ថ្មីៗនេះក្លិបអធិរាជស Real Madrid បញ្ជាក់ជាផ្លូវការ ថា Mbappe បានរងរបួសជង្គង់ខាងឆ្វេង។ ស្ថានភាពនេះបានធ្វើឱ្យ Mbappe អវត្តមាន ២ ប្រកួតហើយ គឺការប្រកួតជម្រុះ playoff ពាន UCL ជើងទី ២ ទល់ Benfica និងការប្រកួតក្របខណ្ឌ La Liga ទល់នឹង Getafe នាយប់រំលងអាធ្រាត្រឈានចូលថ្ងៃ អង្គារិ៍ ទី ៣ ខែ មីនា នេះ។

ទោះបីជាយ៉ាងណា Real Madrid មិនទាន់បានបញ្ជាក់នៅឡើយទេ ថា Mbappe នឹងត្រូវអវត្តមានរយៈពេលប៉ុន្មានសប្តាហ៍ ប៉ុន្តែបើតាមគ្រូបង្វឹកលោក Álvaro Arbeloa បានបញ្ជាក់ គឺ Mbappe កំពុងស្ថិតក្នុងភាពសង្ស័យសម្រាប់ការប្រកួតទល់នឹង Man City ដោយស្ថានភាពរបួសរបស់គេមិនមែនស្ថិតក្នុងរយៈពេលខ្លីទេ ប៉ុន្តែស្ថិតក្នុងរយៈពេលវែង។

ដោយឡែក Jude Bellingham វិញ បានអវត្តមានប៉ុន្មានប្រកួតមកហើយ ដោយសារមានបញ្ហារបួសសាច់ដុំភ្លៅ។ យោងតាមសារព័ត៌មាន El Laguero បានឱ្យដឹង ថា ខ្សែបម្រើសញ្ជាតិ អង់គ្លេស នឹងអវត្តមានការប្រកួតវគ្គ ១៦ ក្រុមចុងក្រោយទាំង ២ ជើងតែម្តងទល់ Man City។ Bellingham អាចនឹងត្រឡប់មកកាន់ទីលានវិញបាន នាចុងខែ មីនា ឬ ដើមខែ មេសា ខាងមុខ។

គួរបញ្ជាក់ ថា ការប្រកួតជើងទី ១ វគ្គ ១៦ ក្រុមចុងក្រោយពាន UCL រវាង Real Madrid និង Man City នឹងធ្វើឡើងជើងទី ១ នៅកីឡដ្ឋាន Santiago Bernabeu នៅថ្ងៃទី ១២ ខែ មីនា ឆ្នាំ ២០២៦។ ចំណែកការប្រកួតជើងទី ២ នឹងធ្វើឡើងនៅកីឡដ្ឋាន Eitihad ក្នុងប្រទេស អង់គ្លេស នាថ្ងៃទី ១៨ ខែ មីនា ឆ្នាំ ២០២៦៕

អត្ថបទ៖ សេម កុសល

The post Real Madrid អាចបាត់កម្លាំងសំខាន់ដល់ទៅ ២ នាក់ ពេលជួប Man City ក្នុងពាន UCL appeared first on Kampuchea Thmey Daily.

ក្នុងការប្រកួតពានរង្វាន់ UEFA Champions League ទល់នឹងក្រុម RB Salzburg កីឡាករ Bellingham បានបញ្ជូនបាល់ឲ្យមិត្តរួមក្រុមចំនួន២លើកជួយឲ្យ Real Madrid ទទួលបានបានជ័យជម្នះ ៥-១ នៅកីឡដ្ឋាន Santiago Bernabeu។

កីឡាករវ័យ២១ឆ្នាំរូបនេះបានស៊ុតបញ្ចូលទីបាន៩គ្រាប់ និងបញ្ជូនបាល់ឲ្យមិត្តរួមក្រុមបាន៩លើកក្នុងការបង្ហាញខ្លួន២៧ប្រកួតនៅរដូវកាលនេះ។ ឥឡូវនេះគាត់ស៊ុតបញ្ចូលទី១១គ្រាប់ និងបញ្ចូលបាល់ឲ្យមិត្តរួមក្រុមបាន១៣លើក ក្នុងការបង្ហាញខ្លួន៤១ប្រកួតក្នុងក្របខណ្ឌ UEFA Champions League ។ កីឡាករ Lionel Messi មានស្ថិតិរកគ្រាប់បាល់ និងបញ្ចូលបាល់ឲ្យមិត្តរួមក្រុម សរុប២៤លើក មុនពេលឈានដល់អាយុ២២ឆ្នាំ ស៊ុតបាន១៧គ្រាប់និង៧លើក។

Bellingham ពេលនេះមានអាយុត្រឹមតែ២១ឆ្នាំ និង​៦ខែ មានន័យថា គាត់អាចវ៉ាដាច់កំណត់ត្រារកគ្រាប់បាល់ និង​បញ្ចូលទីរបស់កីឡាករអាហ្សង់ទីន Messi បានទៀត ប្រសិនបើរូបគេបន្ដធ្វើបានល្អជាមួយក្រុម Real Madrid ក្នុងពានរង្វាន់ UREFA Champions League៕

ប្រែសម្រួល៖ ផា រតនា

The post Bellingham តាមទាន់កំណត់ត្រារបស់ Messi ក្នុង​ពាន UEFA appeared first on Kampuchea Thmey Daily.

