Burn X Flash Archives - Kampuchea Thmey Daily

ក្រុម Esports កម្ពុជា ទទួលបានលេខ៣ ព្រឹត្តិការណ៍អាស៊ី IESF Asian Championship

Sovath Sok — Fri, 14 Jul 2023 01:25:15 +0000

ក្រុមកីឡាអេឡិចត្រូនិកជម្រើសជាតិកម្ពុជា សម្រាប់វិញ្ញាសា MLBB ទទួលបានចំណាត់ថ្នាក់លេខ៣ ក្នុងព្រឹត្តិការណ៍ប្រកួត IESF Gamers8 Asian Championship ឆ្នាំ២០២៣នៅប្រទេសអារ៉ាប៊ីសាអ៊ូឌីត។

ការប្រកួតដែលធ្វើនៅទីក្រុង Riyadh ប្រទេសអារ៉ាប៊ីសាអ៊ូឌីត ចាប់ពីថ្ងៃទី៨ ដល់ទី១៤ ខែកក្កដានេះ មានក្រុមជម្រើសជាតិចំនួន៨ ចូលរួមប្រកួតក្នុងវិញ្ញាសា MLBB។ ចំពោះក្រុមអ្នកចម្បាំងអង្គរ ប្រកួតនៅវគ្គសន្សំពិន្ទុក្នុងពូល A បានឈ្នះជម្រើសជាតិអារ៉ាប់រួម ដោយលទ្ធផល ២-០ ហើយការប្រកួតទី២ បានចាញ់ម៉ុងហ្គោល់ ០-២ ប៉ុន្តែប្រកួតទី៣បានយកឈ្នះជម្រើសជាតិនេប៉ាល់ ២-០ ដើម្បីទទួលបានចំណាត់ថ្នាក់លេខ២នៅក្នុងពូល A។

នៅវគ្គខ្វែង Upper Bracket ក្រុមជម្រើសជាតិកម្ពុជាបានចាញ់ដោយលទ្ធផល ០-២ ក្រោមស្នាដៃជម្រើសជាតិ ហ្វីលីពីន។ បន្ទាប់មក ជម្រើសជាតិកម្ពុជាបានប្រកួតឈ្នះកាហ្សាក់ស្ថាននៅវគ្គ Lower Bracket ដោយលទ្ធផល ២-០ ដើម្បីបានឡើងទៅកាន់វគ្គពាក់កណ្តាលផ្តាច់ព្រ័ត្រដែលវគ្គនេះក្រុមកម្ពុជាបានចាញ់ម៉ុងហ្គោល ១-២ ដើម្បីទទួលបានចំណាត់ថ្នាក់លេខ៣ ដោយទទួលបានប្រាក់រង្វាន់ ២ពាន់ដុល្លារអាមេរិក។

ចំណែក ហ្វីលីពីនបានក្លាយជាជើងឯក ដោយទទួលបានប្រាក់រង្វាន់ ៧ពាន់ដុល្លារអាមេរិក បន្ទាប់ពីបានយកឈ្នះដោយលទ្ធផល ៣-០ លើម៉ុងហ្គោលី ដែលទទួលបានចំណាត់ថ្នាក់លេខ២ ដែលទទួលបានប្រាក់រង្វាន់ ៣,៥ពាន់ដុល្លារអាមេរិក។

សម្រាប់ព្រឹត្តិការណ៍ប្រកួត IESF Gamers8 Asian Championship ឆ្នាំ២០២៣នេះ គឺជាផ្នែកមួយនៃវគ្គជម្រុះជម្រើសជាតិប្រចាំតំបន់អាស៊ីដើម្បីជ្រើសរើសយក៥ក្រុម ទៅព្រឹត្តិការណ៍ប្រកួតពិភពលោកលើកទី១៥ (15^th WE Championship) នៅប្រទេសរ៉ូម៉ានី នាចុងខែសីហាខាងមុខ។

ក្រុមជម្រើសជាតិកម្ពុជាបានកក់កៅអីទៅ 15^th WE Championship ដែលស្ថិតក្នុងចំណោមក្រុម៥ មានដូចជា ហ្វីលីពីន ម៉ុងហ្គោលី កាហ្សាក់ស្ថាន និងក្រុមម្ចាស់ផ្ទះអារ៉ាប៊ីសាអ៊ូឌីត (លេខ៣ល្អបំផុតនៅវគ្គសន្សំពិន្ទុក្នុងពូល)។

