iPhone 16 Archives - Kampuchea Thmey Daily

Apple និងឥណ្ឌូណេស៊ីព្រមព្រៀងគ្នា ដើម្បីលុបការបិទការលក់ iPhone 16

Huon Dina — Tue, 25 Feb 2025 07:32:36 +0000

សារព័ត៌មាន Bloomberg បានចុះផ្សាយនៅថ្ងៃអង្គារនេះដោយស្រង់សម្ដីប្រភពដឹងច្បាស់ពីបញ្ហាថា ក្រុមហ៊ុនបច្ចេកវិទ្យាអាមេរិក Apple និងរដ្ឋាភិបាល បានព្រមព្រៀងគ្នាលើលក្ខខណ្ឌផ្សេងៗ ដើម្បីឆ្ពោះទៅរកការលុបចោលការហាមប្រាមមិនឱ្យលក់ទូរស័ព្ទម៉ាក iPhone 16 នៅឥណ្ឌូណេស៊ី។

ប្រភពមិនបានបញ្ជាក់ថាតើភាគីបានព្រមព្រៀងគ្នាលើលក្ខខណ្ឌគ្នាអ្វីខ្លះនោះទេ ប៉ុន្តែថា ក្រសួងឧស្សាហកម្មឥណ្ឌូណេស៊ីដែលទទួលបន្ទុកលើការហាមឃាត់ គ្រោងនឹងចុះហត្ថលេខាលើអនុស្សរណៈនៃកិច្ចព្រមព្រៀងជាមួយក្រុមហ៊ុន Apple ឱ្យបានឆាប់ ក្នុងសប្តាហ៍នេះ។

ក្រោយចុះហត្ថលេខារួច ក្រសួងនឹងរៀបចំសន្និសីទកាសែត និងចេញលិខិតអនុញ្ញាតការលក់ iPhone 16 ឱ្យបានឆាប់តាមដែលអាចធ្វើទៅបាន។

គួររំឭកថា រដ្ឋាភិបាលឥណ្ឌូណេស៊ីបានចេញការហាមឃាត់ការលក់ទូរស័ព្ទម៉ាក iPhone 16 របស់ Apple កាលពីខែតុលា ឆ្នាំមុន ដោយសម្អាងថា ក្រុមហ៊ុនមិនបានវិនិយោគតាមទឹកប្រាក់ដែលខ្លួនបានសន្យា និងផលិតទូរស័ព្ទដោយមិនប្រើប្រាស់គ្រឿងគ្រៅក្នុងស្រុកឥណ្ឌូណេស៊ី ដែលច្បាប់បានកំណត់ (ត្រូវប្រើប្រាស់សមាសធាតុក្នុងស្រុក ៣៥ ភាគរយ)។

ក្រោយពីនោះមក រដ្ឋមន្ត្រីវិនិយោគរបស់ឥណ្ឌូណេស៊ីបាននិយាយថា Apple គ្រោងនឹងវិនិយោគ ១ ប៊ីលានដុល្លារនៅរោងចក្រផលិតគ្រឿងបន្លាស់សម្រាប់ស្មាតហ្វូន និងផលិតផលផ្សេងទៀតរបស់ក្រុមហ៊ុន។ ក្រៅពីការវិនិយោគនេះ ក្រុមហ៊ុន Apple ប្តេជ្ញាបណ្តុះបណ្តាលធនធានមនុស្សក្នុងស្រុកលើការស្រាវជ្រាវ និងការអភិវឌ្ឍតាមរយៈកម្មវិធីផ្សេងៗ លើសពីកម្មវិធីដែលខ្លួនធ្លាប់មានស្រាប់នាពេលកន្លងមក។

ទោះជាយ៉ាងណាក៏ដោយ Apple គ្មានគម្រោងដាក់រោងចក្រផលិតទូរស័ព្ទម៉ាក iPhone ភ្លាមៗក្នុងស្រុកឥណ្ឌូណេស៊ី នាពេលនេះនោះទេ៕

The post Apple និងឥណ្ឌូណេស៊ីព្រមព្រៀងគ្នា ដើម្បីលុបការបិទការលក់ iPhone 16 appeared first on Kampuchea Thmey Daily.

