កីឡាករ Yulo ឈរលេខ១ ជាបុគ្គលត្រូវគេស្វែងរកច្រើនបំផុតលើ Google នៅហ្វីលីពីន

Pha Rothana — Fri, 13 Dec 2024 07:25:23 +0000

កីឡាករ Carlos Yulo ឈរចំណាត់ថ្នាក់លេខ១សម្រាប់ការស្វែងរកក្នុង Google នៅប្រទេសហ្វីលីពីន ឆ្នាំ២០២៤ បន្ទាប់ពីឈ្នះមេដាយមាស២គ្រឿងពីព្រឹត្តិការណ៍កីឡាអូឡាំពិក នៅទីក្រុងប៉ារីស ប្រទេសបារាំង។

កីឡាករកាយសម្ព័ន្ធវ័យ២៤ឆ្នាំ បានក្លាយជាអត្តពលិកដ៏ល្បីល្បាញបំផុតរបស់ប្រទេសហ្វីលីពីន ក្រោយទទួលបានជោគជ័យក្នុងព្រឹត្តិការណ៍អូឡាំពិក ឆ្នាំ២០២៤។ រូបគេបានកាន់កាប់តំណែងកំពូលទាំងនៅក្នុងបញ្ជីឈ្មោះបុគ្គលិកលក្ខណៈកីឡា និងជាប់ចំណាត់ថ្នាក់ទី៤ នៅក្នុងចំណាត់ថ្នាក់កំពូលក្នុងប្រភេទព័ត៌មានទូទៅ។

ចំណាត់ថ្នាក់លេខ២ សម្រាប់បុគ្គលិកលក្ខណៈបុរសត្រូវបានគេស្វែងរកច្រើនបំផុតនៅឆ្នាំនេះនៅ ប្រទេសហ្វីលីពីនបានទៅតារាសម្តែងលោក Nash Aguas ។ តារាល្បីក្នុងស្រុកផ្សេងទៀតមានឈ្មោះក្នុងបញ្ជីរួមមានតារាចម្រៀង-អ្នកនិពន្ធបទចម្រៀង Rico Blanco និងតារាបាល់បោះវ័យក្មេង Kobe Paras ដែលថ្មីៗនេះបានបញ្ជាក់ពីទំនាក់ទំនងជាមួយតារាសម្តែងកញ្ញា Kyline Alcantara ។

(តារាសម្ដែងហ្វីលីពីន លោក Nash Aguas)

ស្ថិតក្នុងវ័យត្រឹមតែ២៤ឆ្នាំ Yulo បានក្លាយជាកីឡាករកាយសម្ព័ន្ធហ្វីលីពីនល្អបំផុតក្នុងប្រវត្តិសាស្ត្រ។ នេះបើយោងតាមទស្សនាវដ្តី Forbes ។ រូបគេជាអត្តពលិកហ្វីលីពីនទី២ ដែលបានឈ្នះមេដាយមាសអូឡាំពិក និងជាអត្តពលិកទីមួយដលបានឈ្នះមេដាយមាសកីឡាអូឡាំពិក២គ្រឿងជូនប្រទេសហ្វីលីពីន។

ក្រោយការឈ្នះមេដាយមាស២គ្រឿងនៅកីឡាអូឡាំពិក កីឡាករ Yulo ទទួលបានប្រាក់រង្វាន់លើកទឹកចិត្តរាប់លានដុល្លារ។ រូបគេត្រូវបានសន្យាផ្តល់រង្វាន់ជាច្រើន ក្នុងនោះមាន ខុនដូក្នុងទីក្រុងម៉ានីល ការផ្គត់ផ្គង់អាហារពេញមួយជីវិតដោយឥតគិតថ្លៃពីអ្នកជំនួញល្បីៗ និងក្រុមហ៊ុនធំៗនៅក្នុងប្រទេសហ្វីលីពីន៕

ប្រែសម្រួល៖ ផា រតនា

The post កីឡាករ Yulo ឈរលេខ១ ជាបុគ្គលត្រូវគេស្វែងរកច្រើនបំផុតលើ Google នៅហ្វីលីពីន appeared first on Kampuchea Thmey Daily.

Yulo ម្ចាស់មេដាយស៊ីហ្គេម១៤គ្រឿង និងពិភពលោក១៣គ្រឿង នឹងមកប្រកួតស៊ីហ្គេមនៅកម្ពុជា

chean virakbot — Fri, 10 Feb 2023 02:57:25 +0000

កីឡាករកាយសម្ព័ន្ធជម្រើសជាតិហ្វីលីពីនអាយុ២២ឆ្នាំ Carlos Yulo នឹងចូលរួមប្រកួតកីឡាស៊ីហ្គេម លើកទី៣២ ឆ្នាំ២០២៣ នៅប្រទេសកម្ពុជានាខែឧសភាខាងមុខនេះ។

តាមការផ្សាយរបស់ក្រុមប្រឹក្សាអូឡាំពិកអន្តរជាតិ (IOC) ក្នុងសប្តាហ៍នេះ លោក Cynthia Carrion Norton ប្រធានសមាគមកីឡាកាយសម្ព័ន្ធហ្វីលីពីនបាននិយាយថា ៖«គាត់ (Carlos Yulo) នឹងចូលរួមប្រកួតស៊ីហ្គេម ឆ្នាំ២០២៣។ យើងកំពុងពង្រឹងគុណភាព និងសម្រាប់កីឡាដែលយើងស្រឡាញ់»។

