Cristian Roque Archives - Kampuchea Thmey Daily

ក្លិបព្រះខ័នរាជស្វាយរៀង ប្រកាសពីការចាកចេញកីឡាករ Patrick, Cristian និង Yudai

chean virakbot — Fri, 29 May 2026 04:08:54 +0000

នៅព្រឹកថ្ងៃទី២៩ ខែឧសភា ឆ្នាំ ២០២៦ ក្លិបបាល់ទាត់ ព្រះខ័នរាជស្វាយរៀង បានប្រកាសពីការចាកចេញរបស់កីឡាករសំខាន់ ៣ នាក់គឺ Patrick Robson, Cristian Roque និង Yudai Ogawa។

ខ្សែប្រយុទ្ធប្រេស៊ីល Patrick Robson បានចូលរួមជាមួយ ព្រះខ័នរាជស្វាយរៀង តែមួយរដូវកាលប៉ុណ្ណោះគឺ ២០២៥-២៦ ដោយបានជួយឲ្យក្រុមឈ្នះ ជើងឯកលីគកំពូលកម្ពុជា ជើងឯកពានរង្វាន់សម្តេចតេជោ ហ៊ុន សែន និងពានបើករដូវកាល ខេមបូឌានស៊ុបភើខាប់ ព្រមទាំងចំណាត់ថ្នាក់លេខ២ ពានងាស៊ី AFC Challenge League។ ពេលនេះ រូបគេសម្រេចចាកចេញ និងចូលរួមជាមួយក្លិប Bersin Bandung នៃលីគបាល់ទាត់កំពូលឥណ្ឌូណេស៊ី។

កីឡាករជប៉ុនសញ្ជាតិកម្ពុជា Yudai Ogawa ក៏បានចូលរួមជាមួយ ព្រះខ័នរាជស្វាយរៀង តែមួយរដូវកាលដែរ ហើយក៏សម្រេចចាកចេញវិញ។ កីឡាករសញ្ជាតិកម្ពុជារូបនេះនៅមិនទាន់ដឹងច្បាស់ថា ទៅចូលរួមជាមួយក្លិបណាទេ ឬក៏អាចចេញទៅក្រៅប្រទេសក៏ថាបាន ខណៈរូបគេបានលេងនៅក្នុងប្រទេសកម្ពុជា ប្រមាណ ៧ រដូវកាលមកហើយគិតចាប់តាំងពីឆ្នាំ ២០១៨។

ចំណែកខ្សែប្រយុទ្ធសញ្ជាតិប្រេស៊ីល Cristian Roque បានចូលរួមជាមួយព្រះខ័នរាជស្វាយរៀង ២ រដូវកាលគឺ ២០២៤-២៥ និង ២០២៥-២៦ ដោយបានឈ្នះជើងឯកលីគកំពូលកម្ពុជា ២ លើក ឈ្នះជើងឯកពានរង្វាន់សម្តេចតេជោ ហ៊ុន សែន ១ លើក ពានបើករដូវកាលខេមបូឌានស៊ុបភើខាប់ ១ លើក និងចំណាត់ថ្នាក់លេខ ២ ពាន AFC Challenge League ២ លើក។

នៅពេលនេះ Cristian Roque បានសម្រេចចិត្តចាកចេញពី ព្រះខ័នរាជស្វាយរៀង ប៉ុន្តែរូបគេនឹងមិនទាន់ចាកចេញពីប្រទេសកម្ពុជាឡើយ។ រូបគេចង់បន្តលេងនៅលីគកំពូលកម្ពុជាដោយសាររូបគេចង់ទទួលបានសញ្ជាតិកម្ពុជាដើម្បីលេងតំណាងឲ្យជម្រើសជាតិកម្ពុជាលើឆាកអន្តរជាតិ។

ព្រះខ័នរាជស្វាយរៀង ទំនងជាធ្វើការរុះរើទ្រង់ទ្រាយធំ បន្ទាប់ពីចប់រដូវកាល ដើម្បីត្រៀមខ្លួនឲ្យបានល្អសម្រាប់រដូវកាលថ្មីដែលត្រូវលេងក្នុងពានរង្វាន់អាស៊ីកម្រិតទី២ AFC Champions League Two និងពានរង្វាន់ផ្សេងៗជាច្រើនទៀត៕

អត្ថបទ៖ វិរបុត្រ

The post ក្លិបព្រះខ័នរាជស្វាយរៀង ប្រកាសពីការចាកចេញកីឡាករ Patrick, Cristian និង Yudai appeared first on Kampuchea Thmey Daily.