ឥណ្ឌូណេស៊ីច្រានចោលសំណើវិនិយោគ ១០០ លានដុល្លារ របស់ Apple ដើម្បីលុបបំរាមលក់ iPhone 16 ដោយទាមទារបន្ថែម

Huon Dina — Mon, 25 Nov 2024 04:42:13 +0000

រដ្ឋាភិបាលឥណ្ឌូណេស៊ី បានច្រានចោលសំណើវិនិយោគចំនួន ១០០ លានដុល្លារ របស់ក្រុមហ៊ុនបច្ចេកវិទ្យា Apple ដើម្បីលុបចោលបំរាមលក់ iPhone 16 នៅក្នុងប្រទេស ដោយទាមទារឱ្យក្រុមហ៊ុនដដែលបន្ថែមការវិនិយោគឱ្យកាន់តែធំជាងនេះទៅទៀត។ នេះបើតាមការចុះផ្សាយរបស់សារព័ត៌មាន No Musica កាលពីថ្ងៃអាទិត្យ។

រដ្ឋមន្ត្រីក្រសួងឧស្សាហកម្មឥណ្ឌូណេស៊ី លោក Agus Gumiwang Kartasasmita បានជួបជាមួយអ្នកតំណាងរបស់ក្រុមហ៊ុន Apple ហើយបានបដិសេធសំណើចុងក្រោយរបស់ពួកគេ។ អ្នកនាំពាក្យក្រសួង Febri Hendri Antoni Arif បានពន្យល់ថា ការវិនិយោគធំជាងនេះ នឹងជួយអភិវឌ្ឍវិស័យផលិតកម្មរបស់ឥណ្ឌូណេស៊ី ហើយអាចបញ្ចូលប្រទេសខ្លួនទៅក្នុងខ្សែចង្វាក់ផ្គត់ផ្គង់ពិភពលោករបស់ក្រុមហ៊ុន Apple ។

គួរគូសបញ្ជាក់ថា ភាពចម្រូងចម្រាស់រវាងក្រុមហ៊ុនបច្ចេកវិទ្យា Apple និងឥណ្ឌូណេស៊ី កើតឡើងក្រោយរដ្ឋាភិបាលឥណ្ឌូណេស៊ីបានចេញបំរាមលក់ iPhone 16 ក្នុងប្រទេសរបស់ខ្លួន ដោយលើកឡើងថា ក្រុមហ៊ុនមិនបានវិនិយោគតាមការសន្យា និងថាមិនប្រើប្រាស់គ្រឿងបន្លាស់ផលិតក្នុងស្រុកឥណ្ឌូណេស៊ីតាមការកំណត់។

តាមការរាយការណ៍ ដើមឡើយ Apple បានសន្យាវិនិយោគចំនួន ១០៩ លានដុល្លារ សម្រាប់ការស្រាវជ្រាវ និងការអភិវឌ្ឍន៍ក្នុងស្រុក ប៉ុន្តែបានវិនិយោគត្រឹមតែ ៩៥ លានដុល្លារប៉ុណ្ណោះ។ ដើម្បីជួសជុលបញ្ហានេះ ក្រុមហ៊ុនបានសន្យាវិនិយោគថ្មីបន្ថែម ១០ លានដុល្លារ និងក្រោយមកបានដំឡើងដល់ ១០០ លានដុល្លារ។

យ៉ាងណាមិញ រដ្ឋាភិបាលឥណ្ឌូណេស៊ីនៅតែទាមទារថាវាមិនគ្រប់គ្រាន់។ ក្រៅពីការដាក់បញ្ជូលឥណ្ឌូណេស៊ីទៅក្នុងខ្សែចង្វាក់ផ្គត់ផ្គង់សកលរបស់ Apple រដ្ឋាភិបាលឥណ្ឌូណេស៊ីបានស្នើឱ្យក្រុមហ៊ុនឥណ្ឌូណេស៊ីអាចផ្គត់ផ្គង់ Apple នូវគ្រឿងបន្ថែម និងឆ្នាំងសាកផ្សេងៗ។ មន្ត្រីឥណ្ឌូណេស៊ីក៏ចង់ឱ្យ Apple បង្កើតមជ្ឈមណ្ឌលស្រាវជ្រាវមួយ ដែលផ្តោតលើបញ្ញាសិប្បនិម្មិត និងបច្ចេកវិទ្យាឧស្សាហកម្ម ៤.០ ផងដែរ៕

