Foodpanda Archives - Kampuchea Thmey Daily

តៃវ៉ាន់បិទផ្លូវ Uber មិនឱ្យទិញយក Foodpanda ដោយខ្លាចប៉ះពាល់ដល់ការប្រកួតប្រជែង

Huon Dina — Thu, 26 Dec 2024 03:38:46 +0000

គណៈកម្មការពាណិជ្ជកម្មប្រកបដោយយុត្តិធម៌តៃវ៉ាន់ (FTC) បានប្រកាសកាលពីថ្ងៃពុធថា តៃវ៉ាន់បានបិទផ្លូវ ក្រុមហ៊ុនដឹកជញ្ជូនអាមេរិក Uber Technologies មិនឱ្យទិញយកអាជីវកម្មរបស់ក្រុមហ៊ុនកម្ម៉ង់ និងដឹកជញ្ជូនចំណីអាហារ Foodpanda នៅលើកោះនេះ ដោយបារម្ភថា វានឹងប៉ះពាល់ដល់ការប្រកួតប្រជែង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ក្រុមហ៊ុន Uber និង Foodpanda មិនទាន់ប្រតិកម្មយ៉ាងណាទេ ចំពោះការសម្រេចចិត្តនេះ ប៉ុន្តែក្រុមហ៊ុនដឹកជញ្ជូនអាល្លឺម៉ង់ Delivery Hero ដែលជាក្រុមហ៊ុនមេរបស់ Foodpanda បានឱ្យដឹងថា ក្រុមហ៊ុន Uber ប្រហែលជាអាចនឹងតវ៉ាចំពោះការសម្រេចចិត្តរបស់ FTC ឬក៏លុបចោលការទិញយករបស់ខ្លួន។

ក្នុងសន្និសីទសារព័ត៌មានកាលពីថ្ងៃពុធ FTC បាននិយាយថា ផលប៉ះពាល់អវិជ្ជមាននៃទិញយក នឹងមានច្រើនជាងអត្ថប្រយោជន៍សេដ្ឋកិច្ចទាំងមូល ហើយវិធានការកែតម្រូវ នឹងមិនអាចដោះស្រាយកង្វល់នៃការប្រកួតប្រជែងបានទេ។

អនុប្រធាន FTC លោក Chen Chih-min បានថ្លែងយ៉ាងដូច្នេះថា៖ «សម្រាប់ទីផ្សារវេទិកាដឹកជញ្ជូនម្ហូបអាហារ សម្ពាធប្រកួតប្រជែងជាចម្បងរបស់ UberEats គឺមកពី Foodpanda ។ ការទិញយក នឹងលុបបំបាត់សម្ពាធប្រកួតប្រជែងនេះ»។ UberEats សំដៅលើវេទិការបស់ Uber ដែលមានមុខងារដូច Foodpanda។

លោកបន្តទៀតថា៖ «ក្រោយការទិញយក UberEats នឹងមានឧបសគ្គតិចជាងមុនក្នុងការប្រកួតប្រជែង ដោយនឹងលើកទឹកចិត្តបន្ថែមទៀតឱ្យវាបង្កើនតម្លៃសម្រាប់អ្នកប្រើប្រាស់ និងថែមទាំងបង្កើនកម្រៃជើងសារសម្រាប់ប្រតិបត្តិករភោជនីយដ្ឋានផងដែរ»។ លោកបន្ថែមថា បើក្រុមហ៊ុនទាំង២បូកបញ្ជូលគ្នា នោះវានឹងកាន់កាប់ចំណែកទីផ្សារដឹកជញ្ជូនម្ហូបអាហាររហូតដល់ ៩០ ភាគរយ។

គួររំឭកថា ក្រុមហ៊ុន Uber និង Delivery Hero បានប្រកាសពីការទិញយក Foodpanda កាលពីខែឧសភាកន្លងទៅ ក្នុងតម្លៃព្រមពៀង ១,២៥ ប៊ីលានដុល្លារ ដោយមាន ៩៥០ លានដុល្លារជាលុយសុទ្ធ និង ៣០០ លានដុល្លារ ជាភាគហ៊ុនទើបចេញថ្មី៕

The post តៃវ៉ាន់បិទផ្លូវ Uber មិនឱ្យទិញយក Foodpanda ដោយខ្លាចប៉ះពាល់ដល់ការប្រកួតប្រជែង appeared first on Kampuchea Thmey Daily.

Uber សម្រេចកិច្ចព្រមព្រៀង ១,២ ប៊ីលានដុល្លារ គ្រប់គ្រងលើជំនួញសេវាកម្មដឹកជញ្ជូនអាហារ Foodpanda តៃវ៉ាន់

May Kunmakara — Wed, 15 May 2024 08:31:00 +0000

ក្រុមហ៊ុនដឹកជញ្ជូនអាមេរិក Uber បានចុះកិច្ចព្រមព្រៀងតម្លៃ ១,២៥ ប៊ីលានដុល្លារ ជាមួយក្រុមហ៊ុនដឹកជញ្ជូនអាល្លឺម៉ង់ Delivery Hero ដោយនឹងគ្រប់គ្រងលើជំនួញសេវាកម្មដឹកជញ្ជូនម្ហូបអាហារកម្មង់តាមអនឡាញ Foodpanda នៅកោះតៃវ៉ាន់។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។

ក្រោមកិច្ចព្រមព្រៀងថ្មីស្រឡាងនេះ ក្រុមហ៊ុន Uber នឹងកាន់កាប់អាជីវកម្ម Foodpanda នៅតៃវ៉ាន់ក្នុងតម្លៃ ៩០០ លានដុល្លារជាសាច់ប្រាក់ និងទិញ ភាគហ៊ុនថ្មីចំនួន ៣០០ លានដុល្លារ របស់ Delivery Hero ដែលជាក្រុមហ៊ុនមេរបស់ Foodpanda។