Breaking News! Cristian នឹងចាកចេញពី ព្រះខ័នរាជស្វាយរៀង ចុងរដូវកាលនេះ

chean virakbot — Mon, 25 May 2026 02:25:53 +0000

ខ្សែប្រយុទ្ធប្រេស៊ីល Cristian Roque បានបដិសេធក្លិបជាច្រើននៅក្នុងតំបន់អាស៊ានដើម្បីបន្តលេងនៅក្នុងលីគបាល់ទាត់កំពូលកម្ពុជាទៀត។

ក្រោយចប់ការប្រកួតវគ្គផ្តាច់ព្រ័ត្រ ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៩ កាលពីយប់ថ្ងៃទី២៤ ខែឧសភា ឆ្នាំ ២០២៦ កីឡាករ Cristian Roque បានប្រាប់ក្នុងបទសម្ភាសថា រដូវកាល ២០២៥-២៦ គឺជារដូវកាលចុងក្រោយសម្រាប់រូបគេនៅក្លិបបាល់ទាត់ព្រះខ័នរាជស្វាយរៀង ដូច្នេះរូបគេនឹងចាកចេញពីក្លិបជើងឯកលីគកំពូលកម្ពុជានៅចុងរដូវកាលនេះហើយ។

កីឡាករបានបន្តថា មានក្លិបមួយចំនួននៅតំបន់អាស៊ានដូចជានៅវៀតណាម ឥណ្ឌូណេស៊ី និងម៉ាឡេស៊ីជាដើមបានចាប់អារម្មណ៍លើរូបគេ ប៉ុន្តែរូបគេមិនទាន់ចង់ចាកចេញពីកម្ពុជាឡើយ។ រូបគេចង់បន្តលេងនៅលីគបាល់ទាត់កំពូលកម្ពុជានៅរដូវកាលក្រោយមួយទៀត។

កីឡាករបានបញ្ជាក់ថា ៖«ខ្ញុំចង់មានលិខិតឆ្លងដែនកម្ពុជា ហើយលេងឲ្យក្រុមបាល់ទាត់ជម្រើសជាតិកម្ពុជា»។

រហូតដល់ពេលនេះ Cristian Roque បានលេងនៅលីគបាល់ទាត់កំពូលកម្ពុជាចំនួន ៤ រដូវកាលហើយពោលគឺនៅក្លិប ណាហ្គាវើលដ៍ ២ រដូវកាល និង ព្រះខ័នរាជស្វាយរៀង ២ រដូវកាល។

តាមច្បាប់របស់សហព័ន្ធកីឡាបាល់ទាត់អន្តរជាតិ (FIFA) បានចែងថា កីឡាករបរទេសម្នាក់លេងនៅក្នុងលីគបាល់ទាត់របស់ប្រទេសមួយរយៈពេល ៥ ឆ្នាំ រូបគេមានសិទ្ធិលេងតំណាងឲ្យជម្រើសជាតិនៃប្រទេសនោះ ប្រសិនបើប្រទេសនោះត្រូវការ ហើយផ្តល់សញ្ជាតិឲ្យ។

Cristian បានក្លាយជាតួសំខាន់ម្នាក់ក្នុងការជួយឲ្យ ព្រះខ័នរាជស្វាយរៀង ឈ្នះជើងឯកលីគកំពូលកម្ពុជា ២ លើក ឈ្នះជើងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន ១ លើក និងទទួលបានចំណាត់ថ្នាក់លេខ២ ពានរង្វាន់អាស៊ី AFC Challenge League ២ លើក៕

អត្ថបទ៖ វិរបុត្រ

The post Breaking News! Cristian នឹងចាកចេញពី ព្រះខ័នរាជស្វាយរៀង ចុងរដូវកាលនេះ appeared first on Kampuchea Thmey Daily.

Cristian Roque សូមទោសប្រជាជនកម្ពុជា សម្រាប់ការមិនឈ្នះជើងឯកពានអាស៊ី ACGL

chean virakbot — Thu, 14 May 2026 02:30:43 +0000

ខ្សែប្រយុទ្ធសញ្ជាតិប្រេស៊ីល Cristian Roque បានសូមទោសដល់ប្រជាជនកម្ពុជាទាំងអស់សម្រាប់ការមិនជោគជ័យក្នុងវគ្គផ្តាច់ព្រ័ត្រ ពានរង្វាន់ AFC Challenge League ជាលើកទី២។

កីឡាករបាននិយាយថា ៖«វាពិបាកនិយាយណាស់ បន្ទាប់ពីចាញ់វគ្គផ្តាច់ព្រ័ត្រ ខ្ញុំគ្មានអ្វីក្រៅពី សូមគុណដល់អ្នករាល់គ្នាសម្រាប់ការគាំទ្រ និងសូមអភ័យទោសចំពោះប្រជាជនកម្ពុជាទាំងអស់ដែលបានគាំទ្រលើកទឹកចិត្តពួកយើង។ ខ្ញុំពិតជាសូមទោសមែន»។

ក្រុមបាល់ទាត់ ព្រះខ័នរាជស្វាយរៀង ទទួលបានចំណាត់ថ្នាក់លេខ ២ ជាលើកទី២ ក្នុងពានរង្វាន់ក្លិបទ្វីប អាស៊ី AFC Challenge League បន្ទាប់ពីបានចាញ់ក្រុមម្ចាស់ផ្ទះ Kuwait SC នៅវគ្គផ្តាច់ព្រ័ត្រក្នុងលទ្ធផល ៣-៤ កាលពីយប់មិញ។