The post ឥណ្ឌូណេស៊ីច្រានចោលសំណើវិនិយោគ ១០០ លានដុល្លារ របស់ Apple ដើម្បីលុបបំរាមលក់ iPhone 16 ដោយទាមទារបន្ថែម appeared first on Kampuchea Thmey Daily.

Apple សន្យាវិនិយោគថ្មី ១០០ លានដុល្លារនៅឥណ្ឌូណេស៊ី ដើម្បីឱ្យរដ្ឋាភិបាលទម្លាក់ចោលបំរាមលក់ iPhone 16

Huon Dina — Wed, 20 Nov 2024 02:55:28 +0000

ក្រុមហ៊ុនបច្ចេកវិទ្យាយក្សអាមេរិក Apple Inc. បានសន្យាដាក់ការវិនិយោគថ្មីរហូតដល់ ១០០ លានដុល្លារនៅឥណ្ឌូណេស៊ី ដើម្បីជាយុទ្ធសាស្រ្តយកចិត្តរដ្ឋាភិបាលប្រទេសនេះ ឱ្យដកបំរាមលក់ស្មាតហ្វូន iPhone 16 ក្នុងស្រុករបស់ខ្លួន។ នេះបើតាមការចុះផ្សាយរបស់សារព័ត៌មាន Bloomberg ដែលស្រង់សម្ដីប្រភពដឹងច្បាស់ពីបញ្ហានេះជាអនាមិក។

ការវិនិយោគ ១០០ លានដុល្លារនេះ នឹងធ្វើឡើងក្នុងរយៈពេល ២ ឆ្នាំ និងមានច្រើនជាង ១០ ដង ធៀបនឹងការសន្យាវិនិយោគកាលពីដើមខែនេះ។ បើតាមប្រភព Apple គ្រោងនឹងចំណាយការវិនិយោគលើរោងចក្រផលិតគ្រឿងបន្ថែម និងគ្រឿងបន្លាស់ សម្រាប់ឧបករណ៍របស់ខ្លួន រួមទាំងស្មាតហ្វូន ទៅទីក្រុងបានឌុង។

ប្រភពលើកឡើងថា ក្រោយក្រុមហ៊ុន Apple បានដាក់សំណើរបស់ខ្លួន ក្រសួងឧស្សាហកម្មឥណ្ឌូណេស៊ី បានសុំឱ្យក្រុមហ៊ុនបច្ចេកវិទ្យានេះកែសម្រួលផែនការវិនិយោគរបស់ខ្លួន ដោយផ្តោតលើការស្រាវជ្រាវ និងការអភិវឌ្ឍន៍សម្រាប់ស្មាតហ្វូនរបស់ខ្លួននៅក្នុងប្រទេស។ ប្រភពបន្ថែមថា ក្រសួងឧស្សាហកម្មមិនបានធ្វើការសម្រេចចិត្តចុងក្រោយ លើសំណើថ្មីបំផុតរបស់ក្រុមហ៊ុន Apple នោះទេ។

គួរគូសបញ្ជាក់ថា សំណើវិនិយោគថ្មី ធ្វើឡើងក្រោយក្រសួងឧស្សាហកម្មឥណ្ឌូណេស៊ីបានបិទការលក់ iPhone 16 ដែលជាស្មាតហ្វូនរបស់ Apple ក្នុងប្រទេសរបស់ខ្លួន ដោយសម្អាងថា ក្រុមហ៊ុនបច្ចេកវិទ្យាមិនបានវិនិយោគឱ្យគ្រប់តាមការសន្យា និងគោរពតាមគោលការណ៍ផលិតកម្ម ដែលតម្រូវឱ្យគ្រប់ស្មាតហ្វូនទាំងអស់ត្រូវមានគ្រឿងបន្លាស់ ៤០ ភាគរយ ផលិតក្នុងប្រទេសឥណ្ឌូណេស៊ី។