សូមបញ្ជាក់ថា សហព័ន្ធកីឡាអេឡិចត្រូនិកកម្ពុជាបានបញ្ជូនកីឡាករ ៥រូប និងគ្រូបង្វឹក ១រូប ដែលដឹកនាំដោយលោក ជាន ចាន់រ៉ា អគ្គលេខាធិការរងសហព័ន្ធដើម្បីចូលរួមប្រកួត IESF Gamers8 Asian Championship កាលពីថ្ងៃទី៨ ដល់ទី១៤ ខែកក្កដា ឆ្នាំ២០២៣ នៅទីក្រុង Riyadh ប្រទេសអារ៉ាប៊ីសាអ៊ូឌីត។

នៅចុងខែសីហាខាងមុខ ក្រុមជម្រើសជាតិកម្ពុជាអ្នកចម្បាំងអង្គរនឹងធ្វើដំណើរទៅប្រទេសរ៉ូម៉ានី ដើម្បីចូលរួមប្រកួតព្រឹត្តិការណ៍ពិភពលោកលើកទី១៥៕

អត្ថបទ៖ វីរបុត្រ

The post ក្រុម Esports កម្ពុជា ទទួលបានលេខ៣ ព្រឹត្តិការណ៍អាស៊ី IESF Asian Championship appeared first on Kampuchea Thmey Daily.

E-Sports៖ កម្ពុជា នឹងប៉ះហ្វីលីពីន ឬម៉ុងហ្គោលី វគ្គពាក់កណ្តាលផ្តាច់ព្រ័ត្ររសៀលនេះ

Sovath Sok — Thu, 13 Jul 2023 01:50:26 +0000

អ្នកចម្បាំងអង្គរដែលជាក្រុមកីឡាអេឡិចត្រូនិកជម្រើសជាតិកម្ពុជាលើវិញ្ញាសា MLBB បានឈានដល់វគ្គពាក់កណ្តាលផ្តាច់ព្រ័ត្រហើយ បន្ទាប់ពីបានប្រកួតឈ្នះក្រុមជម្រើសជាតិកាហ្សាក់ស្ថាន នៅវគ្គ Lower Bracket ក្នុងការប្រកួតជើងឯក IESF Gamers8 Asia Championship នៅទីក្រុង Riyadh ប្រទេសអារ៉ាប៊ីសាអ៊ូឌីត។

ក្រុមជម្រើសជាតិកម្ពុជា បានឆ្លងការប្រកួត៥លើកគឺ៣លើកនៅវគ្គសន្សំពិន្ទុក្នុងពូល និង២លើកនៅវគ្គខ្វែង។ វគ្គសន្សំពិន្ទុក្នុងពូល ក្រុមកម្ពុជាបានបើកឆាកយកឈ្នះលើជម្រើសជាតិអារ៉ាប៊រួម ដោយលទ្ធផល ២-០ ហើយការប្រកួតទី២បានចាញ់ម៉ុងហ្គោល ០-២ ប៉ុន្តែប្រកួតទី៣បានយកឈ្នះជម្រើសជាតិនេប៉ាល់ ២-០ ដើម្បីទទួលបានចំណាត់ថ្នាក់លេខ២នៅក្នុងពូល A។

នៅវគ្គខ្វែង ក្រុមជម្រើសជាតិកម្ពុជាបានចាញ់ ០-២ ក្រោមស្នាក់ដៃជម្រើសជាតិ ហ្វីលីពីន ដែលជាក្រុមចំណាត់ថ្នាក់លេខ១ក្នុងពូល B ខណៈក្រុមលេខ២ពូល B គឺកាហ្សាក់ស្ថាន បានចាញ់ ម៉ុងហ្គោលី ដែលជាក្រុមលេខ១នៅពូល A។

ក្រុមហ្វីលីពីន និងម៉ុងហ្គោលី ត្រូវជួបគ្នានៅវគ្គពាក់កណ្តាលផ្តាច់ព្រ័ត្រ នៅវគ្គ Upper Bracket ខណៈក្រុមកម្ពុជាបានធ្លាក់មកប្រកួតវគ្គ Lower Bracket ជាមួយក្រុមកាហ្សាក់ស្ថាន ហើយបានយកឈ្នះដោយលទ្ធផល ២-០ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រដោយត្រូវជួបហ្វីលីពីន ឬម៉ុងហ្គោលសាជាថ្មី។