ការប្រកួត ដែលប្រព្រឹត្តឡើងនៅកីឡដ្ឋាន Jaber Al-Ahmad ក្នុងប្រទេស គុយវ៉ែត នារាត្រីថ្ងៃទី ១៣ ខែ ឧសភា ឆ្នាំ ២០២៦ ប្រើពេលរហូតដល់ ១២០នាទី ទើបបានបញ្ចប់។ ព្រះខ័នរាជស្វាយរៀង បានបើកការនាំមុខ ២-០ ដើមវគ្គទី ១ ដែលរក្សារហូតចប់ការប្រកូត។ នៅដើមវគ្គទី២ ក្រុមម្ចាស់ផ្ទះរកបានគ្រាប់បាល់ ២ គ្រាប់យ៉ាងលឿនដើម្បីតាមស្មើ ២-២ រហូតចប់ ៩០នាទី។

ការបន្ថែមម៉ោង ១៥នាទី ពីរដង Cristian Roque បានស៊ុតចូលដើម្បីឲ្យ ព្រះខ័នរាជស្វាយរៀង នាំមុខជាថ្មី ៣-២ ប៉ុន្តែត្រូវបានម្ចាស់ផ្ទះរកបាន ២ គ្រាប់ដើម្បីទទួលបានជ័យជម្នះដោយលទ្ធផល ៣-៤។

នេះជាលើកទី២ ដែល ព្រះខ័នរាជស្វាយរៀង ទទួលបានចំណាត់ថ្នាក់លេខ ២ ក្នុងពានរង្វាន់ AFC Challenge League បន្ទាប់ពីលើកទី១ បានប្រើពេលរហួតដល់ ១២០នាទីដូចគ្នាដោយបានចាញ់ក្រុម FK Arkadag ដោយលទ្ធផល១-២ នៅទឹកដី កម្ពុជា។

ការទទួលបានចំណាត់ថ្នាក់លេខ ២ នេះ ព្រះខ័នរាជស្វាយរៀង ទទួលបានប្រាក់រង្វាន់សរុបប្រមាណជាង ៨០ ម៉ឺនដុល្លារអាមេរិក ក្នុងនោះប្រាក់រង្វាន់រងជើងឯក ៥០ ម៉ឺនដុល្លារ និងប្រាក់ទទួលបានពីវគ្គសន្សំពិន្ទុក្នុងពូលដល់វគ្គពាក់កណ្តាលផ្តាច់ប្រមាណ ៣០ ម៉ឺនដុល្លារអាមេរិក៕

អត្ថបទ៖ វិរបុត្រ

The post Cristian Roque សូមទោសប្រជាជនកម្ពុជា សម្រាប់ការមិនឈ្នះជើងឯកពានអាស៊ី ACGL appeared first on Kampuchea Thmey Daily.

Cristian ថា «ទោះនៅកន្លែងណា ដៃគូជានរណា យើងលេងដើម្បីឈ្នះ»

chean virakbot — Tue, 05 May 2026 01:33:12 +0000

ខ្សែប្រយុទ្ធរបស់ ព្រះខ័នរាជស្វាយរៀង Cristian Roque បានលើកឡើងពីការប្រកួតនៅកន្លែងណា ដៃគូជានរណា គឺ ព្រះខ័នរាជស្វាយរៀង តែងតែលេងដើម្បីទទួលបានជ័យជម្នះ។

កីឡាករបាននិយាយថា ៖«យើងតែងតែលេងដើម្បីទទួលបានជ័យជម្នះ ទោះបីជា ការប្រកួតនៅកន្លែងណា ឬដៃគូជានរណាក៏ដោយ។ យើងនៅតែខ្លាំង យើងនៅតែរួមដៃគ្នា»។

ការបង្ហាញពីឆន្ទៈរបស់កីឡាករ Cristian Roque បានឡើង អមជាមួយរូបភាពដែលប្រកួតជាមួយ អង្គរថាយហ្គឺរ កាលពីថ្ងៃអាទិត្យ ទី៣ ខែឧសភា ឆ្នាំ ២០២៦ គ្រាដែល ព្រះខ័នរាជស្វាយរៀង បានចាញ់ អង្គរថាយហ្គឺរ ដោយលទ្ធផល ៣-៤។ ការប្រកួតនោះ ម្ចាស់ផ្ទះបាននាំមុខ ៣-០ មុនពេល ក្រុមជើងឯកតាមស្មើ ៣-៣ ប៉ុន្តែចុងម៉ោងកីឡាករ ហាន់ ទី រកបានគ្រាប់បាល់ជ័យជម្នះ។ ទោះបីជាយ៉ាងណា លទ្ធផលឈ្នះ ឬចាញ់ នៅក្នុងលីគគ្មានបញ្ហាសម្រាប់ ព្រះខ័នរាជស្វាយរៀង ឡើយ ដោយសារពួកគេបានក្លាយជាជើងឯករួចទៅហើយ។

ការប្រកួតសំខាន់នៅចំពោះរបស់ ព្រះខ័នរាជស្វាយរៀង គឺវគ្គផ្តាច់ព្រ័ត្រ ពានរង្វាន់ AFC Challenge League នៅថ្ងៃទី១៣ ខែឧសភា ឆ្នាំ ២០២៦ ជាមួយក្រុម Kuwait SC នៅប្រទេសគុយវ៉ែត និងការប្រកួតជើងទី២ វគ្គពាក់កណ្តាលផ្តាច់ព្រ័ត្រ ពានរង្វាន់សម្តេចតេជោ ហ៊ុន សែន ជាមួយ បឹងកេត នៅថ្ងៃទី២០ ខែឧសភា ឆ្នាំ ២០២៦។

