ប្រសាសន៍​ក្នុង​នាម​ប្រធានសហព័ន្ធ​កីឡា​បាល់ទាត់​អាស៊ាន លោក ខៀវ សាម៉េត បាន​លើក​ឡើង​ថា ៖«សហព័ន្ធ​បាល់ទាត់​អាស៊ាន​ផ្តល់​តម្លៃ​លើ​ស្មារតី​នៃ​សាមគ្គីភាព កិច្ច​សហប្រតិបត្តិការ និង​ការ​គោរព​គ្នា​ទៅ​វិញ​ទៅ​មក​ដែល​បញ្ជាក់​ពី​សហគម​បាល់ទាត់​សកល ស្ថិត​​ក្រោម​ការ​ដឹក​នាំ​ដ៏​ឆ្លាត​វៃ​របស់​លោកប្រធាន Gianni Infantino។ ចក្ខុវិស័យ និងការប្តេជ្ញា​ចិត្ត​របស់លោក​ប្រធាន FIFA ជា​មូលដ្ឋាន​គ្រឹះ​ដ៏​រឹង​មាំ​​នៃ​ការ​ប្រកួត និង​ពង្រីក​កាលានុវត្តភាព​សម្រាប់​ការ​អភិវឌ្ឍ​បាល់ទាត់​គ្រប់​តំបន់»។

«យើង​ខ្ញុំ​គាំទ្រ​លោក​ប្រធាន Gianni Infantino សម្រាប់អាណត្តិ​​​ថ្មី​ និង​ជឿ​ជាក់​ថា ភាព​ជា​អ្នក​ដឹក​នាំ​របស់​លោក​នឹង​បន្ត​នាំផ្លូវ​បាល់ទាត់​ឆ្ពោះ​ទៅ​រក​​សុចរិតភាព ភាពរឹងមាំ​ ការចូលរួម​ និងកំណើនប្រកបដោយនិរន្តរភាព»។ សំដី​សង្កត់​ធ្ងន់​របស់​លោក ខៀវ សាម៉េត។

ក្រោម​ការ​ដឹក​នាំ​របស់​លោក Gianni Infantino សហព័ន្ធ​កីឡា​បាល់ទាត់​អន្តរជាតិ​បាន​បន្ត​ពង្រឹក​អភិបាលកិច្ច លើក​កម្ពស់​គុណភាព និង​ឈាន​ទៅ​រក​ការ​ប្រកួត​ប្រជែង ព្រម​ទាំង​ពង្រីក​កម្មវិធី​ប្រកួត ក៏​ដូច​ជា​ព្រឹត្តិការណ៍​កាន់​តែ​ច្រើន​ទូទាំង​ពិភព​លោក។

និយាយ​ដោយ​ឡែក​តែ​តំបន់​អាស៊ាន FIFA បាន​ផ្តល់​ឳកាស​ឲ្យ​រៀប​ចំ​កម្មវិធី​ប្រកួត​សំខាន់ៗ​ជា​ច្រើន​ដូច​ជា ជើង​ឯក​ពិភព​លោកអាយុ ២៣ ឆ្នាំ FIFA U-17 World Cup កាល​ពី​ឆ្នាំ ២០២៣ និង​កិច្ច​ប្រជុំ​កំពូល FIFA Congress លើក​ទី​៧៤ ឆ្នាំ ២០២៥ និង​ជើង​ឯក​ហ្វូត​បាល​សាល​ពិភព​លោក FIFA Futsal Women’s World Cup ឆ្នាំ ២០២៥។ អ្វី​ដែល​សំខាន់​ចុង​ក្រោយ​ ពាន​រង្វាន់ FIFA ASEAN Cup។

​លោក Gianni Infantino បាន​ប្រកាស​ឈរ​ឈ្មោះ​បោះ​ឆ្នោត​ជ្រើស​រើស​ជា​ប្រធាន FIFA អាណត្តិ​ទី​៤ របស់​លោក ដែល​គ្រោង​ធ្វើ​នៅ​ឆ្នាំ ២០២៧៕

អត្ថបទ៖ វិរបុត្រ

The post ប្រធាន AFF លោក ខៀវ សាម៉េត គាំទ្រ​លោក Gianni បន្ត​ជា​ប្រធាន FIFA អាណត្តិ​ថ្មី appeared first on Kampuchea Thmey Daily.