ក្រុមហ៊ុនអាមេរិកដដែល រំពឹងថា ការទិញយកនឹងធ្វើឱ្យខ្លួនទទួលបានប្រាក់ប្រចាំឆ្នាំ ១៥០ លានដុល្លារបន្ថែមពីលើប្រាក់ចំណេញស្នូលនៃអាជីវកម្មដឹកជញ្ជូនរបស់ខ្លួន ក្នុងរយៈពេល១ឆ្នាំនៃការបិទកិច្ចព្រមព្រៀង ទំនងជានៅឆមាសទី១នៃឆ្នាំ ២០២៥។

គួរគូសបញ្ជាក់ថា កិច្ចព្រមព្រៀងរវាងក្រុមហ៊ុនដឹកជញ្ជូនទាំង២ ធ្វើឡើងខណៈក្រុមហ៊ុនដឹកជញ្ជូនម្ហូបអាហារនៅអាស៊ីជាច្រើន កំពុងប្រឈមមុខនឹងកម្រិតចំណូលស្ដួចស្តើង ដោយសារតែការចំណាយខ្ពស់លើការបញ្ចុះតម្លៃ និងការផ្សព្វផ្សាយផ្សេងៗ ដើម្បីរក្សាអ្នកប្រើប្រាស់ដែលក្បិតក្បៀតការចំណាយដោយសារតែអតិផរណា និងសម្ភាធតម្លៃនៃការរស់នៅ ទោះបីជាសេវាកម្មដឹកជញ្ជូនបានស្ទុះងើបឡើងវិញក្រោយវិបត្តិកូវីដក្ដី។

ទ្វីបអាស៊ី បានក្លាយជាទីផ្សារដ៏ធំសម្រាប់ក្រុមហ៊ុន Delivery Hero បន្ទាប់ពីក្រុមហ៊ុននេះសម្រេចបានកិច្ចព្រមព្រៀង ៤ ប៊ីលានដុល្លារនៅកូរ៉េខាងត្បូងក្នុងឆ្នាំ ២០១៩។ យ៉ាងណាមិញ ក្រុមហ៊ុនបាន និងកំពុងព្យាយាមដកទ្រព្យមួយចំនួនរបស់ខ្លួនចេញពីតំបន់ ដើម្បីបង្កើនប្រាក់ចំណេញ។

ជុំវិញកិច្ចព្រមព្រៀងថ្មីជាមួយក្រុមហ៊ុន Uber នាយកប្រតិបត្តិ និងជាសហស្ថាបនិកនៃក្រុមហ៊ុន Delivery Hero លោក Niklas Ostberg បាននិយាយក្នុងសេចក្តីថ្លែងការណ៍ថា៖ «យើងត្រូវផ្តោតលើធនធានរបស់យើងលើផ្នែកផ្សេងៗទៀតនៃអាជីវកម្មសកលរបស់យើង ដែលយើងមានអារម្មណ៍ថាយើងអាចមានឥទ្ធិពលធំបំផុតសម្រាប់អតិថិជន អ្នកលក់ និងអ្នកជិះ»។

កន្លងមក ក្រុមហ៊ុន Delivery Hero ក៏ចង់លក់អាជីវកម្ម Foodpanda របស់ខ្លួននៅក្នុងទីផ្សារអាស៊ីអាគ្នេយ៍មួយចំនួន ដើម្បីរៀបចំរចនាសម្ព័ន្ធឡើងវិញ។ យ៉ាងណាមិញ ក្រុមហ៊ុនបាននិយាយកាលពីខែកុម្ភៈថា ខ្លួនបានបញ្ចប់ការពិភាក្សាលើការលក់នៃប្រតិបត្តិការទាំងនោះហើយ៕

The post Uber សម្រេចកិច្ចព្រមព្រៀង ១,២ ប៊ីលានដុល្លារ គ្រប់គ្រងលើជំនួញសេវាកម្មដឹកជញ្ជូនអាហារ Foodpanda តៃវ៉ាន់ appeared first on Kampuchea Thmey Daily.

ធនាគារ ABA និង foodpanda សហការភ្ជាប់ប្រព័ន្ធ ដើម្បីផ្ដល់ភាពងាយស្រួល

អ៊ិន ពិសី — Wed, 10 Jan 2024 10:30:00 +0000

ABA ដែលជាធនាគារផ្ដល់សេវាហិរញ្ញវត្ថុឌីជីថលឈានមុខនៅកម្ពុជា និងក្រុមហ៊ុន foodpanda ដែលជាក្រុមហ៊ុនដឹកជញ្ជូនអាហារឈានមុខនៅកម្ពុជា សហការណែនាំមធ្យោបាយទូទាត់បែបឌីជីថល តាម ABA PAY ទៅក្នុងអេប foodpanda ដើម្បីផ្ដល់ភាពងាយស្រួល និងបទពិសោធទូទាត់ប្រាក់កាន់តែចំណេញជូនអតិថិជន។

ខណៈអតិថិជន ABA រាប់លាននាក់ និយមទូទាត់ដោយផ្ទាល់ពីស្មាតហ្វូនរបស់ពួកគាត់ ABA PAY បានក្លាយជាការបន្ថែមដ៏ប្រសើរមួយ ទៅក្នុងជម្រើសទូទាត់ប្រាក់ដែលមាននៅក្នុងអេប foodpanda ដូចជាសាច់ប្រាក់ និងកាតឥណពន្ធ/កាតឥណទាន។

ការភ្ជាប់ប្រព័ន្ធ ABA PAY ធ្វើឲ្យអតិថិជន ABA ទូទាត់ប្រាក់សម្រាប់ការកម្មង់របស់ពួកគេនៅលើអេប foodpanda កាន់តែងាយស្រួល។ ប្រតិបត្តិការនីមួយៗត្រូវបានការពារដោយសុវត្ថិភាព និងទាមទារការអនុញ្ញាតប្រតិបត្តិការជាមួយលេខកូដ PIN របស់ ABA Mobile។