កីឡាករ Cristian Roque បានចូលរួមជាមួយ ព្រះខ័នរាជស្វាយរៀង ៣ រដូវកាលហើយ ហើយក៏បានឈ្នះជើងឯកលីគកំពូលកម្ពុជា ទាំង ៣ រដូវកាលចុងក្រោយ ប៉ុន្តែឈានចូលឆ្នាំទី៥ ដែលរូបគេលេងនៅលីគកំពូលកម្ពុជា បន្ទាប់ពីចូលរួមជាមួយ ណាហ្គាវើលដ៍ តាំងពីឆ្នាំ ២០២២។

ក្រៅពីឈ្នះជើងឯកលីគកំពូលកម្ពុជា រូបគេក៏បានជួយឲ្យ ព្រះខ័នរាជស្វាយរៀង ឈ្នះជើងឯកពានរង្វាន់សម្តេចតេជោ ហ៊ុន សែន ១ លើក និងពានខេមបូឌានស៊ុបភើខាប់ ២ លើក ព្រមទាំងទទួលបានចំណាត់ថ្នាក់លេខ ២ ពានរង្វាន់អាស៊ី AFC Challenge League ១ លើក និងកំពុងឈានដល់វគ្គផ្តាច់ព្រ័ត្រជាលើកទី២ ពានរង្វាន់អាស៊ីដដែលនេះ៕

អត្ថបទ៖ វិរបុត្រ

The post Cristian ថា «ទោះនៅកន្លែងណា ដៃគូជានរណា យើងលេងដើម្បីឈ្នះ» appeared first on Kampuchea Thmey Daily.

មុនជួបគ្នាស្អែក លោកគ្រូ McConkey និង Cristian បារម្ភចំណុចមួយរបស់ Manila Digger

Kosal Sem — Wed, 08 Apr 2026 06:35:44 +0000

គ្រូបង្វឹករបស់ ព្រះខ័នរាជស្វាយរៀង លោក Matthew McConkey និងខ្សែបម្រើប្រយុទ្ធ Cristiano Roque បានមើលឃើញដូចគ្នាពីចំណុចពិសេសមួយរបស់ក្រុម Manila Digger ដែលគួរឱ្យព្រួយបារម្ភ គឺ «ការលេងវាយបកលឿន»។

ព្រះខ័នរាជស្វាយរៀង និង Manila Digger ធ្លាប់បានជួបគ្នារួចម្តងហើយ កាលពីវគ្គចែកពូលនៃពូល D ក្នុងពាន AFC Challenge League នេះ កាលពីថ្ងៃទី ១ ខែ វិច្ឆិកា ឆ្នាំ ២០២៥ ដោយលទ្ធផលពេលនោះស្មើគ្នា ២-២។ តាមរយៈបទពិសោធនេះ បានធ្វើឱ្យលោក McConkey និងកីឡាករក្រុមរហស្សនាមព្រះខ័នខៀវ ទាំងមូលបានដឹងច្រើនអំពីរបៀបលេងរបស់ Manila Digger។

មុនជួបគ្នាក្នុងជើងទី ១ វគ្គពាក់កណ្តាលផ្តាច់ព្រ័ត្រពាន ACGL នៅល្ងាចថ្ងៃ ព្រហស្បតិ៍ ទី ៩ ខែ មេសា ស្អែក ទាំងលោក McConkey និង Cristian បានបង្ហាញការយល់ឃើញអំពីចំណុកពិសេសច្រើនរបស់ក្រុម Manila Digger ប៉ុន្តែចំណុចមួយ ដែលអ្នកទាំង ២ មើលឃើញដូចគ្នា គឺក្រុម Manila Digger លេងលឿនជាមួយការការពារវាយបក។

ថ្លែងនៅក្នុងសន្និសីទសារព័ត៌មាននាព្រឹកថ្ងៃ ពុធ ទី ៨ ខែ មេសា នេះ លោក McConkey បានមានប្រសាសន៍ ថា៖ «យើងបានធ្វើអ្វីៗគ្រប់យ៉ាង តាមរយៈការវិភាគ ហើយយើងបានពិនិត្យមើលការប្រកួតមុនៗទាំងអស់រួចហើយ។ ថ្ងៃស្អែក យើងនឹងត្រូវប្រកួតជាមួយក្រុមមួយដែលខ្លាំងណាស់ មានសមត្ថភាពផ្នែកកាយសម្បទាល្អ មានល្បឿនលឿន ហើយអាចក្លាយជាគ្រោះថ្នាក់ខ្លាំងនៅក្នុងពេលខ្លះៗ»។