យោងតាមការវាយតម្លៃរបស់ FIFA ដែលបានធ្វើបច្ចុប្បន្នភាពកាលពីថ្ងៃទី ០១ ខែ មេសា ឆ្នាំ ២០២៦ បានឱ្យដឹង ថា ក្រុមជម្រើសជាតិ កម្ពុជា ឡើង ៣ ចំណាត់ថ្នាក់ពីលេខ ១៨០ ទៅលេខ ១៧៧។ ដោយឡែកក្រុមនៅ អាស៊ាន ផ្សេងទៀត គឺ ទីម័រខាង​កើត​ ស្ថិតនៅលេខខ ២០០, ប្រ៊ុយណេ ស្ថិតនៅលេខ ១៩៣, ឡាវ ស្ថិតនៅលេខ ១៨៥, និង​មីយ៉ាន់ម៉ា ស្ថិតនៅលេខ ១៥៨។

ក្រុម សិង្ហបុរី ស្ថិតនៅលេខ ១៤៧, ក្រុម ហ្វីលីពីន ស្ថិតនៅលេខ ១៣៥។ ចំណែក ម៉ាឡេស៊ី វិញស្ថិតនៅចំណាត់ថ្នាក់លេខ ១៣៨, ឥណ្ឌូណេស៊ី ស្ថិតនៅចំណាតថ្នាក់លេខ ១២២, ក្រុមជម្រើសជាតិ វៀតណាម ស្ថិតនៅលេខ ៩៩ និងចុងក្រោយ ថៃ ស្ថិតនៅលេខ ៩៣។

ការឡើងចំណាត់ថ្នាក់របស់ក្រុម កម្ពុជា គឺបានធ្វើឱ្យអ្នកគាំទ្រចាប់អារម្មណ៍ជាខ្លាំង ដោយសារថ្ងៃ FIFA’s Day នៃខែ មេសា​ ក្រុមរហស្សនាមគោព្រៃមិនបានប្រកួតទាល់តែសោះ។ ហេតុផល ដែលអាចបង្ហាញពីការឡើងចំណាត់ថ្នាក់របស់ កម្ពុជា ទាំងមិនបានប្រកួតសោះ នោះគឺដោយសារ FIFA ប្រើរូបមន្តគិតចំណាត់ថ្នាក់តាមប្រព័ន្ធ “Sum”។

ប្រការនេះមានន័យ ថា ក្រុមនីមួយៗទទួលបានពិន្ទុ ឬបាត់បង់ពិន្ទុអាស្រ័យលើ លទ្ធផលប្រកួតឈ្នះ ស្មើ ឬចាញ់។ ប្រសិនបើឈ្នះទទួលបានពិន្ទុ ចាញ់បាត់បង់ពិន្ទុ ហើយប្រសិនបើមិនលេងសោះ គឺពិន្ទុនឹងនៅរក្សាដដែល។ ជាមួយគ្នានេះ គេក៏គិតលើសមត្ថភាពរបស់ក្រុមគូប្រជែង និងកម្មវត្ថុនៃការប្រកួតផងដែរ ថា តើការប្រកួតនោះជាពានផ្លូវការ ឬមិត្តភាព។

ក្រុមមិនបានលេង គឺពិន្ទុរបស់ពួកគេមិនបាត់បង់នោះទេ។ ដូច្នេះចំណាត់ថ្នាក់របស់ពួកគេ គឺឡើងចុះអាស្រ័យលើក្រុម ដែលបានលេង។ មានន័យថា បើក្រុមបានលេងទទួលបានជ័យជម្នះ នោះចំណាត់ថ្នាក់ក្រុមមិនបានលេងនឹងធ្លាក់ ហើយបើក្រុមបានលេងចាញ់ នោះក្រុមមិនបានលេងនឹងឡើងចំណាត់ថ្នាក់៕

អត្ថបទ៖ សេម កុសល

The post នេះជាមូលហេតុ កម្ពុជា ឡើង ៣ ចំណាត់ថ្នាក់ក្នុង​តារាង FIFA Ranking ទាំងមិនបានលេងសោះ appeared first on Kampuchea Thmey Daily.

កាលពីថ្ងៃទី ២៦ ខែ កញ្ញា ឆ្នាំ ២០២៥ FIFA បានរកឃើញសមាគមកីឡាបាល់ទាត់ម៉ាឡេស៊ី បានក្លែងបន្លំសញ្ជាតិកីឡាករចំនួន ៧ នាក់រួមមានកីឡាករ Gabriel Felipe Arrocha, Facundo Tomás Garcés, Rodrigo Julián Holgado, Imanol Javier Machuca, João Vitor Brandão Figueiredo, Jon Irazábal Iraurgui និង Hector Alejandro Hevel Serrano។

នៅពេលនោះមានសេចក្តីរាយការណ៍ ថា FIFA បានពិន័យ សមាគមបាល់ទាត់ម៉ាឡេស៊ី ជាប្រាក់ជាង ៤៣ម៉ឺនដុល្លារអាមេរិក និងដាក់ពិន័យកីឡាករទាំង ៧ នាក់ខាងលើ ជាទឹកប្រាក់ក្នុងម្នាក់ចំនួន ២,៥០០ ដុល្លារអាមេរិក​ម្នាក់​ៗ​ និងមិនឲ្យពួកគេពាក់ព័ន្ធជាមួយសកម្មភាពបាល់ទាត់រយៈពេល ១២ ខែ។ យ៉ាងណា FIFA ក៏បានទុកឱកាសឱ្យសមាគមបាល់ទាត់ ម៉េឡេស៊ី ប្តឹងឧទ្ធរណ៍ ដើម្បីតវ៉ាផងដែរ។

