សែន រ៉ាដេត ត្រូវបានអ្នកគាំទ្រកោតសរសើរយ៉ាងខ្លាំង បន្ទាប់ពីរូបគេបង្ហាញសក្តានុពលរបស់ខ្លួន តាមរយៈការតស៊ូប្រកួតដោយភាពអង់អាចនៅសង្វៀន Knock Out កាលពី ២ ខែ មុន ទោះការប្រកួតនោះចាញ់កីឡាករម្ចាស់ផ្ទះជប៉ុន YUKI MORIOKA ក៏ដោយ។

នៅខែ កុម្ភៈ ខាងមុខកីឡាករ នឹងទទួលបានឱកាសចេញទៅប្រកួតនៅក្រៅប្រទេសជាថ្មី ដោយនៅថ្ងៃទី ៧ ត្រូវហោះទៅ អេស្ប៉ាញ ជួបកីឡាករ Gonzalo Tebar និងនៅថ្ងៃទី ២៨ ត្រូវចេញទៅ អង់គ្លេស ដណ្តើមខ្សែក្រវាត់ ISKA ពិភពលោក ទល់នឹងកីឡាករ Fergus Smith។

ការចេញទៅដណ្តើមខ្សែក្រវាត់ ISKA ពិភពលោកនាខែ កុម្ភៈ ខាងមុខ ទំនងនឹងក្លាយជាភាពមិនងាយស្រួលប៉ុន្មានទេ សម្រាប់សែន រ៉ាដេត ព្រោះរូបគេ នឹងត្រូវជួបកីឡាករជើងខ្លាំងប្រចាំទម្ងន់ ៥៤ គីឡូក្រាមរបស់ អង់គ្លេស។ គូប្រកួតរបស់ រ៉ាដេត កីឡាករ Fergus Smith ត្រូវបានគេដឹង ថា ជាម្ចាស់មេដាយមាសការប្រកួតប្រដាល់សេរីនៅ អឺរ៉ុប ២ ឆ្នាំជាប់គ្នា ហើយបច្ចុប្បន្នកំពុងគ្រងខ្សែក្រវាត់ WMO ទ្វីប អឺរ៉ុប មួយខ្សែ។

រឿងគួរឱ្យចាប់អារម្មណ៍មួយទៀត គឺនៅឆ្នាំ ២០២៥ កីឡាករបានឆ្លងកាត់ការប្រកួតអាជីពចំនួន ៨ លើក ដោយឈ្នះទាំង ៨ លើកជាប់ៗគ្នា។ កីឡាកររូបនេះ ក៏ធ្លាប់ឡើងសង្វៀន ONE មួយលើកផងដែរ ដោយកាលពីថ្ងៃទី ១៧ ខែ តុលា ឆ្នាំ ២០២៥ បានផ្តួលកីឡាករ Zahran Al-Wesabi ឱ្យសន្លប់ទឹកទី ១។

នេះជាឱកាសដ៏កម្រសម្រាប់កីឡាករគុនខ្មែរចិត្តសឿង សែន រ៉ាដេត ដែលអាចឡើងដណ្តើមខ្សែក្រវាត់ស្ថាប័ន ISKA ពិភពលោកនៅក្រៅប្រទេស។ ចាំមើល ថាតើ រ៉ាដេត នឹងអាចបំបែកកំណត់ត្រាជាកីឡាករគុនខ្មែរដំបូងគេ ដែលអាចដណ្តើមខ្សែក្រវាត់ ISKA ពិភពលោកនៅក្រៅប្រទេសដំបូងគេបានដែរឬទេ?

អត្ថបទ៖ សេម កុសល

The post សែន រ៉ាដេត ទៅដណ្តើម​ខ្សែក្រវាត់ ISKA នៅអង់គ្លេស ប៉ះ​ជើងខ្លាំងមិនទាន់ចាញ់ ៨ ប្រកួតជាប់គ្នា appeared first on Kampuchea Thmey Daily.