កីឡាករ Vinicius បានប្តេជ្ញា​នឹង​ជួយ​ Mbappe ឲ្យ​ឆាប់​បាន​សម្របខ្លួន​ក្នុង​បរិយាកាស​ថ្មី​។ កីឡាករ Vinicius បានលើកយកកីឡាករ Jude Bellingham ជាគំរូ ក្រោយរូបគេបានផ្លាស់មកក្រុម Real Madrid កាលពីរដូវកាលមុន ប៉ុន្តែខ្សែបម្រើសញ្ជាតិអង់គ្លេស​បាន​សម្របខ្លួន​យ៉ាងឆាប់រហ័ស។

កីឡារក Vinicius បានប្រាប់ទូរទស្សន៍ Real Madrid TV ថា ៖«យើងត្រូវមើលថែគាត់ ហើយធ្វើអ្វីគ្រប់យ៉ាងតាមដែលអាចធ្វើទៅបាន ដើម្បីឲ្យគាត់អាចសម្របខ្លួនបានលឿន។ វាតែងតែមានផលពិបាក​ខ្លះ​ពេល​ចូលរួមជាមួយក្លិប​ថ្មី ប៉ុន្តែយើងបានធ្វើវាម្ដងរួចហើយជាមួយ Jude Bellingham រដូវកាលមុន។ សង្ឃឹមថា យើងអាចធ្វើវាម្តងទៀតជាមួយ Kylian Mbappe»។

កីឡាករ Bellingham រក​​បាន២៣គ្រាប់ និងបញ្ជូនបាល់ឲ្យមិត្តរួមក្រុមចំនួន១៣លើក​ដែល​បាន​ជួយក្រុម Real Madrid ឈ្នះពានរង្វាន់ La Liga និង UEFA Champions League។

រដូវកាលថ្មីនេះ វត្តមាន Mbappe នឹងចាប់ដៃគូប្រយុទ្ធជាមួយ Vinicius និង Rodrygo តំបន់​ប្រយុទ្ធរបស់ក្លិប Real Madrid។

ក្លិប​ Real Madrid ត្រូវជួបក្រុម Atalanta ជាម្ចាស់ជើងឯក Europa League ក្នុងការប្រកួត UEFA Super Cup នៅថ្ងៃពុធសប្តាហ៍ក្រោយ។ នេះនឹងក្លាយជា​ឱកាស​របស់ Mbappe ​សម្រាប់​ការ​បង្ហាញ​ខ្លួន​ផ្លូវ​ការ​លើក​ដំបូង និង​អាច​ឈ្នះ​ពាន​រង្វាន់​ទី១​តែ​ម្តង៕

ប្រែសម្រួល៖ ផា រតនា

The post Vinicius រីក​រាយ​ជួយ​ Mbappe ឲ្យឆាប់សម្របខ្លួននៅ Real Mdrid appeared first on Kampuchea Thmey Daily.

ក្នុងរយៈពេលប៉ុន្មានឆ្នាំចុងក្រោយនេះ ទោះបីអធិរាជស Real Madrid គ្មាន​វត្តមានតារាឆ្នើម Cristiano Ronaldo, Gareth Bale, Karim Benzema, Marcelo និង Casemiro ប៉ុន្តែពួក​គេ​នៅតែរក្សាបាន​ភាពខ្លាំងដដែល។ ពួកគេ​បាននាំយកកីឡាករក្មេងៗ ពោរពេញដោយ​សមត្ថភាពដើម្បី​ប្រជែងជាមួយក្រុមកំពូលៗ។ ជាក់ស្តែងក្នុងរដូវនេះ កីឡាករក្មេង៤រូបរួមមាន Jude Bellingham, Vinicius Junior, Rodrygo និង Eduardo Camavinga កំពុងសហការគ្នាបានយ៉ាងល្អ ហើយជួយ Real Madrid បន្តឱកាស​ប្រកួតប្រជែងពានរង្វាន់ធំៗ។

កីឡាករ​វ័យ២០​ឆ្នាំ Jude Bellingham

ចំណូលថ្មីដ៏សំខាន់ក្នុងរដូវកាលនេះគឺខ្សែបម្រើ Jude Bellingham ជាកីឡាករវ័យក្មេងដែលមានតម្លៃខ្ពស់បំផុតនៅក្នុងក្រុម។ រូប​គេ​ត្រូវបាន Real Madrid ទិញមកពីក្លិប Borussia Dortmund ក្នុងតម្លៃ១០៣លានអឺរ៉ូ ក្នុងកិច្ចសន្យារយៈពេល៦ឆ្នាំ។ បច្ចុប្បន្នកីឡាករ​វ័យ២០ឆ្នាំ សញ្ជាតិអង់គ្លេស ជាតួអង្គដ៏សំខាន់​ក្នុងការជួយក្រុមឈ្នះពានរង្វាន់ Spanish Super Cup និង​កំពុង​ឈរនៅកំពូលតារាង LaLiga ។ ម្ចាស់អាវលេខ៥​បង្ហាញខ្លួនឲ្យក្រុម Real Madrid បាន២១ ស៊ុតបញ្ចូលទី១៦។