ពិធីដាក់ដំណើរការ ABA PAY ទៅក្នុងអេប foodpanda ត្រូវបានប្រព្រឹត្តទៅនៅការិយាល័យកណ្ដាល foodpanda។ ពិធីនេះ ត្រូវបានអញ្ជើញចូលរួមដោយអ្នកតំណាងជាន់ខ្ពស់របស់ក្រុមហ៊ុនទាំងពីរ ក្នុងនោះមានលោក Zokhir Rasulov នាយកឌីជីថល ABA និងលោក Achaya BC អ្នកគ្រប់គ្រងប្រចាំប្រទេសនៃ foodpanda Cambodia។

លោក Zokhir Rasulov បានអធិប្បាយក្នុងឱកាសនោះថា “យើងខ្ញុំមានសេចក្ដីសោមនស្ស ក្នុងការប្រកាសអំពីភាពជាដៃគូយុទ្ធសាស្ដ្រជាមួយ foodpanda ជាក្រុមហ៊ុនដឹកជញ្ជូនអាហារឈានមុខ ដែលអតិថិជន ABA ជាច្រើនពឹងផ្អែកលើការដឹកជញ្ជូនម្ហូបអាហារប្រចាំថ្ងៃ។ ជាមួយ ABA PAY ដែលបានដាក់បញ្ចូលទៅក្នុងអេប foodpanda ឥឡូវអតិថិជនរបស់យើង អាចធ្វើការទូទាត់ប្រាក់បានយ៉ាងងាយស្រួល និងរហ័ស ព្រមទាំងលទ្ធភាពក្នុងការទទួលបានប្រូម៉ូសិន និងការបញ្ចុះតម្លៃផ្ដាច់មុខផងដែរ។”

លោកបានបន្ថែមថា “ការភ្ជាប់ប្រព័ន្ធនេះ អាចដំណើរការទៅបានដោយសារដំណោះស្រាយ ABA PayWay ដែលជាមធ្យោបាយទូទាត់ប្រាក់ឈានមុខរបស់ប្រទេស ដែលធានាដល់ប្រតិបត្តិការងាយស្រួល និងសុវត្ថិភាព។ ភាពជាដៃគូនេះ គឺគ្រាន់តែជាការចាប់ផ្ដើមប៉ុណ្ណោះ ព្រោះថា ABA និង foodpanda ប្ដេជ្ញាពង្រឹងបទពិសោធទូទាត់ប្រាក់របស់អ្នកប្រើប្រាស់បន្ថែមទៀត ជាមួយនឹងគម្រោងក្នុងការណែនាំមធ្យោបាយទូទាត់បន្ថែមនៅពេលខាងមុខ។”

លោក Achaya BC នាយកប្រចាំប្រទេសនៃ foodpanda Cambodia ក៏បានមានប្រសាសន៍ផងដែរថា “កិច្ចការចម្បងរបស់យើង គឺតែងតែផ្តោតលើការផ្តល់គុណតម្លៃជូនអតិថិជន តាមគ្រប់មធ្យោបាយទាំងអស់ដែលអាចធ្វើទៅបាន ។ ភាពជាដៃគូជាមួយ ABA PAY នេះ នឹងកាន់តែពង្រឹងដល់បេសកកម្មរបស់ foodpanda បន្ថែមទៀត ក្នុងការលើកទឹកចិត្តឲ្យអតិថិជនកាន់តែច្រើន សម្របទៅនឹងការទូទាត់ប្រាក់ឌីជីថលប្រកបដោយប្រសិទ្ធភាព និងសុវត្ថិភាព។ យើងជឿជាក់ថា ភាពជាដៃគូនេះក៏នឹងផ្តល់នូវបទពិសោធសេវាកម្មពេញលេញ និងរលូនដល់អតិថិជនរបស់យើងទាំង ABA PAY និង foodpanda ។ យើងនឹងរួមគ្នា បន្តអភិវឌ្ឍកិច្ចសហការរបស់យើង ដើម្បីបំពេញតម្រូវការរបស់អតិថិជន និងផ្តល់នូវគុណតម្លៃ និងការពេញចិត្តរបស់អតិថិជនកាន់តែប្រសើរ”។

ភាពជាដៃគូរវាង ABA និង foodpanda រួមចំណែកដល់ការអភិវឌ្ឍនៃការទូទាត់បែបឌីជីថលនៅក្នុងប្រទេសកម្ពុជា ដោយលើកកម្ពស់សង្គមដែលមិនប្រើសាច់ប្រាក់ ស្របតាមចក្ខុវិស័យរបស់កម្ពុជា សម្រាប់អនាគតឌីជីថលប្រកបដោយបរិយាបន្ន និងការតភ្ជាប់កាន់តែប្រសើរ។ តាមរយៈប្រតិបត្តិការមិនប្រើក្រដាសប្រាក់ និងការផ្តល់ជូននូវជម្រើសទូទាត់ដ៏ងាយស្រួល ប្រកបដោយសុវត្ថិភាព ភាពជាដៃគូនេះលើកទឹកចិត្តដល់ប្រជាពលរដ្ឋខ្មែរ ក៏ដូចជាបង្កើតសង្គមជាតិមួយ ដែលទូទាត់ដោយមិនប្រើក្រដាសប្រាក់។

នៅក្នុងដំណាក់កាលបន្តបន្ទាប់នៃភាពជាដៃគូនេះ ABA នឹងដាក់ចេញនូវជម្រើសការទូទាត់បន្ថែមទៀតសម្រាប់ជាអត្ថប្រយោជន៍ដល់អតិថិជន foodpanda ដូចជា មុខងារ Account On File ដែលអនុញ្ញាតឱ្យមានការទូទាត់ដោយចុចតែម្តង ដោយមិនចាំបាច់បញ្ចូលព័ត៌មានលម្អិតរបស់អតិថិជនម្តងហើយម្តងទៀត និងមុខងារ ABA KHQR ដែលផ្តល់នូវភាពងាយស្រួលកាន់តែច្រើន ក្នុងការទូទាត់ប្រាក់ពីធនាគារផ្សេងទៀតរបស់អតិថិជន ទៅកាន់គណនីអាជីវករ foodpanda ។

