កីឡាការិនី Marta ត្រូវបានក្រុមជម្រើសជាតិប្រេស៊ីលកោះហៅ ដើម្បីតៀមចូលរួមក្នុងព្រឹត្តិការណ៍អូឡាំពិកឆ្នាំ២០២៤ នៅទីក្រុងប៉ារីស។ នាង​បានក្លាយជាកីឡាការិនីដំបូងគេបានបង្ហាញខ្លួនក្នុងការប្រកួត World Cup ចំនួន៦លើកនិងព្រឹត្តិការណ៍អូឡាំពិកចំនួន៦លើក ជាមួយក្រុមជម្រើសជាតិប្រេស៊ីល។ ក្នុងការប្រកួតពានរង្វាន់បាល់ទាត់ពិភពលោកនារីឆ្នាំ២០២៣ នៅប្រទេសអូស្ត្រាលី និងនូវែលសេឡង់ ប៉ុន្តែរូបនាងមិនអាចជួយក្រុមប្រេស៊ីលឆ្លងផុតវគ្គសន្សំពិន្ទុទេ។

សម្រាប់សមិទ្ធផលជាមួយក្រុមជម្រើសជាតិប្រេស៊ីល កីឡាការិនី Marta បានឈ្នះមេដាយប្រាក់ក្នុងព្រឹត្តិការណ៍អូឡាំពិកឆ្នាំ២០០៤ និងអូឡាំពិកឆ្នាំ២០០៨ ក្រោយចាញ់សហរដ្ឋអាមេរិកទាំង២នៅវគ្គផ្ដាច់ព្រ័ត្រ។ កីឡាការិនី Marta ក៏ជាអ្នកស៊ុតបញ្ចូលទីច្រើនជាងគេ​ក្នុងការប្រកួតបាល់ទាត់ពិភពលោកផ្នែកនារី ក្រោយស៊ុតបញ្ចូលទី១៧គ្រាប់ ក្នុងការបង្ហាញខ្លួន២៣លើក។

កីឡាការិនីវ័យ៣៨ឆ្នាំរូបនេះក៏ធ្លាប់បានប្រកាសកាលពីខែមេសាថានាងគ្រោងនឹងចូលនិវត្តន៍ពីបាល់ទាត់អន្តរជាតិនៅឆ្នាំនេះផងដែរ ប៉ុន្តែយ៉ាងមិញ​ត្រូវរង់ចាំមើលរហូតការប្រកួតអូឡាំពិកបានបញ្ចប់ សិនទើបដឹងច្បាស់ពីការប្រកាសចូលនិវត្តន៏ពីក្រុមជម្រើសជាតិប្រេស៊ីលឬ​យ៉ាង​ណា៕

ប្រែសម្រួល៖ ផា រតនា

The post Marta ក្លាយជាកីឡាការិនីបង្ហាញខ្លួនឲ្យប្រេស៊ីលក្នុងពានអន្តរជាតិច្រើនជាងគេ appeared first on Kampuchea Thmey Daily.

គោលបំណងស្នូលនៃការដេញថ្លៃគឺដើម្បី​បង្កើត​មូលដ្ឋានថ្មី ដោយធានា​បាន​នូវ​ការ​ផ្តល់​ការប្រកួតប្រជែង​ដ៏​អស្ចារ្យ​​មិនធ្លាប់មាន​ក្នុងប្រវត្តិសាស្រ្ត​បាល់ទាត់​នារី។ ការ​​រៀបចំហេដ្ឋារចនាសម្ព័ន្ធឡូជីស្ទិក ធានានូវបទពិសោធ​ចំពោះអ្នកគាំទ្រ ពិសេស​ការស្នាក់នៅគុណភាពខ្ពស់ និងតំណភ្ជាប់ការដឹកជញ្ជូន។ ការ​ប្រកួត​នឹង​ត្រូវ​បាន​ប្រមូល​ផ្តុំ​នៅ​ក្នុង​តំបន់​តូច​មួយ​ ដែល​លាត​សន្ធឹង​តាម​ព្រំដែន​ប្រទេស​បែលហ្សិក ហុល្លង់​ និង​អាល្លឺម៉ង់។ វិធីសាស្រ្តនេះកាត់បន្ថយ​ការធ្វើដំណើរ ស្របតាមគោលដៅនិរន្តរភាព​ដ៏​មហិច្ឆតា។

