Delta Archives - Kampuchea Thmey Daily

Delta ជិតក្ស័យហើយ! ពិភពលោកសង្ឃឹមធំធេង បើថ្នាំនេះទទួលការអនុញ្ញាត

Sok Sovann — Fri, 15 Oct 2021 01:28:38 +0000

ពិភពលោកកំពុងតែមានក្តីសង្ឃឹមខ្ពស់ក្នុងការកម្ចាត់ជំងឺកូវីដ-១៩ ក៏ដូចជាវីរុសបំប្លែងខ្លួន Delta ផងដែរ នៅពេលទទួលបានព័ត៌មានថា ក្រុមប្រឹក្សាខាងក្រៅ របស់និយតករសុខភាពអាមេរិក នឹងជួបប្រជុំគ្នានៅចុងខែក្រោយនេះ ដើម្បីពិភាក្សាថាតើ ត្រូវអនុញ្ញាតឲ្យប្រើប្រាស់ថ្នាំប្រឆាំងវីរុស របស់ក្រុមហ៊ុន Merck & Co ដែរឬក៏អត់។

ក្រុមប្រឹក្សារបស់រដ្ឋបាលចំណីអាហារនិងឱសថអាមេរិក (FDA) នឹងជួបប្រជុំនៅថ្ងៃទី ៣០ ខែវិច្ឆិកា ដើម្បីពិភាក្សាអំពីសុវត្ថិភាពនិងប្រសិទ្ធភាពនៃថ្នាំ Molnupiravir សម្រាប់ការព្យាបាលជំងឺកូវីដ-១៩ កម្រិតស្រាលទៅមធ្យម ចំពោះមនុស្សពេញវ័យដែលបានធ្វើតេស្តវិជ្ជមាននិងមានហានិភ័យខ្ពស់នៃការវិវត្តទៅជាជំងឺធ្ងន់ធ្ងរ។

កាលពីដើមសប្តាហ៍នេះ ក្រុមហ៊ុន Merck បាននិយាយថា ខ្លួនបានដាក់ពាក្យស្នើសុំការអនុញ្ញាតប្រើប្រាស់គ្រាអាសន្នរបស់សហរដ្ឋអាមេរិកសម្រាប់ថ្នាំ molnupiravir ដែលខ្លួនកំពុងអភិវឌ្ឍន៍ ជាមួយដៃគូ Ridgeback Biotherapeutics។

ប្រសិនបើទទួលបានការអនុញ្ញាតមែននោះ Molnupiravir នឹងក្លាយជាថ្នាំប្រឆាំងវីរុសដំបូងបង្អស់លើកលោក យកទៅកម្ចាត់ជំងឺកូវីដ-១៩ រួមទាំងមេរោគបំប្លែងខ្លួន Delta ផងដែរ។

បើយោងតាមទិន្នន័យដែលចេញផ្សាយកាលពីដើមខែនេះ បានបង្ហាញថា ថ្នាំរបស់ក្រុមហ៊ុន Merck អាចកាត់បន្ថយអត្រានៃការចូលមន្ទីរពេទ្យនិងស្លាប់បាន ៥០% ក្នុងការសាកល្បងលើអ្នកជំងឺកម្រិតស្រាលទៅមធ្យម។

ក្រុមហ៊ុននេះ មានកិច្ចសន្យាជាមួយរដ្ឋាភិបាលសហរដ្ឋអាមេរិក ដើម្បី ផ្គត់ផ្គង់ថ្នាំ ចំនួន ១.៧ លានឈុត ដោយមួយឈុតមានតម្លៃ ៧០០ ដុល្លារ។ ថ្មីៗ ក្រុមហ៊ុនផលិត ក៏បានចុះកិច្ចព្រមព្រៀងជាមួយប្រទេស ម៉ាឡេស៊ីនិងសិង្ហបុរី សម្រាប់ការផ្គត់ផ្គង់ថ្នាំនេះផងដែរ៕

ប្រែសម្រួល៖ Vann Vann

ប្រភព៖ Reuters

ចុចអាន៖ ថ្នាំ Molnupiravir ពិតជាអាចជំនួសវ៉ាក់សាំងកូវីដ បានមែនទេ?

The post Delta ជិតក្ស័យហើយ! ពិភពលោកសង្ឃឹមធំធេង បើថ្នាំនេះទទួលការអនុញ្ញាត appeared first on Kampuchea Thmey Daily.