ក្រោយបន្លាយអស់រយៈពេលជាង ៣ ខែ នៅទីបំផុត FIFA បានធ្វើសេចក្តីសម្រេចអំពីការដាក់ពិន័យលើក្រុមជម្រើសជាតិ ម៉ាឡេស៊ី ផ្លូវការហើយ។ គណៈកម្មការវិន័យរបស់ FIFA បានរកឃើញ ថា សមាគមបាល់ទាត់ ម៉ាឡេស៊ី បានរំលោភមាត្រា ១៩ នៃក្រមវិន័យរបស់ FIFA (ឆ្នាំ ២០២៥) ដែលដាក់អ្នកលេង មិនមានសិទ្ធិចូលរួមប្រកួត ក្នុងការប្រកួតមិត្តភាពអន្តរជាតិកម្រិតក្រុមធំ។

FIFA បានសម្រេចដាក់ពិន័យឱ្យ ម៉ាឡេស៊ី ចាញ់ការប្រកួតមិត្តភាពទាំងអស់នៅក្នុងឆ្នាំ ២០២៥ ។ ប្រការនេះមានន័យ ថា ការប្រកួត ដែល ម៉ាឡេស៊ី ស្មើ កាបវែ ១-១, ឈ្នះ សិង្ហបុរី ២-១ និង ឈ្នះ ប៉ាឡេស្ទីន ១-០ នឹងត្រូវកំណត់ឱ្យចាញ់ ៣-០ គ្រប់ការប្រកួតទាំងអស់វិញ។ ជាមួយគ្នានេះ សមាគមបាល់ទាត់ ម៉ាឡេស៊ី នឹងត្រូវទទួលរងការពិន័យជាទឹកប្រាក់ចំនួន ១២,៥៨០ ដុល្លារអាមេរិក៕

អត្ថបទ៖ សេម កុសល

The post FIFA ចេញសេចក្តីសម្រេច ដាក់ពិន័យ ម៉ាឡេស៊ី រឿងបន្លំសញ្ជាតិកីឡាករ ៧ នាក់ផ្លូវការ appeared first on Kampuchea Thmey Daily.

ការដាក់ពិន័យនេះបានកើតឡើង បន្ទាប់ FIFA រកឃើញសមាគមបាល់ទាត់ម៉ាឡេស៊ី បានក្លែងបន្លំឯកសារចូលសញ្ជាតិរបស់កីឡាករចំនួន ៧ នាក់ ហើយក្នុងចំណោមនោះមានកីឡាករ Rodrigo Holgado ផងដែរ។ ករណីនេះ សមាគមបាល់ទាត់ម៉ាឡេស៊ី ត្រូវ​បាន FIFA ​ពិន័យ​ជាប្រាក់​ជាង ៤៣ ម៉ឺនដុល្លារ ខណៈ​កីឡាករទាំង ៧ នាក់នោះ ត្រូវហាមឃាត់មិន​ឲ្យ​មាន​សកម្មភាព​បាល់ទាត់​រយៈ​ពេល ១២ ខែ និង​ជាប្រាក់ ២៥០០​ ដុល្លារអាមេរិកក្នុងម្នាក់។

យ៉ាងណាមិញ សមាគមបាល់ទាត់ម៉ាឡេស៊ី ក៏បានធ្វើការប្តឹងឧទ្ធរណ៍ ជំទាស់វិញដែរ ប៉ុន្តែចុងក្រោយត្រូវបាន FIFA ច្រានចោលការប្តឹងឧទ្ធរណ៍នេះ។ ជំហានបន្ទាប់ ម៉ាឡេស៊ី មិនទាន់បញ្ចប់ត្រឹមនេះនោះទេ ដោយពួកគេនឹងប្តឹងទៅតុលាការអាជ្ញាកណ្តាលកីឡាបន្តទៀត ដើម្បីជំនុំជំរះរកភាពយុត្តិធម៌អំពីរឿងនេះ។

ទោះបីជា FIFA មិនទាន់បានសម្រេចអំពីការពិន័យជាផ្លូវការក៏ដោយ ប៉ុន្តែកាលពីថ្ងៃ អង្គារ៍ ទី ១១ ខែ វិច្ឆិកា កន្លងទៅ ក្លិប America de Cali បានសម្រេចចិត្ត បញ្ចប់កិច្ចសន្យារបស់កីឡាករ Holgado តែម្តង ស្របពេលកិច្ចសន្យារបស់កីឡាកររូបនេះនៅសល់លើសមួយឆ្នាំទៀត៕

ប្រែសម្រួល៖ សេម កុសល
ប្រភព៖ nst.com

The post កីឡាករ ម៉ាឡេស៊ី ម្នាក់ត្រូវក្លិបផ្តាច់កុងត្រា ក្រោយ FIFA ចោទរឿងបន្លំសញ្ជាតិ appeared first on Kampuchea Thmey Daily.