សេចក្តីថ្លែងការណ៍រួមពីប្រធានសហព័ន្ធកីឡាបាល់ទាត់​បែលហ្ស៊ិក លោក Pascale Van Damme ប្រធាន​សមាគមបាល់ទាត់​ហុល្លង់​ លោក Just Spee និងប្រធាន​សមាគមបាល់ទាត់អាល្លឺម៉ង់ លោក Bernd Neuendorf បានរៀបរាប់​ថា​៖«យើង​រីករាយ ក្នុងការប្រកាសពីការចាប់ផ្តើម​ដេញថ្លៃ BNG2027 ជា​ផ្លូវ​ការ។ បន្ទាប់ពី​ត្រៀម​ខ្លួន​ជា​ច្រើនខែ យើងទន្ទឹងរង់ចាំក្នុងការបង្ហាញ​លក្ខណៈ​សម្បត្តិ​របស់យើង​សម្រាប់ FIFA 2027 Women’s World Cup»។

«យើងជឿជាក់ថា ការដេញថ្លៃ BNG2027 ដែលទទួលបានជោគជ័យអាចដើរតួជាកាតាលីករដ៏មានឥទ្ធិពលមួយ ដើម្បីធានា​បាន​ពី​ការ​ប្រកួត​របស់ស្ត្រី​ដ៏​មាន​សក្តានុពល និង​ទទួល​ការចាប់អារម្មណ៍ពីអ្នកគាំទ្រ​ពី​មហាជនទូទាំងពិភព​លោក»៕

ប្រែសម្រួល៖ ផា រតនា
ប្រភព៖ Onefootball

The post បែលហ្ស៊ិក ហុល្លង់ អាល្លឺម៉ង់ រួមគ្នាដេញថ្លៃ World Cup នារីឆ្នាំ ២០២៧ appeared first on Kampuchea Thmey Daily.

ការដេញថ្លៃធ្វើជាម្ចាស់សហម្ចាស់​ផ្ទះ​ចំនួន២ និង​ការដេញថ្លៃ​ធ្វើ​ម្ចាស់​ផ្ទះ​តែម្នាក់ឯង​មាន​១។ ប្រទេសប្រេស៊ីល ដែលពីមុនធ្វើជាម្ចាស់ផ្ទះការប្រកួតបាល់ទាត់ពិភពលោក ផ្នែកបុរស ក្នុងឆ្នាំ១៩៥០ និងឆ្នាំ២០១៤ មានបំណងក្លាយជាប្រទេសនៅអាមេរិកខាងត្បូងដំបូងគេដែលរៀបចំការប្រកួតស្ត្រី។ ពួកគេ​បាន​ក្លាយ​ជា​គូ​ប្រជែង​សហរដ្ឋអាមេរិក ពីការធ្វើជាម្ចាស់ផ្ទះជាលើកទី៣ ក្នុងចំណោមការប្រកួតបាល់ទាត់ពិភពលោក ចំនួន១០លើក គិតទាំងឆ្នាំ២០២៧។

សហរដ្ឋអាមេរិក មានគោលបំណងចម្លងភាពជោគជ័យពី​ការប្រកួតបាល់ទាត់ពិភពលោកបុរស ឆ្នាំ២០២៦ ​ដើម្បី​​សហការ​ជាមួយប្រទេសម៉ិកស៊ិក​ដើម្បី​ដេញ​ថ្លៃ និងប្រើប្រាស់ហេដ្ឋារចនាសម្ព័ន្ធពីព្រឹត្តិការណ៍​កីឡាដ៏សំខាន់បំផុតរបស់ទ្វីបក្នុងទសវត្សរ៍នេះ។ អាមេរិក​ធ្លាប់ធ្វើជាម្ចាស់ផ្ទះក្នុងឆ្នាំ១៩៩៣ និង២០០៣ ដោយព្យាយាមបំបែក​កំណត់​ត្រា​របស់​ប្រទេសចិន​ដែលធ្វើជាម្ចាស់ផ្ទះ World Cup ឆ្នាំ១៩៩១ និង២០០៧។