លទ្ធផលតេស្តរហ័សលើអាជីវករផ្សារធំថ្មី វិជ្ជមាន ៣ នាក់

Mey Soklim — Fri, 27 Aug 2021 00:44:38 +0000

បន្ទាប់ពីតេស្តរហ័សរបស់ក្រុមគ្រូពេទ្យទៅលើអាជីវករផ្សារធំថ្មីនៅរាជធានីភ្នំពេញ រកឃើញវិជ្ជមានកូវីដ១៩ ចំនួន ០៣ នាក់ ក្នុងចំណោមអាជីវករ ៣៩៣ នាក់។

កាលពីល្ងាចថ្ងៃទី ២៦ ខែសីហា ឆ្នាំ ២០២១ នេះ ក្រុមគ្រូពេទ្យបានចុះសហការ ជាមួយអាជ្ញាធរខណ្ឌដូនពេញ ដែលដឹកនាំដោយលោកសុខ ពេញវុធ អភិបាលនៃគណៈអភិបាលខណ្ឌដូនពេញ រួមជាមួយគណៈកម្មការផ្សារ ដែលដឹកនាំដោយលោកស្រី ប៉ុន ដានី អភិបាលរដ្ឋាករស្វយ័តផ្សារធំថ្មីចុះយកសំណាក លើអាជីវករផ្នែកលក់ម្ហូប អាហារហូបចុកប៉ែកខាងលិច បន្ទាប់ពីមានអ្នកជំងឺបំប្លែងថ្មី Delta ចំនួន ៥ នាក់ធ្លាប់បានចេញចូលផ្សារនៅបរិវេណលក់បន្លែត្រីសាច់គ្រឿងសមុទ្ រ(គ្រឿងហូបចុក)។

ប្រភពពីគណៈកម្មការផ្សារធំថ្មី បន្ទាប់ពីគ្រូពេទ្យតេស្តសំណាក រកឃើញអាជីវករ ៣ នាក់មានវិជ្ជមានកូវីដ ១៩ ប្រភេទធម្មតា មិនមែនពពួកបំប្លែងខ្លួនដែលតា និងត្រូវបានបញ្ជូនទៅសម្រាកព្យាបាល។

អាជ្ញាធរខណ្ឌដូនពេញបានបញ្ជាក់ថា ក្រោយមានអាជីវករពាក់ព័ន្ធរកឃើញមានអ្នកឆ្លង ពុំមានការបិទផ្សារទាំងមូលនោះទេ ដោយគ្រាន់តែបិទនៅតូបអ្នកដែលឆ្លងតែប៉ុណ្ណោះ ព្រមទាំងបាញ់ថ្នាំសម្លាប់មេរោគដើម្បីឱ្យបងប្អូនអាជីវករ ដែលមានតូបផ្សេងៗលក់ដូរជាធម្មតាវិញ៕

អត្ថបទ៖ រស្មី

The post លទ្ធផលតេស្តរហ័សលើអាជីវករផ្សារធំថ្មី វិជ្ជមាន ៣ នាក់ appeared first on Kampuchea Thmey Daily.

ការសិក្សាបញ្ជាក់ជាថ្មីថា វ៉ាក់សាំងនៅតែមានប្រសិទ្ធភាពប្រឆាំង Delta

chean virakbot — Fri, 20 Aug 2021 01:08:27 +0000

ការចាក់វ៉ាក់សាំងបង្ការកូវីដ-១៩ទាំងពីរដូសនៅតែជាជម្រើសដ៏ល្អបំផុតដើម្បីការពារប្រឆាំងនឹង Delta ជាវីរុសបំប្លែងខ្លួនឆ្លងដ៏សាហាវដែលរកឃើញដំបូងនៅប្រទេសឥណ្ឌា និងកំពុងរាតត្បាតខ្លាំងទូទាំងពិភពលោក។

ការសិក្សាដ៏ធំមួយបានបង្ហាញថា វ៉ាក់សាំង Oxford-AstraZeneca ដែលពីដំបូងមានប្រសិទ្ធភាពតិចបានផ្តល់ប្រសិទ្ធភាពការពារខ្ពស់ដូចវ៉ាក់សាំង Pfizer-BioNTech ដែរ បន្ទាប់ពីចាក់រួច៤ទៅ៥ខែ។ ប៉ុន្តែវាមិនសូវមានប្រសិទ្ធភាពខ្លាំងដូចប្រសិទ្ធភាពប្រឆាំងនឹងវីរុស Alpha ឡើយ។