កីឡាករលំដាប់ A របស់ កម្ពុជា បឺត សង្ឃឹម អាចនឹងត្រូវធ្វើការងារធ្ងន់សម្រាប់ជំនួបខាងមុខនេះ ព្រោះតាមរយៈប្រវត្តិប្រកួត ដែលទទួលបាននៅលើបណ្តាញសង្គម កីឡាករ Marcin Nicinski ជាជើងខ្លាំងមួយរូប។ កីឡាករ Marcin Nicinski ហាក់មានតែមលើ សង្ឃឹម ត្រង់កម្ពស់ ដោយរូបគេមានកម្ពស់ដល់ទៅ ១.៨០ ម៉ែត្រ ខណៈកូនសិស្សលោកគ្រូសេន ប៊ុនថេន វិញ មានកម្ពស់ត្រឹម ១.៦៧ ម៉ែត្រ។

កីឡាករ ប៉ូឡូញ វ័យ ២៤ ឆ្នាំរូបនេះ គឺជាកីឡាករម្នាក់ ដែលមានសមត្ថភាពវាយកណ្តាប់ដៃលឿន ហើយរូបគេក៏ពូកែចេញចូលលឿនផងដែរ ព្រោះគេជាកីឡាករជំនាញលើការប្រកួតលក្ខណៈឃីគបុកស៊ីង។ តាមប្រវត្តិប្រកួតកន្លងមក Marcin Nicinski ធ្លាប់ប្រកួតអាជីពចំនួន ១១ ដង ក្នុងនោះឈ្នះ ៩ ដង និងចាញ់ ២ ដង។ ដោយឡែកការប្រកួតចុងក្រោយ ដែលជាការប្រកួតទី ១២ របស់គេ ទល់នឹងកីឡាករ ប្រេស៊ីល Francisco Malone កាលពីខែ មិថុនា ឆ្នាំ ២០២៥ មិនត្រូវបានបង្ហាញលទ្ធផលនោះទេ។ បច្ចុប្បន្ន កីឡាករ​ប៉ូឡូញ​រូប​នេះ​មានខ្សែក្រវាត់ ២ នៅក្នុងដៃ​ គឺ​ ISKA World PRO Champion និងខ្សែក្រវាត់ PZKB K-1 Champion។ 

នេះជាលើកទី ២ ហើយ សម្រាប់ បឺត សង្ឃឹម ដែលទទួលបានឱកាសប្រកួតដណ្តើមខ្សែក្រវាត់ស្ថាប័ន ISKA ប៉ុន្តែលើកទី ១ ដែលធ្វើឡើងនៅប្រទេស អូស្ត្រាលី កាលពីខែ មេសា ឆ្នាំ ២០២៥ ត្រូវបានរំសាយចោលទៅវិញ។ យ៉ាងណា មុនការប្រកួតដណ្តើមខ្សែក្រវាត់ ISKA ពិភពលោកនេះ នៅថ្ងៃទី ១១ ខែ តុលា មកដល់ បឺត សង្ឃឹម បានថ្លែងនៅក្នុងកិច្ចសម្ភាសជាមួយផេកផ្លូវការលោក ស្រឿ ស្រេង (សំណព្វ) ប្រធាន ISKA ពិភពលោកប្រចាំ កម្ពុជា ថា កីឡាករ ប៉ូឡូញ រូបនេះល្អ។ រូបគេចង់បានខ្សែក្រវាត់នេះ ហើយគេក៏បានហ្វឹកហាត់ត្រៀមខ្លួនរួចរាល់​ដែរ។

គួររម្លឹកថា ការប្រកួតដណ្តើមខ្សែក្រវាត់ពិភពលោក ISKA Kun Khmer នេះ ធ្លាប់ធ្វើនៅ កម្ពុជា រួចម្តងហើយ កាលថ្ងៃទី ២០ ខែ កក្កដា ឆ្នាំ ២០២៥ ដោយពេលនោះមនុស្សឈើ សុខ ធី ជាអ្នកក្លាយជាម្ចាស់ខ្សែក្រវាត់ បន្ទាប់ពីយកឈ្នះកីឡាករ អេស្ប៉ាញ សាមូអេល អូលីយ៉ាស់៕