Carlos Yulo ជាកីឡាករវ័យក្មេងម្នាក់ដែលឈ្នះមេដាយមាសច្រើនបំផុតក្នុងព្រឹត្តិការណ៍កីឡាស៊ីហ្គេម គិតចាប់តាំងពីរូបគេបានចូលរួមប្រកួតលើកដំបូងកាលពីឆ្នាំ២០១៩ ហើយរហូតដល់ពេលនេះបានចូលរួមប្រកួតស៊ីហ្គេម២ដងហើយ និងជាលើកទី៣រាប់ទាំងស៊ីហ្គេមនៅកម្ពុជា។

ឈ្នះមេដាយស៊ីហ្គេម១៤គ្រឿងពីការប្រកួតពីរលើកកន្លងមក

ការចូលរួមប្រកួតស៊ីហ្គេម ២លើកកន្លងមក រូបគេឈ្នះមេដាយសរុប១៤គ្រឿងគឺ មាស៧គ្រឿង និងប្រាក់៧គ្រឿង។ ឆ្នាំ២០១៩ ស៊ីហ្គេម នៅប្រទេសកំណើតរបស់ខ្លួន រូបគេបានឈ្នះមេដាយមាស២គ្រឿង និងមេដាយប្រាក់៥គ្រឿង។ ចំណែកស៊ីហ្គេម ឆ្នាំ២០២១ (លើក២០២២) នៅប្រទេសវៀតណាម រូបគេបង្កការភ្ញាក់ផ្អើលខ្លាំងមែនទែន ដោយដណ្តើមមេដាយមាសរហូតដល់ទៅ៥គ្រឿងម្នាក់ឯង និងមេដាយប្រាក់២គ្រឿង ក្នុងនោះវិញ្ញាសាជាក្រុម១គ្រឿង។

ឈ្នះមេដាយជើងឯកកាយសម្ព័ន្ធអាស៊ី៤គ្រឿង

ក្នុងការចូលរួមប្រកួតកីឡាកាយសម្ព័ន្ធជើងឯកអាស៊ី Yulo បានឈ្នះមេដាយ៤គ្រឿងគឺ មាស៣ និងប្រាក់១ ដែលមេដាយទាំងអស់នេះឈ្នះក្នុងឆ្នាំ២០២២ នៅទីក្រុងដូហា។

ឈ្នះមេដាយពិភពលោក១៣គ្រឿង

Carlos Yulo បានឈ្នះមេដាយមាសកាយសម្ព័ន្ធជើងឯកពិភពលោក២គ្រឿង (១គ្រឿងឆ្នាំ២០១៩, ១គ្រឿងទៀតឆ្នាំ២០២១), ឈ្នះមេដាយប្រាក់២គ្រឿង (១គ្រឿងឆ្នាំ២០២១, ១គ្រឿងឆ្នាំ២០២២) និងឈ្នះមេដាយសំរឹទ្ធ២គ្រឿង (១គ្រឿងឆ្នាំ២០១៨, ១គ្រឿងឆ្នាំ២០២២)។

Carlos Yulo ជាមួយមិត្តស្រីជនជាតិអូស្ត្រាលី

ជាមួយគ្នានេះ រូបគេបានឈ្នះមេដាយកម្រិតពិភពលោក FIG World Cup Series ៧គ្រឿងទៀតគឺមាស៣ ប្រាក់២ និងសំរឹទ្ធ៤។ ចំនួនមេដាយដែលរូបគេរកបានខាងលើនៅមិនទាន់រាប់បញ្ចូលមេដាយក្នុងការប្រកួតកម្រិតយុវជន និងព្រឹត្តិការណ៍អន្តរជាតិផ្សេងៗជាច្រើនគ្រឿងទៀត។

ទើបតែមានវ័យ២២ឆ្នាំ Carlos Yulo កំពុងមានសក្តានុពលសម្រាប់ការស្វែងរកមេដាយជូនហ្វីលីពីនពីព្រឹត្តិការណ៍សំខាន់នាពេលខាងមុខដូចជាកីឡាទ្វីបអាស៊ី និងកីឡាអូឡាំពិកជាដើមដែលរូបគេមិនទាន់ឈ្នះមេដាយ។

អត្ថបទ៖ វីរបុត្រ

The post Yulo ម្ចាស់មេដាយស៊ីហ្គេម១៤គ្រឿង និងពិភពលោក១៣គ្រឿង នឹងមកប្រកួតស៊ីហ្គេមនៅកម្ពុជា appeared first on Kampuchea Thmey Daily.

Carlos Yulo Archives - Kampuchea Thmey Daily

កីឡាករ Yulo ឈរលេខ១ ជាបុគ្គលត្រូវ​គេស្វែងរក​ច្រើន​បំផុតលើ Google នៅហ្វីលីពីន

កីឡាករ Yulo ឈរលេខ១ ជាបុគ្គលត្រូវគេស្វែងរកច្រើនបំផុតលើ Google នៅហ្វីលីពីន