ដោយឡែក នៅ​តំបន់​អឺរ៉ុប​ក៏​ស្វះ​ស្វែងរកការរៀបចំ​បាល់ទាត់​នារី​ World Cup ជា​លើកទី៣​ដែរ​ បន្ទាប់ពី​ប្រទេសបារាំង​ធ្លាប់​ធ្វើ​​ឆ្នាំ២០១៩ និងស៊ុយអែត ធ្វើ​នៅឆ្នាំ១៩៩៥។ លើកនេះ ប្រទេស​អាល្លឺម៉ង់ ​បែលហ្ស៊ិក និង​ហុល្លង់​បាន​ចាប់ដៃ​គ្នា​ដើម្បី​ប្រជែង​ជា​មួយប្រេស៊ីល និង​សហរដ្ឋ​អាមេរិក-ម៉ិកស៊ិក​។

ការសម្រេចចិត្តថា ប្រទេស​ណា​ធ្វើជាម្ចាស់ផ្ទះព្រឹត្តិការណ៍ World Cup ស្ត្រីលើកទី១០ ឆ្នាំ​២០២៧​ នឹងត្រូវប្រកាសនៅខែឧសភាឆ្នាំ​២០២៤​ តាមរយៈការបោះឆ្នោតបើកចំហនៅមហាសន្និបាតរបស់ FIFA ក្នុង​ទីក្រុងបាងកក ប្រទេសថៃ៕

ប្រែសម្រួល៖ មន្នីរ័ត្ន
ប្រភព៖ Insidethegames

The post ពេលនេះ៦ប្រទេសបានដាក់ពាក្យធ្វើ​ជា​ម្ចាស់​ផ្ទះបាល់ទាត់នារីពិភពលោកឆ្នាំ២០២៧ appeared first on Kampuchea Thmey Daily.

ប្រទេសទាំង​៣​នៅអឺរ៉ុបបានអះអាងថា ការដេញថ្លៃរួមគ្នារបស់ពួកគេដែលត្រូវបាន​ដាក់ឈ្មោះជាផ្លូវការ ថា  BNG2027  នឹង “បំបែកមូលដ្ឋានថ្មីដោយធានាថា វាផ្តល់នូវការប្រកួតប្រជែងលើកម្រិតដែលមិនធ្លាប់មានពីមុនមកក្នុងប្រវត្តិសាស្ត្រនៃការប្រកួតបាល់ទាត់នារី”។

ការប្រកួតនឹងត្រូវធ្វើឡើងនៅទូទាំងព្រំដែននៃប្រទេសទាំង​៣​ ដោយអ្នករៀបចំសង្ឃឹមថា វាអាចកាត់បន្ថយការធ្វើដំណើរ និងជួយធ្វើឱ្យការប្រកួតមាននិរន្តរភាពតាមដែលអាចធ្វើទៅបាន។

នៅក្នុងសេចក្តីថ្លែងការណ៍រួមមួយ ប្រធានសហព័ន្ធកីឡាបាល់ទាត់បែលហ្ស៊ិក លោក Pascale Van Damme,​ ប្រធានសហព័ន្ធកីឡាបាល់ទាត់ហូឡង់ លោក Just Spee និងប្រធានសមាគមបាល់ទាត់អាល្លឺម៉ង់ លោក Bernd Neuendorf បានប្រកាសពីការចាប់ផ្តើមដេញថ្លៃជាផ្លូវការ។