យោងតាមរដ្ឋាភិបាលឥណ្ឌូណេស៊ី ក្រុមហ៊ុន Apple បានវិនិយោគត្រឹមតែ ១,៥ ទ្រីលានរូពៀ (៩៥ លានដុល្លារ) ប៉ុណ្ណោះ ដែលមិនគ្រប់តាមការសន្យាប្រមាណ ១,៧ ទ្រីលានរូពៀ កាលពីលើកមុន។

សំណើវិនិយោគថ្មី បង្ហាញឱ្យឃើញថា ឥណ្ឌូណេស៊ី ដែលមានប្រជាជនសរុបជាង ២៧៨ លាននាក់ គឺជាទីផ្សារដ៏សំខាន់មួយសម្រាប់ក្រុមហ៊ុន Apple៕

The post Apple សន្យាវិនិយោគថ្មី ១០០ លានដុល្លារនៅឥណ្ឌូណេស៊ី ដើម្បីឱ្យរដ្ឋាភិបាលទម្លាក់ចោលបំរាមលក់ iPhone 16 appeared first on Kampuchea Thmey Daily.

ឥណ្ឌូណេស៊ីហាមប្រាមការលក់ iPhone 16 ក្នុងប្រទេស

Huon Dina — Mon, 28 Oct 2024 06:07:46 +0000

រដ្ឋាភិបាលឥណ្ឌូណេស៊ីបានប្រកាសហាមលើការលក់ស្មាតហ្វូន iPhone 16 ក្នុងប្រទេសរបស់ខ្លួន ដោយសម្អាងថា ក្រុមហ៊ុន Apple មិនបានបំពេញតាមការប្ដេជ្ញាវិនិយោគ។ នេះបើការចុះផ្សាយរបស់កាសែត Jakarta Globe ដោយស្រង់សម្ដីរបស់អ្នកនាំពាក្យក្រសួងឧស្សាហកម្មឥណ្ឌូណេស៊ីកាលពីចុងសប្ដាហ៍។

ប្រតិបត្តិការលក់ណាមួយនៃ iPhone 16 ដែលជាម៉ូដែលស្មាតហ្វូនទំនើបចុងក្រោយគេបង្អស់របស់ Apple ក្នុងប្រទេសឥណ្ឌូណេស៊ី គឺជាអំពើខុសច្បាប់។ យ៉ាងណាមិញ អ្នកនាំពាក្យក្រសួងឧស្សាហកម្មនិយាយក្នុងសេចក្ដីថ្លែងការណ៍ថា អ្នកដំណើរអាចនាំចូល iPhone 16 ចូលក្នុងប្រទេសឥណ្ឌូណេស៊ីសម្រាប់ការប្រើប្រាស់ផ្ទាល់ខ្លួន ដោយឆ្លងកាត់ការបង់ពន្ធ ប៉ុន្តែមិនអាចជួញដូរបាននោះទេ។

ការបញ្ជាក់របស់អ្នកនាំពាក្យធ្វើឡើងក្រោយរដ្ឋមន្ត្រីឧស្សាហកម្មឥណ្ឌូណេស៊ី លោក Agus Gumiwang Kartasasmita បានប្រកាសជុំវិញបញ្ហានេះកាលពីថ្ងៃអង្គារសប្ដាហ៍មុន ដោយថ្លែងថា៖ «ប្រសិនបើមាន iPhone 16 ណាមួយគ្រឿង ដែលអាចប្រតិបត្តិការបានក្នុងប្រទេសរបស់យើង ខ្ញុំអាចនិយាយបានថា វាជាឧបករណ៍ខុសច្បាប់។ សូមរាយការណ៍មកយើង»។ លោកបន្ថែមថា Apple មិនទាន់ទទួលបានប័ណ្ណឧបករណ៍ចល័តអន្តរជាតិ (IMEI) សម្រាប់ចរាចរណ៍ការលក់ iPhone 16 នៅឥណ្ឌូណេស៊ីនៅឡើយទេ។

