កម្ពុជាគាំទ្រ IOM ចំពោះការកែលម្អប្រសិទ្ធភាពក្នុងការប្រើប្រាស់ធនធានហិរញ្ញវត្ថុ ដើម្បីជួយដល់រដ្ឋសមាជិក

Thoeun Vansong — Fri, 20 Mar 2026 02:40:15 +0000

តំណាងអចិន្ត្រៃយ៍កម្ពុជាប្រចាំការិយាល័យអង្គការសហប្រជាជាតិ ក្នុងទីក្រុងហ្សឺណែវ លោក កែ សុវណ្ណ បានបញ្ជាក់ពីការគាំទ្ររបស់កម្ពុជាចំពោះការបន្តកែលម្អប្រសិទ្ធភាពរបស់អង្គការអន្តរជាតិទេសន្តរប្រវេសន៍ (IOM) ក្នុងការប្រើប្រាស់ធនធានហិរញ្ញវត្ថុ ដើម្បីជួយដល់រដ្ឋសមាជិក។

ការបញ្ជាក់នេះ ធ្វើឡើងបន្ទាប់ពីតំណាងរបស់កម្ពុជា បានកត់សម្គាល់ឃើញអំពីការរឹតត្បិតផ្នែកហិរញ្ញវត្ថុបច្ចុប្បន្នសម្រាប់អង្គការ IOM។

ថ្លែងចូលរួមមតិយោបល់លើបទបង្ហាញសង្ខេបរបស់លោកស្រី Amy Pope អគ្គនាយិកាអង្គការ IOM នៅឯទីស្នាក់ការអង្គការ IOM នាទីក្រុងហ្សឺណែវ កាលពីថ្ងៃទី១៧ ខែមីនា ឆ្នាំ២០២៦ លោក កែ សុវណ្ណ បានសង្កត់ធ្ងន់លើសារៈសំខាន់នៃការធានាឱ្យមានធនធាន ដែលអាចព្យាករបាន និងមាននិរន្តរភាព ដើម្បីអនុញ្ញាតឱ្យ IOM អាចបន្តផ្តល់ជំនួយមនុស្សធម៌សំខាន់ៗ និងការគាំទ្រផ្នែកបច្ចេកទេសដល់រដ្ឋសមាជិក។

ក្នុងន័យនេះ លោក បញ្ជាក់ថា កម្ពុជាគាំទ្រដល់កិច្ចខិតខំប្រឹងប្រែងបន្តរបស់ IOM ក្នុងការកែលម្អប្រសិទ្ធភាព ភាពថ្លៃថ្នូរ និងការទទួលខុសត្រូវក្នុងការប្រើប្រាស់ធនធាន។

តំណាងអចិន្ត្រៃយ៍កម្ពុជា បានលើកទឹកចិត្តឱ្យ IOM បន្តធ្វើការសម្របសម្រួលអាទិភាពយុទ្ធសាស្ត្ររបស់ខ្លួនឱ្យស្របតាមតម្រូវការតំបន់ និងអាទិភាពរបស់រដ្ឋសមាជិកផងដែរ រួមទាំងបញ្ហាប្រឈម ដែលកំពុងកើតឡើង ដូចជា ការផ្លាស់ទីពាក់ព័ន្ធនឹងអាកាសធាតុ និងការផ្លាស់ទីដោយបង្ខំ។

លោក ក៏បានទទួលស្គាល់សារៈសំខាន់នៃតួនាទីរបស់អង្គការ IOM ក្នុងការដោះស្រាយការវិវត្តន៍នៃស្ថានភាពចលនាទេសន្តរប្រវេសន៍នៅក្នុងតំបន់អាស៊ី-ប៉ាស៊ីហ្វិក និងវាយតម្លៃខ្ពស់ចំពោះការផ្តល់ការគាំទ្ររបស់ IOM ដល់រដ្ឋសមាជិក ក្នុងការពង្រឹងអភិបាលទេសន្តរប្រវេសន៍ លើកកម្ពស់ការធ្វើទេសន្តរប្រវេសន៍ដែលមានសុវត្ថិភាព និងមានរបៀបរៀបរយ និងការការពារទេសន្តរប្រវេសន៍ដែលស្ថិតនៅក្នុងស្ថានភាពងាយរងគ្រោះ៕

The post កម្ពុជាគាំទ្រ IOM ចំពោះការកែលម្អប្រសិទ្ធភាពក្នុងការប្រើប្រាស់ធនធានហិរញ្ញវត្ថុ ដើម្បីជួយដល់រដ្ឋសមាជិក appeared first on Kampuchea Thmey Daily.