តាមការ​ចុះ MoU នេះ សហព័ន្ធ​កីឡា​បាល់ទាត់​អន្តរជាតិ និង​អាស៊ាន បាន​សម្រេច​បង្កើត​ពាន​រង្វាន់​ផ្លូវការ​មួយ​ឈ្មោះ FIFA ASEAN Cup ដែលនឹងឃើញ​​ក្រុម​បាល់ទាត់​ជម្រើស​ជាតិ​ទាំង ១១ ប្រចាំ​តំបន់​ចូល​រួម​ប្រកួតប្រជែង។

លោក Infantino ប្រធាន FIFA បាន​លើក​ឡើង​ថា ៖«ពាន​រង្វាន់​ថ្មី​នេះ​នឹង​បន្ថែម​កាន់​តែ​ល្អ​​សម្រាប់​ការ​ប្រកួត​បាល់ទាត់​នៅ​ក្នុង​តំបន់។ តាម​រយៈ​ពាន​រង្វាន់ FIFA ASEAN Cup យើងនឹង​រួប​រួម​​ប្រទេស​ទាំង​អស់ ហើយ​ពាន​នេះនឹង​ជា​ជោគជ័យ​ដ៏​ធំ​មួយ ​ដែល​ជួយ​ជម្រើស​ជាតិ​នៅ​ក្នុង​តំបន់​អាស៊ាន​កាន់​តែ​រីក​ចម្រើន ហើយ​ជួយ​គ្នា​ឲ្យ​កាន់​តែ​រីក​ចម្រើន»។

ទោះ​បី​ជា​យ៉ាង​ណា កាល​បរិច្ឆេទ​ និង​រូបមន្ត​នៃ​ការ​ប្រកួត នៅ​មិន​ទាន់​ប្រកាស​លំអិត​ឡើយ។

ប្រទេសទាំង​ ១១ នៅ​តំបន់​អាស៊ាន​ត្រូវ​ចូល​រួម​ប្រកួត​គឺ ឥណ្ឌូណេស៊ី ម៉ាឡេស៊ី ថៃ វៀតណាម សិង្ហបុរី ហ្វីលីពីន មីយ៉ាន់ម៉ា កម្ពុជា ឡាវ ប្រ៊ុយណេ និង​ ទីម័រខាងកើត។

ក្រៅ​ពី​កម្មវិធី​ប្រកួត​កម្រិត AFC និង FIFA បច្ចុប្បន្ន​តំបន់​អាស៊ាន​មាន​តែ​ពាន​រង្វាន់​ ASEAN Championship​ មួយ​ប៉ុណ្ណោះ​ ដែល​រៀបចំ​ការ​ប្រកួត​​​រាល់​ពីរ​ឆ្នាំ​ម្តង។ ដូច្នេះ FIFA ASEAN Cup គឺ​ជា​ពាន​រង្វាន់​ទី​២ សម្រាប់​ក្រុម​ជម្រើស​ជាតិ​ជម្រើស​ទី១​​​នៅ​តំបន់​អាស៊ាន៕

អត្ថបទ៖ វីរបុត្រ

The post ប្រធាន FIFA ថា ពាន FIFA ASEAN Cup ជា​ជោគជ័យ​ធំ​មួយ​ប្រចាំ​តំបន់​អាស៊ាន appeared first on Kampuchea Thmey Daily.

ប្រទេស​នៅ​តំបន់​អាស៊ាន​ចំនួន ១០ សុទ្ធ​តែ​មានបុគ្គល​ត្រូវ​បាន​ប្រកាស​តែង​តាំង​​ចូល​ក្នុង​គណៈកម្មការ​ប្រតិបត្តិ​ថ្មី ក្នុង​នោះ​កម្ពុជា​ មាន ២នាក់ ម៉ាឡេស៊ី មាន ៦នាក់ វៀតណាម មាន ៤​នាក់ សិង្ហបុរី មាន ៤​នាក់ ហ្វីលីពីន មាន ៤នាក់ ឥណ្ឌូណេស៊ី មាន ៣នាក់ មីយ៉ាន់ម៉ា មាន ៣នាក់ ឡាវ មាន៣​នាក់  ថៃ មាន ២នាក់  និង​ទីម័រ​ខាង​កើត​មាន ១នាក់។