រដ្ឋមន្រ្តីដដែលបានសម្អាងថា ការហាមប្រាមកើតចេញពីក្រុមហ៊ុន Apple ដែលមិនបំពេញការសន្យារបស់ខ្លួនសម្រាប់ការបណ្ដាក់ទុននៅឥណ្ឌូណេស៊ី និងការមិនបំពេញតាម «លក្ខខណ្ឌសមាសធាតុផលិតក្នុងស្រុក» របស់ឥណ្ឌូណេស៊ី។ លោកថ្លែងយ៉ាងដូច្នេះថា៖ «យើងជាក្រសួងឧស្សាហកម្ម មិនទាន់អាចចេញលិខិតអនុញ្ញាតសម្រាប់ iPhone 16 បានទេ ព្រោះការប្តេជ្ញាចិត្តនៅតែមាន ដែល Apple មិនទាន់សម្រេចបាន»។

ក្រុមហ៊ុនបច្ចេកវិទ្យាយក្សអាមេរិក Apple ដែលចាប់ផ្ដើមដាក់លក់ iPhone 16 នៅខែកញ្ញា បានសន្យាវិនិយោគសរុបជាទឹកប្រាក់ប្រមាណ ១០៩ លានដុល្លារ ក្នុងប្រទេសឥណ្ឌូណេស៊ី ប៉ុន្តែមកទល់ពេលនេះ បានវិនិយោគត្រឹមតែប្រមាណ ៩៥ លានដុល្លារប៉ុណ្ណោះ។

ការប្រកាសហាមដដែល ធ្វើឡើងក្រោយដំណើរទស្សនកិច្ចរបស់នាយកប្រតិបត្តិ Apple លោក Tim Cook ទៅកាន់ទីក្រុងហ្សាកាតា កាលពីខែមេសា។ កាលនោះ លោកបានពិភាក្សាអំពីផែនការផលិតកម្មដែលធំមួយជាមួយអតីតប្រធានាធិបតីឥណ្ឌូណេស៊ី លោក ចូកូ វីដូដូ ដោយថា ក្រុមហ៊ុន Apple កំពុងសិក្សាពីជម្រើសដាក់រោងចក្រផលិតកម្មនៅឥណ្ឌូណេស៊ី ដែលជាទីផ្សារដ៏ធំមួយក្នុងតំបន់៕

The post ឥណ្ឌូណេស៊ីហាមប្រាមការលក់ iPhone 16 ក្នុងប្រទេស appeared first on Kampuchea Thmey Daily.

iPhone 16 Archives - Kampuchea Thmey Daily

Apple និង​ឥណ្ឌូណេស៊ី​ព្រមព្រៀងគ្នា ដើម្បី​លុបការបិទការលក់ iPhone 16

ឥណ្ឌូណេស៊ី​ច្រានចោលសំណើវិនិយោគ ១០០ លាន​ដុល្លារ របស់​ Apple ដើម្បីលុបបំរាមលក់ iPhone 16 ដោយ​ទាម​ទារ​បន្ថែម​

Apple សន្យាវិនិយោគថ្មី​ ១០០ លាន​ដុល្លារ​នៅ​ឥណ្ឌូណេស៊ី​ ដើម្បី​ឱ្យ​រដ្ឋាភិបាល​ទម្លាក់ចោល​បំរាមលក់ iPhone 16

ឥណ្ឌូណេស៊ី​ហាម​ប្រាមការលក់ iPhone 16 ក្នុង​ប្រទេស​

Apple និងឥណ្ឌូណេស៊ីព្រមព្រៀងគ្នា ដើម្បីលុបការបិទការលក់ iPhone 16

ឥណ្ឌូណេស៊ីច្រានចោលសំណើវិនិយោគ ១០០ លានដុល្លារ របស់ Apple ដើម្បីលុបបំរាមលក់ iPhone 16 ដោយទាមទារបន្ថែម

Apple សន្យាវិនិយោគថ្មី ១០០ លានដុល្លារនៅឥណ្ឌូណេស៊ី ដើម្បីឱ្យរដ្ឋាភិបាលទម្លាក់ចោលបំរាមលក់ iPhone 16

ឥណ្ឌូណេស៊ីហាមប្រាមការលក់ iPhone 16 ក្នុងប្រទេស