មិនមានទិន្នន័យគ្រប់គ្រាន់សម្រាប់វ៉ាក់សាំង Moderna ទេ ប៉ុន្តែអ្នកស្រាវជ្រាវជឿថា វាស្ទើរតែមានប្រសិទ្ធភាពល្អដូចវ៉ាក់សាំងផ្សេង។

ពួកគេបានធ្វើការវិភាគលើលទ្ធផលតេស្ត២លានកន្លះពីអ្នកចូលរួម ៧៤៣ ៥២៦នាក់នៅក្នុងការស្ទង់មតិអ្នកឆ្លងកូវីដ-១៩នៅចក្រភពអង់គ្លេសដែលដឹកនាំដោយសាកលវិទ្យាល័យ Oxford និងការិយាល័យស្ថិតិជាតិ។

ប្រសិទ្ធភាពខ្ពស់

វ៉ាក់សាំង Pfizer-BioNTech មានប្រសិទ្ធភាព៩៣%ប្រឆាំងនឹងការឆ្លងដែលមានរោគសញ្ញារយៈពេល២សប្តាហ៍ បន្ទាប់ពីចាក់ដូសទី២ ប្រៀបធៀបជាមួយនឹងវ៉ាក់សាំង Oxford-AstraZeneca មានប្រសិទ្ធភាពតែ៧១%។

ទោះជាយ៉ាងណា យូរៗទៅ ប្រសិទ្ធភាពរបស់វ៉ាក់សាំង Pfizer-BioNTech បានធ្លាក់ចុះ។ ផ្ទុយវិញវ៉ាក់សាំង Oxford-AstraZeneca នៅរក្សាប្រសិទ្ធភាពខ្ពស់ដដែល។

អ្នកស្រី Sarah Walker សាស្ត្រាចារ្យនៅសាកលវិទ្យាល័យ Oxford បានឲ្យដឹងថា ប៉ុន្តែគ្មានមូលហេតុបង្កឲ្យព្រួយបារម្ភទេ ពីព្រោះ«នៅពេលអ្នកចាប់ផ្តើមប្រសិទ្ធភាពខ្ពស់ អ្នកនឹងរក្សារយៈពេលបានយូរ»។

អ្នកស្រីមានប្រសាសន៍ថា ៖«អង្គការសុខភាពពិភពលោកបានកំណត់កម្រិតស្តង់ដារ៥០% ហើយយើងមានកម្រិតខ្ពស់ជាងនេះ។ វ៉ាក់សាំងពីរប្រភេទនេះនៅតែមានប្រសិទ្ធភាពខ្ពស់ប្រឆាំងនឹង Delta បានយ៉ាងល្អ»។

គន្លឹះសំខាន់ផ្សេងៗទៀតពីការស្រាវជ្រាវរាប់បញ្ចូល

មនុស្សដែលបានយកឈ្នះកូវីដ-១៩រឹតតែមានអង់ទីគ័រខ្លាំងនៅពេលចាក់វ៉ាក់សាំងពេញលេញ។
ចន្លោះពេលវេលារវាងចាក់ដូសទី១ និងដូសទី២មិនប៉ះពាល់ដល់ប្រសិទ្ធភាពរបស់វ៉ាក់សាំងទេ។
មនុស្សវ័យក្មេងទទួលបានប្រសិទ្ធភាពការពារពីវ៉ាក់សាំងខ្លាំងជាងមនុស្សចាស់ជាង។

ការសិក្សាក៏បានឆ្លុះបញ្ចាំងពីការស្រាវជ្រាវមុនៗដោយបង្ហាញថា មនុស្សចាក់វ៉ាក់សាំងពេញលេញដែលបានឆ្លង Delta មានកម្រិតវីរុសប្រហាក់ប្រហែលនឹងមនុស្សដែលមិនទាន់ចាក់វ៉ាក់សាំង។ ផ្ទុយទៅវិញ ចំពោះវីរុសបំប្លែងខ្លួន Alpha មានកម្រិតទាបខ្លាំង។

អ្នកស្រីសាស្ត្រាចារ្យ Walker បន្តថា ៖«យើងមិនទាន់ដឹងទេថាតើការឆ្លងកើតមានឡើងច្រើនយ៉ាងណាចំពោះអ្នកឆ្លងកូវីដ-១៩ បន្ទាប់ពីបានចាក់វ៉ាក់សាំងរួច»។

«ឧទាហរណ៍ ពួកគេប្រហែលជាមានកម្រិតវីរុសខ្ពស់ក្នុងរយៈពេលខ្លី។ ពួកវាប្រាកដជាមានសក្តានុពលដើម្បីបញ្ជូនច្រើន។ ប៉ុន្តែការពិតដែរថា ពួកគេមានកម្រិតវីរុសខ្ពស់ចំពោះមនុស្សដែលមិនទាន់ចាក់វ៉ាក់សាំងប្រហែលជាមិនអាចការពារ Delta ដូចយើងសង្ឃឹមនោះទេ»។