អត្ថបទ៖ សេម កុសល

The post បឺត សង្ឃឹម ត្រូវដណ្តើមខ្សែក្រ​វាត់ ISKA ពិភព​លោក ទល់នឹង​ម្ចាស់ខ្សែក្រវាត់ ២ ស្ថាប័នរបស់​ប៉ូឡូញ appeared first on Kampuchea Thmey Daily.

កីឡាករ អូស្ត្រាលី រូបនោះមានឈ្មោះថា Brandon Spain បច្ចុប្បន្នមានវ័យ ២៥ ឆ្នាំ កើតនៅឆ្នាំ ១៩៩៩។ គេជាអ្នកប្រដាល់អាជីពម្នាក់ ដែលធ្លាប់ឆ្លងកាត់ការប្រកួតនៅសង្វៀនធំៗជាច្រើន។ ក្នុងនោះគេធ្លាប់ឡើងសង្វៀនលក្ខណៈអាជីពបានចំនួន ៦៩ ដង ឈ្នះ ៥១ ដង និងចាញ់ ១៨ ដង។

អ្វីដែលគួរឱ្យចាប់អារម្មណ៍ អ្នកប្រដាល់វាយក្នុងទម្ងន់ ៦០ គីឡូក្រាមរូបនេះ គេជាម្ចាស់ខ្សែក្រវាត់ ៩ ស្ថាប័ន ហើយមិនត្រឹមតែប៉ុណ្ណោះ គេក៏ធ្លាប់ឈ្នះខ្សែក្រវាត់ WBC និងជាកីឡាករ ដែលស្ថិតនៅក្នុងចំណាត់ថ្នាក់ពិភពរបស់ WBC ផងដែរ។

នេះជាលើកទី ២ ហើយ សម្រាប់បឺត សង្ឃឹម ដែលចេញទៅប្រកួតដណ្តើមខ្សែក្រវាត់នៅប្រទេស អូស្ត្រាលី បន្ទាប់ពីលើកដំបូងគេបានទៅដណ្តើមខ្សែក្រវាត់ WBC ទល់នឹងអ្នកប្រដាល់ ថៃ យោធិន ប៉ុន្តែជារឿងសោកស្តាយ ដែលពោលនោះ សង្ឃឹម ត្រូវលោកអាជ្ញាកណ្តាលបញ្ឈប់ត្រឹមទឹកទី១៕

អត្ថបទ៖ សេម កុសល

The post បឺត សង្ឃឹម ដណ្តើមខ្សែក្រវាត់ ISKA ជួបជើងខ្លាំងម្ចាស់ខ្សែក្រវាត់ ៩ ស្ថាប័ន appeared first on Kampuchea Thmey Daily.

អ្នកប្រដាល់វ័យក្មេង Takumi Terada បានទម្លាក់ជើងខ្លាំងកីឡាករ Taito Gunji ឲ្យធ្លាក់មកលេខ២ក្នុងតារាងចំណាត់ថ្នាក់​ពិភពលោកក្នុងប្រភេទទម្ងន់៥៧គីឡូក្រាម​រៀបចំឡើងដោយ Beyond Kick។ អ្វីដែលកាន់តែពិសេសគឺកីឡាករ Takumi Terada នេះហើយបានធ្វើឲ្យកីឡាករ Taito Gunji ស្គាល់បរាជ័យលើកដំបូងគិតតាំងពីឆ្នាំ​២០១២។ ក្នុងការប្រកួតដណ្ដើមខ្សែក្រវាត់ K-1 Featherweight កម្មវិធី K-1 World Max 2024 នៅទីក្រុង​តូក្យូ​ កាលពីថ្ងៃទី២៩ ខែកញ្ញា ឆ្នាំ២០២៤ កីឡាករ Terada បានឈ្នះពិន្ទុកីឡាករ Taito Gunji ក្នុងទឹកទី៤ ដែលជាទឹកបន្ថែម ក្រោយការប្រកួត៣ទឹកលទ្ធផលស្មើគ្នា។