សេចក្តីថ្លែងការណ៍បានបញ្ជាក់ថា ៖«បន្ទាប់ពីការរៀបចំជាច្រើនខែ យើងទន្ទឹងរង់ចាំការបង្ហាញរបស់យើងក្នុងការធ្វើជាម្ចាស់ផ្ទះ FIFA 2027 Women’s World Cup។ យើងជឿជាក់ថា នឹងផ្តល់នូវការប្រកួតប្រកបដោយគុណភាពដែលមិនអាចប្រៀប​បានសម្រាប់ក្រុម​ចូលរួម និងអ្នកគាំទ្រមកពីជុំវិញពិភពលោក​​​»។

ការដេញថ្លៃរួមគ្នារបស់ប្រទេស​នៅ​តំបន់​អឺរ៉ុប​គឺជាផ្នែកមួយនៃការប្រជែងគ្នាចំនួន ៤ ដើម្បីធ្វើជាម្ចាស់ផ្ទះនៃការប្រកួតឆ្នាំ២០២៧ រួមជាមួយនឹងប្រទេសអាហ្វ្រិកខាងត្បូង ប្រេស៊ីល និងការដេញថ្លៃរួមគ្នាដោយម៉ិកស៊ិក និងសហរដ្ឋអាមេរិក។

ការប្រកួត FIFA Women’s World Cup ឆ្នាំ២០២៣​​ ដែល​ទើប​តែ​ចប់​​ ត្រូវបានសហម្ចាស់ផ្ទះអូស្ត្រាលី និងនូវែលសេឡង់​ដែល​មាន​​ក្រុមចំនួន ៣២ប្រទេសជាលើកដំបូង ហើ​យ​ក្រុមអេស្ប៉ាញ​បានយកឈ្នះក្រុមអង់គ្លេស​ ១-០​ ដើម្បី​ក្លាយ​ជាម្ចាស់​ជើង​ឯក​ FIFA Women’s World Cup ជាលើកដំបូង។

ចំពោះអាល្លឺម៉ង់​​ធ្លាប់ធ្វើជាម្ចាស់ផ្ទះ FIFA Women’s World Cup ម្ដងកាលពីឆ្នាំ២០១១ ពេលដែលពាន​ធ្លាក់​ទៅ​ដៃ​របស់​ក្រុមបាល់ទាត់​នារី​ជប៉ុន៕

ប្រែសម្រួល៖ មន្នីរ័ត្ន
ប្រភព៖ canberratimes.com.au

The post បែលហ្ស៊ិក ហូឡង់ និងអាល្លឺម៉ង់ រួមគ្នាដេញថ្លៃធ្វើម្ចាស់ផ្ទះបាល់ទាត់នារីពិភពលោក២០២៧ appeared first on Kampuchea Thmey Daily.

ក្រុមប្រឹក្សាកីឡាជាន់ខ្ពស់របស់រដ្ឋាភិបាល (CSD) បានព្រមានថា ខ្លួននឹងឈានជើងចូល ប្រសិនបើសហព័ន្ធបាល់ទាត់អេស្បាញ REFF បរាជ័យក្នុងការចាត់​វិធាន​ការ​ប្រឆាំងនឹង លោក Rubiales ។

Rubiales បានប្រឈមមុខនឹងការរិះគន់ បន្ទាប់ពីបានថើបកីឡាការិនី Hermoso អំឡុងពេលពិធីប្រគល់មេដាយ បន្ទាប់ពីជ័យជម្នះរបស់អេស្ប៉ាញលើក្រុមអង់គ្លេស ក្នុងវគ្គផ្តាច់ព្រ័ត្រ FIFA Women’s World Cup។

បន្ទាប់​ពី​​បុរសវ័យ ៤៦ឆ្នាំរូបនេះបានសុំទោសចំពោះអាកប្បកិរិយារបស់ខ្លួន នាយករដ្ឋមន្រ្តីរបស់ប្រទេសនេះ លោក Pedro Sanchez បាននិយាយថា “មិនគ្រប់គ្រាន់ទេ” ខណៈឧបនាយករដ្ឋមន្ត្រីទី២ លោក Yolanda Díaz បានអំពាវនាវឱ្យលោក “លាលែងពីតំណែង” ។