អ្នកស្រីសាស្ត្រាចារ្យ Walker បញ្ជាក់ថា ៖«នេះមានន័យថា វាសំខាន់ណាស់សម្រាប់មនុស្ស ដែលត្រូវទទួលការចាក់វ៉ាក់សាំងទាំងនៅចក្រភពអង់គ្លេស និងទូទាំងពិភពលោក»៕

ប្រែសម្រួល៖ វីរបុត្រ
ប្រភព៖ BBC

The post ការសិក្សាបញ្ជាក់ជាថ្មីថា វ៉ាក់សាំងនៅតែមានប្រសិទ្ធភាពប្រឆាំង Delta appeared first on Kampuchea Thmey Daily.

វីរុសបំប្លែងថ្មី Delta រកឃើញស្ទើរគ្រប់ខេត្ត លើកលែង៣ខេត្តសរុបករណីកើនជិត ៥០០

deth leng — Sat, 14 Aug 2021 01:13:13 +0000

ក្រសួងសុខាភិបាល បានប្រកាសរកឃើញវីរុសបំប្លែងថ្មី Delta ចំនួន ៦៥ ករណីបន្ថែមទៀត ដែលធ្វើឱ្យករណីឆ្លងវីរុសប្រភេទ Delta នៅកម្ពុជាបានកើនដល់ជិត ៥០០ ករណី (៤៩៤) ត្រឹមតែរយៈពេលប៉ុន្មានខែ។

គិតចាប់ពីថ្ងៃទី ៣១ ខែមីនា រហូតដល់ថ្ងៃទី ១៣ ខែសីហា ឆ្នាំ ២០២១ កម្ពុជាបានរកឃើញអ្នកវិជ្ជមានវីរុសកូវីដ១៩ប្រភេទ ដែលតា(Delta) លើពលករត្រឡប់មកពីប្រទេសថៃ និងប្រទេសវៀតណាម អ្នកដំណើរមកតាមជើងហោះហើរ បុគ្គលិកសុខាភិបាល មន្ត្រីរាជការ និងអ្នកភូមិនៅក្នុងសហគមន៍ សរុបទាំងអស់ចំនួន ៤៩៤ នាក់ ស្រី ២៤៣ នាក់ និងបានប៉ះពាល់ដល់ ២២ រាជធានីខេត្ត លើកលែងតែខេត្ត ៣ ប៉ុណ្ណោះ គឺខេត្តកែប ខេត្តតាកែវ និងខេត្តក្រចេះ នៅមិនទាន់រកឃើញករណីដែលតា។

ក្រសួងសុខាភិបាលបញ្ជាក់ថា វីរុសដែលតា (Delta) កំពុងបន្តរាត្បាតវាយលុកចូលក្នុងសហគមន៍ ជាពិសេស ខេត្តឧត្តរមានជ័យ រាជធានីភ្នំពេញ សៀមរាប ព្រះវិហារ កំពង់ចាម កំពង់ធំ និងបណ្ដាខេត្តមួយចំនួនទៀត៕

The post វីរុសបំប្លែងថ្មី Delta រកឃើញស្ទើរគ្រប់ខេត្ត លើកលែង៣ខេត្តសរុបករណីកើនជិត ៥០០ appeared first on Kampuchea Thmey Daily.

តេស្តបុគ្គលិក និងអ្នកពាក់ព័ន្ធ ៦៣ នាក់ ដែលសង្ស័យ វីរុស Delta ទទួលលទ្ធផលអវិជ្ជមាន

deth leng — Fri, 13 Aug 2021 07:42:06 +0000

អាជ្ញាធរខណ្ឌចំការមន នៅយប់ថ្ងៃទី ១២ ខែសីហា បានចុះប្រតិបត្តិការស្វែងរកអ្នកពាក់ព័ន្ធ និងបានធ្វើតេស្តសំណាកបុគ្គលិក និងអ្នកពាក់ព័ន្ធចំនួន ៦៣ នាក់នៅអគារខុនដូ ផ្លូវនរោត្តមមួយកន្លែង ជាលទ្ធផលអវិជ្ជមានទាំងអស់។

