅ៨ពិន្ទុ។ សំណួរជាច្រើនត្រូវបានចោទសួរអំពីអនាគតរបស់លោក Thomas Tuchel។ ក្នុងនោះនាយក​ប្រតិបត្តិក្លិប Bayern Munich បានចេញមុខបកស្រាយអំពីករណីនេះ។

លោក Jan-Christian Dreesen នាយក​ប្រតិបត្តិ Bayern Munich បាននិយាយថា៖«វាច្បាស់ណាស់ថាសំណួរនេះកំពុងកើតឡើង។ វាបាន​កើត​មាន​ឡើង​យូរ​ហើយ។ ខ្ញុំមិនជឿលើសេចក្តីថ្លែងការណ៍ដ៏មានសក្តានុពល​ទាំងនេះចំពោះ​គ្រូបង្វឹកនោះទេ។ ខ្ញុំបាននិយាយអ្វីមួយអំពីរឿងនេះរួចហើយ ប៉ុន្តែវាមិនមែនជាសំណួរនោះទេ។ យើងត្រូវផ្តោតលើការប្រកួតបន្ទាប់»។

តាមការបញ្ជាក់របស់លោកនាយក​ប្រតិបត្តិក្លិប​ បច្ចុប្បន្នក្រុមទាំងមូលកំពុងគិតគឺការប្រកួតបន្ទាប់។ ចំពោះការបញ្ចប់តួនាទីរបស់លោក Thomas Tuchel មិនទាន់អាចកំណត់បានទេ ប៉ុន្តែ​លោកបានបញ្ជាក់យ៉ាងច្បាស់ថា ការប្រកួតសប្ដាហ៍ប្រកួតលោក Tuchel នៅតែជាគ្រូបង្វឹករបស់ក្រុម Bayern Munich។

ស្ថានភាពរបស់ក្រុម Bayern Munich កាន់តែអាក្រក់ឡើង ក្នុងការប្រកួត៣លើកចុងក្រោយ​ដោយ​សប្តាហ៍​​ទី២៣ ពួកគេនឹងត្រូវជួប​ RB Leipzig ដែលជាក្រុមខ្លាំង។ នៅថ្ងៃទី៦ ខែមីនា ពួក​គេ​ត្រូវជូប​ Lazio ក្នុងការប្រកួតជើងទី២ ពានរង្វាន់ UEFA Champion League ដើម្បី​ប្រជែង​ទៅ​វគ្គ​៨​​ក្រុម​ចុង​ក្រោយ បន្ទាប់​ពី​ពួកគេចាញ់ ១-០ កាលពី​ជើង​ទី១​នៅ​ក្រៅ​ដី៕

ប្រែសម្រួល៖ ផា រតនា
ប្រភព៖ Goal

The post Tuchel នៅតែបន្តដឹកនាំ Bayern Munich ទោះបរាជ័យ៣ប្រកួតជាប់គ្នា appeared first on Kampuchea Thmey Daily.

កីឡាករ Sacha Boey និយាយ​ថា​៖ «​​សុបិន​របស់ខ្ញុំបានក្លាយ​ជា​ការ​ពិត​ហើយ។ វាពិតជាមាន​កិត្តិយសសម្រាប់​ខ្ញុំ​ដែល​បាន​លេង​ឱ្យ​ក្លិប​ធំ​ដូច​ជា Bayern។ ខ្ញុំទន្ទឹងរង់ចាំក្នុងការចូលរួមជាមួយក្រុមថ្មី និងបានលេងជាមួយកីឡាករដ៏អស្ចារ្យនា​ពេល​ខាង​មុខ​»។