ក្រោយជ័យជម្នះ Terada បានគ្រងជាម្ចាស់ខ្សែក្រវាត់ K-1 Featherweight ជាពិសេសបានឡើងឈរលេខ១ក្នុងតារាងចំណាត់ថ្នាក់ពិភព​លោក​ ស្របពេលរូបគេកំពុងមានកំណត់ត្រាយ៉ាងល្អក្នុងការប្រកួតឃីកបុងសុីងកម្រិតអាជីព។ គិត​ចាប់តាំងពីឆ្នាំ២០២០ កីឡាករ Terada ប្រកួតបាន១១លើក​ ឈ្នះ១០ ចាញ់១លើក ហើយកំពុងគ្រងខ្សែក្រវាត់​២ខ្សែ​គឺ​ ISKA Oriental Rules World Super-featherweight និង K-1 Featherweight។

កីឡាករ Takumi Terada ស្ថិត​នៅ​ក្លិប​ Team Vasileus ជាមួយកីឡាករឆ្នើម Takeru Segawa។ រូប​គេ​មាន​​ពេល​វេលា​វែងឆ្ងាយទៀត ក្នុងការប្រឡូក​អាជីពឈឺសាច់មួយនេះ។ ជាពិសេសនៅមានដៃគូខ្លាំងៗ​ជាងច្រើនទៀតដែលអ្នកប្រដាល់វ័យក្មេងម្នាក់នេះត្រូវជួប៕

អត្ថបទ៖ ផា រតនា

The post Terada ឡើងឈរលេខ១ពិភពលោក ឃីក​បុកស៊ីង​​​ទម្ងន់៥៧គីឡូក្រាម appeared first on Kampuchea Thmey Daily.

កាល​ពី​ឆ្នាំ​២០០៨ សហព័ន្ធ​កីឡា​ប្រដាល់​កម្ពុជា​សហការជា​មួយ​ក្រសួង​អប់រំ យុវជន និង​កីឡា​ស្ថាប័ន​ប្រដាល់​ឃីក​បុក​ស៊ីង​អន្តរជាតិ ISKA បាន​រៀបចំ​ឲ្យ​មាន​ការ​ប្រកួត​ដណ្តើម​ខ្សែ​ក្រវាត់ ISKA ពិភព​លោក​២ខ្សែ​គឺ កីឡាករ​កម្ពុជា វ៉ន់ វីវ៉ា ជា​មួយ​កីឡាករ​អង់គ្លេស Ben Barwise និង​កីឡាករ មាស ចន្ថា ជា​មួយ​កីឡាករ​អង់គ្លេស Tim Thomas។

វ៉ន វីវ៉ា និង​ មាស ចន្ថា បាន​ក្លាយ​ជា​កីឡាករ​២​រូប​ដំបូង​គេ​ដែល​បាន​ឈ្នះ​ខ្សែ​ក្រវាត់ ISKA ពិភព​លោក ប៉ុន្តែ មាស ចន្ថា ត្រូវ​បាន​កីឡាករ​អង់គ្លេស​មក​វ៉ៃ​ដណ្តើម​បាន​វិញ​នៅ​ឆ្នាំ​២០១២ ខណៈ​​ វ៉ន វីវ៉ា ​បាន​ការពារ​បាន​ជោគជ័យ និង​រក្សា​ទុក​រហូត​ដល់​បច្ចុប្បន្ន។

