Lewandowski បានលេងនៅ Barcelona ៤ រដូវកាលហើយ ពោលតាំងពីរដូវកាល ២០២២-២០២៣ មក បន្ទាប់ពីចាកចេញពី Bayern Munich។ កីឡាករនឹងអស់សុពលភាពកិច្ចសន្យាជាមួយក្រុមអ្នកមានបុណ្យនៅខែ មិថុនា ឆ្នាំ ២០២៦ ប៉ុន្តែយោងតាមសារព័ត៌មាន BBC Sport បានឱ្យដឹង ថា អតីតខ្សែប្រយុទ្ធ Bayern Munich នឹងមិនបន្តកិច្ចសន្យាថ្មីឡើយ ដោយសម្រេចចិត្តចាកចេញនៅចុងបញ្ចប់រដូវកាលនេះ។

បច្ចុប្បន្ន Lewandowski កំពុងត្រូវបានគេចាត់ទុក ជាវីបុរសមួយរូបរបស់ក្លិប ដោយសាររូបគេជាកីឡាករមានឆន្ទៈខ្ពស់មួយរូប ដែលបានមកជួយ Barcelona អំឡុងពេលស្ថិតក្នុងគ្រាដ៏លំបាក។ ក្នុងការលេងនៅ Barcelona ៤ ឆ្នាំមកនេះ ខ្សែប្រយុទ្ធសញ្ជាតិ ប៉ូឡូញ រកបាន ១១៨ គ្រាប់ ពីការលេង ១៨៨ ប្រកួត។ ជាមួយគ្នានេះ កីឡាករបានឈ្នះពាន La Liga ២ លើក, Copa del Rey ១ លើក និង Spanish Super Cup ៣ លើក។

ក្រោយមានព័ត៌មានច្បាស់ការ អំពីការចាកចេញរបស់ Lewandowski ក្លិប Barcelona ក៏បានត្រៀមផែនការរួចរាល់ផងដែរ ដោយបានកំណត់មុខសញ្ញាលើខ្សែប្រយុទ្ធក្រុម Atletico Madrid កីឡាករ Julian Alvarez ជាគោលដៅផ្ទេរធំបំផុតរបស់ពួកគេ។​ ទោះបីជាយ៉ាងណា នៅក្នុងខណៈពេលនេះ Barcelona កំពុងជួបបញ្ហាធំមួយ គឺរឿងតម្លៃ ដោយសារ At Madrid ដាក់តម្លៃខ្ពស់ខ្លាំង រហូតដល់ទៅ ១៤០.៩១ លានដុល្លារអាមេរិកឯណោះ៕

ប្រែសម្រួល៖ សេម កុសល
ប្រភព៖ GOAL

The post Barcelona ចុចឈ្មោះខ្សែប្រយុទ្ធម្នាក់ជាគោលដៅធំ ក្រោយ Lewandowski សម្រេចចិត្តចាកចេញ appeared first on Kampuchea Thmey Daily.

យោងតាមសារព័ត៌មាន GOAL បានឱ្យដឹង ថា ភាគី Barcelona បានស៊ើបសួរព័ត៌មានមួយចំនួនអំពី Alvarez នៅ At Madrid ប៉ុន្តែអ្វី ដែលទទួលបានមកវិញ គឺ At Madrid បានកំណត់តម្លៃដាក់លក់ខ្សែប្រយុទ្ធសញ្ជាតិ អាហ្សង់ទីន រូបនេះក្នុងតម្លៃ ២៣៦ លានដុល្លារអាមេរិក។ ចំនួននេះ ត្រូវបានគេដឹង ថា មានតម្លៃថ្លៃបំផុតទី ២ បន្ទាប់ពី Neymar ដែលការផ្ទេរពី Barcelona ទៅ PSG ក្នុងឆ្នាំ ២០១៧ មានតម្លៃ ២៦២ លានដុល្លារអាមេរិក។