ឥឡូវនេះ ប្រធានក្រុមប្រឹក្សាកីឡាជាន់ខ្ពស់របស់រដ្ឋាភិបាល លោក Victor Francos បានអះអាងថា ក្រុមប្រឹក្សានឹងចូលខ្លួនចាត់ការ​ ប្រសិនបើវិធានការវិន័យមិនត្រូវបានធ្វើឡើងប្រឆាំងនឹង លោក Rubiales ។

លោក Francos បាននិយាយថា ៖«យើងមានភាពច្បាស់លាស់ជាមួយ RFEF អំពីតម្រូវការក្នុងការបើកដំណើរការដែលបង្កើតឡើងដោយច្បាប់កីឡា។ យើងមិនអាចឆ្លងកាត់ការមិនបើកដំណើរការនីតិវិធីផ្ទៃក្នុងទាំងនោះ​ទេ។ យើងនឹងរង់ចាំការដោះស្រាយរឿងនេះជាបន្ទាន់ ដែលវាមានកម្រិតខ្លាំងចំពោះមនុស្សពីរនាក់ដែលពាក់ព័ន្ធ ហើយមិនមានអ្វីច្រើនក្នុងការស៊ើបអង្កេត»។

ឥឡូវនេះត្រូវបានគេរាយការណ៍ថា ករណីនេះអាចត្រូវបានផ្ទេរទៅតុលាការរដ្ឋបាលកីឡាអេស្ប៉ាញ (TAD) បន្ទាប់ពីក្រុមប្រឹក្សាកីឡាជាន់ខ្ពស់របស់រដ្ឋាភិបាល បានទទួលពាក្យបណ្តឹងជាផ្លូវការប្រឆាំងនឹងលោក។

ក្រុមប្រឹក្សាកីឡាជាន់ខ្ពស់របស់រដ្ឋាភិបាល មានអំណាចទាមទារឲ្យដកអ្នកគ្រប់គ្រងដែលសាងភាពអាម៉ាស់ចេញ ព្រោះវាជាស្ថាប័នស្វយ័តរបស់ក្រសួងវប្បធម៌ និងកីឡា។

វាត្រូវបានគេរាយការណ៍ថា Liga F ដែលជាលីគបាល់ទាត់នារីរបស់អេស្ប៉ាញ ក៏បានដាក់ពាក្យប្តឹងទៅ CSD ដើម្បីបណ្តេញលោក Rubiales ចេញផងដែរ។ គេបានហៅសកម្មភាពនេះថាជា “ការអាម៉ាស់លើឆាកអន្តរជាតិដែលមិនធ្លាប់មានពីមុនមក”៕

ប្រែសម្រួល៖ មន្នីរ័ត្ន
ប្រភព៖ insidethegames.biz

The post ក្រុមប្រឹក្សាកីឡាអេស្ប៉ាញនឹងចូលខ្លួន បើសហព័ន្ធបរាជ័យដោះស្រាយរឿងលោក Rubiales appeared first on Kampuchea Thmey Daily.

ការយកចិត្តទុកដាក់ត្រូវបានទាក់ទាញឱ្យប្រធាន FIFA លោក Gianni Infantino ប្រើប្រាស់យន្តហោះឯកជនដើម្បីចំណាយពេលប្រាំមួយថ្ងៃពីការប្រកួតនៅកោះប៉ាស៊ីហ្វិក។

សមាជិកគណៈកម្មាធិការអូឡាំពិកអន្តរជាតិដែលនៅប្រទេសស្វីសរូបនេះត្រូវបានគេជឿថាបានធ្វើដំណើរជាង ៤០ ០០០គីឡូម៉ែត្រតាមយន្តហោះក្នុងអំឡុងពេលការប្រកួតបាល់ទាត់នារីពិភពលោក។