ខ្សែការពារស្លាបស្ដាំ Sacha Boey ​ដែល​កើតនៅ​ជាយក្រុងប៉ារីស ប្រទេស​បារាំង​ បានចាប់ផ្តើមលេងបាល់ទាត់នៅ FC Romainville និង Red Star FC មុនពេលចូលរួមសាលា​បាល់ទាត់ Rennes ក្នុងឆ្នាំ២០១៤។ រូប​គេ​បានបង្ហាញខ្លួនជាលើកដំបូងនៅក្នុង Ligue 1 នៅអាយុ១៨ឆ្នាំកាលពីខែឧសភា ឆ្នាំ២០១៩ ហើយត្រូវបានខ្ចីជើងទៅក្លិប Dijon មុនពេលចុះហត្ថលេខាផ្ទេរទៅកាន់ Galatasaray នៅ​រដូវ​កាលឆ្នាំ ២០២១-២២។ កីឡាករសញ្ជាតិបារាំងរូបនេះបានបង្ហាញខ្លួនចំនួន៨៣ប្រកួត ស៊ុតបញ្ចូលទីបាន៤គ្រាប់ និងឈ្នះពានរង្វាន់តួកគី​ Süper Lig កាលពីរដូវក្តៅមុន។

លោក Christoph Freund នាយកផ្នែកកីឡារបស់ Bayern បាន​លើក​ឡើង​ថា ៖«Sacha Boey ជាខ្សែការពារស្តាំដ៏រហ័ស និងរឹងមាំ ដែល​គ្រប់​គ្រង​​បាល់ក្រោមច្រើន​។ គាត់​ជាកីឡាករដែលអ្នកគាំទ្រចូលចិត្តនៅ​ក្លិប​Galatasaray និង​បាន​អភិវឌ្ឍ​ខ្លួន​យ៉ាងល្អក្នុងរយៈពេលប៉ុន្មានឆ្នាំ​ចុង​ក្រោយ​ ជាមួយ​ក្លិប​ដែល​មាន​​បទពិសោធ​ Champions League»៕

ប្រែសម្រួល៖ ផា រតនា
ប្រភព៖ Theathletic

The post Sacha សម្រេច​ក្តីស្រមៃលេងឲ្យក្លិប Bayern Munich appeared first on Kampuchea Thmey Daily.

ក្លិប​បាល់ទាត់ Girona ដែលដឹកនាំដោយលោក Míchel បានធ្វើឲ្យអ្នកគាំទ្រនៅអេស្ប៉ាញ និង​ជុំវិញពិភពលោកមាន​ការ​ចាប់​អារម្មណ៍​យ៉ាង​ខ្លាំង​ បន្ទាប់​ពី​លោក​បាន​ដឹកនាំក្រុមមួយនេះឲ្យឈរ​លើ​កំពូល​តារាង​ LaLiga។ ឆ្លង​កាត់​២១​ប្រកួត Girona រក​បាន​៥២​ពិន្ទុ​តាម​រយៈ​ជ័យជម្នះ​១៦​លើក​ ស្មើ៤​លើក និងចាញ់​តែ​១​លើក​ប៉ុណ្ណោះ។ ក្នុង​ជើង​ទី​១​រដូវកាល​​នេះ ពួកគេ​បានយកឈ្នះក្រុមខ្លាំងដូចជា Barcelona, Atletico, Madrid​, Valencia និង Sevilla។

លីគ​ LaLiga បានឈានដល់សប្ដាហ៍ទី២១ ខណៈការប្រកួតនឹងបញ្ចប់នៅសប្ដាហ៍ទី៣៨ ដូច្នេះនៅសល់ចំនួន១៧ប្រកួតទៀតដែលក្រុមទាំងអស់ត្រូវ​តែ​ប្រជែង​គ្នា។ ប្រសិន​បើ Girona បន្តធ្វើបានល្អ​ទៀត ពួក​គេ​​អាច​​បង្កើត​ប្រវត្តិ​សាស្ត្រ​ជា​លើក​ដំបូង​ក្នុង​ការ​ឈ្នះ​ជើងឯកលីគកំពូល​អេស្ប៉ាញ។ រដូវកាលមុនពួកគេបញ្ចប់នៅចំណាត់ថ្នាក់ទី១០ក្នុងតារាងពិន្ទុ។