Barcelona បានមើលឃើញ Alvarez ជាផែនការរយៈពេលវែងរបស់ក្លិប ដោយសារតែសមត្ថភាពពូកែបត់បែនរបស់គេ ស្របតាមការចង់បានរបស់នាយកផ្នែកកីឡាលក់ Deco។ ទោះបីជាយ៉ាងណា បញ្ហាហិរញ្ញវត្ថុរបស់ក្លិប នៅតែជារបាំងធំលើការផ្ទេរនេះ ហើយជាមួយគ្នានេះ La Liga ក៏កំពុងរឹតដ្បិតលើការចាយវាយរបស់ក្លិបនៅតំបន់ កាតាឡាន់ មួយនេះផងដែរ។

គួរឱ្យដឹងផងដែរ ថា បច្ចុប្បន្នមានក្លិបនៅ Premier League មួយចំនួន កំពុងតែតាមដានស្ថានភាពរបស់ Alvarez ដូច Barcelona ដែរ។ ទោះបីជាយ៉ាងណាក៏ដោយ កីឡាករ អាហ្សង់ទីន វ័យ ២៦ ឆ្នាំរូបនេះ ត្រូវបានគេរាយការណ៍ថារូបគេ ចង់នៅលេងនៅប្រទេសអេស្ប៉ាញ បន្តទៀត។ ករណីប្រសិនបើកីឡាករចាកចេញពិតមែន គឺគេចង់ចូលរួមជាមួយ Barcelona តែ ១ គត់៕

ប្រែសម្រួល៖ សេម កុសល
ប្រភព៖ GOAL

The post At Madrid ដាក់តម្លៃលក់ Alvarez ទៅ Barcelona ក្នុងតម្លៃថ្លៃបំផុតទី ២ បន្ទាប់ពី Neymar appeared first on Kampuchea Thmey Daily.

ក្លិប​អ្នក​មានបុណ្យ Barcelona ហាក់បង្កើនការចាប់អារម្មណ៍​ខ្លាំងលើ​កីឡាករ​ Julian Alvarez នៅរដូវកាលនេះ បន្ទាប់ពីរូបគេបង្ហាញសមត្ថភាពលេចធ្លោ ដោយការលេង ៧ ប្រកួត​ដើម​រដូវកាល ២០២៥-២០២៦ រូបគេរកបាន ៦ គ្រាប់។

ខ្សែប្រយុទ្ធសញ្ជាតិ អាហ្សង់ទីន វ័យ ២៥ ឆ្នាំ ត្រូវបានគេមើលឃើញ ថា ជាបេក្ខភាពដ៏សក្តិសមបំផុត ដើម្បីមកជំនួសខ្សែប្រយុទ្ធចាស់វស្សា Robert Lewandowski ក្នុងរយៈពេលវែង ដែលត្រូវបានគេរំពឹង នឹងចាកចេញពីក្លិបក្នុងតំបន់ កាតាឡាន់ នៅចុងបញ្ចប់រដូវកាលនេះ។

គួរឱ្យដឹងថា Alvarez គឺនៅសល់កិច្ចសន្យា ជាមួយក្លិប At Madrid រយៈពេលវែងទៀត ពោលគឺដល់ខែ មិថុនា ឆ្នាំ ២០៣០។ ប្រសិនបើ Barcelona ពិតជាធ្វើការចរចា ដើម្បីចុះកិច្ចសន្យាយកខ្សែប្រយុទ្ធសញ្ជាតិ អាហ្សង់ទីន រូបនេះនៅរដូវកាលក្រោយពិតមែន នោះត្រូវបានគេមើលឃើញ ថា នឹងក្លាយជារឿងដ៏ស្មុគស្មាញ។

ទោះបីជាយ៉ាងណា Barcelona នៅតែកំណត់មុខសញ្ញាលើ Alvarez ជាគោលដៅផ្ទេរធំបំផុតសម្រាប់ពួកគេ ដើម្បីមកពង្រឹងតំបន់ប្រយុទ្ធក្នុងរយៈពេលវែង៕

ប្រែសម្រួល៖ សេម កុសល
ប្រភព៖ Tribuna

The post ក្លិប Barcelona កំណត់គោលដៅយក​ខ្សែប្រយុទ្ធដ៏មានសក្តានុពលម្នាក់ មកជំនួស Lewandowski appeared first on Kampuchea Thmey Daily.