កីឡាករ​វ័យ​២៣​ឆ្នាំ Vinicius Junior

Vinicius Junior បាន​ចូលរួមជាក្រុម Real Madrid មុន​កីឡាករ​៣​នាក់​ទៀត។ ថ្ងៃទី២៣ ខែឧសភា ឆ្នាំ២០១៧ Real Madrid បានចុះហត្ថលេខាលើកិច្ចសន្យានាំយក Vinicius នៅ​ពេល​រូបគេ​អាយុមិនទាន់គ្រប១៨ឆ្នាំ។ ដូច្នេះត្រូវរង់ចាំដល់កីឡាករ​មានអាយុ១៨ឆ្នាំ ទើបស្របតាមច្បាប់ក្នុងការដោះដូរកីឡាករ។ ថ្ងៃទី២០ ខែកក្កដា ឆ្នាំ២០១៨ រូបគេ​បាន​បង្ហាញ​ខ្លួន​ជាផ្លូវការក្នុងនាមជាកីឡាកររបស់ Real Madrid ដោយពាក់អាវលេខ២៨។

Vinicius បានបង្ហាញខ្លួនជាលើកដំបូងនៅថ្ងៃទី២៩ ខែកញ្ញា ត្រូវបានប្ដូរចូលនៅនាទី៨៧ ក្នុងជំនួបជាក្រុម Atletico Madrid។ បច្ចុប្បន្នកីឡាករវ័យ២៣ឆ្នាំសញ្ជាតិប្រេស៊ីលរូបនេះបង្ហាញខ្លួនបាន១៦៥លើក ស៊ុតបញ្ចូលទី៤១ និង​ជាសមាជិកជួយឲ្យក្រុម Real Madrid ឈ្នះពានរង្វាន់ LaLiga ២លើក, UEFA Champion League ១លើក, UEFA Super Cup ១លើក, FIFA Club World Cup ២លើក, Spanish Super Cup ៣លើក និង Copa del Ray ១លើក។

កីឡាករវ័យ​២៣​ឆ្នាំ Rodrygo

សម្រាប់ Rodrygo ក៏ជាកម្លាំងសំខាន់របស់លោក Carlos Ancelotti ចាប់តាំងពីចូលរួមជាក្រុម Real Madrid តាំងពីឆ្នាំ២០១៩។ រូបគេបង្ហាញខ្លួនបាន១៣២ ស៊ុតបញ្ចូលទី២៤គ្រាប់។ រូប​គេ​ពិតជាធ្វើបានល្អនៅក្នុងទីលានក្នុងនាមជាខ្សែបម្រើប្រយុទ្ធស្លាបស្តាំ ខណៈ Vinicius ខ្សែបម្រើប្រយុទ្ធស្លាបឆ្វេង។ បើនិយាយពីមិត្តភាពរបស់ពួកគេគឺមានភាពស្និទ្ធ​ស្នាលគ្នា​ខ្លាំង​ដោយសារពួកគេមានសញ្ជាតិប្រេស៊ីលដូចគ្នា។ សមិទ្ធផលដែល Rodrygo​ សម្រេចជាមួយ Real Madrid គឺ​ដូច​ Vinicius ដែរ។

កីឡាករវ័យ​២១​ឆ្នាំ Eduardo Camavinga

ចំពោះតំបន់បម្រើកណ្ដាលវិញ កីឡាករ Eduardo Camavinga ជាធនធានដ៏សំខាន់នាថ្ងៃខាងមុខសម្រាប់​អធិរាជ​ស។ បច្ចុប្បន្ន រូប​គេ​ទទួលបាន​ឱកាស​បង្ហា​ញ​ខ្លួន​ញឹក​ញាប់​នៅលើទីលាន។ ខ្សែបម្រើវ័យ២១ឆ្នាំ រូបនេះបានចូលរួមជាមួយក្រុម Real Madrid កាលពីថ្ងៃទី៣១ ខែសីហា ឆ្នាំ២០២១ ក្នុង​កុងត្រារយៈពេលវែង រហូតដល់ថ្ងៃទី៣០ ខែមិថុនា ឆ្នាំ២០២៧។ ចំណុចពិសេសរបស់ Camavinga គឺអាចលេងជាខ្សែបម្រើប្រយុទ្ធ លេងខ្សែការពារ ខ្សែបម្រើការពារក៏បាន។ គិតចាប់តាំងឆ្នាំ២០២១ រូបគេបង្ហាញបាន៨១លើក ស៊ុតបញ្ចូលទី២គ្រាប់ ជាមួយ Real Madrid។

អត្ថបទ៖ ផា រតនា

The post កម្លាំងស្នូលវ័យក្មេង៤រូបកំពុងសហការគ្នាយ៉ាងល្អនៅ Real Madrid appeared first on Kampuchea Thmey Daily.