នៅពេលនេះមានតែ៣ក្រុមប៉ុណ្ណោះបានស្ថិតនៅវគ្គពាក់កណ្តាលផ្តាច់ព្រ័ត្រគឺហ្វីលីពិន ម៉ុងហ្គោលី និងកម្ពុជា។ រវាងហ្វីលីពីន និង ម៉ុងហ្គោល ក្រុមដែលឈ្នះឡើងទៅវគ្គផ្តាច់ព្រ័ត្រ ខណៈក្រុមចាញ់ត្រូវប្រកួតក្នុងវគ្គពាក់កណ្តាលផ្តាច់ព្រ័ត្រម្តងទៀតជាកម្ពុជា។ ការប្រកួតចាប់ពីម៉ោង១២ថ្ងៃត្រង់ (ប្រហែលជាម៉ោង២រសៀលនៅកម្ពុជា) និងការប្រកួតវគ្គផ្តាច់ព្រ័ត្រនឹងធ្វើវេលាម៉ោងប្រហែលជា៧យប់ (ម៉ោងនៅកម្ពុជា)។

សូមបញ្ជាក់ថា ក្រុមជើងឯកទទួលបានប្រាក់រង្វាន់៧ពាន់ដុល្លារ ជើងឯករងទទួលបាន៣,៥ពាន់ដុល្លារ និងលេខ៣ទទួលបាន២ពាន់ដុល្លារ ដូច្នេះមានន័យថា ក្រុមជម្រើសជាតិកម្ពុជាស្ថិតក្នុងចំណោម៣ក្រុមចុងក្រោយដែលទទួលបានប្រាក់រង្វាន់ហើយ ប៉ុន្តែគ្រាន់តែមិនទាន់ដឹងថាតើនឹងស្ថិតចំណាត់ថ្នាក់លេខប៉ុន្មាន៕

អត្ថបទ៖ វីរបុត្រ

The post E-Sports៖ កម្ពុជា នឹងប៉ះហ្វីលីពីន ឬម៉ុងហ្គោលី វគ្គពាក់កណ្តាលផ្តាច់ព្រ័ត្ររសៀលនេះ appeared first on Kampuchea Thmey Daily.

Esports៖ ក្រុមជម្រើសជាតិកម្ពុជា ឡើងប៉ះក្រុមខ្លាំងហ្វីលីពីន នៅអារ៉ាប៊ីសាអូឌីតល្ងាចនេះ

Sovath Sok — Wed, 12 Jul 2023 02:59:22 +0000

នៅថ្ងៃព្រហស្បតិ៍ ទី១៣ ខែកក្កដានេះ ក្រុមកីឡាអេឡិចត្រូនិកជម្រើសជាតិកម្ពុជា Burn X Flash ត្រូវប្រកួតជាមួយក្រុមជម្រើសជាតិហ្វីលីពីន Brand Esports ក្នុងវគ្គខ្វែងដើម្បីរកឱកាសឡើងទៅវគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍ IESF Asia Championship ឆ្នាំ២០២៣ នៅទីក្រុង Riyadh ប្រទេសអារ៉ាប៊ីសាអ៊ូឌីត។

មុនឈានដល់វគ្គបន្តនេះ ក្រុមជម្រើសជាតិកម្ពុជាបានឆ្លងកាត់៣ប្រកួតនៅវគ្គសន្សំពិន្ទុក្នុងពូលគឺឈ្នះអារ៉ាប់រួម ២-០, ឈ្នះនេប៉ាល់ ២-០ និងចាញ់ម៉ុងហ្គោលី ០-២ ដូច្នេះក្រុមកម្ពុជាស្ថិតនៅចំណាត់ថ្នាក់លេខ២ ខណៈម៉ុងហ្គោលីស្ថិតនៅលេខ១ បន្ទាប់ពីឈ្នះទាំង៣ប្រកួត។

តាមរយៈលទ្ធផលឈរនៅចំណាត់ថ្នាក់លេខ២ក្នុងពូល A នេះ ក្រុមកម្ពុជាត្រូវប្រកួតវគ្គ Upper Bracket ជាមួយក្រុមខ្លាំងហ្វីលីពីនដែលជាក្រុមចំណាត់ថ្នាក់លេខ១នៅពូល B វេលាម៉ោង២:២០នាទីរសៀល (ម៉ោងប្រមាណ៦:២០ល្ងាចនៅកម្ពុជា) ហើយក្រុមលេខ១ពូល A គឺម៉ុងហ្គោលីត្រូវប្រកួតជាមួយក្រុមលេខ២ពូលB គឺកាហ្សាក់ស្ថាន វេលាម៉ោង៤រសៀល។