Barcelona កំពុងរៀបចំគម្រោងយ៉ាងហ្មត់ចត់អំពីគម្រោងអនាគត ដោយស្វែងរកខ្សែប្រយុទ្ធថ្មី ដែលមានសក្តានុពលម្នាក់មកជំនួស Robert Lewandowski ក្នុងរយៈពេលវែង។

Lewandowski បានចាកចេញពី Bayern Munich មកចូលរួមជាមួយ Barcelona កាលពីរដូវក្តៅឆ្នាំ ២០២២។ ខ្សែប្រយុទ្ធសញ្ជាតិ ប៉ូឡូញ វ័យ ៣៦ ឆ្នាំរូបនេះ បានដើរតួជាខ្សែប្រយុទ្ធស្នូលដ៏សំខាន់របស់ក្រុមអ្នកមានបុណ្យក្នុងរយៈពេលជិត ៣ រដូវកាលមកនេះ ខណៈកិច្ចសន្យារបស់គាត់ នៅសល់តែ ១ រដូវកាលទៀតប៉ុណ្ណោះ ពោលគឺត្រឹមខែ មិថុនា ឆ្នាំ ២០២៦។

ដកស្រង់ប្រភពចេញពី beIN SPORTS បានឱ្យដឹងថា ក្រុមប្រឹក្សាភិបាលរបស់ Barcelona បានណែនាំទៅប្រធានក្លិបលោក Joan Laporta និងគ្រូបង្វឹកថ្មីលោក Hansi Flick ឱ្យតាមដានលើ Alverez ព្រោះពួកគេជឿជាក់ថា ខ្សែប្រយុទ្ធសញ្ជាតិ អាហ្សង់ទីន វ័យ ២៥ ឆ្នាំរូបនេះនឹងក្លាយជាអ្នកជំនួស Lewandowski ដ៏សក្តិសម​បំផុត​នា​ពេល​បច្ចុប្បន្ន។ រូប​គេ​នឹង​ក្លាយ​ជា​​ដៃ​គូ​ដ៏​មាន​សក្តានុពល​ជា​មួយ Lamine Yamal, Pedri និង Pau Cubarsi ជាដើម។ ថ្នាក់ដឹកនាំរបស់ Barcelona នឹងជម្រុញលើការផ្ទេរនេះនៅឆ្នាំ ២០២៦ ប្រសិនបើមានភាពអំណោយផល លើ កត្តាហិរញ្ញវត្ថុ។

សូមបញ្ជាក់ថា Alvarez ដែលជាម្ចាស់ជើងឯក World Cup ២០២២ ជាមួយអាហ្សង់ទីន គឺនៅសល់កិច្ចសន្យារយៈពេល ៥ ឆ្នាំទៀតជាមួយ At Madrid ពោល គឺដល់ខែ មិថុនា ឆ្នាំ ២០៣០៕

ប្រែសម្រួល៖ សេម កុសល
ប្រភព៖ beIN SPORTS

The post Barcelona ដាក់ផែនការយកខ្សែប្រយុទ្ធ​សញ្ជាតិ អាហ្សង់ទីន​ម្នាក់មក​ជំនួស Lewandowski appeared first on Kampuchea Thmey Daily.

ក្រោយការសម្រេចផ្លាស់ទៅកាន់ទឹកដីអេស្ប៉ាញ ខ្សែប្រយុទ្ធ Julian Alvarez ក្លាយជាកីឡាករទី៥ ក្នុងប្រវត្តិសាស្រ្ដ​របស់​លីគ​កំពូល​អង់គ្លេស​ Premier League ដែលមានតម្លៃផ្ទេរចេញខ្ពស់បំផុត ជាមួយទឹកប្រាក់ចំនួន៨២លានផោន។ រូបគេក៏ជាកីឡាករទី១ ក្នុងប្រវត្តិសាស្រ្ដក្លិបមេឃខៀវ Manchester City ដែលមានតម្លៃផ្ទេរចេញខ្ពស់គេជាងគិតត្រឹមឆ្នាំ២០២៤។