សម្រាប់​កម្ពុជា លោក ខៀវ សាម៉េត អនុប្រធាន​សហព័ន្ធ​កីឡា​បាល់ទាត់​កម្ពុជា ត្រូវ​បាន​តែង​តាំង​​​ជា​​សមាជិក​នៃ​​«គណៈកម្មការ​​អនាគត​បាល់ទាត់» ដែល​នៅ​តំបន់​អាស៊ាន​មាន​តែ​លោក​ម្នាក់​គត់។ ចំណែក កញ្ញា យិន ម៉ារ៉ាឌី ​មន្ត្រី​ របស់​សហព័ន្ធ​កីឡា​បាល់ទាត់​កម្ពុជា ត្រូវ​បាន​តែង​តាំង​ជាសមាជិក​នៃ​«គណៈកម្មការ​ការ​ប្រកួត​បាល់ទាត់​យុវ​នារី» ហើយ​ក៏​មាន​តែកញ្ញា​ម្នាក់​គត់​នៅ​តំបន់​អាស៊ាន។

ចំណែក​លោក​ស្រី Nualphan Lamsam ប្រធាន​សមាគម​​កីឡា​បាល់ទាត់​ថៃ ត្រូវ​បាន​តែង​តាំង​ជា​ប្រធាន​គណៈកម្មការ​អភិវឌ្ឍ ដែល​​ជា​លើក​ដំបូង​សម្រាប់​ស្ត្រី​​កាន់​តួនាទីនេះ​របស់​សហព័ន្ធ​កីឡា​បាល់ទាត់​អន្តរជាតិ។

ខាង​ក្រោម​ជា​សមាសភាព​បុគ្គល​នៅ​ប្រទេស​អាស៊ាន

ម៉ាឡេស៊ី

• Hamidin Mohd Amin –  ផ្នែក​ទំនាក់ទំនង និង​ព័ត៌មាន FIFA Council & Media and Communications
• Windsor John – គ្រុបសម្រប​សម្រួល FIFA–Confederations Coordination Group
• Parusuraman Subramanian – អនុប្រធាន​ផ្នែក​សីលធម៌ , Ethics (Investigatory Chamber)
• Gurcharan Singh – គណៈកម្មការ​វេជ្ជសាស្ត្រ Medical Committee
• Sivasundaram Sithamparam – ផ្នែក​បច្ចេកវិទ្យា Technical Development & Technology, Innovation & Digital Transformation
• Suraya Yaacob – ផ្នែក​ការ​ប្រកួត​ក្រុម​ជម្រើស​ជាតិ​នារី Women’s National Team Competitions

វៀតណាម

• Trần Quốc Tuấn –គណៈកម្មការ​ប្រកួត​ក្រុម​ជម្រើសជាតិ​ National Teams Competitions Committee
• Nguyễn Văn Phú –គណៈកម្មការ​វេជ្ជសាស្ត្រ Medical Committee
• Nguyễn Thanh Hà –គណៈកម្មការ​បាល់ទាត់​នារី Women’s Football Committee
• Nguyễn Thị Mỹ Dung –គណៈកម្មការ​វិន័យ Disciplinary Committee

សិង្ហបុរី

• Abdul Salim Ahmed Ibrahim – គណៈកម្មការ​វិន័យ Disciplinary Committee
• Desmond Ong – គណៈកម្មការ​និតិកម្ម Legal Committee
• Shamsul Maidin –គណៈកម្មការ​អាជ្ញា​កណ្តាល Referees Committee
• Forrest Li – គណៈកម្មការ​ទីផ្សារ និង​ពាណិជ្ជកកម្ម Commercial & Marketing Advisory Committee

ហ្វីលីពីន

• Mariano Araneta – គណៈកម្មការក្រម​ប្រឹក្សា និង​ប្រឆាំង​ការ​រើស​អើង FIFA Council & Anti-Racism
• Guillermo Iroy Jr. – ផ្នែក​សីលធម៌ Ethics (Investigatory Chamber)
• John Gutierrez – គណៈកម្មការ​កីឡា​ហ្វូតសាល Futsal Committee
• Renee Songalia – គណៈកម្មការ​បាល់ទាត់​ឆ្នេរខ្សាច់ Beach Soccer Committee

ឥណ្ឌូណេស៊ី

• Erick Thohir – ប្រធាន គណៈកម្មការ​ភាគទុនិក​បាល់ទាត់​បុរស Men’s Football Stakeholders Committee
• Susie Kurniasih – គណៈកម្មការ​ហិរញ្ញវត្ថុ Standing & Finance Committees
• Nirmala Dewi – គណៈកម្មការ​បាល់ទាត់​អូឡាំពិក Olympic Football Committee

មីយ៉ាន់ម៉ា

• Zaw Zaw – ប្រធាន គណៈកម្មការទទួល​បន្ទុក​បាល់​ទាត់សង្គម Football Social Responsibility Committee
• Htate Kun Naung Myint Wai – គណៈកម្មការប្រកួត​បាល់ទាត់​យុវជន Youth Boys’ Competitions
• Phatkanit Srigatesook – គណៈកម្មការរ​អភិបាល់ទាត់​នារី Women’s Football Development