ជាមួយនឹងការបន្ថែមនូវមុខងារទាំងនេះ នាពេលខាងមុខ ការកុម្ម៉ង់អាហារ និងគ្រឿងទេស តាមរយៈក្រុមហ៊ុន foodpanda នឹងកាន់តែមានភាពរលូន និងជាទីពេញចិត្ត ហើយថែមទាំងពង្រឹងការប្តេជ្ញាចិត្តរបស់ដៃគូ ក្នុងការលើកកម្ពស់ការទូទាត់ដោយមិនប្រើក្រដាសប្រាក់ និងតាមបែបឌីជីថល នៅក្នុងប្រទេសកម្ពុជា៕

The post ធនាគារ ABA និង foodpanda សហការភ្ជាប់ប្រព័ន្ធ ដើម្បីផ្ដល់ភាពងាយស្រួល appeared first on Kampuchea Thmey Daily.

foodpanda ចាប់ដៃគូជាមួយ Brocco ក្នុងការដឹកជញ្ជូនអាហារសុខភាពតាមរយៈ pandasend

Sophal Tuon — Thu, 03 Nov 2022 03:59:14 +0000

foodpanda បានបន្ថែមសេវាថ្មីមួយទៀតដែលមានឈ្មោះថា pandasend ជាសេវាដឹកជញ្ជូនរហ័សទាន់ចិត្ត ដែលសិក្ត័សមសម្រាប់ហាងទំនិញ ភោជនីយដ្ឋាន អាជីវកម្ម អនឡាញ អាជីវកម្មធន់តូច និងមធ្យម ។ល។ ស្របទៅនឹងការផ្លាស់ប្តូរនៃពេលបច្ចុប្បន្ន ល្បឿន និងភាពងាយស្រួលបានក្លាយជាអាទិភាពចម្បងរបស់ pandasend និងដៃគូសហការ ក្នុងគោលបំណងនាំមកនូវភាពងាយស្រួល តម្លៃកាន់តែប្រសើរឡើង និងកាត់បន្ថយរយៈពេលដឹកជញ្ជូន។

ដោយសារតែកត្តាទាំងនេះទើប pandasend ទទួលបានការគាំទ្រ ពីដៃគូអាជីវកម្មជាច្រើន។

ក្នុងនោះមាន ប្រូខូ – Brocco ហាងប្រភេទអាហារសុខភាព Keto ដែលគ្មានជាតិស្ករ មិនប្រើប្រាស់ប៊ីចេង និង ទឹកបន្លែ ផ្លែឈើ ស្រស់ៗ ដែលមានការដឹកជូនអតិថិជនភ្លាមៗ បានធ្វើការសហការជាមួយ pandasend សម្រាប់សេវាដឹកជញ្ជូនរហ័សក្នុងគោលបំណងរក្សាគុណភាពអាហារបន្ថែមភាពងាយស្រួលដល់អាជីវកម្ម និងអតិថិជនរបស់គាត់។ សុខភាពគឺជាផ្នែកមួយដ៏សំខាន់បំផុតនៃជីវិតប្រចាំថ្ងៃរបស់យើង ជាមួយនឹងការមមាញឹកបងប្អូនមួយចំនួនប្រហែលជាមិនមានពេលគ្រប់គ្រាន់ដើម្បីរៀបចំអាហារត្រឹមត្រូវនៅទីនោះ Brocco ដើរតួសំខាន់ក្នុងការផ្តល់នូវដំណោះស្រាយរហ័ស និងមានផាសុខភាព។

សម្រាប់អតិថិជនដែលចង់់ធ្វើការកុម្ម៉ង់ លោកអ្នកអាចចូលទៅកាន់ facebook របស់ brocco ហើយប្រើប្រាស់កូដ “pandasend01” នឹងទទួលបានការរបញ្ចុះតម្លៃ ១០% ភ្លាមៗ

គួរបញ្ជាក់ផងដែរថា៖ លេខកូដនេះមានប្រសិទ្ធភាពត្រឹម រយៈពេល ២ សប្តាហ៍ ចាប់ពីថ្ងៃចេញផ្សាយអត្ថបទ និងរហូតដល់ ២ សប្តាហ៍ត្រូវបានបញ្ចប់។

សម្រាប់ម្ចាស់អាជីវកម្ម ដែលមានបំណងចង់ចូលរួមសហការ និងជាដៃគូអាជីវកម្មរបស់ pandasend- ចាប់ផ្ដើមប្រើប្រាស់ https://pandasend-kh.com ៕

foodpanda គឺជាក្រុមហ៊ុនដែលផ្ដល់ជូននៅសេវាដឹកជញ្ជូនម្ហូបអាហារ ទំនិញ និងរបស់របរប្រើប្រាស់ប្រចាំថ្ងៃដែលធ្វើឲ្យអតិថិជនកាន់តែមានភាពងាយស្រួល។

សម្រាប់អតិថិជនថ្មីដែលចង់ធ្វើការកម្ម៉ង់់ អាចធ្វើការទាញយកកម្មវិធីទូរសព្ទនៅលើ Apple App Store និង Google Play Store ហើយប្រើប្រាស់កូដ “HELLOPANDA” ដើម្បីទទួលបានការបញ្ចុះតម្លៃរហូតដល់ ៥០%៕

The post foodpanda ចាប់ដៃគូជាមួយ Brocco ក្នុងការដឹកជញ្ជូនអាហារសុខភាពតាមរយៈ pandasend appeared first on Kampuchea Thmey Daily.

foodpanda មានវត្តមានក្នុងពិព័រណ៌ការងារដ៏ធំនៅសាលកោះពេជ្រឆ្នាំនេះ!