លោក អាំង សិរីពិសិដ្ឋ អភិបាលរងខណ្ឌចំការមន ប្រាប់កម្ពុជាថ្មី នៅថ្ងៃសុក្រនេះថា អាជ្ញាធរមានការសង្ស័យនៅអគារខុនដូ ជាន់ទី២៣ ដែលមានករណីសង្ស័យមានអ្នកផ្ទុកជំងឺកូវីដ១៩ប្រភេទបម្លែងថ្មីDelta។

ជាលទ្ធផលបឋមអ្នកដែលយកសំណាកទាំង ៦៣ នាក់អវិជ្ជមានទាំងអស់ ហើយរង់ចាំ ៤ ថ្ងៃទៀត ដើម្បីយកសំណាកនៅ PCR តេស្ត ខណៈព្រឹកនេះក្រុមគ្រូពេទ្យស្ម័គ្រចិត្តសម្ដេចតេជោ TYDA បានចុះវាយតម្លៃពីហានិភ័យហើយឃើញមានកម្រិតទាបត្រឹម ៤% ដូច្នេះមិនមានហានិភ័យទេនៅទីតាំងខាងលើ៕

The post តេស្តបុគ្គលិក និងអ្នកពាក់ព័ន្ធ ៦៣ នាក់ ដែលសង្ស័យ វីរុស Delta ទទួលលទ្ធផលអវិជ្ជមាន appeared first on Kampuchea Thmey Daily.

Delta កំពុងរាតត្បាតអាមេរិកចូលមន្ទីរពេទ្យខ្ពស់ខ្លាំងក្នុងពេល៦ខែនេះ

chean virakbot — Tue, 10 Aug 2021 02:42:31 +0000

ករណីឆ្លងវីរុសកូរ៉ូណា និងការចូលព្យាបាលនៅមន្ទីរពេទ្យនៅសហរដ្ឋអាមេរិកមានកម្រិតខ្ពស់ក្នុងរយៈពេល៦ខែដែលបណ្តាលមកពីការរាតត្បាតវីរុសបំប្លែងខ្លួន Delta នៅតាមផ្នែកជាច្រើនដែលមានអត្រាចាក់វ៉ាក់សាំងទាប។

យោងតាម Reuters បានបង្ហាញថា ករណីឆ្លងកូវីដ-១៩ទូទាំងអាមេរិកជាមធ្យម១០ម៉ឺននាក់ក្នុងមួយថ្ងៃក្នុងរយៈពេល៣ថ្ងៃជាប់គ្នាដែលកើនឡើង៣៥%ប្រៀបធៀបនឹងកាលពីសប្តាហ៍មុន។ រដ្ឋលូសៀណា ហ្លរីដា និងអាកាន់សា មានករណីឆ្លងថ្មីច្រើនជាងគេបំផុតកាលពីសប្តាហ៍មុនដោយផ្អែកលើប្រជាជន។

ការចូលព្យាបាលនៅមន្ទីរពេទ្យបានកើនឡើងរហូតដល់៤០% និងករណីមរណភាពបានកើនឡើង១៨%កាលពីសប្តាហ៍មុន។

ការរាលដាលឆ្លងកាន់តែខ្លាំងចុងក្រោយនេះបានជំរុញលុបចោលព្រឹត្តិការណ៍ដែលមានប្រាក់ចំណូលខ្ពស់មួយចំនួន។ ករណីលើកលែងគឺការប្រកួតប្រណាំងម៉ូតូប្រចាំឆ្នាំនៅតំបន់ Sturgis ក្នុងរដ្ឋ South Dakota ដែលដំណើរការតាមការគ្រោងទុក។

យោងតាមទិន្នន័យរបស់មជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក (CDC) បានបង្ហាញថា កាលពីថ្ងៃអាទិត្យ ទី៨ ខែសីហា រដ្ឋហ្លរីដា មានករណីឆ្លងថ្មីចំនួន ២៨ ៣១៧នាក់។

តាមការវិភាគរបស់ Reuters រកឃើញថា សម្រាប់អ្នកចូលមន្ទីរពេទ្យនៅរដ្ឋហ្លរីដាបានជាប់កំណត់ត្រាខ្ពស់៨ថ្ងៃជាប់គ្នា។ សិស្សភាគច្រើនបំផុតនៅរដ្ឋនេះត្រូវវិលចូលសាលារៀនវិញនៅសប្តាហ៍នេះ ខណៈកំពុងជជែកគ្នាពីវិធានការណ៍ការពារថាតើត្រូវឲ្យសិស្សពាក់ម៉ាស់ឬយ៉ាងណា។