ឡាវ

• Kanya Keomany – គណៈកម្មលាររ​ប្រកួត​ក្លិប​នារី FIFA Council & Women’s Club Competitions
• Viphet Sihachakr – គណៈកម្មការ​ទីផ្សារ និង​ពាណិជ្ជកម្ម Commercial & Marketing Advisory
• Bounyou Sisane – គណៈកម្មការ​ប្រឆាំង​ការ​រើស​អើង Anti-Racism & Anti-Discrimination

កម្ពុជា

• កញ្ញា យិន ម៉ារ៉ាឌី – គណៈកម្មការ​ប្រកួត​បាល់ទាត់យុវតី Youth Girls’ Competitions Committee
• លោក ខៀវ សាម៉េត – គណៈកម្មការ​អនាគត​បាល់ទាត់ Future of Football Committee

ថៃ

• Nualphan Lamsam – ប្រធាន គណៈកម្មការ​អភិវឌ្ឍ Development Committee (លើក​ទី១​មាន​នារី​កាន់​តួនាទី​នេះ)
• Lertsak Pattanachaikul – សមាជិក​គណៈកម្មការ​សមាជិក​សមាគម Member Associations Committee

ទីម័រ​ខាង​កើត

• Nilton Telmo Gusmão Dos Santos – គណៈកម្មការ​ប្រឆាំង​ការ​រើស​អើង Anti-Racism & Anti-Discrimination

អត្ថបទ៖ វីរបុត្រ

The post អបអរ! FIFA តែងតាំង ជន​ជាតិ​ខ្មែរ ​២ ​នាក់ ជា​សមាជិកអាណត្តិ​ថ្មី ឆ្នាំ ២០២៥-២០២៩ appeared first on Kampuchea Thmey Daily.

កាល​ពី​ល្ងាច​មិញ (ថ្ងៃទី​៦ ខែ​តុលា) FIFA បានបង្ហាញ​ពី​ការ​​ស្រាវ​ជ្រាវ​​​ប្រភព​សំបុត្រ​កំណើត​នៃ​ជីដូន ជីតា​របស់​កីឡាករ​​បរទេស​ ៧ នាក់​ ដែល​បាន​ជាប់​ជម្រើស​ជាតិ​ម៉ាឡេស៊ី គឺ​មិន​មែន​មាន​កំណើត​នៅ​ប្រទេស​ម៉ាឡេស៊ី​ទេ ប៉ុន្តែ​សមាគម​កីឡា​បាល់ទាត់​ម៉ាឡេស៊ី បាន​ដាក់​​ជីដូន​ជីតា​របស់​ពួក​គេ​​​កើត​នៅ​ប្រទេស​ម៉ាឡេស៊ី។

ទន្ទឹម​ជា​មួយ​គ្នា​នេះ​ សមាគម​កីឡា​បាល់ទាត់​ម៉ាឡេស៊ី (FAM) បាន​បញ្ជាក់​ជា​ផ្លូវ​ការ​ថា ខ្លួន​នឹង​ប្តឹង​ជំទាស់​​​ពី​​ការសម្រេច​របស់ FIFA។ ​ខ្លួន នឹង​ដំណើរ​ការ​ស្រប​ច្បាប់​គ្រប់​ទម្រង់ ​ដើម្បី​បញ្ជាក់​ពី​ភាព​ត្រឹម​ត្រូវ​របស់​ខ្លួន។ ពួក​គេ​បាន​សង្កត់​ធ្ងន់​ថា FIFA គ្មាន​ភស្តុតាង​ច្បាស់​លាស់​សម្រាប់​ការគាំទ្រ​ដល់​ការ​ចោទ​ប្រកាន់​​លើ​ខ្លួន។

ករណី​កីឡាករ​ជម្រើស​ជាតិ​ម៉ាឡេស៊ី ៧ នាក់ត្រូវ​បាន​ធ្វើ​ការ​ស៊ើប​អង្កេត បន្ទាប់​ពី​ម៉ាឡេស៊ី បាន​ឈ្នះ​វៀតណាម ដោយ​លទ្ធផល ៤-០ កាល​ពី​ថ្ងៃ​ទី​១០ ខែ​មិថុនា ឆ្នាំ ២០២៥ ក្នុង​វគ្គ​ជម្រុះ​ជើងឯក​អាស៊ី 2027 AFC Asian Cup Qualifiers។