deth leng — Sun, 30 Oct 2022 02:51:39 +0000

ក្រោយពីបានចុះអនុស្សារណៈនៃការយោគយល់គ្នារវាងក្រុមហ៊ុនដឹកជញ្ជូនអាហារ foodpanda ក្រសួងការងារ និងបណ្ដុះបណ្ដាលវិជ្ជាជីវៈកាលពីថ្ងៃទី១១ ខែ តុលា ឆ្នាំ២០២២ រួចមក ក្រុមហ៊ុនបានចូលរួមតាំងពិពរណ៍ការងារ ក្នុងនាមជាម្ចាស់ឧបត្ថម្ភគាំទ្រដ៏សំខាន់មួយ ក្នុងពិព័រណ៌ការងារថ្នាក់ជាតិ ប្រចាំឆ្នាំមួយនេះ។

ពិព័រណ៍ការងារ និងផលិតភាពជាតិ ឆ្នាំ២០២២ បានចាប់ធ្វើឡើងនៅថ្ងៃទី២៨និង២៩ខែ តុលា ឆ្នាំ២០២២ នៅសាលមហោស្រពកោះពេជ្រ ដែលធ្វើឡើងក្នុងន័យចូលរួមចំណែកក្នុងការផ្តល់ឱកាសការងារដល់បងប្អូនខ្មែរយើង និងអភិវឌ្ឍធនធានមនុស្សនៅក្នុងប្រទេសកម្ពុជាផងដែរ។

ក្រៅពីចូលរួមជាម្ចាស់ឧបត្ថម្ភ ក្រុមហ៊ុន foodpanda ក៏បានដាក់ស្ដង់ដ៏ធំមួយ ដើម្បីជួប និងស្វែងរកបុគ្គលិកពេញម៉ោងមានសមត្ថភាព និងដៃគូដឹកជញ្ជូនបន្ថែមចូលមកធ្វើការ ក៏ដូចជាសហការជាមួយ foodpanda ដែរ។

នៅស្ដង់នោះ អ្នកទាំងអស់គ្នាក៏អាចចូលមកសួរនាំនូវព័ត៌មានទូទៅទាក់ទងនឹងឱកាសការងារ និងអាចយក CV មកដាក់ ហើយចូលសម្ភាសន៍ការងារភ្លាមៗបានទៀត។ មិនតែប៉ុណ្ណោះពួកគេក៏មានជាការបង្វិលកងផ្សងសំណាង ល្បែងកំសាន្ដផ្សេងៗដើម្បីឈ្នះរង្វាន់យ៉ាងច្រើនពី foodpanda ថែមទាំងមានឱកាសទទួលបានគូប៉ុងបញ្ចុះតម្លៃ កាដូ និងវត្ថុអនុស្សាវរីយ៍ជាច្រើនផងដែរ។

បន្ថែមពីលើការផ្ដល់ព័ត៌មាន និង ការជ្រើសរើសបុគ្គលិក foodpanda ក៏បានចាប់យកឱកាសដ៏ល្អនេះ ដើម្បីផ្សព្វផ្សាយបន្ថែមពីសេវាកម្ម និងប្រ៊េនរបស់ខ្លួនឲ្យកាន់តែធំទូលាយជាងមុន ជាការជម្រុញឲ្យមានអតិថិជនប្រើប្រាស់សេវាកម្មដឹកជញ្ជូនអាហារ ក៏ដូចជាសេវាកម្មដឹកជញ្ជូនរបស់ប្រើប្រាស់ប្រចាំថ្ងៃ និងសេវាកម្ម pick-up (កុម្ម៉ង់តាម foodpanda តែទៅយកនៅហាងផ្ទាល់) កាន់តែច្រើនជាងមុន។

foodpanda ក៏មានកម្មវិធីពិសេសៗជារៀងរាល់សប្តាហ៍ជាមួយការទិញមួយថែមមួយ ការបញ្ចុះតម្លៃជាច្រើន ការដឹកជញ្ចូនដោយឥតគិតថ្លៃ និងប្រូម៉ូសិនជាច្រើនទៀត។ សូមកុម្មង់តាមfoodpandaទាំងអស់គ្នាដើម្បីទទួលបាន ការផ្តល់ជូនពិសេសៗជាច្រើនទៀត។

សម្រាប់ព័ត៌មានបន្ថែមសូមទំនាក់ទំនង មកកាន់គេហទំព័រហេ្វសប៊ុកផ្លូរការរបស់ foodpanda (KH) តាមរយះតំណរនេះ https://www.facebook.com/foodpandaCambodiaKH ឬទំនាក់ទំនងចុះឈ្មោះជាដៃគូដឹកជញ្ជូនក្រុមហ៊ុន foodpanda តាមរយៈ https://rider.foodpanda.com.kh/៕

The post foodpanda មានវត្តមានក្នុងពិព័រណ៌ការងារដ៏ធំនៅសាលកោះពេជ្រឆ្នាំនេះ! appeared first on Kampuchea Thmey Daily.

យុវជនកម្ពុជាជាង ១ ពាន់នាក់ ទទួលបានឱកាសការងារ ជាមួយក្រុមហ៊ុនដឹកជញ្ជូនអាហារ Foodpanda

Din Thary — Tue, 11 Oct 2022 10:49:49 +0000

អ្នកតំណាងរបស់ក្រុមហ៊ុន Foodpanda បានគូសបញ្ជាក់ឲ្យដឹងថា បច្ចុប្បន្ននេះ ម៉ាកយីហោ Foodpanda ត្រូវបានមហាជនប្រើប្រាស់នៅក្នុងប្រទេសចំនួន ១៤ នៅទូទាំងទ្វីបអាស៊ី ក្នុងការបម្រើសេវាសាធារណៈអនឡាញ និងសេវាកម្មដឹកជញ្ជូន។ ការឲ្យដឹងបែបនេះ តាមរយៈពិធីចុះអនុស្សរណៈនៃការយោគយល់គ្នា (MOU) រវាងក្រសួងការងារ និងបណ្ដុះបណ្ដាលវិជ្ជាជីវៈ និងក្រុមហ៊ុនឌីលីវើរី ហេរ៉ូ (Foodpanda)។