គ្រូបង្វឹកសញ្ជាតិ អៀឡង់ បានបន្ថែម ថា៖ «ខ្ញុំគិតថា ចំណុចសំខាន់បំផុតរបស់ពួកគេគឺ ពួកគេគ្រោះថ្នាក់ខ្លាំងនៅពេលប្ដូរពីការការពារទៅវាយប្រហារ។ ដូច្នេះ បើអ្នកបាត់បង់បាល់នៅតំបន់ដែលមិនគួរបាត់ ជាពិសេសនៅតំបន់កណ្ដាលទីលាន វាអាចបង្កបញ្ហាឲ្យយើងបាន។ ដូច្នេះយើងត្រូវគ្រប់គ្រងស្ថានភាពទាំងនោះឲ្យបានល្អ។ ពួកគេមានគុណភាពល្អក្នុងចំណុចជាច្រើន ដូចជា បាល់រៀបចំ ហើយពេលខ្លះក៏អាចរៀបចំការលេងពីក្រោមបានល្អផងដែរ។ ប៉ុន្តែ ចំណុចសំខាន់មួយដែលពួកគេល្អខ្លាំងបំផុត គឺការប្ដូរល្បឿនពីការការពារទៅវាយបក»។

ងាកមកកាន់ Cristian វិញ បានលើកឡើងនៅក្នុងសន្និសីទសារព័ត៌មាន ថា៖ «នេះជាការប្រកួតដ៏លំបាកមួយ ព្រោះពួកគេលេងខ្លាំង និងល្បឿនលឿនយ៉ាងស្វាហាប់។ ប៉ុន្តែយើងត្រូវតែអនុវត្តតាមផែនការរបស់យើង។ ប្រសិនបើយើងអាចគ្រប់គ្រងការប្រកួត ចាត់ចែងការប្រកួតបានល្អ និងបង្កើតឱកាសបាន ខ្ញុំសង្ឃឹមថា យើងនឹងឈ្នះការប្រកួតនេះនៅថ្ងៃស្អែក»។

ទោះបីជាយ៉ាងណា លោក McConkey បានបញ្ជាក់រួចហើយ ថា ក្រុមព្រះខ័នរាជស្វាយរៀង បានត្រៀមរួចរាល់សម្រាប់ការប្រកួតទល់នឹងក្រុម Manila Digger ដើម្បីដណ្តើមជ័យជម្នះ មុនការប្រកួតជើងទី ២ ដែលនឹងត្រូវប្តូរទឹកដីទៅប្រទេស ហ្វីលីពីន នៅថ្ងៃទី ១៦ ខែ មេសា ឆ្នាំ ២០២៦៕

អត្ថបទ៖ សេម កុសល

The post មុនជួបគ្នាស្អែក លោកគ្រូ McConkey និង Cristian បារម្ភចំណុចមួយរបស់ Manila Digger appeared first on Kampuchea Thmey Daily.

ខ្សែប្រយុទ្ធ Cristian Roque កំពុងឡើងជើងវិញ ចំពេលពាន AFC Challenge League មកដល់

chean virakbot — Tue, 21 Oct 2025 02:51:20 +0000

ខ្សែបម្រើប្រយុទ្ធកណ្តាល Cristian Roque បានបង្ហាញសមត្ថភាពលេចធ្លោគួរឲ្យចាប់អារម្មណ៍ក្នុងការប្រកួតដែល ព្រះខ័នរាជស្វាយរៀង បានយកឈ្នះ កងយោធពលខេមរភូមិន្ទ ដោយលទ្ធផល ៦-១ ក្នុងសប្តាហ៍ទី៨ នៃលីគបាល់ទាត់កំពូលកម្ពុជា កាលពីថ្ងៃអាទិត្យ ទី១៩ ខែតុលា ឆ្នាំ ២០២៥ នៅស្តាតចាស់។

កីឡាករ Cristian Roque លេខ២១

កីឡាករ Cristian បានរបួសកាលពីចុងរដូវកាលមុនរហូតត្រូវបានយកទៅពិនិត្យព្យាបាលនៅក្រៅប្រទេសមុនការប្រកួតវគ្គផ្តាច់ព្រ័ត្រ AFC Challenge League ជាមួយក្រុម Arkadag។ របួសនោះនៅតែមិនទាន់ជាសះស្បើយ សូម្បីតែការចេញទៅប្រកួតហ្វឹកហាត់នៅប្រទេសម៉ាឡេស៊ី កាលដើមរដូវកាលថ្មីនេះ ក៏រូបគេមិនបានបង្ហាញខ្លួនលើទីលានដែរ។

កីឡាករ Cristian អបអរជាមួយមិត្តរួមក្រុម

រដូវកាលថ្មីចូលមកដល់ គ្រូបង្វឹកបានដាក់ឲ្យកីឡាករសញ្ជាតិប្រេស៊ីលចូលលេងនៅវគ្គទី២ មុនពេលមានឈ្មោះលេងជម្រើស១១នាក់ដំបូង។ សម្រាប់ការប្រកួតលីគបាល់ទាត់កំពូលកម្ពុជា ៥ ប្រកួតដំបូង រូបគេមិនអាចរកបានគ្រាប់បាល់ ឬបញ្ជូនបាល់ឲ្យមិត្តរួមក្រុមណាមួយសោះ។ ឈានចូលការប្រកួតទី៦ ទើបរូបគេ ស៊ុតបាន ១ គ្រាប់ និងបញ្ជូនបាល់ឲ្យ Kwame Peprah ស៊ុតចូល ១ គ្រាប់ ប៉ុន្តែជាពេលដែល ព្រះខ័នរាជស្វាយរៀង បានចាញ់ ភ្នំពេញក្រោន ដោយលទ្ធផល ២-៣។