​ឥឡូវ​នេះ​ សហព័ន្ធ​កីឡាប្រដាល់​គុន​ខ្មែរ​បាន​រៀបចំ​ឲ្យ​មា​ន​ការ​ប្រកួត​ដណ្តើម​ខ្សែ​ក្រវាត់​ ISKA ជា​ថ្មី​លើ​ទឹក​ដី​កម្ពុជា​ ដោយ​​​ប្រើ​ឈ្មោះ​​«ខ្សែ​ក្រវាត់​ ISKA គុន​ខ្មែរ​ពិភព​លោក»។ កាល​ពី​ថ្ងៃទី​៧ ខែ​មេសា ឆ្នាំ​២០២៤ សហព័ន្ធ​កីឡា​ប្រដាល់​គុន​ខ្មែរ​សហការ​ជា​មួយ​ស្ថានីយ៍ទូរទស្សន៍​បាយ័ន និង​ម្ចាស់​ឧបត្ថម្ភ​បាន​រៀបចំ​ការ​ប្រកួត​ដណ្តើម​ខ្សែ​ក្រវាត់​ ISKA គុន​ខ្មែរ​ពិភព​លោក​ដល់​ទៅ​៣​ខ្សែ។

ជាលទ្ធផលកីឡាករ​កម្ពុជា ប៊ុន សុធា បាន​ឈ្នះ​​ខ្សែក្រវាត់​​ក្នុង​ទម្ងន់​៥៧​គីឡូក្រាម។ កីឡាករ​ប្រេស៊ីល-កម្ពុជា សែន ចន្ទរិទ្ធីគុន​ បាន​ឈ្នះ​ខ្សែ​ក្រវាត់​​ក្នុង​ទម្ងន់​៧៥​គីឡូក្រាម និង​កីឡាករ​ថៃ ផនសាវ៉ាន បាន​ឈ្នះ​ខ្សែ​ក្រវាត់​ក្នុង​ទម្ងន់​៦៥​គីឡូក្រាម។

ក្នុង​សន្និសីទ​សារព័ត៌មាន លោក​ស្រី Roma Maria Rozanska-Steffen ដែល​ជា​ភរិយា​របស់​កីឡាករ សែន ចន្ទរិទ្ធីគុន​ បានតំណាង​ស្ថាប័ន​ប្រដាល់ ISKA បាន​បញ្ជាក់​ថា ស្ថាប័ន​ប្រដាល់​អន្តរជាតិ​នេះ​បាន​ទទួល​ស្គាល់​​​ខ្សែ​ក្រវាត់ ISKA គុន​ខ្មែរ​ពិភព​លោក​ដែល​រៀបចំ​នៅ​ប្រទេស​កម្ពុជា។

ជាក់​ស្តែង​ផេក​ឈ្មោះ ISKA Europe បាន​ផ្សព្វផ្សាយ​យ៉ាង​ទូលំទូលាយ​អំពី​​ការ​ប្រកួត​ដណ្តើម​ខ្សែ​ក្រវាត់​ ISKA គុន​ខ្មែរ​ពិភព​លោក​នេះក្នុង​នោះ​មាន​ការបង្ហោះ​ផ្សាយ​ពី​កម្មវិធី​ប្រកួត វីដេអូ​ផ្សព្វផ្សាយ​មុន​ការ​ប្រកួត និង​លទ្ធផល​នៃ​ការ​ប្រកួត​ជា​ដើម។ ប្រការ​នេះ​មាន​ន័យ​ថា ស្ថាប័ន​អន្តរជាតិ​បាន​ទទួល​ស្គាល់​ និង​គាំទ្រ​ជា​ផ្លូវ​ការ​ពី​ខ្សែ​ក្រវាត់​នៅ​ប្រទេស​កម្ពុជា ប៉ុន្តែ​​មិន​មែន​ជា​ប្រភេទ​ខ្សែ​ក្រវាត់​ដែល​ស្ថាប័នអន្តរជាតិ​មក​រៀបចំ​នៅ​ប្រទេស​កម្ពុជា​​ដោយ​ផ្ទាល់​នោះ​ទេ។