នៅ​លីគ​អង់គ្លេស Premier League ឈានដល់សប្ដាហ៍ទី២១ ក្នុងនោះក្លិប Aston Villa ដែលដឹកនាំដោយលោក Unai Emery កំពុងឈរនៅចំណាត់ថ្នាក់លេខ៤ បណ្ដោះអាសន្ន ដោយប្រកួត២១លើក ឈ្នះ១៣ ស្មើ៤​ ចាញ់៤ មាន៤៣ពិន្ទុ តាមពីក្រោយក្រុមលេខ១ Liverpool តែ៥ពិន្ទុប៉ុណ្ណោះ។ ក្នុងជុំទី១ ក្រុម Aston Villa បានយកឈ្នះក្រុមធំ​ៗ​ដូចជា Arsenal, Spur និង Chelsea។

លីគ​កំពូល​អង់គ្លេស​នឹងបញ្ចប់នៅសប្ដាហ៍ទី៣៨ ដូច្នេះនៅសល់ចំនួន១៧ប្រកួត​ទៀត​ ដើម្បីសម្រេចថា ក្រុម​ណានឹងក្លាយជាម្ចាស់ជើងឯក។ Aston Villa បានធ្វើឲ្យអ្នកគាំទ្រ​ភ្ញាក់ផ្អើលក្នុងរដូវកាលនេះ ដោយមានលទ្ធភាពប្រជែងជើងឯកលីគកំពូលអង់គ្លេស និងកៅអី UEFA Champion League។ រដូវកាលមុនពួកគេបញ្ចប់នៅចំណាត់ថ្នាក់លេខ៧ក្នុងតារាងពិន្ទុ។

ក្រុម Bayern Leverkusen ដែលដឹកនាំដោយលោក Xabi Alonso កំពុងធ្វើឲ្យអ្នកគាំទ្រលើពិភព​លោក​កោតសរសើរមិន​ស្ទើរទេ ក្រោយពួកគេមិនទាន់ស្គាល់បរាជ័យសោះ​ក្នុងរដូវកាលនេះ។ ឆ្លងកាត់ប្រកួត១៨លើក ពួក​គេ​បាន​ឈ្នះ១៥ ស្មើ៣ មាន៤៨ពិន្ទុ កំពុង​នាំមុខក្រុម​ខ្លាំង​លេខ២ Bayern Munich ៧ពិន្ទុ​ដែល​ទើប​ប្រកួតបាន១៧លើក។

លីគកំពូលអាល្លឺម៉ង់​នឹងបញ្ចប់​នៅសប្ដាហ៍ទី៣៤ ដូច្នេះ​នៅ​សល់​១៦​ប្រកួត​ទៀត​ដើម្បី​សម្រេច​ថា ក្រុម​ណា​ជា​ម្ចាស់​ជើង​ឯក Bundesliga ក្នុងរដូវកាលនេះ។ រដូវកាលមុន Bayern Leverkusen បញ្ចប់នៅចំណាត់ថ្នាក់លេខ៦៕

អត្ថបទ៖ ផា រតនា

The post ក្លិប៣​នៅអឺរ៉ុបកំពុងធ្វើឲ្យអ្នកគាំទ្រភ្ញាក់ផ្អើលក្នុងរដូវកាលនេះ appeared first on Kampuchea Thmey Daily.