ប្រធាន IOM សរសើរក្រសួងការងារ លើយន្តការការពារសិទ្ធិពលករនៅក្រៅប្រទេស

អ៊ិន ពិសី — Mon, 25 Dec 2023 08:03:01 +0000

លោកស្រី Kristin Parco ប្រធានបេសកកម្មរបស់អង្គការអន្តរជាតិទេសន្តរប្រវេសន៍ (IOM) ប្រចាំកម្ពុជា បានកោតសរសើរក្រសួងការងារ និងបណ្ដុះបណ្ដាលវិជ្ជាជីវៈ ក្នុងកិច្ចការគាំពារ និងលើកកម្ពស់សិទ្ធិពលករទេសន្តរប្រវេសន៍ ដោយអះអាង ក្រសួង មានគំនិតផ្ដួចផ្ដើម និងយន្តការការពារជាច្រើន ទាំងក្នុងប្រទេស កម្រិតតំបន់ និងអន្តរជាតិ។

ថ្លែងក្នុងទិវាអន្តរជាតិសម្រាប់ទេសន្តរប្រវេសន៍ឆ្នាំ ២០២៣ កាលពីថ្ងៃទី ២២ ខែធ្នូ ឆ្នាំ ២០២៣ នាទីស្ដីការក្រសួងការងារ និងបណ្ដុះបណ្ដាលវិជ្ជាជីវៈ លោកស្រីបានឲ្យដឹងថា «…ក្រោមការដឹកនាំរបស់ក្រសួងការងារ និងបណ្ដុះបណ្ដាលវិជ្ជាជីវៈ កម្ពុជា មានវឌ្ឍនភាពគួរឱ្យកត់សម្គាល់លើវិស័យការងារ និងពលករទេសន្តរប្រវេសន៍ ដែលបានធ្វើឱ្យវិស័យនេះក្លាយជាយន្តការគន្លឹះជាអាទិភាពមួយក្នុងការលើកកម្ពស់ និងការពារសិទ្ធពលករចំណាកស្រុក។ តាមរយៈយន្តការនេះ កម្ពុជា បានលើកកម្ពស់ និងធ្វើឱ្យប្រសើរឡើងនូវជីវភាពរបស់ពលករតាមរយៈគំនិតផ្ដួចផ្ដើមជាច្រើន និងការពង្រឹងកិច្ចសហប្រតិបត្តិការតំបន់ និងអន្តរជាតិ»។

លោកស្រីបានបន្តគូសបញ្ជាក់ថា ពលករចំណាកស្រុកកម្ពុជា គឺជាកម្លាំងចលករយ៉ាងសំខាន់ក្នុងការជំរុញកំណើនសេដ្ឋកិច្ចជាតិតាមរយៈចំណូលប្រមាណ ២.២ ពាន់លានដុល្លារ ក្នុងរយៈពេល ១ ឆ្នាំៗ ខណៈ កម្ពុជា មានពលរដ្ឋចំណាកស្រុកប្រមាណ ១.៣ លាននាក់ ដែលកំពុងបម្រើការងារនៅប្រទេសថៃ កូរ៉េខាងត្បូង ជប៉ុន ម៉ាឡេស៊ី សិង្ហបុរី កោះហុងកុង និងរាជាណាចក្រអារ៉ាប៊ីសាអូឌីត។

សម្រាប់ លោកស្រី បើទោះបីជាបញ្ហាពលករចំណាកស្រុកជាបញ្ហាអន្តរជាតិ និងមានភាពស្មុគស្មាញ ប៉ុន្តែក្នុងនាម IOM និងអង្គការអន្តរជាតិ ខាងការងារ (ILO) បានត្រៀមខ្លួនរួចជាស្រេចដើម្បីគាំទ្ររាជរដ្ឋាភិបាលកម្ពុជាក្នុងការពង្រឹងការធ្វើចំណាកស្រុកដោយស្របច្បាប់៕

The post ប្រធាន IOM សរសើរក្រសួងការងារ លើយន្តការការពារសិទ្ធិពលករនៅក្រៅប្រទេស appeared first on Kampuchea Thmey Daily.

IOM Archives - Kampuchea Thmey Daily

កម្ពុជាគាំទ្រ IOM ចំពោះការកែលម្អប្រសិទ្ធភាពក្នុងការប្រើប្រាស់ធនធានហិរញ្ញវត្ថុ ដើម្បីជួយដល់រដ្ឋសមាជិក

ប្រធាន IOM សរសើរក្រសួងការងារ លើយន្តការការពារសិទ្ធិពលករ​នៅក្រៅប្រទេស

ប្រធាន IOM សរសើរក្រសួងការងារ លើយន្តការការពារសិទ្ធិពលករនៅក្រៅប្រទេស