តំណាងរបស់ក្រុមហ៊ុន Foodpanda បានឲ្យដឹងថា Foodpanda ជាយីហោចែកចាយអាហារ និងគ្រឿងទេសនានា ដែលកម្មសិទ្ធិរបស់ក្រុមហ៊ុន Delivery Hero ដែលមានទីស្នាក់ការកណ្ដាលនៅទីក្រុងប៊ែរឡាំង ប្រទេសអាល្លឺម៉ង់។ ក្រុមហ៊ុនបានឈានជើងចូលទីផ្សារកម្ពុជា ដោយបានចុះបញ្ជីស្របច្បាប់ជាមួយក្រសួងពាណិជ្ជកម្មកាលពីថ្ងៃទី២៤ ខែតុលា ឆ្នាំ២០១៩ កន្លងទៅនេះ។

ចំពោះវត្តមានរបស់ Foodpanda បានសម្រួលឱ្យភោជនីយដ្ឋាន និងម្ចាស់ហាងដៃគូនានា អាចបង្ខិតគ្រឿងទេស និងម្ហូបអាហារទៅជិតអតិថិជន តាមរយៈការប្រព័ន្ធបច្ចេកវិទ្យាបដិវត្តឧស្សាហកម្មជំនាន់ទី៤។

លោក អ៊ិត សំហេង រដ្ឋមន្រ្តីក្រសួងការងារបានថ្លែងថា ការមកវិនិយោគនៅកម្ពុជារបស់ក្រុមហ៊ុន បានជួយបង្កើនឱកាសការងាររបស់យុវជនដែលកំពុងបម្រើការងារនៅក្នុងក្រុមហ៊ុនប្រមាណជាង ១ ពាន់នាក់។

បើតាមលោករដ្ឋមន្រ្តី នៅក្នុងការបិទខ្ទប់ដោយសារការគំរាមកំហែងដោយកូវីដ-១៩ ក្រុមហ៊ុន Foodpanda បានដើរតួនាទីយ៉ាងសំខាន់ក្នុងការដឹកជញ្ជូនម្ហូបអាហារសម្រាប់ផ្គត់ផ្គង់ដល់ពលរដ្ឋនៅក្នុងរាជធានីភ្នំពេញបានយ៉ាងល្អ។ ហើយលោកក៏បានបន្តឲ្យ ខាងក្រុមហ៊ុន រៀបចំកម្មវិធីលើកទឹកចិត្តចំពោះអ្នកដឹកជញ្ជូនឆ្នើម ពោលគឺបុគ្គលិកដឹកជញ្ជូនដែលគិតគូគោរពច្បាប់ចរាចរណ៍ បរិស្ថាន និងរកប្រាក់ចំណូលសម្រាប់ផ្គត់ផ្គង់ជីវភាពក្នុងគ្រួសារ នឹងបានលើកទឹកចិត្តដល់ក្រុមហ៊ុនឲ្យពង្រីកសាខារបស់ខ្លួនឲ្យបានច្រើន ដើម្បីបង្កើនឱកាសការងារដល់យុវជន និងផ្គត់ផ្គង់ម្ហូបអាហារដល់ពលរដ្ឋនៅតាមបណ្តាខេត្តមួយចំនួនទៀត៕

ដោយ៖ ឌឿនចាន់ ថារី

The post យុវជនកម្ពុជាជាង ១ ពាន់នាក់ ទទួលបានឱកាសការងារ ជាមួយក្រុមហ៊ុនដឹកជញ្ជូនអាហារ Foodpanda appeared first on Kampuchea Thmey Daily.

ដៃគូដឹកជញ្ជូន foodpanda អស់កង្វល់រឿងបញ្ហាសាំងឡើងថ្លៃ ព្រោះតែ SUNRA និង MIKU

Sorn Phanith — Fri, 15 Jul 2022 11:30:00 +0000

នាថ្ងៃទី១៥ ខែកក្កដា ឆ្នាំ២០២២ ក្រុមហ៊ុនដឹកជញ្ជូនម្ហូបអាហារឈានមុខគេនៅកម្ពុជា foodpanda បានចុះកិច្ចព្រមព្រៀងជាដៃគូជាមួយ SUNRA និង MIKU ដែលជាក្រុមហ៊ុនផ្គត់ផ្គង់ម៉ូតូអគ្គិសនីទំនើបធំមួយនៅកម្ពុជា។

កិច្ចសហការជាដៃគូនេះ ធ្វើឡើងក្នុងគោលបំណងជួយសម្រួលដល់ការកាត់បន្ថយថ្លៃចំណាយរបស់ដៃគូដឹកជញ្ជូន ខណៈពេលដែលតម្លៃប្រេងឥន្ធនៈកំពុងកើនឡើងខ្ពស់។ លើសពីនេះទៀត ដៃគូទាំងសង ខាងក៏មានចក្ខុវិស័យរួមគ្នា ក្នុងការចូលរួមចំណែកថែរក្សាបរិស្ថាន ដោយលើកទឹកចិត្តដល់ដៃគូដឹកជញ្ជូន foodpanda គ្រប់រូបគួរចាប់អារម្មណ៍ និងងាកមកសាកល្បងប្រើប្រាស់ ម៉ូតូអគ្គិសនីទំនើបរបស់ SUNRA និង MIKU ក្នុងប្រតិបត្តិការប្រចាំថ្ងៃរបស់ខ្លួន។