កីឡាករ Adeyemi វ័យ២១ ឆ្នាំកំពុងស្ថិតនៅក្នុងទីក្រុង Ibadan ដើម្បីមើល​ផែន​ការ​របស់ខ្លួនកំពុងអនុវត្ត​ដោយ​មាន​គោលដៅក្នុងការលុបបំបាត់ភាពក្រីក្រ និងបញ្ចប់វិសមភាព ហើយជួយដល់យុវជនក្នុងស្រុកតាមរយៈការអប់រំ ការផ្តល់សិទ្ធិអំណាច និងការអភិវឌ្ឍបាល់ទាត់។ មូលនិធិនេះមានគោលបំណងផ្តល់ការអប់រំដល់សិស្សចំនូន១០០០នាក់ នៅឆ្នាំ២០៣០ នៅរដ្ឋ Oyo ដែលមានចំនួនកុមារក្រៅសាលាច្រើនជាងគេនៅភាគនិរតី​ប្រទេសនីហ្សេរីយ៉ា។ មូលនិធិនេះក៏ដំណើរការក្លិបបាល់ទាត់ Adeyemi ដែល​មាន​គោលដៅ​បណ្តុះបណ្តាលកីឡាករបាល់ទាត់អាជីពចំនួន៥០០០នាក់នៅឆ្នាំ២០៣០។

កីឡាកររបស់ Dortmund បានមើលការហ្វឹកហាត់​របស់​ក្មេងៗនៅកីឡដ្ឋាន Olubadan និងការប្រកួតបាល់ទាត់តាមដងផ្លូវក្នុងទីក្រុង Odo Osun ខណៈពេល​រូបគេក៏បានចូលរួម​សកម្មភាព​ក្នុងសហគមន៍ផងដែរ។ មូលនិធិបានបញ្ចប់ការរៀបចំផែនការ ការផ្តល់ហិរញ្ញប្បទាន ការសាងសង់ និងការដាក់ឱ្យដំណើរការរោងចក្រប្រព្រឹត្តិកម្មទឹកស្អាតសម្រាប់មនុស្ស ២០ ០០០នាក់នៅក្នុងសហគមន៍ Odo Osun។

កីឡាករវ័យ២១ឆ្នាំរូបនេះបាន​ធ្វើ​ទស្សនកិច្ច​ទៅកាន់ Ibadan ដោយបាន​ជួប​ព្រះមហាក្សត្រនៃ Ibadanland។ Adeyemi កើតនៅទីក្រុង Munich ដែលមានឪពុកជនជាតិនីហ្សេរីយ៉ា និងម្តាយជនជាតិរ៉ូម៉ានី។

ការបង្ហោះលើ Instagram កីឡាករ Karim Adeyemi បានសរសេរថា ៖«នៅអាយុ​១០​ឆ្នាំ ខ្ញុំបានទៅលេងស្រុកកំណើតរបស់ឪពុកខ្ញុំគឺ Ibadan ប្រទេសនីហ្សេរីយ៉ាជាលើកដំបូង។ ការតភ្ជាប់​រវាងប្រទេស និងវប្បធម៌​រស់រវើក ហើយការចងចាំដ៏ពេញចិត្តបំផុតមួយរបស់ខ្ញុំគឺការចំណាយពេលជាមួយក្រុមគ្រួសារ​ដោយរីករាយ។ ខ្ញុំ​បាន​សន្យាជាមួយឪពុក​ថា ​ខ្ញុំចង់រួមចំណែក​ជួយ​ប្រជាជននីហ្សេរីយ៉ា»។

Adeyemi ក៏បានទៅលេងរដ្ឋ Lagos និងកីឡដ្ឋាន Maracana ក្នុងទីក្រុង Ajegunle ជាកន្លែងដែល​រូប​គេ​ និងកីឡាករអន្តរជាតិនីហ្សេរីយ៉ា Wilfred Ndidi បានបរិច្ចាគអគារលំនៅដ្ឋានដល់កីឡដ្ឋាន​ដើម្បីកែលម្អ៕

ប្រែសម្រួល៖ ផា រតនា
ប្រភព៖ Bundesliga

The post វ័យទើប២១ឆ្នាំ Adeyemi ធ្វើសកម្មភាពសប្បុរសធម៌ជាច្រើននៅនីហ្សេរីយ៉ា appeared first on Kampuchea Thmey Daily.