កាន់សញ្ញាសំគាល់ អ្នកតវ៉ាពាក់ម៉ាស់ និងអ្នកប្រឆាំងបានជួបជុំគ្នានៅសាលារៀន Pinellas County Schools ជិត St Petersburg កាលពីថ្ងៃចន្ទនៅពេលគណៈគ្រប់គ្រងបានកោះហៅប្រជុំពិសេសមួយដើម្បីពិភាក្សាពីពិធីការពាក់ម៉ាស់។

ប្រធានសហជីពគ្រូបង្រៀនធំជាងគេលំដាប់ទី២របស់ប្រទេសកាលពីថ្ងៃអាទិត្យបានប្រកាសពីការផ្លាស់ប្តូរនៅក្នុងវគ្គសិក្សាដោយគាំទ្រការចាក់ថ្នាំបង្ការសម្រាប់គ្រូបង្រៀនអាមេរិកនៅក្នុងកិច្ចប្រឹងប្រែងដើម្បីការពារសិស្សដែលនៅក្មេងដើម្បីចាក់វ៉ាក់សាំង។

ចំនួនកុមារឆ្លងកូវីដ-១៩ចូលមន្ទីរពេទ្យកំពុងកើនឡើងទូទាំងប្រទេសដែលធ្វើឲ្យអ្នកជំនាញសុខភាពយល់ឃើញថា ដោយសារតែវីរុសបំប្លែងខ្លួន Delta ដែលទំនងជាឆ្លងដល់ក្មេងជាងវីរុស Alpha៕

ប្រែសម្រួល៖ វីរបុត្រ
ប្រភព៖ Reuters

The post Delta កំពុងរាតត្បាតអាមេរិកចូលមន្ទីរពេទ្យខ្ពស់ខ្លាំងក្នុងពេល៦ខែនេះ appeared first on Kampuchea Thmey Daily.

អាជ្ញាធរខេត្តកណ្តាលកំពុងស្រាវជ្រាវគ្រួសារអ្នកជំងឺបំប្លែងថ្មី ដែលតាពីរនាក់យកមកទៅធ្វើតេស្ត

Mey Soklim — Mon, 02 Aug 2021 11:13:51 +0000

លោក វេជ្ជបណ្ឌិត គួយប៊ុន ធឿន ប្រធានមន្ទីរសុខាភិបាលខេត្តកណ្តាលបានឱ្យដឹងនៅល្ងាចថ្ងៃទី០២សីហាថា អាជ្ញាធរខេត្តកណ្តាលបាននឹងកំពុងស្រាវជ្រាវក្រុមគ្រួសារអ្នកជំងឺបំប្លែងថ្មីដែលតាពីរនាក់ ដែលមានស្រុកកំណើតនៅខេត្តកណ្តាលដើម្បីយកទៅធ្វើតេស្តរកកូវីដ១៩ ពិសេសរកមេរោគបំប្លែងថ្មីដែលតា។

លោក វេជ្ជបណ្ឌិត គួយ ប៊ុន ធឿន បានបន្តថា ករណីពាក់ព័ន្ធជំងឺកូវីដ១៩បំប្លែងថ្មីដែលតានេះ នៅខេត្តកណ្តាលនេះនៅមិនទាន់មាននៅឡើយទេ។ប៉ុន្តែកន្លងមកយើងបានទទួលព័ត៌មានពីក្រសួងសុខាភិបាលមកថាមានពីរករណីតែបច្ចុប្បន្ននេះគាត់ស្នាក់នៅភ្នំពេញទេក្នុងនោះមានម្នាក់ជាបុគ្គលិកកាល់ម៉ែត ស្នាក់នៅទួលសង្កែតែបច្ចុប្បន្ននេះមានស្រុកកំណើតនៅឃុំព្រែកក្មេងស្រុកល្វាឯម និងម្នាក់ទៀតគាត់នៅពេទ្យរុស្សីមានវិជ្ជមានជំងឺកូវីដ១៩ដែលតា តែស្នាក់នៅបឹងសាឡាងតែបច្ចុប្បន្ននេះមានអាស័យដ្ឋាននៅឃុំព្រែកថ្មីស្រុកកោះធំ។