កីឡាករ Kwame Peprah

ឈានចូលសប្តាហ៍ទី៨ ដែលជាការប្រកួតទី៧ របស់ ព្រះខ័នរាជស្វាយរៀង Cristian Roque បានបង្ហាញសមត្ថភាពកាន់តែល្អដោយរកបាន ២ គ្រាប់ និងក្លាយជាកីឡាករល្អប្រចាំការប្រកួតក្នុងជ័យជម្នះ ៦-១ លើម្ចាស់ កងយោធពលខេមរភូមិន្ទ។

កីឡាករ Patrick

ចំណែកការប្រកួតក្នុងពាន ASEAN Club Championship វិញ រូបគេបានស្ថិតនៅកៅអីបម្រុង ជាពេល ព្រះខ័នរាជស្វាយរៀង បានឈ្នះក្រុម Shan United ដោយលទ្ធផល ៣-០ នៅទឹកដីមីយ៉ាន់ម៉ា និងការប្រកួតទី២ នៅទឹកដីវៀតណាម Cristian ជាប់ជម្រើស ១១នាក់ដំបូង។

ជម្រើស១១នាក់ ក្រុមព្រះខ័នរាជស្វាយរៀង

ពេលនេះ កីឡាករប្រេស៊ីលដែលប្រកបអាជីពបាល់ទាត់នៅកម្ពុជាឈានដល់ឆ្នាំទី ៥ កំពុងឡើងវិញ ទាំងកម្លាំងស្មារតី និងកាយសម្បទា សម្រាប់ការប្រកួតពានរង្វាន់អន្តរជាតិ ដើម្បីចាប់ដៃគ្នាជាមួយខ្សែប្រយុទ្ធបរទេសជួរមុខកំពុងល្អ Patrick និង Kwame ។ ដូច្នេះពួកគេទាំង ៣ នឹងក្លាយជាកម្លាំងជួរមុខដ៏សំខាន់សម្រាប់ការប្រកួតសន្សំពិន្ទុក្នុងពូល D នៃពានរង្វាន់ AFC Challenge League។

កីឡាករ មិន រតនៈ, គឹម សុខយុទ្ធ និង Cristian អបអរ

សូមបញ្ជាក់ថា ព្រះខ័នរាជស្វាយរៀង ប្រកួតជាមួយក្រុមម៉ុងហ្គោលី SP Falcons នៅថ្ងៃអាទិត្យ ទី២៦ ខែតុលា វេលាម៉ោង ៤រសៀល ហើយការប្រកួតទី ២ ជាមួយក្រុមឡាវ Ezra FC ម៉ោង៧យប់ថ្ងៃទី២៩ ខែតុលា និងចុងក្រោយជាមួយហ្វីលីពីន Manila Digger ម៉ោង៧យប់នៅថ្ងៃទី១ ខែវិច្ឆិកា៕

កីឡាករ Cristian ទទួលបានពានកីឡាករល្អប្រចាំការប្រកួត

អត្ថបទ៖ វីរបុត្រ

The post ខ្សែប្រយុទ្ធ Cristian Roque កំពុងឡើងជើងវិញ ចំពេលពាន AFC Challenge League មកដល់ appeared first on Kampuchea Thmey Daily.

ដាក់ផែនការនៅកម្ពុជាយូរទៀត Cristian គ្រោងនាំប្រពន្ធកូនមកនៅខ្មែរដែរ

chean virakbot — Fri, 04 Apr 2025 01:38:35 +0000

ខ្សែប្រយុទ្ធរបស់ព្រះខ័នរាជស្វាយរៀង Cristian Roque ដែលដាក់ផែនការលេងបាល់ទាត់នៅកម្ពុជាច្រើនឆ្នាំទៀត គ្រោងនាំប្រពន្ធ និងកូនពីប្រទេសប្រេស៊ីលមកស្នាក់នៅជុំគ្នាក្នុងប្រទេសកម្ពុជា។

តាមពិតទៅភរិយា និងកូនរបស់កីឡាករ Cristian ធ្លាប់បានមកកម្ពុជាម្តងហើយកាលពីឆ្នាំ២០២៣ ប៉ុន្តែនៅពេលនោះពួកគាត់ពិបាកសម្របខ្លួនក្នុងការរស់នៅប្រទេសកម្ពុជា ខណៈមិនចេះភាសាអង់គ្លេស ហើយសូម្បីកីឡាករផ្ទាល់ក៏មិនសូវភាសាអង់គ្លេសដែរ។ យ៉ាងណា បន្ទាប់ពីស្នាក់នៅកម្ពុជារយៈពេលជាង៣ឆ្នាំ កីឡាករចេះភាសាអង់គ្លេសដែលអាចប្រើប្រាស់ក្នុងការទំនាក់ទំនង និងយល់កាន់តែច្បាស់ពីស្ថានភាពរស់នៅក្នុងប្រទេសនេះ ដូច្នេះរូបគេកាន់តែមានអារម្មណ៍សុខស្រួលដែលចង់ឲ្យប្រពន្ធ និងកូនមករស់នៅជុំគ្នាដែរ។