លោក Foster បានអះអាងថា ស្ថាប័ន FIFA បានទទួលឥទ្ធិពលពីប្រទេសអារ៉ាប៊ីសាអ៊ូឌីត ដែលសម្បូរប្រេង និងប្រទេសកាតារ សម្បូរហ្គាស ដែលបានរៀបចំការប្រកួត FIFA World Cup កាលពីឆ្នាំមុន ​ធ្វើឲ្យ​ខកខានក្នុងការបំពេញកាតព្វកិច្ចក្រោមក្របខណ្ឌសកម្មភាពអាកាសធាតុរបស់អង្គការសហប្រជាជាតិ (UN)។

លោក Foster បានពណ៌នាថា ការប្រកួតបាល់ទាត់នារីពិភពលោក នៅអូស្ត្រាលី និងនូវែលសេឡង់ ឆ្នាំ២០២៣ ថាជាឱកាស​ខកខានក្នុងការបង្កើនការប្រយុទ្ធប្រឆាំងនឹងការប្រែប្រួលអាកាសធាតុ ហើយក៏បានរិះគន់អ្នករៀបចំការប្រកួតផងដែរ។

FIFA បានចេញផ្សាយយុទ្ធសាស្រ្តនិរន្តរភាពសម្រាប់ការប្រកួតបាល់ទាត់នារីពិភពលោក ដែលគ្របដណ្តប់លើគោលដៅសង្គម សេដ្ឋកិច្ច និងបរិស្ថានសម្រាប់ការប្រកួតនេះ។

ទីតាំងទាំង ១០ របស់ខ្លួនសម្រាប់ការប្រកួតគឺ “អគារត្រូវតែបៃតង” ដែលផ្តល់មូលនិធិដល់គម្រោងកាត់បន្ថយការបំភាយឧស្ម័នផ្ទះកញ្ចក់ ក្នុងការប៉ុនប៉ងដើម្បីទូទាត់ការធ្វើដំណើររបស់ក្រុមការបំភាយឧស្ម័ន។

ការប្រកួតបាល់ទាត់នារីពិភពលោក នៅប្រទេសអូស្ត្រាលី និងនូវែលសេឡង់ គឺជាការប្រកួតដំបូងដែលមានក្រុមចំនួន៣២ ហើយធ្វើឡើងជាលើកដំបូងនៅក្នុងប្រទេសច្រើនជាងមួយ។ វាបានបញ្ចប់នៅថ្ងៃអាទិត្យ (ថ្ងៃទី២០ ខែសីហា) ដោយក្រុមនារីអេស្ប៉ាញ គ្រងជើងឯក៕

ប្រែសម្រួល៖ មន្នីរ័ត្ន
ប្រភព៖ insidethegames.biz

The post ប្រធាន FIFA រងការរិះគន់ពីការជិះយន្តហោះឯកជននៅកោះប៉ាស៊ីហ្វិក​ពេលWorld Cupនារី appeared first on Kampuchea Thmey Daily.

គ្រាប់​បាល់​ជ័យជម្នះ​របស់​ក្រុម​នារី​អេស្ប៉ាញ​បាន​កើត​ឡើង​នៅ​នាទី​២៩ ក្នុង​វគ្គ​ទី១​ដោយ​កីឡាការិនី Carmona ដែល​បាន​ក្លាយ​ជា​វីរកីឡាការិនីអេស្ប៉ាញ​ បន្ទាប់​ពីបំប៉ោង​សំណាញ់​ទី​របស់​ក្រុម​នារី​អង់គ្លេស​ដើម្បី​នាំ​មុខ ១-០។ បន្ទាប់​មក អង់គ្លេស​បាន​ដាក់​សម្ពាធ និង​សម្រុក​យ៉ាង​ខ្លាំង ប៉ុន្តែ​មិន​អាច​បំប៉ោង​សំណាញ់​ទី​របស់​អេស្ប៉ាញ​បាន​ឡើយ។

នេះ​ជា​កំណត់​ត្រា​ប្រវត្តិសាស្ត្រ​លើក​ដំបូង​សម្រាប់​ក្រុម​បាល់ទាត់​នារី​អេស្ប៉ាញ​ដែល​បាន​ឈ្នះ​ជើង​ឯក​នារី​ពិភព​លោក។