ផេក ISKA Europe បាន​ទទួលស្គាល់​​ខ្សែ​ក្រវាត់​ខ្សែ​ក្រវាត់ ISKA នៅ​តាម​បណ្តា​ប្រទេស​ផ្សេង​ៗ​​​ទូទាំង​ពិភព​លោក ដូច​ដែល​ពួក​គេ​ទទួល​ស្គាល់​ពី​កម្ពុជា​ដែរ។ វា​ជា​ការ​ទទួល​ស្គាល់ និង​គាំទ្រ​​​អំពី​ការ​រៀបចំ​​​ ប៉ុន្តែ​មិន​មែន​ជា​ព្រឹត្តិការណ៍​ដែល​ស្ថាប័ន​អន្តរជាតិ​​មួយ​នេះ​រៀបចំ​ដោយ​ខ្លួន​ឯង​ផ្ទាល់​នោះ​ទេ។  

នៅ​ក្នុង​ឱកាស​បុណ្យ​ចូល​ឆ្នាំ​ថ្មី ប្រពៃណី​ជាតិ​ខ្មែរ​នេះ សង្វៀន​ប្រដាល់ Kun Khmer International Fight Gym រៀបចំ​ឲ្យ​មាន​ការ​ប្រកួត​ខ្សែ​ក្រវាត់ ISKA គុន​ខ្មែរ​ពិភព​លោក​២​ខ្សែ​។ កីឡាករ ឈឿង ល្វៃ ប្រកួត​ជា​មួយ​កីឡាករ​អូស្ត្រាលី Tonkin ទម្ងន់​៧២.៥​គីឡូក្រាម និង​កីឡាករ រិន ដេវីត ប្រកួត​ជា​មួយ​កីឡាករ​ប្រេស៊ីល Olivera ទម្ងន់៦១គីឡូក្រាម។ ផេក ISKA Europe ក៏​បាន​ផុស​ពី​ការ​ប្រកួត​ដណ្តើម​ខ្សែ​ក្រវាត់​របស់ ឈឿង ល្វៃ និង រិន ដេវីត ដែរ។

រូប​ភាព​ខ្សែ​ក្រវាត់​ក៏​មាន​លក្ខណៈ​ខុស​ប្លែក​ពី​ខ្សែ​ក្រវាត់​​ម្យ៉ាង​ដែរ។ លោក សំណព្វ អ្នក​ផ្គូផ្គង​កម្មវិធី​ប្រដាល់​នេះ​បាន​ប្រាប់ផេក Khmer Sports ​ថា ខ្សែ​ក្រវាត់ ISKA​ Kun Khmer World  Championship ផលិត​នៅ​ប្រទេស​អង់គ្លេស។ គិត​ត្រឹម​ថ្ងៃ​ទី​៩ ខែ​មេសា ឆ្នាំ​២០២៤ ISKA គុន​ខ្មែរ​មិន​ទាន់​មាន​តំណាង​ឡើយ​នៅ​ទូទាំង​ពិភព​លោក។ ការ​រៀបចំ​នេះ​គឺ​ក្នុង​លក្ខខណ្ឌ​ដែល​ស្ថាប័ន ISKA អនុញ្ញាត​ឲ្យ​រៀបចំ​ក្នុង​កិច្ច​សហការ​គ្នា​ និង​ទទួល​ស្គាល់។ ប្រការ​នេះ​មាន​ន័យ​ថា ស្ថាប័ន​ណា​ដែល​មាន​លក្ខណៈ​សម្បត្តិ​គ្រប់​គ្រាន់​ក៏​អាច​ចាប់​ដៃ​គូ​​ជា​មួយ​គេ​ដើម្បី​​រៀប​ចំ​ការ​ប្រកួត​ដណ្តើម​ខ្សែ​ក្រវាត់ ISKA ដែរ។