កំណត់ត្រាផ្ទេរកីឡាករចេញថ្លៃបំផុតរបស់​ Premier League ទី១បានទៅលើកីឡាករ Philippe Coutinho នៅរូបគេផ្លាស់ទៅកាន់ក្រុម FC Barcelona ក្នុងតម្លៃ១៤៦លានផោន។ ទី២ កីឡាករ​ Eden Hazard ផ្លាស់ទៅក្លិប Real Madrid ក្នុងតម្លៃ១៣០លានផោន។ ទី៣ កីឡាករ​ Harry Kane ផ្លាស់ទៅក្លិប Bayern Munich ​ក្នុង​តម្លៃ១០០លានផោន និង​កីឡាករទី៤ Gareth Bale ផ្លាស់ទៅ​ Real Madrid ក្នុងតម្លៃ៨៥.៣លានផោន។ កីឡាករទី៥បានទៅលើខ្សែប្រយុទ្ធ Julian Alvarez ដែលបានទម្លាក់កីឡាករ Cristiano Ronaldo ទៅលេខរៀងទី៦វិញ។

Alvarez បានបង្ហាញខ្លួន១០៣ប្រកួត​ឲ្យ​​ Man City ចាប់តាំងពីបានមកដល់កីឡដ្ឋាន Etihad កាលពី២ឆ្នាំមុនដោយស៊ុតបញ្ចូលទីបាន៣៦គ្រាប់។ កីឡាករជម្រើសជាតិអាហ្សង់ទីនរូប​នេះ​បានឈ្នះពានរង្វាន់ Premier League​ ២​លើក, FA Cup ១លើក, Champions League ១លើក, Super Cup ១លើក និង Club World Cup ១លើក ជា​មួយ Man City៕

ប្រែសម្រួល៖ ផា រតនា

The post Alvarez ជាកីឡាករទី៥ មានតម្លៃផ្ទេរចេញខ្ពស់បំផុតនៅ Premier League appeared first on Kampuchea Thmey Daily.

កីឡាករ Julian Alvarez បាននិយាយថា ៖«វាអាស្រ័យលើគាត់ ប៉ុន្តែខ្ញុំចង់​គាត់​បន្តលេង​យូរ​ទៀត។ គាត់​​នៅ​តែ​​អាចធ្វើបានល្អ។ សូម្បី​មិត្តរួម​ក្រុម​ជម្រើសជាតិ​ទាំង​អស់​​សុទ្ធ​​តែ​សប្បាយចិត្ត និងរីករាយចង់ឃើញ Messi បន្តលេងក្រុមជម្រើសជាតិ»។

Alvarez ​ដែល​បាន​ធំដឹង​ក្តី​ជាអ្នកគាំទ្ររបស់កីឡាករ Messi កាល World Cup ឆ្នាំ២០២២ មាន​ឱកាស​លេង​ជា​មួយ​គ្នា​ក្នុង​ក្រុមជម្រើសជាតិ​អាហ្សង់ទីន។

កីឡាករ Alvarez បានបន្ថែមថា ៖«ពេលខ្ញុំធំឡើង គាត់គឺជានិមិត្តរូបរបស់ខ្ញុំ។ ខ្ញុំចាំបានថា នៅពេលហ្វឹកហាត់ជាមួយក្រុមធំ ខ្ញុំបានសុំរូបថតគាត់មួយសន្លឹក។ បន្ទាប់មក ខ្ញុំ​បាន​ចូលលេងក្នុងក្រុមឈុតធំ​ជា​មួយ​គាត់។ ខ្ញុំ​បាន​បង្កើតភាពរីករាយរាល់ពេលលេងជាមួយគាត់។ ខ្ញុំមានមោទនភាពណាស់ចំពោះអ្វីគ្រប់យ៉ាងដែលយើងសម្រេចបានជាមួយជម្រើសជាតិ»។