២ក្រុមដែលឈ្នះនៅវគ្គ Upper Bracket នឹងឡើងទៅវគ្គពាក់កណ្តាលផ្តាច់ព្រ័ត្រ ប៉ុន្តែក្រុម២ដែលចាញ់ក៏នៅបន្តប្រកួតក្នុងវគ្គ Lower Bracket ដើម្បីរកឱកាសទៅវគ្គពាក់កណ្តាលផ្តាច់ព្រ័ត្រ។

ព្រឹត្តិការណ៍ IESF Asia Championship នេះជាផ្នែកមួយនៃវគ្គជម្រុះតំបន់អាស៊ីដើម្បីស្វែងរក៥ក្រុមឡើងទៅជុំផ្តាច់ព្រ័ត្រជើងឯកពិភពលោកនៅប្រទេសរ៉ូម៉ានី។ សម្រាប់ក្រុមកម្ពុជា Burn X Flash បានកក់កៅអីឡើងទៅជុំផ្តាច់ព្រ័ត្រជើងឯកពិភពលោកនៅចុងខែសីហា ខាងមុខនេះហើយ ពីព្រោះក្រុមចំណាត់ថ្នាក់លេខ១ និងលេខ២ក្នុងពូលទាំងពីរគឺទទួលបានកៅអីដោយស្វ័យប្រវត្តិ ខណៈមួយក្រុមទៀតត្រូវប្រកួតស្វែងរកក្រុមចំណាត់ថ្នាក់លេខ៣ល្អបំផុត។

អត្ថបទ៖ វីរបុត្រ

The post Esports៖ ក្រុមជម្រើសជាតិកម្ពុជា ឡើងប៉ះក្រុមខ្លាំងហ្វីលីពីន នៅអារ៉ាប៊ីសាអូឌីតល្ងាចនេះ appeared first on Kampuchea Thmey Daily.

ចាប់ពូលរួច ក្រុម Burn X Flash សង្ឃឹមខ្ពស់ បានកៅអីទៅជុំជើងឯកពិភពលោក

Sovath Sok — Mon, 10 Jul 2023 01:50:36 +0000

ក្រុមកីឡាអេឡិចត្រូនិកកម្ពុជា Burn X Flash សង្ឃឹមខ្ពស់មែនទែន ក្នុងការទទួលបានកៅអីពីព្រឹត្តិការណ៍ជម្រុះតំបន់អាស៊ីក្នុងយុទ្ធនាការ Gamers8 Asia Championship ២០២៣ នៅទីក្រុងរីយ៉ាដ ប្រទេសអារ៉ាប៊ីសាអូឌីត សម្រាប់ធ្វើដំណើរទៅចូលរួមប្រកួតជើងឯកពិភពលោក ជុំផ្តាច់ព្រ័ត្រ WE Championship លើកទី១៥ នៅប្រទេសរ៉ូម៉ានី។

វិញ្ញាសា MLBB នេះមានប្រទេសចំនួន ៨ ចូលរួមប្រកួតជម្រុះ ដើម្បីរកកៅអីទៅជើងឯកពិភពលោកលើកទី១៥។ ប្រទេសទាំង៨មាន អារ៉ាប់រួម កម្ពុជា ម៉ុងហ្គោល និងនេប៉ាល់ ស្ថិតនៅពូល A ខណៈ៤ប្រទេសផ្សេងទៀតគឺ ម្ចាស់ផ្ទះអារ៉ាប៊ីសាអូឌីត កាហ្សាក់ស្ថាន ហ្វីលីពីន និងបង់ក្លាដែស ស្ថិតនៅពូល B។

ថ្ងៃបើកឆាកសន្សំពិន្ទុក្នុងពូល ក្រុមតំណាងកម្ពុជាត្រូវប្រកួតជាមួយក្រុមជម្រើសជាតិអារ៉ាប់រួម វេលាប្រហែលម៉ោង៤រសៀលម៉ោងនៅកម្ពុជា និងបន្ទាប់មកប្រកួតជាមួយម៉ុងហ្គោលី វេលាម៉ោងប្រហែល៨យប់ម៉ោង នៅកម្ពុជា។