ជា​មួយរួម​ ស្ថាប័ន International Sport Kickboxing Association ទទួល​ស្គាល់​ជា​ផ្លូវ​ការ​​ពី​ខ្សែ​ក្រវាត់ ISKA គុន​ខ្មែរពិភព​លោក​ទាំង​ខ្សែ​ក្រវាត់​ដែល​រៀបចំ​ដោយ​​ស្ថានីយ៍​ទូរទស្សន៍​បាយ័ន និង​ KKIF ដែល​ស្ថិត​ក្រោម​ការគ្រប់​គ្រង​របស់​សហព័ន្ធ​កីឡា​ប្រដាល់​គុន​ខ្មែរ​តែ​មួយ។

មែន​ទែន​ទៅ​ ស្ថាប័ន ISKA ​មាន​​កីឡា​ប្រយុទ្ធ​ច្រើន​ប្រភេទ​ដូច​ជាកីឡា ឃីកបុក​ស៊ីង ការ៉ាតេ គុនចម្រុះ ក្បាច់ឃ្លេ មួយ​ថៃ គុន​ខ្មែរ ជា​ដើម​ ដែល​មាន​ខ្សែ​ក្រវាត់​កម្រិត​ពិភព​លោកទៅ​តាម​ប្រភេទ​កីឡា​នីមួយ​ៗ៕

អត្ថបទ៖ វីរបុត្រ

The post តើ​ខ្សែក្រវាត់​ ISKA គុន​ខ្មែរ​ពិភពលោកទទួលស្គាល់កម្រិតណា? appeared first on Kampuchea Thmey Daily.

ការ​ប្រកួត​ដណ្តើម​ខ្សែ​ក្រវាត់​ពិភព​លោក ISKA ជា​ថ្មី​​នៅ​សង្វៀន​បាយ័ន​នេះ​មាន​រហូត​ដល់​ទៅ​​​៣​គូ​នៅ​ពេលកីឡាករ​អ៉ីរ៉ង់​ហាត់​គុន​ខ្មែរ​ អាលៀ អាសក្កា ប្រកួត​ជា​មួយ​កីឡាករ​ថៃ ផន សសាវ៉ាន ជេអរ ដណ្តើម​ខ្សែ​ក្រវាត់​គុនខ្មែរ ISKA ទម្ងន់​​៦៥​គីឡូក្រាម។

​ម្ចាស់​ផ្ទះ​កម្ពុជា ប៊ុន សុធា ប្រកួត​ជា​មួយ​កីឡាករ​ម៉ាឡេស៊ី អ៊ូម៉ា រេដវូហ្វ ​ដណ្តើម​ខ្សែ​ក្រវាត់គុន​ខ្មែរ​​ ISKA ទម្ងន់​៥៧​គីឡូក្រាម។ ជា​មួយ​គ្នា​នេះ ខ្លា​ចាស់​ខ្មែរ-ប្រេស៊ីល សែន ចន្ទរិទ្ធីគុណ ប្រកួត​ជា​មួយ​កីឡាករ​តួកគី ស៊ីណាន ឆាឡា ដណ្តើម​ខ្សែ​ក្រវាត់​គុន​ខ្មែរ ISKA ទម្ងន់​៧៥​គីឡូក្រាម។

នេះ​អាចចាត់​ទុក​ជា​លើក​ទី​១​ដែល​មាន​ការ​ប្រកួត​ដណ្តើម​ខ្សែ​ក្រវាត់​ពិភព​លោក ISKA នៅ​លើ​ទឹក​ដី​ប្រទេស​កម្ពុជា​ក្នុង​រយៈ​ពេល​១២​ឆ្នាំ​ចុង​ក្រោយ បន្ទាប់​ពី​ធ្លាប់​មានការ​ប្រកួត​​​កាល​ពី​ឆ្នាំ​២០១២។ នៅ​ចាំ​បាន​ថា វ៉ន វីវ៉ា បាន​ប្រកួត​ឈ្នះ​កីឡាករអង់គ្លេស Ben Barwise ដើម្បី​ទទួល​បាន​ខ្សែ​ក្រវាត់ ISKA ពិភព​លោក​នៅ​ឆ្នាំ​២០០៨ ដែល​បាន​ក្លាយ​ជា​កីឡាករ​កម្ពុជា​ទី១​ទទួល​បាន​ខ្សែ​ក្រវាត់​នេះ។