លោកស្រី ឡាយ ស៊ីវហួង នាយកគ្រប់គ្រងផ្នែកប្រតិបត្តិការនៃក្រុមហ៊ុន foodpanda បានថ្លែងថា ៖“ដើម្បីសម្រួលលើការចំណាយរបស់ដៃគូដឹកជញ្ជូន ខណៈតម្លៃប្រេងឥន្ធនៈហាក់មិនទាន់ធ្លាក់ចុះ ពួកយើងក៏ផ្តួចផ្តើមឲ្យមានកិច្ចសហការនេះសម្រាប់ដៃគូដឹកជញ្ជូន foodpanda ក្នុងការទទួលអត្ថប្រយោជន៍ និងការសន្សំសំចៃជាច្រើន។ លើសពីនេះទៅទៀត ពួកយើងក៏ចង់ចូលរួមចំណែកក្នុងការជួយរក្សាបរិស្ថានផងដែរ។ ពួកយើងសង្ឃឹមថាភាពជាដៃគូនេះ នឹងនាំមកនូវតម្លៃជាច្រើនដល់ដៃគូដឹកជញ្ជូនរបស់ពួកយើងទាក់ទងនឹងហិរញ្ញវត្ថុ និងភាពងាយស្រួល។ មិនត្រឹមតែសម្រាប់អ្នកដែលកំពុងជាដៃគូដឹកជញ្ជូនរបស់ពួកយើងទេ ពួកយើងក៏ផ្តល់ឱកាសសម្រាប់អ្នកដែលចង់ក្លាយជាដៃគូដឹកជញ្ជូនរបស់ពួកយើង ប៉ុន្តែមិនទាន់មានយានជំនិះ ដូច្នេះពួកគាត់ក៏អាចទទួលបានការងារ និងប្រាក់ចំណូលផងដែរ”។

កញ្ញា គឹម លីណា អ្នកគ្រប់គ្រងហាងម៉ូតូអគ្គិសនី SUNRA និង MIKUបានបន្ថែមទៀតថា៖ “ការចុះអនុស្សរណៈយោគយល់គ្នាថ្ងៃនេះរវាងក្រុមហ៊ុន foodpanda និង SUNRA MIKU គឺជាការរួមចំណែកមួយ ដើម្បីជំរុញការផ្លាស់ប្ដូរមកប្រើប្រាស់មធ្យោបាយ ធ្វើដំណើរបៃតង (Green Mobility)។ ដោយឃើញថា ការលក់ដូរ Online និងដឹកជញ្ជូនទំនិញ ម្ហូបអាហារ កំពុងតែមានតម្រូវការកើនឡើងខ្លាំង ដែលមានម៉ូតូដឹកជញ្ជូនរាប់ពាន់គ្រឿងចរន្តក្នុងទីក្រុង។ ហេតុដូច្នេះការផ្លាស់ប្ដូរមកប្រើប្រាស់មធ្យោបាយធ្វើដំណើរ បៃតងជាលក្ខណៈបែបម៉ូតូអគ្គិសនី គឺជាការចូលរួមយ៉ាងសំខាន់មួយ ដើម្បីរួមចំណែកទប់ស្កាត់ការបម្រែបម្រួលអាកាសធាតុ (Climate Change) កាត់បន្ថយឧស្ម័នផ្ទះកញ្ចក់ (Green House Gas) ក៏ដូចជាកាត់បន្ថយផ្សែងពុលក្នុងទីក្រុងដែលមានផលប៉ះពាល់ ខ្លាំងដល់សុខភាពផ្លូវដង្ហើម។” កញ្ញាបានបន្តទៀតថា៖ “កាន់តែពិសេសជាងនេះទៅទៀតនោះ គឺ អ្នកដឹកជញ្ជូននឹងអាចសន្សំសំចៃថវិកាប្រចាំខែបានច្រើនអំពីការប្រើប្រាស់ម៉ូតូអគ្គិសនី ដោយថាម៉ូតូម៉ាក SUNRA និង MIKU មិនត្រូវការប្រើសាំង ឬប្តូរប្រេងម៉ាស៊ីននោះទេ។ ការជិះ 100km ប្រើអគ្គិសនីអស់ត្រឹមតែ 2.14 kwh គិតជាប្រាក់ ស្មើនឹង 1600 រៀលប៉ុណ្ណោះ!! ដូច្នេះអាចសន្សំសំចៃ ×10 ដង ប្រៀបធៀបទៅនឹងការប្រើម៉ូតូសាំងធម្មតា។ គួរបញ្ជាក់ផងដែរថាម៉ូតូអគ្គិសនី SUNRA និង MIKU ប្រើប្រាស់អាគុយប្រភេទលីចូម (lithium ion battery) ដែលមានកម្លាំងខ្លាំង និង អាយុកាលប្រើប្រាស់បានច្រើនឆ្នាំ មានល្បឿនលឿនល្មមត្រឹម 80km/ ម៉ោង ហើយការសាកថ្ម 4 ម៉ោងពេញអាចរត់បានចំងាយ 135km សមល្មមសម្រាប់ការដឹកជញ្ជូន។

ជាមួយគ្នានេះដែរ ក្រុមហ៊ុនក៏មានផ្ដល់ជូននូវតម្លៃពិសេសសម្រាប់ឱ្យដៃគូដឹកជញ្ជូន foodpanda និងជួយសម្របសម្រួលស្វែងរកដៃគូធនាគារ ដើម្បីផ្ដល់សេវាកម្មឥណទានជូនផងដែរ។ foodpanda និង SUNRA MIKU ជឿជាក់ថាភាពជាដៃគូនេះ នឹងជួយសម្រួលថ្លៃចំហាយរបស់ដៃគូដឹកជញ្ជូនរាប់ពាន់នាក់ និងសង្ឃឹមយ៉ាងមុតមាំថា ការសហការនេះនឹងរួមចំនែកលើកស្ទួយការការពារបរិស្ថានបន្ថែមទៀត។

ក្លាយជាដៃគូដឹកជញ្ជូនក្រុមហ៊ុន foodpanda ឥឡូវនេះតាមរយៈ https://rider.foodpanda.com.kh/

សម្រាប់ព័ត៌មានបន្ថែមអំពីក្រុមហ៊ុន Miku https://www.mikuev.com

The post ដៃគូដឹកជញ្ជូន foodpanda អស់កង្វល់រឿងបញ្ហាសាំងឡើងថ្លៃ ព្រោះតែ SUNRA និង MIKU appeared first on Kampuchea Thmey Daily.