តំណាងក្រុម Burn X Flash បាននិយាយថា ការប្រកួតនេះ ពួកគេសង្ឃឹមស្ទើរ ៨០% ក្នុងការទទួលបានកៅអីឡើងទៅការប្រកួតជើងឯកពិភពលោកលើកទី១៥ នៅប្រទេសរ៉ូម៉ានីពេលខាងមុខ ពីព្រោះក្រុមក្នុងពូលជាមួយគ្នាគឺមិនសូវជាខ្លាំងជាងក្រុមតំណាងកម្ពុជាប៉ុន្មានឡើយ។ ជាពិសេសក្រុមខ្លះ ពួកគេធ្លាប់ប្រកួតឈ្នះទៀតផង ដូច្នេះពួកគេពិតជាសង្ឃឹមទទួលបានលទ្ធផលល្អ។

សម្រាប់ការប្រកួតវិញ្ញាសា MLBB ប្រចាំតំបន់នេះ គឺជ្រើសរើសយក ៥ក្រុម ឡើងទៅជុំផ្តាច់ព្រ័ត្រ។ លេខ១ និងលេខ២នៃពូលទាំងពីរគឺទទួលបានកៅអីឡើងជុំផ្តាច់ព្រ័ត្រដោយស្វ័យប្រវត្តិ ខណៈ១ក្រុមទៀតត្រូវជ្រើសរើសពីក្រុមចំណាត់ថ្នាក់លេខ៣ល្អបំផុត។

ទោះបីជាយ៉ាងណា ការប្រកួតនេះ មានការប្រកួតដណ្តើមយកចំណាត់ថ្នាក់ជើងឯក លេខ២ និងលេខ៣ ដោយមានការប្រកួតលក្ខណៈ Upper Bracket និង Lower Bracket ជាបន្តបន្ទាប់ទើបរកឃើញក្រុមឡើងទៅវគ្គផ្តាច់ព្រ័ត្រដើម្បីដណ្តើមជើងឯកដែលមានប្រាក់រង្វាន់ចំនួន៧០០០ដុល្លារ លេខ២ចំនួន៣៥០០ដុល្លារ និងលេខ៣ចំនួន២ពាន់ដុល្លារអាមេរិក។

ព្រឹត្តិការណ៍ Gamers8 Asia Championship ២០២៣ដែលប្រទេសអារ៉ាប៊ីសាអូឌីតធ្វើជាម្ចាស់ផ្ទះនេះមាន៤វិញ្ញាសា និងមានប្រទេស១៩មកពីតំបន់ទូទាំងអាស៊ីចូលរួមប្រកួតជម្រុះ ខណៈកម្ពុជាបានបញ្ជូនក្រុម Burn X Flash ដើម្បីចូលរួមប្រកួតតែវិញ្ញាសា MLBB មួយប៉ុណ្ណោះ។

សូមបញ្ជាក់ក្រុម Burn X Flash មានកីឡាករ ទី ឧត្តម, កុសល ពិសិដ្ឋ, សុខ រដ្ឋ សូ ម៉ារ៉ា, វិធូរ សុវិសាល និងមានគ្រូបង្វឹកលោក Alvarez Soriano Ralph James ដែលដឹកនាំដោយលោក ជាន ចាន់រ៉ា អគ្គលេខាធិការរងសហព័ន្ធកីឡាអេឡិចត្រូនិកកម្ពុជា៕

អត្ថបទ៖ វីរបុត្រ

The post ចាប់ពូលរួច ក្រុម Burn X Flash សង្ឃឹមខ្ពស់ បានកៅអីទៅជុំជើងឯកពិភពលោក appeared first on Kampuchea Thmey Daily.

Burn X Flash Archives - Kampuchea Thmey Daily

ក្រុម Esports កម្ពុជា ​ទទួលបាន​លេខ៣ ព្រឹត្តិការណ៍អាស៊ី IESF Asian Championship

E-Sports៖ កម្ពុជា នឹងប៉ះហ្វីលីពីន ឬម៉ុងហ្គោលី វគ្គពាក់កណ្តាលផ្តាច់ព្រ័ត្ររសៀលនេះ

Esports៖ ក្រុមជម្រើសជាតិកម្ពុជា ឡើងប៉ះក្រុមខ្លាំងហ្វីលីពីន នៅអារ៉ាប៊ីសាអូឌីតល្ងាចនេះ

ចាប់ពូលរួច ក្រុម​ Burn X Flash សង្ឃឹម​ខ្ពស់ ​បានកៅអីទៅជុំ​ជើង​ឯកពិភព​លោក

ក្រុម Esports កម្ពុជា ទទួលបានលេខ៣ ព្រឹត្តិការណ៍អាស៊ី IESF Asian Championship

ចាប់ពូលរួច ក្រុម Burn X Flash សង្ឃឹមខ្ពស់ បានកៅអីទៅជុំជើងឯកពិភពលោក