បន្ទាប់​មក កីឡាករ​កម្ពុជា​ម្នាក់​ទៀត​គឺ មាស ចន្ថា បានប្រកួត​ឈ្នះ​កីឡាករអង់គ្លេស Tim Thomas ​ដើម្បី​ទទួល​បាន​ខ្សែ​ក្រវាត់ ISKA ពិភព​លោក​នៅ​​ខែ​សីហា ឆ្នាំ​២០០៨​ នៅ​ពហុកីឡដ្ឋាន​ជាតិ​អូឡាំពិក។ រូប​គេ​បាន​ក្លាយ​ជា​កីឡាករកម្ពុជា​ទី​២​ដែល​បាន​ឈ្នះ​ខ្សែ​ក្រវាត់​ពិភព​លោក​នេះ។

ទោះបី​ជា​យ៉ាង​ណា រយៈ​ពេល​​ជាង​៣​ឆ្នាំ​ក្រោយ​មក Tim Thomas ​បាន​វិល​ត្រឡប់​មក​ទឹក​ដី​កម្ពុជា​ជា​ថ្មី​ដើម្បី​ដណ្តើម​ខ្សែ​ក្រវាត់ ISKA ពី​កីឡាករកម្ពុជា​ មាស ចន្ថា វិញ​ម្តង។ នៅ​ពេលនោះ​កីឡាករ​កម្ពុជា​មិន​អាច​ការពារ​ខ្សែ​ក្រវាត់​របស់​ខ្លួន​បាន​ទេ​ដោយ​បាន​សន្លប់​ក្នុង​ទឹក​ទី​៥​​របូត​ខ្សែ​ក្រវាត់​ទៅ​ម្ចាស់​ដើម​វិញ​នៅ​ឆ្នាំ​២០១២។

រហូត​ដល់​ពេល​នេះ​មាន​តែ​អតីត​កីឡាករ វ៉ន វីវ៉ា ម្នាក់​គត់​ដែល​មាន​ខ្សែ​ក្រវាត់​ពិភព​លោក ISKA ប៉ុន្តែ​នៅ​ពេល​នោះ​មិន​ទាន់​ប្រើ​ឈ្មោះ​ខ្សែ​ក្រវាត់​គុន​ខ្មែរ ISKA ពិភព​លោក​ទេ។ សម្រាប់​ថ្ងៃ​ទី​៧ ខែ​មេសា នេះ​គឺ​ប្រើ​ឈ្មោះ ខ្សែ​ក្រវាត់​គុន​ខ្មែរ ISKA។

ជំនួបដណ្ដើមខ្សែក្រវាត់ពិភពលោក ISKA គុនខ្មែរ

• កីឡាករ អាលៀ អាសហ្គា (អ៉ីរ៉ង់) Vs ផនសាវ៉ាន ជេអ័រ (ថៃ) ទម្ងន់​៦៥គ.ក
• កីឡាករ ប៊ុន សុធា (កម្ពជា) Vs អ៊ូម៉ា វេដ វូហ្វ (ម៉ាឡេស៊ី) ទម្ងន់​៥៧​គ.ក
• កីឡាករ សែន ចន្ទរិទ្ធីគុន (ខ្មែរ-ប្រេស៊ីល) Vs ស៊ីណាន ឆាឡា (តួកគី) ទម្ងន់៧៥​គ.ក

អត្ថបទ៖ វីរបុត្រ

The post ក្រោយរង់ចាំ១២ឆ្នាំ ខ្សែក្រវាត់ ISKA ដាក់ឲ្យប្រកួតជាថ្មីលើដីកម្ពុជាចុងសប្តាហ៍នេះ appeared first on Kampuchea Thmey Daily.