កីឡាករបាននិយាយថា ៖«គ្រួសាររបស់ខ្ញុំឥឡូវនៅប្រទេសប្រេស៊ីល ពីព្រោះឆ្នាំដំបូង ខ្ញុំមិនដឹងរបៀបរស់នៅទីនេះទេ។ ចូលឆ្នាំទី២ទើប ភរិយារបស់ខ្ញុំបានមកកម្ពុជា។ ភរិយា និងកូនរបស់ខ្ញុំចូលចិត្តទីនេះដែរ ប៉ុន្តែគាត់ពិបាកសម្របខ្លួនដែរ ជាពិសេសគាត់ពិបាករឿងអាហារ។ លើកទី១សម្រាប់គាត់នៅប្រទេសថ្មី។ គាត់ពិបាកក្នុងការរស់នៅ ហើយគាត់ក៏បានត្រឡប់ទៅប្រេស៊ីលវិញ។ គាត់ស្នាក់នៅទីនេះបាន៦ខែ»។

កីឡាករបានឲ្យដឹងទៀតថា ៖«ខ្ញុំគិតថា ប្រហែលជារដូវកាលក្រោយ ពួកគាត់អាចនឹងមកកម្ពុជាម្តងទៀត។ នេះជាការគ្រោងទុក ខ្ញុំមិនដឹងថា ភរិយារបស់ខ្ញុំមកឬអត់ ពីព្រោះគាត់ពិបាកសម្របខ្លួននៅទីនេះ។ គាត់អត់ចេះនិយាយអង់គ្លេស អត់អាចចេញទៅក្រៅម្នាក់ឯង ហើយគាត់ប្រហែលជាគិតថា មិនសូវមានសុវត្ថិភាព។ ប៉ុន្តែខ្ញុំអាចនិយាយបានថា នៅទីនេះគ្មានគ្រោះថ្នាក់អ្វីទេ។ ដូចខ្ញុំសួរ Odawara អំពីកម្មវិធីនៅកម្ពុជា ដូចជាពិធីជប់លៀង ឬសប្បុរសធម៌ ឬអ្វីក៏ដោយគ្មានបញ្ហាអ្វីទេ»។

ទាក់ទងនឹងសុខសុវត្ថិភាពនៅកម្ពុជា កីឡាករ Cristian Roque តែងតែបានប្រាប់សាច់ញាតិ និងអ្នកស្គាល់នៅប្រទេសថា កម្ពុជាមានអាកាសធាតុក្តៅដូចប្រេស៊ីលដែរ តែជាប្រទេសដ៏ល្អ។ នេះជាអ្វីដែលរូបបានប្រាប់គ្រួសារ និងមិត្តភក្តិនៅប្រេស៊ីល។

កីឡាករនិយាយថា ៖«យើងអាចធ្វើអ្វីក៏បាន។ គ្រប់ពេលដែលខ្ញុំបាននិយាយប្រាប់មិត្តភក្តិ។ ឪពុករបស់ខ្ញុំក៏បានសួរនាំអំពីប្រទេសកម្ពុជាដែរ។ ខ្ញុំបានប្រាប់ឪពុកម្តាយរបស់ខ្ញុំថា កុំព្រួយបារម្ភអ្វីពីខ្ញុំ ពីព្រោះខ្ញុំរស់នៅទីនេះសុខស្រួល។ ខ្ញុំរស់នៅទីនេះសុខសប្បាយ ដូច្នេះខ្ញុំប្រាប់ពួកគាត់ថា កុំបារម្ភ។ កម្ពុជាជាប្រទេសដ៏ល្អ»៕

អត្ថបទ៖ វីរបុត្រ

The post ដាក់ផែនការនៅកម្ពុជាយូរទៀត Cristian គ្រោងនាំប្រពន្ធកូនមកនៅខ្មែរដែរ appeared first on Kampuchea Thmey Daily.

Cristian រៀបរាប់ពីការរស់នៅប្រទេសកម្ពុជាដ៏រីករាយ

chean virakbot — Thu, 03 Apr 2025 01:35:27 +0000

ខ្សែប្រយុទ្ធព្រះខ័នរាជស្វាយរៀង Cristian Roque បានរស់នៅប្រទេសកម្ពុជាសម្រាប់ការប្រកបអាជីពបាល់ទាត់រយៈពេលជាង៣ឆ្នាំហើយដែលរហូតដល់ពេលនេះរូបគេកំពុងរីករាយមែនទែន។