កីឡាករ Messi គឺជាអ្នកស៊ុតបញ្ចូលទីច្រើនជាងគេក្នុងក្រុមជម្រើសជាតិអាហ្សង់ទីន ដោយរកបាន១០៦គ្រាប់ ខណៈ​ Gabriel Batistuta រក​ចំនួន៥០គ្រាប់។ Alvarez បានឈ្នះពានរង្វាន់ធំៗចំនួន៦នៅចន្លោះខែធ្នូ ឆ្នាំ២០២២ ដល់​ខែធ្នូ ឆ្នាំ២០២៣ ទាំងការឈ្នះពានជាមួយក្រុម Man City និងក្រុមជម្រើសជាតិអាហ្សង់ទីន៕

ប្រែសម្រួល៖ ផា រតនា
ប្រភព៖ Goal

The post Alvarez ចង់ឲ្យ Messi បន្តលេងឲ្យអាហ្សង់ទីនយូរទៀត appeared first on Kampuchea Thmey Daily.

កាលពី ១១ឆ្នាំមុន នៅឯការប្រកួតបាល់ទាត់ក្នុងស្រុកមួយ នៅពេលអ្នកសារព័ត៌មានបានសួរក្មេងប្រុសម្នាក់នូវគោលបំណងទៅថ្ងៃអនាគត គេបានឆ្លើយថា សុបិនរបស់គេគឺចង់លេងនៅក្នុងព្រឹត្តិការណ៍ World Cup ហើយកីឡាករបាល់ទាត់ដែលក្មេងប្រុសរូបនេះគោរពស្រឡាញ់ជាងគេគឺ Lionel Messi ។ លុះជាង ១០ឆ្នាំក្រោយ ក្មេងប្រុសម្នាក់នេះមិនត្រឹមតែក្លាយជាកីឡាករនៅក្នុងការប្រកួតបាត់ទាត់ពិភពលោក World Cup 2022 ប៉ុណ្ណោះទេ គេថែមទាំងបានក្លាយជាមិត្តរួមក្រុមរបស់ Lionel Messi ដែលជួយឱ្យអាហ្សង់ទីនឡើងដល់វគ្គផ្តាច់ព្រ័ត្រទៀតផង។

ខាងក្រោមជារឿងរ៉ាវគួរឱ្យចាប់អារម្មណ៍របស់កីឡាករអាហ្សង់ទីន Julian Alvarez!

កាលពីយប់មិញ ក្នុងវគ្គពាក់កណ្តាលផ្តាច់ព្រ័តទល់នឹងក្រូអាត អាហ្សង់ទីនបានយកឈ្នះដោយពិន្ទុ ៣-០ ឈ្នះទៅវគ្គផ្តាច់ព្រ័ត្រនៃព្រឹត្តិការណ៍ World Cup 2022។ ក្នុងនោះការសហការគ្នាដ៏ល្អរវាងតារាបាល់ទាត់ Lionel Messi ជាមួយកីឡាករវ័យក្មេង Julian Alvarez ត្រូវបានគេហៅថា ជាការរួមបញ្ចូលគ្នានៃ “វីរបុរស” ពីររូប។ ជាពិសេស ទំនាក់ទំនងរវាង Messi និង Julian មិនត្រឹមតែជាមិត្តរួមក្រុមប៉ុណ្ណោះទេ ថែមទាំងរវាងអ្នកគាំទ្រ និង Idol ទៀតផង។

ក្នុងនាមជាវីរបុរសបាល់ទាត់ឈានមុខគេរបស់ពិភពលោក នរណាក៏ដឹងដែរថា Messi បានក្លាយជាអាយដលដ៏អស្ចារ្យសម្រាប់កីឡាករបាល់ទាត់ជាច្រើននាក់ សឹងនៅគ្រប់ទីកន្លែងទូទាំងពិភពលោក ហើយក្នុងនោះក៏មាន Julian ម្នាក់ផងដែរ។