សហព័ន្ធ​កីឡា​បាល់ទាត់​អន្តរជាតិ បាន​រក​ឃើញ​ថា ដើម​កំណើត​របស់ ជីដូន​ជីតារបស់​កីឡាករក្លែង​ក្លាយ។ តាម​ពិត​​ដើម​កំណើត​របស់​ជីដូន​ជីតា​នៅ​ប្រទេស​អាហ្សង់ទីន អេស្ប៉ាញ ប្រេស៊ីល និង ហូឡង់ គឺ​មិន​មែន​កើត​នៅ​ម៉ាឡេស៊ី​ទេ។ FIFA បញ្ជាក់​ថា ដូច្នេះ គ្មាន​កីឡាករ​ណា​ម្នាក់​ក្នុង​ចំណោម​ ៧ ​នាក់​នោះ​មាន​សិទ្ធិ​តំណាង​ឲ្យ​ជម្រើស​ជាតិ​ម៉ាឡេស៊ី​​ឡើយ។

ឥឡូវ​ ករណី​នេះ​កំពុង​ដំណើរ​ការ​បន្ត ហើយ​អាច​ឈាន​ដល់​ទៅ​ដល់តុលាការ​​អាជ្ញា​កណ្តាល​​កីឡា (CAS)។ សហព័ន្ធ​កីឡា​បាល់ទាត់​អាស៊ី (AFC) ក៏​នឹង​ពិនិត្យ​មើល​ជុំ​វិញ​ករណី​​នេះ​បន្ថែម​ទៀត ថា​តើ​ម៉ាឡេស៊ី​បំពាន​លើ​ច្បាប់​យ៉ាង​ណា៕

ចាប់​តាំង​ពីសហព័ន្ធ​កីឡា​បាល់ទាត់​អន្តរជាតិ បាន​បង្ហាញ​ករណី​ជាសាធារណៈ​កាល​ពី​ចុង​ខែ​កញ្ញា ឆ្នាំ ២០២៥​ កីឡាករ​ទាំង ៧ នាក់​មិន​មាន​ឈ្មោះ​ក្នុង​ក្រុម​ជម្រើស​ជាតិ​ម៉ាឡេស៊ី និង​ក្លិប​របស់​ពួក​គេ​ទេ។ FIFA បាន​ពិន័យ​កីឡាករ​​ម្នាក់​ៗ​ជា​ប្រាក់ ២៥០០​ដុល្លារ និង​មិន​ឲ្យ​មាន​សកម្មភាព​បាល់ទាត់​រយៈ​ពេល ១២ ខែ ហើយ​សមាគម​​កីឡា​បាល់ទាត់​ម៉ាឡេស៊ី ត្រូវ​បាន​ពិន័យ​ជាប្រាក់​ជាង ៤៣​ម៉ឺន​ដុល្លារ។

កីឡាករ​ទាំង​៧​នាក់​

1. កីឡាករ Gabriel Felipe Arrocha (នៅ​ក្លិប Unionistas អេស្ប៉ាញ)
2. កីឡាករ Facundo Tomás Garcés (នៅ​ក្លិប Deportivo Alavés អេស្ប៉ាញ)
3. កីឡាករ Rodrigo Julián Holgado (នៅ​ក្លិប América de Cali កូឡុំប៊ី)
4. កីឡាករ​ Imanol Javier Machuca (នៅ​ក្លិប Atlético Vélez Sarsfield អាហ្សង់ទីន )
5. កីឡាករJoão Vitor Brandão Figueiredo (នៅ​ក្លិប Johor Darul Ta’zim ម៉ាឡេស៊ី)
6. កីឡាករ Jon Irazábal Iraurgui (នៅ​ក្លិប Johor Darul Ta’zim ម៉ាឡេស៊ី)
7. កីឡាករ Hector Alejandro Hevel Serrano (នៅ​ក្លិប Johor Darul Ta’zim ម៉ាឡេស៊ី)

ប្រែ​សម្រួល៖ វីរបុត្រ

The post FIFA បង្ហាញ​ការ​ភ្ញាក់ផ្អើល​​ជា​ថ្មី​ពី ​​កីឡាករ​​ជាប់​ជម្រើស​ជាតិ​ម៉ាឡេស៊ី ៧​នាក់សុទ្ធ​តែក្លែង​បន្លំ appeared first on Kampuchea Thmey Daily.

នៅ​យប់​ថ្ងៃ​ទី​២៦ ខែ​កញ្ញា ឆ្នាំ ២០២៥ សមាគម​កីឡា​បាល់ទាត់​ម៉ាឡេស៊ី សូម​បញ្ជាក់​ថា កីឡាករ​ដែល​ពាក់​ព័ន្ធ និង​សមាគម​កីឡា​បាល់ទាត់​ម៉ាឡេស៊ី​បាន​អនុវត្ត​ដោយ​សេចក្តី​ស្មោះ​ត្រង់ និង​តម្លាភាព​​​សម្រាប់​កិច្ច​ការ​នេះ។ FAM ​បាន​ផ្តល់​ឯកសារ​ទាំង​អស់ និង​​បំពេញ​តាមយន្តការ​ស្រប​ទៅ​តាម​ច្បាប់​ដែល​​​បាន​អនុញ្ញាត។