ចំណែក​ក្រុម​បាល់ទាត់​នារី​អង់គ្លេស​បាន​​​ត្រឹម​ចំណាត់​ថ្នាក់​លេខ​២​ជា​លើក​ទី២​ក្នុង​ប្រវត្តិសាស្ត្ររ​របស់​ខ្លួន បន្ទាប់​ពី​​ធ្លាប​បាន​ជើង​ឯក​រង​​លើក​ទី១​​កាល​ពី​​ឆ្នាំ២០១៥។ ដោយ​ឡែក​ចំណាត់​ថ្នាក់​លេខខ​៣​​បាន​ទៅ​ក្រុមនារីស៊ុយអែត បន្ទាប់​ពី​បាន​យក​ឈ្នះ​ក្រុម​នារី​ម្ចាស់​ផ្ទះ​អូស្ត្រាលី ២-០។

ប្រាក់​រង្វាន់ និង​ពាន​រង្វាន់

• ក្រុម​ជើង​ឯក៖ នារី​អេស្ប៉ាញ ទទួល​បាន​ប្រាក់​រង្វាន់​១០,៥​លានដុល្លារ​អាមេរិក
• ជើងឯករង៖ ក្រុម​នារី​អង់គ្លេស ទទួល​បាន​ប្រាក់​រង្វាន់៧​,៥​លាន​ដុល្លារ​អាមេរិក
• លេខ​៣៖ ក្រុម​នារី​ស៊ុយអែត ទទួល​បាន​ប្រាក់​រង្វាន់៦​,៧៥​លាន​ដុល្លារ​អាមេរិក
• លេខ៤៖ ក្រុម​អូស្ត្រាលី ទទួល​បាន​ប្រាក់​រង្វាន់៦,២៥​លាន​ដុល្លារ​អាមេរិក
• ស្បែកជើងមាស​បានទៅកីឡាការិនីជប៉ុន Hinata Miyazawa ស៊ុតបាន៥​គ្រាប់
• កីឡាការិនី​ល្អ​ប្រចាំ​ព្រឹត្តិការណ៍​គឺ Aitana Bonmati របស់​អេស្ប៉ាញ
• កីឡាការិនី​វ័យ​ក្មេងល្អ​ជាង​គេគឺ​ Salma Paralluelo របស់​អេស្ប៉ាញ
• អ្នកចាំទី​ល្អ​ជាង​គេ​គឺ Mary Earps របស់​អង់គ្លេស
• ក្រុម Fair Play គឺ ក្រុម​នារីជប៉ុន

អត្ថបទ៖ វីរបុត្រ

The post អបអរសាទរ! ក្រុមនារីអេស្ប៉ាញឈ្នះជើង​ឯកពិភពលោកនារីលើកដំបូង appeared first on Kampuchea Thmey Daily.

រឿងគួរឲ្យចាប់​អារម្មណ៍​ ក្រុមមកពីតំបន់អាហ្រិ្វក​៣ក្រុមគឺ នីហ្សេរីយ៉ា អាហ្រិកខាងត្បូង និងម៉ារ៉ុក បានឡើងដល់វគ្គ ១៦ក្រុមចុងក្រោយ ប៉ុន្តែ​គួរឲ្យសោកស្តាយក្រុមទាំង​៣មិនអាចបន្តទៅវគ្គ៨ចុងក្រោយ​ឡើយ​ក្នុង​ព្រឹត្តិការណ៍​បាល់ទាត់​នារី​ជើង​ឯក​ពិភព​លោក​ឆ្នាំ​២០២៣។

ទោះបី​ជាមិន​អាច​ឡើងទៅវគ្គបន្តក្តី ក៏​ក្រុមក្នុងតំបន់អាហ្វ្រិក ៣ក្រុមនេះ​បាន​ធ្វើឲ្យអ្នកគាំទ្រ​ភ្ញាក់ផ្អើល​ខ្លាំង ដោយសារ​ការ​ឡើង​ដល់​១៦ក្រុមចុងក្រោយ​ជា​កំណត់​ត្រា​ដ៏​ល្អ​របស់​ពួក​គេ។