កីឡាករ Julian Alvarez កើតនៅឆ្នាំ២០០០ រស់នៅក្នុងប្រទេសអាហ្សង់ទីន។ តាំងពីកុមារភាពមក គេជាមនុស្សស្រឡាញ់វិស័យកីឡាបាល់ទាត់ខ្លាំងបំផុត ហើយបានចាត់ទុក Messi ជា Idol របស់គេតាំងពីតូចៗមកម្ល៉េះ។ នៅអាយុ ១២ ឆ្នាំ Julian មានឱកាសបានជួប និងថតរូបជាមួយ Messi ។ ក្នុង​បទ​សម្ភាសន៍​មួយ Julian បាន​និយាយ​ថា ​ក្តី​សុបិន​ដ៏​ធំ​បំផុត​របស់​គេ​គឺ​ការ​ចូល​រួម​ប្រកួត​នៅ World Cup។

បន្ទាប់ពីលេងជាច្រើនឆ្នាំនៅលីគយុវជន ក្នុងឆ្នាំ ២០១៨ Julian បានលេងជាផ្លូវការក្នុងលីគអាជីពក្នុងនាមជាសមាជិកក្លឹប River Plate ។ បន្ទាប់មកគេបានចូលរួមជាមួយក្រុម Manchester City ។ ក្នុងរយៈពេល ១០ ឆ្នាំនៃការប្រឡូកក្នុងវិស័យបាល់ទាត់ Julian Alvarez បានទាក់ទាញចំណាប់អារម្មណ៍របស់អ្នកជំនាញជាមួយនឹងការលេងប្រកបដោយភាពច្នៃប្រឌិត និងបត់បែនរបស់គេ។ លុះមកដល់ឆ្នាំ ២០២២ ក្តីស្រមៃក្នុងវ័យកុមារភាពរបស់ Julian បានក្លាយជាការពិត នៅពេលដែលគេបានក្លាយជាសមាជិកនៃក្រុមអាហ្សង់ទីន ហើយក្លាយជាមិត្តរួមក្រុមជាផ្លូវការជាមួយ Messi ។

នៅក្នុងព្រឹត្តិការណ៍ World Cup 2022 អ្នកគាំទ្របាល់ទាត់ពេញចិត្តនឹងសមត្ថភាពនៃការបញ្ជូនបាល់យ៉ាងរហ័សរបស់ខ្សែប្រយុទ្ធវ័យ ២២ឆ្នាំរូបនេះខ្លាំងបំផុត។ សូម្បីតែគ្រូបង្វឹកអាហ្សង់ទីន Lionel Scaloni បានទុកឱកាស Julian លេងជាខ្សែប្រយុទ្ធដ៏សំខាន់ទៀតផង។ បន្ទាប់ពីជ័យជម្នះ ៣-០ លើក្រូអាតក្នុងវគ្គពាក់កណ្តាលផ្តាច់ព្រ័ត្រ អ្នកជំនាញបាននិយាយថា កីឡាករអាហ្សង់ទីន លេខ ៩ និង លេខ ១០ គឺជាកីឡាករប្រកួតដ៏ល្អឥតខ្ចោះនៅក្នុងព្រឹត្តិការណ៍ World Cup 2022 ។ បច្ចុប្បន្ន ទាំង Messi និង Julian ត្រូវបានប្រជាជនអាហ្សង់ទីនកោតសរសើរ និងចាត់ទុកជាវីរបុរសគ្រប់គ្នា សូម្បីអ្នកគាំទ្រក្រុមអាហ្សង់ទីនផ្សេងទៀតនៅលើពិភពលោក ក៏ស្ញើចសរសើរសមត្ថភាពកីឡាករទាំងពីររូបនេះយ៉ាងពេញទំហឹងផងដែរ៕

ប្រែសម្រួល៖ សន្យា

ចុចអាន៖ Messi បង្កើតកំណត់ត្រាអស្ចារ្យយ៉ាងច្រើន ត្រឹមមួយប្រកួតជាមួយក្រូអាត

The post រឿងរ៉ាវខ្លះៗរបស់វីរបុរស Julian Alvarez ដែលទើបជួយអាហ្សង់ទីន យកឈ្នះលើក្រូអាត appeared first on Kampuchea Thmey Daily.