Cristian បានរៀបរាប់ថា ៖«ខ្ញុំពិតជារីករាយណាស់ក្នុងការស្នាក់នៅទីនេះ ពីព្រោះកាលពីឆ្នាំដំបូង ខ្ញុំអត់ចេញទៅណាទេ គឺនៅតែផ្ទះ និងទៅលេងបាល់ប៉ុណ្ណោះ។ ប្រហែលជា៨ខែ ខ្ញុំទៅតែលេងបាល់ និងត្រឡប់មកផ្ទះវិញ ពីព្រោះពេលនោះ ខ្ញុំអត់ចេះអង់គ្លេស។ ខ្ញុំមិនដឹងថាតើត្រូវទំនាក់ទំនងជាមួយអ្នកដទៃដូចម្តេច»។

«បច្ចុប្បន្ននេះ ខ្ញុំអាចទៅណាក៏បាន។ ខ្ញុំចេញទៅក្រៅជាមួយមិត្តភក្តិ។ ពួកគាត់តេទូរសព្ទមកខ្ញុំ ហើយណាត់ជួបគ្នាកន្លែងណាមួយ ខ្ញុំអាចទៅបាន។ ដូចជាទៅភោជនីយដ្ឋាន ខ្ញុំឧស្សាហ៍នាំ Taka ទៅជាមួយដើម្បីញាំអាហារប្រេស៊ីល ញាំ BBQ។ ឥឡូវនេះ ខ្ញុំអាចទៅកន្លែងណាក៏បាន ហើយរីករាយជាមួយមិត្តរួមក្រុម ជាមួយមិត្តភក្តិ។ ខ្ញុំអាចធ្វើអ្វីក៏បាន ហើយអាចទៅណាមកណាម្នាក់ឯង តែខ្ញុំមិនធ្លាប់ទៅណាម្នាក់ឯងទេ»។

កីឡាករបានបន្តថា ៖«ភាគច្រើនដែលខ្ញុំចេញទៅក្រៅគឺដើម្បីញាំ BBQ ជាមួយមិត្តភក្តិ ពីព្រោះមិត្តភក្តិជាប្រេស៊ីលចូលចិត្តដូចគ្នា។ ខ្ញុំចូលចិត្តបាយឆា ឡុកឡាក់សាច់គោ បាទគឺឡុកឡាក់សាច់គោជាអាហារខ្មែរដែលខ្ញុំចូលចិត្ត។ ជូនកាលខ្ញុំញាំស៊ុប និងមីស៊ុប ឆ្ងាញ់ ខ្ញុំចូលចិត្តញាំ»៕

អត្ថបទ៖ វីរបុត្រ

The post Cristian រៀបរាប់ពីការរស់នៅប្រទេសកម្ពុជាដ៏រីករាយ appeared first on Kampuchea Thmey Daily.

Cristian Roque Archives - Kampuchea Thmey Daily

ក្លិប​ព្រះ​ខ័ន​រាជ​ស្វាយរៀង ប្រកាស​ពី​ការ​ចាក​ចេញ​កីឡាករ Patrick, Cristian និង Yudai

Breaking News! Cristian នឹងចាក​ចេញពី ព្រះ​ខ័ន​រាជ​ស្វាយរៀង ​ចុងរដូវ​កាល​នេះ

Cristian Roque សូម​ទោស​ប្រជា​ជន​កម្ពុជា​ សម្រាប់​ការមិន​ឈ្នះ​​ជើង​ឯកពាន​អាស៊ី ACGL

Cristian ថា «ទោះ​នៅ​កន្លែង​ណា ដៃគូ​ជា​នរណា​ យើង​លេង​ដើម្បីឈ្នះ»

មុនជួបគ្នាស្អែក លោកគ្រូ McConkey និង Cristian បារម្ភចំណុចមួយរបស់ Manila Digger

ខ្សែ​ប្រយុទ្ធ Cristian Roque កំពុង​ឡើង​ជើង​វិញ ចំ​ពេល​ពាន AFC Challenge League មកដល់

ដាក់​ផែន​ការនៅ​កម្ពុជា​យូរ​ទៀត Cristian គ្រោង​នាំ​ប្រពន្ធកូនមក​នៅ​ខ្មែរ​ដែរ

Cristian រៀបរាប់​ពី​ការ​រស់​នៅ​ប្រទេស​កម្ពុជា​ដ៏​រីក​រាយ

ក្លិបព្រះខ័នរាជស្វាយរៀង ប្រកាសពីការចាកចេញកីឡាករ Patrick, Cristian និង Yudai

Breaking News! Cristian នឹងចាកចេញពី ព្រះខ័នរាជស្វាយរៀង ចុងរដូវកាលនេះ

Cristian Roque សូមទោសប្រជាជនកម្ពុជា សម្រាប់ការមិនឈ្នះជើងឯកពានអាស៊ី ACGL

Cristian ថា «ទោះនៅកន្លែងណា ដៃគូជានរណា យើងលេងដើម្បីឈ្នះ»

ខ្សែប្រយុទ្ធ Cristian Roque កំពុងឡើងជើងវិញ ចំពេលពាន AFC Challenge League មកដល់

ដាក់ផែនការនៅកម្ពុជាយូរទៀត Cristian គ្រោងនាំប្រពន្ធកូនមកនៅខ្មែរដែរ

Cristian រៀបរាប់ពីការរស់នៅប្រទេសកម្ពុជាដ៏រីករាយ