អ្នកដឹកជញ្ជូន foodpanda ទទួលការបណ្តុះបណ្តាលពីមន្ត្រីជំនាញចរាចរណ៍ផ្លូវគោក

Sorn Phanith — Wed, 15 Jun 2022 10:14:13 +0000

ក្រុមហ៊ុន Delivery Hero (Cambodia) Co., Ltd [foodpanda] ប្រតិបត្តិករដឹកជញ្ជូនម្ហូបអាហារ គ្រឿងទេស និងសម្ភារៈប្រើប្រាស់ប្រចាំថ្ងៃ ឈានមុខគេនៅកម្ពុជា បានរៀបចំវគ្គបណ្តុះបណ្តាលស្តីពី “ច្បាប់ចរាចរណ៍ផ្លូវគោក” ដល់ដៃគូដឹកជញ្ជូនរបស់ខ្លួននៅ សាលអង្គរ-គីហ្សូណា (CJCC) ពីថ្ថ្ងៃទី ១៣-១៤ ខែមិថុនា ឆ្នាំ២០២២ ។

ជាលើកទីពីរហើយដែលក្រុមហ៊ុន foodpanda សហការជាមួយ ស្នងការដ្ឋាននគរបាលរាជធានីភ្នំពេញ ក្នុងការរៀបចំវគ្គបណ្តុះបណ្តាលស្តីពី “ច្បាប់ចរាចរណ៍ផ្លូវគោក“ ក្នុងគោលបំណងលើកកម្ពស់ ការយល់ដឹងពីសារៈសំខាន់នៃការអនុវត្តច្បាប់ ដើម្បីរក្សាសុវត្ថិភាពក្នុងពេលបើកបរ។ វគ្គបណ្ដុះបណ្ដាលនេះ បានធ្វើឡើងរយៈពេលពីរថ្ងៃ ដោយមានការចូលរួមពីដៃគូដឹកជញ្ជូន foodpanda ប្រមាណជាង ៦០០ នាក់ និងក្រោមការបង្ហាត់បង្ហាញដោយផ្ទាល់ពីមន្ត្រីជំនាញចរាចរណ៍ផ្លូវគោកនៃ ស្នងការដ្ឋាននគរបាលរាជធានីភ្នំពេញ។

ក្នុងពិធីប្រកាសបើកវគ្គបណ្តុះបណ្តាលនេះ លោកស្រី ឡាយ ស៊ីវហួង នាយកគ្រប់គ្រងផ្នែកប្រតិបត្តិការ នៃក្រុមហ៊ុន foodpanda មានប្រសាសន៍ថា «កម្មវិធីបណ្តុះបណ្តាលនេះបង្កើតឡើង ជារៀងរាល់ឆមាសក្នុងគោលបំណង បង្កើនសមត្ថភាពយល់ដឹងពីច្បាប់ចរាចរណ៍ជូនដល់ដៃគូដឹកជញ្ជូន ក្នុងគោលដៅរួមគ្នា លុបបំបាត់ការបំពានច្បាប់ចរាចរណ៍ កាត់បន្ថយគ្រោះថ្នាក់ចរាចរណ៍ និង ជាពិសេស រក្សាសុវត្ថិភាពក្នុងការបើកបរទាំងអស់គ្នា»។

អ្វីដែលគួរឲ្យកត់សំគាល់ផងដែរនោះ វគ្គបណ្តុះបណ្តាលស្តីពី “ច្បាប់ចរាចរណ៍ផ្លូវគោគ”នេះ ត្រូវបានយកចិត្តទុកដាក់ខ្ពស់ពីសំណាក់ ស្នងការដ្ឋាននគរបាលរាជធានីភ្នំពេញ ក្រោមការចូលរួមសហការដោយផ្ទាល់របស់ ឧត្តមសេនីយ៍ទោ ចេវ ហាក់ ស្នងការរងនៃស្នងការដ្ឋាននគរបាលរាជធានីភ្នំពេញ និងបង្រៀនដោយផ្ទាល់ពីលោកវរសេនីយ៍ទោ ពុំ សិលា និងលោកអនុសេនីយ៍ឯក សេង សុផាត មន្ត្រីជំនាញចរាចរណ៍នៃស្នងការដ្ឋាននគរបាលរាជធានីភ្នំពេញ។

ឧត្តមសេនីយ៍ទោ ចេវ ហាក់ បានមានប្រសាសន៍ថា «វគ្គបណ្តុះបណ្តាលនេះ គឺជាជំនួយពញ្ញាក់ស្មារតីបន្ថែម ដល់ក្រុមអ្នកដឹកជញ្ជូនដែលតែងតែប្រើប្រាស់ដងផ្លូវ ឱ្យបន្តការប្រុងប្រយ័ត្ន និងបន្តចូលរួមគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួន ដើម្បីចូលរួមកាត់បន្ថយគ្រោះថ្នាក់ចរាចរណ៍ដែលអាចកើតមានឡើងជាយថាហេតុ» ។

ក្រុមហ៊ុន foodpanda ប្តេជ្ញាបន្ដចូលរួមផ្សព្វផ្សាយនិងលើកកម្ពស់ការអនុវត្តច្បាប់ចរាចរណ៍ ឲ្យកាន់តែមានភាពទូលំទូលាយថែមទៀត ទៅកាន់ដៃគូដឹកជញ្ជូនទូរទាំង រាជធានីភ្នំពេញ និងតាមបណ្តាខេត្ត ក្រុងទាំង១៥ ដែល foodpanda កំពុងបំពេញប្រតិបត្តិការ ៕

សម្រាប់ព័ត៌មានបន្ថែមអំពីក្រុមហ៊ុន foodpanda សូមចូលទៅកាន់គេហទំព័រ www.foodpanda.com.kh ឬទំនាក់ទំនងចុះឈ្មោះជាដៃគូដឹកជញ្ជូនក្រុមហ៊ុន foodpanda តាមរយៈ https://rider.foodpanda.com.kh/ ។

The post អ្នកដឹកជញ្ជូន foodpanda ទទួលការបណ្តុះបណ្តាលពីមន្ត្រីជំនាញចរាចរណ៍ផ្លូវគោក appeared first on Kampuchea Thmey Daily.