លោក វេជ្ជបណ្ឌិត បានបន្តទៀតថា «យើងកំពងស្រាវជ្រាវរកក្រុមគ្រួសារគាត់នៅស្រុកទាំងពីរហ្នឹងដើម្បីយើងយកសំណាកគាត់មើល។ប្រសិនបើរកឃើញមានវិជ្ជមានកូវីដ១៩យើងនឹងបន្តយកសំណាកទៅធ្វើតេស្តបន្តទៀតនៅវិទ្យាស្ថានប៉ាស្ទ័រដើម្បីស្រាវជ្រាវរកមេរោគដែលតាតើគាត់មានអត់បើមានមេរោគដែលតាបានន័យថាពួកគាត់មានពាក់ព័ន្ធជាមួយអ្នកមានវិជ្ជមាននៅភ្នំពេញទាំងពីរនាក់នោះហើយ»។

ក្រសួងសុខាភិបាលនៅថ្ងៃនេះបានប្រកាសរកឃើញអ្នកឆ្លងវីរុសកូវីដ១៩ បំប្លែងថ្មីB.1.617.2 Deltaចំនួន១០៩នាក់បន្ថែមទៀតក្នុងនោះ រកឃើញនៅថ្ងៃទី៣១ កក្កដាចំនួន៤៣នាក់និងថ្ងៃទី០១សីហាចំនួន៦៦នាក់។

បើតាមក្រសួងក្នុងចំណោមអ្នករកឃើញបំប្លែងថ្មីដែលតាទាំង១០៩នាក់នោះក្នុងនោះនៅភ្នំពេញចំនួន៥នាក់ដែល១នាក់ជាពលករមកពីប្រទេសថៃកំពុងសម្រាកព្យាបាលនៅមណ្ឌលព្យាបាលសែនសុខរាជធានីភ្នំពេញ ទី២ បុគ្គលិកមន្ទីរពេទ្យកាល់ម៉ែតខាងរោគស្ត្រី ទី៣ បុគ្គលិកអនាម័យនិងអ្នកជំងឺផ្នែកសង្គ្រោះបន្ទាន់១នាក់នៅមន្ទីរពេទ្យមិត្តភាពខ្មែរសូវៀតនិងទី៤អ្នកដំណើរបរទេសមកពីម៉ាឡេស៊ី១នាក់។

គួរបញ្ជាក់ថាគិតចាប់ពីថ្ងៃទី៣១រហូតដល់ថ្ងៃទី០១ខែសីហាឆ្នាំ២០២១កម្ពុជាមានអ្នកឆ្លងវីរុសកូវីដ១៩ បំប្លែងថ្មី B.1.617.2Deltaចំនួន២២៣នាក់ស្រី១០៧នាក់។ក្នុងនោះរកឃើញក្នុងកំឡុងខែមេសា១នាក់ថ្ងៃទី០៤ ខែមិថុនា៤នាក់ថ្ងៃ១៨មិថុនា៧នាក់ថ្ងៃទី២៥មិថុនា២៥នាក់ ថ្ងៃទី១៦កក្កដា៣៧នាក់ថ្ងៃទី២២ ខែកក្កដានិងថ្ងៃទី២៥ ខែកក្កដាមានចំនួន៣៩នាក់ថ្ងៃទី៣១ ខែកក្កដា ៤៣នាក់ និងថ្ងៃទី០១សីហា៦៦នាក់៕

អត្ថបទ៖ សំអឿន

The post អាជ្ញាធរខេត្តកណ្តាលកំពុងស្រាវជ្រាវគ្រួសារអ្នកជំងឺបំប្លែងថ្មី ដែលតាពីរនាក់យកមកទៅធ្វើតេស្ត appeared first on Kampuchea Thmey Daily.

៣ខែខាងមុខ មេរោគកូវីដ១៩ ប្រភេទ Delta នឹងរាលដាលពេញពិភពលោក ខណៈកម្ពុជាក៏ប្រឈមខ្លាំង

deth leng — Thu, 29 Jul 2021 03:48:11 +0000

មេរោគកូវីដ១៩ ប្រភេទ ដែលតា (Delta) កំពុងរីករាលដាលជុំវិញពិភពលោក ខណៈប្រទេសកម្ពុជាក៏កំពុងទទួលរងជំងឺប្រភេទនេះផងដែរ ខណៈេរោគនេះ នឹងបង្កើនការរាតត្បាតនៅជុំវិញពិភពលោកក្នុងរយៈពេល៣ខែខាងមុខ។

ប្រធានមន្ទីរសុខាភិបាលរាជធានីភ្នំពេញ លោក ងី មានហេង បានប្រាប់ឱ្យដឹងថា សម្រាប់ប្រទេសកម្ពុជាដែលជាប្រទេសមួយបាននិងកំពុងរីករាលដាលនៃជំងឺនេះផងដែរនោះ កំពុងចាត់វិធានការយ៉ាងម៉ឺងម៉ាត់បំផុតផងដែរដើម្បីទប់ស្កាត់និងការពារជំងឺនេះកុំឲ្យរីករាលដាលចូលក្នុងសហគមន៍ ពិសេសក្នុងរយៈពេល៣ខែនេះ ។