វគ្គសន្សំពិន្ទុក្នុងពូល ក្រុមបាល់ទាត់នារី នីហ្សេរីយ៉ា​ បាន​ឆ្លងកាត់ ៣ប្រកួត​គឺ​ឈ្នះ​១ ស្មើ ២​ មាន​៥ពិន្ទុ ឈរ​លេខ​២​ក្នុង​ពូល  ហើយក្រុម​ម្ចាស់​ផ្ទះ​អូស្រ្តាលី​ឈរលេខ១ក្នុងពូល B។

ចំពោះក្រុម អាហ្រិ្វកខាងត្បូង ស្ថិតក្នុងពូល G ជាមួយក្រុមខ្លាំងៗរួមមាន ស៊ុយអែត អ៊ីតាលី និង អាហ្សង់ទីន។​ ឆ្លងកាត់៣ប្រកួត ក្នុងវគ្គសន្សំពិន្ទុក្នុងពូល ក្រុម​នារីអាហ្រិ្វកខាងត្បូង ឈរលេខ ២ ដោយឈ្នះ១ ស្មើ១ និងចាញ់១ មាន ៤ពិន្ទុ។ វាជារឿងដែលមិនគួរឲ្យជឿថា ក្រុម អាហ្វ្រិកខាងត្បូងអាចឡើងវគ្គបន្តបាន។ ចំណែក​ក្រុម​នារី ម៉ារ៉ុក ស្ថិតក្នុងពូល H ជាមួយក្រុម អាឡឺម៉ង់ កូឡុំប៊ី និង កូរ៉េខាងត្បូង។​ ឆ្លង់កាត់ ៣ប្រកួត ក្នុងវគ្គសន្សំពិន្ទុក្នុងពូល ម៉ារ៉ុក ឈរលេខ ២ ដោយឈ្នះ២ ចាញ់១ មាន៦ពិន្ទុ។

ដោយ​ឡែក្រុម​បាល់ទាត់​នារី​ពីតំបន់​អាស៊ី​មាន​តែ​២​ប៉ុណ្ណោះ​ដែល​បាន​កៅអីនៅ​វគ្គ​១៦​ក្រុម​ចុង​ក្រោយ​គឺ​ម្ចាស់​ផ្ទះ​អូស្ត្រាលី និង​ជប៉ុន ហើយ​ក្រុម​ទាំងពីរ​​ធ្វើ​បាន​ល្អ​​បន្ត​ទៀត​​ដោយ​បាន​ឈាន​ដល់​វគ្គ​៨​ក្រុម​ចុង​ក្រោយ។

ចំណែក​​ក្រុម​មក​ពី​តំបន់​អឺរ៉ុប​មាន​ច្រើន​ជាង​គេ​ក្នុង​​វគ្គ​៨​ក្រុម​ចុង​ក្រោយ​គឺអេស្ប៉ាញ ហូឡង់ ស៊ុយអែត បារាំង អង់គ្លេស និង កូឡុំប៊ី។ កាលវិភាគការប្រកួតក្នុងវគ្គ ៨ក្រុមចុងក្រោយមាន​ដូច​ខាង​ក្រោម៖

ថ្ងៃទី ១១ ខែសីហា ឆ្នាំ ២០២៣​

• ក្រុមនារី អេស្ប៉ាញ vs នារី ហូឡង់
• ក្រុមនារី ជប៉ុន vs នារី ស៊ុយអែត

ថ្ងៃទី ១២ ខែសីហា ឆ្នាំ ២០២៣

• ក្រុមនារី អូស្រ្តាលី vs នារី បារាំង
• ក្រុមនារី អង់គ្លេស vs នារី កូឡុំប៊ី

អត្ថបទ៖ ផា រតនា

The post ក្រុមអាស៊ី២ឡើងវគ្គ១/៤ ខណៈក្រុមអាហ្រិ្វកធ្លាក់អស់ត្រឹមវគ្គ១៦ក្រុមជើងឯកនារីពិភពលោក appeared first on Kampuchea Thmey Daily.