តាម​ពិត​ទៅ FIFA ធ្លាប់​បាន​ត្រួតពិនិត្យ​ពី​លក្ខណៈ​សម្បត្តិ​នៃ​កីឡាករ​ និង​បាន​ផ្តល់​ការ​អនុញ្ញាត​ផ្លូវ​ការ​​រួច​រាល់​ហើយ​ដែល​ផ្តល់​ឲ្យ​ពួក​គេ​មាន​សិទ្ធិ​ស្រប​ច្បាប់​ដើម្បី​តំណាង​ឲ្យ​ជម្រើស​ជាតិ​​ម៉ាឡេស៊ី។

ជុំវិញ​ការ​សម្រេច​ខាង​លើ FAM ​នឹង​ប្តឹង​ជំទាស់​ទៅ​សាលាឧទ្ធរណ៍ និង​ប្រើ​គ្រប់​យន្តការ ព្រម​ទាំង​នីតិវិធី​ច្បាប់​ដើម្បី​ធានា​បាន​ពី​ អត្ថប្រយោជន៍​នៃ​កីឡាករ និង​ក្រុម​បាល់ទាត់ជម្រើស​ជាតិ​ម៉ាឡេស៊ី​។

FAM ​នៅ​តែ​បន្ត​ប្តេជ្ញា​គោរព​តាម​ច្បាប់អន្តរជាតិ​ដ៏​ម៉ឺងម៉ាត់ និង​ខ្ជាប់​ខ្ជួន ព្រម​ទាំង​ការពារកេរ្តិ៍​​ឈ្មោះ​ក្រុម​ជម្រើស​ជាតិ​ម៉ាឡេស៊ី។ សមាគម​បាល់ទាត់​ម៉ាឡេស៊ី នឹង​បន្ត​ធ្វើ​ការ​ជិតស្និទ្ធ​ជា​មួយ រដ្ឋាភិបាល​ម៉ាឡេស៊ី និង​គ្រប់​ភាគី​ពាក់​ព័ន្ធ​ដើម្បី​ធានា​បាន​នូវការ​អនុវត្តប្រកប​ដោយ​តម្លាភាព និង​ស្មារតី​កីឡា។

សូមបញ្ជាក់​ថា សហព័ន្ធកីឡាបាល់ទាត់អន្តរជាតិ បានពិន័យ សមាគមកីឡាបាល់ទាត់ម៉ាឡេស៊ី និងកីឡាករចំនួន ៧ នាក់​ដោយ​បាន​ចោទ​ប្រកាន់​ពី​ការ​ក្លែងបន្លំឯកសារ ដើម្បីចូលសញ្ជាតិ​ ដែលបានបំពានលើមាត្រា ២២ នៃក្រមវិន័យរបស់ FIFA។ សមាគមបាល់ទាត់ម៉ាឡេស៊ី ត្រូវ​បាន​ពិន័យ​ជាប្រាក់​ជាង ៤៣ម៉ឺនដុល្លារ ខណៈ​កីឡាករ ៧ នាក់ មិន​ឲ្យ​មាន​សកម្មភាព​បាល់ទាត់​រយៈ​ពេល ១២ ខែ និង​ជាប្រាក់ ២៥០០​ដុល្លារម្នាក់។

កីឡាករ​ទាំង​៧​នាក់​

• ១- កីឡាករ Gabriel Felipe Arrocha (នៅ​ក្លិប Unionistas អេស្ប៉ាញ)
• ២- កីឡាករ Facundo Tomás Garcés (នៅ​ក្លិប Deportivo Alavés អេស្ប៉ាញ)
• ៣- កីឡាករ Rodrigo Julián Holgado (នៅ​ក្លិប América de Cali កូឡុំប៊ី)
• ៤- កីឡាករ​ Imanol Javier Machuca (នៅ​ក្លិប Atlético Vélez Sarsfield អាហ្សង់ទីន )
• ៥- កីឡាករJoão Vitor Brandão Figueiredo (នៅ​ក្លិប Johor Darul Ta’zim ម៉ាឡេស៊ី)
• ៦- កីឡាករ Jon Irazábal Iraurgui (នៅ​ក្លិប Johor Darul Ta’zim ម៉ាឡេស៊ី)
• ៧- កីឡាករ Hector Alejandro Hevel Serrano (នៅ​ក្លិប Johor Darul Ta’zim ម៉ាឡេស៊ី)

អត្ថបទ៖ វីរបុត្រ

The post ម៉ាឡេស៊ី បញ្ជាក់​ពី​ភាព​ត្រឹម​ត្រូវ និង​គ្រោង​​​ប្តឹង​ជំទាស់​​​ ជុំ​វិញ FIFA ដាក់ពិន័យ​ធ្ងន់​ធ្ងរ appeared first on Kampuchea Thmey Daily.