លោក ងី មានហេង ថ្លែងក្នុងកិច្ចប្រជុំតាមរយៈ វីឌីអូ Conference ជាមួយអាជ្ញាធរខណ្ឌទាំង១៤ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញនៅថ្ងៃទី ២៨ ខែកក្កដា។

លោក ងី មានហេង បានមានប្រសាសន៍លើកឡើងថា ៥ថ្ងៃចុងក្រោយនេះ មេរោគកូវីដ១៩ ប្រភេទ ដែលតា បានថយចុះប្រមាណ១ភាគ៤ (១/៤ ) ហើយបើប្រៀបធៀបទៅនឹងខែមុន ក៏មានការថយចុះផងដែរ។

ប៉ុន្តែទោះបីជាយ៉ាងណាក្តី ក្រសួងសុខាភិបាលដូចជាអាជ្ញាធរររាជធានីភ្នំពេញ បានត្រៀមលក្ខណៈទប់ទល់កូវីដ១៩ ប្រភេទ ដែលតានេះយ៉ាងម៉ឺងម៉ាត់ផងដែរ។

លោកបញ្ជាក់ទៀតថា ពិភពលោកយើង ៣ខែខាងមុខនេះ នឹងមានការរាតត្បាតដ៏ធំមួយ ពីប្រភេទជំងឺកូវីដ១៩ បំលែងថ្មី(ដែលតា) ខណៈដែរជំងឺនេះ បានមកដល់រាជធានីភ្នំពេញហើយ តែវាមិនទាន់ចូលទៅដល់សហគមន៍នៅឡើយទេ។

ជាការទស្សន៍ទាយរបស់ពិភពលោក គឺ ៣ខែខាងមុខនេះ នឹងមានការរីករាលដាលជំងឺកូវីដ១៩ បំលែងថ្មី(ដែលតា)នេះ យ៉ាងខ្លាំង។

ទន្ទឹមនឹងនេះប្រទេសកម្ពុជា បានដាក់ចេញជាវិធានការយ៉ាងម៉ឺងម៉ាត់បំផុតផងដែរ ដើម្បីបង្ការនិងទប់ស្កាត់ជំងឺនេះកុំឲ្យមានការរីករាលដាលធំឡើងទៀត។

គួរបញ្ជាក់ផងដែរថា ពាក់ព័ន្ធនឹងវិធានការទប់ស្កាត់ការរាតត្បាតជំងឺកូវីដ១៩ បំលែងថ្មីដែលតា កុំឱ្យឆ្លងរាលដាលចូលក្នុងសហគមន៍ ប្រមុខរាជរដ្ឋាភិបាលកម្ពុជា បានសម្រេចបិទខ្ទប់ភូមិសាស្ត្រ ខេត្តចំនួន៨ផងដែរ ដែលក្នុងនោះ មានខេត្តកោះកុង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ ព្រះវិហារ និង ខេត្តសៀមរាប ជាបណ្ដោះអាសន្នសម្រាប់រយៈពេល១៤ថ្ងៃ ដោយគិតចាប់ពីវេលាម៉ោង២៣និង៥៩នាទី ថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១៕ ដោយៈ ស្រីរ័ត្ន

The post ៣ខែខាងមុខ មេរោគកូវីដ១៩ ប្រភេទ Delta នឹងរាលដាលពេញពិភពលោក ខណៈកម្ពុជាក៏ប្រឈមខ្លាំង appeared first on Kampuchea Thmey Daily.

Delta Archives - Kampuchea Thmey Daily

Delta ជិតក្ស័យហើយ! ពិភពលោកសង្ឃឹមធំធេង បើថ្នាំនេះទទួលការអនុញ្ញាត

លទ្ធផលតេស្តរហ័សលើអាជីវករ​ផ្សារធំថ្មី វិជ្ជមាន ៣ នាក់

ការសិក្សា​បញ្ជាក់ជា​ថ្មី​​ថា វ៉ាក់​សាំង​នៅ​តែ​មាន​ប្រសិទ្ធភាពប្រឆាំង​ Delta

វីរុសបំប្លែងថ្មី Delta រកឃើញស្ទើរ​​គ្រប់ខេត្ត លើកលែង៣ខេត្តសរុបករណីកើនជិត ៥០០